ᓘᑲᓯᐅᑉ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᔪᐊᓇᓯ ᐹᑉᑎᑎᕆᔨᐅᑉ ᐊᔪᕆᕐᑐᐃᓂᖓ

¹ ᐊᕐᕌᒍᓂᒃ 15ᓂᒃ ᓰᓴᕆ ᑍᐱᕆᐊᓯ ᐊᖓᔪᖅᑳᕐᔪᐊᖑᓕᕐᑎᓪᓗᒍ, ᐴᓐᑎᐅᓯ ᐰᓛᑑᓯ ᐊᐅᓚᑦᓯᔨᐅᑎᓪᓗᒍ ᔫᑎᐊᒥ; ᐃᕉᑕᓯ ᐊᖓᔪᖅᑳᕐᔪᐊᖑᑎᓪᓗᒍ ᒐᓕᓕᐊᒥ, ᐃᕉᑕᓯᐅᑉ ᖃᑕᓐᖑᑖ ᐱᓕᑉᐴᓯ ᐊᖓᔪᖅᑳᖑᑎᓪᓗᒍ ᐂᑐᕆᐊᒥ ᑐᕌᑯᓁᑎᓯᒥᓗ, ᓔᓴᓂᐊᓯ ᐊᖓᔪᖅᑳᖑᑎᓪᓗᒍ ᐊᐱᓕᓂᒥ,

² ᐋᓇᓯ ᑬᐊᐹᓯᓗ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᖑᑎᓪᓗᒋᒃ, ᔪᐊᓇᓯ ᓴᑲᕅᐊᐅᑉ ᐃᕐᓂᖓ ᒎᑎᐅᑉ ᐅᖃᕐᕕᒋᕚ ᐃᓄᖃᖏᑦᑐᒦᑎᓪᓗᒍ.

³ ᔪᐊᓇᓯ ᑰᖕᒥ ᔪᐊᕐᑕᓂᒥ ᖃᓂᒋᔭᓕᒫᖓᓂᓗ ᐱᓇᓱᐊᓕᓚᐅᕐᐳᖅ, ᐊᔪᕆᕐᑐᐃᓪᓗᓂ ᐹᑉᑎᑕᐅᓂᐅᑉ ᓇᓗᓁᒃᑯᑕᐅᓂᖓᓂᒃ ᓵᒋᐊᕐᓂᕐᒧᑦ ᐊᔪᕐᓃᑦ ᐃᓱᒪᒋᔪᓐᓁᕐᑕᐅᓂᖏᓐᓄᑦ.

⁴ ᓇᓚᐅᑦᑍᔪᖅ ᐂᓮᐊᓯ ᐅᖃᕐᓯᒪᖕᒪᑦ, “ᐃᓄᖃᖏᑦᑐᒥ ᕾᒐᓛᕐᑐᖃᕐᐳᖅ: ‘ᐊᑕᓂᐅᑉ ᐊᖅᑯᑎᒃᓴᖓ ᐋᖅᑭᒃᓱᕐᓯᐅᒃ; ᐊᖅᑯᑎᒃᓴᖓ ᑐᑭᓕᐊᕐᓯᑎᓪᓗᒍ.

⁵ ᓇᕐᓮᑦ ᑕᒪᕐᒥᒃ ᓇᖓᕐᑎᕐᑕᐅᔪᒫᕐᐳᑦ, ᐱᖑᐃᑦ ᖃᖅᑬᓪᓗ ᐳᒃᑭᒡᓕᑎᑕᐅᔪᒫᕐᓗᑎᒃ, ᐊᖅᑯᑎᑦ ᓴᖑᐃᖓᔪᑦ ᑐᑭᓕᐊᕐᓯᑎᑕᐅᔪᒫᕐᐳᑦ, ᒪᓃᑦᑐᑦ ᒪᓂᖅᑲᒃᓴᕐᓗᒋᑦ.

⁶ ᐃᓄᓕᒫᑦ ᑕᑯᔪᒫᕐᐳᑦ ᒎᑎᐅᑉ ᐱᐅᓕᔭᐅᕕᒃᓴᐅᑎᑕᖓᓂᒃ.’”

⁷ ᐃᓄᒋᐊᒃᑐᑦ ᔪᐊᓇᓯᒧᐊᕐᒪᑕ ᐹᑉᑎᑕᐅᔪᒪᓪᓗᑎᒃ, ᔪᐊᓇᓯᐅᑉ ᐅᖃᐅᑎᕔᑦ, “ᖁᒡᓗᒋᐊᖑᔮᕐᑐᓯ! ᑭᐊ ᕿᒫᖁᕚᓯ ᒎᑎᐅᑉ ᓂᓐᖓᐅᓯᖓᓂᑦ ᑎᑭᑦᓱᒫᕐᑐᒥᑦ?

⁸ ᐊᑏ ᓴᖅᑭᑎᑦᓯᓕᕆᑦᓯ ᓵᒋᐊᕐᓂᓯ ᓇᓗᓁᕐᑕᐅᑦᔪᑎᖓᓂᒃ, ᐃᓱᒪᑦᑍᓕᒋᑦᓯ ᐃᒫᒃ: ‘ᒎᑎᐅᑉ ᐃᓄᖁᑎᒋᕚᑎᒍᑦ ᐂᑉᕋᕼᐋᒻ ᑭᖑᕚᕆᖕᒪᑎᒍᑦ.’ ᐃᒫᒃ ᐅᖃᐅᑎᕙᑦᓯ; ᒎᑎ ᒪᑯᓂᖓ ᐅᔭᕋᖕᓂᒃ ᐂᑉᕋᕼᐋᒻᒧᑦ ᑭᖑᕚᓐᖑᕐᑎᑦᓯᔪᓐᓇᕐᐳᖅ!

⁹ ᒫᓐᓇ ᐅᓕᒪᐅᑦ ᐅᐸᓗᖕᒊᕐᑕᐅᓯᒪᓕᕇᕐᐳᖅ ᓇᐹᕐᑐᑦ ᒪᖑᒃᓯᒪᓂᖏᑎᒍᑦ ᓇᑲᑎᕐᑕᐅᖁᓪᓗᒋᑦ; ᑍᒤᒻᒪᑦ ᓇᐹᕐᑐᓕᒫᑦ ᐸᐅᕐᖓᖃᖏᑦᑐᑦ ᓇᑲᑕᐅᓂᐊᕐᐳᑦ ᐃᒋᑕᐅᓗᑎᒃ ᐃᑯᒪᒧᑦ.”

¹⁰ ᐃᓄᐃᑦ ᔪᐊᓇᓯ ᐊᐱᕆᕚᑦ, “ᖃᓄᕐᓕ ᑕᕝᕙ ᐱᔭᕆᐊᖃᕐᐱᑖ?”

¹¹ ᔪᐊᓇᓯᐅᑉ ᑭᐅᕔᑦ, “ᒪᕐᕉᖕᓂᒃ ᐅᕕᓂᕈᖃᕐᑑᑉ, ᐂᑉᐸᖓ ᑐᓂᔭᒃᓴᕆᕚ ᐱᖃᖏᑦᑐᒧᑦ; ᓂᕿᖃᕐᑐᖅ, ᓂᕆᔭᒃᓴᖃᖏᑦᑐᒥᒃ ᐱᑎᑦᓯᔪᒃᓴᐅᕗᖅ.”

¹² ᕉᒪᒥᐅᑦ ᑮᓇᐅᔧᕐᑎᑦᓯᔨᖁᑎᖏᑦ ᕾᓚᐅᕆᕗᑦ ᐹᑉᑎᑕᐅᔭᕐᑐᕐᓗᑎᒃ, ᔪᐊᓇᓯᒧᑦ ᐅᖃᕐᓗᑎᒃ, “ᐊᔪᕆᕐᑐᐃᔩ, ᖃᓄᖅ ᐱᔪᒃᓴᐅᕕᑖ?”

¹³ ᔪᐊᓇᓯᐅᑉ ᐅᖃᐅᑎᕔᑦ, “ᑮᓇᐅᔧᕐᑎᑦᓯᖁᔭᐅᓂᑦᓯ ᐅᖓᑖᓄᑦ ᐱᖃᑦᑕᕆᐊᖃᓐᖏᓚᓯ.”

¹⁴ ᐊᒻᒪ ᐅᓇᑕᕐᑐᒃᓮᑦ ᔪᐊᓇᓯ ᐊᐱᕆᒋᕚᑦ, “ᐅᕙᒍᓪᓕ ᖃᓄᖅ ᐱᔪᒃᓴᐅᕕᑖ?” ᔪᐊᓇᓯᐅᑉ ᐅᖃᐅᑎᕔᑦ, “ᓲᖑᓴᖕᓂᕐᒧᑦ ᑎᒡᓕᖃᑦᑕᖏᓪᓗᓯ ᑮᓇᐅᔭᓂᒃ ᓴᒡᓗᕿᑦᓯᓂᕐᒧᓪᓘᓐᓃᑦ, ᑮᓇᐅᑦᔭᓕᐊᓯ ᓈᒻᒪᒋᓯᐅᒃ.”

¹⁵ ᐃᓄᐃᓪ ᓂᕆᐅᖕᓂᖃᕐᐸᓪᓕᐊᓕᕐᐳᑦ, ᐃᓱᒪᖃᓕᕐᓗᑎᒡᓗ ᔪᐊᓇᓯ ᙭ᔅᑑᓯᐅᓇᓱᒋᓪᓗᒍ.

¹⁶ ᔪᐊᓇᓯᐅᑉ ᑕᒪᕐᒥᒃ ᐅᖃᐅᑎᕔᑦ, “ᐃᒥᕐᒧᑦ ᐹᑉᑎᑉᐸᑦᓯ; ᐅᕙᓐᓂᓪᓕ ᐱᔪᓐᓇᕐᓂᕐᓴᖅ ᑎᑭᓐᓂᐊᕐᐳᖅ, ᓇᓗᖅᑯᑎᕗᖓ ᑖᑦᓱᒪ ᐃᑎᒐᒍᑎᖏᓐᓂᒃ ᓯᖐᑦᔮᕐᓯᔭᕆᐊᒃᓴᖅ; ᑖᑦᓱᒪ ᐹᑉᑎᑦᓱᒫᕐᐹᓯ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᐃᑯᒪᒧᓪᓗ.

¹⁷ ᑖᑦᓱᒪ ᐃᕖᔧᑦᔪᑎᓂ ᑎᒍᒥᐊᕐᐹ, ᓂᐊᖂᔭᒃᓴᓕᕆᕝᕕᖕᒥᓂ ᓂᐊᖂᔭᒃᓴᑦ ᐃᕖᔭᕐᓂᐊᕐᐰᑦ, ᓂᐊᖂᔭᒃᓴᑦ ᐴᖅᑲᕐᓗᒋᑦ ᓂᐊᖂᔭᒃᓴᒃᑯᕕᖕᒥᓄᑦ, ᐃᕕᐅᓂᖏᑦ ᐃᑭᓐᓂᐊᕐᐰᑦ ᐃᑯᒪᒧᑦ ᖃᒥᓱᐃᑦᑐᒧᑦ.”

¹⁸ ᐊᑦᔨᒌᖏᑦᑐᑎᒍᑦ ᔪᐊᓇᓯ ᐊᔪᕆᕐᑐᐃᓚᐅᕐᐳᖅ ᐃᓄᖕᓄᑦ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ.

¹⁹ ᔪᐊᓇᓯᐅᑉ ᐃᕉᑕᓯ ᐊᖓᔪᖅᑲᖅ ᐃᓂᕐᑎᓚᐅᕐᐹ ᐃᕉᑎᐊᓯᒥᒃ ᓄᓕᐊᖃᓕᓚᐅᕐᒪᑦ ᓄᑲᖓᑕ ᓄᓕᐊᖓᓂᒃ, ᐊᓯᖏᓐᓂᒡᓗ ᐱᐅᖏᑦᑐᓕᑦᔪᑎᒋᔭᓕᒫᖏᓐᓂᒃ.

²⁰ ᐃᕉᑕᓯ ᐱᐅᖏᑐᓕᓂᕆᔭᒥ ᐱᐅᖏᖅᑭᔭᖏᓐᓂᒃ ᐱᐅᖏᑦᑐᓕᓚᐅᕐᐳᖅ ᔪᐊᓇᓯᒥᒃ ᑎᒍᔭᐅᑎᑦᓯᓚᐅᕐᒪᑦ.

ᔩᓱᓯᐅᑉ ᐹᑉᑎᑕᐅᓂᖓ

²¹ ᐃᓄᓕᒫᑦ ᐹᑉᑎᑕᐅᓯᒪᓕᕐᑎᓪᓗᒋᑦ, ᔩᓱᓯ ᐹᑉᑎᑕᐅᓚᐅᕆᕗᖅ. ᑐᒃᓯᐊᕐᑎᓪᓗᒍ, ᕿᓚᒃ ᐊᖕᒪᕐᐳᖅ,

²² ᐊᓂᕐᓂᐅᑉ ᐃᑦᔪᕐᓁᑦᑑᑉ ᐊᖅᑲᕐᕕᒋᕚ ᑕᑯᒃᓴᐅᓪᓗᓂ ᑎᖕᒥᐊᑎᑐᑦ ᑑᕕᑎᑐᑦ, ᓂᐱᒥᒃ ᕿᓚᖕᒥᑦ ᓂᓪᓕᕐᑐᖃᕐᐳᖅ, “ᐃᕐᓂᕆᕙᒋᑦ ᓇᒡᓕᒋᔭᕋ; ᖁᕕᐊᒋᑦᓯᐊᕐᑕᕋ.”

ᔩᓱᓯᐅᑉ ᓯᕗᓕᕕᓂᖏᑦ

²³ ᔩᓱᓯ ᐱᓇᓱᐊᕆᐊᓯᑎᓪᓗᒍ 30 ᖃᓂᒋᔮᓂ ᐊᕐᕌᒍᖃᓕᓚᐅᕐᐳᖅ, ᑖᓐᓇ ᔫᓯᐱᐅᑉ ᐃᕐᓂᕆᕚ, ᐃᓄᐃᑦ ᐃᓱᒪᒋᔭᖏᑎᒍᑦ, ᔫᓯᐱ ᕼᐃᓕᐅᑉ ᐃᕐᓂᕆᕚ,

²⁴ ᕼᐃᓕ ᒫᑕᑎᐅᑉ ᐃᕐᓂᕆᕚ, ᒫᑕᑎ ᓕᕔᑉ ᐃᕐᓂᕆᕚ, ᓕᕔ ᒥᓪᑬᑉ ᐃᕐᓂᕆᕚ, ᒥᓪᑬ ᔮᓁᑉ ᐃᕐᓂᕆᕚ, ᔮᓁ ᔫᓯᐱᐅᑉ ᐃᕐᓂᕆᕚ,

²⁵ ᔫᓯᐱ ᒪᑕᑍᐊᓯᐅᑉ ᐃᕐᓂᕆᕚ, ᒪᑕᑍᐊᓯ ᐂᒨᓯᐅᑉ ᐃᕐᓂᕆᕚ, ᐂᒨᓯ ᓁᕼᐅᒥᐅᑉ ᐃᕐᓂᕆᕚ, ᓁᕼᐅᒥ ᐃᔅᓕᐅᑉ ᐃᕐᓂᕆᕚ, ᐃᔅᓕ ᓈᒡᒊᑉ ᐃᕐᓂᕆᕚ,

²⁶ ᓈᒡᒊ ᒫᑎᐅᑉ ᐃᕐᓂᕆᕚ, ᒫᑎ ᒪᑕᑍᐊᓯᐅᑉ ᐃᕐᓂᕆᕚ, ᒪᑕᑍᐊᓯ ᓰᒥᓂᐅᑉ ᐃᕐᓂᕆᕚ, ᓰᒥᓂ ᔫᓯᑭᐅᑉ ᐃᕐᓂᕆᕚ, ᔫᓯᑭ ᔫᑕᐅᑉ ᐃᕐᓂᕆᕚ,

²⁷ ᔫᑕ ᔪᐊᓇᓇᐅᑉ ᐃᕐᓂᕆᕚ, ᔪᐊᓇᓇ ᕇᓴᐅᑉ ᐃᕐᓂᕆᕚ, ᕇᓴ ᔨᕈᐸᐱᐅᓪ ᐃᕐᓂᕆᕚ, ᔨᕈᐸᐱ ᓯᐊᓪᑎᐅᑉ ᐃᕐᓂᕆᕚ, ᓯᐊᓪᑎᐅᓪ ᓂᕅᐅᑉ ᐃᕐᓂᕆᕚ,

²⁸ ᓂᕅ ᒥᓪᑬᑉ ᐃᕐᓂᕆᕚ, ᒥᓪᑬ ᐋᑎᐅᑉ ᐃᕐᓂᕆᕚ, ᐋᑎ ᑰᓴᒥᐅᑉ ᐃᕐᓂᕆᕚ, ᑰᓴᒥ ᐃᓪᒪᑕᒥᐅᑉ ᐃᕐᓂᕆᕚ, ᐃᓪᒪᑕᒥ ᐃᕆᐅᑉ ᐃᕐᓂᕆᕚ,

²⁹ ᐃᕆ ᔮᓱᐊᑉ ᐃᕐᓂᕆᕚ, ᔮᓱᐊ ᐃᓔᓴᕆᐅᑉ ᐃᕐᓂᕆᕚ, ᐃᓔᓴᕆ ᔪᕆᒥᐅᑉ ᐃᕐᓂᕆᕚ, ᔪᕆᒻ ᒫᑕᑎᐅᑉ ᐃᕐᓂᕆᕚ, ᒫᑕᑎ ᓕᕔᑉ ᐃᕐᓂᕆᕚ,

³⁰ ᓕᕔ ᓯᒥᐅᓂᐅᑉ ᐃᕐᓂᕆᕚ, ᓯᒥᐅᓂ ᔫᑕᐅᑉ ᐃᕐᓂᕆᕚ, ᔫᑕ ᔫᓯᐱᐅᑉ ᐃᕐᓂᕆᕚ, ᔫᓯᐱ ᔫᓇᒥᐅᑉ ᐃᕐᓂᕆᕚ, ᔫᓇᒥ ᐃᓕᐊᑭᒥᐅᑉ ᐃᕐᓂᕆᕚ,

³¹ ᐃᓕᐊᑭᒻ ᒥᓕᐊᑉ ᐃᕐᓂᕆᕚ, ᒥᓕᐊ ᒥᓐᓇᐅᑉ ᐃᕐᓂᕆᕚ, ᒥᓐᓇ ᒪᑖᑕᐅᑉ ᐃᕐᓂᕆᕚ, ᒪᑖᑕ ᓁᑕᓂᐅᑉ ᐃᕐᓂᕆᕚ, ᓁᑕᓂ ᑍᕕᑎᐅᑉ ᐃᕐᓂᕆᕚ, ᑍᕕᑎ ᔨᓯᐅᑉ ᐃᕐᓂᕆᕚ,

³² ᔨᓯ ᐅᐱᑎᐅᑉ ᐃᕐᓂᕆᕚ, ᐅᐱᑎ ᐳᐊᓯᐅᑉ ᐃᕐᓂᕆᕚ, ᐳᐊᓯ ᓵᓪᒪᓂᐅᑉ ᐃᕐᓂᕆᕚ, ᓵᓪᒪᓐ ᓁᓴᓇᐅᑉ ᐃᕐᓂᕆᕚ,

³³ ᓁᓴᓇ ᐊᒥᓇᑕᐅᑉ ᐃᕐᓂᕆᕚ, ᐊᒥᓇᑕᑉ ᐊᑦᒥᓂᐅᑉ ᐃᕐᓂᕆᕚ, ᐊᑦᒥᓂ ᐋᕐᓂᐅᑉ ᐃᕐᓂᕆᕚ, ᐋᕐᓂ ᕼᐃᔅᕋᓂᐅᑉ ᐃᕐᓂᕆᕚ, ᕼᐃᔅᕋᓐ ᐱᕆᓯᐅᑉ ᐃᕐᓂᕆᕚ, ᐱᕆᓯ ᔫᑕᐅᑉ ᐃᕐᓂᕆᕚ,

³⁴ ᔫᑕ ᔧᑰᑉ ᐃᕐᓂᕆᕚ, ᔧᑯ ᐂᓴᑭᐅᑉ ᐃᕐᓂᕆᕚ, ᐂᓴᑭ ᐂᑉᕋᕼᐊᑉ ᐃᕐᓂᕆᕚ, ᐂᑉᕋᕼᐋᒻ ᑏᕋᐅᑉ ᐃᕐᓂᕆᕚ, ᑏᕋ ᓇᕼᐅᕆᐅᑉ ᐃᕐᓂᕆᕚ,

³⁵ ᓇᕼᐅᕆ ᓯᕈᒋᐅᑉ ᐃᕐᓂᕆᕚ, ᓯᕈᒋ ᕆᐅᑉ ᐃᕐᓂᕆᕚ, ᕆᐅ ᐱᓕᒋᐅᑉ ᐃᕐᓂᕆᕚ, ᐱᓕᒋ ᐃᑉᕆᐅᑉ ᐃᕐᓂᕆᕚ, ᐃᑉᕆ ᓰᓚᐅᑉ ᐃᕐᓂᕆᕚ,

³⁶ ᓮᓚ ᑬᓇᓂᐅᑉ ᐃᕐᓂᕆᕚ, ᑬᓇᓂ ᐊᕐᐹᒃᓴᑎᐅᑉ ᐃᕐᓂᕆᕚ, ᐊᕐᐹᒃᓴᑎ ᓰᒥᐅᑉ ᐃᕐᓂᕆᕚ, ᓰᒥ ᓄᐊᑉ ᐃᕐᓂᕆᕚ, ᓄᐊ ᓔᒥᑭᐅᑉ ᐃᕐᓂᕆᕚ,

³⁷ ᓔᒥᑭ ᒥᑑᓴᓚᐅᑉ ᐃᕐᓂᕆᕚ, ᒥᑑᓴᓚ ᐃᓅᑭᐅᑉ ᐃᕐᓂᕆᕚ, ᐃᓅᑭ ᔭᕆᑎᐅᑉ ᐃᕐᓂᕆᕚ, ᔭᕆᑎ ᒪᕼᐊᓚᓕᐅᑉ ᐃᕐᓂᕆᕚ, ᒪᕼᐊᓚᓕᐅ ᑬᓇᓂᐅᑉ ᐃᕐᓂᕆᕚ,

³⁸ ᑬᓇᓂ ᐃᓅᓯᐅᑉ ᐃᕐᓂᕆᕚ, ᐃᓅᓯ ᓰᑎᐅᑉ ᐃᕐᓂᕆᕚ, ᓰᑎ ᐋᑕᒥᐅᑉ ᐃᕐᓂᕆᕚ, ᐋᑕᒥ ᒎᑎᐅᑉ ᐃᕐᓂᖓ.