ᓘᑲᓯᐅᑉ ᐊᒡᓚᖏᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯᐅᑉ ᕾᖁᔨᓂᖓ ᓯᕗᓪᓕᕐᐹᓂᒃ ᐃᓕᓐᓂᐊᕐᑎᒃᓴᒥᓂᒃ

¹ ᐅᓪᓗᐃᑦ ᐃᓚᖓᓐᓂᒃ ᔩᓱᓯ ᑕᓯᐅᑉ ᒋᓂᓴᕇᑎᐅᑉ ᓯᓈᓂ ᓇᖏᕐᑎᓪᓗᒍ, ᐃᓄᐃᑦ ᐃᓂᖃᕈᓐᓃᕐᑎᓕᕐᐹᑦ ᐃᒪᐅᑉ ᑭᒡᓕᖓᓂ, ᑐᓴᕈᒪᓪᓗᑎᒃ ᒎᑎᐅᑉ ᐅᖃᐅᓯᖏᓐᓂᒃ.

² ᐅᒥᐊᖕᓂᒃ ᒪᕐᕉᖕᓂᒃ ᑕᑯᒐᒥ ᓄᓇᒧᑦ ᑐᓚᒃᑑᖕᓂᒃ, ᐃᓄᖏᑦ ᐃᖃᓗᒃᓯᐅᕐᑏᑦ ᓄᓇᒧᑦ ᓂᐅᓪᓗᑎᒃ ᓄᓗᐊᒥᖕᓂᒃ ᐃᕐᕈᕐᑐᐃᓕᕐᑐᓂᒃ.

³ ᔩᓱᓯ ᐅᒥᐊᑉ ᐂᑉᐸᖓᓄᑦ ᐃᑭᕗᖅ, ᓮᒨᓂᐅᑉ ᐅᒥᐊᖓᓄᑦ, ᐅᒥᐊᖅ ᓵᕕᒋᐊᒃᑲᓐᓂᖁᕚ, ᖄᖓᓄᑦ ᐃᖏᓪᓗᓂ ᐃᓄᐃᑦ ᐊᔪᕆᕐᑐᕐᐰᑦ ᐅᒥᐊᒥᑦ.

⁴ ᐅᖃᓪᓚᒌᕋᒥ ᓮᒨᓂ ᐅᖃᐅᑎᕚ, “ᐃᑎᔪᒧᐊᕆᐊᑲᓐᓂᕐᓗᓯ ᐃᖃᓗᒃᓯᐅᖃᑎᑎᓪᓗ ᓄᓗᐊᓕᓚᐅᕆᑦᓯ ᐃᖃᓗᒐᓱᒃᓗᓯ.”

⁵ ᓮᒨᓂᐅᑉ ᑭᐅᕚ, “ᐊᔪᕆᕐᑐᐃᔩ, ᐅᓐᓄᐊᓕᒫᖅ ᐃᖃᓗᒐᓱᓚᐅᕋᓗᐊᕐᐳᒍᑦ ᐃᖃᓗᓚᐅᕋᑕᓗ! ᐅᖃᐅᓰᓪᓕ ᒪᓕᒡᓗᒍ ᓄᓗᑦᔨᕐᓂᐊᕐᐳᖓ.”

⁶ ᓄᓗᑦᔨᕋᒥᒃ; ᐅᓄᕐᑐᐊᓗᖕᓂᒃ ᐃᖃᓗᒃᐳᑦ, ᓄᓗᐊᖏᑦ ᐊᒡᓛᑦ ᐊᓕᖕᓂᐅᓴᓕᕐᓗᑎᒃ,

⁷ ᐅᒥᐊᖑᖃᑎᑎᒃ ᓄᓗᕋᕐᐰᑦ ᐃᑲᔪᕆᐊᕐᑕᐅᔪᒪᓪᓗᑎᒃ. ᕾᖕᒪᑕ ᐅᒥᐊᒃ ᐊᑐᓂᑦ ᐅᓯᓕᕐᓱᕐᐹᑦ ᐅᓯᑦᑐᕐᓗᒋᒃ ᐅᒥᐊᖏᑦ ᑭᕕᓂᐅᓴᓕᕐᓗᑎᒃ.

⁸ ᓮᒨᓂ ᐲᑦᑐᕉᓯ ᑕᒪᑐᒥᖓ ᑕᑯᒐᒥ, ᔩᓱᓯᐅᑉ ᓵᖓᓄᑦ ᓰᖅᑯᕐᐳᖅ, ᐅᖃᕐᓗᓂ, “ᕿᒪᓚᐅᓐᖓ ᐊᑕᓃᖅ ᐱᐅᖏᑦᑐᐊᓘᒐᒪ.”

⁹ ᓮᒨᓂ ᐃᓚᒋᔭᓕᒫᖏᓪᓗ ᑲᒪᔪᐊᓘᕗᑦ, ᐃᖃᓗᒃᑕᑎᒃ ᐅᓄᕐᑐᐊᓘᓂᖏᑦ ᐱᑦᔪᑎᒋᓪᓗᒋᑦ;

¹⁰ ᑍᒤᓚᐅᕆᕗᑦ ᐃᓚᒋᔭᖏᑦ ᔧᒥᓯ ᔪᐊᓇᓯᓗ, ᓯᐱᑎᐅᑉ ᐃᕐᓂᖏᒃ, ᔩᓱᓯᐅᑉ ᓮᒨᓂ ᐅᖃᐅᑎᕚ, “ᑲᑉᐱᐊᓱᖕᓇᒃ; ᒫᓐᓇᒥᑦ ᐱᒋᐊᕐᓗᑎᑦ ᐃᓄᖕᓂᒃ ᐃᖃᓗᒃᓯᐅᕐᑎᐅᓂᐊᓕᕐᐳᑎᑦ.”

¹¹ ᐅᒥᐊᑎᒃ ᑐᓚᒃᑎᓐᓇᒥᒋᑦ ᓄᓇᒧᑦ, ᓱᓇᓕᒫᑎᒃ ᐃᐸᕅᓐᓇᕐᓗᒋᑦ ᔩᓱᓯ ᒪᓕᓕᕐᐹᑦ.

ᔩᓱᓯᐅᑉ ᐋᖅᑭᒃᓯᓂᖓ ᐊᖑᒻᒥᒃ

¹² ᓄᓇᓕᖕᓃᑎᓪᓗᒍ ᔩᓱᓯ, ᐊᖑᒻᒥᒃ ᕾᔪᖃᕐᐳᖅ ᑲᑉᐱᐊᒋᔭᐅᔪᒥᒃ ᐸᕐᑎᕐᑐᒥᒃ; ᑖᑦᓱᒪ ᔩᓱᓯ ᑕᑯᒐᒥᐅᒃ ᓵᖓᓄᑦ ᐹᒻᒪᒃᐳᖅ, ᕿᓄᕕᒋᓪᓗᒍᓗ, “ᐊᑕᓃᖅ ᐱᔪᒪᒍᕕᑦ, ᓴᓗᒻᒪᕈᓐᓇᕋᓗᐊᕐᐸᕐᒪ.”

¹³ ᔩᓱᓯ ᐃᓴᒃᓗᓂ ᐊᒃᑐᕐᐹ, ᐅᖃᐅᑎᓪᓗᒍ, “ᐱᔪᒪᕗᖓ; ᓴᓗᒻᒪᓕᕆᑦ,” ᑕᕝᕔᓐᓇᖅ ᐸᕐᑎᕈᓐᓃᕐᐳᖅ.

¹⁴ ᐃᓂᕐᑎᕐᐹ, ᑭᓇᑐᐃᓐᓇᕐᒧᑦ ᐅᖃᖁᓇᒍ; ᐅᖃᐅᑎᓪᓗᒍ, “ᑐᓂᕐᕈᓯᕐᑎᑦᓯᔨᒧᑦ ᐂᓕᕆᑦ ᖃᐅᔨᓴᕐᓂᐊᕐᒪᑎᑦ, ᑐᓂᕐᕈᑎᒃᓴᒥᒡᓗ ᐋᖅᑭᒃᑕᐅᓂᕐᓄᑦ ᑐᓂᕐᕈᓯᓗᑎᑦ, ᒨᓯᓯᐅᑉ ᐱᖁᔨᓂᖓ ᒪᓕᒡᓗᒍ, ᐃᓄᖕᓄᑦ ᖃᐅᔨᑦᔪᑕᐅᖁᓪᓗᒍ ᐋᖅᑭᒃᑕᐅᓂᕐᓂᒃ.”

¹⁵ ᐊᖏᓂᕐᓴᒥᒡᓕ ᑐᓴᐅᒪᔭᐅᓕᕐᐳᖅ ᐅᖓᓯᒃᑐᒥᑦ ᐊᒡᓛᑦ; ᐃᓄᒐᓴᒡᔪᐊᓪᓗ ᐊᒥᓱᑦ ᕾᕗᑦ ᑐᓴᕈᒪᓪᓗᑎᒃ ᐋᖅᑭᒃᑕᐅᔪᒪᓪᓗᑎᒃᓗ ᐋᓐᓂᐊᒥᖕᓂᑦ.

¹⁶ ᔩᓱᓯᓕ ᑖᒃᑯᓇᓐᖓᑦ ᕿᒪᕉᑎᕗᖅ ᐃᓄᖃᖏᑦᑐᒧᑦ ᑐᒃᓯᐊᕈᒪᓪᓗᓂ.

ᔩᓱᓯᐅᑉ ᐋᖅᑭᒃᓯᓂᖓ ᓄᑭᖃᖏᑦᑐᒥᒃ

¹⁷ ᐅᓪᓗᐃᑦ ᑖᒃᑯᐊ ᐃᓚᖓᓐᓂ, ᔩᓱᓯ ᐊᔪᕆᕐᑐᐃᑎᓪᓗᒍ, ᐹᕆᓯᑦ ᐱᖁᔭᓂᒡᓗ ᐃᓕᓮᔩᑦ ᑕᕝᕙᓃᖃᑕᐅᓚᐅᕆᕗᑦ, ᑕᕝᕗᓐᖓᕐᓯᒪᓪᓗᑎᒃ ᓄᓇᓕᖕᓂᑦ ᒐᓕᓕᐊᒦᑦᑐᓕᒫᓂᑦ, ᔫᑎᐊᒥᓪᓗ, ᔨᕉᓴᓕᒻᒥᓪᓗ; ᐊᑕᓂᐅᑉ ᐱᔪᓐᓇᕐᓂᖓ ᓇᔫᑎᖕᒪᑦ ᑖᑦᓱᒪᓂ, ᖃᓂᒪᔪᑦ ᐋᖅᑭᒃᑕᐅᓚᐅᕐᐳᑦ.

¹⁸ ᐃᓄᐃᓪᓗ ᑕᕝᕗᓐᖓᐅᑦᔨᕗᑦ ᐊᖑᒻᒥᒃ ᓄᑭᖃᖏᑦᑐᒥᒃ ᐃᒡᓕᕐᒦᑎᓪᓗᒍ ᐊᑭᕋᕐᑕᐅᔪᒥᒃ, ᑖᓐᓇ ᐃᒡᓗᒧᑦ ᐃᑎᕈᒪᒐᓗᐊᕐᐹᑦ ᔩᓱᓯᒧᐊᕈᒪᓪᓗᒍ.

¹⁹ ᐃᓄᒋᐊᓗᐊᕐᓂᖓᓄᓪᓕ ᐃᑎᕈᓐᓇᖏᓐᓇᒥᒃ, ᐃᒡᓘᑉ ᖄᖓᓄᐊᕈᑎᕚᑦ, ᐃᒡᓗ ᖁᓛᒍᑦ ᐊᖕᒪᕐᓗᒍ ᓂᖏᑎᑉᐹᑦ ᐃᓄᐃᑦ ᐊᑯᕐᖓᓐᓄᑦ, ᔩᓱᓯᐅᑉ ᓵᖓᓄᑦ.

²⁰ ᖃᐅᔨᒐᒥ ᑖᒃᑯᐊ ᐅᒃᐱᕐᓂᖃᕐᒪᑕ, ᐊᖑᑦ ᓇᓚᔪᖅ ᐅᖃᐅᑎᕚ, “ᐃᓚᓐᓈᒃ, ᐱᐅᖏᑦᑐᓕᓂᑎᑦ ᐃᓱᒪᒋᔭᐅᔪᓐᓁᕐᐳᑦ.”

²¹ ᑕᕝᕙ ᐱᖁᔭᓂᒃ ᐃᓕᓮᔩᑦ ᐹᕆᓯᓪᓗ, ᐊᐱᕆᓕᕐᐳᑦ, ᐅᖃᕐᓗᑎᒃ, “ᓱᖕᒪᓄᓇ ᒎᑎᒥᒃ ᐅᖃᕐᓂᕐᓘᑎᖃᕐᐹ? ᒎᑎ ᑭᓯᒥ ᐱᐅᖏᑦᑐᓕᓂᕐᓂᒃ ᐃᓱᒪᒋᔪᓐᓁᕐᓯᔪᓐᓇᕐᑐᑑᕗᖅ.”

²² ᔩᓱᓯᐅᑉ ᐊᐱᕐᓲᑎᒋᔭᖏᑦ ᖃᐅᔨᒐᒥᒋᑦ ᐅᖃᐅᑎᕔᑦ, “ᓱᖕᒪᑦ ᑍᒫᒃ ᐆᒻᒪᑎᑦᓯᓐᓂ ᐊᐱᕐᓲᑎᖃᕐᐱᓰ?

²³ ᓇᓪᓕᐊᑦ ᐱᔭᕆᐊᑭᓐᓂᕐᓴᐅᕚ ᐅᖃᕈᒪ, ‘ᐱᐅᖏᑦᑐᓕᓂᑎᑦ ᐃᓱᒪᒋᔭᐅᔪᓐᓁᕐᐳᑦ,’ ᐅᕝᕙᓘᓐᓃᑦ ᐅᖃᕈᒪ, ‘ᒪᑭᓪᓗᑎᑦ ᐱᓱᓕᕆᑦ?’

²⁴ ᖃᐅᔨᖁᓪᓗᓯ ᐃᓅᑉ ᐃᕐᓂᖓ ᐱᔪᓐᓇᕐᓂᖃᕐᒪᑦ ᓄᓇᕐᔪᐊᕐᒥ ᐱᐅᖏᑦᑐᓕᓃᑦ ᐃᓱᒪᒋᔪᓐᓁᕐᓗᒋᑦ.” ᓄᑭᖃᖏᑦᑐᒧᑦ ᐅᖃᕐᐳᖅ, “ᐅᖃᐅᑎᕙᒋᑦ ᒪᑭᑦᑎᑦ, ᓇᓪᓚᖓᕖᑦ ᑎᒍᓗᒍ, ᐊᖏᕐᕋᓕᕆᑦ.”

²⁵ ᑕᕝᕔᓐᓇᖅ ᒪᑭᑉᐳᖅ ᐃᓄᐃᑦ ᑕᒃᑯᐊᓂ, ᓇᓚᕕᒋᔭᓂ ᑎᒍᓪᓗᒍ ᐊᖏᕐᕋᓕᕐᐳᖅ, ᒎᑎ ᓂᕐᑐᕐᓗᒍ.

²⁶ ᑕᕝᕙᓃᑦᑐᓕᒫᑦ ᑲᒪᒻᒪᕆᓕᕐᐳᑦ, ᑲᑉᐱᐊᓱᒡᓗᑎᒃ, ᒎᑎ ᓂᕐᑐᕐᓗᒍ ᐅᖃᕐᐳᑦ, “ᐅᓪᓗᒥ ᑕᑯᓚᐅᕐᓯᒪᓐᖏᑕᑦᑎᓐᓂᒃ ᑕᑯᕗᒍᑦ.”

ᔩᓱᓯᐅᑉ ᕾᖁᔨᓂᖓ ᓕᕔᒥᒃ

²⁷ ᑕᒪᑐᒪ ᑭᖑᕐᖓᒍᑦ ᔩᓱᓯ ᐊᓂᕗᖅ, ᑕᑯᓪᓗᓂᓗ ᕉᒪᒥᐅᑦ ᑮᓇᐅᔧᕐᑎᑦᓯᔨᖁᑎᖓᓂᒃ, ᓕᕔᒥᒃ ᐊᑎᓕᖕᒥᒃ, ᑮᓇᐅᔧᕐᑎᑦᓯᕕᖕᒥ ᐃᒃᓯᕙᔪᒥᒃ; ᔩᓱᓯᐅᑉ ᐅᖃᐅᑎᕚ, “ᒪᓕᓐᖓ.”

²⁸ ᓕᕔ ᓂᑯᕕᑉᐳᖅ, ᓱᓇᓕᒫᑦ ᕿᒪᒡᓗᒋᑦ, ᔩᓱᓯ ᒪᓕᒃᓴᕐᐹ.

²⁹ ᓕᕔ ᐃᒡᓗᒥᓂ ᓂᕆᕕᒡᔪᐊᕐᑎᑦᓯᕗᖅ ᔩᓱᓯ ᓂᕆᔭᕐᑐᖁᓪᓗᒍ; ᕉᒪᒥᐅᓪᓗ ᑮᓇᐅᔧᕐᑎᑦᓯᔨᖁᑎᖏᑦ ᐊᒥᓱᑦ, ᐃᓄᐃᓪᓗ ᐊᓯᖏᑦ ᑕᕝᕙᓂ ᓂᕆᔭᕐᑐᕐᓯᒪᕗᑦ.

³⁰ ᐹᕆᓯᑦ ᐱᖁᔭᓂᒡᓗ ᐃᓕᓮᔩᑦ ᑕᕝᕙᓃᑦᑐᑦ ᔩᓱᓯᐅᑉ ᐃᓕᓐᓂᐊᕐᑎᖏᓐᓄᑦ ᓈᒻᒪᒃᓴᕋᑎᒃ ᐅᖃᕐᐳᑦ, “ᓱᖕᒪᑦ ᕉᒪᒥᐅᑦ ᑮᓇᐅᔧᕐᑎᑦᓯᔨᖁᑎᖏᑦ ᐱᐅᖏᑦᑐᓕᔪᓪᓗ ᓂᕆᖃᑎᒋᕕᓯᐅᒃ?”

³¹ ᔩᓱᓯᐅᑉ ᑭᐅᕔᑦ, “ᐃᓄᐃᑦ ᐋᓐᓂᐊᖏᑦᑐᑦ ᐋᓐᓂᐊᓯᐅᑎᒥᑦ ᑲᒪᒋᔭᐅᔭᕆᐊᖃᓐᖏᓚᑦ, ᖃᓂᒪᔪᓪᓕ ᑭᓯᒥ;

³² ᐃᓗᐊᕐᑐᑦ ᕾᖁᔭᕐᑐᕐᓯᒪᓐᖏᓚᒃᑲ, ᐱᐅᖏᑦᑐᓕᔪᓪᓕ ᕾᖁᔭᕐᑐᕐᐸᒃᑲ ᓵᒋᐊᖁᓪᓗᒋᑦ.”

ᔩᓱᓯᐅᑉ ᐊᔪᕆᕐᑐᐃᓂᖓ ᓂᕆᑦᑍᓕᓂᕐᒥᒃ

³³ ᑖᒃᑯᐊ ᔩᓱᓯᒧᑦ ᐅᖃᕐᐳᑦ, “ᔪᐊᓇᓯᐅᑉ ᐃᓕᓐᓂᐊᕐᑎᖏᑦ ᓂᕆᑦᑍᓕᕙᒃᐳᑦ ᐊᑯᓔᑦᑐᒥᒃ ᑐᒃᓯᐊᕐᓗᑎᒃ, ᐹᕆᓯᓪᓗ ᐃᓕᓐᓂᐊᕐᑎᖏᑦ ᑍᒤᑉᐸᒃᑭᕗᑦ, ᐃᓕᓐᓂᐊᕐᑎᑎᓪᓕ ᓂᕆᕗᑦ ᐃᒥᕐᓗᑎᒡᓗ.”

³⁴ ᔩᓱᓯᐅᑉ ᐅᖃᐅᑎᕔᑦ, “ᑲᑎᑎᑕᐅᔪᓄᑦ ᓂᕆᔭᕐᑐᕐᓯᒪᔪᑦ ᓂᕆᑦᑍᓕᑎᑦᓱᓐᓇᕐᐱᓯᐅᒃ? ᐅᐃᒃᓴᖅ ᑕᕝᕙᓃᑦᑎᓪᓗᒍ?

³⁵ ᐅᓪᓗᐃᑦ ᓇᓪᓕᐅᑎᔪᒫᕐᐳᑦ ᐅᐃᒃᓴᒥᒃ ᐊᕐᓵᕐᑕᐅᕕᖓᑦ, ᑕᕝᕙ ᑕᒪᓐᓇ ᓇᓪᓕᐅᑎᒃᐸᑦ ᓂᕆᑦᑍᓕᓕᕈᒫᕐᐳᑦ.”

³⁶ ᐊᑦᔨᐅᔪᒥᒃ ᐅᖃᐅᑎᕔᑦ: “ᐊᓕᒃᓯᔪᖃᕐᐸᓐᖏᓚᖅ ᐊᓐᓄᕌᒥᒃ ᓄᑖᒥᒃ, ᐊᓐᓄᕌᑐᖃᕐᒧᓪᓗ ᐃᓚᓕᐅᑎᓗᒍ; ᑍᒤᒃᑯᓂ, ᐊᓐᓄᕌᖅ ᓄᑖᖅ ᓱᕋᑐᐃᓐᓇᕐᓂᐊᕐᐹ, ᑖᓐᓇ ᐊᓐᓄᕌᑉ ᓄᑖᑉ ᐃᓚᖓ ᐊᓐᓄᕌᑐᖃᐅᑉ ᐊᑦᔨᒋᓕᕈᓐᓇᖏᒻᒪᒍ.

³⁷ ᐅᐂᓂᒥᒃ ᓄᑖᒥᒃ ᐃᒻᒥᕐᓱᐃᔪᖃᕐᐸᓐᖏᓚᖅ ᐅᒪᔪᕕᓂᐅᑉ ᐊᒥᖓᓄᑦ ᐅᐂᓂᖃᐅᑎᑐᖃᕐᓄᑦ; ᑍᒤᒃᑯᓂ, ᐊᒥᖅ ᐅᐂᓂᖃᐅᑎᑐᖃᖅ ᖄᕐᓂᐊᕐᐳᖅ, ᐅᐂᓂ ᑯᕕᓗᓂ, ᐅᐂᓂᖃᐅᑎᓗ ᐊᓯᕈᕐᑕᐅᒐᔭᕐᐳᖅ.

³⁸ ᐅᐂᓂᓕ ᓄᑖᖅ ᐊᒥᕐᒧᑦ ᓄᑖᒧᑦ ᐃᒻᒥᕐᓲᑎᔭᐅᔪᒃᓴᐅᕗᖅ.

³⁹ ᐅᐂᓂᑐᖃᕐᒥᒃ ᐱᕙᒃᑐᑦ ᓄᑖᒥᒃ ᐅᐂᓂᒥᒃ ᐱᔪᒪᕙᓐᖏᓚᑦ; ᐅᖃᕐᐸᒡᓗᑎᒃ, ‘ᐱᑐᖃᖅ ᒪᒪᕐᓂᕐᓴᐅᕗᖅ.’”