ᒫᑎᐅᓯᐅᑉ ᐊᒡᓚᖏᑦ 21 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯ ᓂᕐᑐᕐᑕᐅᒻᒪᕆᒡᓗᓂ ᔨᕉᓴᓕᒻᒧᑦ ᐃᑎᕐᓂᖓ

¹ ᔩᓱᓯ ᐃᓕᓐᓂᐊᕐᑎᖏᓪᓗ ᔨᕉᓴᓕᒻᒧᑦ ᑎᑭᓴᕐᑐᕐᐸᓪᓕᐊᓕᕐᓗᑎᒃ, ᐱᑦᐰᒋᒧᑦ ᑎᑭᑉᐳᑦ, ᖃᖅᑲᒧᑦ ᐅᕐᓱᒃᓴᐅᔪᓐᓇᕐᑐᓂᒃ ᐸᐅᓐᖓᖃᓲᓂᒃ ᓇᐹᕐᑐᓕᖕᒧᑦ, ᑕᕝᕙᓐᖓᑦ ᐃᓕᓐᓂᐊᕐᑎᒥᓂᒃ ᒪᕐᕉᖕᓂᒃ ᑎᓕᓯᕗᖅ ᓯᕗᓂᕐᒥᓄᑦ ᐂᖁᓪᓗᒋᒃ.

² ᐃᒫᒃ ᐅᖃᐅᑎᓪᓗᒋᒃ: “ᓄᓇᓕᖕᓄᐊᕆᑦᑎᒃ ᓯᕗᓂᑦᓯᓐᓃᑦᑐᓄᑦ, ᑕᕝᕗᓐᖓᕈᑦᓯᒃ ᑕᑯᓂᐊᕐᐳᓯᒃ ᓯᐅᑎᖅᑯᕐᑐᔪᒥᒃ ᐃᐱᕐᓯᒪᔪᒥᒃ ᓄᕐᕋᖓᓗ ᓴᓂᐊᓃᓐᓂᐊᕐᐳᖅ; ᑖᒃᑯᐊᒃ ᐃᐲᑦᔮᕐᓗᒋᒃ ᕾᑦᔪᑎᓂᐊᕐᐸᓯᒃ.

³ ᐅᖃᐅᑦᔭᐅᒍᑦᓯᒡᓕ ᖃᓄᑐᐃᓐᓇᖅ, ᐅᖃᐅᑎᓂᐊᕐᐸᓯᒃ, ‘ᐊᑕᓂᐅᑉ ᐊᑐᕈᒪᖕᒪᒋᒃ’; ᑕᕝᕔᓐᓇᖅ ᐃᓕᑦᓯᖕᓄᑦ ᐱᔭᐅᖁᓕᕐᓂᐊᕐᐹᒃ.”

⁴ ᑕᒪᓐᓇ ᐱᓂᐊᕐᓂᐅᓚᐅᕐᐳᖅ ᓇᓚᐅᑦᑍᔪᑉ ᐅᖃᐅᓯᕆᔭᕕᓂᖏᑦ ᓇᓚᐅᑦᓯᖁᓪᓗᒋᑦ ᐃᒤᓕᔪᑦ:

⁵ “ᓮᐅᓂᐅᑉ ᐃᒡᓗᒐᓴᖏᑦ ᐅᖃᐅᑎᓯᐅᒃ, ᑕᑯᒋᑦ, ᐊᖓᔪᖅᑳᕐᔪᐊᓯ ᕾᓕᕐᐳᖅ! ᐃᒻᒥᓂᒃ ᒥᑭᓕᑎᕐᓗᓂ ᓯᐅᑎᖅᑯᕐᑐᔫᑉ ᖄᖓᓂ ᐃᑭᒪᓪᓗᓂ, ᓯᐅᑎᖅᑯᕐᑐᔫᑉ ᓄᕐᕋᖓᓂ.”

⁶ ᑕᕝᕙ ᐃᓕᓐᓂᐊᕐᑎᖏᒃ ᑕᕝᕗᓐᖓᕐᐴᒃ ᐱᓇᓱᐊᕐᓗᑎᒡ ᑍᒫᒃ ᐱᓇᓱᐊᖁᔭᐅᒐᒥᒃ:

⁷ ᓯᐅᑎᖅᑯᕐᑐᔪᒥᒃ ᑕᕝᕗᓐᖓᐅᑦᔨᕘᒃ ᓄᕐᕋᖓᓂᒡᓗ, ᐊᓐᓄᕌᒥᖕᓂᒃ ᐃᑭᒻᒪᕕᓕᕐᓗᒍ, ᔩᓱᓯ ᖄᖓᓄᑦ ᐃᑭᕗᖅ.

⁸ ᐃᓄᒐᓴᒡᔪᐊᑦ ᐃᓚᖏᑦ ᐅᓕᒡᔪᐊᒥᖕᓂᒃ ᐊᖅᑯᑎᒧᑦ ᐃᓯᕕᑎᕆᕗᑦ, ᐃᓚᖏᓪᓕ ᓇᐹᕐᑑᑉ ᐊᕙᓚᖓᔪᖏᓐᓂᒃ ᓇᑲᑎᕆᓪᓗᑎᒃ ᐊᖅᑯᑎᒧᑦ ᐃᓯᕕᑎᕆᕗᑦ.

⁹ ᐃᓄᒐᓴᒡᔪᐊᑦ ᔩᓱᓯᐅᑉ ᓯᕗᓂᖓᓂ ᐱᓱᒃᑐᑦ, ᑭᖑᓂᖓᓃᑦᑐᓪᓗ ᕾᒐᓛᓕᕐᐳᑦ, “ᕼᐆᓵᓇ ᑍᕕᑎᐅᑉ ᐃᕐᓂᖓ ᓂᕐᑐᕐᑕᐅᓕ, ᒎᑎᐅᑉ ᓮᒻᒪᕐᓕᐅᒃ ᐊᑕᓂᐅᑉ ᐊᑎᖓᓂ ᑎᑭᑦᑐᖅ! ᕼᐆᓵᓇ ᓂᕐᑐᕐᑕᐅᓕ ᖁᑦᓯᖕᓂᕐᐹᖅ!”

¹⁰ ᔩᓱᓯ ᔨᕉᓴᓕᒻᒧᐊᕐᒪᑦ, ᓄᓇᓕᓕᒫᑦ ᑕᕝᕙᓃᑦᑐᑦ ᖁᐊᕐᓵᖓᓕᕐᐳᑦ, ᐃᓄᐃᓪᓗ ᐅᖃᕐᐳᑦ, “ᑭᓇᐅᓇ?”

¹¹ ᐃᓄᒐᓴᒡᔪᐊᑦ ᐅᖃᕐᐳᑦ, “ᐅᓇ ᓇᓚᐅᑦᑍᔨ ᔩᓱᓯ ᓈᓴᕇᑎᒥᑦ ᒐᓕᓕᐊᒦᑦᑐᒥᑦ ᐱᔪᖅ.”

ᔩᓱᓯᐅᑉ ᑐᒃᓯᐊᕐᕕᒡᔪᐊᕐᒧᐊᕐᓂᖓ

¹² ᔩᓱᓯ ᑐᒃᓯᐊᕐᕕᒡᔪᐊᕐᒧᐊᕋᒥ ᑕᕝᕙᓃᑦᑐᓕᒫᑦ ᐊᓂᑎᑉᐰᑦ ᓂᐅᕕᕋᓱᒃᑐᑦ ᓂᐅᕐᕈᑎᖃᕐᑐᓪᓗ, ᑮᓇᐅᔭᓂᒡᓗ ᑕᐅᕐᓰᔩᑦ ᓵᖏᑦ ᐅᕐᕈᑎᑉᐰᑦ ᐊᕿᒡᒋᐅᔮᕐᑐᓂᒡᓗ ᓂᐅᕐᕈᑎᓖᑦ ᐃᒃᓯᕙᐅᑕᖏᑦ ᐅᕐᕈᑎᒃᑭᕔᑦ,

¹³ ᐅᖃᐅᑎᓪᓗᒋᑦ, “ᒎᑎᐅᑉ ᐅᖃᐅᓯᖏᓐᓂ ᐅᖃᕐᓯᒪᕗᖅ; ‘ᐃᒡᓗᒐ ᑍᔭᐅᔭᕆᐊᕐᐳᖅ ᑐᒃᓯᐊᕐᕕᖕᒥᒃ’; ᐃᓕᑦᓯᓕ ᑎᒡᓕᒃᑎᓄᑦ ᐃᔨᕐᓯᒪᕕᐅᑎᑉᐸᓯ!”

¹⁴ ᑕᐅᑐᖏᑦᑐᑦ ᑐᓯᐊᑦᑐᓪᓗ ᔩᓱᓯᒧᐊᕐᐳᑦ ᑐᒃᓯᐊᕐᕕᒡᔪᐊᕐᒥ, ᑖᒃᑯᐊ ᐋᖅᑭᒃᐰᑦ.

¹⁵ ᑐᓂᕐᕈᓯᕐᑎᑦᓯᔩᓪᓕ ᐊᖓᔪᖅᑳᖏᑦ ᐱᖁᔭᓂᒡᓗ ᐃᓕᓮᔩᑦ ᓂᓐᖓᐅᒪᓕᕐᐳᑦ, ᑕᑯᒐᒥᒃ ᔩᓱᓯᐅᑉ ᐱᓂᐊᕐᓂᖏᓐᓂᒃ ᑲᒪᓇᕐᑐᓂᒃ, ᓱᕈᓰᓪᓗ ᑕᕝᕙᓂ ᑐᒃᓯᐊᕐᕕᒡᔪᐊᕐᒥ ᕾᒐᓛᕐᓂᖏᓐᓄᑦ, “ᕼᐆᓵᓇ ᑍᕕᑎᐅᑉ ᐃᕐᓂᖓ!”

¹⁶ ᑕᕝᕙ ᑖᒃᑯᐊ ᔩᓱᓯ ᐅᖃᐅᑎᕚᑦ, “ᑐᓵᕖᑦ, ᓱᕈᓰᑦ ᖃᓄᐃᓕᖕᒪᖔᑕ?” ᔩᓱᓯᐅᑉ ᑭᐅᕔᑦ, “ᑐᓵᑦᓯᐊᕐᐸᒃᑲ, ᒎᑎᐅᑉ ᐅᖃᐅᓯᖏᓐᓂᒃ ᐅᖃᓕᒫᓚᐅᕐᓯᒪᓐᖏᓚᓰ ᐃᒤᓕᔪᓂᒃ, ‘ᓱᕈᓯᑯᓗᖕᓂᑦ ᓄᑕᕋᓛᓂᓪᓗ ᐊᒪᒪᒃᑐᓂᑦ ᐊᑐᐃᓐᓇᕈᐃᓚᐅᕐᐳᑎᑦ ᖃᓂᖏᑎᒍᑦ ᓂᕐᑐᕐᑕᐅᔪᒪᓪᓗᑎᑦ.’”

¹⁷ ᑕᕝᕙ ᕿᒪᒃᓗᒋᑦ, ᑕᕝᕙᓐᖓᑦ ᐃᒡᓗᒐᓴᖕᓂᑦ ᐊᐅᓪᓚᕐᐳᖅ ᐱᑕᓂᒧᐊᕐᓗᓂ, ᑕᕝᕙᓂ ᐅᓐᓄᐊᒥ ᓯᓂᒃᑕᕐᐳᖅ.

ᔩᓱᓯᐅᑉ ᓇᐹᕐᑐᒥᒃ ᐸᐅᕐᖓᓕᖕᒥᒃ ᐅᖃᕐᓂᕐᓘᑦᔨᓂᖓ

¹⁸ ᐅᓪᓛᒃᑯᑦ ᔩᓱᓯ ᔨᕉᓴᓕᒻᒧᑦ ᐅᑎᕐᐸᓪᓕᐊᓕᕐᓗᓂ, ᑳᓕᕐᐳᖅ.

¹⁹ ᓇᐹᕐᑐᒥᒡᓗ ᐸᐅᕐᖓᓕᒃᓴᒥᒃ ᐊᖅᑯᑎᐅᑉ ᓴᓂᐊᓃᑦᑐᒥᒃ ᑕᑯᒐᒥ ᐅᐸᒃᐹ, ᓇᓂᓯᓐᖏᓚᕐᓗ ᐱᕈᕐᑐᖏᓐᓂᒃ ᐅᖃᐅᔭᖃᑐᐃᓐᓇᕐᒪᑦ. ᓇᐹᕐᑐᖅ ᐅᖃᐅᑎᕚ, “ᐱᕈᕐᕕᐅᒃᑲᓐᓂᓚᐅᕐᓯᒪᑦᔮᔪᓐᓃᕐᐳᑎᑦ!” ᑕᕝᕔᓐᓇᖅ ᓇᐹᕐᑐᖅ ᐸᐅᕐᖓᓕᒃᓴᖅ ᑐᖁᓕᕗᖅ.

²⁰ ᐃᓕᓐᓂᐊᕐᑎᖏᓪᓕ ᑕᒪᑐᒥᖓ ᑕᑯᓐᓈᕋᒥᒃ ᑲᒪᓂᐊᕐᐳᑦ ᐅᖃᕐᓗᑎᒃ, “ᖃᓄᐊᓗᖑᓇ ᓇᐹᕐᑐᖅ ᐸᐅᕐᖓᓕᒃᓴᖅ ᕿᓚᒥᑯᓗᒃ ᑐᖁᓕᑲᐅᕐᑐᕐᐹ?”

²¹ ᔩᓱᓯᐅᑉ ᑭᐅᕔᑦ, “ᓱᓕᔪᒥᒃ ᐅᖃᐅᑎᕙᑦᓯ, ᐅᒃᐱᕈᑦᓯ ᖁᓚᖏᑦᓯᐊᕐᓗᓯ, ᑍᒫᒃᑕᐅᖅ ᐱᔪᓐᓇᕐᐳᓯ ᐱᓂᐊᕐᓂᕆᕋᑖᕐᑕᑦᑐᑦ ᓇᐹᕐᑐᒧᑦ, ᑍᒤᑦᑐᑐᐃᓐᓇᕐᒨᓐᖏᑦᑐᕐᓕ, ᐊᒡᓛᑦ ᖃᖅᑲᒧᑦ ᐆᒧᖓ ᐅᖃᕈᑦᓯ, ‘ᑕᕝᕙᓐᖓᑦ ᖃᖓᑦᑕᕐᓗᑎᑦ ᐃᒫᓄᑦ ᑲᑕᓕᕆᑦ,’ ᑕᕝᕙ ᑍᒤᓐᓂᐊᕐᐳᖅ.

²² ᓱᓇᑐᐃᓐᓇᑦᓯᐊᒥᒡᓗ ᑐᒃᓯᐊᕈᑦᓯ, ᑕᕝᕙ ᑐᓂᓯᕕᐅᓂᐊᕐᐳᓯ, ᐅᒃᐱᕈᑦᓯ.”

ᔩᓱᓯᐅᑉ ᐊᐱᕆᔭᐅᓂᖓ ᓇᑭᑦ ᐱᔪᓐᓇᕐᓂᖃᕐᑎᑕᐅᓂᖓᓂᒃ

²³ ᔩᓱᓯ ᑐᒃᓯᐊᕐᕕᒡᔪᐊᕐᒧᑦ ᐃᑎᕐᒪᑦ, ᐊᔪᕆᕐᑐᐃᓕᕐᑎᓪᓗᒍ ᑕᕝᕙᓂ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᔫᑎᓪᓗ ᐊᖓᔪᖅᑳᖏᑦ ᔩᓱᓯᒧᐊᕐᐳᑦ ᐅᖃᕐᓗᑎᒃ, “ᓇᑭᑦ ᐱᔪᓐᓇᕐᓂᖃᕐᑎᑕᐅᓪᓗᑎᑦ ᑕᒪᒃᑯᓂᖓ ᐱᓇᓱᐊᖃᑦᑕᕐᐲᑦ, ᑭᓇᒧᑦ ᐱᓇᓱᐊᕈᓐᓇᕐᑎᑕᐅᒐᕕᑦ?”

²⁴ ᔩᓱᓯᐅᑉ ᑭᐅᕔᑦ, “ᐊᐱᕆᓂᐊᕐᐸᑦᓯᑦᑕᐅᖅ ᐊᐱᖅᑯᓯᕐᒧᑦ ᐊᑕᐅᓯᕐᒧᑦ; ᑭᐅᔪᓐᓇᕈᑦᓯᓐᖓ, ᑕᕝᕙ ᐅᖃᐅᑎᓂᐊᕐᐸᑦᓯ ᓇᑭᑦ ᐱᔪᓐᓇᕐᓂᖃᕐᑎᑕᐅᖕᒪᖔᕐᒪ ᐱᓇᓱᐊᕈᓐᓇᖁᓪᓗᖓ ᑕᒪᒃᑯᓂᖓ.

²⁵ ᔪᐊᓇᓯᐅᑉ ᐹᑉᑎᑦᓯᖃᑦᑕᕐᓂᖓ ᓇᑭᑦ ᐱᔪᓐᓇᕐᓂᖃᕐᑎᑕᐅᕚ, ᒎᑎᒦᑦ, ᐅᕝᕙᓗ ᐃᓄᖕᓂᑦ?” ᑕᕝᕙ ᐃᒻᒥᖕᓄᑦ ᐅᖃᖃᑦᑕᐅᑎᓕᕐᐳᑦ, “ᐅᖃᕈᑦᑕ, ‘ᒎᑎᒥᑦ ᐱᕗᖅ,’ ᐅᖃᐅᑎᓂᐊᕐᐹᑎᒍᑦ, ‘ᓱᖕᒪᓪᓕ ᐅᒃᐱᕆᓚᐅᖏᑉᐱᓯᐅᒃ?’

²⁶ ᐅᖃᕐᒥᒍᑦᑕᓕ, ‘ᐃᓄᖕᓂᑦ ᐱᕗᖅ,’ ᐃᓄᒐᓴᒡᔪᐊᓂᒃ ᑲᑉᐱᐊᓱᒃᐳᒍᑦ; ᐃᓄᐃᑦ ᖁᓚᖏᑦᓯᐊᕐᒪᑕ ᔪᐊᓇᓯ ᓇᓚᐅᑦᑍᔫᓂᖓᓂᒃ”

²⁷ ᑕᕝᕙ ᔩᓱᓯ ᑭᐅᕚᑦ, “ᖃᐅᔨᒪᓐᖏᓚᕗᑦ.” ᔩᓱᓯᐅᑉ ᐅᖃᐅᑎᕔᑦ, “ᐅᕙᖓᑦᑕᐅᖅ ᐅᖃᐅᑎᓂᐊᓐᖏᓚᑦᓯ ᓇᑭᑦ ᐱᔪᓐᓇᕐᓂᖃᕐᑎᑕᐅᓪᓗᖔ ᐱᓇᓱᐊᑲᑦᑕᕐᒪᖔᕐᒪ.”

ᓄᑲᕇᒃ ᒪᕐᕉᒃ ᐊᑦᔨᐅᑎᑕᐅᓂᖓᒃ

²⁸ “ᖃᓄᕐᓕ ᐃᓱᒪᕕᓰ? ᐊᖑᑎᑕᖃᓚᐅᕐᐳᖅ ᒪᕐᕉᖕᓂᒃ ᐃᕐᓂᓕᖕᒥᒃ; ᐃᕐᓂᓂᓗ ᐊᖓᔪᒃᓕᖅ ᐅᐸᒃᓗᒍ ᐅᖃᐅᑎᕚ, ‘ᐃᕐᓃᒃ, ᐅᓪᓗᒥ ᐸᐅᕐᒐᓂᒃ ᐅᐂᓂᒃᓴᐅᓂᐊᕐᑐᓂᒃ ᐱᕈᕐᓰᕕᖁᑎᓂ ᐱᓇᓱᐊᕆᐊᕐᑐᓚᐅᕆᑦ.’

²⁹ ᑖᑦᓱᒪ ᑭᐅᕚ, ‘ᑕᐅᕗᓐᖓᕈᒪᖏᓐᓇᒪ,’ ᑭᖑᓂᖓᒍᓪᓕ ᖃᕿᐊᓕᕋᒥ ᐱᕈᕐᓰᕕᓕᐊᕐᐳᖅ.

³⁰ ᑕᕝᕙ ᐊᑖᑕᖓ ᓄᑲᕐᖠᕐᒧᑦ ᐅᐸᒍᑎᒋᕗᖅ ᑍᒫᑦᓮᓐᓇᖅ ᐅᖃᐅᑎᓪᓗᓂᐅᒃ; ᑖᑦᓱᒪ ᑭᐅᕚ, ‘ᐄ, ᑕᐅᕗᓐᖓᕐᓂᐊᕐᐳᖓ,’ ᐱᓇᓱᐊᕆᐊᕐᑐᓚᐅᕋᓂᓗ.

³¹ ᓇᓪᓕᐊᒃ ᑍᒪ ᐊᑖᑕᒥ ᐱᓇᓱᐊᕐᑕᐅᖁᔭᖓᓂᒃ ᐱᓇᓱᐊᓚᐅᕐᐹ?” ᑖᒃᑯᐊ ᑭᐅᕚ, “ᑖᓐᓇ ᐊᖓᔪᒃᖠᖅ.” ᑕᕝᕙ ᔩᓱᓯᐅᑉ ᐅᖃᐅᑎᕔᑦ, “ᓱᓕᔪᒥᒃ ᐅᖃᐅᑎᕙᑦᓯ, ᕉᒪᒥᐅᑦ ᑮᓇᐅᔧᕐᑎᑦᓯᔨᖁᑎᖏᑦ ᐊᖑᓐᓂᐊᕐᑏᓪᓗ ᐊᑐᒐᐅᓪᓗᑎᒃ ᓯᕗᓪᓕᐅᓗᑎᒃ ᐃᓕᑦᓯᓐᓂᑦ ᒎᑎᐅᑉ ᐊᑕᓂᐅᕕᖓᓄᐊᖅᑳᕈᒫᕐᐳᑦ.

³² ᔪᐊᓇᓯ ᐹᑉᑎᑎᕆᔨ ᐃᓕᑦᓯᓐᓄᐊᓚᐅᕐᐳᖅ ᑕᑯᑎᑦᓯᓪᓗᓂ ᐊᖅᑯᒻᒥᒃ ᓇᓛᒎᕐᑐᒥᒃ ᐊᑐᕐᑕᐅᔪᓐᓇᕐᑐᒥᒃ, ᐅᒃᐱᓚᐅᓐᖏᓚᓯᓕ; ᕉᒪᒥᐅᑦ ᑮᓇᐅᔧᕐᑎᑦᓯᔨᖁᑎᖏᑦ ᐊᖑᓐᓂᐊᕐᑏᓪᓗ ᑖᑦᓱᒥᖓ ᐅᒃᐱᕈᓱᓚᐅᕐᐳᑦ; ᑕᒪᑐᒥᖓ ᑕᑯᓕᕋᓗᐊᕋᑦᓯ ᑭᖑᓂᖓᒍᑦ ᖃᕿᐊᓕᓚᐅᓐᖏᓚᓯ ᔪᐊᓇᓯᓗ ᐅᒃᐱᕆᓚᐅᕐᓇᓯᐅᒃ.”

ᐅᐂᓂᓕᒃᓴᒥᒃ ᑲᒪᔩᑦ ᐊᑦᔨᐅᑎᑕᐅᓂᖏᑦ

³³ ᔩᓱᓯ ᐅᖃᕐᐳᖅ, “ᑐᓴᒃᑲᓐᓂᓚᐅᕆᑦᓯ ᐊᑦᔨᐅᔫᑉ ᐊᓯᐊᓂᒃ; ᑍᑦᓱᒪᓂ ᓄᓇᖁᑎᓕᒃ ᐸᐅᕐᒐᓂᒃ ᐅᐂᓂᒃᓴᐅᓂᐊᕐᑐᓂᒃ ᐱᕈᕐᓰᕕᖁᑎᒥᓂ ᑲᓐᖓᕐᓱᐃᓚᐅᕐᐳᖅ, ᑖᓐᓇ ᐱᕈᕐᓰᕕᖁᑎᓂ ᐊᕙᓗᓕᐅᕐᐹ, ᐃᑎᕐᓴᓕᐅᕐᓗᒋᓪᓗ ᐅᐂᓂᖃᐅᑎᒃᓴᓂᒃ ᐋᖅᑭᒃᓱᐃᓚᐅᕐᐳᖅ, ᐳᕐᑐᔪᒥᒃ ᖃᐅᔨᓴᕐᕕᒃᓴᒥ ᓴᓇᓪᓗᓂ, ᐱᕈᕐᓰᕕᒃ ᐊᑐᕐᑕᐅᑎᑉᐹ ᐱᕈᕐᓰᕕᖕᒥᒃ ᑲᒪᔨᓄᑦ, ᓄᓇᐅᓪᓗ ᐊᓯᐊᓄᑦ ᐊᐅᓪᓚᕐᖢᓂ.

³⁴ ᐸᐅᕐᖓᓂᒡᓕ ᑲᑎᕐᓯᕕᒃ ᓇᓪᓕᐅᑎᓕᕐᒪᑦ, ᐱᔨᓂ ᑎᓕᕔᑦ ᐱᕈᕐᓰᕕᖕᒥᒃ ᑲᒪᔨᓄᑦ ᑲᑎᕐᓱᕐᑕᖏᓐᓂᒃ ᐸᐅᕐᖓᓂ ᐱᖃᑕᐅᔪᒪᓪᓗᓂ;

³⁵ ᐱᕈᕐᓰᕕᖕᒥᒡᓕ ᑲᒪᔩᑦ ᐱᖁᑎᓕᐅᑉ ᐱᔨᖏᑦ ᑎᒍᕔᑦ, ᐃᓚᖓᑦ ᐋᓐᓂᕐᓯᕐᐹᑦ, ᐃᓚᖓᑦ ᑐᖁᓪᖢᒍ, ᐃᓚᖓᓪᓗ ᐅᔭᖅᑲᓄᑦ ᒥᓪᓗᕐᐹᑦ.

³⁶ ᑭᖑᓂᖓᒍᑦ ᓱᓕ ᑎᓕᓯᒃᑲᓐᓂᕐᐳᖅ ᐱᔨᒥᓂᒃ, ᓯᕗᓪᓕᕐᒥᑦ ᐅᓄᕐᓂᕐᓴᓂᒃ; ᑖᒃᑯᐊᓕ ᐱᕈᕐᓰᕕᖕᒥᒃ ᑲᒪᔩᑦ ᑍᒫᑦᓮᓐᓇᖅ ᐱᓂᐊᕐᕕᒋᒋᕔᑦ.

³⁷ ᑭᖑᓪᓕᕐᐹᒥᒡᓕ ᐃᕐᓂᓂ ᑎᓕᓕᕆᕚ ᑖᒃᑯᓄᖓ, ᐅᖃᕐᓗᓂ, ‘ᖁᓚᕐᓇᓐᖏᓚᖅ ᐃᕐᓂᕋ ᐃᓕᕋᒋᓂᐊᕐᐹᑦ.’

³⁸ ᐱᕈᕐᓰᕕᖕᒥᒡᓕ ᑲᒪᔩᑦ, ᐱᖁᑎᓕᐅᑉ ᐃᕐᓂᖓ ᑕᑯᒐᒥᑦᔪᒃ, ᐃᒻᒥᖕᓄᑦ ᐅᖃᕐᐳᑦ, ‘ᐅᓇ ᐱᖁᑎᓕᐅᑉ ᐃᕐᓂᖓ; ᐊᑏ ᑐᖁᓚᐅᕐᓚᕗᑦ ᑭᖑᕐᖑᑎᔭᒃᓴᖏᑦ ᐱᑖᕆᓂᐊᕋᑦᑎᒍ!’

³⁹ ᑕᕝᕙ ᑎᒍᕚᑦ, ᑕᕝᕙᓐᖓᓪᓗ ᐱᕈᕐᓰᕕᖕᒥᑦ ᐊᓂᑎᑉᐹᑦ, ᑐᖁᓪᖢᒍ.

⁴⁰ “ᑭᖑᓂᖓᒍᑦ ᐱᕈᕐᓰᕕᖕᒥᒃ ᐱᖁᑎᓕᒃ ᑎᑭᒃᑯᓂ, ᑖᒃᑯᐊ ᖃᓄᐃᓕᐅᓕᕋᔭᕐᐰᑦ ᑲᒪᔨᐅᔪᑦ ᐱᕈᕐᓰᕕᖕᒥ?”

⁴¹ ᑖᒃᑯᐊ ᐅᖃᕐᐳᑦ, “ᓂᑲᒋᖏᑦᓯᐊᕐᓗᒋᑦ ᐱᐅᖏᑦᑐᓕᔪᑦ ᑐᖁᒃᑲᔭᕐᐰᑦ, ᐱᕈᕐᓰᕕᒃ ᑲᒪᔨᓄᑦ ᐊᓯᖏᓐᓄᑦ ᑲᒪᒋᔭᐅᑎᓕᕋᔭᕐᐹ ᐱᕈᕐᑐᖏᓐᓂᒃ ᐱᖃᑕᐅᑎᑦᓯᖃᑦᑕᕋᔭᕐᑐᓄᑦ ᑲᑎᕐᓱᐃᕕᒃ ᓇᓪᓕᐅᑎᔭᕌᖓᑦ.”

⁴² ᔩᓱᓯᐅᑉ ᐅᖃᐅᑎᕔᑦ, “ᒎᑎᐅᑉ ᐅᖃᐅᓯᖏᓐᓂᒃ ᐅᖃᓕᒫᓚᐅᕐᓯᒪᓐᖏᓚᓰ ᐃᒤᓕᔪᓂᒃ? ‘ᐅᔭᕋᒃ ᑐᓐᖓᕕᒃᓴᖅ ᐃᒡᓗᓕᐅᕐᑎᓂᑦ ᓇᕐᕈᒋᔭᐅᔪᖅ ᑖᓐᓇ ᐱᓪᓚᕆᐊᓗᓐᖑᕐᐳᖅ ᑎᕆᖅᑰᓕᕐᓗᓂ; ᑕᒪᓐᓇ ᐊᑕᓂᐅᑉ ᓇᖕᒥᓂᖅ ᐱᓇᓱᐊᓚᐅᕐᐹ; ᐅᕙᑦᑎᓐᓄᓪᓗ ᑲᒪᓇᕐᑐᐊᓘᕗᖅ!’

⁴³ “ᑍᒤᒻᒪᑦ ᐅᖃᐅᑎᕙᑦᓯ, ᒎᑎᐅᑉ ᐊᑕᓂᐅᕕᖓᓂᒃ ᐊᕐᓵᕐᑕᐅᔪᒫᕐᐳᓯ ᑐᓂᔭᐅᖔᕐᓗᓂ ᐃᓄᖕᓄᑦ ᐱᕈᕐᑐᖃᕐᑎᑦᓯᔪᓐᓇᕐᑐᓄᑦ. [

⁴⁴ ᓇᓪᓕᐊᑦ ᑕᕝᕗᖓ ᐅᔭᕋᖕᒧᑦ ᑲᑕᒃᑐᖅ ᓯᖁᒥᓐᓂᐊᕐᐳᖅ; ᐅᔭᕋᒃ ᓇᓪᓕᐊᓐᓄᑦ ᑲᑕᒃᑯᓂ, ᑲᑕᒡᕕᒋᔭᒥᓂᒃ ᓯᖃᓪᓕᓯᓂᐊᕐᐳᖅ.]”

⁴⁵ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᐹᕆᓯᓪᓗ, ᔩᓱᓯᐅᑉ ᐊᑦᔨᐅᔪᕆᔭᖓᓂᒃ ᑐᓵᒐᒥᒃ, ᖃᐅᔨᕗᑦ ᐅᖃᐅᓯᕆᔭᐅᓂᕐᒥᖕᓂᒃ.

⁴⁶ ᑍᒤᒻᒪᑦ ᑎᒍᓇᓱᐊᕋᓗᐊᕐᐹᑦ, ᐃᓄᒐᓴᒡᔪᐊᓂᒡᓕ ᓯᕘᕋᕗᑦ, ᑖᒃᑯᐊ ᐃᓱᒪᖃᕐᒪᑕ ᓇᓚᐅᑦᑍᔫᓇᓱᒋᓪᓗᒍ.