ᒫᑎᐅᓯᐅᑉ ᐊᒡᓚᖏᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦᑲᒪᓇᕐᑐᓕᖁᔨᓪᓗᑎᒃ ᐊᔪᐃᓐᓇᕐᑐᑦ ᒫᑯᓯ 8:11-13 ; ᓘᑲᓯ 12:54-56 1 ᐹᕆᓯᑦ ᐃᓚᖏᑦ ᓵᑦᔪᓰᓪᓗ ᔩᓱᓯᒧᐊᕐᐳᑦ ᐆᒃᑐᕈᒪᓪᓗᒍ; ᑍᒤᒻᒪᑦ ᑲᒪᓇᕐᑐᓕᖁᕚᑦ, ᑕᑯᑎᑕᐅᔪᒪᓪᓗᑎᒃ ᓇᓗᓁᒃᑯᑕᕐᒥᒃ ᕿᓚᖕᒥᑦ ᐱᔪᒥᒃ. 2 ᔩᓱᓯᐅᑉ ᑭᐅᕔᑦ, “ᓯᕿᓂᖅ ᓂᐱᓕᕐᑎᓪᓗᒍ ᐅᖃᕐᐸᒃᐳᓯ, ‘ᓯᓚᑦᓯᐊᕙᐅᓛᓕᕆᕗᖅ; ᓄᕗᔧᑦ ᐊᐅᐸᕐᓯᖕᒪᑕ.’ 3 ᐅᓪᓛᒻᒪᕆᒃᑯᓪᓗ ᐅᖃᕐᐸᒃᑭᕗᓯ, ‘ᐅᓪᓗᒥ ᓯᓚᓗᖕᓂᐊᕐᐳᖅ, ᓄᕗᔧᑦ ᐊᐅᐸᕐᑑᓪᓗᑎᒃ ᕿᕐᓂᕐᑕᐅᖕᒪᑕ.’ ᓯᓚᒥᒃ ᓇᓚᐅᑦᑍᔪᓐᓇᕐᑐᓯ ᑕᑯᓐᓈᕐᓗᓯ ᕿᓚᖕᒥᒃ, ᑐᑭᓯᔪᓐᓇᓐᖏᓚᓯᓕ ᓇᓗᓁᒃᑯᑕᕐᓂᒃ ᓇᓪᓕᐅᑎᓕᕐᑐᓂᒃ ᒫᓐᓇᐅᔪᒥᒃ! 4 ᐅᓪᓗᒥ ᐃᓄᐃᑦ ᐱᐅᖏᑦᑑᓕᔪᑦ ᒎᑎᖃᖏᑦᑐᓪᓗ ᑲᒪᓇᕐᑐᓂᓕᕐᒥᒃ ᑕᑯᔪᒪᕗᑦ, ᐆᒥᖓ ᑭᓯᐊᓂ ᑐᓂᓯᕕᐅᓂᐊᕐᐳᑦ ᔫᓇᐅᑉ ᑲᒪᓇᕐᑐᓕᓂᖓᓂᒃ.” ᑕᕝᕙ ᕿᒪᒃᐰᑦ ᐊᐅᓪᓚᕐᓗᓂ ᑕᕝᕙᓐᖓᑦ. ᐹᕆᓯᑦ ᓵᑦᔪᓰᓪᓗ ᐳᕙᓪᓚᖅᑯᑎᖏᑦ ᒫᑯᓯ 8:14-21 5 ᐃᓕᓐᓂᐊᕐᑎᑦ ᑕᓯᒃᑯᑦ ᐃᑳᕐᓗᑎᒃ ᐊᑭᐊᓄᐊᕋᒥᒃ, ᓂᐊᖂᔭᒥᒃ ᓇᒃᓴᕆᐊᒃᓴᖅ ᐳᐃᒍᕐᑐᕕᓂᐅᕗᑦ. 6 ᑕᕝᕙ ᔩᓱᓯᐅᑉ ᐅᖃᐅᑎᕔᑦ, “ᑲᒪᑦᓯᐊᕆᑦᓯ ᐃᒃᐱᒍᓱᑦᓯᐊᕐᓗᓯᓗ ᐹᕆᓯᑦ ᓵᑦᔪᓰᓪᓗ ᐳᕙᓪᓚᖅᑯᑎᖏᓐᓂᒃ.” 7 ᑖᒃᑯᐊ ᐃᒻᒥᖕᓄᑦ ᐅᖃᖃᑎᒌᓕᕐᐳᑦ, ᐅᖃᕐᓗᑎᒃ, “ᑍᒫᖑᓇ ᐅᖃᑐᖅ ᓂᐊᖂᔭᒥᒃ ᓇᒃᓴᓚᐅᖏᓐᓂᑦᑎᓐᓄᑦ.” 8 ᔩᓱᓯᐅᑉ ᖃᐅᔨᒪᒐᒥᒋᑦ ᖃᓄᖅ ᐅᖃᐅᓯᖃᕐᒪᖔᑕ, ᐅᖃᐅᑎᕔᑦ, “ᓱᖕᒪᑦ ᐃᓕᑦᓯᓐᓄᑦ ᐅᖃᖃᑎᒌᒃᐱᓰ ᓂᐊᖂᔭᒡᒋᕐᓯᒪᖏᓐᓂᑦᓯᓐᓃᒃ? ᐅᒃᐱᕐᓂᖃᓐᖏᓗᐊᕋᑦᓯ! 9 ᓱᓕ ᑐᑭᓯᓐᖏᓚᓰ ᐃᖅᑲᐅᒪᓇᒻᓯᓗ ᓂᐊᖂᔭᓂᒃ ᐊᒡᒍᐃᓚᐅᕋᒪ ᑕᓪᓕᒪᓂᒃ 5,000ᓄᑦ ᐱᔭᐅᓂᐊᕐᑐᓃᒃ? ᖃᑦᓯᓂᒃ ᐃᕕᐅᔭᓂᒃ ᑕᑍᓚᐅᕐᐱᓰ? 10 ᐊᒻᒪᓗᑦᑕᐅᖅ ᐳᐃᒍᕆᕕᓯᐅᒃ ᓂᐊᖂᔭᓂᒃ 7ᓂᒃ ᐊᒡᒍᐃᓚᐅᕋᒪ 4,000ᓄᑦ ᐱᔭᐅᓂᐊᕐᑎᓪᓗᒋᑦ? ᖃᑦᓯᓂᒃ ᐃᕕᐅᔭᓂᒃ ᑕᑍᓚᐅᕐᐱᓯ 11 ᓱᖕᒪᓪᓖ ᑐᑭᓯᓐᖏᓚᓯ ᓂᐊᖂᔭᒥᒃ ᐱᑦᔪᑎᖃᕐᓗᖓ ᐅᖃᖏᓐᓇᒪ? ᐃᓕᑦᓯᓐᓂᒃ ᐃᒃᐱᒍᓱᑦᓯᐊᕆᑦᓯ ᐹᕆᓯᑦ ᓵᑦᔪᓰᓪᓗ ᐳᕙᓪᓚᖅᑯᑎᖏᓐᓂᒃ!” 12 ᑕᕝᕙ ᐃᓕᓐᓂᐊᕐᑎᑦ ᑐᑭᓯᓕᕐᐳᑦ ᐅᓗᕆᐊᓱᖁᔭᐅᖏᓐᓂᕐᒥᒡᓂᒃ ᓂᐊᖂᔭᒧᑦ ᐳᕙᓪᓚᖅᑯᑎᒥᒃ, ᐹᕆᓯᓪᓕ ᓵᑦᔪᓰᓪᓗ ᐊᔪᕆᕐᑐᐃᓂᖏᓐᓂᒃ ᑖᒃᑯᓂᖓᑐᐊᖅ. ᐲᑦᑐᕉᓯᐅᑉ ᓇᓗᓁᕐᓯᓂᖓ ᔩᓱᓯᒥᒃ ᒫᑯᓯ 8:27-30 ; ᓘᑲᓯ 9:18-21 13 ᑕᕝᕙ ᔩᓱᓯ ᓯᓴᕆᐊ ᐱᓕᐰᑉ ᓄᓇᖓᑕ ᖃᓂᒋᔮᓄᐊᕐᐳᖅ, ᑕᕝᕙᓂ ᐃᓕᓐᓂᐊᕐᑎᓂ ᐊᐱᕆᕔᑦ, “ᐃᓅᑉ ᐃᕐᓂᖓ ᐃᓄᖕᓂᑦ ᑭᓇᐅᓇᓱᒋᔭᐅᕚ?” 14 ᑖᒃᑯᐊ ᑭᐅᕚᑦ, “ᐃᓚᖏᑦ ᔪᐊᓇᓯ ᐹᑉᑎᑎᕆᔨᐅᓂᕅᕗᑦ, ᐃᓚᖏᓪᓕ ᐃᓔᑦᔭᐅᓂᕅᕗᑦ, ᐃᓚᖏᓪᓗᑦᑕᐅᖅ ᔨᕆᒤᐊᐅᓂᕅᕗᑦ ᐅᕝᕙᓗ ᓇᓚᐅᑦᑍᔪᑦ ᐃᓚᖓᑦ.” 15 ᑕᕝᕙ ᔩᓱᓯᐅᑉ ᐅᖃᐅᑎᕔᑦ, “ᐃᓕᑦᓯᓖ ᑭᓇᐅᓇᓱᒋᕕᓯᓐᖔ?” 16 ᑕᕝᕙ ᓮᒨᓂ ᐲᑦᑐᕉᓯᐅᑉ ᑭᐅᕚ, “ᒥᓮᐊᓯᐅᕗᑎᑦ, ᒎᑎᐅᑉ ᐆᒪᔫᑉ ᐃᕐᓂᖓ.” 17 ᔩᓱᓯᐅᑉ ᐅᖃᐅᑎᕚ, “ᓮᒨᓃ ᔪᐊᓇᓯᐅᑉ ᐃᕐᓂᖓ ᓇᓛᒍᑦ ᐅᖃᕐᐳᑎᑦ! ᑕᒪᓐᓇ ᖃᐅᔨᑎᑕᐅᓃᑦ ᐃᓄᑐᐃᓐᓇᕐᒥᑦ ᐱᓐᖏᓚᖅ, ᐊᑖᑕᒪᓕ ᕿᓚᖕᒦᑦᑑᑉ ᑕᒪᑐᒥᖓ ᑐᑭᓯᑎᑉᐹᑎᑦ. 18 ᑍᒤᒻᒪᑦ ᐅᖃᐅᑎᕙᒋᑦ, ᐲᑦᑐᕉᓯᐅᕗᑎᑦ, ᕾᕐᑐᖅ; ᕾᕐᑐᒧᑦ ᑕᕝᕗᖓ ᐃᓚᒌᒃᑐᖁᑎᒃᑲ ᑐᓐᖓᕕᖃᕐᑎᓪᓗᒋᑦ ᐋᖅᑭᒃᓱᕐᓂᐊᕐᐸᒃᑲ, ᑲᑉᐱᐊᓇᕐᑐᕕᐅᓪᓗᓐᓃ ᐃᓯᕐᑕᕐᕕᖓᑕ ᓵᓚᒋᔪᓐᓇᕐᓂᐊᓐᖏᓚ. 19 ᑐᓂᓯᕕᒋᓂᐊᕐᐸᒋᑦ ᒎᑎᐅᑉ ᐊᑕᓂᐅᕕᖓᑕ ᐅᒃᑯᐃᕈᑎᖏᓐᓂᒃ; ᓄᓇᕐᔪᐊᒥ ᕿᓚᒃᓱᕐᓂᐊᕐᑕᑎᑦ ᕿᓚᖕᒥ ᕿᓚᒃᓱᕐᑕᐅᓯᒪᔪᒫᕆᕗᑦ, ᓄᓇᕐᔪᐊᒥᓗ ᑕᒫᓂ ᕿᓚᕈᑦᔮᕐᓂᐊᕐᑕᑎᑦ ᕿᓚᖕᒥᑦᑕᐅᖅ ᕿᓚᕈᑦᔮᕐᑕᐅᔪᒫᕆᕗᑦ.” 20 ᑕᕝᕙ ᔩᓱᓯᐅᑉ ᐃᓕᓐᓂᐊᕐᑎᓂ ᐃᓂᕐᑎᕐᐰᑦ ᑭᓇᒧᓪᓘᓐᓃᑦ ᐅᖃᖁᓇᒋᑦ ᙭ᔅᑑᓯᐅᓂᕐᒥᓂᒃ. ᔩᓱᓯᐅᑉ ᐋᓐᓂᐊᑎᑕᐅᓂᒃᓴᒥᓂᒃ ᑐᖁᑕᐅᓂᒃᓴᒥᓂᒡᓗ ᐅᖃᐅᓯᖃᕐᓂᖓ ᒫᑯᓯ 8:31—9:1 ; ᓘᑲᓯ 9:22-27 21 ᑕᕝᕙᓐᖓᑦ ᐱᒋᐊᕐᓗᓂ ᔩᓱᓯ ᓇᓗᓇᖏᑦᓯᐊᕐᑐᒥᒃ ᐃᓕᓐᓂᐊᕐᑎᒥᓄᑦ ᐅᖃᐅᓯᖃᓕᕐᐳᖅ, “ᔨᕉᓴᓕᒻᒧᐊᕆᐊᖃᕐᐳᖓ ᑕᕝᕙᓂ ᐋᓐᓂᐊᑎᑕᐅᔪᒫᕐᐳᖓ ᐊᖏᔪᒥᒃ ᔫᑎᓄᑦ ᐊᖓᔪᖅᑲᐅᔪᓄᑦ, ᑐᓂᕐᕈᓯᕐᑎᑦᓯᔩᓪᓗ ᐊᖓᔪᖅᑳᖏᓐᓄᑦ, ᐱᖁᔭᓂᒡᓗ ᐃᓕᓮᔨᓄᑦ, ᑐᖁᑕᐅᔪᒫᕐᐳᖓ, ᐅᓪᓗᐃᓪᓕ ᐱᖓᔪᐊᓐᓂ ᒪᑭᑦᓱᒫᕆᕗᖓ.” 22 ᐲᑦᑐᕉᓯᐅᑉ ᓴᓂᒥᓄᐊᕐᑎᓪᓗᓂᐅᒃ ᐃᓂᕐᑎᒻᒪᕆᓕᕐᐹ; ᐅᖃᕐᓗᓂ, “ᒎᑎᐅᑉ ᑕᒪᓐᓇ ᓄᖅᑲᕐᑎᓪᓕᐅᒃ, ᐊᑕᓃᖅ! ᑕᒪᓐᓇ ᐃᓕᖕᓄᑦ ᑎᑭᓚᐅᕐᓯᒪᓂᐊᓐᖏᓚᖅ!” 23 ᔩᓱᓯᐅᑉ ᐲᑦᑐᕉᓯ ᓵᓪᖢᒍ ᐅᖃᐅᑎᕚ, “ᓵᑖᓇᓰ, ᑐᓄᓐᓅᐊᕆᑦ! ᐊᑐᕆᐊᖃᕐᑕᓐᓂᒃ ᐊᒡᕕᐊᕋᓱᐊᕋᕕᑦ; ᑕᒪᓐᓇ ᐃᓱᒪᒋᔧᑦ ᒎᑎᒥᑦ ᐱᖏᒻᒪᑦ, ᐃᓄᑐᐃᓐᓇᕐᒥᓪᓕ ᐱᕗᖅ!” 24 ᑕᕝᕙ ᔩᓱᓯᐅᑉ ᐃᓕᓐᓂᐊᕐᑎᓂ ᐅᖃᐅᑎᕔᑦ, “ᓇᓪᓕᐊᑦ ᐅᕙᓐᓄᑦ ᒪᓕᒍᒪᔪᖅ, ᐱᓇᓱᐊᕈᒪᔭᒥᓂᒃ ᖁᔭᓈᕐᓯᔪᒃᓴᐅᕗᖅ, ᓴᓐᓂᖓᔪᓕᒥᓂᒃ ᐊᒡᔭᕐᓯᓗᓂ, ᒪᓕᒃᑐᒃᓴᐅᕗᖅ ᐅᕙᓐᓂᒃ. 25 ᐃᓅᓯᕐᒥᓂᒃ ᐊᓐᓂᕈᓱᒃᑐᖅ ᐃᓅᓯᕐᒥᓂᒃ ᐊᓯᐅᔨᔪᒫᕐᐳᖅ, ᓇᓪᓕᐊᓪᓕ ᐃᓅᓯᕐᒥᓂᒃ ᐊᓯᐅᔨᔪᖅ ᐅᕙᓐᓂᒃ ᐱᑦᔪᑎᖃᕐᓗᓂ ᑖᓐᓇ ᐃᓅᓯᕐᒥᒃ ᓇᓂᓯᓂᐊᕐᐳᖅ. 26 ᐃᓄᒃ ᓱᓇᒥᒃ ᐱᕙᓪᓕᐅᑎᒃᓴᖃᕋᔭᕐᐹ ᓯᓚᕐᔪᐊᓕᒫᒥᒃ ᐱᑖᕈᓂ, ᐃᓅᓯᕐᒥᓂᒡᓗ ᐊᓯᐅᔨᓗᓂ ᐅᕝᕙᓗ ᓱᓇᒥᒃ ᑐᓂᔭᒃᓴᖃᕋᔭᕐᐹ? ᐃᓅᓯᕐᒥᓂᒃ ᐅᑎᕐᑎᑦᓯᔪᓐᓇᖁᓪᓗᒎ? 27 ᐃᓅᑉ ᐃᕐᓂᖓ ᑎᑭᑦᓱᒫᕐᒪᑦ ᐂᖏᓖᖁᑎᓂ ᐃᓚᒋᓗᒋᑦ ᐊᑖᑕᖓᑕ ᓂᕐᑐᕐᓇᕐᓂᕐᔪᐊᖓᓂᑦ, ᑕᕝᕙᓂ ᐊᑐᓂᑦ ᐊᑭᓕᕈᒫᕐᐰᑦ ᐱᓂᐊᕐᓂᕆᓚᐅᕐᑕᖏᑦ ᒪᓕᒡᓗᒋᑦ. 28 ᓱᓕᔪᒥᒃ ᐅᖃᐅᑎᕙᑦᓯ! ᐅᕙᓃᑦᑐᖃᕐᐳᖅ ᐃᓅᑉ ᐃᕐᓂᖓᑕ ᐊᖓᔪᖅᑳᕐᔪᐊᖑᕐᓂᕆᓂᐊᕐᑕᖓᓂᒃ ᑕᑯᓚᐅᖅᑳᕋᑎᒃ ᑐᖁᓂᐊᖏᑦᑐᓂᒃ.” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society