ᒫᑎᐅᓯᐅᑉ ᐊᒡᓚᖏᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦᔩᓱᓯᐅᑉ ᐊᔪᕆᕐᑐᐃᓂᖓ ᖃᖅᑲᐅᑉ ᖄᖓᓂ 1 ᔩᓱᓯᐅᑉ ᐃᓄᒋᐊᒃᑐᕐᔪᐊᑦ ᑕᑯᒐᒥᒋᑦ, ᖃᖅᑲᐅᑉ ᖄᖓᓄᐊᕐᐳᖅ, ᑕᕝᕙᓂ ᐃᒃᓯᕙᕐᖢᓂ. ᐃᓕᓐᓂᐊᕐᑎᖏᑦ ᐊᕙᑖᓃᓕᕐᒪᑕ, 2 ᔩᓱᓯᐅᑉ ᐊᔪᕆᕐᑐᕐᐰᑦ ᐅᖃᕐᓗᓂ: ᓱᓕᔪᒥᒃ ᖁᕕᐊᓱᖕᓂᖃᑦᓯᐊᕐᓂᖅ ᓘᑲᓯ 6:20-23 3 “ᓮᒪᓇᕐᑐᒦᑉᐳᑦ ᐊᓂᕐᓂᒃᑯᑦ ᐊᔪᕐᓴᕐᑐᑦ; ᒎᑎᐅᑉ ᐊᑕᓂᐅᕕᖓᓂᒃ ᐱᖃᓕᕐᒪᑕ. 4 ᓮᒪᓇᕐᑐᒦᑉᐳᑦ ᕿᒃᓵᓂᕐᒧᑦ ᖁᕝᕕᐅᕐᑐᑦ; ᒎᑎᐅᑉ ᓮᒻᒪᕐᑎᑦᓱᒫᕐᒪᒋᑦ. 5 ᓮᒪᓇᕐᑐᒦᑉᐳᑦ ᐃᒻᒥᖕᓂᒃ ᐊᖏᔪᕈᕐᑎᖏᑦᑐᑦ; ᒎᑎᐅᑉ ᐊᖏᕈᑎᒋᓯᒪᔭᖏᓐᓂᒃ ᓄᓇᕐᔪᐊᕐᒥ ᑭᖑᕐᖑᑦᔨᔪᒫᕐᒪᑕ. 6 ᓮᒪᓇᕐᑐᒦᑉᐳᑦ ᑳᒃᑐᑦ ᐃᒥᕈᒃᑐᓪᓗ ᓇᓛᒎᕐᓂᕐᒥᒃ; ᒎᑎᐅᑉ ᓈᒻᒪᒃᓯᑎᓐᓂᐊᕐᒪᒋᑦ ᐱᔪᒪᔭᖏᓐᓂᒃ. 7 ᓮᒪᓇᕐᑐᒦᑉᐳᑦ ᐃᓅᖃᑎᒥᖕᓂᒃ ᓂᑲᒍᓱᒃᑐᑦ, ᒎᑎᒧᑦ ᓂᑲᒋᔭᐅᔪᒪᕐᒪᑕ. 8 ᓮᒪᓇᕐᑐᒦᑉᐳᑦ ᐆᒻᒪᑎᒥᒍᑦ ᐸᓯᔭᐅᑦᔪᑎᒃᓴᖃᖏᑦᑐᑦ; ᒎᑎᒥᒃ ᑕᑯᔪᒫᕐᒪᑕ. 9 ᓮᒪᓇᕐᑐᒦᑉᐳᑦ ᐃᓅᖃᑎᒌᑦᓯᐊᖏᑦᑐᓂᒃ ᐃᓚᒌᑦᓯᐊᓕᕐᑎᑦᓯᔪᑦ; ᒎᑎᐅᑉ ᕿᑐᕐᖓᒥᓂᒃ ᑍᔪᒫᕐᒪᒋᑦ. 10 ᓮᒪᓇᕐᑐᒦᑉᐳᑦ ᐊᑭᕋᕐᑐᕐᑕᐅᔪᑦ ᓇᓛᒎᕐᓂᖅ ᐱᓪᓗᒍ; ᒎᑎᐅᑉ ᐊᑕᓂᐅᕕᖓᓂᒃ ᐱᖃᓕᕐᒪᑕ. 11 “ᓮᒪᓇᕐᑐᒦᑉᐳᓯ ᐃᓄᐃᑦ ᖃᓄᑐᐃᓐᓇᖅ ᐅᖃᕐᓂᕐᓗᒡᕕᒋᒃᐸᓯ, ᐊᑭᕋᕐᑐᕐᑕᐅᒍᑦᓯᓗ, ᓱᓕᖏᑦᑐᒥᒡᓗ ᖃᓄᑐᐃᓐᓇᖅ ᐅᖃᕐᓂᕐᓘᑎᒋᔭᐅᒍᑦᓯ ᐅᕙᓐᓄᑦ ᒪᓕᒡᑎᐅᓂᓯ ᐱᑦᔪᑎᒋᓪᓗᒍ. 12 ᖁᕕᐊᓱᒋᑦᓯ ᓯᕆᓗᓯᓗ, ᐊᖏᔪᒥᒃ ᐊᑭᓕᕐᑕᐅᔪᒫᕋᑦᓯ ᕿᓚᖕᒥ, ᓇᓚᐅᑦᑍᔪᑦᑕᐅᖅ ᑍᒤᓕᐅᕐᑕᐅᓚᐅᕐᒪᑕ ᓯᕗᓂᑦᓯᓐᓂ.” ᑕᕆᐅᕐᓗ ᖃᐅᒪᔪᕐᓗ ᒫᑯᓯ 9:50 ; ᓘᑲᓯ 14:34-35 13 “ᓄᓇᕐᔪᐊᑉ ᑕᕆᐅᕆᕚᓯ; ᑕᕆᐅᖅ ᑕᕆᐅᖑᔪᓐᓃᕐᐸᑦ ᖃᓄᖅ ᑕᕆᐅᓐᖑᒃᑲᓐᓂᕐᑎᑕᐅᔪᓐᓇᕐᐸ? ᓱᓇᒧᑦ ᐊᑑᑎᒃᓴᖃᕈᓐᓃᕐᐳᖅ, ᒪᓂᖅᑲᒧᑦ ᓈᕕᑕᐅᓗᓂ ᐃᓄᖕᓄᑦ ᑐᓪᓕᕋᒐᒃᓴᐅᓕᕐᐳᖅ. 14 “ᓯᓚᕐᔪᐊᑉ ᖃᐅᒪᓂᕆᕚᓯ; ᐃᒡᓗᒐᓮᑦ ᖃᖅᑲᐅᑉ ᖄᖓᓃᑦᑐᑦ ᓱᓇᑐᐃᓐᓇᒧᑦ ᑕᓕᐅᒪᑎᑕᐅᔪᓐᓇᓐᖏᓚᑦ. 15 ᓇᓂᕈᐊᕐᒥᒃ ᐃᑭᑦᓯᔪᖃᕐᐸᒃᐹ ᖃᑦᑕᕐᒧᑦ ᐳᓯᑦᔪᑎᓂᐊᕐᑕᒥᓂᒃ; ᖃᐅᒻᒪᖅᑯᓪᓕ ᐃᑭᑕᐅᓲᖑᕗᖅ ᐃᓂᖓᓄᐊᕐᑕᐅᓪᓗᓂ, ᐃᒡᓗᒦᑦᑐᓕᒫᑦ ᖃᐅᒻᒪᒃᑎᑕᐅᖁᓪᓗᒋᑦ. 16 ᑍᒫᒃᑕᐅᖅ ᖃᐅᒻᒪᖁᑎᓯ ᐃᓄᖕᓄᑦ ᖃᐅᒪᑎᓯᐅᒃ, ᐱᓂᐊᑦᓯᐊᕐᓂᑦᓯᓐᓂᒃ ᑕᑯᖁᓪᓗᒋᑦ, ᐊᑖᑕᓯ ᕿᓚᖕᒦᑦᑐᖅ ᓂᕐᑐᕐᑕᐅᖁᓪᓗᒍ.” ᔩᓱᓯᐅᑉ ᐱᖁᔭᓂᒃ ᐊᔪᕆᕐᑐᐃᑦᔪᑎᖃᕐᓂᖓ 17 “ᐃᓱᒪᑦᑍᓕᒋᑦᓯ ᒨᓯᓯᐅᑉ ᐱᖁᔭᖏᓐᓂᒃ, ᓇᓚᐅᑍᔪᓪᓗ ᐊᔪᕆᕐᑐᐃᑦᔪᑎᖏᓐᓂᒃ ᐊᑐᕈᓐᓃᕐᑎᑦᓯᔭᕐᑐᕋᓱᒋᓗᖓ; ᐊᑐᕈᓐᓃᕐᑎᒋᐊᕐᑐᓐᖏᓚᒃᑲ, ᓇᓚᐅᑦᓯᑎᑦᑕᕐᑐᕐᐸᑲᓕ. 18 ᓱᓕᔪᒥᒃ ᐅᖃᐅᑎᕙᑦᓯ, ᕿᓚᒃ ᓄᓇᕐᔪᐊᕐᓗ ᓄᖑᓚᐅᖅᑳᕐᑎᓐᓇᒋᒃ, ᐱᖁᔧᑦ ᓈᓂᖏᑦ ᐋᖅᑭᒋᐊᕈᑎᖏᓪᓗ ᐊᑐᕈᓐᓃᕐᑐᖃᑦᔮᓐᖏᓚᑦ, ᑕᒪᕐᒥᑦᓯᐊᖅ ᓇᓚᐅᑦᓯᓚᐅᖅᑳᕐᑎᓐᓇᒋᑦ. 19 ᑍᒤᒻᒪᑦ, ᓇᓪᓕᐊᑦ ᐱᖁᔧᑦ ᒥᑭᓐᓂᕐᐹᖓᓂᒡᓘᓐᓃᑦ ᐊᑐᖏᑦᑐᖅ, ᐊᓯᒥᓂᒡᓗ ᑍᒫᒃ ᐊᔪᕆᕐᑐᐃᓗᓂ, ᑖᓐᓇ ᐱᓪᓚᕆᐅᖏᓐᓂᕐᐸᐅᔪᒫᕐᐳᖅ ᒎᑎᐅᑉ ᐊᑕᓂᐅᕕᖓᓂ; ᑍᒫᒃᑕᐅᖅ ᓇᓪᓕᐊᑦ ᐱᖁᔭᓂᒃ ᐊᑐᕐᑐᖅ ᐊᓯᒥᓂᒡᓗ ᑍᒫᒃ ᐊᔪᕆᕐᑐᐃᓗᓂ, ᑖᓐᓇ ᐱᓪᓚᕆᐅᓂᕐᐸᐅᔪᒫᕐᐳᖅ ᒎᑎᐅᑉ ᐊᑕᓂᐅᕕᖓᓂ. 20 ᐅᖃᐅᑎᕙᑦᓯᓕ ᐃᒫᒃ: ᒎᑎᐅᑉ ᐊᑕᓂᐅᕕᖓᓄᐊᕈᓐᓇᕐᓂᐊᕐᐳᓯ, ᑭᓯᐊᓂ ᐱᖁᔭᓂᒃ ᐃᓕᓮᔨᓂᑦ ᐹᕆᓯᓂᓪᓗ ᐊᑐᑦᓯᐊᕐᓂᕐᓴᐅᒍᑦᓯ ᒎᑎᐅᑉ ᐱᓂᐊᕐᑕᐅᖁᔭᖏᓐᓂᒃ.” ᔩᓱᓯᐅᑉ ᐊᔪᕆᕐᑐᐃᓂᖓ ᓂᓐᖓᐅᒪᓂᖅ ᐱᓪᓗᒍ 21 “ᑐᓴᕐᓯᒪᒐᑦᓯ ᐃᓄᐃᑦ ᐅᖃᐅᑦᔭᐅᓯᒪᓚᐅᕐᒪᑕ, ‘ᐱᔮᕆᓗᑎᑦ ᐃᓄᐊᕐᑐᒃᓴᐅᓐᖏᓚᑎᑦ: ᐱᔮᕆᓗᓂ ᐃᓄᐊᕐᑐᖅ ᐃᖅᑲᕐᑐᐃᕕᖕᒧᐊᕐᑕᐅᓂᐊᕐᐳᖅ.’ 22 ᒫᓐᓇᓕ ᐅᖃᐅᑎᕙᑦᓯ: ᐃᓅᖃᑎᒥᓄᑦ ᓂᓐᖓᒃᑐᖅ ᐃᖅᑲᕐᑐᐃᕕᖕᒧᐊᕐᑕᐅᓂᐊᕐᐳᖅ; ᐃᓅᖃᑎᒥᓂᒡᓗ ᐊᑑᑎᒃᓴᖃᖏᓐᓂᕅᔪᖅ ᑖᓐᓇ ᔫᑎᑦ ᐃᖅᑲᕐᑐᐃᔨᖏᓐᓄᐊᕐᑕᐅᓂᐊᕐᐳᖅ, ᐃᓅᖃᑎᒥᓂᒡᓗ ᓱᓇᒃᓴᐅᖏᓐᓂᕅᔪᖅ, ᑖᓐᓇ ᐃᑯᒪᕐᔪᐊᕐᒧᑦ ᐱᑎᑕᒃᓴᐅᕗᖅ. 23 ᑍᒤᒻᒪᑦ ᑐᓂᕐᕈᓯᕐᕕᖕᒥ ᑐᓂᕐᕈᓯᕐᓂᐊᓕᕐᓗᑎᑦ ᒎᑎᒧᑦ, ᑕᕝᕙᓂ ᐃᖅᑲᐃᒍᕕᑦ ᐃᓅᖃᑎᖕᓄᑦ ᓮᒻᒪᕐᕕᐅᓯᒪᖏᓐᓂᕐᓂᒃ, 24 ᑐᓂᕐᕈᑎᒋᓂᐊᕐᑍᑦ ᑐᓂᕐᕈᓯᕐᕕᐅᑉ ᓵᖓᓄᑦ ᕿᒪᒡᓗᒍ; ᖃᑕᓐᖑᑏᑦ ᐅᐸᒡᓗᒍ ᓮᒻᒪᖃᑎᒋᓕᕈᒃ, ᑭᖑᓂᖓᒍᑦ ᑐᓂᕐᕈᓯᕐᕕᖕᒧᑦ ᐅᑎᕐᓗᑎᑦ, ᑐᓂᕐᕈᑎᒃᓮᑦ ᑐᓂᓕᕈᒃ ᒎᑎᒧᑦ. 25 “ᓇᓪᓕᐊᓐᓄᑦ ᐃᖅᑲᕐᑐᒐᒃᓴᓕᐊᖑᒍᕕᑦ ᐃᖅᑲᕐᑐᐃᕕᖕᒧᐊᖅᑳᕐᑎᓐᓇᓯᒃ ᓮᒻᒪᕐᓴᓚᐅᕈᒃ. ᐃᖅᑲᕐᑐᐃᕕᖕᒧᑦ ᑲᔪᓯᒍᑦᓯᒃ ᑖᑦᓱᒪ ᐃᖅᑲᕐᑐᐃᔨᒧᐊᕐᑎᓐᓂᐊᕐᒪᑎᑦ, ᐃᖅᑲᕐᑐᐃᔨᐅᑉ ᐳᓖᓯᒧᐊᕐᑎᒃᑲᔭᕐᒪᑎᑦ, ᐳᓖᓯᐅᓪᓗ ᑎᒍᔭᐅᓯᒪᕕᖕᒧᐊᕐᑎᓪᓗᓂᑎᑦ. 26 ᓱᓕᑦᓯᐊᕐᓗᖓ, ᐅᖃᐅᑎᕙᒋᑦ, ᑕᕝᕙᓃᓕᕋᔭᕋᕕᑦ, ᐊᑭᓕᕆᐊᖃᕐᑕᓕᒫᕐᓂᒃ ᐊᑭᓖᓚᐅᖏᓐᓂᕐᓂ.” ᔩᓱᓯᐅᑉ ᐊᔪᕆᕐᑐᐃᓂᖓ ᐊᓯᓐᓂᐊᕆᐊᖃᖏᓐᓂᕐᒥᒃ 27 “ᑐᓴᐅᒪᕗᓯ ᐅᖃᐅᓯᐅᕙᒃᑐᒥᒃ, ‘ᓄᓕᐊᕇᖕᓂᕐᒥᒃ ᐊᓯᕈᕆᐃᔪᒃᓴᐅᓐᖏᓚᑎᑦ’ 28 ᒫᓐᓇᓕ ᐅᖃᐅᑎᕙᑦᓯ: ᓇᓪᓕᐊᑦ ᐊᕐᓇᒥᒃ ᑕᑯᓐᓈᕐᓗᓂ ᐃᒃᓯᒍᒃᑐᖅ, ᑖᓐᓇ ᓄᓕᐊᕇᖕᓂᕐᒥᒃ ᐊᓯᕈᐃᔭᕇᕐᐳᖅ ᐆᒻᒪᑎᒥᒍᑦ. 29 ᑍᒤᒻᒪᑦ ᐃᔨᕕᑦ ᑕᓕᕐᐱᐅᑉ ᐊᔪᕐᑐᓕᑎᑉᐸᑎᑦ, ᐲᕈᒃ ᐃᒋᓪᓗᒍᓗ! ᐃᓕᖕᓄᑦ ᐱᐅᓂᕐᓴᐅᕗᖅ ᑎᒦᑦ ᐃᓚᑰᒃᐸᑦ, ᑎᒥᓕᒫᕕᑦ ᐃᒋᑕᐅᒐᔭᕐᓂᖓᓂᑦ ᐃᑯᒪᕐᔪᐊᕐᒧᑦ. 30 ᐊᒡᒐᒃᐱᓪᓗ ᑕᓕᕐᐱᐅᑉ ᐊᔪᕐᑐᓕᑎᑉᐸᑎᑦ, ᓇᑲᒃᑭᑦ ᐃᒋᓪᓗᒋᑦ! ᐃᓕᖕᓄᑦ ᐱᐅᓂᕐᓴᐅᕗᖅ ᐊᕙᑎᕕᑦ ᐃᓚᖓᓂᒃ ᐃᓚᑰᓕᕈᕕᑦ, ᑎᒥᓕᒫᕕᑦ ᐃᒋᑕᐅᒐᔭᕐᓂᖓᓂᑦ ᐃᑯᒪᕐᔪᐊᕐᒧᑦ.” ᔩᓱᓯᐅᑉ ᐊᔪᕆᕐᑐᐃᓂᖓ ᓄᓕᐊᕇᖕᓄᑦ ᐊᕕᓪᓚᕆᒃᑑᖕᓄᑦ ᒫᑎᐅᓯ 19:9 ; ᒫᑯᓯ 10:11-12 ; ᓘᑲᓯ 16:18 31 “ᐅᖃᕐᑐᖃᕐᐸᓚᐅᕆᕗᖅ, ‘ᓇᓪᓕᐊᑦ ᓄᓕᐊᒥᓂᒃ ᐊᕕᑦᓯᓪᓚᕆᒃᑐᖅ, ᐊᕕᑦᓯᓪᓚᕆᖕᓂᖓᓂᒃ ᓇᓗᓁᕐᓯᓯᒪᔪᓂᒃ ᑎᑎᖅᑲᓂᒃ ᑐᓂᓯᕕᒋᔭᒃᓴᕆᕚ,’ 32 ᒫᓐᓇᓕ ᐅᖃᐅᑎᕙᑦᓯ: ᐊᖑᑎᐅᑉ ᓄᓕᐊᓂ ᐊᕕᓪᓚᕆᒃᐸᒍ ᐊᓯᓐᓂᐊᕐᓂᕐᒨᖏᑎᓪᓗᒍ, ᑖᓐᓇ ᐸᓯᔭᒃᓴᐅᓕᕐᐳᖅ ᓄᓕᐊᕇᖕᓂᕐᒥᒃ ᐊᓯᕈᐃᓂᕐᒧᑦ; ᑖᑦᓱᒥᖓᓗ ᐊᕐᓇᒥᒃ ᐊᕕᑕᐅᓪᓚᕆᒃᓯᒪᔪᒥᒃ ᓄᓕᐊᓂᒃᑐᖅ ᐊᓯᕈᐃᒋᕗᖅ.” ᔩᓱᓯᐅᑉ ᐊᔪᕆᕐᑐᐃᓂᖓ ᐊᖏᒻᒪᕆᖕᓂᕐᒥᒃ 33 “ᑐᓴᓚᐅᕆᕗᓯ ᐃᓄᐃᑦ ᐅᖃᐅᑦᔭᐅᕙᓚᐅᕐᒪᑕ, ‘ᐊᖏᒻᒪᕆᒃᑐᒃᓴᐅᓐᖏᓚᑎᑦ ᓱᓕᖏᓪᓗᑎᑦ, ᐊᖏᒻᒪᕆᒃᑯᕕᑦ ᐊᑕᓂᐅᑉ ᓵᖓᓂ ᐊᑐᒐᒃᓴᕆᕙᑎᑦ ᐊᑐᕐᓂᐊᕐᓂᕋᕐᓯᒪᔭᑎᑦ.’ 34 ᒫᓐᓇᓕ ᐅᖃᐅᑎᕙᑦᓯ: ᓱᓇᑐᐃᓐᓇᕐᒥᒃ ᑍᓯᖃᓯᐅᑦᔨᓗᓯ ᐊᖏᒻᒪᕆᒃᑐᒃᓴᐅᓐᖏᓚᓯ, ᕿᓚᒡᓘᓐᓃᑦ ᑍᖃᓯᐅᑎᓗᒍ, ᒎᑎᐅᑉ ᐃᒃᓯᕙᐅᑕᕐᔪᐊᕆᖕᒪᒍ. 35 ᓄᓇᕐᔪᐊᕐᓘᓐᓃᑦ ᑍᖃᓯᐅᑎᓗᒍ, ᐃᑎᒐᖏᑕ ᐃᑯᕐᕋᕆᖕᒪᒍ; ᔨᕉᓴᓕᒻᓘᓐᓃᑦ ᑍᖃᓯᐅᑎᓗᒍ, ᑖᓐᓇ ᐊᖓᔪᖅᑳᕐᔪᐊᖑᓂᕐᐹᑉ ᐃᒡᓗᒐᓴᒡᔪᐊᖁᑎᒋᖕᒪᒍ. 36 ᐊᖏᒻᒪᕆᒃᑐᒃᓴᐅᖏᓐᓂᕗᓯ ᓂᐊᖁᓯ ᑍᖃᓯᐅᑎᓗᒍ, ᓄᔭᕐᒥᒃ ᐊᑕᐅᓯᕐᒥᒡᓘᓐᓃᑦ ᖃᑯᕐᓯᑎᑦᓯᔪᓐᓇᖏᓐᓇᑦᓯ ᕿᕐᓂᕐᓯᑎᑦᓯᔪᓐᓇᕋᓯᓗ. 37 ᐃᒫᒡᓕ ᐅᖃᖃᑦᑕᓕᕆᑦᓯ, ᐊᖏᕈᑦᓯ ᐊᖏᕐᓗᓯ, ᐊᖏᖏᒃᑯᑦᓯ ᐊᖏᖏᓪᓗᓯ! ᑖᒃᑯᐊ ᐊᓯᐊᓂᒃ ᐅᖃᒃᑲᓐᓂᕋᓱᒃᑯᑦᓯ ᑕᒪᓐᓇ ᐱᐅᖏᑦᑐᐊᓗᖕᒥᑦ ᐱᕗᖅ.” ᔩᓱᓯᐅᑉ ᐊᔪᕆᕐᑐᐃᓂᖓ ᐊᑭᓂᐊᕆᐊᖃᖏᓐᓂᕐᒥᒃ ᓘᑲᓯ 6:29-30 38 “ᑐᓴᐅᒪᕗᓯ ᐅᖃᐅᓯᐅᕙᒃᑐᒥᒃ, ‘ᐃᔨ ᐃᔨᒥᒃ, ᑭᒍᑦ ᑭᒍᑎᒥᒃ ᐊᑭᖃᕆᐊᖃᕐᐳᖅ.’ 39 ᒫᓐᓇᓕ ᐅᖃᐅᑎᕙᑦᓯ: ᐊᑭᓂᐊᕋᓱᒃᑐᒃᓴᐅᓐᖏᓚᓯ ᐱᑦᓯᐊᕐᑎᒋᓐᖏᑕᑦᓯᓐᓄᑦ. ᐅᓗᐊᒃᑯᑦ ᐸᑎᒃᑕᐅᒍᕕᑦ, ᐅᓗᐊᕕᑦ ᐃᒡᓗᐊᑦᑕᐅᖅ ᒪᓂᓕᕈᒃ. 40 ᓇᓪᓕᐊᓐᓄᑦ ᐃᖅᑲᕐᑐᐃᕕᖕᒧᐊᕐᑎᑕᐅᒍᕕᑦ ᐅᕕᓂᕈᐃᑦ ᐱᔪᒪᓗᒍ, ᐊᓐᓄᕌᑦᑕᐅᖅ ᓯᓚᓪᓕᖅ ᐱᑖᕆᓚᐅᕐᓕᐅᒃ. 41 ᐅᓇᑕᕐᑐᒃᓴᒧᑦ ᐊᒡᔭᕐᓯᖁᔭᐅᒍᕕᑦ 1ᒤᓕᒥᒃ ᐅᖓᓯᖕᓂᓕᖕᒧᑦ, ᐊᒡᔭᕐᓯᓚᐅᕆᑦ 2ᒤᓕᒥᒃ. 42 ᓇᓪᓕᐊᓐᓄᑦ ᐱᔪᒪᕕᐅᒍᕕᑦ ᑐᓂᓯᕕᒋᓚᐅᕈᒃ: ᓱᓇᑐᐃᓐᓇᕐᒥᒃ ᐊᑐᕐᕕᐅᔪᒪᒍᕕᑦ ᐊᑐᕐᑎᓚᐅᕈᒃ.” ᐊᑭᕋᕐᑐᕐᑎᒥᒃ ᓇᒡᓕᒍᓱᖕᓂᖅ ᓘᑲᓯ 6:27-28 , 32-36 43 “ᑐᓴᐅᒪᕗᓯ ᐅᖃᐅᓯᐅᕙᒃᑐᒥᒃ, ‘ᐃᓅᖃᑎᓯ ᓇᒡᓕᒋᓯᒋᒃ, ᐊᑭᕋᕐᑐᕐᑎᓯᓗ ᐆᒥᒋᓗᒋᑦ.’ 44 ᒫᓐᓇᓕ ᐅᖃᐅᑎᕙᑦᓯ: ᐊᑭᕋᕐᑐᕐᑎᓯ ᓇᒡᓕᒋᓯᒋᒃ, ᐃᓕᑦᓯᓐᓂᒃ ᐅᖃᐅᓯᖃᕐᓗᒃᑐᑦ ᓮᒻᒪᑎᑕᐅᖁᓯᒋᒃ, ᐊᑭᕋᕐᑐᕐᓂᕐᒧᑦ ᐅᖁᒤᒃᓴᕐᑎᑦᓯᔪᑦ ᑐᒃᓯᐅᑎᓯᒋᒃ, 45 ᕿᑐᕐᖓᕆᔭᐅᓕᖁᓪᓗᓯ ᐊᑖᑕᑦᓯᓐᓄᑦ ᕿᓚᖕᒦᑦᑐᒧᑦ; ᑖᑦᓱᒪ ᓯᕿᓂᓂ ᖃᐅᒻᒪᒃᑎᒻᒪᒍ ᐱᑦᓯᐊᕐᑐᓄᑦ ᐱᑦᓯᐊᖏᑦᑐᓄᓪᓗ, ᓯᓚᓗᒃᑎᑦᓯᕙᒡᓗᓂᓗ ᐊᑲᐅᔪᓕᔪᓄᑦ ᐊᑲᐅᖏᑦᑐᓕᔪᓄᓪᓗ. 46 ᐃᓕᑦᓯᓐᓂᒃ ᓇᒡᓕᒍᓱᒃᑐᑦ ᑭᓯᒥ ᓇᒡᓕᒋᔭᑐᐊᕆᒍᑦᓯᒋᒃ, ᓱᓇᒥᒃ ᐊᑭᓕᕐᑕᐅᑦᔪᑎᒃᓴᖃᕐᐱᓰ? ᕉᒪᒥᐅᑦ ᑮᓇᐅᔧᕐᑎᑦᓯᔨᖁᑎᖏᑦ ᐊᒡᓛᑦ ᑍᒤᓕᐅᕐᐸᒃᑭᕗᑦ! 47 ᐃᓚᓐᓈᕆᔭᓯ ᑭᓯᒥ ᑐᓐᖓᓱᒃᑎᖃᑦᑕᕈᑦᓯᒋᒃ, ᖃᓅᖅ ᐊᓯᑦᓯᓐᓂᑦ ᐱᑦᓯᐊᕐᓂᕐᓴᐅᒐᔭᕐᐱᓰ? ᐅᒃᐱᖏᑦᑐᑦ ᐊᒡᓛᑦ ᑍᒤᓕᐅᕐᐸᒃᑭᕗᑦ! 48 ᑍᒤᒻᒪᑦ ᓈᒻᒪᑦᓯᐊᕐᑐᒥᒃ ᐃᓕᖅᑯᓯᖃᕐᑐᒃᓴᐅᕗᓯ, ᓲᕐᓗ ᐊᑖᑕᓯ ᕿᓚᖕᒦᑦᑐᖅ ᓈᒻᒪᑦᓯᐊᕐᑐᒥᒃ ᐃᓕᖅᑯᓯᖃᕐᒪᑦ.” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society