ᒫᑎᐅᓯᐅᑉ ᐊᒡᓚᖏᑦ 23 - ᐊᒡᓔᑦ ᐃᑦᔪᕐᖕᓁᑦᑐᑦᔩᓱᓯᐅᑉ ᐃᓂᕐᑎᕆᓂᖓ ᒪᓕᖁᔨᓇᓂ ᐱᖁᔭᓂᒃ ᐃᓕᓮᔨᓂᒃ ᐹᕆᓯᓂᒡᓗ ᒫᑯᓯ 12:38-39 ; ᓘᑲᓯ 11:43 , 46 ; 20:45-46 1 ᑕᕝᕙ ᔩᓱᓯ ᐃᓄᒋᐊᒃᑐᕐᔪᐊᓄᑦ ᐃᓕᓐᓂᐊᕐᑎᒥᓄᓪᓗ ᐅᖃᕐᐳᖅ, 2 “ᐱᖁᔭᓂᒃ ᐃᓕᓮᔩᑦ ᐹᕆᓯᓪᓗ, ᐱᔪᓐᓇᕐᓯᑎᑕᐅᓯᒪᕗᑦ ᑐᑭᓯᓇᕐᓯᑎᑦᓯᔨᐅᖁᓪᓗᒋᑦ ᒨᓯᓯᐅᑉ ᐱᖁᔭᖏᓐᓂᒃ. 3 ᑍᒤᒻᒪᑦ ᓈᓚᒋᐊᖃᕐᐸᓯ ᒪᓕᒡᓗᓯᐅᒡᓗ ᐅᖃᐅᓯᕆᔭᓕᒫᖏᓐᓂᒃ ᐃᓕᑦᓯᓐᓄᑦ; ᐱᓂᐊᕐᓂᖏᓪᓕ ᒪᓕᒐᒃᓴᕆᓐᖏᓚᓯ; ᐊᔪᕆᕐᑐᐃᑦᔪᑎᒋᔭᒥᖕᓂᒃ ᐊᑐᕈᓐᓇᖏᒻᒪᑕ. 4 ᓇᖕᒪᒐᒃᓴᓂᒃ ᕿᓚᒃᓱᐃᕗᑦ ᐅᖁᒤᑦᑐᓂᒃ, ᐃᓄᐃᑦ ᓇᖕᒪᖕᓂᐊᕐᑕᖏᓐᓂᒃ; ᓇᖕᒥᓂᕐᓕ ᒥᑭᔪᒥᒡᓘᓐᓃᑦ ᐊᒃᑐᐃᔪᒪᓇᑎᒃ. 5 ᓱᓇᑐᐃᓐᓇᕐᓂᒃ ᐱᓇᓱᐊᖃᑦᑕᕐᐳᑦ ᐃᓄᖕᓄᑦ ᑕᑯᔭᐅᔪᒪᑐᐃᓐᓇᕐᓗᑎᒃ; ᒎᑎᐅᑉ ᐅᖃᐅᓯᖏᓐᓂᒃ ᑎᑎᕋᕐᕕᒋᓯᒪᔪᑦ ᖃᐅᕈᑎᖏᑦ ᑕᓕᕐᒥᐅᑕᖏᓪᓗ, ᑕᑯᓚᐅᕐᓯᐅᒃ ᐊᖏᔫᑎᐊᓗᐃᑦ! ᐅᓕᒡᔪᐊᖏᑕᓗ ᓂᒡᔭᖏᑦ ᑕᑭᔫᑎᐊᓗᐃᑦ! 6 ᓂᕆᕕᒃᔪᐊᕐᑐᖃᕐᑎᓪᓗᒍ ᐅᐱᒋᔭᐅᔪᑦ ᐃᓂᖏᓐᓂ ᐃᓂᖃᕈᒪᕗᑦ, ᔫᑎᓪᓗ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ ᐃᓂᑦᓯᐊᕙᐅᓂᕐᐹᓂ ᑭᓯᐊᓂ ᐃᓂᖃᕐᐸᒃᓗᑎᒃ; 7 ᓂᐅᕕᕐᕕᖕᓂᓗ ᐃᒃᐱᒋᔭᐅᑦᓯᐊᕐᓗᑎᒃ ᓂᓪᓕᐅᑦᔭᐅᔪᒪᕙᒃᐳᑦ, ᐃᓄᖕᓄᑦ ᕌᑉᐰᒥᒃ ᑍᔭᐅᔪᒪᕙᒃᓗᑎᒃ. 8 ᕌᑉᐰᒥᒃ ᑍᔭᐅᔭᕆᐊᖃᓐᖏᓚᓯ, ᐃᓘᓐᓇᓯ ᖃᑕᓐᖑᑎᒌᑐᐃᓐᓇᕋᑦᓯ, ᐊᑕᐅᓯᑐᐊᒥᒡᓕ ᕌᑉᐰᖃᕐᐳᓯ. 9 ᐊᑖᑕᒥᒡᓗ ᑍᓯᔪᒃᓴᐅᓐᖏᓚᓯ ᑕᒫᓂ ᓄᓇᒦᑦᑐᒥᒃ, ᐊᑕᐅᓯᑐᐊᒥᒃ ᐊᑖᑕᖃᕋᑦᓯ ᕿᓚᖕᒦᑦᑐᒥᒃ. 10 ᐊᖓᔪᖅᑳᒥᒃ ᑍᔭᐅᔪᒃᓴᐅᓐᖏᓚᓯ, ᐊᑕᐅᓯᑐᐊᖅ ᐊᖓᔪᖅᑳᕆᒐᑦᓯᐅᒃ ᙭ᔅᑑᓯ. 11 ᐃᓕᑦᓯᓐᓂ ᐊᖓᔪᖅᑳᖑᓂᕐᐸᐅᔪᖅ ᑖᓐᓇ ᐱᔨᒋᔭᐅᔪᒃᓴᐅᕗᖅ. 12 ᐃᒻᒥᓂᒃ ᐊᖏᔪᕈᕐᑎᑦᑐᖅ ᑖᓐᓇ ᒥᑭᒡᓕᑎᑕᐅᓂᐊᕐᐳᖅ, ᐃᒻᒥᓂᒡᓗ ᒥᑭᒡᓕᑎᕐᑐᖅ ᑖᓐᓇ ᐊᖏᔪᕈᕐᑎᑕᐅᓂᐊᕐᐳᖅ.” ᔩᓱᓯᐅᑉ ᑕᒃᑯᕐᒨᕐᑐᓂᒃ ᐱᐅᖏᑦᑐᐊᓘᓂᕅᓂᖓ ᒫᑯᓯ 12:40 ; ᓘᑲᓯ 11:39-44 , 52 ; 20:47 13 “ᐃᓕᑦᓯᓐᓄᑦ ᑲᑉᐱᐊᓐᓇᒦᒃ, ᐱᖁᔭᓂᒃ ᐃᓕᓮᔩᑦ ᐹᕆᓯᓪᓗ, ᑕᒃᑯᕐᒨᕐᑐᓯ! ᒎᑎᐅᑉ ᐊᑕᓂᐅᕕᖓᑕ ᐅᒃᑯᐊᖓ ᐅᒃᑯᐊᕐᓯᒪᒐᑦᓯᐅᒃ ᐃᓄᐃᑦ ᐃᑎᖁᓇᒋᑦ; ᓇᖕᒥᓂᕐᓗ ᐃᑎᕐᓯᒪᓇᓯ, ᑕᕝᕗᖓᓗ ᐃᑎᕋᓱᐊᕐᑐᑦ ᐊᒡᕕᐊᕋᓱᐊᕐᐸᓯ! [ 14 “ᐃᓕᑦᓯᓐᓄᑦ ᑲᑉᐱᐊᓐᓇᒦᒃ, ᐱᖁᔭᓂᒃ ᐃᓕᓮᔩᑦ ᐹᕆᓯᓪᓗ, ᑕᒃᑯᕐᒨᕐᑐᓯ! ᐅᐃᒡᒐᕐᓃᑦ ᓴᖐᑦᑐᕐᓂᐊᒐᕆᓪᓗᒋᑦ ᐱᖁᑎᖏᓐᓂᒃ ᐊᕐᓵᕋᑦᓯᐅᒃ, ᑕᑯᓐᓇᕐᑕᐅᔪᒪᓪᓗᓯᓗ ᑕᑭᔪᓂᒃ ᑐᒃᓯᐅᑎᖃᑦᑕᕐᐸᓯ! ᑕᒪᓐᓇ ᐱᑦᔪᑎᒋᓪᓗᒍ ᓱᒋᐊᕐᑕᐅᓂᓯ ᐊᖏᓂᕐᓴᐅᔪᒫᕐᐳᖅ!] 15 “ᐃᓕᑦᓯᓐᓄᑦ ᑲᑉᐱᐊᓐᓇᒦᒃ, ᐱᖁᔭᓂᒃ ᐃᓕᓮᔩᑦ ᐹᕆᓯᓪᓗ, ᑕᒃᑯᕐᒨᕐᑐᓯ! ᓄᓇᒃᑯᑦ ᐃᖏᕐᕋᕙᒃᑐᓯ ᐃᒪᒃᑯᓪᓗ ᐅᒥᐊᕐᑐᕐᓗᓯ ᐃᑳᕐᐸᒃᑐᓯ ᐊᑕᐅᓯᑯᓗᖕᒥᒃ ᒪᓕᒃᑎᑖᕆᐊᕐᑐᕐᓗᓯ; ᒪᓕᒃᑎᑖᕌᖓᑦᓯ, ᑲᑉᐱᐊᓇᕐᑐᕕᖕᒧᐊᕐᑐᒃᓴᓐᖑᕐᑎᑉᐸᓯ ᐃᓕᑦᓯᓐᓂᑦ ᒪᕐᕈᐊᕐᑎᓪᓗᐊᕐᑐᒥᒃ ᐱᐅᖏᓐᓂᕐᓴᐅᓕᕐᑎᓪᓗᒍ! 16 “ᐃᓕᑦᓯᓐᓄᑦ ᑲᑉᐱᐊᓐᓇᒦᒃ, ᑕᐅᑐᖏᑦᑑᓪᓗᓯ ᑕᓯᐅᕐᑎᐅᔪᓯ! ᐊᔪᕆᕐᑐᐃᖃᑦᑕᕋᑦᓯ, ‘ᒎᑎᐅᑉ ᑐᒃᓯᐊᕐᕕᒃᔪᐊᖁᑎᖓ ᑍᖃᓯᐅᑎᓗᒍ ᐅᖃᕕᒃᑐᖃᕐᐸᑦ, ᑖᓐᓇ ᕿᓚᒃᑕᐅᓯᒪᖏᓐᓂᕋᕐᐸᓯ; ᒎᑎᐅᑉ ᑐᒃᓯᐊᕐᕕᒃᔪᐊᖁᑎᖓᑕ ᒎᓗᖓ ᑍᖃᓯᐅᑎᓗᒍ ᐅᖃᕕᒃᑐᖃᕐᐸᑦ, ᑖᓐᓇ ᕿᓚᒃᓱᕐᑕᐅᓂᕋᕐᐸᓯ.’ 17 ᓯᓔᑦᑐᐊᓘᕗᓯ ᑕᐅᑐᖏᑦᑐᓯ! ᓇᓪᓕᐊᑦ ᐊᑐᕐᓂᕐᓴᐅᕙ ᒎᓗᓘᓐᓃᑦ, ᑐᒃᓯᐊᕐᕕᒡᔪᐊᕐᓘᓐᓃᑦ ᒎᓗᒥᒃ ᐃᑦᔪᕐᓁᑦᑐᓐᖑᕐᑎᑦᓯᔪᖅ? 18 ᐊᒻᒪ ᐊᔪᕆᕐᑐᐃᕙᒃᑭᕗᓯ, ‘ᑐᓂᕐᕈᓯᕐᕕᒃ ᐊᓪᑕᕆ ᑍᓗᒍ ᐅᖃᕕᒃᑐᖃᕐᐸᑦ, ᐊᖏᕈᑎᒋᔭᒥᓄᑦ ᕿᓚᒃᑕᐅᓯᒪᖏᓐᓂᕋᕐᐸᓯ; ᑐᓂᕐᕈᓯᕐᕕᖕᒧᓪᓕ ᑐᓂᔭᐅᓯᒪᔪᖅ ᑍᖃᓯᐅᑎᓗᒍ ᐅᖃᕕᒃᑐᖃᕐᐸᑦ, ᑖᓐᓇ ᕿᓚᒃᓱᕐᑕᐅᓂᕋᕐᐸᓯ.’ 19 ᑕᑯᓐᓇᖏᓪᓚᕆᒃᑐᓯ! ᓇᓪᓕᐊᑦ ᐊᑐᕐᓂᕐᓴᐅᕚ? ᑐᓂᕐᕈᑎᓪᓘᓐᓃᑦ, ᑐᓂᕐᕈᓯᕐᕕᒡᓘᓐᓃᑦ ᑐᓂᕐᕈᑎᓂᒃ ᐃᑦᔪᕐᓁᑦᑐᓐᖑᕐᑎᑦᓯᔪᖅ? 20 ᑍᒤᒻᒪᑦ, ᐃᓄᒃ ᐅᖃᕕᒃᑯᓂ ᑐᓂᕐᕈᓯᕐᕕᒃ ᑍᖃᓯᐅᑎᓗᒍ, ᑖᓐᓇ ᑐᓂᕐᕈᓯᕐᕕᒃ ᑍᖃᓯᐅᑎᓪᓗᒍ ᐊᖏᕐᐳᖅ, ᑐᓂᕐᕈᑕᐅᔪᓕᒫᓪᓗ ᐱᖃᓯᐅᑎᕔᑦ; 21 ᑐᒃᓯᐊᕐᕕᒡᔪᐊᕐᓗ ᑍᖃᓯᐅᑎᓗᒍ ᐅᖃᕕᒃᑐᖅ, ᑖᓐᓇ ᑐᒃᓯᐊᕐᕕᒃᔪᐊᖅ ᑍᖃᓯᐅᑎᓪᓗᒍ ᐊᖏᕐᐳᖅ, ᒎᑎᓗ ᑍᖃᓯᐅᑎᕚ, ᒎᑎ ᑕᕝᕙᓃᒻᒪᑦ; 22 ᐃᓄᒡᓕ ᕿᓚᖕᒥᒃ ᑍᖃᓯᐅᑦᔨᓗᓂ ᐅᖃᕕᒃᐸᑦ, ᑖᓐᓇ ᐊᖏᕐᐳᖅ ᒎᑎᐅᑉ ᐃᒃᓯᕙᐅᑕᕐᔪᐊᖓ ᑍᖃᓯᐅᑎᓪᓗᒍ, ᑕᕝᕙᓂᓗ ᐃᒃᓯᕙᔪᖅ ᐱᖃᓯᐅᑎᒋᕚ. 23 “ᐃᓕᑦᓯᓐᓄᑦ ᑲᑉᐱᐊᓐᓇᒦᒃ, ᐱᖁᔭᓂᒃ ᐃᓕᓮᔩᑦ ᐹᕆᓯᓪᓗ, ᑕᒃᑯᕐᒨᕐᑐᓯ! ᑐᓂᓯᖃᑦᑕᕐᑐᓯ ᒎᑎᒧᑦ ᐊᒡᓛᑦ ᓂᖀᑦ ᒪᒪᕐᓴᐅᑎᖏᑕ ᑕᓪᓕᒪᐅᔪᖏᓐᓂᒃ, ᒪᑯᓂᖓ ᒥᓐᑏᑦ, ᑎᐅᓪᓗ, ᑯᒥᓃᓂᒡᓗ, ᐱᖁᔧᑦ ᐊᔪᕆᕐᑐᐃᑦᔪᑎᖏᑕ ᐱᔭᕆᐊᖃᕐᓂᕐᐹᖏᑦ ᓈᓚᒍᒪᓇᒋᑦ, ᒪᑯᐊ ᐊᑦᔨᒌᒃᑎᑦᓯᓂᖅ, ᓂᑲᒍᓱᖕᓂᕐᓗ, ᐅᒃᐱᕐᓂᕐᓗ; ᑕᒪᒃᑯᐊ ᑕᒪᑦᔭ ᐊᑐᕆᐊᖃᕐᑕᓯ, ᐊᓯᖏᑦ ᖁᔭᓈᖏᓪᓗᒋᑦ. 24 ᑕᓯᐅᕐᑎᐅᔪᓯ ᑕᐅᑐᖏᑦᑐᓯ! ᐃᒥᕐᓂᐊᕐᑕᑦᓯᓐᓂᒃ ᓴᓃᔭᐃᑦᔪᑎᒧᑦ ᒥᓗᒋᐊᓂᒃ ᐲᔧᕙᒃᑐᓯ, ᑳᒥᓕᐊᓗᖕᒥᒡᓕ ᐄᓯᖃᑦᑕᕐᐳᓯ! 25 “ᐃᓕᑦᓯᓐᓄᑦ ᑲᑉᐱᐊᓐᓇᒦᒃ ᐱᖁᔭᓂᒃ ᐃᓕᓮᔩᑦ ᐹᕆᓯᓪᓗ, ᑕᒃᑯᕐᒨᕐᑐᓯ! ᐃᒥᐅᑎᑦ ᐸᓕᐊᓪᓗ ᓯᓚᑎᖏᑦ ᓴᓗᒻᒪᕐᓴᕐᐸᒃᐸᓯ, ᐃᓗᖏᓪᓕ ᑕᑕᑉᐳᑦ ᓯᕘᕋᓵᕆᓂᕐᒥᒃ, ᐃᓱᒪᒋᔭᑑᔪᒪᓂᕐᒥᒡᓗ. 26 ᑕᐅᑐᖏᑦᑐᓯ ᐹᕆᓯᑦ! ᐃᒥᐅᑎᑦ ᐸᓕᐊᓪᓗ ᐃᓗᖏᑦ ᓴᓗᒻᒪᕐᓴᖅᑳᕐᓯᐅᒃ, ᑕᕝᕙ ᓯᓚᑖᑦᑕᐅᖅ ᓴᓗᒻᒪᑦᓯᐊᕐᓂᐊᕐᐳᖅ! 27 ᐃᓕᑦᓯᓐᓄᑦ ᑲᑉᐱᐊᓐᓇᒦᒃ ᐱᖁᔭᓂᒃ ᐃᓕᓮᔩᑦ ᐹᕆᓯᓪᓗ, ᑕᒃᑯᕐᒨᕐᑐᓯ! ᐃᓗᕕᕐᑎᑐᑦ ᖃᑯᕐᑕᒥᒃ ᓯᓚᑖᒍᑦ ᐊᒥᐊᕆᔪᑎᑐᑦ ᑍᒤᑉᐳᓯ, ᓯᓚᑎᖏᑦ ᑕᑯᒥᓇᕐᑐᐊᓘᕗᑦ, ᐃᓗᖏᓪᓕ ᑕᑕᑉᐳᑦ ᓴᐅᓂᕕᓂᕐᓂᒃ ᒪᒤᑦᑐᐊᓗᖕᓂᒡᓗ. 28 ᑍᒫᑦᓮᓐᓇᑦᑕᐅᖅ, ᓯᓚᑎᑦᓯᒍᑦ ᒎᑎᐅᑉ ᐱᖁᔭᖏᓐᓂᒃ ᒪᓕᑦᓯᐊᕐᑑᔮᕐᐳᓯ, ᐃᓗᑦᓯᒍᓪᓕ ᑕᑕᑉᐳᓯ ᑕᒃᑯᕐᒨᕐᓂᕐᒥᒃ ᐊᔪᕐᓂᕐᒥᒡᓗ.” ᔩᓱᓯᐅᑉ ᓇᓗᓁᕐᓯᓂᖓ ᓱᒋᐊᕐᑕᐅᔪᒫᕐᓂᖏᓐᓂᒃ ᓘᑲᓯ 11:47-51 29 “ᐃᓕᑦᓯᓐᓄᑦ ᑲᑉᐱᐊᓐᓇᒦᒃ ᐱᖁᔭᓂᒃ ᐃᓕᓮᔩᑦ ᐹᕆᓯᓪᓗ, ᑕᒃᑯᕐᒨᕐᑐᓯ! ᓇᓚᐅᑦᑍᔪᑦ ᐃᓗᕕᖏᑦ ᐱᐅᓴᕐᐸᓯ, ᐃᖅᑲᐅᒪᔭᐅᑦᔪᑎᒃᓴᖏᓐᓂᒡᓗ ᑎᑎᕋᕐᓯᒪᔪᑎᒍᑦ ᐃᓅᓯᖃᑦᓯᐊᓚᐅᕐᑐᓂᒃ ᐃᓅᑎᓪᓗᒋᑦ ᓇᓗᓁᕐᓯᓯᒪᔪᓯ; 30 ᐅᖃᕐᐸᒃᐳᓯ, ‘ᑍᑦᓱᒪᓂᐅᑎᓪᓗᒍ ᓯᕗᓕᕕᓂᑦᑕ ᐃᓅᕕᒋᓚᐅᕐᑕᖏᓐᓂ ᐃᓅᒐᔭᕈᑦᑕ, ᐱᓂᐊᕐᓂᕆᓚᐅᕐᑕᖏᑎᑐᑦ ᑍᒤᒐᔭᓐᖏᓚᒍᑦ, ᓇᓚᐅᑦᑍᔪᓂᒃ ᑐᖁᑦᓯᖃᑦᑕᓚᐅᕐᑐᑎᑐᑦ.’ 31 ᑭᓯᐊᓂᓕ ᓇᓗᓁᕐᓯᕗᓯ ᑍᒃᑯᓄᖓ ᑭᖑᕚᕆᔭᐅᓂᑦᓯᓐᓂᒃ, ᓇᓚᐅᑦᑍᔪᓂᒃ ᐃᓄᐊᓚᐅᕐᑐᓄᑦ. 32 ᐊᑏ, ᒫᓐᓇ ᓯᕗᓕᕕᓂᑦᓯ ᐱᒋᐊᓚᐅᕐᑕᖓᑦ ᑲᔪᓯᑎᓕᕐᓯᐅᒃ ᐱᔭᕇᕐᓗᒍ. 33 ᖁᒡᓗᒋᐊᖑᔪᓯ, ᐃᕐᓂᐅᔪᓯᓗ ᖁᒡᓗᒋᐊᕐᔪᐊᓄᑦ, ᖃᓄᖅ ᐃᓕᑦᓯᓐᓂᒃ ᓴᐳᑎᔪᓐᓇᕋᓱᒋᕕᓯ ᑲᑉᐱᐊᓇᕐᑐᕕᖕᒥᑦ? 34 ᑍᒤᒻᒪᑦ ᓇᓚᐅᑦᑍᔪᓂᒃ ᑎᓕᓯᕕᒋᓂᐊᕐᐸᑦᓯ, ᓯᓚᑐᔪᓂᒡᓗ, ᐊᔪᕆᕐᑐᐃᔨᓂᒡᓗ; ᐃᓚᖏᑦ ᑐᖁᓐᓂᐊᕐᐸᓯ, ᐃᓚᖏᓪᓗ ᓴᓐᓂᖓᔪᓕᖕᒧᑦ ᑭᑭᐊᒃᑐᕐᓗᓯᐅᒃ, ᐃᓚᖏᑦ ᑏᒐᕐᑐᕐᓗᒋᑦ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ, ᒪᓕᑲᑕᖕᓂᐊᕐᐸᓯᓗ ᐊᑭᕋᕐᑐᕐᓗᒋᑦ ᓄᓇᓕᖕᓂᑦ ᓄᓇᓕᖕᓄᑦ. 35 ᑕᒪᓐᓇ ᐱᑦᔪᑎᒋᓪᓗᒍ ᓱᒋᐊᕐᑕᐅᓂᕐᒧᑦ ᑎᑭᑕᐅᔪᒫᕐᐳᓯ, ᐸᓯᔭᒃᓴᐅᖏᑦᑐᓂᒃ ᐃᓄᐊᖃᑦᑕᕐᓂᑦᓯᓐᓄᑦ ᓄᓇᕐᔪᐊᕐᒥ, ᐂᐱᓕᐅᑉ ᐸᓯᔭᒃᓴᐅᖏᑦᑑᑉ ᐃᓄᐊᕐᑕᐅᓂᖓᓂᑦ, ᓴᑲᕅᐊᐅᑉ ᐸᕋᑬᐊᐅᑉ ᐃᕐᓂᖓᑕ ᐃᓄᐊᕐᑕᐅᓂᖓ ᑎᑭᓪᓗᒍ, ᑖᓐᓇ ᐃᓄᐊᓚᐅᕐᑕᓯ ᑐᒃᓯᐊᕐᕕᒡᔪᐊᕐᒥ ᑐᓂᕐᕈᓯᕐᕕᐅᑉ ᐃᑦᔪᕐᓁᑦᑐᕕᐅᓪᓗ ᐊᑯᓐᓂᖓᓂ. 36 ᓱᓕᔪᒥᒃ ᐅᖃᐅᑎᕙᑦᓯ, ᓱᒋᐊᕐᑕᐅᓂᖅ ᑕᒪᓐᓇ ᑎᑭᑦᓱᒫᕐᐳᖅ ᐅᓪᓗᒥ ᐃᓅᔪᓄᑦ.” ᔩᓱᓯᐅᑉ ᐅᒡᒍᐊᕈᑎᖃᕐᓂᖓ ᔨᕉᓴᓕᒻᒥᒃ ᓘᑲᓯ 13:34-35 37 “ᐆ ᔨᕉᓴᓕᒻ, ᔨᕉᓴᓕᒻ, ᓇᓚᐅᑦᑍᔪᓂᒃ ᑐᖁᑦᓯᔪᑎᑦ, ᑎᓕᔭᐅᔪᓂᒡᓗ ᐅᔭᖅᑲᓄᑦ ᒥᓪᓗᕐᑐᑎᑦ! ᐃᓄᖁᑎᑎᑦ ᐅᓄᕐᑐᐃᕐᓱᕐᓗᖓ ᐃᕿᑦᓱᒪᖃᑦᑕᓚᐅᕋᓗᐊᕐᐸᒃᑲ, ᐊᕐᓇᕕᐊᑉ ᕿᑐᕐᖓᒥᓂᒃ ᐃᓴᕈᕐᒥᓄᑦ ᑲᑎᑎᑦᓯᕙᖕᓂᖓᑎᑐᑦ, ᑍᒤᑕᐅᔪᒪᓚᐅᖏᑦᑐᓯᓕ! 38 ᑕᑯᒋᑦ, ᑐᒃᓯᐊᕐᕕᒃᔪᐊᖁᑎᓯ ᕿᒪᒃᑕᐅᔪᒫᕐᐳᖅ ᐃᓄᖃᕈᓐᓁᕐᓗᓂ. 39 ᐅᖃᐅᑎᕙᑦᓯ, ᑕᑯᓂᐊᕈᓐᓃᕐᐸᑦᓯᖓ ᐅᖃᓚᐅᖅᑳᕐᑎᓐᓇᓯ, ‘ᒎᑎᐅᑉ ᓮᒻᒪᕐᓕᐅᒃ ᐊᑕᓂᐅᑉ ᐊᑎᖓᓂ ᑎᑭᑦᑐᖅ.’” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society