ᓘᑲᓯᐅᑉ ᐊᒡᓚᖏᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦᔩᓱᓯᐅᑉ ᑎᓕᓯᓂᖓ ᐃᓕᓐᓂᐊᕐᑎᒥᓂᒃ 12ᓂᒃ ᒫᑎᐅᓯ 10:5-15 ; ᒫᑯᓯ 6:7-13 1 ᔩᓱᓯᐅᑉ ᐃᓕᓐᓂᐊᕐᑎᓂ 12 ᑲᑎᖁᓪᓗᒋᑦ ᕾᖁᕔᑦ, ᐱᔪᓐᓇᕐᓂᕐᒥᒃ ᐊᖓᔪᖅᑲᐅᓂᕐᒥᒡᓗ ᑐᓂᓯᕕᒋᕔᑦ ᐊᓂᕐᓂᕐᓗᖕᓂᒃ ᐊᓂᑎᑦᓯᔪᓐᓇᖁᓪᓗᒋᑦ, ᐋᓐᓂᐊᔪᓂᒡᓗ ᐋᖅᑭᒃᓯᔪᓐᓇᕐᓂᕐᒥᒃ. 2 ᑎᓕᕔᑦ ᐊᔪᕆᕐᑐᐃᖁᓪᓗᒋᑦ ᒎᑎᐅᑉ ᐊᑕᓂᐅᕕᖓᓂᒃ ᐋᓐᓂᐊᔪᓂᒡᓗ ᐋᖅᑭᒃᓯᖁᓪᓗᒋᑦ. 3 ᐅᖃᐅᑎᓪᓗᒋᓪᓗ “ᐊᐅᓚᓂᕆᓂᐊᕐᑕᑦᓯᓐᓄᑦ ᓱᓇᑐᐃᓇᕐᒥᒃ ᓇᒃᓴᕐᑍᓕᒋᑦᓯ, ᐊᔭᐅᑉᐱᐊᓕᔭᕋᓯ, ᐃᒃᐱᐊᕐᔪᓕᔭᕋᓯᓘᓐᓃᑦ, ᓂᕿᒃᓴᒋᕋᓯᓘᓐᓃᑦ, ᑮᓇᐅᔭᓕᔭᕋᓯᓘᓐᓃᑦ; ᐊᑎᔭᒃᓴᒃᑲᓐᓂᕐᒥᒃ ᐊᓐᓄᕌᒡᒋᖏᓪᓗᓯ. 4 ᓇᓪᓕᐊᓐᓄᑐᐃᓇᖅ ᐃᒡᓗᒧᑦ ᐃᑎᕈᑦᓯ, ᑕᕝᕙᓃᖏᓐᓇᕆᑦᓯ, ᓄᓇᓕᖕᓂᑦ ᐊᐅᓪᓚᓚᐅᖏᓐᓂᑦᓯᓐᓂ. 5 ᑐᓐᖓᓱᒃᑎᑕᐅᖏᒃᑯᑦᓯᓕ, ᓄᓇᓕᖕᓂᑦ ᑕᕝᕙᓐᖓᑦ ᐊᐅᓪᓚᓕᕈᑦᓯ ᓵᓃᑦ ᐃᑎᒐᑦᓯᓐᓂᑦ ᑲᑕᒐᕐᑎᓯᐅᒃ ᓈᒻᒪᒋᔭᐅᖕᒋᓐᓂᖏᓂᒃ ᓇᓗᓁᒃᑯᑕᐅᓂᐊᕐᒪᑦ.” 6 ᐃᓕᓐᓂᐊᕐᑎᖏᑦ ᐊᐅᓪᓚᕐᐳᑦ, ᓄᓇᓕᓕᒫᓄᑦ ᐊᖅᑯᓵᖃᑦᑕᕐᓗᑎᖅ, ᐊᔪᕆᕐᑐᐃᓪᓗᑎᒃ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᖃᓂᒪᔪᑦ ᐋᖅᑭᒃᐰᑦ ᓇᓂᑐᐃᓐᓈᖅ. ᐃᕉᑕᓯᐅᑉ ᓇᓗᓕᕐᓂᖓ ᒫᑎᐅᓯ 14:1-12 ; ᒫᑯᓯ 6:14-29 7 ᐃᕉᑕᓯ ᒐᓕᓕᐊᒥ ᐊᖓᔪᖅᑳᖑᔪᖅ ᑐᓴᖃᑦᑕᓕᕋᒥ ᐱᓂᐊᕐᓂᕆᔭᐅᕙᓪᓕᐊᔪᓂᒃ, ᓇᓗᓕᕐᐳᖅ, ᐃᓄᐃᑦ ᐃᓚᖏᑦ ᐅᖃᖃᑦᑕᕐᒥᖕᒪᑕ ᔪᐊᓇᓯ ᐹᑉᑎᑎᕆᔨ ᑐᖁᖓᔪᓂᑦ ᒪᑭᓐᓂᕋᕐᑕᐅᓪᓗᓂ, 8 ᐃᓚᖏᓪᓗ ᐅᖃᖃᑦᑕᕐᒪᑕ ᐃᓔᑦᔭ ᓴᖅᑭᓐᓂᕋᕐᑕᐅᓪᓗᓂ, ᐃᓚᖏᓪᓗ ᐅᖃᖃᑦᑕᕆᓪᓗᑎᒃ ᓇᓚᐅᑦᑍᔪᑦ ᐃᓚᖓᑦ ᐆᒻᒪᕐᓯᒪᓂᕋᕐᑕᐅᓪᓗᓂ. 9 ᐃᕉᑕᓯ ᐅᖃᕐᐳᖅ, “ᔪᐊᓇᓯ ᓂᐊᖁᐃᕐᑕᐅᑎᓚᐅᕐᐸᕋ; ᑭᓇᓖᓐᓇ ᐊᖑᑦ ᑐᓴᖃᑦᑕᕐᐸᕋ ᑕᒪᒃᑯᓂᖓ ᐱᓇᓱᐊᕐᑐᖅ?” ᑕᑉᕙ ᔩᓱᓯ ᑕᑯᓇᓱᐊᕐᐹ. ᔩᓱᓯᐅᑉ ᓂᕆᑎᑦᓯᓂᖓ ᐊᖑᑎᓂᒃ 5,000ᓂᒃ ᒫᑎᐅᓯ 14:13-21 ; ᒫᑯᓯ 6:30-44 ; ᔪᐊᓇᓯ 6:1-14 10 ᐋᐴᓯᑕᓖᑦ ᐅᑎᕋᒥᒃ ᖃᓄᐃᓕᐅᕐᓂᕆᓚᐅᕐᑕᒥᖕᓂᒃ ᐅᓂᒃᑳᕐᐳᑦ ᔩᓱᓯᒧᑦ. ᐃᓚᒋᓪᓗᒋᑦ ᐊᐅᓪᓚᕐᐳᑦ ᓄᓇᓕᖕᓄᑦ ᐱᑦᓮᑕᒥᒃ ᐊᑎᓕᖕᒧᑦ. 11 ᐃᓄᒋᐊᒃᑐᑦ ᖃᐅᔨᒐᒥᒃ, ᒪᓕᒃᓴᕐᐹᑦ; ᔩᓱᓯᐅᑉ ᑐᓐᖓᓱᒃᑎᑉᐰᑦ ᐅᖃᓪᓚᒡᕕᒋᓪᓗᒋᑦ ᒎᑎᐅᑉ ᐊᑕᓂᐅᕕᖓᓂᒃ, ᐋᖅᑭᒃᑕᐅᔭᕆᐊᓖᑦ ᐋᓐᓂᐊᔪᑦ ᐋᖅᑭᒃᐰᑦ. 12 ᓯᕿᓂᖅ ᐊᒃᐸᓕᕐᒪᑦ ᐅᓐᓄᓕᕐᑎᓪᓗᒍ; ᐃᓕᓐᓂᐊᕐᑎᖏᑦ ᔩᓱᓯᒧᐊᕐᐳᑦ ᐅᖃᐅᑎᓪᓗᒍ, “ᐃᓄᐃᑦ ᐊᐅᓪᓚᖁᓕᒃᑭᑦ, ᓄᓇᓕᖕᓄᐊᕐᓗᑎᒃ ᖃᓂᒋᔭᖏᓪᓄᓪᓗ ᓯᓂᒃᑕᕐᕕᖕᓄᐊᕐᓗᑎᒃ ᓂᕆᔭᓴᕐᑖᕐᓂᐊᕐᒪᑕ; ᒫᓂ ᐃᓄᖃᖏᑦᑐᒦᒃᑲᑦᑕ.” 13 ᔩᓱᓯᐅᑉ ᐅᖃᐅᑎᕔᑦ, “ᐃᓕᑦᓯ ᓂᕆᑎᓚᐅᕐᓯᐅᒃ.” ᐃᓕᓐᓂᐊᕐᑎᖏᑦ ᐅᖃᕐᐳᑦ, “ᑕᓪᓕᒤᓐᓇᕐᓂᒃ ᓂᐊᖂᔭᖃᕐᐳᒍᑦ ᐃᖃᓘᖕᓂᒡᓗ ᒪᕐᕉᖕᓂᒃ, ᓂᐅᕕᕆᐊᖁᕕᑎᒎᑦ? ᐅᑯᐊ ᐃᓄᒋᐊᒑᓗᐃᑦ ᓂᕆᔭᒃᓴᖏᓐᓂᒃ?” 14 ᑕᕝᕙᓃᑦᑐᑦ 5,000 ᖃᓂᒋᔮᓃᓚᐅᕐᐳᑦ ᐊᖑᑎᑦ. ᐃᓕᓐᓂᐊᕐᑎᓂ ᐅᖃᐅᑎᕔᑦ, “ᐃᓄᐃᑦ ᐃᖏᖁᓚᐅᕐᓯᐅᒃ ᐊᕕᒃᑐᕐᓗᒋᑦ 50ᐅᓈᕐᑎᕐᓗᑎᒃ.” 15 ᐃᓕᓐᓂᐊᕐᑎᖏᑦ ᑍᒫᒃ ᐱᓇᓱᐊᕐᐳᑦ, ᐃᓄᓕᒫᑦ ᐃᒃᓯᕚᓕᕐᒪᑕ. 16 ᑕᕝᕙ ᔩᓱᓯᐅᑉ ᓂᐊᖂᔧᑦ ᑕᓪᓕᒪᑦ ᐃᖃᓘᒡᓗ ᒪᕐᕉᒃ ᑎᒍᓪᓗᒋᑦ ᕿᓚᖕᒧᑦ ᐋᕐᓗᕐᐳᖅ, ᒎᑎ ᖁᔭᒋᔭᕇᕋᒥᐅᒃ ᐊᕕᒃᐰᑦ, ᐃᓕᓐᓂᐊᕐᑎᒥᓄᓪ ᑐᓂᓪᓗᒋᑦ ᐃᓄᖕᓄᑦ ᑐᓂᐅᖅᑬᖁᓪᓗᒋᑦ. 17 ᐃᓄᓕᒫᑦ ᓂᕆᕗᑦ ᐊᕿᐊᑦᑐᕐᓗᑎᒃ; ᐃᓕᓐᓂᐊᕐᑎᖏᑕ ᐊᒥᐊᒃᑯᑦ ᐊᒡᒍᕐᓯᒪᔪᑦ ᓄᐊᑉᐰᑦ ᐃᕕᐅᔭᓄᑦ 12ᓄᑦ. ᐲᑦᑐᕉᓯᐅᑉ ᓇᓗᓁᕐᓯᓂᖓ ᔩᓱᓯᒥᒃ ᒫᑎᐅᓯ 16:13-19 ; ᒫᑯᓯ 8:27-29 18 ᔩᓱᓯ ᐃᓄᑑᓪᓗᓂ ᑐᒃᓯᐊᕐᑎᓪᓗᒍ, ᐃᓕᓐᓂᐊᕐᑎᖏᑕ ᐅᐸᒃᐹᑦ; ᐃᓕᓐᓂᐊᕐᑎᓂ ᐊᐱᕆᕔᑦ, “ᐃᓄᖕᓂᑦ ᑭᓇᐅᓇᓱᒋᔭᐅᕗᖔ?” 19 ᐃᓕᓐᓂᐊᕐᑎᖏᑦ ᑭᐅᕗᑦ, “ᔪᐊᓇᓯ ᐹᑉᑎᑎᕆᔨᐅᓇᓱᒋᔭᐅᕗᑎᑦ; ᐃᓚᖏᓂᓪᓗ ᐃᓔᑦᔭᐅᓇᓱᒋᔭᐅᓪᓗᑎᑦ, ᐃᓚᖏᑕᓗ ᓇᓚᐅᑦᑍᔪᑦ ᐃᓚᖓᑦ ᐆᒻᒪᕐᑐᕕᓂᐅᓇᓱᒋᕚᑎᑦ.” 20 ᔩᓱᓯᐅᑉ ᐊᐱᕆᕔᑦ, “ᐃᓕᑦᓯᓕ, ᑭᓇᐅᓇᓱᒋᕕᓯᓐᖔ?” ᐲᑦᑐᕉᓯᐅᑉ ᑭᐅᕚ, “ᒥᓮᐊᓯᐅᕗᑎᑦ ᒎᑎᒥᑦ ᐱᓯᒪᔪᖅ.” ᔩᓱᓯᐅᑉ ᐅᖃᐅᑦᔨᓂᖓ ᐋᓐᓂᐊᑎᑕᐅᓂᒃᓴᒥᓂᒃ ᑐᖁᑕᐅᓂᒃᓴᒥᓂᒡᓗ ᒫᑎᐅᓯ 16:20-28 ; ᒫᑯᓯ 8:30—9:1 21 ᔩᓱᓯᐅᑉ ᐃᓕᓐᓂᐊᕐᑎᓂ ᐃᓂᕐᑎᒻᒪᕆᒃᐰᑦ ᐅᖃᖁᓇᒋᑦ ᑕᒪᑐᒥᖓ ᑭᓇᑐᐃᓐᓇᕐᒧᑦ. 22 ᐅᖃᐅᑎᓪᓗᒋᑦ, “ᐃᓅᑉ ᐃᕐᓂᖓ ᐊᖏᔪᒥᒃ ᐋᓐᓂᐊᑎᑕᐅᔭᕆᐊᖃᕐᐳᖅ, ᓇᕐᕈᒋᔭᐅᓗᓂ ᔫᑎᑦ ᐊᖓᔪᖅᑳᖏᓐᓂᑦ, ᑐᓂᕐᕈᓯᕐᑎᑦᓯᔩᓪᓗ ᐊᖓᔪᖅᑳᖏᓐᓂᑦ, ᐱᖁᔭᓂᒡᓗ ᐃᓕᓮᔨᓂᑦ, ᑐᖁᑕᐅᓛᕐᐳᖅ, ᐅᓪᓗᐃᑦ ᐱᖓᔪᐊᓐᓂᒃ ᒪᑭᓛᕆᕗᖅ.” 23 ᔩᓱᓯᐅᑉ ᑕᕝᕙᓃᑦᑐᓕᒫᑦ ᐅᖃᐅᑎᕔᑦ, “ᐅᕙᓐᓂᒃ ᒪᓕᒍᒪᔪᖃᕐᐸᑦ, ᐃᓱᒪᒥᓂᒃ ᐃᓅᔪᒪᔪᒃᓴᐅᓐᖏᓚᖅ, ᓴᓐᓂᖓᔪᓕᒃᓴᒥᓂᒃ ᖃᐅᑕᒫᑦ ᐊᒡᔭᕐᓯᔪᒃᓴᐅᕗᖅ ᒪᓕᒡᓗᖓᓗ. 24 ᓇᓪᓕᐊᑦ ᐃᓅᓯᕐᒥᓂᒃ ᐱᓯᒪᓇᓱᓗᐊᕐᑐᖅ ᐃᓅᓯᕐᒥᓂᒃ ᐊᓯᐅᔨᔪᒫᕐᐳᖅ; ᓇᓪᓕᐊᓪᓕ ᐃᓅᓯᕐᒥᓂᒃ ᐊᓯᐅᔨᔪᖅ ᐱᑦᔪᑎᒋᓗᖓ, ᐃᓅᓯᓂ ᐱᐅᓕᔪᒫᕐᐹ. 25 ᐃᓄᒃ ᓱᓇᒥᒃ ᐱᕙᓪᓕᕈᑎᖃᕋᔭᕐᐹ, ᓯᓚᕐᔪᐊᓕᒫᖅ ᐱᑖᕆᒐᓗᐅᕈᓂᐅᒃ, ᓇᖕᒥᓂᕐᓗ ᐃᓅᓯᕐᒥᓂᒃ ᐊᓯᐅᔨᖔᕐᓗᓂ ᐊᑑᑎᒃᓴᖃᕈᓐᓃᑎᒃᑯᓂᐅᒃ? 26 ᐃᓅᑉ ᓇᓪᓕᐊᑦᑕ ᑲᓐᖑᓲᑎᒋᒃᐸᖓ ᐃᓄᖕᓄᑦ ᐊᔪᕆᕐᑐᐃᑦᔪᑎᒋᔭᒃᑲᓗ, ᑖᓐᓇᑦᑕᐅᖅ ᐃᓅᑉ ᐃᕐᓂᖓᑕ ᑲᓐᖑᓲᑎᒋᔪᒫᕆᕚ ᓂᕐᑐᕐᓇᕐᑐᕐᔪᐊᖑᓗᓂ ᑎᑭᒃᑯᓂ ᐊᑖᑕᐅᑉ ᓂᕐᑐᕐᓇᕐᓂᕐᔪᐊᖓᓂ ᐂᖏᓖᓪᓗ ᐃᑦᔪᕐᓁᑦᑐᑦ ᐃᓚᒋᓗᒋᑦ. 27 ᓱᓕᔪᒥᒃ ᐅᖃᐅᑎᕙᑦᓯ, ᒫᓐᓇ ᐅᕙᓂ ᓇᖏᖃᑎᒋᔭᓯ ᐃᓚᖏᑦ ᑐᖁᓂᐊᓐᖏᓚᑦ, ᒎᑎᐅᑉ ᐊᑕᓂᐅᕕᖓᓂᒃ ᑕᑯᓚᐅᖅᑳᕋᑎᒃ.” ᔩᓱᓯᐅᑉ ᑕᑯᒥᓇᕐᓯᑎᑕᐅᓂᖓ ᒫᑎᐅᓯ 17:1-8 ; ᒫᑯᓯ 9:2-8 28 ᑕᒪᑐᒪ ᑭᖑᕐᖓᓂ ᐱᓇᓱᐊᕈᓯᖅ ᓈᓯᒪᓕᕐᑎᓪᓗᒍ ᑖᒃᑯᓂᖓ ᐅᖃᐅᓯᖃᓚᐅᕐᓗᓂ, ᖃᖅᑲᒧᑦ ᑐᒃᓯᐊᕆᐊᕐᑐᕐᐳᖅ ᐲᑦᑐᕉᓯ ᔪᐊᓇᓯᓗ ᔧᒥᓯᓗ ᐃᓚᒋᓪᓗᒋᑦ. 29 ᑐᒃᓯᐊᕐᑎᓪᓗᒍ, ᑮᓇᖓᑕ ᑕᐅᑦᑐᐊ ᐊᑦᔨᒋᔪᓐᓃᕐᐹ, ᐊᓐᓄᕌᖏᑦ ᖃᑯᕐᓯᕗᑦ ᕿᓪᓕᕐᓯᓪᓗᑎᒃ. 30 ᑕᑯᒋᑦ, ᐊᖑᑏᖕᓂᒃ ᒪᕐᕉᖕᓂᒃ ᐅᖃᖃᑎᖃᓕᕐᐳᖅ, ᒨᓯᓯᒥ ᐃᓔᑦᔭᒥᒡᓗ, 31 ᑖᒃᑯᐊᒃ ᓴᖅᑭᕐᐴᒃ ᑕᑯᒥᓇᕐᑐᐊᓗᖕᒥᒃ ᖃᐅᒪᓂᖃᕐᓗᑎᒃ ᔩᓱᓯᐅᑉ ᐊᑯᓂᐅᖏᑦᑐᖅ ᐊᐅᓪᓚᕐᓂᐊᓕᕐᓂᖓᓂᒃ ᐅᖃᐅᓯᖃᕐᓗᑎᒃ, ᐊᑐᕐᓂᐊᕐᑕᖓᓂᒃ ᔨᕉᓴᓕᒻᒥ. 32 ᐲᑦᑐᕉᓯ ᐃᓚᖏᓪᓗ ᐅᐃᕐᖓᕐᓂᕐᒧᑦ ᓯᓂᓚᐅᕐᐳᑦ, ᐃᖅᑯᒻᒪᕋᒥᒃ ᔩᓱᓯᐅᑉ ᓂᕐᑐᕐᓇᕐᓂᕐᔪᐊᖓ ᑕᑯᕚᑦ ᐊᖑᑏᒡᓗ ᒪᕐᕉᒃ ᓇᖏᖃᑎᒋᔭᖏᒃ. 33 ᕿᒪᕉᑎᓕᕐᒪᑎᒃ ᔩᓱᓯᒥᑦ, ᐲᑦᑐᕉᓯ ᐅᖃᕐᐳᖅ, “ᐊᔪᕆᕐᑐᐃᔩ, ᐅᕙᓃᓐᓂᕗᑦ ᖁᕕᐊᓇᕐᑐᐊᓘᕗᖅ; ᓯᓂᒃᑕᕕᓕᐅᓚᐅᕐᑕ ᐱᖓᓱᓂᒃ, ᐃᓕᖕᓄᑦ ᒨᓯᓯᒧᓪᓗ ᐃᓔᑦᔭᒧᓪᓗ”, ᑍᒫᒃ ᐅᖃᕋᓗᐊᕋᒥ ᐃᒻᒥᓂᒃ ᐃᒃᐱᒋᓚᐅᓐᖏᓚᖅ. 34 ᐲᑦᑐᕉᓯ ᐅᖃᕇᑐᐊᕐᒪᑦ, ᓄᕗᔭ ᓴᖅᑭᑉᐳᖅ ᑖᒃᑯᐊ ᐅᓕᒃᐰᑦ; ᐃᓕᓐᓂᐊᕐᑎᑦ ᑲᑉᐱᐊᓱᓕᕐᐳᑦ ᓄᕗᔭᒧᑦ ᐅᓕᒃᑕᐅᒐᒥᒃ. 35 ᓄᕗᔭᒥᑦ ᓂᐱ ᑐᓴᕐᓴᐅᓕᕐᐳᖅ ᐅᖃᕐᑐᖅ, “ᐅᓇ ᐃᕐᓂᕋ, ᓂᕈᐊᕐᓯᒪᔭᕋ; ᑖᓐᓇ ᓈᓚᒃᓯᐅᒃ!” 36 ᓂᐱ ᓂᐸᖏᕐᒪᑦ, ᔩᓱᓯ ᑖᓐᓇᑑᓕᕐᑐᖅ ᐅᑦᔨᕆᓕᕐᐹᑦ. ᑖᒃᑯᐊ ᑕᒪᑐᒥᖓ ᑭᓇᒧᓪᓘᓐᓃᑦ ᐅᖃᐅᓯᖃᓚᐅᓐᖏᓚᑦ, ᑍᑦᓱᒪᓂᐅᑎᓪᓗᒍ ᑕᑯᓚᐅᕐᑕᒥᖕᓂᒃ. ᔩᓱᓯᐅᑉ ᐊᓂᕐᓂᕐᓗᖕᒥᒃ ᐊᓂᑎᑦᓯᓂᖓ ᓱᕈᓯᕐᒥᑦ ᒫᑎᐅᓯ 17:14-18 ; ᒫᑯᓯ 9:14-27 37 ᖃᐅᑎᓪᓗᒍ, ᖃᖅᑲᒥᑦ ᐊᒻᒧᐊᖕᒪᑕ, ᐃᓄᒋᐊᒃᑐᕐᔪᐊᓂᑦ ᔩᓱᓯ ᐅᐸᒃᑕᐅᕗᖅ. 38 ᐃᓄᒋᐊᒃᑐᓂᓪᓕ ᐊᖑᑦ ᕾᒐᓛᓕᕐᐳᖅ, “ᐊᔪᕆᕐᑐᐃᔩ, ᕿᓄᕕᒋᕙᒋᑦ ᐃᕐᓂᕋ ᑕᑯᓚᐅᕈᒃ, ᕿᑐᕐᖓᑐᐊᕆᒐᒃᑯ; 39 ᐊᓂᕐᓂᕐᓘᑉ ᑎᑭᖃᑦᑕᕐᒪᒍ, ᑎᑭᑦᓴᕅᖕᒪᒍ ᑕᕝᕔᓐᓇᖅ ᓂᓪᓕᐊᓕᖃᑦᑕᕐᐳᖅ; ᐊᐅᓚᑎᑖᓗᒋᓪᓗᓂᐅᒃ ᓱᑲᖓᔪᐊᓘᑎᖃᑦᑕᕐᒪᒍ, ᖃᓂᖓ ᖃᐳᐊᓕᕐᑐᐊᓘᓪᓗᓂ; ᑍᒫᒡᓗ ᐋᓐᓂᐊᑎᖃᑦᑕᕐᐹ ᕿᒪᒍᓐᓁᓪᓕᕙᒃᓗᒍ. 40 ᐃᓕᓐᓂᐊᕐᑎᑎᑦ ᑖᑦᓱᒥᖓ ᐊᓂᕐᓂᕐᓗᖕᒥᒃ ᐊᓂᑎᑦᓯᖁᓚᐅᕋᓗᐊᕐᐸᒃᑲ, ᐊᔪᕐᐹᓪᓕ.” 41 ᔩᓱᓯᐅᑉ ᑭᐅᕔᑦ, “ᐅᒃᐱᕐᓂᖃᖏᑦᑐᓯ, ᑕᒻᒪᕐᓯᒪᓪᓗᓯᓗ, ᖃᓄᖅ ᐊᑯᓂᐅᑎᒋᔪᖅ ᓇᔪᕆᐊᖃᕐᐸᑦᓰ, ᖃᓄᕐᓗ ᐊᑯᓂᐅᑎᒋᔪᖅ ᕿᓄᐃᓵᕈᑎᒋᔭᕆᐊᖃᕐᐸᑦᓰ?” ᐊᖑᑦ ᐅᖃᐅᑎᕚ, “ᐃᕐᓃᑦ ᒪᐅᖓ ᕾᑎᓚᐅᕈᒃ.” 42 ᓱᕈᓯᖅ ᕾᓕᕐᑎᓪᓗᒍ, ᐊᓂᕐᓂᕐᓘᑉ ᓄᓇᒧᑦ ᐅᕐᕈᑎᑉᐹ ᓱᑲᑎᑖᓗᒋᓪᓗᒍ. ᔩᓱᓯᐅᑉ ᐊᓂᕐᓂᕐᓗᒃ ᐃᓂᕐᑎᕐᓗᒍ ᐊᓂᖁᕚ, ᓱᕈᓯᖅ ᐋᖅᑭᒃᐹ, ᐊᑖᑕᖓᓄᑦ ᐅᑎᕐᑎᓪᓗᒍ. 43 ᐃᓄᓕᒫᑦ ᑲᒪᕕᒃᔪᐊᕐᐳᑦ ᒎᑎᐅᑉ ᐊᔪᖏᓐᓂᐊᓗᐊᓂᒃ. ᐃᓄᐃᑦ ᑲᒪᔪᐊᓘᑎᓪᓗᒋᑦ ᓱᓕ ᔩᓱᓯᐅᑉ ᐱᓂᐊᕐᓂᖓᓂᒃ, ᐃᓕᓐᓂᐊᕐᑎᓂ ᐅᖃᐅᑎᕔᑦ, ᔩᓱᓯᐅᑉ ᓱᓕ ᑐᖁᑕᐅᓛᕐᓂᕐᒥᓂᒃ ᐅᖃᐅᓯᖃᕐᓂᖓ ᒫᑎᐅᓯ 17:22-23 ; ᒫᑯᓯ 9:30-32 44 “ᐅᑯᐊ ᐅᖃᐅᓯᕆᓂᐊᕐᑕᒃᑲ ᐳᐃᒍᕐᑍᓕᓯᐅᒃ; ᐃᓅᑉ ᐃᕐᓂᖓ ᐱᑎᑕᐅᒋᐊᕕᓕᕐᐳᖅ ᐃᓄᐃᑦ ᐱᔪᓐᓇᕐᓂᖏᓐᓄᑦ.” 45 ᐃᓕᓐᓂᐊᕐᑎᖏᓪᓕ ᑕᒪᑐᒥᖓ ᐅᖃᕐᑕᖓᓂᒃ ᑐᑭᓯᓚᐅᓐᖏᓚᑦ, ᐅᖃᐅᓰᑦ ᓇᓗᓇᕐᑎᑕᐅᓚᐅᕐᒪᑕ ᑖᒃᑯᓄᖓ ᑐᑭᓯᓚᐅᓐᖏᓚᑦ; ᐃᓕᕋᒋᕚᓗ ᐊᐱᕆᔭᕆᐊᒃᓴᖅ ᑕᒪᑐᒥᖓ. ᑭᓇ ᐱᓪᓚᕆᐅᓂᕐᐹᖑᕙ? ᒫᑎᐅᓯ 18:1-5 ; ᒫᑯᓯ 9:33-37 46 ᔩᓱᓯᐅᑉ ᐃᓕᓐᓂᐊᕐᑎᖏᑦ ᐂᕙᖃᑎᒌᓕᕐᐳᑦ ᓇᓪᓕᐊᑦ ᐱᓚᕆᐅᓂᕐᐸᐅᖕᒪᖔᑦ. 47 ᔩᓱᓯᐅᑉ ᖃᓄᖅ ᐃᓱᒪᖃᕐᒪᖔᑕ ᖃᐅᔨᒐᒥᒋᑦ, ᓱᕈᓯᕐᒥᒃ ᑎᒍᓯᕗᖅ ᓴᓂᒥᓄᑦ ᓇᖏᕐᓯᑎᓪᓗᒍ, 48 ᑖᒃᑯᐊ ᐅᖃᐅᑎᕔᑦ, “ᓇᓪᓕᐊᑦ ᐆᒥᖓ ᓱᕈᓯᑯᓗᖕᒥᒃ ᐃᓚᓕᐅᕐᓯᔪᖅ ᐱᑦᔪᑎᒋᓗᖓ ᐅᕙᓐᓂᒃ ᐃᓚᓕᐅᕐᓯᕗᖅ, ᐅᕙᓐᓂᒡᓗ ᐃᓚᓕᐅᕐᓯᔫᑉ ᐅᕙᓐᓂᒃ ᑎᓕᓯᔪᖅ ᐃᓚᓕᐅᕆᕚ; ᐃᓕᑦᓯᓐᓂᑦ ᒥᑭᓐᓂᕐᐹᖑᔪᖅ ᑖᓐᓇ ᐱᓚᕆᐅᓂᕐᐹᖑᕗᖅ.” ᓇᓪᓕᐊᑦᑕ ᐃᓕᑦᓯᓐᓂᒃ ᐊᑭᕋᕐᑐᖏᑦᑑᑉ ᐃᓚᒋᕚᓯ ᒫᑯᓯ 9:38-40 49 ᔪᐊᓇᓯ ᐅᖃᓕᕐᐳᖅ, “ᐊᔪᕆᕐᑐᐃᔩ, ᐃᓄᖕᒥᒃ ᑕᑯᓚᐅᕐᐳᒍᑦ ᐊᓂᑎᑦᓯᖃᑦᑕᕐᑐᒥᒃ ᐊᓂᕐᓂᕐᓗᖕᓂᒃ ᐃᕝᕕᑦ ᐊᑎᖓᓂ, ᑖᓐᓇ ᐃᓂᕐᑎᓚᐅᕐᐸᕗᑦ ᑍᒤᓕᐅᖁᓇᒍ ᐃᓚᒋᖏᓐᓇᑦᑎᒍ.” 50 ᔩᓱᓯᐅᑉ ᐅᖃᐅᑎᕚ, “ᑍᒤᓕᐅᕐᑐᖅ ᐃᓂᕐᑎᕐᓂᐊᕋᓯᐅᒃ; ᐃᓕᑦᓯᓐᓂᒃ ᐊᑭᕋᕐᑐᖏᑦᑑᑉ ᐃᓚᒋᕚᓯ.” ᓴᒥᐊᕆᐊᒥᐅᑦ ᓄᓇᓖᑦ ᔩᓱᓯᒥᒃ ᐃᓚᓕᐅᕐᓯᔪᒪᖏᑦᑐᑦ 51 ᔩᓱᓯᐅᑉ ᕿᓚᖕᒧᐊᕐᑎᑕᐅᕕᒃᓴᖓ ᖃᒡᓕᕙᓪᓕᐊᓕᕐᒪᑦ, ᑲᔪᓯᔪᒪᓕᕐᐳᖅ ᔨᕉᓴᓕᒻᒧᑦ ᐂᔪᒪᓕᕐᓗᓂ. 52 ᐅᐸᖕᓂᐊᕐᑕᒥᓄᑦ ᐅᖃᕆᐊᕐᑐᕐᑎᑦᓯᕗᖅ, ᓴᒥᐊᕆᐊᕐᒥᐅᑦ ᓄᓇᓕᖏᑕ ᐃᓚᖓᓐᓄᑦ ᓯᓂᒃᑕᕐᕕᒋᓂᐊᕐᑕᒥᖕᓂᒃ ᐅᐸᓗᖕᒊᕐᓯᖁᓪᓗᒋᑦ; 53 ᓴᒥᐊᕆᐊᒥᐅᓪᓕ ᐃᓚᓕᐅᓐᖏᓛᑦ, ᓇᓗᓇᖏᒻᒪᑦ ᔩᓱᓯ ᔨᕉᓴᓕᒻᒧᐊᕐᐸᓪᓕᐊᖕᒪᑦ. 54 ᐃᓕᓐᓂᐊᕐᑎᖏᑕ ᔧᒥᓯᐅᑉ ᔪᐊᓇᓯᐅᓪᓗ ᑕᒪᓐᓇ ᑐᓴᕋᒥᒃᑯᒃ, ᔩᓱᓯᒧᑦ ᐅᖃᕐᐴᒃ, “ᐊᑕᓃᖅ, ᕿᓚᖕᒥᑦ ᐃᑯᒪᒥᒃ ᑲᑕᒃᑐᖃᖁᓪᓗᒍ ᑐᒃᓯᐊᖁᕕᑎᒃᑰᒃ ᐃᓚᓕᐅᕐᓯᔪᒪᖏᑦᑐᑦ ᓄᖑᑕᐅᖁᓪᓗᒋᑦ?” 55 ᔩᓱᓯᐅᑉ ᑕᑯᓴᕐᓗᒋᒃ ᐃᓂᕐᑎᕐᐹᒃ; [ᐅᖃᕐᓗᓂ, “ᐊᓂᕐᓂᕐᒧᑦ ᖃᓄᐃᑦᑐᒧᑦ ᕿᑐᕐᖓᕆᔭᐅᖕᒪᖔᑦᓯᒃ ᓇᓗᕗᓯᒃ; ᐃᓅᑉ ᐃᕐᓂᖓ ᑎᑭᓯᒪᖏᒻᒪᑦ ᐃᓄᖕᓂ ᐊᓯᕈᐃᔭᕐᑐᕐᓗᓂ, ᐱᐅᓕᔭᕐᑐᕐᓗᒋᓪᓕ.”] 56 ᔩᓱᓯ ᐃᓕᓐᓂᐊᑎᓂ ᐃᓚᒋᓪᓗᒋᑦ ᓄᓇᓖᑦ ᐊᓯᖏᓐᓄᐊᕐᐳᑦ. ᔩᓱᓯᒥᒃ ᒪᓕᒃᑎᐅᔪᒪᔪᑦ ᒫᑎᐅᓯ 8:19-22 57 ᐊᖅᑯᑎᒃᑯᑦ ᐱᓱᒃᓗᑎᒃ ᐊᖑᒻᒥᑦ ᔩᓱᓯ ᐅᖃᐅᑦᔭᐅᕗᖅ, “ᒪᓕᖕᓂᐊᕐᐸᒋᑦ ᓇᒧᑐᐃᓐᓇᖅ ᐂᒐᓗᐊᕈᕕᑦ.” 58 ᔩᓱᓯᐅᑉ ᑭᐅᕚ, “ᑎᕆᒐᓂᐊᑦ ᓯᑎᖃᕐᐳᑦ, ᑎᖕᒥᐊᓪᓗ ᐅᓪᓗᖃᕐᖢᑎᒃ; ᐃᓅᓪᓕ ᐃᕐᓂᖓ ᓇᓂᑐᐃᓐᓇ ᓯᓂᒡᕕᒃᓴᖃᓐᖏᓚᕐᓘᓐᓃᑦ.” 59 ᐊᒻᒪ ᐊᓯᐊᓄᑦ ᐅᖃᕆᕗᖅ, “ᐃᕝᕕᑦ ᒪᓕᓐᖓ.” ᑖᓐᓇ ᑭᐅᕗᖅ, “ᐊᑕᓃᖅ, ᐊᑖᑕᒐ ᐃᓗᕕᕆᐊᕐᑐᖅᑳᓚᐅᕐᓚᒍ.” 60 ᔩᓱᓯᐅᑉ ᑭᐅᕚ, “ᑐᖁᖓᔪᑦ ᑐᖁᔨᐊᒥᖕᓂᒃ ᐃᓗᕕᕐᓯᓕᕐᓕ; ᐃᕝᕕᑦ ᒎᑎᐅᑉ ᐊᑕᓂᐅᕕᖓᓂᒃ ᐅᖃᐅᓯᖃᕆᐊᕐᑐᓕᕆᑦ.” 61 ᓱᓕ ᐃᓚᖓᑦ ᐅᖃᕆᕗᖅ, “ᐊᑕᓃᖅ, ᒪᓕᒍᒪᕙᒋᑦ; ᐃᓚᒃᑲᓕ ᑕᕝᕙᐅᕗᑏᕆᐊᕐᑐᖅᑳᓚᐅᕐᓚᒃᑲ.” 62 ᔩᓱᓯᐅᑉ ᑭᐅᕚ, “ᓇᓪᓕᐊᑦ ᐱᕈᕐᓰᕕᓕᐅᕈᑎᒥᓂᒃ ᑎᒍᓯᔪᖅ ᓴᓇᓯᒋᐊᕐᓗᓂ, ᑭᖑᒧᑦ ᕿᕕᐊᕈᓂ, ᐊᑐᕐᑕᐅᔪᓐᓇᓐᖏᓚᖅ ᒎᑎᐅᑉ ᐊᑕᓂᐅᕕᖓᓄᑦ.” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society