ᒫᑎᐅᓯᐅᑉ ᐊᒡᓚᖏᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯᐅᑉ ᑕᑯᒃᓴᑯᑦ ᐊᓯᓐᖑᕐᑎᑕᐅᓂᖓ

¹ ᐅᓪᓗᐃᑦ ᐱᖓᓲᔪᕐᑐᑦ ᑭᖑᓂᖓᒍᑦ ᔩᓱᓯᐅᑉ ᐲᑦᑐᕉᓯ ᔧᒥᓯᑯᒃᓗ ᔪᐊᓇᓯᑯᒃ ᓄᑲᕇᒃ, ᐃᓚᒋᓪᓗᒋᑦ ᖃᖅᑲᒧᑦ ᐳᕐᑐᔪᒧᑦ ᒪᔪᐊᕈᑎᕔᑦ, ᐃᓚᑐᐊᕆᓪᓗᒋᑦ.

² ᐃᓕᓐᓂᐊᕐᑎᑦ ᑕᑯᓐᓈᕐᑎᓪᓗᒋᑦ ᔩᓱᓯᐅᑉ ᑕᑯᒃᓴᐅᓂᖓ ᐊᓯᖑᕐᑎᑕᐅᕗᖅ, ᑮᓇᖓ ᖃᐅᒻᒪᒃᐳᖅ ᓯᕿᓂᐅᑉ ᖃᐅᒪᓂᖓᑐᑦ, ᐊᓐᓄᕌᖏᓪᓗ ᖃᐅᒪᔪᕐᔪᐊᖑᓕᕐᓗᑎᒃ.

³ ᑕᑯᒋᑦ, ᑖᒃᑯᓄᖓ ᓴᖅᑭᑦᑐᖃᕐᐳᖅ ᒨᓯᓯᒥᒃ ᐃᓔᑦᔭᒥᒡᓗ ᔩᓱᓯᒥᒃ ᐅᖃᖃᑎᖃᕐᑑᖕᓂᒃ.

⁴ ᐲᑦᑐᕉᓯ ᐅᖃᕐᐳᖅ ᔩᓱᓯᒧᑦ, “ᐊᑕᓃᖅ, ᑕᕝᕙᓂ ᖁᕕᐊᓇᓗᐊᓕᕐᒪᑦ; ᐱᔪᒪᒍᕕᑦ, ᑕᕝᕙᓂ ᓯᓂᒃᑕᕐᕕᓕᐅᕈᒪᕗᖓ ᐱᖓᓱᓂᒃ, ᐃᓕᖕᓄᑦ, ᒨᓯᓯᒧᓪᓗ, ᐃᓔᑦᔭᒧᓪᓗ.”

⁵ ᐅᖃᓪᓚᒃᑎᓪᓗᒍ ᓱᓕ, ᑕᑯᒋᑦ, ᓄᕗᔭᒧᑦ ᖃᐅᒪᔪᒧᑦ ᑎᑭᑕᐅᕗᑦ, ᓂᐱ ᓄᕗᔭᒥᑦ ᐅᖃᕐᐳᖅ, “ᑖᓐᓇ ᑕᕝᕙ ᐃᕐᓂᕋ ᓇᒡᓕᒋᔭᕋ, ᖁᕕᐊᒋᑦᓯᐊᕐᑕᕋ; ᑖᓐᓇ ᓈᓚᒃᓯᐅᒃ!”

⁶ ᐃᓕᓐᓂᐊᕐᑎᑦ ᑕᒪᑐᒥᖓ ᑐᓴᕋᒥᒃ, ᓄᓇᒧᑦ ᐳᓐᖓᓕᕐᐳᑦ, ᑲᑉᐱᐊᓱᓗᐊᕐᓂᕐᒧᑦ.

⁷ ᔩᓱᓯᐅᓪᓕ ᐅᐸᒃᓗᒋᑦ ᐊᒃᑐᕐᐰᑦ, ᐅᖃᕐᓗᓂ, “ᒪᑭᒋᑦᓯ, ᑲᑉᐱᐊᓱᖏᓪᓗᓯ.”

⁸ ᐃᓕᓐᓂᐊᕐᑎᓪᓕ ᑕᑯᓴᕋᒥᒃ, ᐃᓄᖕᒥᒃ ᑕᑯᓐᖏᓚᑦ ᔩᓱᓯᐅᑉ ᐊᓯᐊᓂᒃ.

⁹ ᖃᖅᑲᒥᑦ ᐊᖅᑲᓕᕐᓗᑎᒃ, ᔩᓱᓯᐅᑉ ᐃᓂᕐᑎᕐᐰᑦ, ᐅᖃᕐᓗᓂ, “ᑕᒪᑐᒥᖓ ᑕᑯᑎᑕᐅᓂᑦᓯᓐᓂᒃ ᑭᓇᑐᐃᓐᓇᕐᒧᑦ ᐅᖃᕐᑍᓕᒋᑦᓯ; ᐃᓅᑉ ᐃᕐᓂᖓ ᒪᑭᓚᐅᖅᑳᕐᑎᓐᓇᒍ ᑐᖁᖓᔪᓂᑦ.”

¹⁰ ᐃᓕᓐᓂᐊᕐᑎᑦ ᐊᐱᕆᕚᑦ, “ᓱᖕᒪᓂᒃᑯᐊ ᐱᖁᔭᓂᒃ ᐃᓕᓮᔩᑦ ᐅᖃᖃᑦᑕᕐᐸᑦ ᐃᓔᑦᔭ ᓯᕗᓪᓕᐅᓗᓂ ᑎᑭᑦᑕᕆᐊᖃᕐᓂᕋᕐᓗᒎ?”

¹¹ ᔩᓱᓯᐅᑉ ᑭᐅᕔᑦ, “ᐃᓛᒃ ᐃᓔᑦᔭ ᓯᕗᓪᓕᐅᓪᓗᓂ ᑎᑭᓯᒪᕗᖅ, ᑖᑦᓱᒪ ᑕᒪᕐᒥᒃ ᐅᐸᓗᖕᒊᔭᕐᓂᐊᕐᐰᑦ,

¹² ᐅᖃᐅᑎᕙᑦᓯᓕ, ᐃᓔᑦᔭ ᑎᑭᑦᑕᕇᕐᓯᒪᕗᖅ, ᐃᓄᐃᓪᓗ ᐃᓕᑕᕆᓐᖏᓛᑦ, ᐱᓂᐊᕐᕕᒋᓚᐅᕐᐹᓪᓗ ᐃᓱᒪᕐᓲᑎᒋᓪᓗᒍ. ᑍᒫᒃᑕᐅᖅ ᐃᓅᑉ ᐃᕐᓂᖓ ᑖᒃᑯᓇᓐᖓᑦ ᐋᓐᓂᐊᑎᑕᐅᔪᒫᕆᕗᖅ.”

¹³ ᑕᕝᕙ ᐃᓕᓐᓂᐊᕐᑎᑦ ᑐᑭᓯᕗᑦ ᔪᐊᓇᓯ ᐹᑉᑎᑎᕆᔨᒥᒃ ᐅᖃᐅᓯᖃᕐᓂᖓᓂᒃ.

ᔩᓱᓯᐅᑉ ᓄᑲᑉᐱᐊᒥᒃ ᐊᓂᕐᓂᕐᓗᖕᒧᑦ ᐃᑎᕐᑕᐅᓯᒪᔪᒥᒃ ᐋᖅᑭᒃᓯᓂᖓ

¹⁴ ᐃᓄᒐᓴᒡᔪᐊᓄᑦ ᐅᑎᕐᒪᑕ, ᐊᖑᑦ ᔩᓱᓯᒧᐊᕐᐳᖅ, ᓵᖓᓄᓪᓗ ᓰᖅᑯᕐᓗᓂ,

¹⁵ ᐅᖃᕐᐳᖅ, “ᐊᑕᓃᖅ, ᐃᕐᓂᕋ ᓂᑲᒋᓚᐅᕈᒃ, ᖀᕐᓱᖃᑦᑕᕐᒪᑦ, ᖀᕐᓱᓕᕌᖓᒥ ᐅᕐᕈᖃᑦᑕᕐᒪᑦ ᐃᑯᒪᒧᑦ ᐃᒪᕐᒧᓪᓘᓐᓃᑦ.

¹⁶ ᐃᓕᓐᓂᐊᕐᑎᖕᓄᓪᓕ ᐋᖅᑲᐅᒐᓗᐊᕐᐸᕋ, ᑖᒃᑯᐊᓕ ᐋᖅᑭᒍᓐᓇᓐᖏᓛᑦ.”

¹⁷ ᔩᓱᓯᐅᑉ ᑭᐅᕚ, “ᐅᒃᐱᕐᓂᖃᖏᑦᑐᓯ ᑕᒻᒪᕐᓯᒪᔪᐊᓘᔪᓯᓗ, ᖃᓄᖅ ᐊᑯᓂᐅᑎᒋᔪᖅ ᓇᔪᕆᐊᖃᕐᐸᑦᓰ? ᖃᓄᕐᓗ ᐊᑯᓂᐅᑎᒋᔪᖅ ᕿᓄᐃᓵᕐᕕᒋᔭᕆᐊᖃᕐᐸᑦᓰ? ᓄᑲᑉᐱᐊᖅ ᐅᕙᓐᓄᑦ ᒪᐅᖓ ᕾᑎᓚᐅᕈᒃ.”

¹⁸ ᔩᓱᓯᐅᑉ ᐊᓂᕐᓂᕐᓗᒃ ᐃᓂᕐᑎᕐᓗᒍ ᑕᕝᕙᓐᖓᑦ ᐊᓂᖁᕚ, ᐊᓂᕐᓂᕐᓗᒃ ᓄᑲᑉᐱᐊᒥᑦ ᐊᓂᕗᖅ, ᑕᕝᕙᑦᓮᓐᓇᖅ ᓄᑲᑉᐱᐊᖅ ᐋᖅᑭᒃᐳᖅ.

¹⁹ ᑕᕝᕙ ᐃᓕᓐᓂᐊᕐᑎᑦ ᔩᓱᓯᒧᐊᕐᐳᑦ ᐃᓄᑑᓕᕐᒪᑦ ᐊᐱᕆᕚᑦ, “ᓱᖕᒪᓪᓕ ᐊᓂᕐᓂᕐᓗᒃ ᐊᓂᑎᑦᓱᓐᓇᓐᖏᓚᕘᑦ?”

²⁰ ᔩᓱᓯᐅᑉ ᑭᐅᕔᑦ, “ᐅᒃᐱᕐᓂᑭᓗᐊᕋᑦᓯ, ᓱᓕᔪᒥᒃ ᐅᖃᐅᑎᕙᑦᓯ, ᐅᒃᐱᕐᓂᖃᕈᑦᓯ ᐱᕈᕐᓯᐊᒃᓴᐅᑉ ᑲᓐᖓᕐᓲᑎᒃᓴᕐᑕᖓᑐᑦ ᒥᑭᔪᑯᓗᒃᑎᑐᑦ ᒪᔅᑕᕐᑦᑐᑦ, ᐆᒧᖓ ᖃᖅᑲᒧᑦ ᐅᖃᕈᓐᓇᕐᐳᓯ, ‘ᐅᕙᓐᖓᑦ ᓅᑦᒋᑦ ᐊᕗᖓ,’ ᑕᕝᕙᓐᖓᓪᓗ ᓅᓐᓂᐊᕐᐳᖅ; ᓱᓇᓕᒫᓂᒃ ᐊᔪᕐᑕᖃᕐᓂᐊᓐᖏᓚᓯ.” [

²¹ ᑕᒪᒃᑯᐊᓕ ᐊᓂᕐᓂᕐᓗᐃᑦ ᑐᒃᓯᐊᕐᓂᕐᒧᑦ ᓂᕆᑦᑍᓕᓂᕐᒧᓪᓗ ᑭᓯᐊᓂ ᐊᓂᑎᑕᐅᔪᓐᓇᕐᐳᑦ; ᐊᓯᐊᒍᓪᓕ ᐊᓂᑎᑕᐅᔪᓐᓇᓐᖏᓚᑦ.]

ᔩᓱᓯᐅᑉ ᐅᖃᐅᓯᖃᒃᑲᓐᓂᕐᓂᖓ ᑐᖁᑕᐅᓂᒃᓴᒥᓂᒃ

²² ᐃᓕᓐᓂᐊᕐᑎᑦ ᑲᑎᓐᖓᓕᕐᒪᑕ ᒐᓕᓕᐊᒥ, ᔩᓱᓯᐅᑉ ᐅᖃᐅᑎᕔᑦ, “ᐃᓅᑉ ᐃᕐᓂᖓ ᐃᓄᖕᓄᑦ ᐱᔭᐅᒃᑲᕐᑕᐅᔭᕆᐊᖃᕐᐳᖅ.

²³ ᑖᒃᑯᓇᓐᖓᓪᓗ ᑐᖁᑕᐅᔪᒫᕐᐳᖅ; ᐅᓪᓗᐃᓪᓕ ᐱᖓᔪᐊᓐᓂ ᒪᑭᑦᓱᒫᕆᕗᖅ.” ᐃᓕᓐᓂᐊᕐᑎᓪᓗ ᕿᒃᓵᒻᒪᕆᓕᕐᐳᑦ.

ᑐᒃᓯᐊᕐᕕᒃᔪᐊᕐᒥ ᐊᑭᓕᐅᑦᔨᓂᖅ ᑖᒃᓯᑎᒍᑦ

²⁴ ᔩᓱᓯ ᐃᓕᓐᓂᐊᕐᑎᖏᓪᓗ ᑲᐲᕐᓂᐊᒧᑦ ᑎᑭᒻᒪᑕ, ᑐᒃᓯᐊᕐᕕᒃᔪᐊᕐᒥ ᑖᒃᓯᑎᒍᑦ ᐊᑭᓕᕐᓱᐃᑎᑦᓯᔨ, ᐲᑦᑐᕉᓯᒧᐊᕐᐳᖅ ᐊᐱᕆᓪᓗᒍ, “ᐅᓇ ᐃᓕᓮᔨᓯ ᑐᒃᓯᐊᕐᕕᒃᔪᐊᑉ ᑖᒃᓯᖏᓐᓂᒃ ᐊᑭᓖᕙᓐᖏᑦᑑᖅ?”

²⁵ ᐲᑦᑐᕉᓯᐅᑉ ᑭᐅᕚ, “ᐊᑭᓖᓲᖑᖕᒥᔪᖅ.” ᐲᑦᑐᕉᓯ ᐃᒡᓗᒧᑦ ᐃᑎᕐᒪᑦ, ᔩᓱᓯᐅᑉ ᓂᓪᓕᕆᐊᖅᑳᓪᓗᓂ ᐅᖃᐅᑎᕚ, “ᓮᒨᓃ, ᖃᓄᕐᓕ ᐃᓱᒪᖃᕐᐲᑦ? ᓇᓪᓕᐊᑦ ᐊᑭᓖᔭᕆᐊᖃᕐᐹ ᐊᑐᕈᑎᒥᖕᓂᒃ ᑖᒃᓯᓂᒡᓘᓐᓃᑦ ᓄᓇᕐᔪᐊᕐᒥ ᐊᖓᔪᖅᑳᕐᔪᐊᖑᔪᓅᑦ? ᑖᒃᑯᐊᓘᓐᓃᑦ ᑕᒫᓂ ᓄᓇᑐᖃᓖᑦ ᐊᖓᔪᖅᑲᐅᕕᒋᔭᖏᑦ, ᐅᕝᕙᓘᓐᓃᑦ ᓂᐅᕐᕈᓯᒪᔪᑦ?”

²⁶ ᐲᑦᑐᕉᓯᐅᑉ ᑭᐅᕚ, “ᑖᒃᑯᐊ ᓂᐅᕐᕈᓯᒪᔪᑦ.” ᔩᓱᓯᐅᑉ ᑭᐅᕚ, “ᑍᒤᒻᒪᑦ, ᓄᓇᑐᖃᓖᑦ ᐊᑭᓖᔭᕆᐊᖃᓐᖏᓚᑦ,

²⁷ ᑖᒃᑯᐊᓕ ᐊᒡᕕᐊᕈᑎᒃᓴᓕᐅᕐᓂᐊᖏᓐᓇᑦᑎᒍ; ᑍᒤᒻᒪᑦ, ᑕᓯᕐᒧᑦ ᐃᖃᓪᓕᐊᓚᐅᕆᑦ; ᓯᕗᓪᓕᕐᐹᕐᓗ ᐃᖃᓗᒃᑍᑦ, ᖃᓂᖓ ᐂᑦᑕᕐᑎᓐᓂᐊᕐᐸᑦ, ᖃᓂᖓᓂᓪᓗ ᑮᓇᐅᔭᓂᒃ ᓇᓂᓯᓂᐊᕐᐳᑎᑦ ᐊᑭᓕᐅᑎᓪᓗᐊᕐᑕᑦᑎᓐᓂᒃ ᑐᒃᓯᐊᕐᕕᒡᔪᐊᕐᒧᑦ; ᑖᒃᑯᐊ ᑮᓇᐅᔭᑦ ᐱᓗᒋᑦ ᐊᑭᓕᐅᑎᒋᓂᐊᕐᐸᑎᑦ ᐊᑭᓕᐅᑎᒋᔭᕆᐊᖃᕐᑕᑦᑎᓐᓄᑦ ᑖᒃᓯᓄᑦ.”