ᒫᑎᐅᓯᐅᑉ ᐊᒡᓚᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯᐅᑉ ᐱᔪᒥᓵᕐᑕᐅᓂᖓ

¹ ᑕᕝᕙ ᐊᓂᕐᓂᐅᑉ ᔩᓱᓯ ᑕᓯᐅᕐᐹ ᐃᓄᖃᖏᑦᑐᒧᑦ, ᐆᒃᑐᕐᑕᐅᓗᓂ ᐱᔪᒥᓵᕐᑕᐅᖁᓪᓗᒍ ᓵᑖᓇᓯᒧᑦ.

² ᐅᓪᓗᓂᒃ ᐅᓐᓄᐊᓂᒡᓗ 40ᓂᒃ ᓂᕆᓚᐅᖏᓐᓇᒥ, ᑳᓕᕐᐳᖅ.

³ ᐱᔪᒥᓵᕆᔨᐅᑉ ᑎᑭᑉᐹ ᐅᖃᐅᑎᓪᓗᒍ, “ᒎᑎᐅᑉ ᐃᕐᓂᕆᒃᐸᑎᑦ, ᐅᑯᐊ ᐅᔭᕅᑦ ᓂᐊᖂᔭᓐᖑᕐᑎᓚᐅᒃᑭᑦ.”

⁴ ᔩᓱᓯᐅᑉ ᑭᐅᕚ, “ᒎᑎᐅᑉ ᐅᖃᐅᓯᖏᓐᓂ ᑎᑎᕋᕐᓯᒪᕗᖅ, ‘ᐃᓄᒃ ᓂᐊᖂᔭᑐᐃᓐᓇᕐᒥᒃ ᐃᓅᑦᔪᑎᖃᓐᖏᓚᖅ, ᒎᑎᐅᓪᓕ ᐅᖃᐅᓯᖏᓐᓂᒃ ᖃᓂᖓᓂᑦ ᐊᓂᔪᓂᒃ ᑕᒤᓐᓂᒃ ᐃᓅᑦᔪᑎᒃᓴᖃᕐᐳᖅ.’”

⁵ ᑕᕝᕙ ᓵᑖᓇᓯᐅᑉ ᔩᓱᓯ ᔨᕉᓴᓕᒻᒧᐊᕈᑎᕚ ᐃᒡᓗᒐᓴᖕᓄᑦ ᐃᑦᔪᕐᓁᑦᑐᓄᑦ, ᖃᑉᕕᕐᑎᓪᓗᒍ ᑐᒃᓯᐊᕐᕕᒡᔪᐊᑉ ᐳᕐᑐᓂᕐᐹᖓᓄᑦ.

⁶ ᐅᖃᐅᑎᓪᓗᒍ, “ᒎᑎᐅᑉ ᐃᕐᓂᕆᒃᐸᑎᑦ, ᑕᐅᓄᖓ ᐃᓕᖕᓂᒃ ᑲᑕᒃᑎᓚᐅᕆᑦ, ᒎᑎᐅᑉ ᐅᖃᐅᓯᖏᓐᓂ ᑎᑎᕋᕐᓯᒪᖕᒪᑦ, ‘ᐂᖏᓖᖁᑎᓂ ᑎᓕᓂᐊᕐᐰᑦ ᐱᓪᓗᑎᑦ; ᐊᒡᒐᖕᒥᖕᓄᑦ ᑎᒍᒥᐊᕐᓂᐊᕐᐹᑎᑦ, ᐃᑎᒐᑎᑦ ᐋᓐᓂᖁᓇᒋᑦ ᐅᔭᖅᑲᓄᑦ.’”

⁷ ᔩᓱᓯᐅᑉ ᑭᐅᕚ, “ᒎᑎᐅᑉ ᐅᖃᐅᓯᖏᓐᓂ ᑎᑎᕋᕐᓯᒪᒋᕗᖅ, ‘ᐊᑕᓂᕐᒥᒃ ᒎᑎᖕᓂᒃ ᐆᒃᑐᕐᓗᒍ ᐱᔪᒥᓵᕆᔪᒃᓴᐅᓐᖏᓚᑎᑦ.’”

⁸ ᐊᒻᒪ ᓵᑖᓇᓯᐅᑉ ᔩᓱᓯ ᐊᐅᓪᓚᕈᑎᕚ ᖃᖅᑲᒧᑦ ᐳᕐᑐᔪᐊᓗᖕᒧᑦ, ᑕᑯᑎᓪᓗᒍ ᓯᓚᕐᔪᐊᕐᒥᐅᑦ ᐊᖓᔪᖅᑲᐅᕕᖏᓐᓂᒃ ᑕᑯᒥᓇᕐᓂᖏᓐᓂᒡᓗ.

⁹ ᐅᖃᐅᑎᓪᓗᒍ, “ᑕᒪᒃᑯᐊᓕᒫᑦ ᑐᓂᓂᐊᕐᐸᒃᑲ ᐃᓕᖕᓄᑦ, ᓵᓐᓄᑦ ᓰᖅᑯᕐᓗᑎᑦ ᑐᒃᓯᐊᕐᕕᒋᒍᕕᖓ.”

¹⁰ ᑕᕝᕙ ᔩᓱᓯᐅᑉ ᑭᐅᕚ, “ᓵᑖᓇᓰ ᐅᕙᓐᓂᑦ ᐊᐅᓪᓚᕆᑦ! ᒎᑎᐅᑉ ᐅᖃᐅᓯᖏᓐᓂ ᑎᑎᕋᕐᓯᒪᖕᒪᑦ, ‘ᐊᑕᓂᕐᒧᑦ ᒎᑎᖕᓄᑦ ᑐᒃᓯᐊᕐᑐᒃᓴᐅᕗᑎᑦ ᑖᓐᓇ ᑭᓯᒥ ᐱᔨᑦᓯᕐᑕᒃᓴᕆᕙᑦ!’”

¹¹ ᑕᕝᕙ ᓵᑖᓇᓯᐅᑉ ᕿᒪᒃᐹ; ᑕᑯᒋᓪᓗ, ᐂᖏᓖᑦ ᔩᓱᓯ ᐅᐸᒃᓗᒍ ᐃᑲᔪᓕᕐᐹᑦ.

ᔩᓱᓯᐅᑉ ᐱᓇᓱᐊᓕᕐᓂᖓ ᒐᓕᓕᐊᒥ

¹² ᔩᓱᓯ ᑐᓴᕋᒥ ᔪᐊᓇᓯᐅᑉ ᑎᒍᔭᐅᓂᖓᓂᒃ, ᒐᓕᓕᐊᒧᐊᕐᐳᖅ.

¹³ ᐃᒡᓗᒐᓮᑦ ᓈᓴᕇᑎ ᕿᒪᒡᓗᒋᑦ ᑲᐲᕐᓂᐊᒥ ᓄᓇᖃᕆᐊᕐᑐᕐᐳᖅ, ᑕᓯᐅᑉ ᓯᓈᓃᑦᑐᒥ, ᓯᐳᓗᓂᐅᑉ ᓈᑉᑕᓕᐅᓪᓗ ᐃᓚᖓᓃᑦᑐᒧᑦ.

¹⁴ ᑍᒤᓚᐅᕐᐳᖅ ᓇᓚᐅᑦᑍᔫᑉ ᐂᓮᐊᓯᐅᑉ ᐅᖃᐅᓯᖏᑦ ᓇᓚᐅᑦᓯᓕᖁᓪᓗᒋᑦ, ᐅᖃᕐᑐᑦ:

¹⁵ “ᓯᐳᓗᓂᐅᑉ ᓄᓇᖓ, ᓈᑉᑕᓕᐅᓪᓗ ᓄᓇᖓ, ᐃᒪᕐᒧᑦ ᑐᕌᖓᔫᑉ ᐊᖅᑯᑎᖓᓃᑦᑑᒃ, ᔪᐊᕐᑕᓂᐅᑉ ᐊᑭᐊᓂ, ᒐᓕᓕᐊ ᔫᑎᐅᖏᑦᑐᑦ ᓄᓇᖓᑦ,

¹⁶ ᑕᕝᕙᓂ ᐃᓄᐃᑦ ᑖᕐᑐᒦᑦᑐᑦ ᖃᐅᒪᔪᕐᔪᐊᖅ ᑕᑯᕚᑦ, ᑐᖂᓪᓗ ᑕᕐᕋᓕᓂᖓᓃᑦᑐᓄᑦ ᖃᐅᒪᔪᖅ ᓴᖅᑭᑉᐳᖅ.”

¹⁷ ᑕᕝᕙᓐᖓᑦ ᐱᒋᐊᕐᓗᒍ ᔩᓱᓯ ᐊᔪᕆᕐᑐᐃᓯᕗᖅ, ᐅᖃᕐᓗᓂ: “ᖃᕿᐊᓕᕆᑦᓯ, ᕿᓚᐅᑉ ᐊᑕᓂᐅᕕᐊ ᖃᒡᓕᓕᕐᒪᑦ!”

ᔩᓱᓯᐅᑉ ᐃᖃᓗᒃᓯᐅᕐᑎᓂᒃ ᓯᑕᒪᓂᒃ ᕾᖁᔨᓂᖓ

¹⁸ ᔩᓱᓯ ᒐᓕᓕᐊᑉ ᑕᓯᕐᔪᐊᖓᑕ ᓯᓈᒍᑦ ᐱᓱᒃᓗᓂ, ᑕᑯᕗᖅ ᓄᑲᕇᖕᓂᒃ ᒪᕐᕉᖕᓂᒃ, ᓮᒨᓂᒥᒃ ᐲᑦᑐᕉᓯᒥᒃ ᑍᔭᐅᔪᖅ ᖃᑕᓐᖑᑖᓂᒡᓗ ᐋᓐᑐᕉᒥᒃ, ᓄᓗᑦᔨᕋᓱᐊᕐᑑᖕᓂᒃ ᑕᓯᕐᒧᑦ, ᐃᖃᓗᒃᓯᐅᕐᑎᐅᒐᒥᒃ.

¹⁹ ᔩᓱᓯ ᑖᒃᑯᖕᓄᖓ ᐅᖃᕐᐳᖅ, “ᒪᓕᒃᓯᓐᖓ, ᐃᓄᖕᓂᒃ ᐃᖃᓗᒐᓱᒃᑐᑎᑐᑦ ᐱᓇᓱᐊᕐᑎᓛᕋᑦᓯᒃ.”

²⁰ ᑕᕝᕔᓐᓇᖅ ᓄᓗᐊᑎᒃ ᕿᒪᒡᓗᒋᑦ, ᔩᓱᓯ ᒪᓕᒃᓴᕐᐹᒃ.

²¹ ᑕᕝᕙᖓᑦ ᐱᓱᓕᕐᒥᒐᒥ, ᓄᑲᕇᖕᓂᒃᑕᐅᖅ ᒪᕐᕉᖕᓂᒃ ᑕᑯᒋᕗᖅ, ᔧᒥᓯᒥᒃ ᔪᐊᓇᓯᒥᒡᓗ ᓯᐱᑎᐅᑉ ᐃᕐᓂᖏᖕᓂᒃ, ᑖᒃᑯᐊᒃ ᐅᒥᐊᒦᑉᐴᒃ ᐊᑖᑕᑎᒃ ᓯᐱᑎ ᐃᓚᒋᓪᓗᒍ, ᓄᓗᐊᒥᖕᓂᒃ ᐊᖕᒪᔪᐃᔧᔪᒃ, ᑖᒃᑯᐊᒃᑕᐅᖅ ᕾᖁᕚᒃ.

²² ᑕᕝᕔᓐᓇᖅ ᐅᒥᐊᖅ ᐊᑖᑕᑎᒃᓗ ᕿᒪᒃᐹᒃ, ᔩᓱᓯ ᒪᓕᒃᓗᒍ.

ᔩᓱᓯᐅᑉ ᐊᔪᕆᕐᑐᐃᓂᖓ ᐋᓐᓂᐊᔪᓂᒡᓗ ᐋᖅᑭᒃᓯᓂᖓ

²³ ᔩᓱᓯ ᒐᓕᓕᐊᓕᒫᒥ ᓇᒧᑐᐃᓐᓇᖅ ᐂᖃᑦᑕᕐᐳᖅ, ᐊᔪᕆᕐᑐᐃᕙᒡᓗᓂ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ, ᐅᖃᐅᓯᖃᕐᓗᓂ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᒎᑎᐅᑉ ᐊᑕᓂᐅᕕᖓᓂᒃ, ᐊᑦᔨᒌᖏᑦᑐᓂᒃ ᐋᓐᓂᐊᓖᑦ ᖃᓂᒪᔪᓪᓗ ᐃᓄᐃᑦ ᐋᖅᑭᒃᐰᑦ.

²⁴ ᑐᓴᐅᒪᔭᐅᓕᕐᐳᖅ ᓄᓇᒥ ᓯᕆᐊᓕᒫᒥ, ᐃᓄᐃᑦ ᑕᕝᕗᓐᖓᐅᑦᔨᕗᑦ ᖃᓂᒪᔪᖁᑎᒥᖕᓂᒃ, ᐊᑦᔨᒌᖏᑦᑐᓂᒃ ᖃᓂᒻᒪᓯᖃᕐᑐᓂᒃ, ᐃᓕᖅᑯᓯᕐᓗᒡᑐᓂᒡᓗ, ᐊᓂᕐᓂᕐᓗᖕᒧᓪᓗ ᐃᑎᕐᕕᐅᓯᒪᔪᓂᒃ, ᖀᕐᓱᕐᐸᒃᑐᓂᒡᓗ, ᓄᑭᖃᖏᑦᑐᓂᒡᓗ, ᔩᓱᓯᐅᑉ ᑕᒪᕐᒥᒃ ᐋᖅᑭᒃᐰᑦ.

²⁵ ᐃᓄᒋᐊᒃᑐᕐᔪᐊᑦ ᒪᓕᒃᐹᑦ ᒐᓕᓕᐊᒥᑦ ᑎᑲᐳᓖᓯᒥᓪᓗ, ᔨᕉᓴᓕᒻᒥᓪᓗ, ᔫᑎᐊᒥᓪᓗ, ᔪᐊᕐᑕᓂᐅᓪᓗ ᐊᑭᐊᓂᑦ ᐱᓯᒪᔪᓕᒫᑦ ᒪᓕᒃᐹᑦ.