ᒪᓚᑬᑉ ᐊᒡᓚᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐊᑕᓂᐅᑉ ᐅᖃᐅᓯᖏᑦ ᐃᓴᕆᐊᓕᒥᐅᓄᑦ ᒪᓚᑬᒃᑯᑦ.

ᐊᑕᓂᐅᑉ ᓇᒡᓕᒍᓱᖕᓂᖓ ᐃᓴᕆᐊᓕᒥᐅᓂᒃ

² ᐊᑕᓂᖅ ᐅᖃᕐᐳᖅ, “ᓇᒡᓕᒋᓚᐅᕐᐸᑦᓯ.” ᐅᖃᕐᐳᓯᓕ, “ᖃᓄᐃᓕᐅᕐᓗᑎᑦ ᓇᒡᓕᒋᕕᒋᑎᒍᑦ?” ᐊᑕᓂᖅ ᐅᖃᕐᐳᖅ, “ᐄᓴ ᔧᑰᑉ ᖃᑕᓐᖑᑎᒋᓚᐅᓐᖏᓛ? ᔧᑯᓕ ᓇᒡᓕᒋᓚᐅᕐᐸᕋ.

³ ᐄᓴ ᐆᒥᒋᓪᓗᒍ, ᖃᖅᑲᖁᑎᖓᓗ ᓱᓇᖃᕈᓐᓃᕐᑎᓚᐅᕐᐸᕋ ᑭᖑᕐᖑᑎᔭᒃᓴᖏᓪᓗ ᓱᓇᖃᔪᐃᑦᑐᒥ ᑐᓂᓚᐅᕐᐸᒃᑲ ᕿᒻᒥᖓᔪᓄᑦ.”

⁴ ᐄᑐᒥ ᐅᖃᕋᓗᐊᕐᐸᑦ, “ᐊᔪᓕᕐᑎᑕᐅᓯᒪᒐᓗᐊᕐᐳᒍᑦ ᐅᑎᕐᓂᐊᕐᐳᒍᓪᓕ, ᐋᖅᑭᒃᓱᕆᐊᕐᑐᕐᓗᒋᑦ ᓱᕋᒃᓯᒪᔪᑦ ᐃᓂᒋᓚᐅᕐᑕᕗᑦ.” ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ; “ᓴᓇᓂᐊᕋᓗᐊᕐᐳᑦ, ᓱᕋᖕᓂᐊᕆᕙᒃᑲᓕ; ᑍᔭᐅᓕᓚᐅᕐᑎᓐᓇᒋᑦ ᐱᐅᖏᑦᑐᓕᔪᑦ ᓄᓇᖓᓂᒃ, ᐃᓄᐃᓪᓗ ᑍᔭᐅᔪᒫᕆᕗᑦ ᐊᑕᓂᐅᑉ ᓂᓐᖓᐅᑎᓯᒪᓕᕐᐰᑦ ᐃᓱᖃᖏᑦᑐᒧᑦ.”

⁵ ᓇᖕᒥᓂᖅ ᑕᑯᔪᒫᕐᐳᓯ, ᐅᖃᕐᓗᓯᓗ, “ᐊᑕᓂᖅ ᐊᔪᒐᖃᖏᑦᑐᕐᔪᐊᖑᕗᖅ ᐊᒡᓛᑦ ᐃᓴᕆᐊᓕᒥᐅᑦ ᓄᓇᖓᑕ ᑭᒡᓕᖓᑕ ᐅᖓᑖᓃᑉᐳᖅ.”

ᐊᑕᓂᐅᑉ ᐋᖅᑭᒋᐊᕐᓯᓂᖓ ᑐᓂᕐᕈᓯᕐᑎᑦᓯᔨᓂᒃ

⁶ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ ᑐᓂᕐᕈᓯᕐᑎᑦᓯᔨᓄᑦ, “ᐃᕐᓂᐅᑉ ᐊᑖᑕᓂ ᐅᐱᒋᕚ, ᐱᔨᐅᓪᓗ ᐊᖓᔪᖅᑳᓂ, ᐊᑖᑕᐅᒍᒪᓕ, ᓇᐅᒡᓕ ᐅᐱᒋᔭᐅᓂᕋ? ᐊᖓᔪᖅᑳᖑᒍᒪᓗ ᓇᐅᒡᓕ ᐃᓕᕋᒋᔭᐅᓂᕋ? ᑐᓂᕐᕈᓯᕐᑎᑦᓯᔩᑦ ᐊᑎᓐᓂᒃ ᓇᕐᕈᔪᓯ. ᐅᖃᕐᐳᓯ, ‘ᖃᓄᖅ ᐊᑎᕐᓂᒃ ᓇᕐᕈᓚᐅᕐᐱᑖ?’

⁷ ᓇᕐᕈᓇᕐᑐᓂᒃ ᓂᕿᓂᒃ ᑐᓂᕐᕈᓯᕐᐳᓯ ᑐᓂᕐᕈᓯᕐᕕᓐᓂ, ᐅᖃᕐᐳᓯᓗ, ‘ᖃᓄᖅ ᓇᕐᕈᓇᕐᓯᑎᑦᓯᓚᐅᕐᐱᑖ?’ ᐃᓱᒪᓚᐅᕋᑦᓯ ᐊᑕᓂᐅᑉ ᑐᓂᕐᕈᓯᕐᕕᖁᑎᖓ ᐱᓪᓚᕆᐅᓗᐊᓐᖏᓚᖅ.

⁸ ᑕᐅᑐᖏᑦᑐᓂᒃ ᐆᒪᔪᓂᒃ ᑐᓂᕐᕈᓯᕐᑎᓪᓗᓯ, ᑕᒪᓐᓇ ᐱᐅᖏᑦᑑᓐᖏᓛᖅ? ᑐᓯᐊᑦᑐᓂᒃ ᖃᓂᒪᔪᓂᒡᓗ ᑐᓂᕐᕈᓯᕐᑎᓪᓗᓯ ᑕᒪᓐᓇ ᐱᐅᖏᑦᑑᓐᖏᓛᖅ? ᑐᓂᕐᕈᑎᒋᒍᑦᓯᒋᒃ ᐊᐅᓚᑦᓯᔨᑦᓯᓐᓄᑦ; ᐃᓕᑦᓯᓐᓃᒃ ᖁᕕᐊᓲᑎᖃᕋᔭᕐᐹᑦ? ᐃᓚᓕᐅᕋᔭᕐᐹᓰ ᓈᒻᒪᒋᓗᓯ? ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ.

⁹ “ᒫᓐᓇᓕ ᒎᑎᐅᑉ ᖁᕕᐊᒋᔭᖓᓂᒃ ᕿᓂᓕᕆᑦᓯ, ᐅᕙᑦᑎᓐᓄᑦ ᓈᒃᑭᒍᓱᓕᖁᓪᓗᒍ. ᑍᒤᓕᐅᓕᕈᑦᓯ, ᓈᒻᒪᒋᒐᔭᕐᐹᓰ? ᖁᕕᐊᒋᓗᓯᓗ? ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ.

¹⁰ ᑭᓇ ᐊᑯᓐᓇᑦᓯᓐᓂ ᐅᒃᑯᐊᒥᒃ ᒪᑐᓯᔪᓐᓇᕐᐹ? ᐊᑐᕐᓂᕐᓗᒡᓗᓯ ᐃᑭᑦᓯᖁᓇᓯ ᑐᓂᕐᕈᓯᕐᕕᓐᓂ? ᐃᓕᑦᓯᓐᓂᒃ ᖁᕕᐊᒋᔭᖃᕈᓐᓃᕐᐳᖓ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, ᑐᓂᕐᕈᑎᓯᓘᓐᓃᑦ ᐃᓚᓕᐅᕐᓂᐊᕈᓐᓃᕐᐸᒃᑲ.

¹¹ ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᑦ ᐊᑎᕋ ᐊᖏᔪᕈᕐᑎᑕᐅᕗᖅ ᐃᓅᖃᑎᒌᒡᔪᐊᓂ, ᓇᓂᓕᒫᖅ ᑎᐱᑦᓯᐊᕆᒃᑐᓂᒃ ᐳᔪᕐᓂᒃ ᑐᓂᕐᕈᓯᕐᐳᑦ ᐊᑎᓐᓄᑦ, ᐃᑦᔪᕐᓁᑦᑐᓂᒡᓗ ᑐᓂᕐᕈᑎᓂᒃ; ᐊᑎᕋ ᐊᖏᔪᕈᕐᑎᑕᐅᕗᖅ ᐃᓅᖃᑎᒌᒡᔪᐊᓄᑦ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ.

¹² ᓇᕐᕈᓇᕐᓯᑎᓚᐅᕐᐸᓯᓕ ᐃᒫᒃ ᐅᖃᕐᑎᓪᓗᓯ, ‘ᐊᑕᓂᐅᑉ ᑐᓂᕐᕈᓯᕐᕕᖓ ᓇᕐᕈᓇᕐᐳᖅ, ᐱᕈᕐᑐᐃᓪᓗ ᓂᖀᓪᓗ ᓇᕐᕈᓇᕆᕗᑦ.’

¹³ ‘ᐃᕿᐊᓐᖑᓇᕐᓯᕗᑦ,’ ᓇᕐᕈᒋᓪᓗᖓᓗ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, ᑎᒡᓕᒐᕕᓃᑦ ᐂᑦᑑᑎᒋᕙᓯ, ᑐᓯᐊᑦᑐᑦ, ᖃᓂᒪᔪᓪᓗ, ᑕᒪᒃᑯᐊᓗ ᑐᓂᕐᕈᑎᒋᓪᓗᒋᑦ! ᐃᓚᓕᐅᕆᐊᖃᕐᐸᒃᑳ ᑐᓂᕐᕈᑎᓰ? ᐊᑕᓂᖅ ᐅᖃᕐᐳᖅ.

¹⁴ ᓱᒋᐊᒐᒃᓴᐅᕗᖅ ᐆᒪᔪᖁᑎᖃᕋᓗᐊᕐᓗᓂ ᐊᖑᓴᓪᓗᕐᒥᒃ ᐊᖏᕈᑎᒋᓯᒪᔭᒥᓂᒃ ᑐᓂᕐᕈᑎᒋᔪᒪᓪᓗᒍ, ᑐᓂᕐᕈᓯᖔᕈᓂ ᐆᒪᔪᒥᒃ ᓈᒻᒪᖏᑦᑐᒥᒃ ᐊᑕᓂᕐᒧᑦ, ᐅᕙᖓ ᐊᖓᔪᖅᑳᕐᔪᐊᒍᕗᖓ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, ᐊᑎᕋᓗ ᓯᕘᕋᒋᔭᐅᕗᖅ ᐃᓅᖃᑎᒌᒡᔪᐊᓄᑦ.”