ᒪᓚᑬᑉ ᐊᒡᓚᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

¹ “ᒫᓐᓇᓕ ᑐᓂᕐᕈᓯᕐᑎᑦᓯᔨᐅᔪᓯ, ᐃᓕᑦᓯᓐᓄᑦ ᑕᒪᓐᓇ ᐱᖁᔭᕋ ᑐᕌᖓᕗᖅ.

² ᑐᓴᕐᓂᐊᖏᒃᑯᑦᓯ, ᐆᒻᒪᑎᑦᓯᓐᓂᓪᓗ ᐱᔪᒥᒃ ᐊᑎᕋ ᐱᓐᓇᕐᓇᕐᓯᑎᓐᓂᐊᖏᒃᑯᑦᓯᐅᒃ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, ᑕᕝᕙ ᓱᒋᐊᕐᑕᐅᓂᕐᒧᑦ ᑎᑭᑕᐅᑎᑦᓱᒫᕐᐸᑦᓯ, ᓮᒻᒪᕐᑕᐅᓂᒃᓴᓯᓗ ᓱᒋᐊᕐᑕᐅᓂᓐᖑᕐᑎᓪᓗᒋᑦ; ᐃᓛᒃ ᓱᒋᐊᕐᓯᒪᓕᕇᕐᐸᒃᑲ, ᐆᒻᒪᑎᑦᓯᓐᓂ ᐃᓂᖃᕐᑎᖏᓐᓇᑦᓯᐅᒃ.

³ ᑕᑯᒋᑦ, ᑭᖑᕚᒃᓴᓯ ᐃᓂᕐᑎᕈᒫᕐᐸᒃᑲ, ᑮᓇᓯᓗ ᐊᓇᕐᒥᒃ ᒥᖑᐊᕐᓗᒋᑦ, ᑐᓂᕐᕈᑎᓯ ᐊᓇᖏᓐᓂᒃ, ᐊᓂᑎᓪᓗᓯᓗ ᓇᔪᒐᓐᓂᑦ.

⁴ ᑕᕝᕙ ᖃᐅᔨᔪᒫᕐᐳᓯ ᐱᖁᔭᕋ ᑕᒪᓐᓇ ᐃᓕᑦᓯᓐᓄᑦ ᑐᓂᓯᒪᒐᒃᑯ, ᐊᖏᕈᑎᒋᓚᐅᕐᑕᕋ ᓕᕔᒧᑦ ᑲᔪᓯᖁᓪᓗᒍ. ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ.

⁵ “ᐊᖏᖃᑎᒌᒍᑎᒐ ᑖᑦᓱᒪᓃᒻᒪᑦ ᐃᓅᓯᖅ ᓮᒪᓇᕐᑐᖅ, ᑐᓂᓚᐅᕐᑕᕋ ᐅᕙᓐᓂᒃ ᓯᕘᕋᖁᓪᓗᒍ, ᐅᕙᓐᓂᒃ ᓯᕘᕋᓚᐅᕐᐳᑦ ᐃᓕᕋᓱᒡᓗᓂᓗ ᐊᑎᓐᓂᒃ.

⁶ ᐱᖁᔧᑦ ᓱᓕᔪᑦ ᖃᓂᖓᓃᓚᐅᕐᐳᑦ, ᑕᒻᒪᕐᓂᕐᒥᒡᓗ ᖃᓂᖓᓂᑦ ᓇᓂᓯᕕᐅᓚᐅᓐᖏᓚᖅ. ᐱᓱᖃᑎᒋᓚᐅᕐᐹᖓ ᓮᒪᓇᕐᑐᒃᑯᑦ ᐃᓱᐊᕐᓂᒃᑯᓪᓗ, ᐅᓄᕐᑐᓂᒡᓗ ᐱᐅᖏᑦᑐᓕᓂᕐᒦᑦᑐᓂᒃ ᓴᖑᑎᑦᓯᓚᐅᕐᐳᖅ.

⁷ ᑐᓂᕐᕈᓯᕐᑎᑦᓯᔨᐅᑉ ᖃᓂᖓ ᓴᐳᒻᒥᔪᒃᓴᐅᖕᒪᑦ ᖃᐅᔨᒪᓂᕐᒥᒃ, ᐃᓄᐃᓪᓗ ᕿᓂᕐᑐᒃᓴᐅᕗᑦ ᐊᔪᕆᕐᑐᕐᑕᐅᓂᕐᒥᒃ ᑖᑦᓱᒪ ᖃᓂᖓᓂᑦ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑕ ᐅᖃᕐᑎᒋᒪᒍ.

⁸ “ᐃᓕᑦᓯᓕ ᕿᒤᓯᒪᕗᓯ ᐊᖅᑯᒻᒥᒃ; ᐅᓄᕐᑐᓂᒡᓗ ᐹᓪᓚᒃᑎᑦᓯᓚᐅᕐᐳᓯ ᐊᔪᕆᕐᑐᐃᓂᑦᓯᒍᑦ; ᓕᕔᓪᓗ ᐊᖏᖃᑎᒌᒍᑎᖏᓐᓂᒃ ᓯᖁᒥᑦᓯᓯᒪᓪᓗᓯ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ.

⁹ ᑍᒤᒻᒪᑦ ᓇᕐᕈᒋᔭᐅᓕᕐᑎᑉᐸᑦᓯ ᐃᓕᕋᒃᑯᓐᓇᕐᓯᑎᓪᓗᓯᓗ ᐃᓄᐃᑦ ᓯᕗᕌᓂ, ᐊᖅᑯᑎᒋᔭᐅᖁᔭᒃᑲ ᐊᑐᓚᐅᖏᓐᓇᑦᓯᐅᒃ ᐱᖁᔧᓪᓗ ᐃᓔᓐᓇᖏᓐᓂᒃ ᐊᔪᕆᕐᑐᐃᓚᐅᕋᑦᓯ.”

ᐃᓄᐃᑦ ᐊᓯᓐᓂᐊᕐᓂᖏᑦ ᒎᑎᒥᒃ

¹⁰ ᐊᑕᐅᓯᕐᒥᒃ ᐊᑖᑕᖃᓐᖏᓚᒎᑦ? ᒎᑎᒧᑦ ᐊᑕᐅᓯᕐᒧᑦ ᐱᓐᖑᕐᑎᑕᐅᓯᒪᓐᖏᓚᒎᑦ? ᓱᖕᒪᓪᓕ ᐊᑭᕋᕐᑐᕐᓂᕐᒥᒃ ᐱᓇᓱᐊᑐᐃᓐᓇᕐᐱᑕ ᐃᓅᖃᑎᑦᑎᓐᓄᑦ, ᓯᕗᓕᑦᑕ ᐊᖏᕈᑎᒋᓚᐅᕐᑕᖓᓂᒃ ᓇᕐᕈᓇᕐᓯᑎᑦᓯᓪᓗᑕ?

¹¹ ᔫᑕ ᐱᓂᐊᕐᓂᕐᒥᒍᑦ ᑲᔪᓯᓯᒪᖏᒻᒪᑦ, ᓇᕐᕈᓇᕐᑐᓂᒡᓗ ᐱᓇᓱᐊᕐᓯᒪᕗᑦ ᐃᓴᕆᐊᓕᒥᐅᑦ ᔨᕉᓴᓕᒥᐅᓪᓗ; ᔫᑕ ᓇᕐᕈᓇᕐᓯᑎᑦᓯᓚᐅᕐᒪᑦ ᐊᑕᓂᐅᑉ ᐃᑦᔪᕐᓁᑦᑐᖁᑎᖏᓐᓂᒃ, ᐱᐅᒋᔭᖏᓐᓂᒡᓗ, ᓄᓕᐊᓂᒃᓯᒪᓪᓗᓂᓗ ᐅᖓᓯᒃᑐᒥᐅᑦ ᒎᑎᖏᑕ ᐸᓂᖓᓂᒃ.

¹² ᐊᑕᓂᐅᑉ ᐲᕐᓕᐅᒃ ᔧᑰᑉ ᑐᐱᖏᓐᓂᑦ ᐊᖑᑦ ᑍᓐᓇ ᑍᒤᓕᐅᕐᑐᖅ, ᐃᓚᒋᔭᐅᔪᓐᓃᕐᓕ ᐃᓱᒪᓕᐅᕐᑎᐅᔪᓐᓃᕐᓗᓂ, ᑐᓂᕐᕈᓯᖃᑦᑕᕈᓐᓃᕐᓗᓂᓗ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓄᑦ!

¹³ ᓱᓕᓗ ᐃᒫᒃ ᐱᓂᐊᕐᓂᖃᕆᕗᓯ: ᐊᑕᓂᐅᑉ ᑐᓂᕐᕈᓯᕐᕕᖓ ᖁᕝᕕᐅᕐᓂᕐᓄᑦ ᐅᓕᒃᐸᓯ, ᕿᐊᓂᑦᓯᓐᓄᑦ ᐅᒡᒍᐊᕐᓂᑦᓯᓐᓄᓪᓗ; ᑐᓂᕐᕈᑎᓯ ᐃᓚᓕᐅᕈᓐᓁᕐᒪᒋᑦ, ᖁᕕᐊᒋᔪᓐᓁᕐᓗᒋᓪᓗ ᐱᓂᐊᕐᓂᓯ.

¹⁴ ᐊᐱᕆᒐᓗᐊᕐᐳᓯ, “ᓱᓇ ᐱᑦᔪᑎᒋᓪᓗᒍ?” ᐊᑕᓂᖅ ᖃᐅᔨᓚᐅᕐᒪᑦ ᓄᓕᐊᓪᓗ ᐃᓅᓱᒃᑑᑎᓪᓗᓯᒃ ᐊᖏᖃᑎᒌᓚᐅᕐᓂᑦᓯᓐᓂᒃ, ᑖᑦᓱᒪ ᐊᓯᐊᓄᐊᕐᓯᒪᒐᕕᑦ; ᑖᓐᓇ ᐊᕐᓇᖅ ᐂᑉᐸᕆᒐᓗᐊᕐᓗᒍ ᓄᓕᐊᕆᓪᓗᒍᓗ ᐊᖏᖃᑎᒌᖕᓂᒃᑯᑦ.

¹⁵ ᒎᑎᐅᑉ ᓴᓇᓚᐅᓐᖏᓛᓰᒃ? ᐃᓅᓯᐅᓪᓗ ᐊᓂᕐᓂᖓᓂᒃ ᐱᑎᓪᓗᓯᒃ? ᖃᓄᕐᓗ ᐱᔪᒪᔭᖃᕐᐸ? ᑭᖑᕚᒃᓴᖃᖁᓪᓗᑎᑦ ᒎᑎᒥᒃ ᓈᓚᑦᓯᐊᕐᑐᓂᒃ. ᑍᒤᒻᒪᑦ ᓇᖕᒥᓂᖅ ᑲᒪᒋᑦᓯᐊᓕᕆᑦ, ᓇᓪᓕᐊᓪᓗ ᐊᑐᕐᓂᕐᓗᒃᑍᓕᓕ ᐃᓅᓱᖕᓂᕐᒥᓂᑦ ᓄᓕᐊᕆᔭᒥᓄᑦ.

¹⁶ “ᐃᓴᕆᐊᓕᒥᐅᑦ ᐊᑕᓂᖓ ᒎᑎ ᐅᖃᕐᒪᑦ, ᐊᕕᑦᓯᓂᖅ ᐆᒥᒋᕙᕋ, ᐊᓐᓄᕌᒥᓄᑦ ᐅᓕᒃᓯᓂᐅᖕᒪᑦ ᐱᑦᓯᐊᖏᓐᓂᕐᒥᒃ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ. ᑍᒤᒻᒪᑦ ᓇᖕᒥᓂᖅ ᑲᒪᒋᑦᓯᐊᓕᕆᑦ ᐊᓯᓐᓂᐊᕐᓂᕐᒥᒃ ᐱᓇᓱᐊᖁᓇᒃ.”

ᐃᖅᑲᕐᑐᕐᑕᐅᕕᐅᑉ ᐅᓪᓗᖓ ᖃᒡᓕᕗᖅ

¹⁷ ᐅᖃᐅᓯᑦᓯᓐᓄᑦ ᐊᑕᓂᖅ ᑕᖃᑎᓕᕐᐸᓯ. ᐅᖃᕐᐳᓯᓕ, “ᖃᓄᐃᓕᐅᕐᓗᑖ ᑕᖃᑎᓕᕐᐸᕘᑦ?” ᐃᒫᒃ ᐅᖃᕐᓂᑦᓯᓐᓄᑦ, “ᐱᐅᖏᑦᑐᓕᔪᓕᒫᑦ ᐱᐅᔫᕗᑦ ᐊᑕᓂᐅᑉ ᓵᖓᓂ, ᖁᕕᐊᒋᕔᓪᓗ.” ᐅᕝᕙᓗ ᐅᖃᕐᐳᓯ, “ᓇᐅᒡᓕ ᒎᑎ ᓈᒻᒪᓈᕐᑐᒥᒃ ᐃᖅᑲᕐᑐᐃᔨ?”