ᓘᑲᓯᐅᑉ ᐊᒡᓚᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦᐊᕐᓁᑦ ᔩᓱᓯᒥᒃ ᐃᓚᖃᖃᑦᑕᓚᐅᕐᑐᑦ 1 ᑕᒪᑐᒪ ᑭᖑᕐᖓᒍᑦ ᔩᓱᓯ ᐃᖏᕐᕋᓚᐅᕐᐳᖅ ᓄᓇᓕᒃᑎᒍᑦ ᐃᒡᓗᒐᓴᒃᑎᒍᓪᓗ, ᐊᔪᕆᕐᑐᐃᓪᓗᓂ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᒎᑎᐅᑉ ᐊᑕᓂᐅᕕᖓᓂᒃ. ᐃᓕᓐᓂᐊᕐᑎᓂ 12 ᐃᓚᒋᓪᓗᒋᑦ, 2 ᐊᕐᓁᑦ ᐃᓚᖏᑦ ᐊᓂᕐᓂᕐᓗᖕᓂᒃ ᐊᓂᑎᑦᓯᕕᒋᓚᐅᕐᑕᖏᑦ ᖃᓂᒻᒪᓯᖏᓐᓂᓪᓗ ᐋᖅᑭᓚᐅᕐᑕᖏᑦ ᐅᑯᐊ; ᒥᐊᕆ, ᒫᒃᑕᓖᓂᒥᒃ ᑍᔭᐅᔪᖅ, ᑖᓐᓇ ᐊᓂᑎᑦᓯᕕᒋᓚᐅᕐᑕᖓ ᐊᓂᕐᓂᕐᓗᖕᓂᒃ 7ᓂᒃ; 3 ᔪᐊᓇᓗ ᑦᓲᓴᐅᑉ ᓄᓕᐊᖓ, ᐃᕉᑕᓯᐅᑉ ᐃᒡᓗᒥᓂ ᐊᖓᔪᖅᑳᖁᑎᖓᑕ; ᓲᓵᓇᓗ, ᐊᕐᓁᓪᓗ ᐊᓯᖏᑦ ᐊᒥᓱᑦ, ᖃᓄᑐᐃᓐᓇᖅ ᐃᑲᔪᕐᐸᒃᑐᑦ ᐃᑲᔫᑎᒋᔪᓐᓇᕐᑕᒥᒃᑎᒍᑦ ᔩᓱᓯᒥᒃ ᐃᓕᓐᓂᐊᕐᑎᖏᓐᓂᒡᓗ. ᐊᑦᔨᐅᔪᖅ ᑲᓐᖓᕐᓱᐃᔪᖅ ᒫᑎᐅᓯ 13:1-9 ; ᒫᑯᓯ 4:1-9 4 ᐃᓄᒋᐊᒃᑐᑦ ᕾᕙᓪᓕᐊᑐᐃᓐᓇᕐᒪᑕ ᔩᓱᓯᒧᑦ ᓄᓇᓕᓕᒫᓂᑦ, ᑲᑎᒪᓕᕐᒪᑕ ᐊᑦᔨᐅᔪᒥᒃ ᐅᖃᕐᕕᒋᓕᕐᐰᑦ: 5 “ᑲᓐᖓᕐᓱᐃᔨ ᓂᐊᑰᔭᒃᓴᓂᒃ ᑲᓐᖓᕐᓱᐃᔭᕐᑐᕐᐳᖅ ᐱᕈᕐᓯᐊᒃᓴᓂᒃ; ᑲᓐᖓᕐᓱᐃᓕᕐᒪᑦ ᐱᕈᕐᓯᐊᒃᓮᑦ ᐃᓚᖏᑦ ᐊᖅᑯᒻᒧᑦ ᑲᑕᒃᐳᖅ, ᐱᓱᒃᑐᓄᑦ ᑐᓪᓕᕋᕐᑕᐅᕗᑦ, ᑎᖕᒥᐊᓂᓪᓗ ᓂᕆᔭᐅᓪᓗᑎᒃ. 6 ᐃᓚᖏᓪᓗ ᐅᔭᕋᓛᓄᑦ ᑲᑕᒃᐳᑦ; ᐱᕈᕋᒥᒃ, ᑐᖁᓕᓴᕅᑉᐳᑦ, ᐃᑦᔪᑭᑦᑐᒥ ᐃᑦᓯᖃᖏᓐᓇᒥᒃ. 7 ᐃᓚᖏᑦ ᐅᕐᐲᑦ ᑲᑭᓪᓚᐅᑎᓖᑦ ᐊᑯᕐᖓᓐᓄᑦ ᑲᑕᒃᐳᑦ; ᐅᕐᐲᑦ ᑲᑭᓪᓚᐅᑎᓖᑦ ᐱᕈᖃᑎᒋᒐᒥᒋᑦ ᐃᐱᑎᑉᐰᑦ. 8 ᐃᓚᖏᑦ ᓄᓇᒧ ᐃᑦᔪᖃᑦᓯᐊᕐᑐᒧᑦ ᑲᑕᒃᐳᑦ; ᐱᕈᓕᕐᓗᑎᒃ, ᓂᐊᖂᔭᒃᓴᕐᑖᕐᓗᑎᒃ 100ᓂᒃ.” ᑍᒫᒃ ᐅᖃᕆᕋᒥ ᓂᐱᖅᑯᕐᑐᓪᓗᓂ ᐅᖃᕐᐳᖅ, “ᓇᓪᓕᐊᑦ ᑐᓵᔪᓂᒃ ᓯᐅᑎᓕᒃ ᑐᓴᕐᓕ.” ᐊᑦᔨᐅᔪᑦ ᓱᓇᒧᑦ ᐊᑐᕐᒪᖔᑕ ᒫᑎᐅᓯ 13:10-17 ; ᒫᑯᓯ 4:10-12 9 ᐃᓕᓐᓂᐊᕐᑎᖏᑕ ᐊᐱᕆᕚᑦ ᐊᑦᔨᐅᔪᖅ ᖃᓄᖅ ᑐᑭᖃᕐᒪᖔᑦ, 10 ᐅᖃᐅᑎᕔᑦ, “ᐃᓕᑦᓯᓐᓄᑦ ᒎᑎᐅᑉ ᐊᑕᓂᐅᕕᖓᑕ ᓇᓗᓇᕐᓂᖏᑦ ᓴᖅᑭᑕᐅᕗᑦ; ᐊᓯᑦᓯᓐᓄᓪᓕ ᐊᑦᔨᐅᔪᑎᒍᑦ ᓴᖅᑭᑕᐅᕗᑦ, ᑕᑯᒐᓗᐊᕐᓗᑎᒃ, ᓱᖅᑯᐃᕐᓯᖁᓇᒋᑦ, ᑐᓴᕋᓗᐊᕐᓗᑎᒡᓗ ᑐᑭᓯᖁᓇᒋᑦ.” ᐊᑦᔨᐅᔫᑉ ᓇᓗᓁᕐᑕᐅᓂᖓ ᒫᑎᐅᓯ 13:18-23 ; ᒫᑯᓯ 4:13-20 11 “ᐊᑦᔨᐅᔪᖅ ᐃᒫᒃ ᑐᑭᖃᕐᐳᖅ: ᐱᕈᕐᓯᐊᒃᓴᑦ, ᑕᕝᕙ ᒎᑎᐅᑉ ᐅᖃᐅᓯᖏᑦ. 12 ᐱᕈᕐᓯᐊᒃᓮᑦ ᑲᓐᖓᕐᓲᑕᐅᔪᑦ ᐊᖅᑯᑎᒧ ᑲᑕᒃᑐᑦ, ᐅᑯᐊᖑᕗᑦ, ᐅᖃᐅᓯᕐᓂᒃ ᑐᓴᕐᑐᑦ; ᓵᑖᓇᓯᐅᑉ ᐅᖃᐅᓰᑦ ᐃᓱᒪᖏᓐᓂᑦ ᐲᔭᕆᐊᕐᑐᕐᐰᑦ, ᐅᒃᐱᓕᖁᓇᒋᑦ ᐱᐅᓕᔭᐅᖁᓇᒋᓪᓗ. 13 ᐱᕈᕐᓯᐊᒃᓮᑦ ᐅᔭᕋᓛᓄᑦ ᐃᑦᔪᑭᑦᑐᒧᑦ ᑲᑕᒃᑐᑦ ᑖᒃᑯᐊᖑᕗᑦ, ᐅᖃᐅᓯᕐᓂᒃ ᑐᓴᕐᑐᑦ, ᐃᓚᓕᐅᕐᓯᔪᓪᓗ ᖁᕕᐊᓱᒡᓗᑎᒃ; ᑭᓯᐊᓂᓕ ᐊᒫᑭᓐᓇᒥᒃ ᓄᓇᒧᑦ ᒪᖑᒃᓯᒪᔪᓂᒃ, ᐅᒃᐱᕈᓱᓚᐅᕋᓗᐊᕐᓗᑎᒃ ᐱᐅᓐᖏᑐᒥᒃ ᐱᔪᒥᓵᕐᑕᐅᓕᕋᒥᒃ ᑲᑕᒃᐳᑦ. 14 ᐊᒻᒪ ᐱᕈᕐᓯᐊᒃᓴᑦ ᐅᕐᐱᖕᓄᑦ ᑲᑭᓪᓚᐅᑎᓕᖕᓄᑦ ᑲᑕᒃᑐᑦ ᐅᑯᐊᖑᒋᕗᑦ, ᐅᖃᐅᓯᕐᓂᒃ ᑐᓴᕐᑐᑦ, ᐃᓱᒪᔮᕐᓂᕐᒧᓪᓕ ᐱᖁᑎᑖᕈᒪᓂᕐᓄᓪᓗ, ᐱᕈᕐᓯᐊᒃᓴᖏᓪᓗ ᐱᕈᕈᓐᓇᕐᓯᓇᑎᒃ. 15 ᐱᕈᕐᓯᐊᒃᓴᓪᓕ ᓄᓇᒧᑦ ᐃᑦᔪᑦᓯᐊᕆᒃᑐᒧᑦ ᑲᑕᒃᑐᑦ, ᐃᒤᑦᑐᓂᒃ ᑐᑭᖃᕐᐳᑦ, ᐅᖃᐅᓯᕐᓂᒃ ᑐᓴᕐᑐᑦ, ᐱᓯᒤᓐᓇᕐᓗᒋᑦ ᓈᓚᑦᓯᐊᕐᓂᒃᑯᑦ ᐆᒻᒪᑎᒥᒍᑦ, ᓱᕐᕋᔪᐃᑦᑑᓪᓗᑎᒃ ᐱᕈᕐᕕᐅᓚᐅᖏᓐᓂᕐᒥᖕᓂ ᕿᓄᐃᓵᕐᓂᒃᑯᑦ.” ᓇᓂᕈᐊᖅ ᒪᒃᑲᐅᔭᐅᑉ ᐊᑖᓃᑦᑐᖅ ᒫᑯᓯ 4:21-25 16 “ᓇᓂᕈᐊᕐᒥᒃ ᐃᑭᑦᓯᔪᖃᕌᖓᒥ ᒪᑐᔭᐅᕙᓐᖏᓚᖅ ᒪᒃᑲᐅᔭᒧᑦ, ᐅᕝᕙᓗ ᐃᒡᓕᐅᑉ ᐊᑖᓅᕐᓯᔪᖃᕐᐸᓐᖏᓚᖅ, ᓇᓂᕈᐊᒃᑯᕕᖕᒧᓪᓕ ᐃᓕᔭᐅᕙᒃᐳᑦ, ᐃᒡᓗᒧ ᐃᑎᕐᑐᑦ ᖃᐅᒪᔪᒥᒃ ᑕᑯᖁᓪᓗᒋᑦ. 17 “ᐃᔨᕐᓯᒪᔪᖃᕈᓐᓇᓐᖏᓚᖅ ᓴᖅᑭᑎᑕᐅᓂᐊᖏᑦᑐᒥᒃ, ᓱᓇᑐᐃᓐᓇᖅ ᐃᔨᕐᑕᐅᓯᒪᔪᖅ ᖃᐅᒪᔪᒧᑦ ᓴᖅᑭᑕᐅᓂᐊᕐᐳᖅ. 18 “ᑲᒪᑦᓯᐊᕆᑦᓯ ᖃᓄᖅ ᑐᓵᖕᒪᖔᑦᓯ; ᓇᓪᓕᐊᑦ ᐱᖃᕐᑐᖅ ᑐᓂᓯᕕᐅᒃᑲᓐᓂᕐᓂᐊᕐᐳᖅ, ᐱᖃᖏᑦᑐᕐᓗ ᐊᕐᓵᕐᑕᐅᓂᐊᕐᐳᖅ ᐊᒡᓛᑦ ᒥᑭᔪᒥᒃ ᐱᖃᕋᓱᒋᒐᓗᐊᕐᐸᑦ.” ᔩᓱᓯᐅᑉ ᐊᓈᓇᖓ ᖃᑕᓐᖑᑎᖏᓪᓗ ᒫᑎᐅᓯ 12:46-50 ; ᒫᑯᓯ 3:31-35 19 ᑕᕝᕙ ᐊᓈᓇᖓ ᖃᑕᓐᖑᑎᖏᓪᓗ ᑖᑦᓱᒧᖓ ᐅᐸᒍᑎᕗᑦ, ᑎᑭᐅᑎᔪᓐᓇᓐᖏᓚᓪᓕ ᐃᓄᒋᐊᓗᐊᕐᓂᖓᓄᑦ. 20 ᐃᓄᖕᓂᑦ ᐅᖃᐅᑦᔭᐅᕗᖅ, “ᐊᓈᓁᑦ ᖃᑕᓐᖑᑎᑎᓪᓗ ᐃᒡᓘᑉ ᓯᓚᑖᓃᑉᐳᑦ, ᐃᓕᖕᓂᒃ ᑕᑯᔪᒪᓪᓗᑎᒃ.” 21 ᔩᓱᓯᐅᑉ ᐅᖃᐅᑎᕔᑦ, “ᒎᑎᐅᑉ ᐅᖃᐅᓯᖏᓐᓂᒃ ᑐᓴᕐᑐᑦ ᒪᓕᒡᓗᒋᓪᓗ, ᑖᒃᑯᐊ ᐊᓈᓇᒋᕙᒃᑲ ᖃᑕᓐᖑᑎᒋᓪᓗᒋᓪᓗ.” ᔩᓱᓯᐅᑉ ᐊᖅᑯᓇᕐᑐᒥᒃ ᐃᑯᓪᓚᕐᑎᑦᓯᓂᖓ ᒫᑎᐅᓯ 8:23-27 ; ᒫᑯᓯ 4:35-41 22 ᐅᓪᓗᐃᑦ ᐃᓚᖓᓐᓂᒃ ᔩᓱᓯ ᐅᒥᐊᒧᑦ ᐃᑭᕗᖅ ᐃᓕᓐᓂᐊᕐᑎᓂ ᐃᓚᒋᓪᓗᒋᑦ, ᐅᖃᐅᑎᓪᓗᒋᑦ, “ᑕᓯᐅᑉ ᐊᑭᐊᓄᑦ ᐃᑳᓚᐅᕐᑕ.” ᑕᕝᕙ ᐊᐅᓪᓚᓕᕐᐳᑦ. 23 ᑎᖏᕐᕋᐅᑦᑎᔭᕐᓗᑎᒃ ᐃᖏᕐᕋᓕᕐᑎᓪᓗᒋᑦ ᔩᓱᓯ ᓯᓂᓕᕐᐳᖅ. ᐊᓄᕆᐊᓗᒃ ᑎᑭᒻᒪᑦ ᑕᓯᕐᒧᑦ, ᐅᒥᐊᖓᑦ ᐃᒪᒃᐸᓪᓕᐊᓕᕐᓗᓂ, ᓇᖏᐊᕐᓇᕐᑐᒦᓕᕐᓗᑎᒃ. 24 ᐃᓕᓐᓂᐊᕐᑎᖏᑕ ᐅᐸᒃᓗᒍ ᑐᐹᕐᐹᑦ ᐅᖃᐅᑎᓪᓗᒍ, “ᐊᔪᕆᕐᑐᐃᔩ, ᐊᔪᕆᕐᑐᐃᔩ, ᑐᖁᓂᐊᖅᑰᓕᕋᑦᑕ!” ᔩᓱᓯ ᒪᑭᓐᓇᒥ ᐊᓄᕆ ᒪᓕᐊᓗᐃᓪᓗ ᐃᓂᕐᑎᕐᐰᑦ; ᐊᓄᕌᕈᓐᓃᕐᓗᓂ ᐅᕐᓱᐊᓕᕐᐳᖅ. 25 ᔩᓱᓯᐅᑉ ᐅᖃᐅᑎᕔᑦ, “ᓇᐅᒡᓕ ᐅᒃᐱᕐᓂᓯ?” ᑖᒃᑯᐊ ᑲᒪᓂᐊᕐᓗᑎᒃ ᑲᑉᐱᐊᓱᒻᒪᕆᒃᐳᑦ, ᐃᒻᒥᖕᓄᑦ ᐅᖃᖃᑦᑕᐅᑎᓪᓗᑎᒃ, “ᖃᓄᐃᑦᑑᒐᒥᐅᓇ, ᐊᒡᓛᑦ ᐊᓄᕆᒥᒃ ᐃᒪᕐᒥᒡᓗ ᐅᖃᐅᑦᔨᓪᓗᓂ ᓈᓚᒃᑕᐅᔪᓐᓇᕐᐸ?” ᔩᓱᓯᐅᑉ ᐋᖅᑭᒃᓯᓂᖓ ᐊᓂᕐᓂᕐᓗᖕᒧᑦ ᐃᑎᕐᑕᐅᓯᒪᔪᒥᒃ ᒫᑎᐅᓯ 8:28-34 ; ᒫᑯᓯ 5:1-20 26 ᑕᕝᕙ ᓄᓇᒧᑦ ᒋᕌᓴᒧᑦ ᑎᑭᑉᐳᑦ, ᑕᓯᕐᔪᐊᑉ ᒐᓕᓕᐊᑉ ᐊᑭᐊᓃᑦᑐᒧᑦ. 27 ᔩᓱᓯ ᓄᓇᒧᑦ ᓂᐅᖕᒪᑦ, ᐸᕐᕆᐊᕐᑕᐅᕗᖅ ᐊᖑᒻᒥᑦ ᑕᕝᕙᓂ ᓄᓇᖃᖃᑕᐅᔪᒧᑦ, ᐊᓂᕐᓂᕐᓗᒃᑕᐅᓯᒪᔪᒧᑦ; ᐊᑯᓂᐅᓕᕐᑐᖅ ᑖᓐᓇ ᐊᖑᑦ ᐊᓐᓄᕌᖃᕈᓐᓇᓚᐅᓐᖏᓚᖅ, ᐃᒡᓗᒥᓗ ᐊᖏᕐᕋᕐᓯᒪᔪᓐᓇᕋᓂ ᐃᓂᖃᕐᐳᕐᓕ ᐃᓗᕕᕐᓂ. 28 ᑖᑦᓱᒪ ᔩᓱᓯ ᑕᑯᒐᒥᐅᒃ, ᕾᒐᓛᕐᐳᖅ ᓵᖓᓄᑦ ᐹᒻᒪᒡᓗᓂ, ᓂᐱᖅᑯᕐᑐᓪᓗᓂ ᐅᖃᕐᐳᖅ, “ᖃᓄᐃᓕᐅᕐᓂᐊᕐᐱᖔ ᔩᓱᓯ, ᒎᑎᐅᑉ ᖁᑦᓯᖕᓂᕐᐹᑉ ᐃᕐᓂᖓ? ᕿᓄᕕᒋᕙᒋᑦ ᑲᑉᐱᐊᓱᒃᑎᓐᓂᐊᕐᓇᖓ.” 29 ᑍᒫᒃ ᐅᖃᕐᐳᖅ ᔩᓱᓯᐅᑉ ᐊᓂᕐᓂᕐᓗᒃ ᐊᓂᖁᓚᐅᕐᒪᒍ ᐃᓄᖕᒥᑦ ᑖᑦᓱᒪᖓᑦ. ᐅᓄᕐᑐᐃᕐᓱᕐᓗᓂ ᐊᐅᓚᖃᑦᑕᕐᓯᒪᖕᒪᒍ; ᑎᒍᔭᐅᖃᑦᑕᕐᓯᒪᒐᓗᐊᕐᓗᓂ, ᐊᕐᓵᕐᑑᔭᓄᑦ ᑕᓕᖏᒃ ᐃᑎᒐᖏᓪᓗ ᐊᑦᓱᖏᕐᑕᐅᖃᑦᑕᕐᓯᒪᒐᓗᐊᕐᐳᑦ, ᑖᑦᓱᒪᓕ ᐊᕐᓵᕐᑑᔧᑦ ᑭᒃᑐᕋᖃᑦᑕᓚᐅᕐᐰᑦ, ᐊᓂᕐᓂᕐᓘᑉ ᐊᐅᓪᓚᕈᑎᕙᒡᓗᓂᐅᒃ ᐃᓄᖃᖏᑦᑐᒧᑦ. 30 ᑕᕝᕙ ᔩᓱᓯᐅᑉ ᐊᐱᕆᕚ, “ᑭᓇᐅᕕᑦ?” ᑖᓐᓇ ᑭᐅᕗᖅ, “ᓕᒋᐅᓂᐅᕗᖓ”; ᐊᓂᕐᓂᕐᓗᐃᑦ ᐊᒥᓱᕐᔪᐊᑦ ᑖᑦᓱᒪᓂ ᐃᑎᕐᓯᒪᖕᒪᑕ. 31 ᐊᓂᕐᓂᕐᓗᐃᑦ ᕿᓄᕕᒋᕚᑦ, ᐃᑎᔪᒧᑦ ᓇᑎᖃᖏᑦᑐᒧᐊᕐᑎᑕᐅᔪᒪᓇᑎᒃ. 32 ᑕᒫᓂᓕ ᖃᓂᒋᔮᖓᓂ ᑰᒃᑰᓯᑕᖃᕐᐳᖅ ᐊᒥᓱᓂᒃ, ᖃᖅᑲᐅᑉ ᓯᕕᖓᓂᖓᓂ ᓂᕆᓇᓱᒃᑐᓂᒃ; ᐊᓂᕐᓂᕐᓗᐃᑦ ᔩᓱᓯᒧᑦ ᑰᒃᑰᓯᓄᐊᕐᑎᑕᐅᔪᒪᕗᑦ, ᑕᕝᕙ ᑍᒫᒃ ᐱᖁᕔᑦ. 33 ᐊᓂᕐᓂᕐᓗᐃᑦ ᐃᓄᖕᒥᑦ ᐊᓂᒐᒥᒃ, ᑰᒃᑰᓯᓄᑦ ᐃᑎᕐᐳᑦ, ᑰᒃᑰᓯᒐᓴᒡᔪᐊᑦ ᐸᖓᓕᒃᓯᒐᒥᒃ ᐃᓐᓈᕈᒃᑯᑦ ᐃᔪᒃᑲᕐᐳᑦ ᐃᒫᓄᑦ ᐃᐱᓪᓗᑎᒃ. 34 ᑰᒃᑰᓯᓂᒃ ᑲᒪᔪᑦ ᑕᑯᒐᒥᒃ ᑕᒪᑐᒥᖓ, ᕿᒪᒃᓯᕗᑦ, ᐅᖃᕆᐊᕐᑐᕐᓗᑎᒃ ᓄᓇᖅᑲᑎᒥᖕᓄᑦ, ᓄᓇᓖᓪᓗ ᖃᓂᒋᔭᖏᓐᓃᑦᑐᓄᑦ. 35 ᑕᕝᕙ ᐃᓄᐃᑦ ᑕᑯᔭᕐᑐᕐᐳᑦ ᖃᓄᐃᑦᑐᖃᓕᕐᒪᖔᑦ, ᔩᓱᓯ ᐅᐸᒃᑲᒥᑦᔪᒃ, ᐊᖑᑦ ᑕᑯᕚᑦ ᐊᓂᕐᓂᕐᓗᖕᓂᒃ ᐊᓂᑎᑦᓯᕕᐅᓯᒪᓕᕐᑐᖅ, ᐃᒃᓯᕚᕐᑐᖅ ᔩᓱᓯᐅᑉ ᓵᖓᓂ, ᐊᓐᓄᕌᓯᒪᓕᕐᑐᖅ ᐃᓱᒪᖓ ᖃᓄᐃᖏᑦᓯᐊᓕᕐᑐᖅ; ᑖᒃᑯᐊ ᑲᑉᐱᐊᓱᒻᒪᕆᓕᕐᐳᑦ. 36 ᐃᓄᐃᑦ ᑕᑯᓐᓈᓚᐅᕐᑐᑦ ᐅᓂᒃᑳᓕᕐᐳᑦ, ᖃᓄᖅ ᑖᓐᓇ ᐊᓂᕐᓂᕐᓗᖕᓂᒃ ᐊᓂᑎᑦᓯᕕᐅᓚᐅᕐᒪᖔᑦ. 37 ᑕᕝᕙ ᐃᓄᐃᑦ ᒋᕌᓴᐅᑉ ᖃᓂᒋᔭᖓᓃᑦᑐᓕᒫᑦ ᔩᓱᓯ ᐊᐅᓪᓚᖁᓕᕐᐹᑦ; ᐊᒃᓱᒻᒪᕆᐊᓗᒃ ᑲᑉᐱᐊᓱᓕᕋᒥᒃ; ᔩᓱᓯ ᐅᒥᐊᒧᑦ ᐃᑭᒐᒥ ᐅᑎᓕᕐᐳᖅ. 38 ᑖᑦᓱᒪᓕ ᐊᓂᕐᓂᕐᓗᖕᓂᒃ ᐊᓂᑎᑦᓯᕕᐅᖅᑲᐅᔫᑉ ᔩᓱᓯ ᕿᓄᕕᒋᕚ ᓇᔪᕈᒪᓪᓗᒍ. ᔩᓱᓯᐅᑉ ᐊᐅᓪᓚᖁᕚ ᐅᖃᐅᑎᓪᓗᒍ, 39 “ᐊᖏᕐᕋᕐᓄᑦ ᐅᑎᓕᕆᑦ, ᐅᓂᒃᑳᕐᓗᑎᑦ ᒎᑎᒧᑦ ᐱᑦᓯᐊᕐᕕᐅᓯᒪᓂᕐᓂᒃ.” ᑖᓐᓇ ᓄᓇᖅᑲᑎᓕᒫᒥᓄᑦ ᐅᓂᒃᑳᕆᐊᕐᑐᕐᐳᖅ, ᔩᓱᓯᒧᑦ ᐱᑦᓯᐊᕐᕕᐅᓯᒪᓂᕐᒥᓂᒃ. ᔧᕉᓯᐅᑉ ᐸᓂᖓ ᐊᕐᓇᐅᓪᓗ ᔩᓱᓯᐅᑉ ᐊᓐᓄᕌᖓᓂᒃ ᐊᒃᑐᕐᓯᓂᖓ ᒫᑎᐅᓯ 9:18-26 ; ᒫᑯᓯ 5:21-43 40 ᔩᓱᓯ ᐅᑎᕐᒪᑦ, ᐃᓄᒋᐊᒃᑐᑦ ᑐᓐᖓᓱᒃᑎᑉᐹᑦ, ᐅᑕᖅᑭᓚᐅᕋᒥᑦᔪᒃ. 41 ᕾᔪᖃᕆᕗᖅ ᐊᖑᒻᒥᒃ ᔧᕉᓯᒥᒃ ᐊᑎᓕᖕᒥᒃ, ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓂ ᐊᐅᓚᑦᓯᔨᖓᓐᓂᒃ; ᔩᓱᓯᐅᑉ ᐃᑎᒐᖏᑕ ᓵᖓᓄᑦ ᐹᒻᒪᒃᐳᖅ, ᐃᓗᖏᕐᑐᕐᓗᓂ ᐃᒡᓗᒥᓄᑦ ᕾᖁᕚ, 42 ᐸᓂᑐᐊᖓ 12ᓂᒃ ᐊᕐᕌᒍᓕᒃ ᖃᓂᒪᓪᓗᓂ ᑐᖁᓕᒑᓕᕐᒪᑦ. ᔩᓱᓯ ᐱᓱᒃᑎᓪᓗᒍ, ᐃᓄᖕᓂᑦ ᐊᕙᑖᓂᑦ ᓂᓐᓂᐅᕐᑎᑕᐅᓚᐅᕐᐳᖅ ᐃᓄᒋᐊᓗᐊᕐᓂᖏᓐᓄᑦ. 43 ᐊᕐᓇᖅ ᐊᕐᕌᒍᓂᒃ 12ᓂᒃ ᐊᐅᓈᖏᓐᓇᕐᑐᖅ; ᑖᑦᓱᒪ ᐱᖁᑎᓂ ᓄᖑᓚᐅᕐᐰᑦ ᐋᓐᓂᐊᓯᐅᑎᓄᑦ, ᓱᓇᒧᓪᓘᓐᓃᑦ ᐋᖅᑭᒃᑕᐅᔪᓐᓇᕋᓂ, 44 ᔩᓱᓯ ᑐᓄᐊᓂᑦ ᒪᓕᒃᓴᕐᐹ, ᐊᓐᓄᕌᖓᑕ ᓯᓈ ᐊᒃᑐᕐᐹ; ᑕᕝᕔᓐᓇᖅ ᐊᐅᓈᕐᓂᖓ ᓄᖅᑲᕐᐳᖅ. 45 ᔩᓱᓯ ᐅᖃᕐᐳᖅ, “ᑭᐊ ᐊᒃᑐᕐᐹᖓ?” ᐃᓄᐃᑦ ᐊᒃᑐᕐᓯᖏᓐᓂᕋᕐᒪᑕ, ᐲᑦᑐᕉᓯ ᐅᖃᕐᐳᖅ, “ᐊᔪᕆᕐᑐᐃᔩ, ᐃᓄᖕᓂᑦ ᐊᕙᓗᔭᐅᓯᒪᒐᕕᑦ ᓂᓐᓂᐅᕐᑎᑕᐅᕗᑎᑦ!” 46 ᔩᓱᓯ ᐅᖃᕐᐳᖅ, “ᑭᓇᒧᒃᑭᐊᖅ ᐊᒃᑐᕐᑕᐅᒐᒪ; ᐃᒃᐱᒍᓱᒡᓗᖓᓗ ᐱᔪᓐᓇᕐᓂᖅ ᐅᕙᓐᓂᑦ ᐊᓂᓯᒪᖕᒪᑦ.” 47 ᐊᕐᓇᖅ ᖃᐅᔨᒐᒥ ᖃᐅᔨᔭᐅᓂᕐᒥᓂᒃ, ᓴᔪᒡᓗᓂ ᔩᓱᓯᐅᑉ ᓵᖓᓄᑦ ᐹᒻᒪᒃᐳᖅ, ᐃᓄᐃᑦ ᑐᓵᑎᓪᓗᒋᑦ ᐅᖃᓕᕐᐳᖅ ᓱᖕᒪᑦ ᔩᓱᓯ ᐊᒃᑐᕐᒪᖔᕐᒥᐅᒃ, ᑕᕝᕔᓐᓇᖅ ᐊᖅᑭᒃᑕᐅᓂᕐᒥᓂᒃ ᐅᖃᕐᐳᖅ. 48 ᔩᓱᓯᐅᑉ ᐅᖃᐅᑎᕚ, “ᐸᓃᒃ ᐅᒃᐱᕐᓂᕕᑦ ᐋᖅᑭᒃᐹᑎᑦ; ᐃᓱᒪᔮᕈᓐᓃᕐᓗᑎᑦ ᐊᖏᕐᕋᓕᕆᑦ.” 49 ᔩᓱᓯ ᓱᓕ ᑍᒫᒃ ᐅᖃᕐᑎᓪᓗᒍ, ᐅᖃᕆᐊᕐᑐᕐᑐᖃᕐᐳᖅ ᐊᖓᔪᖅᑳᑉ ᐃᒡᓗᖓᓂᑦ ᐱᔪᒥᒃ, ᔧᕉᓯᒧᑦ ᐅᖃᕐᓗᓂ, “ᐸᓃᑦ ᑐᖁᕗᖅ; ᐊᔪᕆᕐᑐᐃᔨ ᐸᒡᕕᓴᒍᓐᓃᕈᒃ.” 50 ᔩᓱᓯᓕ ᑕᒪᑐᒥᖓ ᑐᓴᕋᒥ ᔧᕉᓯ ᐅᖃᐅᑎᕚ, “ᑲᑉᐱᐊᓱᖏᓪᓗᑎᑦ; ᐅᒃᐱᕈᓱᑐᐃᓐᓇᕆᑦ, ᐸᓃᑦ ᖃᓄᐃᑦᓱᓐᓃᕐᓂᐊᕐᐳᖅ.” 51 ᔩᓱᓯ ᐃᒡᓗᒧᑦ ᑎᑭᓐᓇᒥ, ᐃᑎᖁᔨᓐᖏᓚᖅ ᐃᓄᖕᓂᒃ, ᐅᑯᐊ ᐃᑎᖁᔭᑐᐊᕆᕔᑦ ᐲᑦᑐᕉᓯ ᔪᐊᓇᓯᓗ ᔧᒥᓯᓗ ᓂᕕᐊᕐᓵᓪᓗ ᐊᑖᑕᖓ ᐊᓈᓇᖓᓗ. 52 ᑖᒃᑯᐊ ᑕᕝᕙᓃᑦᑐᓕᒫᑦ ᕿᐊᕗᑦ ᐅᒡᒍᐊᕆᓪᓗᒍ ᓂᕕᐊᕐᓵᖅ; ᔩᓱᓯᐅᑉ ᐅᖃᐅᑎᕔᑦ, “ᕿᐊᖏᓪᓗᓯ ᓂᕕᐊᕐᓵᖅ ᑐᖁᖏᒻᒪᑦ, ᓯᓂᑐᐃᓐᓇᕐᒪᑦ.” 53 ᑖᒃᑯᐊ ᐃᔪᕆᕚᑦ, ᖃᐅᔨᒪᒐᒥᒃ ᑐᖁᖓᓐᖕᒪᑦ. 54 ᔩᓱᓯᐅᑉ ᓂᕕᐊᕐᓵᑉ ᐊᒡᒐᖏᑦ ᑎᒍᓪᓗᒋᑦ ᓂᓪᓕᕐᓗᓂ ᐅᖃᐅᑎᕚ, “ᓂᕕᐊᕐᓵᖅ ᒪᑭᑦᑎᑦ!” 55 ᐊᓂᕐᓂᖓᑕ ᐅᑎᕐᕕᒋᕚ, ᑕᕝᕔᓐᓇᖅ ᒪᑭᓪᓗᓂ; ᔩᓱᓯᐅᑉ ᓂᕆᑎᑕᐅᖁᓕᕐᐹ. 56 ᐊᖓᔪᖅᑳᖏᑦ ᐊᖏᔪᒥᒃ ᑲᒪᕘᒃ; ᔩᓱᓯᐅᓪᓕ ᓇᓪᓕᐊᓐᓄᓪᓘᓐᓃᑦ ᑕᒪᓐᓇ ᐅᖃᐅᓯᐅᖁᓐᖏᓛ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society