ᒫᑎᐅᓯᐅᑉ ᐊᒡᓚᖏᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦᐋᐴᓯᑕᓖᑦ 12 ᕾᖁᔭᐅᓂᖏᑦ ᒫᑯᓯ 3:13-19 ; ᓘᑲᓯ 6:12-16 1 ᔩᓱᓯᐅᑉ ᐃᓕᓐᓂᐊᕐᑎᓂ 12 ᕾᖁᕔᑦ, ᐱᔪᓐᓇᕐᓂᕐᑖᕐᑎᓪᓗᒋᑦ ᐊᓂᕐᓂᕐᓗᖕᓂᒃ ᐊᓂᑎᑦᓯᔪᓐᓇᖁᓪᓗᒋᑦ, ᖃᓄᐃᑦᑐᑐᐃᓐᓇᕐᓂᒡᓗ ᐋᓐᓂᐊᓇᕐᑐᓂᒃ ᖃᓂᒻᒪᓯᕐᓂᒡᓗ ᐋᖅᑮᔪᓐᓇᕐᓯᑎᓪᓗᒋᑦ. 2 ᐋᐴᓯᑕᓖᑦ 12 ᐊᑎᖏᑦ ᐅᑯᐊᖑᕗᑦ: ᓯᕗᓪᓕᕐᐹᖅ, ᓮᒨᓂ, ᑍᔭᐅᔪᖅ ᐲᑦᑐᕉᓯᒥᒃ ᖃᑕᓐᖑᑖᓗ ᐋᓐᑐᕉ; ᔧᒥᓯᒃᑯᒡᓗ ᔪᐊᓇᓯᑯᒃ ᓄᑲᕇᒃ, ᓯᐱᑎᐅᑉ ᐃᕐᓂᖏᒃ. 3 ᐱᓕᑉᐴᓯ, ᐸᑎᐅᓗᒥᐅᓗ; ᑑᒪᓯ, ᒫᑎᐅᓯᓗ, ᕉᒪᒥᐅᑦ ᑮᓇᐅᔧᕐᑎᑦᓯᔨᖁᑎᖓᑦ; ᔧᒥᓯᓗ ᐊᐅᓪᐱᐊᓯᐅᑉ ᐃᕐᓂᖓ, ᑖᑎᐊᓯᓗ; 4 ᓮᒨᓂᓗ ᑬᓇᓂᒥᐅᒥᒃ ᑍᔭᐅᔪᖅ ᔫᑕᓯᓗ ᐃᔅᑲᕆᐊᑦ, ᑖᑦᓱᒪ ᔩᓱᓯ ᐱᔭᐅᑎᓚᐅᕐᐹ. ᑖᒃᑯᐊ 12 ᐱᓕᕆᐊᒃᓴᖏᓐᓂᒃ ᐅᖃᐅᑦᔭᐅᓂᖏᑦ ᒫᑯᓯ 6:7-13 ; ᓘᑲᓯ 9:1-6 5 ᑖᒃᑯᐊ 12 ᔩᓱᓯᐅᑉ ᑎᓕᕔᑦ ᐃᒫᒃ ᒪᓕᒐᒃᓴᓕᐅᕐᓗᒋᑦ, “ᔫᑎᐅᖏᑦᑐᑦ ᓄᓇᖏᓐᓄᑦ ᐂᓂᐊᕋᓯ, ᓴᒥᐊᕆᐊᕐᒥᐅᑦ ᓄᓇᖏᓐᓄᐊᕐᑍᓕᓗᓯ. 6 ᒪᑯᓄᖓᓕ ᓰᐱᓄᑦ ᐊᓯᐅᓯᒪᔪᓄᑦ ᐂᓕᕆᑦᓯ, ᐃᓴᕆᐊᓕᒥᐅᑦ ᐃᓄᖏᓐᓄᑦ. 7 ᐃᒫᒃ ᐊᔪᕆᕐᑐᐃᓗᓯ, ‘ᕿᓚᐅᑉ ᐊᑕᓂᐅᕕᐊ ᖃᒡᓕᓕᕐᐳᖅ!’ 8 ᖃᓂᒪᔪᑦ ᐋᖅᑭᒃᓯᒋᒃ, ᑐᖁᖓᔪᓪᓗ ᐆᒻᒪᕐᑎᓪᓗᒋᑦ, ᓯᕘᕋᒋᔭᐅᔪᓂᒡᓗ ᐸᕐᑎᕐᑐᑦ ᐸᕐᑎᕈᓐᓃᕐᑎᓯᒋᒃ, ᐊᓂᕐᓂᕐᓗᐃᓪᓗ ᐃᓄᖕᓂᑦ ᐊᓂᑎᓪᓗᒋᑦ. ᐊᑭᖃᖏᑦᑐᒥᒃ ᑐᓂᓯᕕᐅᒐᑦᓯ ᐊᑭᖃᖏᑦᑐᒥᒃᑕᐅᖅ ᑐᓂᓯᐅᒃ. 9 ᒎᓗᓂᒃ, ᓯᐅᓪᕕᕆᒥᒡᓘᓐᓃᑦ ᓇᒃᓴᕐᓂᐊᕋᓯ, ᑲᓐᓄᔭᓂᒡᓘᓐᓃᑦ ᑮᓇᐅᔭᓂᒃ ᐃᒃᐱᐊᕐᔪᖕᒥᐅᑕᖃᕐᓂᐊᕋᓯ; 10 ᐊᐅᓪᓚᓕᕈᑦᓯ ᕿᓄᕋᑏᑦ ᐴᒃᓴᔭᖓᓂᒃ ᓇᒃᓴᕐᓂᐊᕋᓯ, ᐅᕕᓂᕈᒃᑲᓐᓂᕐᓂᒡᓗ, ᐃᑎᒐᒍᑎᒃᑲᓐᓂᕐᓂᒡᓘᓐᓃᑦ, ᐊᔭᐅᑉᐱᐊᒥᒡᓘᓐᓃᑦ ᓇᒃᓴᕐᓂᐊᕋᓯ; ᐱᓇᓱᐊᕐᑎ ᑐᓂᓯᕕᐅᔭᕆᐊᖃᕐᒪᑦ ᐱᔭᕆᐊᖃᕐᑕᖓᓂᒃ. 11 “ᐃᒡᓗᒐᓴᖕᓄᑦ ᑎᑭᑯᑦᓯ ᓄᓇᓕᖕᓄᓪᓘᓐᓃᑦ, ᖃᐅᔨᓇᓱᐊᕆᑦᓯ ᕿᓂᕐᓗᓯ ᓇᓪᓕᐊᓐᓂᑐᐃᓐᓇᖅ ᐃᓕᑦᓯᓐᓂᒃ ᑐᓐᖓᓱᒃᑎᑦᓯᒐᔭᕐᑐᒥᒃ, ᑐᓐᖓᓱᒃᑎᑦᓯᔪᖅ ᑖᓐᓇ ᓇᔪᓕᕐᓯᐅᒃ, ᑕᕝᕙᓐᖓᑦ ᓄᓇᒥᑦ ᐊᐅᓪᓚᓚᐅᖅᑳᕋᓯ. 12 ᐃᒡᓗᒧᑦ ᐃᑎᕈᑦᓯ, ᐅᖃᕆᑦᓯ ‘ᓮᒪᓂᐅᑉ ᐃᓚᒋᓕᓯ.’ 13 ᐃᓄᖏᓐᓂᑦ ᑐᓐᖓᓱᒃᑎᑕᐅᒍᑦᓯ, ᓮᒪᓂᐅᑉ ᓇᔪᕐᓂᐊᕐᐹᓯ; ᑐᓐᖓᓱᒃᑎᑕᐅᖏᒃᑯᑦᓯᓕ ᓮᒻᒪᕐᑎᑦᓯᓂᓯ ᐊᑐᕐᓂᐊᓐᖏᓚᖅ. 14 ᓄᓇᓕᖕᓂᑦ ᑐᓐᖓᓱᒃᑎᑕᐅᖏᒃᑯᑦᓯ ᐅᖃᐅᓯᕆᔭᓯ ᓈᓚᒃᑕᐅᔪᒪᖏᑉᐸᑕ, ᑕᕝᕙᓐᖓᑦ ᐊᐅᓪᓚᕆᑦᓯ ᐃᑎᒐᑦᓯ ᓴᓂᖏᑦ ᑲᑕᒐᕐᑎᓪᓗᒋᑦ. 15 ᖁᓚᕐᓇᖏᑦᑐᒥᒃ ᐅᖃᐅᑎᕙᑦᓯ, ᐃᖅᑲᕐᑐᐃᕕᒃ ᓇᓪᓕᐅᑎᒃᐸᑦ ᒎᑎᐅᑉ ᓂᑲᒋᓂᕐᓴᕆᓛᕐᐰᑦ ᓱᑑᒪᒥᐅᑦ ᒍᒨᕋᒥᐅᓪᓗ ᐃᓄᖏᑦ ᑖᒃᑯᓇᖓᑦ ᓄᓇᓕᖕᓂᑦ ᑐᓐᖓᓱᒃᑎᑦᓯᖏᑦᑐᓂᑦ.” ᐊᑭᕋᕐᑐᕐᑕᐅᓂᐅᑉ ᑎᑭᐅᑎᓂᖓ ᒫᑯᓯ 13:9-13 ; ᓘᑲᓯ 21:12-17 16 “ᑕᑯᒋᑦ ᓰᐱᑎᑐᑦ ᑎᓕᕙᑦᓯ ᐊᒪᕈᐃᑦ ᐊᑯᕐᖓᓐᓄᑦ; ᑍᒤᒻᒪᑦ ᖁᒡᓗᒋᐊᑎᑐᑦ ᐅᑦᔨᕐᓱᑎᐊᕆᑦᓯ, ᑑᕕᑎᑐᓪᓗ ᐱᖁᓐᓂᕐᑎᒋᓗᓯ. 17 ᖃᐅᔨᓴᑦᓯᐊᕆᑦᓯ, ᐊᖑᑏᑦ ᐃᓚᖏᓐᓄᑦ ᑎᒍᔭᐅᔪᒫᕐᐳᓯ ᐃᖅᑲᕐᑐᕐᑕᐅᕕᖕᒧᓪᓗ ᐋᑕᐅᓗᓯ, ᐃᓯᖁᔭᐅᔪᓐᓃᕈᒫᕐᐳᓯᓗ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓄᑦ. 18 ᐅᕙᖓᓗ ᐱᑦᔪᑎᒋᓗᖓ ᐃᖅᑲᕐᑐᕐᑕᐅᔪᒫᕐᐳᓯ ᐊᐅᓚᑦᓯᔨᐅᔪᓄᑦ ᐊᖓᔪᖅᑳᕐᔪᐊᓄᓪᓗ, ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᖃᐅᓯᖃᕈᓐᓇᖁᓪᓗᓯ ᑖᒃᑯᓄᖓ, ᔫᑎᐅᖏᑦᑐᓄᓪᓗ. 19 ᐃᖅᑲᕐᑐᕐᑕᐅᕕᖕᒧᑦ ᐋᑕᐅᒍᑦᓯ ᐃᓱᒪᔮᕐᓂᐊᕋᓯ ᖃᓄᖅ ᐅᖃᕆᐊᖃᕐᓂᐊᕐᒪᖔᑦᓯ, ᐅᕝᕙᓗ ᖃᓄᐃᓕᓗᓯ ᐅᖃᐅᓯᖃᕐᓂᐊᒪᖔᑦᓯ; ᑕᒪᓐᓇ ᓇᓪᓕᐅᑎᒃᐸᑦ, ᐅᖃᐅᓯᒃᓴᑦᓯᓐᓂᒃ ᑐᓂᓯᕕᐅᔪᒫᕋᑦᓯ. 20 ᐅᖃᐅᓯᕆᔭᓯ ᐃᓕᑦᓯᓐᓂᑦ ᐱᓂᐊᖏᒻᒪᑕ; ᐊᑖᑕᑦᓯᓕ ᐊᓂᕐᓂᖓᓂᑦ ᐱᔪᒫᕐᐳᑦ, ᐅᖃᓪᓚᒍᒫᕐᒪᑦ ᐃᓕᑦᓯᑎᒍᑦ. 21 “ᐊᖑᑦ ᐱᔭᐅᒃᑬᔪᒫᕐᐳᖅ ᖃᑕᓐᖑᑎᒥᓂᒃ ᑐᖁᑎᑕᐅᖁᓪᓗᒍ, ᐊᑖᑕᐅᔪᕐᓗ ᑍᒫᑦᓮᓐᓇᖅ ᐱᔪᒫᕆᕗᖅ ᕿᑐᕐᖓᒥᓄᑦ; ᕿᑐᕐᖓᕐᓗ ᐊᖓᔪᖅᑳᒥᖕᓂᒃ ᐊᑭᕋᕐᑐᓕᕈᒫᕐᐳᑦ ᑐᖁᑕᐅᑎᑦᓯᓗᑎᒃ. 22 ᐃᓄᓕᒫᓄᑦ ᐆᒥᒋᔭᐅᓕᕈᒫᕐᐳᓯ ᐅᕙᖓ ᐱᓪᓗᖓ. ᐅᒃᐱᕐᓂᕐᒥᓂᒡᓕ ᑎᒍᒥᐊᖏᓐᓇᕐᓗᓂ ᐃᓱᐊᓄᑦ, ᑖᓐᓇ ᐱᐅᓕᔭᐅᔪᒫᕐᐳᖅ. 23 ᓄᓇᓕᖕᓂᑦ ᐊᑭᕋᕐᑐᕐᑕᐅᒍᑦᓯ, ᑕᕝᕙᓐᖓᑦ ᕿᒫᒋᑦᓯ ᓄᓇᐅᑉ ᐊᓯᐊᓄᑦ, ᖁᓚᕐᓇᖏᑦᑐᒥᒃ ᐅᖃᐅᑎᕙᑦᓯ ᐃᓴᕆᐊᓕᐅᑉ ᐃᒡᓗᒐᓴᒡᔪᐊᖏᑦ ᐃᖏᕐᕋᔭᕇᕐᕕᒋᓂᐊᖏᓐᓇᑦᓯᐅᒃ, ᐃᓅᑉ ᐃᕐᓂᖓ ᑎᑭᓚᐅᖄᕐᑎᓐᓇᒍ. 24 “ᐃᓕᓐᓂᐊᕐᑎ ᐊᖏᓂᕐᓴᐅᓐᖏᓚᖅ ᐃᓕᓮᔨᒥᓂᑦ; ᐱᔨᓗ ᐊᖏᓂᕐᓴᐅᓐᖏᓚᖅ ᐊᖓᔪᖅᑳᒥᓂᑦ. 25 ᑍᒤᒻᒪᑦ, ᐃᓕᓐᓂᐊᕐᑎ ᐃᓕᓐᓂᐊᕐᑎᑦᓯᔨᒥᑐᑦ ᑍᒤᓕᕈᓂ ᑕᕝᕙ ᓈᒻᒪᒃᓯᕗᖅ, ᐱᔨᓗ ᐊᖓᔪᖅᑳᖃᕐᑐᖅ ᑍᒫᑦᓮᓐᓇᖅ ᐊᖓᔪᖅᑳᒥᑑᓕᕈᓂ ᑕᕝᕙ ᓈᒻᒪᒃᓯᕗᖅ. ᐃᓚᒌᒃᑐᑦ ᐊᖓᔪᖅᑳᖓᑦ ᐱᐅᓪᓯᐹᐱᒥᒃ ᑍᔭᐅᖃᑦᑕᕐᓯᒪᒃᐸᑦ, ᑕᕝᕙ ᓇᖕᒥᓂᖏᑦ ᐊᑎᖃᕐᑎᑕᐅᓂᐊᕐᐳᑦ, ᐱᐅᖏᓐᓂᕐᓴᐅᒃᑲᓐᓂᕐᑐᒥᒃ!” ᑭᓈ ᓯᕘᕋᒋᔭᐅᔪᒃᓴᐅᕙ? ᓘᑲᓯ 12:2-7 26 “ᑍᒤᒻᒪᑦ ᐃᓄᖕᓂᒃ ᓯᕘᕋᓂᐊᕋᓯ; ᐃᔨᕐᑕᐅᓯᒪᔪᑦ ᓴᖅᑭᑎᑕᐅᔪᒫᕐᐳᑦ, ᐃᔨᕋᕐᑐᐊᖑᔪᓪᓗ ᖃᐅᔨᔭᐅᔪᒫᕐᐳᑦ. 27 ᑖᕐᑐᒥ ᐅᖃᐅᑎᒍᑦᓯ, ᖃᐅᒪᑦᓯᐊᕐᑐᒥ ᐅᖃᐅᓯᕆᔭᒃᓴᕆᕙᓯ; ᓯᐅᑎᒃᑯᑦ ᐃᓯᑦᔪᒃᕕᐅᒍᑦᓯ ᐅᖃᐅᓯᕆᔭᕆᐊᖃᕐᐸᓯ ᐃᒡᓘᑉ ᖄᖏᓐᓂ. 28 ᓯᕘᕋᒋᓂᐊᕋᓯᒋᒃ ᑎᒥᒥᒃ ᑐᖁᑦᓯᔪᑦ ᑕᕐᓂᕐᒥᒡᓕ ᑐᖁᑦᓯᔪᓐᓇᖏᑦᑐᑦ; ᓯᕘᕋᒋᓯᐅᒃᓕ, ᑕᒤᓐᓂᒃ ᐊᓯᕈᐃᔪᓐᓇᕐᑐᖅ ᑎᒥᒥᒃ ᑕᕐᓂᕐᒥᒡᓗ ᐃᑯᒪᕐᔪᐊᕐᒥ. 29 ᑮᓇᐅᔭᕐᒧᑦ ᓴᕕᕋᔭᑯᓗᖕᒧᑦ ᐊᑕᐅᓯᕐᒧᑦ ᖁᐸᓄᐊᖕᓂᒃ ᒪᕐᕉᖕᓂᒃ ᓂᐅᕕᕈᓐᓇᕐᐳᑎᑦ, ᑍᒤᒃᑲᓗᐊᕐᑎᓪᓗᒍ ᖁᐸᓄᐊᖅ ᐊᑕᐅᓯᕐᓘᓐᓃᑦ ᑲᑕᒡᓂᐊᓐᖏᓚᖅ ᓄᓇᒧᑦ ᐊᑖᑕᑦᓯ ᑍᒤᖁᖏᑉᐸᒍ. 30 ᓄᔭᓯ ᐊᒡᓛᑦ ᓂᐊᖁᑦᓯᓐᓃᑦᑐᑦ ᖃᑦᓯᐅᖕᒪᖔᑕ ᖃᐅᔨᒪᔭᐅᕗᑦ. 31 ᑍᒤᒻᒪᑦ ᓯᕘᕋᓂᐊᕋᓯ; ᖁᐸᓄᐊᓂᑦ ᐅᓄᕐᑐᓂᑦ ᐱᓪᓚᕆᐅᓂᕐᓴᒻᒪᕆᐊᓘᒐᑦᓯ!” ᙭ᔅᑑᓯᒥᒃ ᐅᖃᐅᓯᖃᕐᓂᖅ, ᓇᕐᕈᓂᕐᓗ ᓘᑲᓯ 12:8-9 32 “ᑭᓇᑐᐃᓐᓇᖅ ᐃᓄᖕᓄᑦ ᐅᖃᐅᓯᖃᕐᐸᑦ ᐅᕙᓐᓂᒃ, ᐅᕙᖓᑦᑕᐅᖅ ᑍᒫᑦᓮᓐᓇᖅ ᐅᖃᐅᓯᕆᓛᕐᐸᕋ ᐊᑖᑕᓐᓄᑦ ᕿᓚᖕᒦᑦᑐᒧᑦ. 33 ᑭᓇᑐᐃᓐᓇᕐᓕ ᐃᓄᖕᓄᑦ ᐅᖃᐅᓯᖃᖏᑉᐸᑦ ᐅᕙᓐᓂᒃ, ᐅᕙᖓᑦᑕᐅᖅ ᐅᖃᐅᓯᕆᓛᓐᖏᓐᓂᕙᕋ ᐊᑖᑕᓐᓄᑦ ᕿᓚᖕᒦᑦᑐᒧᑦ.” ᐃᓅᖃᑎᒌᑦᓯᐊᕐᓂᕐᒥᐅᖏᑦᑐᖅ ᐊᑭᕋᕐᑐᕐᑎᒌᖕᓂᕐᒥᒡᓕ ᓘᑲᓯ 12:51-53 ; 14:26-27 34 “ᐃᓱᒪᓂᐊᕋᓯ ᐃᓅᖃᑎᒌᑦᓯᐊᓕᕐᑎᑦᓯᔭᕐᑐᕋᓱᒋᓗᖓ ᓄᓇᕐᔪᐊᕐᒧᑦ; ᐃᓅᖃᑎᒌᑦᓯᐊᓕᕐᑎᑦᓯᔭᕐᑐᓐᖏᓚᖓ, ᓴᕕᒡᔪᐊᕐᒥᒡᓕ ᐱᑎᑦᓯᕗᖓ. 35 ᑎᑭᓚᐅᕐᐳᖓ ᐃᕐᓂᖅ ᐊᑖᑕᒥᖕᓄᑦ ᐊᑭᕋᕐᑐᓕᖁᓪᓗᒍ, ᐸᓂᒡᓗ ᐊᓈᓇᒥᓄᑦ ᐊᑭᕋᕐᑐᓕᖁᓪᓗᒍ; ᐅᑯᐊᕐᓗ ᓴᑭᒥᓄᑦ ᐊᕐᓇᒧᑦ ᐊᑭᕋᕐᑐᓕᖁᓪᓗᒍ; 36 ᐃᓅᑉ ᐊᑲᐅᖏᓐᓂᕐᐹᒥᒃ ᐊᑭᕋᕐᑐᕐᑎᒋᓂᐊᕐᐰᑦ ᓇᖕᒥᓂᓂ ᐃᒡᓗᒥᐅᖃᑎᓂ. 37 “ᓇᓪᓕᐊᑦ ᐊᑖᑕᒥᓂᒃ ᐊᓈᓇᒥᓂᒡᓘᓐᓃᑦ ᐅᕙᓐᓂᑦ ᐅᖓᒋᔭᖃᕐᓂᕐᓴᐅᒃᐸᑦ, ᑖᓐᓇ ᐅᕙᓐᓄᑦ ᐃᓚᒋᔭᐅᔪᓐᓇᓐᖏᓚᖅ; ᓇᓪᓕᐊᓪᓗ ᐃᕐᓂᕐᒥᓂᒃ ᐸᓂᖕᒥᓂᒡᓘᓐᓃᑦ ᐅᕙᓐᓂᑦ ᐅᖓᒋᔭᖃᕐᓂᕐᓴᐅᒃᐸᑦ, ᑖᓐᓇ ᐅᕙᓐᓄᑦ ᐃᓚᒋᔭᐅᔪᓐᓇᖏᓚᖅ. 38 ᓇᓪᓕᐊᑦ ᓴᓐᓂᖓᔪᓕᒃᓴᒥᓂᒃ ᓇᒃᓴᖏᑦᑐᖅ ᒪᓕᒡᓗᓂ ᐅᕙᓐᓂᒃ, ᑖᓐᓇ ᐅᕙᓐᓄᑦ ᐃᓚᒋᔭᐅᔪᓐᓇᓐᖏᓚᖅ. 39 ᐃᓅᓯᕐᒥᓂᒃ ᐊᓐᓂᕈᓱᒃᑐᖅ, ᐃᓅᓯᕐᒥᓂᒃ ᐊᓯᐅᔨᔪᒫᕐᐳᖅ; ᐃᓅᓯᕐᒥᓂᒡᓕ ᐊᓐᓂᕈᓱᖏᑦᑐᖅ ᐅᕙᖓ ᐱᓪᓗᖓ, ᑖᓐᓇ ᐃᓅᓯᕐᒥᓂᒃ ᓇᒡᕚᕈᒫᕐᐳᖅ.” ᐊᑭᓕᕐᑕᐅᓂᒃᓮᑦ ᒫᑯᓯ 9:41 40 “ᐃᓕᑦᓯᓐᓂᒃ ᐃᓚᓕᐅᕐᓯᔪᖅ ᐅᕙᓐᓂᒃ ᐃᓚᓕᐅᕐᓯᕗᖅ; ᐅᕙᓐᓂᒡᓗ ᐃᓚᓕᐅᕐᓯᔪᖅ ᑎᓕᔨᓐᓂᒃ ᐃᓚᓕᐅᕐᓯᕗᖅ. 41 ᓇᓚᐅᑦᑍᔪᒥᒃ ᐃᓚᓕᐅᕐᓯᔪᖅ, ᓇᓚᐅᑦᑍᔪᑐᑦ ᐊᑭᓕᕐᑕᐅᔪᒫᕐᐳᖅ; ᓇᓪᓕᐊᓪᓗ ᐃᓚᓕᐅᕐᓯᔪᖅ ᒎᑎᒥᒃ ᐃᓚᖃᑦᓯᐊᕐᑐᒥᒃ, ᒎᑎᒥᒃ ᐃᓚᖃᑦᓯᐊᕐᑐᑎᑐᑦ ᐊᑭᓕᕐᑕᐅᔪᒫᕐᐳᖅ. 42 ᓇᓪᓕᐊᑦ ᐃᒥᕐᒥᒃ ᓂᒡᓕᓇᕐᑐᒥᒃ ᐃᒥᕐᑎᑦᓯᔪᖅ ᒪᓕᒡᑎᓐᓂᑦ ᒥᑭᓐᓂᕐᐸᐅᔪᒥᒃ, ᐃᒥᕐᑎᑕᐅᔫᑉ ᐅᕙᓐᓄᑦ ᒪᓕᒡᑎᐅᓂᖓ ᐱᑦᔪᑎᒋᓗᒍ, ᑖᓐᓇ ᓱᓕᒻᒪᕆᒡᓗᖓ ᐅᖃᐅᑎᕙᑦᓯ ᐊᑭᓕᕐᑕᐅᑦᓯᐊᕈᒫᕐᐳᖅ.” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society