ᒫᑎᐅᓯᐅᑉ ᐊᒡᓚᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦᔩᓱᓯᐅᑉ ᐋᖅᑭᒃᓯᓂᖓ ᐊᖑᒻᒥᒃ ᒫᑯᓯ 1:40-45 ; ᓘᑲᓯ 5:12-16 1 ᔩᓱᓯ ᖃᖅᑲᒥᑦ ᐊᒻᒧᐊᖕᒪᑦ, ᐃᓄᒋᐊᒃᑐᕐᔪᐊᑦ ᒪᓕᒡᐹᑦ. 2 ᑕᑯᒋᑦ ᐊᖑᒻᒧᑦ ᐅᐸᒃᑕᐅᕗᖅ, ᓯᕘᕋᒋᔭᐅᔪᒥᒃ ᐸᕐᑎᕐᑐᒧᑦ, ᑖᓐᓇ ᓵᖓᓄᑦ ᓰᖅᑯᕐᓗᓂ, ᐅᖃᕐᐳᖅ, “ᐊᑕᓃᖅ, ᐱᔪᒪᒍᕕᑦ, ᐸᕐᑎᕈᓐᓃᕐᑎᑦᒍᓐᓇᕐᐸᕐᒪ.” 3 ᔩᓱᓯᐅᑉ ᐃᓴᒃᓗᓂ ᐊᒃᑐᕐᐹ, ᐅᖃᐅᑎᓪᓗᒍ, “ᐱᔪᒪᕗᖓ, ᐸᕐᑎᕈᓐᓃᕆᑦ!” ᑕᕝᕔᓐᓇᖅ ᐊᖑᑦ ᑖᓐᓇ ᐸᕐᑎᕈᓐᓃᕐᐳᖅ. 4 ᑕᕝᕙ ᔩᓱᓯᐅᑉ ᐅᖃᐅᑎᕚ, “ᐃᒃᐱᒍᓱᑦᓯᐊᕆᑦ! ᓇᓪᓕᐊᓐᓄᑐᐃᓐᓇᖅ ᐅᓂᒃᑳᕐᑍᓕᒋᑦ; ᑐᓂᕐᕈᓯᕐᑎᑦᓯᔨᒧᓪᓕ ᐂᓕᕆᑦ ᖃᐅᔨᓴᕐᑕᐅᓂᐊᕋᕕᑦ; ᐃᓄᖕᓄᑦ ᖃᐅᔨᔭᐅᑦᓯᐊᖁᓪᓗᑎᑦ ᐋᖅᑭᒃᑕᐅᓂᕐᓂᒃ, ᒨᓯᓯᐅᑉ ᑐᓂᓯᖁᔨᓂᖓ ᒪᓕᒡᓗᒍ ᑐᓂᕐᕈᓯᕆᐊᕐᑐᓕᕆᑦ.” ᐅᓇᑕᕐᑐᒃᓮᑦ ᐊᖓᔪᖅᑳᑦᑕ ᐅᒃᐱᕐᓂᖓ ᓘᑲᓯ 7:1-10 5 ᔩᓱᓯ ᑲᐲᕐᓂᐊᒧᑦ ᑎᑭᓕᕐᑎᓪᓗᒍ, ᕉᒪᒥᐅᑦ ᐅᓇᑕᕐᑐᒃᓴᖁᑎᖏᓐᓄᑦ 100ᓄᑦ ᐊᖓᔪᖅᑳᖑᔫᑉ ᔩᓱᓯᒧᐊᕐᐳᖅ, ᕿᓄᕕᒋᓪᓗᒍ ᐅᖃᕐᐳᖅ: 6 “ᐊᑕᓃᖅ, ᐱᔨᒐ ᖃᓂᒪᓪᓗᓂ ᓇᓚᖕᒪᑦ ᐊᖏᕐᕋᓐᓂ, ᐊᐅᓚᑦᔭᒍᓐᓇᖏᒻᒪᓪᓘᓐᓃᑦ ᐊᒃᓱᒻᒪᕆᐊᓗᒃ ᐃᓗᖏᕐᓱᐊᓪᓗᓂ.” 7 ᔩᓱᓯᐅᑉ ᐅᖃᐅᑎᕚ, “ᐂᓂᐊᕐᐳᖓ ᐋᖅᑭᒋᐊᕐᑐᕐᓗᒍ.” 8 ᐅᓇᑕᕐᑐᒃᓮᓪᓕ ᐊᖓᔪᖅᑳᖓᑦᑕ ᑭᐅᕚ, “ᐊᑕᓃᖅ ᐃᒡᓗᓐᓄᑦ ᐃᑎᕐᑎᑦᓯᔭᕆᐊᒃᓴᖅ ᓇᓗᖅᑯᑎᕗᖓ; ᐅᖃᑐᐃᓐᓇᓕᕆᑦ ᐋᖅᑭᖁᔨᓗᑎᑦ, ᐱᔨᒐ ᑕᕝᕙ ᐋᖅᑭᒃᑕᐅᓂᐊᕐᐳᖅ. 9 ᐅᕙᖓᑦᑕᐅᖅ ᐊᖓᔪᖅᑳᖃᕐᒥᒐᒪ, ᐅᓇᑕᕐᑐᒃᓴᖁᑎᖃᕐᓗᖓ ᓯᐊᓛᕆᔭᓐᓂᒃ, ᐃᓚᖓᓐᓄᑦ ᐅᖃᕈᒪ, ᐃᑯᓐᖓᕆᑦ! ᑍᑯᓐᖓᕐᐳᖅ ᑕᕝᕙ; ᐊᓯᐊᓄᑦ ᐅᖃᕈᒪ, ᕾᒋᑦ! ᕾᕗᖅ ᑕᕝᕙ; ᐱᔨᓐᓄᑦ ᐅᖃᕈᒪ, ᐅᓇ ᓴᓇᓚᐅᕈᒃ! ᓴᓇᕚ ᑕᕝᕙ.” 10 ᔩᓱᓯᐅᑉ ᑕᒪᓐᓇ ᑐᓴᕋᒥᐅᒃ ᑲᒪᓂᐊᕆᕚ, ᒪᓕᒡᑎᓂ ᐅᖃᐅᑎᕔᑦ, “ᓱᓕᔪᒥᒃ ᐅᖃᐅᑎᕙᑦᓯ, ᑍᒫᒃ ᐅᒃᐱᕐᓂᖃᕐᑎᒋᔪᒥᒃ, ᖃᐅᔨᓚᐅᓐᖏᓚᖓ ᐃᓴᕆᐊᓕᒥ. 11 ᖁᓚᕐᓇᖏᑦᑐᒥᒃ ᐅᖃᐅᑎᕙᑦᓯ ᐃᓄᐃᑦ ᐊᒥᓱᑦ ᑎᑭᑦᓱᒫᕐᐳᑦ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓂᓪᓗ, ᐃᒃᓯᕙᖃᑎᖃᕆᐊᕐᑐᕐᓗᑎᒃ ᐂᑉᕋᕼᐋᒻᒥᒃ, ᐂᓴᑭᒥᒃ, ᔧᑯᒥᒡᓗ, ᒎᑎᐅᑉ ᐊᑕᓂᐅᕕᖓᓂ ᕿᓚᖕᒥ. 12 ᑖᒃᑯᐊ ᑕᕝᕗᓐᖓᕐᑐᒃᓴᐅᓚᐅᕐᑑᒐᓗᐊᑦ ᒎᑎᐅᑉ ᐊᑕᓂᐅᕕᖓᓄᑦ, ᐃᒋᑕᐅᔪᒫᕐᐳᑦ ᑖᕐᑐᕐᔪᐊᕐᒧᑦ, ᑕᕝᕙᓂ ᕿᐊᓂᖃᕈᒫᕐᐳᑦ ᐋᓐᓂᐊᓂᕐᒧᓪᓗ ᐊᒡᓕᕈᓛᓗᑎᒃ.” 13 ᔩᓱᓯᓕ ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓄᑦ ᐅᖃᕐᐳᖅ, “ᐊᖏᕐᕋᓕᕆᑦ; ᑕᒪᑐᒥᖓ ᐅᒃᐱᕆᔭᕐᓂᒃ ᑐᓂᓯᕕᐅᓂᐊᕐᐳᑎᑦ.” ᐅᓇᑕᕐᑐᒃᓮᓪᓗ ᐊᖓᔪᖅᑳᖓᑦᑕ ᐱᔨᖓ ᑕᕝᕔᓐᓇᖅ ᐋᖅᑭᒃᑕᐅᕗᖅ ᐃᑲᕐᕋᒥ ᑕᕝᕙᓂ. ᔩᓱᓯᐅᑉ ᐃᓄᖕᓂᒃ ᐊᒥᓱᓂᒃ ᐋᖅᑭᒃᓯᓂᖓ ᒫᑯᓯ 1:29-34 ; ᓘᑲᓯ 4:38-41 14 ᔩᓱᓯᓕ ᐲᑦᑐᕉᓯᐅᑉ ᐃᒡᓗᖓᓄᐊᕋᒥ, ᑕᕝᕙᓂ ᑕᑯᕗᖅ ᐲᑦᑐᕉᓯᐅᑉ ᓴᑭᖓᓂᒃ ᐊᕐᓇᒥᒃ, ᖃᓂᒻᒪᓪᓗᓂ ᓇᓚᔪᒥᒃ ᐆᑎᕐᓇᕐᑐᒥᒃ ᖃᓂᒻᒪᓯᖃᕐᓗᓂ. 15 ᔩᓱᓯᐅᑉ ᐊᕐᓇᖅ ᐊᒡᒐᖏᑎᒍᑦ ᐊᒃᑐᕐᒪᒍ; ᖃᓂᒻᒪᓯᐅᑉ ᐆᑎᕐᓇᕐᑑᑉ ᕿᒪᒃᐹ, ᐊᕐᓇᖅ ᒪᑭᑉᐳᖅ, ᔩᓱᓯ ᐱᔨᑦᓯᕋᓕᕐᐹ ᓂᕆᓂᐊᕐᑕᖏᓐᓂᒃ. 16 ᐅᓐᓄᖕᒪᑦ, ᐃᓄᐃᑦ ᔩᓱᓯᒧᐊᕈᑦᔨᕗᑦ ᐊᓂᕐᓂᕐᓗᖕᓄᑦ ᐃᓗᒻᒥᕐᑕᐅᓯᒪᔪᓂᒃ ᐊᒥᓱᓂᒃ; ᔩᓱᓯᐅᑉ ᐊᓂᕐᓂᕐᓗᐃᑦ ᐃᓄᖕᓂᑦ ᐊᓂᑎᑉᐰᑦ ᐅᖃᐅᓯᕐᒧᑦ, ᖃᓂᒪᔪᓪᓗ ᑕᒪᕐᒥᒃ ᐋᖅᑭᒃᐰᑦ. 17 ᑕᒪᓐᓇ ᔩᓱᓯᐅᑉ ᐱᓂᐊᕐᓂᕆᓚᐅᕐᐹ, ᓇᓚᐅᑦᑍᔫᑉ ᐂᓮᐊᓯᐅᑉ ᐅᖃᐅᓯᕆᓚᐅᕐᑕᖏᑦ ᓇᓚᐅᑦᓯᓕᖁᓪᓗᒋᑦ ᐃᒤᓕᔪᑦ: “ᑖᑦᓱᒪ ᖃᓂᒻᒪᓯᕗᑦ ᑎᒍᕔᑦ, ᐋᓐᓂᐊᕈᑎᒋᔭᕗᓪᓗ ᐊᐅᓪᓚᕈᑎᓪᓗᒋᑦ.” ᔩᓱᓯᒧ ᒪᓕᒃᑎᐅᔪᒪᔪᑦ ᓘᑲᓯ 9:57-62 18 ᔩᓱᓯ ᐃᓄᒐᓴᒡᔪᐊᓂᒃ ᐊᕙᑎᒥᓃᑦᑐᓂᒃ ᖃᐅᔨᒪᒐᒥ, ᐃᓕᓐᓂᐊᕐᑎᓂ ᑕᓯᐅᑉ ᐊᑭᐊᓄᐊᖁᕔᑦ. 19 ᐱᖁᔭᓂᒃ ᐃᓕᓮᔨᐅᑉ ᔩᓱᓯ ᐅᐸᒃᐹ, ᐅᖃᐅᑎᓪᓗᒍ, “ᐊᔪᕆᕐᑐᐃᔩ, ᒪᓕᖕᓂᐊᕐᐸᒋᑦ ᓇᒧᑐᐃᓐᓇᖅ ᐂᒐᓗᐊᕈᕕᑦ.” 20 ᔩᓱᓯᐅᑉ ᑭᐅᕚ, “ᑎᕆᒐᓂᐊᑦ ᓯᑎᖃᕐᐳᑦ, ᑎᖕᒥᐊᓪᓗ ᐅᓪᓗᖃᕐᐳᑦ, ᐃᓅᓪᓕ ᐃᕐᓂᖓ ᓇᓪᓚᖓᕕᒃᓴᖃᓐᖏᓚᕐᓘᓐᓃᑦ ᑕᕾᕐᓯᕐᕕᒃᓴᒥᒃ.” 21 ᑖᑦᓱᒪ ᐊᓯᐊᑕ ᐃᓕᓐᓂᐊᕐᑎᐅᑉ ᔩᓱᓯ ᐅᖃᐅᑎᕚ, “ᐊᑕᓃᖅ, ᐊᑖᑕᒐ ᐃᓗᕕᕆᐊᕐᑐᑲᓚᐅᕐᓚᒍ.” 22 ᔩᓱᓯᐅᑉ ᑭᐅᕚ, “ᒪᓕᓐᖓ, ᑐᖁᖓᔪᑦ ᑐᖁᔨᐊᒥᖕᓂᒃ ᓇᖕᒥᓂᖅ ᐃᓗᕕᕐᓯᓚᐅᕐᓕᑦ.” ᔩᓱᓯᐅᑉ ᐊᓄᕆᒥᒃ ᐃᑯᓪᓚᕐᑎᑦᓯᓂᖓ ᒫᑯᓯ 4:35-41 ; ᓘᑲᓯ 8:22-25 23 ᔩᓱᓯ ᐅᒥᐊᒧᑦ ᐃᑭᖕᒪᑦ, ᐃᓕᓐᓂᐊᕐᑎᖏᑕ ᒪᓕᒃᐹᑦ. 24 ᑕᑯᒋᓪᓗ, ᑕᕝᕔᓐᓇᖅ ᐊᓄᕆᕐᔪᐊᒧᑦ ᑎᑭᑕᐅᕗᑦ, ᐅᒥᐊᖅ ᒪᓕᖕᓄᑦ ᖃᓪᓕᕋᕐᑕᕐᑕᐅᓂᕐᒧᑦ ᐃᒻᒪᓕᕐᐳᖅ; ᔩᓱᓯᓕ ᓯᓂᒃᐳᖅ. 25 ᐃᓕᓐᓂᐊᕐᑎᖏᑕ ᐅᐸᒃᑲᒥᑦᔪᒃ ᑐᐹᕐᓗᒍ, ᐅᖃᐅᑎᕚᑦ: “ᐊᑕᓃᖅ! ᓴᐳᑎᓚᐅᕐᑎᒍᑦ, ᑐᖁᓕᒑᓕᕋᑦᑕ!” 26 ᔩᓱᓯᐅᑉ ᑭᐅᕔᑦ, “ᓱᖕᒪᑦ ᑲᑉᐱᐊᓱᒃᑐᐊᓘᕕᓯ? ᐅᒃᐱᕐᓂᑭᓗᐊᕋᑦᓯ!” ᒪᑭᓪᖢᓂ ᐊᓄᕆ ᐃᒪᕐᓗ ᐃᓂᕐᑎᕐᐹᒃ, ᐊᓄᕌᕈᓐᓃᕐᐳᖅ ᐃᑯᓪᓚᑦᓯᐊᕐᓗᓂ. 27 ᑖᒃᑯᐊ ᑲᒪᓂᐊᒻᒪᕆᒃᐳᑦ, ᐅᖃᕐᓗᑎᒃ, “ᐅᓈ ᖃᓄᐃᑦᑑᒐᒥ ᐊᒡᓛᑦ ᐊᓄᕆᐅᑉ ᐃᒪᐅᓪᓗ ᓈᓚᒃᑕᖓᑦ?” ᔩᓱᓯᐅᑉ ᐊᖑᑏᖕᓂᒃ ᒪᕐᕉᖕᓂᒃ ᐊᓂᕐᓂᕐᓗᖕᓄᑦ ᐃᑎᕐᑕᐅᓯᒪᔫᖕᓂᒃ ᐋᖅᑭᒃᓯᓂᖓ ᒫᑯᓯ 5:1-20 ; ᓘᑲᓯ 8:26-39 28 ᔩᓱᓯ ᑕᓯᐅᑉ ᐊᑭᐊᓄᑦ ᑎᑭᒻᒪᑦ ᓄᓇᐅᑉ ᒑᑕᕋᒥᐅᑦ ᓄᓇᖓᑕ ᐃᓚᖓᓃᑦᑐᒧᑦ, ᐊᖑᑏᖕᓄᑦ ᒪᕐᕉᖕᓄᑦ ᐅᐸᒃᑕᐅᕗᖅ, ᐃᓗᕖᑦ ᕾᕈᓱᖏᓐᓂᑦ ᐱᔫᖕᓄᑦ, ᐊᓂᕐᓂᕐᓗᖕᒧᑦ ᐃᑎᕐᑕᐅᓯᒪᔫᖕᓄᑦ, ᑲᑉᐱᐊᓇᒻᒪᕆᓕᕐᒪᑎᒃ ᐃᓄᖕᓄᑦ ᑕᒪᓐᓇ ᓄᓇ ᓇᔪᕐᑕᖓᒃ ᐅᐸᒃᑕᐅᔪᒪᔪᓐᓃᓚᐅᕐᐳᖅ. 29 ᑖᒃᑯᐊᒃ ᓂᓪᓕᐊᓕᕐᐴᒃ ᕾᒐᓛᕐᓗᑎᒃ, “ᐅᕙᑦᑎᖕᓄᑦ ᖃᓄᐃᓕᐅᕆᐊᕐᑐᕐᐲᑦ ᒎᑎᐅᑉ ᐃᕐᓂᖓ? ᐋᓐᓂᐊᑎᑦᓯᔭᕐᑐᕐᐲᑦ ᓱᓕ ᐱᕕᒃᓴᖅ ᓇᓪᓕᐅᑎᓚᐅᕐᑎᓐᓇᒍ?” 30 ᑕᒫᓂ ᖃᓂᒋᔮᓂ ᓄᓇᒥ ᑰᒃᑰᓯᒐᓴᒡᔪᐊᕐᑕᖃᕐᐳᖅ ᓂᕆᓇᓱᒃᑐᓂᒃ. 31 ᐊᓂᕐᓂᕐᓗᐃᑦ ᔩᓱᓯᒧᑦ ᕿᓄᕗᑦ, “ᐅᕙᑦᑎᓐᓂᒃ ᐊᓂᑎᑦᓯᓂᐊᕈᕕᑦ, ᑰᒃᑰᓯᒐᓴᒡᔪᐊᓄᑦ ᐃᑎᖁᓂᐊᕐᐸᑦᑎᒍᑦ.” 32 ᔩᓱᓯᐅᑉ ᐅᖃᐅᑎᕔᑦ, “ᐊᓂᓕᕆᑦᓯ,” ᐃᓅᖕᓂᓪᓗ ᑖᒃᑯᖕᓇᖓᑦ ᐊᓂᕗᑦ ᑰᒃᑰᓯᓄᑦ ᐃᑎᕐᓗᑎᒃ; ᑰᒃᑰᓯᒐᓴᒡᔪᐊᓪᓗ ᐅᐃᒻᒪᒡᓗᑎᒃ ᐸᖓᓕᒃᓯᕗᑦ ᐃᓐᓈᕈᕐᒧᑦ, ᐃᔪᒃᑲᕋᒥᒃ ᑕᓯᕐᒧᑦ ᐃᐱᕗᑦ. 33 ᐊᖑᑏᑦ ᑰᒃᑰᓯᓂᒃ ᐰᕐᓯᔩᑦ ᕿᒪᒃᓯᕗᑦ ᓄᓇᓕᖕᓄᐊᕐᓗᑎᒃ, ᑕᒪᑐᒥᖓᓗ ᐱᓂᐊᕐᓂᐅᕋᑖᕐᑐᒥᒃ ᐅᓂᒃᑲᐅᓯᖃᕐᐳᑦ, ᑖᒃᑯᐊᒃ ᐊᖑᑏᒃ ᐊᓂᕐᓂᕐᓗᖕᓄᑦ ᐃᑎᕐᑕᐅᓯᒪᓚᐅᑑᒃ ᓱᓚᐅᕐᒪᖔᑎᒃ ᐅᖃᐅᓯᕆᕔᑦ. 34 ᑕᑯᒋᑦ, ᓄᓇᓕᖕᓂᑦ ᐃᓄᓕᒫᑦ ᔩᓱᓯᒧᑦ ᐅᐸᒍᑎᕗᑦ; ᑕᑯᒐᒥᑦᔪᒃ, ᕿᓄᕕᒋᕚᑦ ᓄᓇᒥᖕᓂᑦ ᐊᐅᓪᓚᖁᓪᓗᒍ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society