ᒫᑎᐅᓯᐅᑉ ᐊᒡᓚᖏᑦ 19 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᔪᕆᕐᑐᐃᓂᖅ ᑲᑎᑎᑕᐅᓯᒪᓗᑎᒃ ᐊᕕᑦᓯᔪᒪᔪᓂᒃ

¹ ᔩᓱᓯ ᑕᒪᒃᑯᓂᖓ ᐅᖃᐅᓯᖃᕇᕋᒥ, ᒐᓕᓕᐊᒥᑦ ᐊᐅᓪᓚᕐᐳᖅ ᔫᑎᐊᑉ ᓄᓇᖓᓄᐊᕐᓗᓂ ᑰᑉ ᔪᐊᕐᑕᓂᐅᑉ ᐊᑭᐊᓄᑦ.

² ᐃᓄᒐᓴᒡᔪᐊᓂᓪᓗ ᒪᓕᒃᑕᐅᕗᖅ, ᑕᕝᕙᓂ ᖃᓂᒻᒪᓯᓖᑦ ᐋᖅᑭᒃᐰᑦ.

³ ᐹᕆᓯᓪᓕ ᐃᓚᖏᑦ ᔩᓱᓯᒧᐊᕐᐳᑦ ᐆᒃᑐᕐᓗᒍ ᐊᐱᕆᕚᑦ, “ᐱᖁᔭᕗᑦ ᐊᖑᒻᒥᒃ ᐊᕕᑦᓯᓪᓚᕆᒍᓐᓇᕐᑎᑦᓯᕚᑦ ᓄᓕᐊᒥᖕᓂᒃ, ᓱᓇᑐᐃᓐᓇᕐᒥᒃ ᐱᔪᑎᒃᓴᖃᕋᓗᐊᕈᑏᒃ?”

⁴ ᔩᓱᓯᐅᑉ ᑭᐅᕔᑦ, “ᒎᑎᐅᑉ ᐅᖃᐅᓯᖏᓐᓂᒃ ᐊᑐᐊᕐᓯᓚᐅᓐᖏᓚᓰ? ᐅᖃᕐᑐᖃᕐᒪᑦ, ‘ᐱᒋᐊᕐᓂᕐᒥ ᐱᓐᖑᕐᑎᑦᓯᔪᖅ ᐱᓐᖑᕐᑎᑦᓯᓚᐅᕐᒪᑦ ᐊᖑᒻᒥᒃ ᐊᕐᓇᒥᒡᓗ.’

⁵ “ᒎᑎ ᐅᖃᕐᓯᒪᕗᖅ, ‘ᑍᒤᒻᒪᑦ ᐊᖑᑎᐅᑉ ᐊᑖᑕᓂ ᐊᓈᓇᓂᓗ ᕿᒪᖕᓂᐊᕐᐹᒃ ᓄᓕᐊᓂ ᑲᑎᒫᖓᕈᒪᓗᒍ, ᑖᒃᑯᐊᒃᓗ ᒪᕐᕉᒃ ᑎᒥᒃᑯᑦ ᐊᑕᐅᓯᐅᓕᕐᓂᐊᕐᐳᒃ.’

⁶ ᑍᒤᒻᒪᑦ ᑖᒃᑯᐊᒃ ᒪᕐᕉᔪᓐᓃᕐᐴᒃ ᑎᒥᒃᑯᓪᓕ ᐊᑕᐅᓯᐅᓕᕐᐳᒃ. ᑍᒤᒻᒪᑦ ᒎᑎᐅᑉ ᑲᑎᑎᑕᖏᒃ, ᐃᓅᑉ ᐊᕕᑎᑕᒃᓴᕆᓐᖏᓛᒃ.”

⁷ ᑕᕝᕙ ᐹᕆᓯᑦ ᐅᖃᐅᑎᕚᑦ, “ᓱᖕᒪᓪᓕ ᑍᒪ ᒨᓯᓯ ᐱᖁᔭᒥᒃ ᐋᖅᑭᒃᓯᓚᐅᕐᐸ ᐊᖑᑦ ᐊᕕᑦᓯᓪᓚᕆᒃᑯᓂ ᑎᑎᖅᑲᓂᒃ ᐊᕕᑦᓯᑦᔪᑎᒥᓂᒃ ᓇᓗᓁᕐᓯᔪᓂᒃ ᓄᓕᐊᓂ ᑐᓂᓯᕕᒋᔭᒃᓴᕆᕚ, ᐊᐅᓪᓚᕐᑎᓪᓗᒍᓘ?”

⁸ ᔩᓱᓯᐅᑉ ᑭᐅᕔᑦ, “ᒨᓯᓯᐅᑉ ᐱᖁᔭᒥᒃ ᑍᒤᑦᑐᒥᒃ ᐋᖅᑭᒃᓯᕕᒋᓚᐅᕐᐹᓯ ᐊᕕᑦᓯᓪᓚᕆᒍᓐᓇᕐᓯᑎᑦᓯᓂᕐᒥᒃ ᓄᓕᐊᑦᓯᓐᓂᒃ, ᐊᔪᕆᕐᑐᕐᑕᐅᔭᕆᐊᒃᓴᖅ ᓯᑎᔪᐊᓘᓂᓯ ᐱᓪᓗᒍ, ᑭᓯᐊᓂ ᑕᒪᓐᓇ ᑍᒤᓕᖓᓚᐅᓐᖏᓚᖅ ᐱᓐᖑᕐᑎᑕᐅᓕᕐᑎᓪᓗᒋᑦ.

⁹ ᑍᒤᒻᒪᑦ ᐅᖃᐅᑎᕙᑦᓯ; ᓇᓪᓕᐊᑦ ᓄᓕᐊᒥᓂᒃ ᐊᕕᑦᓯᓪᓚᕆᒃᐸᑦ, ᐊᓯᓐᓂᐊᕐᓂᕐᒥᒃ ᐱᑦᔪᑎᖃᖏᓪᓗᓂ, ᐊᓯᐊᓂᒡᓗ ᓄᓕᐊᓂᒡᓗᓂ ᑖᓐᓇ ᓄᓕᐊᕆᓚᐅᕐᑕᒥᓂᒃ ᐊᓯᓐᓂᐊᕐᐳᖅ.”

¹⁰ ᑕᕝᕙ ᐃᓕᓐᓂᐊᕐᑎᖏᑕ ᐅᖃᐅᑎᕚᑦ, “ᑕᕝᕙᓕ ᑍᒤᓕᖓᓕᕐᐸᑦ ᐊᖑᑎᑦ ᐊᕐᓁᓪᓗ ᓄᓕᐊᓂᖃᑦᑕᖏᓪᓗᑎᒃ ᐱᐅᓂᕐᓴᐅᕗᖅ!”

¹¹ ᔩᓱᓯᐅᑉ ᑭᐅᕔᑦ, “ᑕᒪᓐᓇ ᐅᖃᐅᓯᕆᔭᕋ ᑕᒤᓐᓄᑦ ᐃᓕᖓᓐᖏᓚᖅ, ᑐᓂᓯᕕᐅᓯᒪᔪᓄᓪᓕ ᑭᓯᐊᓂ ᑐᕌᖓᕗᖅ.

¹² ᐊᑦᔨᒌᖏᑦᑐᓂᒃ ᐱᑦᔪᑎᒃᓴᓕᖕᓂᒃ ᐊᖑᑎᓂᒃ ᓄᓕᐊᓂᔪᐃᑦᑐᕐᑕᖃᕐᒪᑦ: ᐃᓚᖏᑦ ᐃᕐᓂᐊᖑᓂᕐᒥᖕᓂᑦ ᑍᒤᑦᑑᔪᑦ: ᐃᓚᖏᓪᓕ ᐃᓅᖃᑎᒥᖕᓂᑦ ᓄᓕᐊᓂᒍᓐᓁᓪᓕᑎᑕᐅᓯᒪᔪᑦ; ᐃᓚᖏᓪᓕ ᓄᓕᐊᖃᓐᖏᓚᑦ ᐃᒻᒥᖕᓂᒃ ᑍᒤᑎᑦᑐᓂᒃ ᒎᑎᐅᑉ ᐊᑕᓂᐅᕕᖓ ᐱᓪᓗᒍ. ᑕᒪᑐᒥᖓ ᐅᖃᐅᓯᕆᔭᓐᓂᒃ ᐃᓚᓕᐅᕐᓯᔪᓐᓇᕐᑐᖅ, ᐃᓚᓕᐅᕐᓯᓕᕐᓕ.”

ᔩᓱᓯᐅᑉ ᓱᕈᓯᑯᓗᖕᓂᒃ ᓮᒻᒪᕐᑎᑦᓯᓂᖓ

¹³ ᐃᓚᖏᓪᓕ ᓱᕈᓯᑯᓗᖕᓂᒃ ᔩᓱᓯᒧᐊᕈᑦᔨᕗᑦ ᐸᑎᒻᒥᓂᐊᕐᒪᒋᑦ ᑐᒃᓯᐅᑎᓗᓂᒋᓪᓗ. ᐃᓕᓐᓂᐊᕐᑎᖏᑕᓕ ᑕᕝᕗᓐᖓᐅᑦᔨᔪᑦ ᐃᓂᕐᑎᕐᐰᑦ.

¹⁴ ᔩᓱᓯ ᐅᖃᕐᐳᖅ, “ᓱᕈᓯᑯᓗᐃᑦ ᐅᕙᓐᓄᑦ ᕾᑎᑕᐅᓕᑦ, ᐊᒡᕕᐊᖏᓪᓗᓯᐅᒃ; ᑍᒤᑦᑐᓄᑦ ᒎᑎᐅᑉ ᐊᑕᓂᐅᕕᖓ ᐱᒋᔭᐅᖕᒪᑦ.”

¹⁵ ᔩᓱᓯᐅ ᐸᑎᒻᒥᕔᑦ, ᑭᖑᓂᖓᒍᓪᓗ ᑕᕝᕙᓐᖓᑦ ᐊᐅᓪᓚᕐᐳᖅ.

ᐃᓅᓱᒃᑐᖅ ᐊᖑᑦ ᐊᔪᕐᓴᖏᑦᑐᖅ

¹⁶ ᑍᑦᓱᒪᓂ ᐊᖑᒻᒥᒃ ᔩᓱᓯᒧᐊᕐᑐᖃᕐᐳᖅ ᐅᖃᕐᓗᓂ, “ᐊᔪᕆᕐᑐᐃᔩ, ᖃᓄᖅ ᐱᐅᔪᒥᒃ ᐱᓂᐊᕐᑐᒃᓴᐅᕗᖔ, ᐃᓅᓯᕐᒥᒃ ᓄᖑᓱᐃᑦᑐᒥᒃ ᐱᔪᓐᓇᖁᓪᓗᖔ?”

¹⁷ ᔩᓱᓯᐅᑉ ᑭᐅᕚ, “ᓱᖕᒪᑦ ᐊᐱᕆᕕᖓ ᓱᓇ ᐱᐅᖕᒪᖔᑦ? ᐊᑕᐅᓯᖅ ᑭᓯᒥ ᐱᐅᔪᑑᕗᖅ. ᐃᓅᓯᕐᒧᑦ ᓄᖑᓱᐃᑦᑐᒧᑦ ᐃᑎᕈᒪᒍᕕᑦ ᐱᖁᔭᓂᒃ ᒪᓕᑦᓯᐊᓕᕆᑦ.”

¹⁸ ᑖᑦᓱᒪ ᐅᖃᐅᑎᕚ, “ᓇᓪᓕᐊᓐᓂᒃ?” ᔩᓱᓯᐅᑉ ᐅᖃᐅᑎᕚ, “ᐃᓄᐊᕐᑐᒃᓴᐅᓐᖏᓚᑎᑦ; ᐊᓯᓐᓂᐊᕐᑐᒃᓴᐅᓐᖏᓚᑎᑦ; ᑎᒡᓕᒃᑐᒃᓴᐅᓐᖏᓚᑎᑦ; ᐃᓅᖃᑎᖕᓂᒃ ᓱᓕᖏᑦᑐᒥᒃ ᐅᖃᐅᓯᖃᕐᑐᒃᓴᐅᓐᖏᓚᑎᑦ;

¹⁹ ᐊᑖᑕᖕᓂᒃ ᐊᓈᓇᖕᓂᒡᓗ ᐅᐱᖑᓱᑦᓯᐊᕐᑐᒃᓴᐅᕗᑎᑦ; ᐃᓅᖃᑎᓯᓗ ᓇᒡᓕᒋᔭᒃᓴᕆᕙᑦ ᓇᖕᒥᓂᖅ ᓇᒡᓕᒋᓂᕐᑐᑦ.”

²⁰ ᐃᓅᓱᒃᑑᑉ ᐅᖃᐅᑎᕚ, “ᑕᒪᒃᑯᐊ ᐱᖁᔭᓕᒫᑦ ᒪᓕᓚᐅᕐᐸᒃᑲ, ᓱᓇᒥᒃ ᓱᓕ ᐱᓇᓱᐊᕆᐊᖃᕐᐳᖔ?”

²¹ ᔩᓱᓯᐅᑉ ᐅᖃᐅᑎᕚ, “ᓈᒻᒪᑦᓯᐊᕈᒪᒍᕕᑦ, ᐱᖁᑎᓕᒫᑎᑦ ᓂᐅᕐᕈᑎᒋᔭᕐᑐᒃᑭᑦ, ᑮᓇᐅᔭᕐᑖᑎᓪᓗ ᐊᔪᕐᓴᕐᑐᓄᑦ ᑐᓂᕐᕈᑎᒋᓗᒋᑦ, ᑕᕝᕙ ᐱᖁᑎᖃᑦᓯᐊᕐᓂᐊᕐᐳᑎᑦ ᕿᓚᖕᒥ; ᐊᑏ ᕾᓕᕆᑦ, ᒪᓕᒡᓗᖓ.”

²² ᐃᓅᓱᒃᑑᑉ ᑕᒪᓐᓇ ᑐᓴᕋᒥᐅᒃ ᑕᕝᕙᓐᖓᑦ ᕿᒪᕉᑎᓕᕐᐳᖅ ᕿᒃᓵᓕᕐᓗᓂ, ᐊᔪᕐᓴᖏᑦᑐᐊᓘᒐᒥ.

²³ ᔩᓱᓯ ᐃᓕᓐᓂᐊᕐᑎᒥᓄᑦ ᐅᖃᕐᐳᖅ, “ᓱᓕᔪᒥᒃ ᐅᖃᐅᑎᕙᑦᓯ: ᐃᓄᖕᓄᑦ ᐊᔪᕐᓴᖏᑦᑐᓄᑦ ᒎᑎᐅᑉ ᐊᑕᓂᐅᕕᖓᓄᑦ ᐃᑎᕆᐊᒃᓴᖅ ᐊᔪᕐᓇᑲᓴᖕᓂᐊᕐᐳᖅ.

²⁴ ᓱᓕ ᐅᖃᐅᑎᒃᑲᓐᓂᕐᐸᑦᓯ; ᐊᒡᓛᑦ ᐊᔪᕐᓇᖏᓐᓂᕐᓴᐅᕗᖅ ᑳᒥᓕ ᒥᖅᑯᑎᐅᑉ ᐃᔨᖓᒎᕆᐊᖓ, ᐊᔪᕐᓴᖏᑦᑑᑉ ᐃᓯᕋᔭᕐᓂᖓᓂᑦ ᒎᑎᐅᑉ ᐊᑕᓂᐅᕕᖓᓄᑦ.”

²⁵ ᐃᓕᓐᓂᐊᕐᑎᑦ ᑕᒪᑐᒥᖓ ᑐᓴᕋᒥᒃ ᐊᖏᔪᒥᒃ ᑲᒪᓕᕐᐳᑦ, ᐅᖃᕐᓗᑎᒃ, “ᑭᓇᓕ ᑍᒪ ᐱᐅᓕᔭᐅᔪᓐᓇᕐᓂᐊᕐᐸ?”

²⁶ ᔩᓱᓯᐅᑉ ᑕᑯᓴᕐᓗᒋᑦ ᐅᖃᐅᑎᕔᑦ, “ᑕᒪᓐᓇ ᐃᓄᖕᓄᑦ ᐊᔪᕐᓇᕐᐳᖅ; ᒎᑎᒧᓪᓕ ᓱᓇᓕᒫᓂᒃ ᐊᔪᕐᓇᕐᑐᖃᓐᖏᓚᑦ.”

²⁷ ᐲᑦᑐᕉᓯ ᓂᓪᓕᕐᐳᖅ ᐅᖃᕐᓗᓂ, “ᑕᑯᒋᑦ, ᓱᓇᓕᒫᑦᑎᓐᓂᒃ ᕿᒤᓚᐅᕐᐳᒍᑦ ᐃᓕᖕᓂᒃ ᒪᓕᒃᓗᑕ. ᓱᓇᒥᒃ ᐱᖃᕈᒫᓕᕐᐱᑕ?”

²⁸ ᔩᓱᓯᐅᑉ ᐅᖃᐅᑎᕔᑦ, “ᓱᓕᔪᒥᒃ ᐅᖃᐅᑎᕙᑦᓯ: ᐃᓅᑉ ᐃᕐᓂᖓ ᐃᒃᓯᕙᐅᑕᕐᔪᐊᕐᒥᓄᑦ ᐱᕕᐊᕐᓇᕐᑐᒧᑦ ᐃᖏᓪᓗᓂ ᓄᑖᒥᒃ ᐱᒋᐊᒃᑲᓐᓂᓕᕐᐸᑦ, ᑕᕝᕙ ᐃᓕᑦᓯ ᒪᓕᒃᑎᐅᔪᓯ ᐅᕙᓐᓄᑦ, ᐃᒃᓯᕙᖃᑕᐅᔪᒫᕐᐳᓯ ᐃᒃᓯᕙᐅᑕᕐᔪᐊᓂ 12ᓂ, ᐃᓴᕆᐊᓕᒥᐅᑦ ᑭᖑᕚᕇᑦ 12 ᐊᖓᔪᖅᑲᐅᕕᒋᓗᒋᑦ.

²⁹ ᑭᒃᑯᓕᒫᑦ ᐃᒡᓗᒥᖕᓂᒃ ᕿᒤᓯᒪᔪᑦ ᖃᑕᓐᖑᑎᒥᖕᓂᒡᓘᓐᓃᑦ ᓇᔭᒥᖕᓂᒡᓘᓐᓃᑦ ᐊᑖᑕᒥᖕᓂᒡᓘᓐᓃᑦ ᐊᓈᓇᒥᖕᓂᒡᓘᓐᓃᑦ ᕿᑐᕐᖓᒥᖕᓂᒡᓘᓐᓃᑦ ᓄᓇᒥᖕᓂᒡᓘᓐᓃᑦ, ᐅᕙᖓ ᐱᑦᔪᑎᒋᓗᖓ, ᑖᒃᑯᐊ ᐱᑎᑕᐅᒃᑲᓐᓂᕈᒫᕐᐳᑦ 100ᐃᕐᑐᓪᓗᐊᕐᑐᓂᒃ, ᑐᓂᓯᕕᐅᓗᑎᒡᓗ ᐃᓅᓯᕐᒥᒃ ᓄᖑᓱᐃᑦᑐᒥᒃ.

³⁰ ᐊᒥᓱᑦ ᓯᕗᓪᓕᐅᔪᑦ ᑭᖑᓪᓕᐅᔪᒫᕐᐳᑦ, ᐅᓄᕐᑐᓪᓗ ᑭᖑᓪᓕᐅᔪᑦ ᓯᕗᓪᓕᐅᔪᒫᕐᐳᑦ.”