ᒫᑎᐅᓯᐅᑉ ᐊᒡᓚᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯ ᙭ᔅᑑᓯᐅᑉ ᓯᕗᓕᕕᓂᖏᑦ

¹ ᐅᑯᐊ ᓇᓗᓁᕐᓯᕗᑦ ᔩᓱᓯ ᙭ᔅᑑᓯᐅᑉ ᓯᕗᓕᕕᓂᖏᓐᓂᒃ, ᑖᓐᓇ ᑍᕕᑎᐅᑉ ᑭᖑᕚᕆᓚᐅᑕᖓ, ᐂᑉᕋᕼᐋᒻᓗ ᑭᖑᕚᕆᓪᓗᓂᐅᒃ.

² ᐂᑉᕋᕼᐋᒻ ᐃᕐᓂᕐᑖᕆᕚ ᐂᓴᑭ, ᐂᓴᑭ ᐃᕐᓂᕐᑖᕐᐳᖅ ᔧᑯᒥᒃ, ᔧᑯᑉ ᐃᕐᓂᕐᑖᐳᖅ ᔫᑕᒥᒃ ᖃᑕᓐᖑᑎᖏᓐᓂᓪᓗ.

³ ᔫᑕ ᐃᕐᓂᕐᑖᕐᐳᖅ ᐱᕆᓯ ᔩᕋᓗ ᐊᓈᓇᖃᕐᑑᒃ ᑕᒫᕆᒥᒃ, ᐱᕆᓯ ᐃᕐᓂᕐᑖᐳᖅ ᕼᐃᔅᕋᓐ, ᕼᐃᔅᕋᓐ ᐃᕐᓂᕐᑖᕆᕚ ᕌᒻ,

⁴ ᕌᒥᐅᓪᓗ ᐃᕐᓂᕐᑖᕆᕚ ᐊᒥᓇᑕᑉ, ᐊᒥᓇᑕᐅᓪᓗ ᐃᕐᓂᕐᑖᕆᕚ ᓁᓴᓇ, ᓁᓴᓇᐅᓪᓗ ᐃᕐᓂᕐᑖᕆᕚ ᓵᓪᒪᓐ,

⁵ ᓵᓪᒪᓇᐅᓪᓗ ᐃᕐᓂᕐᑖᕆᕚ ᐳᐊᓯ ᕅᕼᐋᐱᒥᑦ, ᐳᐊᓯᐅᓪᓗ ᐃᕐᓂᕐᑖᕆᕚ ᐅᐱᑎ ᕉᑎᒥᑦ, ᐅᐱᑎᐅᓪᓗ ᐃᕐᓂᕐᑖᕆᕚ ᔨᓯ,

⁶ ᔨᓯᐅᓪᓗ ᐃᕐᓂᕐᑖᕆᕚ ᐊᖓᔪᖅᑳᕐᔪᐊᖅ ᑍᕕᑎ. ᑍᕕᑎᒥᑦ ᐱᒋᐊᕐᓗᒋᑦ ᐹᐱᓘᓂᒧᑦ ᐊᐅᓪᓚᕈᑦᔭᐅᓂᖏᓐᓄᑦ ᑎᑭᓪᓗᒋᑦ, ᑖᒃᑯᐊ ᑭᖑᕚᕆᑦ ᑎᑎᕋᕐᓯᒪᒋᕗᑦ; ᑍᕕᑎᐅᑉ ᐃᕐᓂᕐᑖᕆᕚ ᓲᓗᒨᓂ ᔪᕅᐊᑉ ᓄᓕᐊᕆᓚᐅᕐᑕᖓᓂᑦ.

⁷ ᓲᓗᒨᓂᐅᑉ ᐃᕐᓂᕐᑖᕆᕚ ᕆᕼᐅᐳᐊᒻ, ᕆᕼᐅᐳᐊᒻ ᐃᕐᓂᕐᑖᕆᕚ ᐊᐰᔭ, ᐊᐰᔭᐅᑉ ᐃᕐᓂᕐᑖᕆᕚ ᐂᓴ,

⁸ ᐂᓴᐅᑉ ᐃᕐᓂᕐᑖᕆᕚ ᔨᕼᐆᓴᐸᑦ, ᔨᕼᐆᓴᐸᑦ ᐃᕐᓂᕐᑖᕆᕚ ᔪᕌᒻ, ᔪᕌᒥᐅᑉ ᐃᕐᓂᕐᑖᕆᕚ ᐅᓮᐊ,

⁹ ᐅᓮᐊᐅᑉ ᐃᕐᓂᕐᑖᕆᕚ ᔫᑕᒻ, ᔫᑕᒥᐅᑉ ᐃᕐᓂᕐᑖᕆᕚ ᐂᕼᐊᔅ, ᐂᕼᐊᓯᐅᑉ ᐃᕐᓂᕐᑖᕆᕚ ᕼᐃᓯᑬᐊ,

¹⁰ ᕼᐃᓯᑬᐊᐅᑉ ᐃᕐᓂᕐᑖᕆᕚ ᒪᓇᓯ, ᒪᓇᓯᐅᑉ ᐃᕐᓂᕐᑖᕆᕚ ᐂᒨᓯ, ᐂᒨᓯᐅᑉ ᐃᕐᓂᕐᑖᕆᕙ ᔪᓮᐊ,

¹¹ ᔪᓮᐊᐅᑉ ᐃᕐᓂᕐᑖᕆᕚ ᔨᑯᓁᐊ ᖃᑕᓐᖑᑎᖏᓪᓗ, ᑕᕝᕙᓂ ᐹᐱᓘᓂᒧᑦ ᐊᐅᓪᓚᕈᑦᔭᐅᓕᓚᐅᕐᐳᑦ.

¹² ᐹᐱᓘᓂᒧᑦ ᐊᐅᓪᓚᕈᑦᔭᐅᓂᖓᓂᑦ ᑭᖑᕚᕇᑦ ᑎᑎᕋᕐᓯᒪᒋᕗᑦ; ᔨᑯᓁᐊᐅᑉ ᐃᕐᓂᕐᑖᕆᕚ ᓯᐊᓪᑎᐅᓪ, ᓯᐊᓪᑎᐅᓕᐅᑉ ᐃᕐᓂᕐᑖᕆᕚ ᔨᕈᐸᐱᐅᓪ,

¹³ ᔨᕈᐸᐱᐅᓕᐅᑉ ᐃᕐᓂᕐᑖᕆᕚ ᐊᐱᐅᑦ, ᐊᐱᐅᑎᐅᑉ ᐃᕐᓂᕐᑖᕆᕚ ᐃᓕᐊᑭᒻ, ᐃᓕᐊᑭᒥᐅᑉ ᐃᕐᓂᕐᑖᕆᕚ ᐊᓱᕆ,

¹⁴ ᐊᓱᕆᐅᑉ ᐃᕐᓂᕐᑖᕆᕚ ᓴᑑᒃ, ᓴᑑᑭᐅᑉ ᐃᕐᓂᕐᑖᕆᕚ ᐊᑭᒻ, ᐊᑭᒥᐅᑉ ᐃᕐᓂᕐᑖᕆᕚ ᐃᓕᐅᑦ,

¹⁵ ᐃᓕᐅᑎᐅᑉ ᐃᕐᓂᕐᑖᕆᕚ ᐃᓕᐊᓴ, ᐃᓕᐊᓴᐅᑉ ᐃᕐᓂᕐᑖᕆᕚ ᒫᑕᓇ, ᒫᑕᓇᐅᑉ ᐃᕐᓂᕐᑖᕆᕚ ᔧᑯ,

¹⁶ ᔧᑰᑉ ᐃᕐᓂᕐᑖᕆᕚ ᔫᓯᐱ ᒥᐊᕆᐅᑉ ᐅᐃᖓ, ᑖᑦᓱᒪ ᐃᕐᓂᕐᑖᕆᕚ ᔩᓱᓯ, ᑖᓐᓇ ᙭ᔅᑑᓯᒥᒃ ᑍᔭᐅᔪᖅ.

¹⁷ ᑕᕝᕙ ᐂᑉᕋᕼᐋᒻᒥᑦ ᑍᕕᑎ ᑎᑭᓪᓗᒍ ᐃᕐᓂᕇᑦ 14ᖑᕗᑦ, ᑍᕕᑎᒥᓪᓗ ᐹᐱᓘᓂᒧᑦ ᐊᐅᓪᓚᕈᑦᔭᐅᓂᖓᓐᓄᑦ ᑎᑭᓪᓗᒍ ᐃᕐᓂᕇᑦ 14ᖑᒋᕗᑦ, ᐹᐱᓘᓂᒧᓪᓗ ᐊᐅᓪᓚᕈᑦᔭᐅᓂᖓᓂᑦ ᙭ᔅᑑᓯᐅᑉ ᐃᕐᓂᐊᖑᓂᖓ ᑎᑭᓪᓗᒍ ᐃᕐᓂᕇᑦ 14ᖑᒋᕗᑦ.

ᔩᓱᓯ ᙭ᔅᑑᓯᐅᑉ ᐃᕐᓂᐊᖑᓂᖓ

¹⁸ ᔩᓱᓯ ᙭ᔅᑑᓯᐅᑉ ᐃᕐᓂᐊᖑᓂᖓ ᐃᒫᒃ ᐱᓚᐅᕐᐳᖅ. ᐊᓈᓇᖓ ᒥᐊᕆ ᐅᐃᒃᓴᖃᓚᐅᕐᒪᑦ ᔫᓯᐱᒥᒃ, ᑲᑎᓚᐅᕋᑎᒡᓕ ᒥᐊᕆ ᖃᐅᔨᔭᐅᕗᖅ ᓄᑕᕋᒃᓴᖃᓕᕐᑐᖅ ᐊᓂᕐᓂᕐᒥᑦ ᐃᑦᔪᕐᓁᑦᑐᒥᑦ ᐱᔪᒥᒃ;

¹⁹ ᐅᐃᒃᓴᖓ ᔫᓯᐱ, ᐱᖁᔭᓂᒃ ᒪᓕᑦᓯᐊᕋᒥ ᑲᓐᖑᓱᒃᑎᑦᓯᔪᒪᓚᐅᓐᖏᓚᖅ ᒥᐊᕆᒥᒃ, ᐃᓱᒪᖃᓕᕐᐳᖅ ᖃᐅᔨᑎᑦᓯᖏᓪᓗᓂ ᐊᕕᑦᓱᒪᓪᓗᓂᐅᒃ.

²⁰ ᑕᒪᑐᒥᖓ ᐃᓱᒪᖃᓕᕐᑎᓪᓗᒍ, ᑕᑯᒋᑦ, ᐊᑕᓂᐅᑉ ᐂᖏᓕᖓᑕ ᓴᖅᑭᕝᕕᒋᕚ ᓯᓐᓇᒃᑑᒪᒃᑯᑦ, ᐅᖃᕐᓗᓂ, “ᔫᓯᐲ, ᑍᕕᑎᐅᑉ ᐃᕐᓂᖓ, ᓯᕘᕋᓂᐊᕐᓇᒃ ᒥᐊᕆᒥᒃ ᓄᓕᐊᕐᑖᕆᐊᒃᓴᖅ, ᓄᑕᕋᒃᓴᖓ ᐊᓂᕐᓂᕐᒥᑦ ᐃᑦᔪᕐᓁᑦᑐᒥᑦ ᐱᖕᒪᑦ.

²¹ ᐃᕐᓂᕐᒥᒃ ᐃᕐᓂᔪᒫᕐᐳᖅ, ᑖᓐᓇ ᔩᓱᓯᒥᒃ ᐊᑎᕐᑖᕐᑎᓛᕐᐸᑦ, ᑖᑦᓱᒪ ᐃᓄᖁᑎᓂ ᐱᐅᓕᔪᒫᕐᒪᒋᑦ ᐊᔪᕐᓂᖏᓐᓂᑦ.”

²² ᑕᒪᓐᓇ ᑍᒤᓚᐅᕐᐳᖅ ᐊᑕᓂᐅᑉ ᐅᖃᐅᓯᖏᑦ ᓇᓚᐅᑍᔪᑯᑦ ᓇᓚᐅᑦᓯᓕᖁᓪᓗᒋᑦ, ᐃᒤᓕᔪᑦ:

²³ “ᑕᑯᒋᑦ, ᐅᐃᒡᒐᓱᒃ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᑦᑐᖅ ᓄᑕᕋᒃᓴᕐᑖᕈᒫᕐᐳᖅ, ᐃᕐᓂᕐᒥᒃ ᐃᕐᓂᔪᒫᕐᓗᓂ, ᑖᓐᓇ ᐃᒫᓄᐃᓕᒥᒃ ᐊᑎᖃᕐᑎᑦᓱᒫᕐᐹᑦ.” ᐊᑎᖓᑕ ᑐᑭᖓ ᐃᒤᓕᕗᖅ, “ᒎᑎᐅᑉ ᓇᔪᕐᐹᑎᒍᑦ”.

²⁴ ᔫᓯᐱ ᓯᓂᖕᒥᓂᑦ ᑐᐸᑲᒥ, ᐊᑕᓂᐅᑉ ᐂᖏᓕᖓᑕ ᐅᖃᐅᓯᖏᑦ ᒪᓕᒡᓗᒋᑦ ᐱᓇᓱᐊᓚᐅᕐᐳᖅ; ᓄᓕᐊᒃᓴᓂ ᒥᐊᕆ ᓄᓕᐊᕐᑖᕆᕚ.

²⁵ ᑲᑎᒪᑐᐃᓐᓇᓚᐅᕐᐹᓕ, ᐊᒃᑐᓚᐅᕐᓇᒍ, ᐃᕐᓂᕐᒥᒃ ᐃᕐᓂᓚᐅᖅᑳᕐᑎᓐᓇᒍ; ᐃᓅᖕᒪᓪᓗ ᐊᑎᕐᑖᕐᑎᑉᐹ ᔩᓱᓯᒥᒃ.