ᒫᑎᐅᓯᐅᑉ ᐊᒡᓚᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᔪᕐᓴᕐᑐᓂᒃ ᐃᑲᔪᕐᓂᖅ

¹ “ᑲᒪᑦᓯᐊᕆᑦᓯ ᐅᒃᐱᕐᓂᕐᒥᒃ ᐱᓇᓱᐊᕐᓂᓯ ᐊᓯᑦᓯᓐᓄᑦ, ᐃᓄᖕᓄᑦ ᑕᑯᒃᓴᐅᓇᓱᑐᐃᓐᓇᕐᓗᓯ ᐱᖁᓇᓯ; ᐃᓄᖕᓄᑦ ᑕᑯᒃᓴᐅᓇᓱᑐᐃᓐᓇᕈᑦᓯ, ᐊᑭᓕᕐᑕᐅᓂᒃᓴᖃᖏᓐᓇᑦᓯ ᐊᑖᑕᑦᓯᓐᓂᑦ ᕿᓚᖕᒦᑦᑐᒥᑦ.

² “ᑍᒤᒻᒪᑦ ᑐᓂᕐᕈᓯᕈᑦᓯ, ᑐᓂᓯᓂᓯ ᖃᐅᔨᔭᐅᓇᓱᐊᕐᓗᓯ ᑎᑦᑐᓚᐅᑎᒥᒃ ᓂᓪᓕᕐᑎᑦᓯᔭᕆᐊᖃᓐᖏᓚᓯ, ᑕᒃᑯᕐᒨᕐᑐᑎᑐᑦ ᑖᒃᑯᐊ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ ᐊᖅᑯᑎᓂᓗ, ᑍᒤᓕᐅᕐᐸᖕᒪᑕ ᐃᓄᖕᓄᑦ ᓂᕐᑐᕐᑕᐅᔪᒪᓪᓗᑎᒃ. ᓱᓕᔪᒥᒃ ᐅᖃᐅᑎᕙᑦᓯ, ᐊᑭᓕᕐᑕᐅᔭᕇᕐᐳᑦ.

³ ᑐᓂᕐᕈᓯᕈᕕᓪᓕ, ᓴᐅᒦᑦ ᖃᐅᔨᑎᑕᒃᓴᕆᓐᖏᓚᑦ ᑕᓕᕐᐱᒃᐱᑦ ᑐᓂᕐᕈᑎᖏᓐᓂᒃ.

⁴ ᑐᓂᕐᕈᓯᕐᓃᑦ ᖃᐅᔨᔭᐅᓂᐊᖏᒻᒪᑦ; ᐊᑖᑕᕕᓪᓗ ᑕᒤᓐᓂᒃ ᑕᑯᓐᓇᕐᑑᑉ ᐊᑭᓕᕈᒫᕐᐹᑎᑦ.”

ᖃᓄᖅ ᑐᒃᓯᐊᕐᑐᒃᓴᐅᖕᒪᖔᑦᑕ

⁵ “ᑐᒃᓯᐊᓕᕌᖓᑦᓯ ᑕᒃᑯᕐᒨᕐᑐᑎᑐᑦ ᑍᒤᑦᑐᒃᓴᐅᓐᖏᓚᓯ; ᑍᒃᑯᐊ ᐃᓄᖕᓄᑦ ᑕᑯᓐᓇᕐᑕᐅᔪᒪᑐᐃᓐᓇᕐᖢᑎᒃ ᑐᒃᓯᐊᓲᖑᖕᒪᑕ ᓇᖏᕐᓗᑎᒃ, ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ ᐊᖅᑯᑎᓂᓗ. ᓱᓕᔪᒥᒃ ᐅᖃᐅᑎᕙᑦᓯ, ᑖᒃᑯᐊ ᐊᑭᓕᕐᑕᐅᔭᕇᕐᐳᑦ.

⁶ ᑐᒃᓯᐊᓕᕌᖓᑦᓯᓕ, ᐃᓄᑑᕕᒋᔪᓐᓇᕐᑕᑦᓯᓐᓄᑦ ᐃᑎᕆᑦᓯ, ᐅᒃᑯᐊᖓ ᐅᒃᑯᐊᕐᓗᒍ, ᐊᑖᑕᓯ ᑕᑯᒃᓴᐅᖏᑦᑐᖅ ᑐᒃᓯᐊᕐᕕᒋᓕᕐᓯᐅᒃ, ᐊᑖᑕᑦᓯ ᑕᒤᓐᓂᒃ ᑕᑯᓐᓇᕐᑑᑉ ᐊᑭᓕᕈᒫᕐᐹᓯ.

⁷ “ᑐᒃᓯᐊᕌᖓᑦᓯ, ᐅᖃᐅᓯᕐᓂᒃ ᑖᒃᑯᓂᖓᑦᓮᓐᓇᖅ ᑕᑭᓕᑎᓪᓗᒋᑦ ᐊᑐᕐᑐᒃᓴᐅᓐᖏᓚᓯ, ᐅᒃᐱᖏᑦᑐᑎᑐᑦ; ᑍᒃᑯᐊ ᐊᒥᓱᓂᒃ ᑭᓯᐊᓂ ᐅᖃᐅᓯᖃᕐᓗᑎᒃ ᑐᓴᕐᑕᐅᔪᓐᓇᕋᓱᒋᖕᒪᑕ.

⁸ ᑍᒃᑯᐊᑎᑐᑦ ᑍᒤᑦᑐᒃᓴᐅᓐᖏᓚᓯ, ᐊᑖᑕᑦᓯ ᖃᐅᔨᒪᔭᕇᕐᒪᓯ ᓱᓇᒥᒃ ᐱᔭᕆᐊᖃᕐᒪᖔᑦᓯ, ᑐᒃᓯᐊᓚᐅᕐᑎᓐᓇᓯᓘᓐᓃᑦ.

⁹ ᑍᒤᒻᒪᑦ ᐃᒫᒃ ᑕᕝᕙ ᑐᒃᓯᐊᕐᑐᒃᓴᐅᕗᓯ: ‘ᐊᑖᑕᕗᑦ ᕿᓚᖕᒦᑦᑐᑎᑦ: ᐊᑏᑦ ᐃᑦᔪᕐᓁᑦᑐᖅ ᐃᓱᒪᒋᔭᐅᑦᓯᐊᕐᓕ;

¹⁰ ᐊᑕᓂᐅᓃᑦ ᕾᓚᐅᕐᓕ; ᐱᔪᒪᔧᑦ ᒪᓕᒃᑕᐅᓕ ᓄᓇᒥ, ᓲᕐᓗ ᕿᓚᖕᒥ ᒪᓕᒃᑕᐅᖕᒪᑦ.

¹¹ ᐅᓪᓗᒥ ᓂᕿᒃᓴᑦᑎᓐᓂᒃ ᑐᓂᓯᕕᒋᑎᒍᑦ.

¹² ᐱᐅᖏᑦᑐᓕᓂᕗᑦ ᐃᓱᒪᒋᔪᓐᓁᒃᑭᑦ, ᑍᒫᒃᑕᐅᖅ ᐃᓅᖃᑎᑦᑕ ᐱᐅᖏᑦᑐᓕᓂᖏᑦ ᐃᓱᒪᒋᔪᓐᓁᕋᑦᑎᒍ.

¹³ ᐱᐅᓐᖏᑐᒥᒃ ᐱᔪᒥᓵᕐᑕᐅᑎᑦᑍᓕᑎᒍᑦ, ᓴᐳᑎᑎᒍᓪᓕ ᓵᑖᓇᓯᒥᑦ. [ᐊᑕᓂᐅᓂᖅ ᐊᔪᒐᖃᖏᓐᓂᕐᓗ ᐃᓅᖃᓐᓂᕐᔪᐊᕐᓂᕐᓗ ᐱᒋᒐᕕᒋᑦ ᐃᓱᖃᖏᑦᑐᒧᑦ, ᐋᒥᓐ.]’

¹⁴ “ᐃᓅᖃᑎᑦᓯ ᐱᐅᖏᑦᑐᓕᓂᖏᑦ ᐃᓱᒪᒋᔪᓐᓁᕐᓂᐊᕈᑦᓯᐅᒃ, ᐊᑖᑕᑦᓯᑦᑕᐅᖅ ᕿᓚᖕᒦᑦᑑᑉ ᐱᐅᖏᑦᑐᓕᓂᓯ ᐃᓱᒪᒋᔪᓐᓁᕐᓂᐊᕆᕔᑦ.

¹⁵ ᐃᓅᖃᑎᑦᓯᓕ ᐱᐅᖏᑦᑐᓕᓂᖏᑦ ᐃᓱᒪᒋᔪᓐᓁᕐᓂᐊᖏᒃᑯᑦᓯᒋᒃ, ᐊᑖᑕᑦᓯᑦᑕᐅᖅ ᐱᐅᖏᑦᑐᓕᓂᓯ ᐃᓱᒪᒋᔪᓐᓁᕐᓂᐊᖏᓐᓂᕔᑦ.”

ᓂᕆᑦᑍᓕᓗᑕ ᖃᓄᖅ ᐱᔪᒃᓴᐅᖕᒪᖔᑕ

¹⁶ “ᓂᕆᑦᑍᓕᔭᕌᖓᑦᓯ, ᑕᒃᑯᕐᒨᕐᑐᑎᑐ ᑍᒤᑦᑐᒃᓴᐅᓐᖏᓚᓯ ᑮᓇᕐᒥᖕᓂᒃ ᑕᑯᒥᓇᕈᓐᓃᕐᑎᑦᓯᔪᑎᑐᑦ, ᑕᐅᑦᑐᒥᒍᑦ ᑕᑯᒃᓴᐅᓇᓱᐊᕐᐸᖕᒪᑕ ᓂᕆᑦᑍᓕᓂᕐᒥᖕᓂᒃ ᖃᐅᔨᔭᐅᔪᒪᓪᓗᑎᒃ. ᓱᓕᔪᒥᒃ ᐅᖃᐅᑎᕙᑦᓯ, ᐊᑭᓕᕐᑕᐅᔭᕇᕐᐳᑦ.

¹⁷ ᐃᓕᑦᓯᓕ ᓂᕆᑦᑍᓕᔭᕌᖓᑦᓯ, ᑮᓇᓯ ᓴᓗᒻᒪᕐᓴᑦᓯᐊᕐᓗᒍ ᐃᓪᓔᕐᓗᓯᓗ ᐱᔪᒃᓴᐅᕗᓯ,

¹⁸ ᐊᓯᑦᓯᓐᓂᑦ ᖃᐅᔨᔭᐅᓂᐊᖏᓐᓇᑦᓯ ᓂᕆᑦᑍᓕᓂᑦᓯᓐᓂᒃ ᐊᑖᑕᑦᓯ ᑭᓯᒥ, ᑕᑯᒃᓴᐅᖏᑦᑑᑉ ᖃᐅᔨᒪᓂᐊᕐᐹᓯ; ᐊᑖᑕᑦᓯ ᐃᓄᑑᑎᓪᓗᓯ ᐱᓂᐊᕐᓂᑦᓯᓐᓂᒃ ᑕᑯᓐᓇᕐᑑᑉ, ᐊᑭᓕᕈᒫᕐᐹᓯ.”

ᕿᓚᖕᒥ ᐊᔪᕐᓴᖏᑦᔪᑎᒃᓴᑦ

¹⁹ “ᓇᖕᒥᓂᖅ ᐊᔪᕐᓴᖏᑦᔪᑎᒃᓴᑦᓯᓐᓂᒃ ᑲᑎᕐᓱᐃᓂᐊᕋᓯ ᑕᒫᓂ ᓄᓇᒥ, ᖁᐱᕐᕈᓄᑦ ᖃᓪᓗᓈᕐᑕᓂᒃ ᓂᕆᓲᓄᑦ, ᒪᓐᖏᕐᑐᕆᒧᓪᓗ ᓱᒃᑯᑕᐅᔪᓐᓇᕐᑐᓂᒃ, ᑎᒡᓕᒃᑎᓄᓪᓗ ᐃᓵᕐᑕᐅᓗᑎᒃ ᑎᒡᓕᒃᑕᐅᔪᓐᓇᕐᑐᓂᒃ.

²⁰ ᓇᖕᒥᓂᕐᓕ ᐊᔪᕐᓴᖏᑦᔪᑎᒃᓴᑦᓯᓐᓂᒃ ᑲᑎᕐᓱᐃᖔᓕᕆᑦᓯ ᕿᓚᖕᒥ, ᖁᐱᕐᕈᓄᑦ ᖃᓪᓗᓈᕐᑕᓂᒃ ᓂᕆᓲᓄᑦ, ᒪᓐᖏᕐᑐᕆᒧᓪᓗ ᓱᒃᑯᑕᐅᔪᓐᓇᖏᑦᑐᓂᒃ, ᑎᒡᓕᒃᑎᓄᓪᓗ ᐃᓵᕐᑕᐅᔪᓐᓇᖏᑦᑐᒥᒃ ᑎᒡᓕᒃᑕᐅᔪᓐᓇᖏᑦᑐᒥᒡᓗ.

²¹ ᐱᖁᑎᓐᓇᕆᔭᕕᑦ ᐃᓂᖓᓂ ᐆᒻᒪᑏᑦᑕᐅᖅ ᑍᑲᓃᓐᓂᐊᕆᕗᖅ.”

ᑎᒥᐅᑉ ᖃᐅᒻᒪᖅᑯᑎᖓᓂᒃ

²² “ᐃᔩᒃ ᓇᓂᕈᐊᖑᕘᒃ ᑎᒥᒧᑦ. ᐃᔩᒃᑭᒃ ᑕᐅᑐᑦᓯᐊᕐᐸᑎᒃ ᑎᒥᓕᒫᑦ ᖃᐅᒪᓂᐊᕐᐳᖅ;

²³ ᐃᔩᒃᑭᒡᓕ ᑕᒃᐲᑦᑑᒃᐸᑎᒃ, ᑎᒥᓕᒫᑦ ᑖᕐᑐᒦᓐᓂᐊᕐᐳᖅ. ᖃᐅᒪᔪᖅ ᐃᓕᖕᓃᑦᑐᖅ ᑖᕐᓯᒃᐸᑦ, ᑖᕐᑐᒻᒪᕆᐊᓘᓂᐊᕐᐳᖅ!”

ᐱᖁᑎᓪᓗ ᒎᑎᓗ

²⁴ “ᐊᖓᔪᖅᑳᖕᓄᑦ ᒪᕐᕉᖕᓄᑦ ᐊᑕᐅᑦᓯᒃᑯᑦ ᐱᔨᑦᓯᕐᑐᖃᕈᓐᓇᓐᖏᓚᖅ; ᐂᑉᐹ ᐆᒥᒋᒐᔭᕐᐹ ᐂᑉᐸᖓᓗ ᓇᒡᓕᒋᓗᒍ; ᐂᑉᐹ ᑲᒪᒋᑦᓯᐊᕋᔭᕐᐹ ᐂᑉᐸᖓᓗ ᓇᕐᕈᒋᓗᒍ. ᑍᒫᒃᑕᐅᖅ ᐊᑕᐅᑦᓯᒃᑯᑦ ᐱᔨᑦᓯᕈᓐᓇᓐᖏᓚᓯ ᒎᑎᒥᒃ ᑮᓇᐅᔭᓂᒡᓗ.

²⁵ “ᑍᒤᒻᒪᑦ ᐅᖃᐅᑎᕙᑦᓯ: ᐃᓅᓯᑦᓯᓐᓂᒃ ᐃᓱᒪᔮᕈᑎᖃᕐᓂᐊᕋᓯ ᓂᕿᓂᒃ, ᐃᒥᒃᓴᑦᓯᓐᓂᒡᓘᓐᓃᑦ, ᐊᓐᓄᕌᒃᓴᑦᓯᓐᓂᒡᓘᓐᓃᑦ. ᐃᓅᓯᓰ ᐊᓐᓂᕐᓇᕐᓂᕐᓴᐅᓐᖏᓚᖅ ᓂᕿᓂᑦ, ᑎᒥᓯᓘ ᐊᑐᕐᓂᕐᓴᐅᓐᖏᓚᖅ ᐊᓐᓄᕌᓂᑦ?

²⁶ ᑎᖕᒥᐊᑦ ᑕᑯᓯᒋᒃ ᖃᖓᑕᖃᑦᑕᕐᑐᑦ: ᐱᕈᕐᓯᐊᒡᓴᓂᒃ ᑲᓐᖓᕐᓱᐃᕙᓐᖏᓚᑦ, ᑲᑎᕐᓱᐃᕙᒐᑎᒡᓗ ᓂᕿᒃᑯᕕᖕᒥᖕᓄᑦ; ᑍᒤᒃᑲᓗᐊᕐᑎᓪᓗᒋᑦ ᐊᑖᑕᑦᓯ ᕿᓚᖕᒦᑦᑑᑉ ᓂᕆᑎᖃᑦᑕᕐᐰᑦ! ᐱᓪᓚᕆᐅᓂᕐᓴᐅᓐᖏᓚᓰ ᑎᖕᒥᐊᓂᑦ?

²⁷ ᓇᓪᓕᓯ ᐃᓅᓯᕐᒥᓂᒃ ᐅᐃᒍᓯᔪᓐᓇᕐᐹ ᐃᓱᒪᔮᕈᑎᒋᓗᓂᐅᒃ?

²⁸ “ᓱᖕᒪᑦ ᐊᓐᓄᕌᑦ ᐃᓱᒪᔮᕈᑎᒋᔭᕆᐊᖃᕐᐱᓯᐅᒃ? ᑕᑯᓚᐅᕐᓯᒋᒃ ᒪᑯᐊ ᑕᑯᒥᓇᕐᑐᑦ ᓄᓇᕅᑦ, ᖃᓄᖅ ᐱᕈᕐᒪᖔᑕ; ᓴᓇᖏᒻᒪᑕ ᐃᒻᒥᖕᓂᒡᓗ ᐊᓐᓄᕌᓕᐅᕋᑎᒃ.

²⁹ ᐅᖃᐅᑎᕙᑦᓯ ᓲᓗᒨᓂ ᐊᖓᔪᖅᑳᕐᔪᐊᖅ ᐊᔪᕐᓴᖏᑦᑑᒐᓗᐊᕐᓗᓂ ᐊᓐᓄᕌᕐᓯᒪᕙᓚᐅᓐᖏᓚᖅ ᓄᓇᕋᕐᑎᑐᑦ ᑕᑯᒥᓇᕐᑎᒋᔪᓂᒃ.

³⁰ ᐱᕈᕐᑐᑦ ᒪᑯᐊ ᒎᑎᐅᑉ ᑍᒫᒃ ᑕᑯᒥᓇᕐᑎᒻᒪᒋᑦ, ᐅᓪᓗᒥ ᑕᒫᓃᑦᑐᑦ ᖃᐅᒃᐸᑦ ᐱᑕᖃᕈᓐᓃᕐᓂᐊᕐᒥᔪᑦ, ᐃᑭᑕᐅᓗᑎᒃ ᕿᔪᒋᔭᐅᓂᐊᕐᒪᑕ, ᒎᑎᐅᑉ ᐊᓐᓄᕌᒃᓴᑦᓯᓐᓂᒃ ᑐᓂᓯᕕᒋᔪᓐᓇᕐᓂᕐᓴᕆᓐᖏᓛᓰ ᐅᒃᐱᕐᓂᑭᑦᑐᓯ!

³¹ “ᑍᒤᒻᒪᑦ ᐃᓱᒪᔮᕈᑎᖃᕐᓂᐊᕋᓯ ᐃᓱᒪᓗᓯ ᐃᒫᒃ; ᓇᑭᓪᓕ ᓂᕆᔭᒃᓴᖃᕐᓂᐊᓕᕐᐱᑖ? ᐅᕝᕙᓘᓐᓃᑦ ᓇᑭᓪᓕ ᐃᒥᒃᓴᖃᕐᓂᐊᓕᕐᐱᑖ? ᓱᓇᒥᒡᓗ ᐊᓐᓄᕌᒃᓴᖃᕐᓂᐊᓕᕐᐱᑖ?

³² ᑕᒪᒃᑯᐊ ᑍᒤᓕᐅᕐᓃᑦ ᒎᑎᒧᑦ ᐅᒃᐱᖏᑦᑐᓂᑦ ᐃᓱᒪᒋᔭᐅᖏᓐᓇᕐᐸᖕᒪᑕ. ᐊᑖᑕᑦᓯᓕ ᕿᓚᖕᒦᑦᑑᑉ ᖃᐅᔨᒪᕚᓯ ᑕᒪᒃᑯᓂᖓ ᑕᒤᓐᓂᒃ ᐱᔭᕆᐊᖃᕐᓂᑦᓯᓐᓂᒃ.

³³ ᒎᑎᐅᑉ ᐊᑕᓂᐅᕕᖓ ᐱᓇᓱᐊᖅᑳᕐᓯᐅᒃ, ᐱᓂᐊᕐᑕᐅᖁᔭᖓ ᓯᕗᓪᓕᐅᑎᓗᒍ, ᑕᕝᕙ ᑕᒪᒃᑯᓂᖓ ᑕᒤᓐᓂᒃ ᐱᔭᕆᐊᖃᕐᑕᑦᓯᓐᓂᒃ ᑐᓂᓯᕕᒋᓂᐊᕐᐹᓯ.

³⁴ ᑍᒤᒻᒪᑦ ᐃᓱᒪᔮᕈᑎᖃᕐᓂᐊᕋᓯ ᖃᐅᒃᐸᐅᓂᐊᕐᑐᒥᒃ; ᐅᓪᓘᓂᐊᕐᑐᖅ ᓇᖕᒥᓂᖅ ᐃᓱᒪᔮᕈᑎᖃᓛᕐᒥᖕᒪᑦ. ᐅᓪᓘᑉ ᐊᑕᐅᓯᐅᑉ ᖁᕕᐊᓇᖏᑦᑐᕐᑕᖃᕐᓂᖏᑦ ᐃᓚᒃᑲᓐᓂᕆᐊᖃᖏᒻᒪᑕ.”