ᒫᑎᐅᓯᐅᑉ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᔪᐊᓇᓯ ᐹᑉᑎᑎᕆᔨᐅᑉ ᐊᔪᕆᕐᑐᐃᓂᖓ

¹ ᑍᑦᓱᒪᓂ ᔪᐊᓇᓯ ᐹᑉᑎᑎᕆᔨ ᐃᓄᖃᖏᑦᑐᒥ ᐊᔪᕆᕐᑐᐃᓕᕐᐳᖅ ᔫᑎᐊᒦᑦᑐᒥ.

² ᐅᖃᕐᓗᓂ, “ᖃᕿᐊᓕᕆᑦᓯ, ᒎᑎᐅᑉ ᐊᑕᓂᐅᕕᖓ ᖃᒡᓕᓕᕐᒪᑦ!”

³ ᔪᐊᓇᓯ ᑖᓐᓇᐅᕗᖅ ᓇᓚᐅᑦᑍᔫᑉ ᐂᓮᐊᓯᐅᑉ ᐅᖃᐅᓯᕆᓚᐅᕐᑕᖓ, ᐃᒫᒃ, “ᐃᓄᖃᖏᑦᑐᒥ ᕾᒐᓛᕐᑐᖃᕐᐳᖅ, ‘ᐊᑕᓂᐅᑉ ᐊᖅᑯᑎᒃᓴᖓ ᐋᖅᑭᒃᓱᕐᓯᐅᒃ; ᐊᖅᑯᑎᒋᓂᐊᕐᑕᖓ ᑐᑭᓕᐊᕐᓯᑎᓪᓗᒍ.’”

⁴ ᔪᐊᓇᓯ ᐊᓐᓄᕌᖃᓚᐅᕐᐳᖅ ᑳᒥᓕᐅᑉ ᒥᖅᑯᖓᓂᒃ; ᑕᑦᓯᕈᑎᖃᕐᓗᓂ ᐊᒥᕕᓂᕐᒥᒃ, ᓂᕿᖃᕐᓗᓂᓗ ᐱᒡᓕᕐᑕᓂᒃ ᐃᒍᑦᑍᓪᓗ ᓰᕐᓇᐅᑎᖏᓐᓂᒃ.

⁵ ᑕᕝᕙ ᔨᕉᓴᓕᒻᒥᐅᑦ, ᔫᑎᐊᒥᓗ ᓄᓇᖃᕐᑐᑦ ᓇᓂᑐᐃᓐᓇᖅ, ᑰᑉ ᔪᐊᕐᑕᓂᐅᑉ ᖃᓂᒋᔮᓂ ᓄᓇᖃᕐᑐᓕᒫᑦ ᑕᑯᔭᕐᑐᕐᐹᑦ,

⁶ ᐊᔪᕐᓂᕐᒥᓂᒃ ᖃᕿᐊᓕᕐᒪᑕ, ᑖᑦᓱᒪ ᐹᑉᑎᑉᐰᑦ ᑰᖕᒥ ᔪᐊᕐᑕᓂᒥ.

⁷ ᐹᕆᓯᓪᓕ ᓵᑦᔪᓰᓪᓗ ᐊᒥᓱᑦ ᑎᑭᑎᓂ ᐹᑉᑎᑦᓯᕕᖕᒥᓄᑦ ᑕᑯᒐᒥᒋᑦ, ᐅᖃᐅᑎᕔᑦ, “ᖁᒡᓗᒋᐊᖑᔮᕐᑐᓯ, ᑭᐊ ᕿᒫᖁᕚᓯ ᒎᑎᐅᑉ ᓂᓐᖓᖕᓂᖓᓂᑦ ᐱᔪᒫᕐᑐᒥᑦ?

⁸ ᖃᕿᐊᓕᕐᓂᓯ ᓇᓗᓁᓕᕐᓯᐅᒃ ᐱᓂᐊᕐᓂᑦᓯᒍᑦ,

⁹ ᐸᓯᔭᒃᓴᐅᖏᓐᓇᓱᒋᑦᑍᓕᒋᑦᓯ ᐃᓱᒪᓗᓯ, ‘ᐂᑉᕋᕼᐋᒻ ᑭᖑᕚᕆᕚᑎᒍᑦ’; ᐅᖃᐅᑎᕙᑦᓯᓕ, ᒎᑎ ᒪᑯᓂᖓ ᐅᔭᕋᖕᓂᒃ ᐂᑉᕋᕼᐋᒻᒧᑦ ᑭᖑᕚᕆᔭᐅᓕᕐᑎᑦᓯᔪᓐᓇᕐᐳᖅ!

¹⁰ ᐅᓕᒪᐅᑦ ᐊᑐᐃᓐᓇᐅᓕᕐᐳᖅ ᓇᐹᕐᑐᑦ ᐊᒫᖏᑎᒍᑦ ᓇᑲᑎᕆᓂᐊᕐᑐᖅ; ᓇᐹᕐᑐᓕᒫᑦ ᐱᐅᔪᒥᒃ ᐱᕈᕐᕕᐅᖏᑦᑐᑦ ᓇᑲᑕᐅᓂᐊᕐᐳᑦ ᐃᒋᑕᐅᓗᑎᒃ ᐃᑯᒪᒧᑦ.

¹¹ ᐃᒪᕐᒧᑦ ᐹᑉᑎᑉᐸᑦᓯ ᖃᕿᐊᓕᕐᓂᑦᓯᓐᓄᑦ ᓇᓗᓁᒃᑯᑕᐅᖁᓪᓗᒍ, ᑭᖑᓂᒃᑯᓪᓕ ᕾᓂᐊᕐᑐᖅ ᐅᕙᓐᓂᑦ ᐊᔪᖏᓐᓂᕐᓴᕐᔪᐊᖑᕗᖅ, ᓇᓗᖅᑯᑎᕗᖓ, ᐊᒡᓛᑦ ᐃᑎᒐᒍᑎᖏᓐᓂᒃ ᑎᒍᒥᐊᕆᐊᒃᓴᖅ, ᑖᑦᓱᒪ ᐹᑉᑎᑦᓱᒫᕐᐹᓯ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᐃᑯᒪᒧᓪᓗ.

¹² ᑖᑦᓱᒪ ᓂᐊᖂᔭᒃᓴᓂᒃ ᓴᓃᔧᑦᔪᑎᓂ ᑎᒍᒥᐊᕐᐹ, ᓂᐊᖂᔭᒃᓴᓂᒃ ᓯᖃᓕᑦᓯᕕᖕᒥᓂᑦ ᓂᐊᖂᔭᒃᓴᐅᖏᑦᑐᑦ ᐊᕕᑎᑦᓱᒪᓪᓗᒋᑦ ᓂᐊᖂᔭᒃᓴᓂᑦ, ᓂᐊᖂᔭᒃᓮᓪᓗ ᓯᕐᓗᐊᕐᒥᓄᑦ ᑲᑎᑦᓱᒫᕐᐰᑦ, ᐃᕕᐅᓂᖏᑦ ᐃᑯᐊᓪᓚᒍᒫᕐᐰᑦ ᐃᑯᒪᒧᑦ ᖃᒥᓱᐃᑦᑐᒧᑦ.”

ᔩᓱᓯᐅᑉ ᐹᑉᑎᑕᐅᓂᖓ

¹³ ᑍᑦᓱᒪᓂ ᔩᓱᓯ ᒐᓕᓕᐊᒥᑦ ᔪᐊᕐᑕᓂᒧᑦ ᑎᑭᑉᐳᖅ, ᔪᐊᓇᓯᒧᑦ ᐹᑉᑎᑕᐅᔪᒪᓪᓗᓂ.

¹⁴ ᔪᐊᓇᓯᐅᓪᓕ ᓄᖅᑲᕐᑎᒐᓱᐊᕐᓗᒍ ᐅᖃᐅᑎᕚ, “ᐅᕙᖓ ᐹᑉᑎᑕᐅᔭᕆᐊᖃᕋᓗᐊᕐᐳᖓ ᐃᓕᖕᓄᑦ, ᐃᕝᕕᓪᓕ ᐅᕙᓐᓄᑦ ᕾᖔᕐᐳᑎᑦ!”

¹⁵ ᔩᓱᓯᐅᑉ ᑭᐅᕚ, “ᒫᓐᓇ ᑍᒤᓕᕐᓕ; ᑍᒤᓕᐅᕐᑎᓪᓗᑕ ᐱᕕᒃᓴᖅ ᓇᓪᓕᐅᑎᕗᖅ ᒎᑎᐅᑉ ᐊᑐᕐᑕᐅᖁᔭᖓᓂᒃ.” ᑕᕝᕙ ᔪᐊᓇᓯᐅᑉ ᐊᖏᕐᐹ.

¹⁶ ᔩᓱᓯ ᐹᑉᑎᑕᐅᔭᕇᕋᒥ ᐃᒫᓂᑦ ᖃᑭᕗᖅ, ᖃᑭᖕᒪᓪᓗ ᑕᑉᕔᓐᓇᖅ ᑕᑯᒋᑦ ᕿᓚᒃ ᐊᖕᒪᕐᐳᖅ, ᒎᑎᐅᑉ ᐊᓂᕐᓂᖓ ᐊᖅᑲᕐᑐᑦ ᑕᑯᕚ ᑎᖕᒥᐊᑎᑐᑦ ᑑᕕᑐᑦ, ᔩᓱᓯᒦᓕᕐᓗᓂ.

¹⁷ ᓂᐱᒥᒃ ᕿᓚᖕᒥᑦ ᓂᓪᓕᕐᑐᖃᕐᐳᖅ ᐅᖃᕐᑐᒥᒃ, “ᐅᓇ ᑕᕝᕙ ᐃᕐᓂᕋ ᓇᒡᓕᒋᔭᕋ, ᖁᕕᐊᒋᑦᓯᐊᕐᑕᕋ.”