ᒫᑎᐅᓯᐅᑉ ᐊᒡᓚᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᓯᑦᓯᓐᓂᒃ ᐃᖅᑲᕐᑐᐃᓂᐊᕋᓯ

¹ “ᐊᓯᑦᓯᓐᓂᒃ ᐃᖅᑲᕐᑐᐃᓂᐊᕋᓯ, ᐃᖅᑲᕐᑐᕐᑕᐅᖁᓇᓯ.

² ᐃᖅᑲᕐᑐᐃᓂᓯ ᒪᓕᒡᓗᒍ ᑍᒫᓪᓗᐊᖅ ᐃᖅᑲᕐᑐᕐᑕᐅᔪᒫᕆᕗᓯ, ᐱᓇᓱᐊᕐᓂᓯ ᒪᓕᒡᓗᒍ ᑍᒫᓪᓗᐊᖅ ᐱᓇᓱᐊᕐᕕᐅᔪᒫᕆᕗᓯ.

³ ᓱᖕᒪᑦ ᐃᓅᖃᑎᕕᑦ ᐃᑦᔨᓯᒪᐅᑎᖓ ᒥᑭᔪᑯᓗᒃ ᑕᑯᕕᐅᒃ? ᐅᕝᕙ ᓇᖕᒥᓂᖅ ᐃᔨᖕᓃᑦᑐᖅ ᓇᐹᕐᑐᕕᓂᐊᓗᒃ ᐃᒃᐱᒋᓇᒍ?

⁴ ᐅᕝᕙᓗ ᖃᓄᖅ ᐃᓅᖃᑎᖕᓄᑦ ᐅᖃᕈᓐᓇᕐᐱᑦ ‘ᐃᑦᔨᓯᒪᐅᑏᓄᓇ ᒥᑭᑦᔪᑯᓗᒃ ᐲᓚᐅᕐᓚᒍ,’ ᐅᕝᕙ ᓇᖕᒥᓂᖅ ᓇᐹᕐᑐᕕᓂᐊᓗᖕᒥᒃ ᐃᔨᖕᓃᑦᑐᖃᕐᑎᓪᓗᒍ?

⁵ ᑕᒃᑯᕐᒨᕐᑐᑎᑦ! ᐃᔨᖕᓃᑦᑐᖅ ᓇᐹᕐᑐᕕᓂᐊᓗᒃ ᐲᖅᑳᓚᐅᕈᒃ, ᑕᕝᕙ ᑕᑯᑦᓯᐊᕈᓐᓇᕐᓯᓂᐊᕐᐳᑎᑦ ᐃᓅᖃᑎᕕᑦ ᐃᑦᔨᓯᒪᐅᑎᖓᓂᒃ ᐲᕐᓯᓇᓱᐊᓕᕈᕕᑦ ᒥᑭᔪᑯᓗᖕᒥᒃ.

⁶ “ᐃᑦᔪᕐᓁᑦᑐᒥᒃ ᑐᓂᓯᓂᐊᕋᓯ ᕿᒻᒥᓄᑦ; ᓴᐸᖓᖁᑎᓯᓗ ᐊᑭᑐᔪᑦ ᐃᒋᓐᓂᐊᕐᓇᒋᑦ ᑰᒃᑰᓰᑦ ᓯᕗᓂᖓᓐᓄᑦ, ᑖᒃᑯᓇᓐᖓᑦ ᑐᓪᓕᕋᕐᑕᐅᑐᐃᓐᓇᕋᔭᕐᒪᑕ ᐃᓕᖕᓄᓪᓗ ᓵᓪᓗᑎᒃ ᐹᔭᐅᑐᐃᓐᓇᕆᐊᖃᕋᕕᑦ.”

ᑐᒃᓯᐊᕐᓂᖅ, ᕿᓂᕐᓂᖅ, ᑎᒡᓗᒃᑐᕐᓂᖅ

⁷ “ᑐᒃᓯᐊᕆᑦᓯ, ᑐᓂᓯᕕᐅᒐᔭᕐᐳᓯ ᑕᕝᕙ; ᕿᓂᕆᑦᓯ, ᓇᓂᓯᒐᔭᕐᐳᓯ ᑕᕝᕙ; ᑎᒡᓗᒃᑐᕆᑦᓯ ᒪᑐᐃᕈᑦᔭᐅᒐᔭᕐᐳᓯ ᑕᕝᕙ.

⁸ ᑐᒃᓯᐊᕐᑐᑦ ᑕᒪᕐᒥᒃ ᑐᓂᓯᕕᐅᒐᔭᕐᐳᑦ; ᕿᓂᕐᑐᓪᓗ ᓇᓂᓯᒐᔭᕐᐳᑦ; ᑎᒡᓗᒃᑐᕐᑐᓪᓗ ᒪᑐᐃᕈᑦᔭᐅᒐᔭᕐᐳᑦ.

⁹ ᓇᓪᓕᐊᑦ ᐊᑖᑕᐅᔪᓯ ᐃᕐᓂᑦᓯᓐᓄᑦ ᑐᒃᓯᕋᕐᕕᐅᒍᑦᓯ ᓂᐊᖂᔭᒥᒃ, ᐅᔭᖅᑲᒥᒃ ᐂᑦᑐᕋᔭᕐᐱᓯᐅᒃ?

¹⁰ ᐅᕝᕙᓗ ᕿᑐᕐᖓᓯ ᐃᖃᓗᖕᒥᒃ ᑐᒃᓯᕋᕐᑎᓪᓗᒍ, ᖁᒡᓗᒋᐊᒥᒃ ᐂᑦᑐᕋᔭᕐᐱᓯᐅᒃ?

¹¹ ᐱᐅᖏᑦᑑᒐᓗᐊᕐᑐᓯ, ᐱᐅᔪᓂᒃ ᑐᓂᓯᔭᕆᐊᒃᓴᖅ ᕿᑐᕐᖓᑦᓯᓐᓄᑦ ᖃᐅᔨᒪᒐᑦᓯ; ᐊᑖᑕᓯᓕ ᕿᓚᖕᒦᑦᑐᖅ ᐱᐅᔪᓂᒃ ᑐᓂᓯᔭᕆᐊᒃᓴᖅ ᖃᐅᔨᒪᑦᓯᐊᕐᓂᕐᓴᐅᕗᖅ ᑐᒃᓯᐊᕐᕕᒋᔨᒥᓄᑦ.

¹² “ᑍᒤᒻᒪᑦ ᐃᓅᖃᑎᑦᓯᓐᓄᑦ ᐱᓇᓱᐊᕐᕕᐅᔪᒪᓂᑦᓯᑎᑐᑦ, ᑍᒫᓪᓗᐊᖅ ᐱᓇᓱᐊᕐᑐᒃᓴᐅᕗᓯ: ᑕᒪᓐᓇ ᑍᒤᓕᐅᕐᓂᖅ ᒨᓯᓯᐅᑉ ᐱᖁᔭᖏᑕ ᑐᑭᒋᖕᒪᒍ, ᓇᓚᐅᑦᑍᔪᓪᓗ ᐊᔪᕆᕐᑐᐃᑦᔪᑎᒋᓪᓗᓂᐅᒃ.”

ᐃᑎᕐᕕᒃ ᓂᕈᑭᑦᑐᖅ

¹³ “ᐃᑎᕐᕕᑭᑦᑐᒃᑯᑦ ᐃᑎᕆᑦᓯ, ᐃᑎᕐᕕᒃ ᓂᕈᑐᖕᒪᑦ ᑲᑉᐱᐊᓇᕐᑐᕕᖕᒧᑦ ᑐᕌᖓᔪᖅ, ᐊᖅᑯᑎᖓ ᐱᔭᕐᓂᕐᑑᓪᓗᓂ, ᐊᒥᓱᑦ ᑕᒪᓐᓇ ᐊᑐᕐᐹᑦ.

¹⁴ ᐃᑎᕐᕕᒃ ᓂᕈᑭᑦᑑᕗᖅ ᐃᓅᓯᕐᒧᑦ ᓄᖑᓱᐃᑦᑐᒧᑦ ᑐᕌᖓᔪᖅ, ᐊᖅᑯᑎᖓ ᐱᔭᕐᓂᖏᑦᑑᓪᓗᓂ, ᐅᓄᖏᑦᑐᑦ ᑕᒪᓐᓇ ᓇᓂᕚᑦ.”

ᓇᐹᕐᑐᑦ ᐱᕈᕐᑐᖏᓐᓄᑦ ᖃᐅᔨᒪᔭᐅᔪᓐᓇᕐᐳᑦ

¹⁵ “ᖃᐅᔨᓴᑦᓯᐊᕆᑦᓯ ᓇᓚᐅᑦᑍᔫᔮᕐᑐᓂᒃ ᓱᓕᖏᑦᑐᓂᒃ; ᑍᒃᑯᐊ ᓯᓚᑎᒥᒃᑎᒍᑦ ᓰᐱᐅᖅᑰᔨᓇᓱᐊᕐᓗᑎᒃ ᐃᓕᑦᓯᓐᓄᐊᕐᓂᐊᕐᒪᑕ, ᐃᓗᒥᒃᑎᒍᓪᓕ ᐹᔪᒪᔪᑎᑐᑦ ᐊᒪᕈᕐᑎᑐᑦ ᑍᒤᑉᐳᑦ.

¹⁶ ᐱᓂᐊᕐᓂᖏᑎᒍᓪᓕ ᖃᐅᔨᒪᔪᓐᓇᕐᓂᐊᕐᐸᓯ. ᐅᕐᐱᒊᑦ ᑲᑭᓐᓇᕐᑐᓖᑦ ᐸᐅᕐᖓᓂᒃ ᐱᕈᕐᕕᐅᓲᖑᓐᖏᓚᑦ, ᐅᕐᐱᒐᐅᔮᕐᑐᓪᓗ ᑲᑭᓪᓚᕐᓇᕐᑐᓖᑦ ᐊᕐᐱᐅᔮᕐᑐᓂᒃ ᐱᕈᕐᕕᐅᕙᖏᓐᓂᕗᑦ.

¹⁷ ᓇᐹᕐᑐᖅ ᐆᒻᒪᑦᓯᐊᕐᑐᖅ ᐱᐅᔪᓂᒃ ᐱᕈᕐᕕᐅᕙᒃᐳᖅ, ᓇᐹᕐᑐᕐᓕ ᐱᐅᖏᑦᑐᖅ ᐱᐅᖏᑦᑐᓂᒃ ᐱᕈᕐᕕᐅᕙᒃᐳᖅ.

¹⁸ ᓇᐹᕐᑐᖅ ᐆᒻᒪᑦᓯᐊᕐᑐᖅ ᐱᕈᕐᓂᕐᓗᒡᕕᐅᕙᓐᖏᓚᖅ, ᓇᐹᕐᑐᕐᓗ ᐱᐅᖏᑦᑐᖅ ᐱᐅᔪᓂᒃ ᐱᕈᕐᕕᐅᕙᖏᓐᓂᕗᖅ.

¹⁹ ᓇᐹᕐᑐᖅ ᓇᓪᓕᐊᑦ ᐱᐅᔪᓂᒃ ᐱᕈᕐᕕᐅᖏᑦᑐᖅ, ᓇᑲᑕᐅᓗᓂ ᐃᒋᑕᐅᓂᐊᕐᐳᖅ ᐃᑯᒪᒧᑦ.

²⁰ ᑍᒫᒃᑕᐅᖅ, ᒎᑎᒧᑦ ᓇᓚᐅᑦᑍᔪᖁᑎᒋᔭᐅᔫᔮᕐᑐᑦ ᓱᓕᖏᑦᑐᑦ, ᐱᓂᐊᕐᓂᖏᑎᒍᑦ ᖃᐅᔨᒪᓂᐊᕐᐸᓯ.”

ᖃᐅᔨᒪᓚᐅᕐᓯᒪᓐᖏᓚᑦᓯ

²¹ “ᐅᕙᓐᓂᒃ ᐊᑕᓂᖃᕐᓂᕋᕐᑐᓕᒫᑦ ᒎᑎᐅᑉ ᐊᑕᓂᐅᕕᖓᓄᑦ ᐃᑎᕐᓂᐊᓐᖏᓚᑦ, ᐊᑖᑕᒪᓕ ᕿᓚᖕᒦᑦᑑᑉ ᐱᓇᓱᐊᕐᑕᐅᖁᔭᖓᓂᒃ ᓈᓚᒃᑐᑦ ᑭᓯᒥ.

²² ᐃᖅᑲᕐᑐᕐᑕᐅᕕᐅᑉ ᐅᓪᓗᖓᓂ, ᐊᒥᓱᑦ ᐅᕙᓐᓄᑦ ᐅᖃᕈᒫᕐᐳᑦ, ‘ᐊᑕᓃᖅ, ᐊᑕᓃᖅ! ᐊᑎᕐᓂ ᒎᑎᐅᑉ ᐅᖃᕐᑕᐅᖁᔭᖓᓂᒃ ᐅᖃᓪᓚᖃᑦᑕᓚᐅᕐᐳᒍᑦ, ᐊᑎᕐᓂᓗ ᐊᓂᕐᓂᕐᓗᐃᑦ ᐊᒥᓱᑦ ᐃᓄᖕᓂᑦ ᐊᓂᑎᖃᑦᑕᓚᐅᕐᐸᕗᑦ, ᐅᓄᕐᑐᓂᒡᓗ ᑲᒪᓇᕐᑐᓕᓂᕐᓂᒃ ᓴᖅᑭᑎᑦᓯᖃᑦᑕᓚᐅᕐᐳᒍᑦ!’

²³ ᑕᕝᕙ ᑭᐅᔪᒫᕐᐸᒃᑲ, ‘ᖃᐅᔨᒪᓚᐅᕐᓯᒪᓐᖏᓚᑦᓯ; ᑕᒫᓃᓐᖏᓚᐅᕆᑦᓯ! ᐊᔪᕐᑐᓕᔪᐊᓘᔪᓯ!’”

ᐃᒡᓗᓕᐅᕐᑏᒃ ᒪᕐᕉᒃ

²⁴ “ᑍᒤᒻᒪᑦ, ᓇᓪᓕᐊᑦ ᐅᖃᐅᓯᕆᔭᓐᓂᒃ ᑐᓴᕐᑐᖅ, ᐊᑐᕐᓗᒋᓪᓗ, ᑖᓐᓇ ᐊᑦᔨᐅᕗᖅ ᐊᖑᒻᒧᑦ ᓯᓚᑐᔪᒧᑦ ᕾᕐᑐᒥ ᐃᒡᓗᓕᐅᕐᑐᒧᑦ;

²⁵ ᑕᕝᕙ ᓯᓚᓗᒻᒪᕆᓕᕐᒪᑦ, ᑰᑦ ᖄᒥᓕᕐᓗᑎᒃ, ᐃᒡᓗ ᐊᓄᕌᕐᕕᐅᒻᒪᕆᓕᕐᓗᓂ, ᐅᕐᕈᓐᖏᓚᖅ, ᕾᕐᑐᒧᑦ ᑐᓐᖓᒐᒥ.

²⁶ “ᓇᓪᓕᐊᓪᓕ ᐅᖃᐅᓯᕆᔭᓐᓂᒃ ᑐᓴᕐᑐᖅ ᐊᑐᓕᕋᓂᓗ, ᑖᓐᓇ ᐊᑦᔨᐅᕗᖅ ᐊᖑᒻᒧᑦ ᓯᓔᑦᑐᒧᑦ ᓯᐅᕋᕐᒥ ᐃᒡᓗᓕᐅᕐᑐᒧᑦ.

²⁷ ᑕᕝᕙ ᓯᓚᓗᒻᒪᕆᓕᕐᒪ, ᑰᑦ ᖄᒥᓕᕐᓗᑎᒃ, ᐃᒡᓗ ᐊᓄᕌᕐᕕᐅᒻᒪᕆᓕᕐᓗᓂ, ᐅᕐᕈᕗᖅ; ᓯᖁᒥᒻᒪᕆᒡᓗᓂ!”

ᔩᓱᓯᐅᑉ ᐱᔪᓐᓇᕐᑎᑕᐅᓂᖓ ᑲᒪᓂᐊᕆᔭᐅᕗᖅ

²⁸ ᔩᓱᓯᐅᑉ ᑕᒪᒃᑯᐊ ᐅᖃᐅᓰᑦ ᐅᖃᐅᓯᕆᔭᕇᕐᒪᒋᑦ, ᐃᓄᒋᐊᒃᑐᕐᔪᐊᑦ ᑲᒪᓂᐊᕐᐳᑦ ᐊᔪᕆᕐᑐᐃᓪᓗᓂ ᐱᐅᓯᕆᔭᖓᓂᒃ.

²⁹ ᐊᔪᕆᕐᓱᐃᖕᒪᑦ ᐱᔪᓐᓇᕐᓂᖃᕐᑐᑐᑦ ᐱᖁᔭᓂᒃ ᐃᓕᓮᔨᑎᑑᖏᑦᑐᖅ.