ᓘᑲᓯᐅᑉ ᐊᒡᓚᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯᐅᑉ ᐱᔪᒥᓵᕐᑕᐅᓂᖓ

¹ ᔩᓱᓯ ᔪᐊᕐᑕᓂᒥᑦ ᐅᑎᓕᕐᑎᓪᓗᒍ, ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐃᓗᒻᒥᕐᑕᐅᓯᒪᓪᓗᓂ, ᐊᓂᕐᓂᐅᑉ ᐃᑦᔪᕐᓁᑦᑑᑉ ᑕᓯᐅᕐᐹ ᐃᓄᖃᖏᑦᑐᒧᑦ,

² ᐅᓪᓗᓂᒃ 40ᓂᒃ ᐃᓄᖃᖏᑦᑐᒥ ᓵᑖᓇᓯᐅᑉ ᐆᒃᑐᕐᓗᒍ ᐱᔪᒥᓵᕐᐹ. ᑖᒃᑯᓇᓂ ᐅᓪᓗᓂ ᓂᕆᓚᐅᓐᖏᓚᖅ; ᐅᓪᓗᐃᑦ ᑖᒃᑯᐊ ᓈᖕᒪᑕ, ᑳᓕᕐᐳᖅ.

³ ᑕᕝᕙ ᓵᑖᓇᓯᐅᑉ ᐅᖃᐅᑎᕚ, “ᒎᑎᐅᑉ ᐃᕐᓂᕆᒃᐸᑎᑦ, ᐅᓇ ᐅᔭᕋᒃ ᓂᐊᖂᔭᓐᖑᖁᓚᐅᕈᒃ.”

⁴ ᔩᓱᓯᐅᑉ ᑭᐅᕚ, “ᐊᒡᓚᖕᓂ ᑎᑎᕋᕐᓯᒪᕗᖅ, ‘ᐃᓄᒃ ᓂᐊᖂᔭᒥᑐᐃᓐᓇᖅ ᐃᓅᑦᔪᑎᖃᓐᖏᓚᖅ.’”

⁵ ᑕᕝᕙ ᓵᑖᓇᓯᐅᑉ ᐳᕐᑐᔪᒧᐊᕐᑎᑉᐹ, ᑕᑯᑎᓪᓗᒍ ᓯᓚᕐᔪᐊᕐᒥ ᐊᖓᔪᖅᑲᐅᕕᓕᒫᓂᒃ ᐃᔨᐅᑉ ᓯᑯᓐᖏᓪᓚᖕᓂᖓᑐᑦ ᕿᓚᒻᒥᐅᑎᒋᔪᒥᒃ,

⁶ ᓵᑖᓇᓯᐅᑉ ᐅᖃᐅᑎᕚ, “ᐊᖓᔪᖅᑲᐅᓂᓕᒫᑦ ᑕᒪᒃᑯᐊ ᓂᕐᑐᕐᓇᕐᓂᖏᓪᓗ ᐃᓕᖕᓄᑦ ᑐᓂᓂᐊᕐᐸᒃᑲ, ᐅᕙᓐᓄᑦ ᑐᓂᔭᐅᓯᒪᔪᑦ, ᐃᓱᒪᓐᓂᒃ ᑐᓂᔪᓐᓇᕐᐸᒃᑲ ᑐᓂᓯᕕᒋᔪᒪᔭᓐᓄᑦ.

⁷ ᑕᒪᒃᑯᐊ ᑕᒪᕐᒥᒃ ᐱᑖᕆᓂᐊᕐᐸᑎᑦ, ᑐᒃᓯᐊᕐᕕᒋᒍᕕᖓ.”

⁸ ᔩᓱᓯᐅᑉ ᑭᐅᕚ, “ᐊᒡᓚᖕᓂ ᑎᑎᕋᕐᓯᒪᕗᖅ, ‘ᐊᑕᓂᖅ ᒎᑎᒋᔧᑦ ᑐᒃᓯᐊᕐᕕᒋᔭᒃᓴᕆᕙᑦ, ᑖᓐᓇᑐᐊᕐᓗ ᐱᔨᑦᓯᕐᑕᒃᓴᕆᕙᑦ.’”

⁹ ᓵᑖᓇᓯᐅᑉ ᔩᓱᓯ ᔨᕉᓴᓕᒻᒧᐊᕈᑎᕚ, ᑐᒃᓯᐊᕐᕕᒡᔪᐊᑉ ᐳᕐᑐᓂᕐᐹᖓᓄᐊᕐᑎᐹ, ᐅᖃᐅᑎᓪᓗᒍ, “ᒎᑎᐅᑉ ᐃᕐᓂᕆᒃᐸᑎᑦ, ᑕᒫᓐᖓᑦ ᐃᓕᖕᓂᒃ ᑲᑕᒃᑎᓚᐅᕆᑦ ᐅᓄᖓ;

¹⁰ ᐊᒡᓚᖕᓂ ᑎᑎᕋᕐᓯᒪᖕᒪᑦ, ‘ᒎᑎᐅᑉ ᐂᖏᓕᖁᑎᓂ ᑎᓕᔪᒫᕐᐰᑦ, ᓴᐳᑎᔭᐅᖁᓪᓗᑎᑦ,’

¹¹ ᐊᒻᒪᓗ, ‘ᑎᒍᒥᐊᕐᑕᐅᓂᐊᕐᐳᑎᑦ ᐃᑎᒐᑎᑦ ᐋᓐᓂᖁᓇᒋᑦ ᐅᔭᖅᑲᓄᑦ.’”

¹² ᔩᓱᓯᐅᑉ ᑭᐅᕚ, “ᐊᒡᓚᖕᓂ ᐅᖃᕐᓯᒪᕗᖅ, ‘ᒎᑎᖕᓂᒃ ᐊᑕᓂᕐᓂᒃ ᐱᔪᒥᓵᕆᔪᒃᓴᐅᓐᖏᓚᑎᑦ.’”

¹³ ᓵᑖᓇᓯᐅᑉ ᐱᔪᒥᓵᕆᑦᔪᑎᓂ ᐃᓱᓕᒃᑲᒥᒋᑦ, ᔩᓱᓯᒥᑦ ᕿᒪᕉᑎᕗᖅ ᐱᕕᒃᓴᒥᓂᒃ ᐅᑕᖅᑭᓕᕆᓪᓗᓂ.

ᔩᓱᓯᐅᑉ ᐱᓇᓱᐊᓯᒋᐊᕐᓂᖓ ᒐᓕᓕᐊᒥ

¹⁴ ᔩᓱᓯ ᐅᑎᕐᐳᖅ ᒐᓕᓕᐊᒧᑦ ᐊᓂᕐᓂᐅᑉ ᐃᑦᔪᕐᓁᑦᑑᑉ ᐱᔪᓐᓇᕐᓂᖓᑕ ᓇᔪᕐᓗᓂᐅᒃ, ᐅᖃᐅᓯᐅᓂᖓ ᒐᓕᓕᐊᑉ ᖃᓂᒋᔭᖓᓃᑦᑐᓕᒫᓄᑦ ᑐᓴᐅᒪᔭᐅᓕᕐᐳᖅ.

¹⁵ ᐊᔪᕆᕐᑐᐃᓪᓗᓂ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ, ᖁᕕᐊᒋᔭᐅᒻᒪᕆᒃᐳᖅ ᐃᓄᓕᒫᓄᑦ.

ᔩᓱᓯᐅᑉ ᓇᕐᕈᒋᔭᐅᓂᖓ ᓈᓴᕇᑎᒥ

¹⁶ ᑭᖑᕐᖓᒍᑦ ᔩᓱᓯ ᓈᓴᕇᑎᒧᐊᕐᐳᖅ, ᐱᕈᕐᓴᕕᒋᓚᐅᕐᑕᒥᓄᑦ; ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓄᐊᕐᐳᖅ, ᐃᓕᖅᑯᓯᕆᕙᒃᑕᒥᑐᑦ ᓴᐸᑎᐅᑎᓪᓗᒍ, ᓂᑯᕕᑉᐳᖅ ᐊᑐᐊᕐᓯᓂᐊᓕᕋᒥ ᐊᒡᓚᖕᓂᒃ;

¹⁷ ᑐᓂᓯᕕᐅᒐᒥ ᓇᓚᐅᑦᑍᔪᑉ ᐂᓮᐊᓯᐅᑉ ᐊᒡᓚᖏᓐᓂᒃ. ᒪᒃᐱᕋᒥᒋᑦ ᐃᒫᒃ ᐊᒡᓚᒃᓯᒪᔪᑦ ᐅᖃᓕᒫᕐᐰᑦ,

¹⁸ “ᐊᑕᓂᐅᑉ ᐊᓂᕐᓂᖓᑕ ᓇᔪᕐᐹᖓ, ᓂᕈᐊᓚᐅᕐᐹᖓ ᐊᔪᕆᕐᑐᐃᖁᓪᓗᖓ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐊᒃᖢᔪᓄᑦ. ᑎᓕᕚᖓᓗ ᐅᖃᐅᑦᔨᖁᓪᓗᖓ ᑎᒍᔭᐅᓯᒪᔪᑦ ᐊᓂᑎᑕᐅᖁᓪᓗᒋᑦ, ᑕᐅᑐᖏᑦᑐᑦ ᑕᐅᑐᓕᕐᑎᑕᐅᖁᓪᓗᒋᑦ, ᓵᓚᒋᔭᐅᓯᒪᔪᓪᓗ ᕿᓚᕈᑦᔮᕐᑕᐅᖁᓪᓗᒋᑦ,

¹⁹ ᐅᖃᐅᑦᔨᖁᓪᓗᖓ ᐊᑕᓂᐅᑉ ᐱᐅᓕᓯᕕᒋᔪᒪᔭᓐᖓᑕ ᐊᕐᕌᒍᖓ ᓇᓪᓕᐅᑎᖕᒪᑦ.”

²⁰ ᔩᓱᓯᐅᑉ ᐅᖃᓕᒫᕐᑕᓂ ᐃᒧᒐᒥᒋᑦ, ᐅᑎᕐᑎᑉᐰᑦ ᑲᒪᔨᒧᑦ, ᐊᔪᕆᕐᑐᐃᕕᖕᒧᑦ ᐃᖏᓪᓗᓂ; ᑕᕝᕙᓃᑦᑐᓕᒫᑦ ᑕᑯᓐᓇᓕᕐᐹᑦ.

²¹ ᐅᖃᕐᕕᒋᓕᕐᐰᑦ, “ᐅᓪᓗᒥ ᐅᑯᐊ ᐊᒡᓔᑦ ᑐᓴᕐᑕᓯ ᓇᓪᓕᐅᑎᕗᑦ.”

²² ᐊᔪᖏᓐᓂᖓ ᐅᖃᐅᓯᕆᕚᑦ, ᑲᒪᓪᓗᑎᒃ ᐅᖃᕈᓐᓇᑦᓯᐊᕐᓂᖓᓂᒃ; ᐅᖃᕐᓗᑎᒃ, “ᐅᓇ ᔫᓯᐱᐅᑉ ᐃᕐᓂᕆᓐᖏᓚᐅᒃ?”

²³ ᔩᓱᓯᐅᑉ ᐅᖃᐅᑎᕔᑦ, “ᓇᓗᓇᓐᖏᓚᖅ ᐃᒫᒃ ᐅᖃᐅᓯᑐᖃᕐᒥᒃ ᐅᖃᐅᑎᔪᒪᓂᐊᕋᑦᓯᓐᖓ, ‘ᐋᓐᓂᐊᓯᐅᕐᑏ ᐃᓕᖕᓂᒃ ᐋᖅᑭᓚᐅᕆᑦ; ᑐᓴᕐᓯᒪᔭᑦᑎᓐᓂᒃ ᑲᐲᕐᓂᐊᒥ ᐱᓂᐊᕐᓂᕆᓚᐅᕐᑕᕐᓂᒃ, ᐅᕙᓂ ᓈᓴᕇᑎᒥ ᐱᓇᓱᐊᓚᐅᕆᑦᑕᐅᖅ.’”

²⁴ ᐃᒫᒡᓗ ᐅᖃᕆᕗᖅ, “ᓱᓕᔪᒥᒃ ᐅᖃᐅᑎᕙᑦᓯ, ᓇᓚᐅᑦᑍᔪᒥᒃ ᐃᓚᓕᐅᕐᑕᐅᔪᖃᓚᐅᕐᓯᒪᓐᖏᓚᖅ ᐱᕈᕐᓴᕕᕕᓂᕐᒥᓂ.

²⁵ ᓱᓕᔪᒥᒃ ᐅᖃᐅᑎᕙᑦᓯ, ᐊᒥᓱᓂᒃ ᐅᐃᒡᒐᕐᓂᕐᑕᖃᓚᐅᕐᐳᖅ ᐃᓴᕆᐊᓕᒥᐅᓂ ᐃᓔᑦᔭ ᐃᓅᑎᓪᓗᒍ, ᑍᑦᓱᒪᓂ ᓯᓚᓗᓚᐅᖏᒻᒪᑦ ᐊᕐᕌᒍᓂᒃ ᐱᖓᓱᓂᒃ, ᑕᖅᑭᓂᒡᓗ ᐱᖓᓲᔪᕐᑐᓂᒃ, ᑳᖕᓇᕐᑐᕐᔪᐊᖃᓕᓚᐅᕐᐳᖅ ᓄᓇᓕᒫᒥ;

²⁶ ᐃᓔᑦᔭ ᐃᓴᕆᐊᓕᒥᐅᑦ ᓇᓪᓕᐊᓐᓄᑦ ᑎᓕᔭᐅᓚᐅᓐᖏᓚᖅ ᓄᓇᓕᖕᒧᓪᓕ ᐊᑕᐅᓯᕐᒧᑦ ᑎᓕᔭᐅᓚᐅᕐᐳᖅ ᔨᕆᐹᑎᒧᑦ, ᓮᑐᓂᒦᑦᑐᒧᑦ, ᐊᕐᓇᒧᑦ ᐅᐃᒡᒐᕐᓂᕐᒧᑦ.

²⁷ ᐊᒥᓱᑦ ᑲᑉᐱᐊᒋᔭᐅᔪᒥᒃ ᐸᕐᑎᓚᐅᕐᐳᑦ ᐃᓴᕆᐊᓕᒥᐅᑦ ᓄᓇᖓᓂ ᓇᓚᐅᑦᑍᔪᖅ ᐃᓔᓴ ᐃᓅᑎᓪᓗᒍ; ᓇᓪᓕᐊᓐᓂᒡᓘᓐᓃᑦ ᐋᖅᑭᒃᑕᐅᔪᖃᓚᐅᓐᖏᓚᖅ, ᓁᒪᓐᓕ ᓯᕆᐊᒥᐅᖅ ᑭᓯᒥ ᐋᖅᑭᒃᑕᐅᔪᑑᓚᐅᕐᐳᖅ.”

²⁸ ᐃᓄᐃᑦ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓃᑦᑐᑦ ᑕᒪᑐᒥᖓ ᑐᓴᕋᒥᒃ ᓂᓐᖓᒃᐳᑦ.

²⁹ ᓂᑯᕕᓐᓇᒥᒃ ᔩᓱᓯ ᑎᒍᓪᓗᒍ ᑕᓯᐅᕐᐹᑦ, ᓄᓇᓕᖕᓂᑦ ᑕᕝᕙᓐᖓᑦ ᐃᓐᓈᕈᕐᒧᐊᕈᑎᓪᓗᒍ, ᑕᕝᕙᓐᖓᑦ ᐃᔪᒃᑲᕐᑎᑦᓱᒪᓪᓗᒍ, ᐃᒡᓗᒐᓴᖃᕐᕕᐅᑉ ᐃᓐᓈᕈᖓᒍᑦ.

³⁰ ᔩᓱᓯᓕ ᐃᓄᒋᐊᒃᑐᑦ ᐊᑯᕐᖓᑦᑎᒍᑦ ᑖᒃᑯᓇᓐᖓᑦ ᐊᐅᓪᓚᕐᐳᖅ.

ᐊᖑᑦ ᐊᓂᕐᓂᕐᓗᖕᒥᒃ ᐃᑎᕐᑕᐅᓯᒪᔪᖅ

³¹ ᑕᕝᕙᓐᖓᑦ ᔩᓱᓯ ᑲᐲᕐᓂᐊᒧᐊᕐᐳᖅ, ᒐᓕᓕᐊᒦᑦᑐᒧᑦ. ᓴᐸᑎᐅᓕᕐᒪᑦ ᑕᕝᕙᓂ ᐊᔪᕆᕐᑐᐃᕗᖅ.

³² ᐊᔪᕆᕐᑐᐃᑦᔪᑎᒋᔭᖏᑦ ᐃᓄᐃᑦ ᑲᒪᓂᐊᕈᑎᒋᕔᑦ, ᐱᔪᓐᓇᕐᓂᖃᕐᑎᑕᐅᓪᓗᓂ ᐊᔪᕆᕐᑐᐃᖕᒪᑦ.

³³ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓃᑦᑐᖃᕐᐳᖅ ᐊᖑᒻᒥᒃ ᐊᓂᕐᓂᕐᓗᖕᒧᑦ ᐃᑎᕐᑕᐅᓯᒪᔪᒥᒃ; ᑖᓐᓇ ᓂᓪᓕᐊᓕᕐᐳᖅ ᓂᐱᖅᑯᕐᑐᓪᓗᓂ,

³⁴ “ᐋᖅ! ᔩᓱᓯ ᓈᓴᕇᑎᒥᐅᖅ, ᖃᓄᐃᓕᐅᕆᐊᕐᑐᕐᐱᑎᒎᑦ, ᑐᖁᕋᕆᐊᕐᑐᕐᐱᑎᒎᑦ? ᑭᓇᐅᖕᒪᖔᕐᐱᑦ ᖃᐅᔨᒪᒐᒃᑭᑦ, ᒎᑎᐅᑉ ᐃᑦᔪᕐᓁᑦᑐᖁᑎᒋᖕᒪᑎᑦ.”

³⁵ ᔩᓱᓯᐅᑉ ᐊᓂᕐᓂᕐᓗᒃ ᐃᓂᕐᑎᕐᐹ, ᐅᖃᐅᑎᓪᓗᒍ, “ᓂᐸᖏᕐᓗᑎᑦ, ᐃᓄᖕᒥᑦ ᐆᒪᓐᖓᑦ ᐊᓂᒋᑦ!” ᐊᓂᕐᓂᕐᓘᑉ ᐃᓄᒃ ᐅᕐᕈᑎᑉᐹ ᐃᓄᐃᑦ ᓵᖏᓐᓂ, ᖃᓄᐃᓕᓇᒍ ᑖᑦᓱᒪᖓᑦ ᐊᓂᕗᖅ.

³⁶ ᐃᓄᓕᒫᑦ ᑲᒪᔪᐊᓘᕗᑦ ᐃᒻᒥᖕᓄᑦ ᐅᖃᓗᑎᒃ, “ᖃᓄᐃᑦᑐᒥᖑᓇ ᐅᖃᐅᓯᓕᒃ ᐊᐅᓚᑦᓯᔪᓐᓇᕐᑐᖅ ᐱᔪᓐᓇᕐᓂᖃᕐᓗᓂ ᐊᓂᕐᓂᕐᓗᖕᓂᒃ ᐊᓂᖁᔨᔪᓐᓇᕐᑐᖅ, ᓈᓚᒃᑕᐅᓪᓗᓂ ᑖᒃᑯᓇᓐᖓᑦ?”

³⁷ ᔩᓱᓯᐅᑉ ᐅᓂᒃᑲᐅᓯᐅᓂᖓ ᑐᓴᐅᒪᔭᐅᓕᕐᐳᖅ ᑲᐱᕐᓂᐊᒥᐅᑦ ᖃᓂᒋᔭᖓᓃᑦᑐᓕᒫᓄᑦ.

ᔩᓱᓯᐅᑉ ᐋᖅᑭᒃᓯᓂᖓ ᐃᓄᖕᓂᒃ ᐊᒥᓱᓂᒃ

³⁸ ᔩᓱᓯ ᐊᓂᕗᖅ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓂᑦ ᓮᒨᓂᐅᑉ ᐃᒡᓗᖓᓄᐊᕐᓗᓂ. ᓮᒧᓂᐅᓪᓕ ᓴᑭᖓ ᐊᕐᓇᖅ ᐋᓐᓂᐊᕗᖅ ᐆᑎᕐᓇᕐᓗᓂ, ᑖᓐᓇ ᐅᖃᐅᓯᕆᕚᑦ ᔩᓱᓯᒧᑦ.

³⁹ ᔩᓱᓯᐅᑉ ᐅᐸᒃᑲᒥᐅᒃ ᐃᒡᓕᖓᑕ ᓴᓂᐊᓂ ᓇᖏᕐᓗᓂ, ᐋᓐᓂᐊᖓ ᐆᑎᕐᓇᕐᑐᖅ ᐊᓂᖁᕚ, ᑕᕝᕙᓐᖓᑦ ᐊᓂᕗᖅ; ᐊᕐᓇᖅ ᑕᕝᕔᓐᓇᖅ ᒪᑭᓐᓇᒥ ᑕᕝᕙᓃᑦᑐᑦ ᐱᔨᑦᓯᕋᓕᕐᐰᑦ.

⁴⁰ ᐅᓐᓄᓕᕐᑎᓪᓗᒍ ᓯᕿᓂᖅ ᓂᐱᖕᒪᑦ, ᐃᓄᓕᒫᑦ ᐃᓚᖃᕐᑐᑦ ᖃᓂᒪᔪᓂᒃ ᖃᓄᑐᐃᓐᓇᖅ ᐋᓐᓂᐊᖃᕐᑐᓂᒃ ᔩᓱᓯᒧᑦ ᐋᑦᓯᕗᑦ; ᑕᒪᕐᒥᒃ ᐸᑎᒻᒥᕔᑦ ᐋᖅᑭᒡᓗᒋᑦ.

⁴¹ ᐊᓂᕐᓂᕐᓗᐃᓪᓗ ᐃᓄᖕᓂᑦ ᐅᓄᕐᑐᓂᑦ ᐊᓂᕗᑦ, ᓂᓪᓕᐊᓪᓗᑎᒃ ᐃᒫᒃ, “ᒎᑎᐅᑉ ᐃᕐᓂᕆᕚᑎᑦ!” ᐃᓂᕐᑎᕐᐰᑦ, ᐅᖃᓪᓚᖁᓇᒋᑦ, ᖃᐅᔨᒪᖕᒪᑕ ᙭ᔅᑑᓯᐅᓂᖓᓂᒃ.

ᔩᓱᓯᐅᑉ ᐊᔪᕆᕐᑐᐃᓂᖓ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ

⁴² ᐅᓪᓛᓐᖑᕐᑎᓪᓗᒍ ᖃᐅᒻᒪᖕᒪᑦ ᔩᓱᓯ ᓄᓇᓕᖕᓂᑦ ᐊᐅᓪᓚᕐᐳᖅ ᐃᓄᖃᖏᑦᑐᒧᐊᕐᓗᓂ, ᐃᓄᐃᑦ ᕿᓂᓕᕐᐹᑦ, ᓇᓂᒐᒥᑦᔪᒃ ᐃᓂᕐᑎᕐᐹᑦ ᐊᐅᓪᓚᖁᓇᒍ ᓄᓇᒥᖕᓂᑦ;

⁴³ ᔩᓱᓯᐅᑉ ᐅᖃᐅᑎᕔᑦ, “ᓄᓇᓕᖕᓂ ᐊᓯᑦᓯᓐᓂᑦᑕᐅᖅ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᖃᐅᓯᖃᕆᐊᖃᕐᐳᖓ ᒎᑎᐅᑉ ᐊᑕᓂᐅᕕᖓᓂᒃ; ᑕᒪᓐᓇ ᑎᓕᔭᐅᑦᔪᑎᒋᓯᒪᒐᒃᑯ.”

⁴⁴ ᑍᒤᒻᒪᑦ ᐊᔪᕆᕐᑐᐃᓚᐅᕐᐳᖅ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ ᔫᑎᐊᒦᑦᑐᓂ.