ᒫᑎᐅᓯᐅᑉ ᐊᒡᓚᖏᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᓴᐸᑎᐅᑉ ᒥᒃᓵᓄᑦ ᐊᐱᕐᓲᑎ

¹ ᑕᒪᑐᒪ ᑭᖑᓂᖓᒍᑦ ᐊᑯᓂᐅᓗᐊᕐᑎᓐᓇᒍ ᔩᓱᓯ ᐱᓱᓕᕐᐳᖅ ᓂᐊᖂᔭᒃᓴᓂᒃ ᐱᕈᕐᓰᕕᒃᑯᑦ ᓴᐸᑎᐅᑎᓪᓗᒍ, ᐃᓕᓐᓂᐊᕐᑎᖏᑦ ᑳᒃᑎᓪᓗᒋᑦ, ᑍᒤᒻᒪᑦ ᓂᐊᖂᔭᒃᓮᑦ ᐱᕈᕐᑐᖏᑕ ᓄᕗᖏᓐᓂᒃ ᑎᒍᓯᖃᑦᑕᓕᕐᐳᑦ, ᐱᕈᕐᑐᖏᓐᓂᒡᓗ ᓂᕆᓪᓗᑎᒃ.

² ᐹᕆᓯᓪᓗ ᑕᒪᑐᒥᖓ ᑕᑯᒐᒥᒃ, ᔩᓱᓯᒧᑦ ᐅᖃᕐᐳᑦ, “ᑕᑯᒋᑦ, ᐃᓕᓐᓂᐊᕐᑎᑎᑦ ᑍᒤᓕᐅᕐᑎᓪᓗᒋᑦ ᓴᐸᑎᒥ ᐊᑐᖁᔭᐅᖏᑦᑐᒥᒃ ᐊᑐᕐᐳᑦ!”

³ ᔩᓱᓯᐅᑉ ᑭᐅᕔᑦ, “ᐊᑐᐊᕐᓯᓚᐅᕐᓯᒪᓐᖏᓚᓰ ᑍᕕᑎᐅᑉ ᐱᓂᐊᕐᓂᕆᓚᐅᕐᑕᖓᓂᒃ, ᑍᑦᓱᒪᓂ ᓇᖕᒥᓂᖅ ᐅᓇᑕᕐᑐᒃᓴᖁᑎᖏᓪᓗ ᑳᓕᕐᑎᓪᓗᒋᑦ?

⁴ ᒎᑎᐅᑉ ᐃᒡᓗᖓᓄᑦ ᐃᑎᓚᐅᕐᐳᖅ, ᓂᕆᓪᓗᓂᓗ ᒎᑎᒧᑦ ᑐᓂᔭᐅᓯᒪᔪᓂᒃ ᓂᐊᖂᔭᓂᒃ, ᐱᖁᔭᑎᒍᑦ ᓂᕆᔭᕆᐊᖃᖏᒃᑲᓗᐊᕐᓗᓂ ᐅᓇᑕᕐᑐᒃᓴᖁᑎᖏᓪᓗ, ᑐᓂᕐᕈᓯᕐᑎᑦᓯᔩᑦ ᓂᕆᔭᕆᐊᖃᕐᑐᑑᓚᐅᕐᒪᑕ ᑖᒃᑯᓂᖓ ᓂᐊᖂᔭᓂᒃ.

⁵ ᐅᕝᕙᓗ ᐊᑐᐊᕐᓯᓚᐅᕐᓯᒪᓐᖏᓚᓰ ᓴᐸᑎᐅᓕᕌᖓᑦ ᑐᓂᕐᕈᓯᕐᑎᑦᓯᔩᑦ ᑐᒃᓯᐊᕐᕕᒃᔪᐊᕐᒥ ᓴᐸᑎᐅᑉ ᐱᖁᔭᖓᓂᒃ ᓱᕅᕙᖕᒪᑕ? ᑍᒤᒐᓗᐊᕐᑎᓪᓗᒋᓪᓕ ᑕᒪᑐᒥᖓ ᐸᓯᔭᒃᓴᐅᑦᔪᑎᖃᓐᖏᓛᑦ?

⁶ ᐅᖃᐅᑎᕙᑦᓯᓕ ᑕᒫᓃᑦᑐᖃᕐᐳᖅ ᑐᒃᓯᐊᕐᕕᒃᔪᐊᒥᑦ ᐊᖏᓂᕐᓴᐅᔪᒥᒃ.

⁷ ᒎᑎᐅᑉ ᐅᖃᐅᓯᖏᓐᓂ ᐅᖃᕐᓯᒪᔪᑦ ᖃᐅᔨᒪᒍᑦᓯᒋᒃ ᖃᓄᖅ ᑐᑭᖃᕐᒪᖔᑕ, ᐃᒤᓕᔪᑦ, ‘ᓂᑲᒍᓱᖕᓂᖅ ᐱᔪᒪᔭᕆᕙᕋ, ᐆᒪᔪᓂᒃ ᑐᓂᕐᕈᓯᕐᓂᐅᖏᑦᑐᖅ.’ ᑖᑦᓱᒪ ᑐᑭᖓ ᑐᑭᓯᒍᑦᓯᐅᒃ, ᐸᓯᔭᒃᓴᐅᖏᑦᑐᓂᒃ ᐸᓯᔭᒃᓴᓐᖑᕐᑎᑦᓯᓇᓱᐊᕋᔭᓐᖏᓚᓯ;

⁸ ᐃᓅᑉ ᐃᕐᓂᖓ ᓴᐸᑎᒧᑦ ᐊᑕᓂᐅᖕᒪᑦ.”

ᐊᖑᑦ ᓄᑭᖃᖏᑦᑐᓂᒃ ᐊᒡᒐᓕᒃ

⁹ ᑕᕝᕙᓐᖓᑦ ᔩᓱᓯ ᕿᒪᕉᑎᒐᒥ, ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓄᐊᕐᐳᖅ.

¹⁰ ᑕᑯᒋᑦ, ᑕᕝᕙᓂ ᐊᖑᑎᑕᖃᕐᐳᖅ ᓄᑭᖃᖏᑦᑐᓂᒃ ᐊᒡᒐᓕᖕᒥᒃ. ᐃᓄᐃᑦ ᐃᓚᖏᑦ ᑕᕝᕙᓃᑉᐳᑦ ᔩᓱᓯᒥᒃ ᐊᑭᕋᕐᑐᕈᑎᒃᓴᒥᖕᓂᒃ ᐱᑦᔪᑎᒃᓴᓯᐅᕈᒪᓪᓗᑎᒃ, ᑍᒤᒻᒪᑦ ᔩᓱᓯ ᐊᐱᕆᕚᑦ, “ᐱᖁᔭᑦᑎᓐᓂᒃ ᐊᑭᕋᕐᑐᕐᐹ ᓴᐸᑎᐅᑎᓪᓗᒍ ᐃᓄᖕᒥᒃ ᐋᖅᑭᒃᓯᔪᖃᕐᐸᑦ?”

¹¹ ᔩᓱᓯᐅᑉ ᐅᖃᐅᑎᕔᑦ, “ᓇᓪᓕᓯᓕ ᖃᓄᖅ ᐱᒐᔭᕐᐹ ᓰᐱᖁᑎᖃᕐᑑᑉ, ᓴᐸᑎᐅᑎᓪᓗᒍ ᓰᐱᖁᑎᖓ ᐃᑎᕐᓴᒧᑦ ᐃᓗᑐᔪᒧᑦ ᑲᑕᒃᐸᑦ, ᑎᒍᓗᒍ ᖃᕝᕕᕐᑎᓐᓇᓱᐊᕋᔭᓐᖏᓚᐅᒃ?

¹² ᐃᓄᒃ ᖃᓄᖅ ᓰᐱᒥᑦ ᐱᓪᓚᕆᐅᓂᕐᓴᐅᑎᒋᕙ! ᑍᒤᒻᒪᑦ, ᐱᖁᔭᕗᑦ ᐱᑦᓯᐊᖁᔨᕗᑦ ᓴᐸᑎᐅᑎᓪᓗᒍ.”

¹³ ᑕᕝᕙ ᐊᖑᒻᒧᑦ ᓄᑭᖃᖏᑦᑐᓂᒃ ᐊᒡᒐᓕᖕᒧᑦ ᐅᖃᕐᐳᖅ, “ᐊᒡᒐᑎᑦ ᐃᓵᒃᑭᑦ.” ᑕᕝᕙ ᐊᖑᑎᐅᑉ ᐊᒡᒐᓂ ᐃᓵᒃᐰᑦ, ᐋᖅᑭᑦᓯᐊᕐᓗᑎᒡᓗ, ᐃᒡᓗᖏᑎᑐᑦ.

¹⁴ ᑕᕝᕙ ᐹᕆᓯᑦ ᑕᕝᕙᓐᖓᑦ ᕿᒪᕉᑎᓗᑎᒃ ᐃᓱᒪᒃᓴᕐᓯᐅᖃᑎᒌᓕᕐᐳᑦ ᖃᓄᖅ ᔩᓱᓯᒥᒃ ᑐᖁᑦᓯᔪᓐᓇᕐᒪᖔᕐᒥᒃ.

ᒎᑎᐅᑉ ᐱᔨᓂ ᓂᕈᐊᕐᓯᒪᔭᖓ

¹⁵ ᔩᓱᓯ ᑐᓴᕋᒥ ᑐᖁᑕᐅᓇᓱᐊᕐᓂᕐᒥᓂᒃ, ᑕᕝᕙᓐᖓᑦ ᓇᔪᕐᑕᒥᓂᑦ ᕿᒪᕉᑎᕗᖅ; ᐃᓄᒐᓴᒡᔪᐊᓂᓪᓗ ᒪᓕᒡᑕᐅᕗᖅ, ᖃᓂᒪᔪᓕᒫᓪᓗ ᖃᓂᒻᒪᓯᖏᓐᓂᑦ ᐋᖅᑭᒃᐰᑦ.

¹⁶ ᐃᓂᕐᑎᕐᐰᑦ ᐃᓄᖕᓄᑦ ᐅᖃᐅᓯᕆᔭᐅᔪᒪᓇᓂ.

¹⁷ ᑕᒪᓐᓇ ᔩᓱᓯᐅᑉ ᐱᓂᐊᕐᓂᕆᕚ ᓇᓚᐅᑦᑍᔪᖅ ᐂᓮᐊᓯᒃᑯᑦ ᐅᖃᐅᓯᐅᓯᒪᔪᑦ ᓇᓚᐅᑦᓯᓕᖁᓪᓗᒋᑦ ᐃᒤᓕᔪᑦ:

¹⁸ “ᑕᑯᒋᑦ, ᑕᕝᕙ ᐱᔨᒐ, ᓂᕈᐊᕐᓯᒪᔭᕋ, ᓇᒡᓕᒋᔭᕋ, ᖁᕕᐊᒋᑦᓯᐊᕐᑕᕋᓗ. ᐊᓂᕐᓂᕋ ᑐᓂᓛᕐᐸᕋ ᑖᑦᓱᒧᖓ, ᐅᖃᐅᓯᖃᕈᒫᕐᐳᖅ ᐊᑦᔨᒌᒃᑎᑦᓯᓗᓂ ᔫᑎᐅᖏᑦᑐᓄᑦ.

¹⁹ ᐂᕙᖃᑎᖃᕈᒫᓐᖏᓚᖅ ᕾᒐᓛᕈᒫᕋᓂᓗ, ᐊᖅᑯᑎᓂ ᓂᐱᖓ ᑐᓵᔭᐅᔪᒫᓐᖏᓚᖅ.

²⁰ ᓇᑲᑦᓯᔪᒫᓐᖏᓚᖅ ᐃᕕᒡᔪᐊᒥᒃ ᓂᐅᖓᔪᒥᒃ, ᖃᒥᑦᓯᔪᒫᓐᖏᓚᕐᓗ ᖁᓪᓕᐅᑉ ᒪᓂᖓᓂᒃ ᐸᓕᓕᕐᑐᒥᒃ. ᓴᐱᓕᕈᒫᓐᖏᓚᕐᓗ ᐊᑦᔨᒌᒃᑎᑦᓯᓂᕐᒥᒃ ᓵᓚᖃᕐᑎᑦᓯᓚᐅᖅᑳᕋᓂ;

²¹ ᔫᑎᐅᖏᑦᑐᓕᒫᓪᓗ ᐊᑎᕐᒥᒍᑦ ᓂᕆᐅᒋᔭᒃᓴᖃᓕᕐᑎᑦᓱᒫᕐᐰᑦ.”

ᔩᓱᓯᓗ ᐱᐅᓪᓯᐹᐱᓗ

²² ᐃᓄᐃᑦ ᐃᓚᖏᑦ ᔩᓱᓯᒧᐊᕈᑦᔨᕗᑦ ᑕᐅᑐᖏᑦᑐᒥᒃ ᐊᖑᒻᒥᒃ, ᐅᖃᕈᓐᓇᖏᑦᑐᒥᒡᓗ ᐊᓂᕐᓂᕐᓗᖕᒧᑦ ᐃᓗᒻᒥᕐᑕᐅᓯᒪᒐᒥ, ᑖᓐᓇ ᔩᓱᓯᐅᑉ ᐋᖅᑭᒃᐹ, ᐊᖑᑦ ᐅᖃᕈᓐᓇᕐᓯᕗᖅ ᑕᐅᑐᓕᕐᓗᓂᓗ.

²³ ᐃᓄᒋᐊᒃᑐᕐᔪᐊᓕᒫᑦ ᑲᒪᓂᐊᕐᐳᑦ ᔩᓱᓯᐅᑉ ᐱᓂᐊᕐᓂᕆᔭᖓᓂᒃ, ᐅᖃᕐᓗᑎᒃ, “ᐅᓈ ᑍᕕᑎᐅᑉ ᐃᕐᓂᕆᓐᖏᑕᕋᓗᐊᖓ?”

²⁴ ᐹᕆᓯᑦ ᑕᒪᑐᒥᖓ ᑐᓴᕋᒥᒃ, ᐅᖃᕐᐳᑦ, “ᐅᓇ ᔩᓱᓯ ᐊᓂᕐᓂᕐᓗᖕᓂᒃ ᐃᓄᖕᒥᑦ ᐊᓂᑎᑦᓯᖃᑦᑕᕐᑐᖅ ᐊᓂᕐᓂᕐᓗᐃᑦ ᐊᖓᔪᖅᑳᖓᓐᓄᑦ ᐱᐅᓪᓯᐹᐱᒧᑦ ᐱᔪᓐᓇᕐᓂᖃᕐᑎᑕᐅᓪᓗᓂ ᑍᒤᓕᐅᖃᑦᑕᕐᑐᖅ.”

²⁵ ᔩᓱᓯᐅᑉ ᖃᐅᔨᒪᒐᒥᒋᑦ ᖃᓄᖅ ᐃᓱᒪᖃᕐᒪᖔᑕ, ᐅᖃᐅᑎᕔᑦ, “ᓄᓇᓖᑦ ᐊᖓᔪᖅᑳᕐᔪᐊᖃᕐᑐᑦ ᐊᑕᐅᓯᕐᒥᒃ ᐊᒡᒍᕐᓗᑎᒃ ᐃᒻᒥᖕᓄᑦ ᐅᓇᑕᓕᕈᑎᒃ ᐊᖓᔪᖅᑲᐅᕕᒃ ᐊᑯᓂᐅᖏᑦᑐᖅ ᓄᖑᒃᑲᔭᕐᐳᖅ, ᓄᓇᓖᓪᓗ, ᐅᕝᕙᓗ ᐃᓚᒌᑦ ᐃᒡᓗᒥᐅᖃᑎᒌᑦ ᐊᒡᒍᕐᓗᑎᒃ, ᐃᒻᒥᖕᓄᑦ ᐅᓇᑕᓕᕈᑎᒃ ᐊᑕᐅᓯᐅᔪᓐᓃᕋᔭᕐᐳᑦ.

²⁶ ᓵᑖᓇᓯᐅᓪᓗ ᓵᑖᓇᓯᐅᖃᑎᓂ ᐊᓂᑎᒃᑯᓂᐅᒃ, ᐃᒻᒥᓂᒃ ᓯᖁᑦᑎᕐᓗᓂ ᐊᒡᒍᕋᔭᕐᐳᖅ; ᖃᓄᕐᓕ ᑍᒪ ᐊᑕᓂᐅᕕᖓ ᑲᔪᓯᔪᓐᓇᕋᔭᕐᐸ?

²⁷ ᐊᓂᕐᓂᕐᓗᐃᑦ ᐊᓂᑎᒍᒃᑭᑦ ᐱᐅᓪᓯᐹᐱᒃᑯᑦ, ᒪᓕᒃᑎᓯᓕ ᑍᒪ ᓇᐅᒃᑯᑦ ᐊᓂᑎᑦᓯᖃᑦᑕᕐᐸᑦ ᐊᓂᕐᓂᕐᓗᖕᓂᒃ? ᑍᒤᒻᒪᑦ ᒪᓕᒡᑎᓯ ᐃᖅᑲᕐᑐᐃᔨᒋᔪᒫᕐᐸᓯ.

²⁸ ᒎᑎᐅᓪᓕ ᐊᓂᕐᓂᖓᒍᑦ, ᐊᓂᕐᓂᕐᓗᐃᑦ ᐊᓂᑎᒍᒃᑭᑦ, ᑕᕝᕙ ᒎᑎᐅᑉ ᐊᑕᓂᐅᕕᖓᓄᑦ ᑎᑭᑕᐅᓯᒪᓕᕐᐳᓯ.

²⁹ “ᐅᕝᕙᓗ ᖃᓄᖅ ᓴᓐᖏᔪᐊᓘᑉ ᐃᒡᓗᖓᓄᑦ ᐃᑎᕐᑐᖃᕈᓐᓇᕐᐹ? ᐱᖁᑎᖏᓐᓂᒡᓗ ᐊᕐᓵᕐᓗᒍ, ᑭᓯᐊᓂ ᓴᓐᖏᔪᐊᓗᒃ ᕿᓚᒃᓱᖅᑳᕐᓗᒍ; ᑕᕝᕙ ᐃᒡᓗᖓᑕ ᐱᖁᑎᖏᓐᓂᒃ ᐊᕐᓵᕐᓯᔪᓐᓇᕐᓯᒐᔭᕐᐳᖅ.

³⁰ “ᐱᓇᓱᐊᖃᑎᒋᓐᖏᑕᕋ ᐅᕙᓐᓂᒃ ᐊᑭᕋᕐᑐᕐᐳᖅ; ᐅᕙᓐᓂᒡᓗ ᑲᑎᕐᓱᐃᖃᑎᖃᖏᑦᑐᖅ ᐊᕕᑎᕆᕗᖅ.

³¹ ᑍᒤᒻᒪᑦ ᐅᖃᐅᑎᕙᑦᓯ, ᐃᓄᐃᑦ ᐊᔪᕐᑐᓕᓂᕐᒥᖕᓂᑦ ᖃᓄᐃᑦᑐᑐᐃᓐᓇᓂᑦ, ᒎᑎᒥᒡᓘᓐᓃᑦ ᐅᖃᕐᓂᕐᓗᒃᓯᒪᒐᓗᐊᕐᐸᑕ ᐃᓱᒪᒋᔪᓐᓁᕐᕕᐅᔪᓐᓇᕐᐳᑦ, ᐊᓂᕐᓂᕐᒥᒡᓕ ᐃᑦᔪᕐᓁᑦᑐᒥᒃ ᐅᖃᕐᓂᕐᓘᑦᔨᔪᖅ ᐃᓱᒪᒋᔪᓐᓁᕐᑕᐅᓂᐊᓐᖏᓚᖅ.

³² ᓇᓪᓕᐊᓪᓗ ᐊᑭᕋᕐᑐᕐᑐᖅ ᐃᓅᑉ ᐃᕐᓂᖓᓂᒃ ᐃᓱᒪᒋᔪᓐᓁᕐᑕᐅᓂᐊᕐᐳᖅ; ᓇᓪᓕᐊᓪᓕ ᐊᑭᕋᕐᑐᕐᐸᑦ ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐃᓱᒪᒋᔪᓐᓁᕐᑕᐅᓂᐊᓐᖏᓚᖅ, ᒫᓐᓇ ᓇᓪᓕᐅᑦᑐᒥ ᐱᔪᒫᕐᑐᒥᓗ.”

ᓇᐹᕐᑐᖅ ᐱᕈᕐᑐᖏᓪᓗ

³³ “ᓇᐹᕐᑐᖅ ᐱᐅᒃᐸᑦ ᐸᐅᕐᖓᖏᑦ ᐱᐅᓂᐊᕆᕗᑦ; ᓇᐹᕐᑐᖅ ᐱᐅᖏᑉᐸᑦ ᐸᐅᕐᖓᖏᑦ ᐱᐅᖏᓐᓂᐊᕆᕗᑦ; ᓇᐹᕐᑐᖅ ᐱᕈᕐᑐᖏᑎᒍᑦ ᖃᐅᔨᒪᔭᐅᕙᒃᐳᖅ.

³⁴ ᐃᓕᑦᓯ ᖁᒡᓗᒋᐊᖑᔪᓯ ᖃᓄᖅ ᐱᐅᔪᓂᒃ ᐅᖃᕈᓐᓇᕐᐱᓰ? ᐱᐅᖏᑦᑑᑎᓪᓗᓯ, ᐆᒻᒪᑎᐅᑉ ᑕᑕᑦᔪᑎᖓᓂᒃ ᐃᓄᒃ ᐅᖃᐅᓯᖃᓲᖑᕘᖅ.

³⁵ ᐃᓄᒃ ᐱᐅᔪᖅ ᐱᐅᔪᓂᒃ ᓴᖅᑭᑎᑦᓯᕙᒃᐳᖅ ᐱᐅᔪᓂᒃ ᑲᑎᕐᓯᕕᖕᒥᓂᑦ; ᐃᓄᒡᓕ ᐱᐅᖏᑦᑐᖅ ᐱᐅᖏᑦᑐᓂᒃ ᓴᖅᑭᑎᑦᓯᕙᒃᐳᖅ ᐱᐅᖏᑦᑐᓂᒃ ᑲᑎᕐᓯᕕᖕᒥᓂᑦ.

³⁶ “ᐅᖃᐅᑎᕙᑦᓯ, ᐃᖅᑲᕐᑐᕐᑕᐅᕕᐅᑉ ᐅᓪᓗᖓᓂ ᐃᓄᓕᒫᑦ ᓴᖅᑭᑎᑦᓯᔭᕆᐊᖃᕈᒫᕐᐳᑦ ᐊᑑᑎᖃᖏᑦᑐᓂᒃ ᐅᖃᐅᓯᕆᓚᐅᕐᓯᒪᔭᒥᖕᓂᒃ.

³⁷ ᐅᖃᐅᓯᑦᓯᓐᓄᑦ ᐸᓯᔭᒃᓴᐅᖏᓐᓂᕋᕐᑕᐅᔪᒫᕐᐳᓯ, ᐅᖃᐅᓯᑦᓯᓄᓪᓗ ᐸᓯᔭᒃᓴᓐᖑᕐᑎᑕᐅᔪᒫᕐᐳᓯ.”

ᑲᒪᓇᕐᑐᒥᒃ ᐊᒃᓱᕈᕐᓗᑎᒃ ᓴᖅᑭᑎᑦᓯᕕᐅᔪᒪᔪᑦ

³⁸ ᑕᕝᕙ ᐱᖁᔭᓂᒃ ᐃᓕᓮᔩᑦ, ᐹᕆᓯᓪᓗ ᐃᓚᖏᑦ ᐅᖃᕐᐳᑦ, “ᐃᓕᓮᔩ, ᑲᒪᓇᕐᑐᓕᑎᓪᓗᑎ ᑕᑯᓐᓇᕈᒪᔪᒍᑦ.”

³⁹ ᔩᓱᓯᐅᑉ ᐅᖃᐅᑎᕔᑦ, “ᐅᓪᓗᒥᐅᔪᖅ ᐃᓄᐃᑦ ᐱᐅᖏᑦᑐᓕᔪᑦ ᒎᑎᖃᖏᑦᑐᓪᓗ ᑲᒪᓇᕐᑐᓕᓂᕐᓂᒃ ᑕᑯᔪᒪᕗᑦ; ᑲᒪᓇᕐᑐᓕᓂᕐᒥᒃ ᑐᓂᓯᕕᐅᓂᐊᓐᖏᓚᑦ ᓇᓚᐅᑦᑍᔪᑉ ᔫᓇᐅᑉ ᑲᒪᓇᕐᑐᓕᓂᖓᑕ ᐊᓯᐊᓂᒃ.

⁴⁰ ᔫᓇ ᐃᒪᕐᒥᐅᑖᓘᑉ ᐃᓗᐊᓃᓚᐅᕐᒪᑦ ᐅᓪᓗᓂᒃ ᐱᖓᓱᓂᒃ ᐅᓐᓄᐊᓂᒡᓗ ᐱᖓᓱᓂᒃ, ᑍᒫᒃᑕᐅᖅ ᐃᓅᑉ ᐃᕐᓂᖓ ᐅᓪᓗᓂᒃ ᐱᖓᓱᓂᒃ ᐅᓐᓄᐊᓂᒡᓗ ᐱᖓᓱᓂᒃ ᓄᓇᕐᔪᐊᑉ ᐃᑎᓂᖓᑕ ᐃᓗᐊᓃᑦᓱᒫᕆᕗᖅ.

⁴¹ ᐃᖅᑲᕐᑐᕐᑕᐅᕕᒃ ᓇᓪᓕᐅᑎᒃᐸᑦ ᓂᓂᕕᒥᐅᑦ ᐃᓄᖏᑦ ᒪᑭᑦᓱᒫᕐᐳᑦ ᒫᓐᓇ ᐃᓅᔪᓂᒃ ᐃᖅᑲᕐᑐᐃᓗᑎᒃ ᐃᒋᑕᒃᓴᕈᕐᑎᑦᓯᓗᑎᒡᓗ; ᐊᔪᕐᓂᕐᒥᖕᓂᑦ ᖃᕿᐊᓕᓚᐅᕐᒪᑕ ᔫᓇ ᓇᓚᐅᑦᑍᔪᖅ ᐅᖃᓪᓚᒃᑎᓪᓗᒍ ᑐᓴᕋᒥᒃ; ᑕᑯᒋᑦ, ᐅᖃᐅᑎᕙᑦᓯ, ᑕᕝᕙᓃᑦᑐᖃᕐᐳᖅ ᔫᓇᒥᑦ ᐊᔪᖏᓐᓂᕐᓴᐅᔪᒥᒃ!

⁴² ᐃᖅᑲᕐᑐᕐᑕᐅᕕᒃ ᓇᓪᓕᐅᑎᒃᐸᑦ ᓰᐸᒥᐅᑦ ᐊᖓᔪᖅᑳᕐᔪᐊᖓ ᐊᕐᓇᖅ ᒪᑭᑦᓱᒫᕐᐳᖅ ᒫᓐᓇ ᐃᓅᔪᓂᒃ ᐃᒋᑕᒃᓴᓐᖑᕐᑎᑦᓯᓗᓂ; ᑖᓐᓇ ᐅᖓᓯᒃᑐᐊᓗᖕᒧᑦ ᐃᖏᕐᕋᓚᐅᕐᒪᑦ ᓄᓇᒥᓂᑦ, ᑐᓵᔭᕐᑐᕐᓗᓂ ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᓯᓚᑐᓂᖓᓂᒃ, ᑕᑯᒋᑦ, ᐅᖃᐅᑎᕙᑦᓯ ᑕᕝᕙᓃᑦᑐᖃᕐᐳᖅ ᓲᓗᒨᓂᒥᑦ ᐊᔪᖏᓐᓂᕐᓴᐅᔪᒥᒃ!”

ᐊᓂᕐᓂᕐᓘᑉ ᓵᑖᓇᓯᒥᓐᖔᕐᓯᒪᔫᑉ ᐅᑎᕐᓂᖓ

⁴³ “ᐊᓂᕐᓂᕐᓗᒃ ᐃᓄᖕᒥᑦ ᐊᓂᒐᒥ, ᓄᓇᒃᑯᑦ ᐸᓂᕐᑐᒃᑯᑦ ᐃᖏᕐᕋᕗᖅ ᐃᓂᒃᓴᒥᓂᒃ ᕿᓂᕐᓗᓂ, ᓇᓂᓯᔪᓐᓇᖏᒃᑯᓂᓕ,

⁴⁴ ᐃᒻᒥᓄᑦ ᐅᖃᕐᐳᖅ, ‘ᐃᒡᓗᒧᑦ ᕿᒪᓚᐅᕐᑕᓐᓄᑦ ᐅᑎᕐᓂᐊᓕᕐᐳᖓ.’ ᐅᑎᕋᒥ, ᐃᒡᓗ ᑕᑯᕚ ᐃᓗᓕᖃᖏᑦᑐᖅ, ᓴᓗᒪᑦᓯᐊᕐᓗᓂ, ᐋᖅᑭᑦᑎᐊᕐᓯᒪᓕᕐᑐᖅ.

⁴⁵ ᑕᕝᕙ ᐊᓂᕗᖅ ᑕᕝᕙᓐᖓᑦ ᐊᓂᕐᓂᕐᓂᒃ 7ᓂᒃ ᐃᒻᒥᓂᑦ ᐱᐅᖏᑦᑑᓂᕐᓴᐅᔪᓂᒃ ᐃᓚᖃᓕᕐᓗᓂ, ᑕᕝᕗᖓᓗ ᑎᑭᓐᓇᒥᒃ ᑕᕝᕙᓂ ᐃᓂᖃᓕᕐᐳᑦ; ᑕᒪᑐᒪᓗ ᑭᖑᓂᖓᒍᑦ ᐃᓄᒃ ᑖᓐᓇ ᓯᕗᕐᖓᓂᑦ ᐱᐅᖏᓐᓂᕐᓴᐅᓕᕐᐳᖅ. ᑍᒤᑦᓱᒫᕆᕗᑦᑕᐅᖅ ᐅᓪᓗᒥ ᐃᓅᔪᓄᑦ ᐱᐅᖏᑦᑐᓄᑦ.”

ᔩᓱᓯᐅᑉ ᐊᓈᓇᖓ ᖃᑕᓐᖑᑎᖏᓪᓗ

⁴⁶ ᔩᓱᓯ ᓱᓕ ᐅᖃᓪᓚᒃᑎᓪᓗᒍ ᐃᓄᖕᓄᑦ, ᑕᑯᒋᑦ, ᔩᓱᓯᐅᑉ ᐊᓈᓇᖓ ᖃᑕᓐᖑᑎᖏᓪᓗ ᑕᕝᕗᖓ ᑎᑭᑉᐳᑦ, ᐃᒡᓘᑉ ᓯᓚᑖᓃᓕᕋᒥᒃ, ᔩᓱᓯ ᐅᖃᐅᑦᔭᐅᖁᕚᑦ ᐅᖃᖃᑎᖃᕈᒪᓪᓗᑎᒃ.

⁴⁷ ᑕᕝᕙ ᐃᓄᐃᑦ ᐃᓚᖓᓐᓄᑦ ᔩᓱᓯ ᐅᖃᐅᑦᔭᐅᕗᖅ, “ᑕᑯᒋᑦ, ᐊᓈᓁᓪᓗ ᖃᑕᓐᖑᑎᑎᓪᓗ ᓯᓚᒥ ᓇᖏᕐᐳᑦ, ᐃᓕᖕᓂᒃ ᐅᖃᖃᑎᖃᕈᒪᓪᓗᑎᒃ.”

⁴⁸ ᔩᓱᓯᐅᑉ ᑭᐅᕔᑦ, “ᑭᓈ ᐊᓈᓇᒐ, ᑭᓇᒃᑯᓪᓘ ᖃᑕᓐᖑᑎᒃᑲ?”

⁴⁹ ᔩᓱᓯ ᐃᓕᓐᓂᐊᕐᑎᒥᓄᑦ ᑎᒃᑯᐊᕐᓗᓂ ᐅᖃᕐᐳᖅ, “ᑕᑯᒋᑦ! ᐅᑯᐊ ᑕᕝᕙ ᐊᓈᓇᒃᑲ ᖃᑕᓐᖑᑎᒃᑲᓗ!

⁵⁰ ᓇᓪᓕᐊᑦ ᐊᑖᑕᒪ ᕿᓚᖕᒦᑦᑑᑉ ᐱᓂᐊᕐᑕᐅᖁᔭᖓᓂᒃ ᐱᓇᓱᐊᕐᑐᖅ, ᑖᓐᓇ ᖃᑕᓐᖑᑎᒋᕙᕋ, ᓇᔭᒋᓪᓗᒍᓗ, ᐊᓈᓇᒋᕙᕋ.”