ᓘᑲᓯᐅᑉ ᐊᒡᓚᖏᑦ 23 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯᐅᑉ ᐃᖅᑲᕐᑐᕐᑕᐅᓂᖓ ᐰᓛᑑᓯᐅᑉ ᓵᖓᓂ

¹ ᐃᖅᑲᕐᑐᐃᕕᖕᒦᑎᑎᔪᓕᒫᑦ ᓂᑯᕕᓐᓇᒥᒃ, ᔩᓱᓯ ᐰᓛᑑᓯᒧᐊᕈᑎᕚᑦ,

² ᔩᓱᓯᒥᒃ ᐃᖅᑲᕐᑐᒐᒃᓴᖑᕐᑎᑎᓯᒪᔪᑦ ᐅᖃᕐᐳᑦ, “ᐅᓇ ᖃᐅᔨᓚᐅᕐᐸᕗᑦ ᐃᓅᖃᑎᑦᑎᓐᓂᒃ ᑕᒻᒪᕐᓮᔪᖅ, ᐃᓂᕐᑎᓚᐅᕐᐹᑎᒍᑦ ᓰᓴᕆᒧᑦ ᑖᒃᓰᔭᖃᑦᑕᖁᓇᑕ, ᐃᒻᒥᓂᒃ ᒥᓮᐊᓯᐅᓂᕋᕐᓗᓂ ᐊᖓᔪᖅᑳᕐᔪᐊᖑᓂᕋᓗᓂᓗ.”

³ ᐰᓛᑑᓯᐅᑉ ᐊᐱᕆᕚ, “ᔫᑎᑦ ᐊᖓᔪᖅᑳᕐᔪᐊᕆᕚᑏᑦ?” ᔩᓱᓯᐅᑉ ᑭᐅᕚ, “ᑕᕝᕙ ᐅᖃᕇᕐᐳᑎᑦ.”

⁴ ᐰᓛᑑᓯ ᐅᖃᕐᐳᖅ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᓐᓄᑦ ᐃᓄᒋᐊᒃᑐᓄᓪᓗ, “ᓇᓂᓯᓐᖏᓚᖓ ᑖᑦᓱᒪ ᐸᓯᔭᐅᑦᔪᑎᒃᓴᖓᓂᒃ.”

⁵ ᑖᒃᑯᐊ ᐱᒋᐊᓪᓚᒃᑲᓐᓂᕐᐳᑦ ᐊᒃᓱᕈᓕᕐᓗᑎᒃ, ᐅᖃᕐᐳᑦ, “ᐆᒪ ᐃᓄᐃᑦ ᐊᔪᕆᕐᑐᐃᑦᔪᑎᒥᓄᑦ ᐅᐃᒪᔮᕐᑎᑉᐰᑦ, ᔫᑎᐊᓕᒫᒥ, ᒐᓕᓕᐊᒥᓪᓗ ᐱᒋᐊᕐᓗᓂ ᒪᐅᖓᓘᓐᓃᑦ ᐊᒡᓛᑦ ᑎᑭᑉᐳᖅ.”

ᔩᓱᓯᐅᑉ ᐃᖅᑲᕐᑐᕐᑕᐅᓂᖓ ᐃᕉᑕᓯᐅᑉ ᓵᖓᓂ

⁶ ᐰᓛᑑᓯ ᑕᒪᑐᒥᖓ ᑐᓴᕋᒥ, ᐊᐱᕆᕚ ᔩᓱᓯ ᒐᓕᓕᐊᒥᐅᖑᖕᒪᖔᑦ.

⁷ ᑐᑭᓯᑎᑕᐅᒐᒥ ᔩᓱᓯ ᐃᕉᑕᓯᐅᑉ ᐊᖓᔪᖅᑳᕐᔪᐊᖑᕕᖓᓂᑦ ᐱᓯᒪᖕᒪᑦ, ᐃᕉᑕᓯᒧᐊᕈᑦᔭᐅᑎᑉᐹ, ᑖᓐᓇ ᔨᕉᓴᓕᒻᒦᒻᒪᑦ ᐱᓇᓱᐊᕐᑎᓪᓗᒋᑦ ᑕᒪᑐᒥᖓ.

⁸ ᐃᕉᑕᓯ ᖁᕕᐊᓱᒻᒪᕆᓚᐅᕐᐳᖅ ᔩᓱᓯᒥᒃ ᑕᑯᒐᒥ, ᑐᓴᐅᒪᔭᑐᖃᕆᒐᒥᐅᒃ ᑕᑯᔪᒪᔭᑐᖃᕆᓪᓗᒍ, ᑲᒪᓇᕐᑐᓕᑎᓪᓗᒍ ᑕᑯᑎᑕᐅᓂᐊᕋᓱᒋᓪᓗᓂ.

⁹ ᐃᕉᑕᓯᐅᑉ ᐊᒥᓱᓂᒃ ᐊᐱᕐᓱᕐᐹ; ᔩᓱᓯᓕ ᑭᐅᓚᐅᓐᖏᓚᖅ.

¹⁰ ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᖏᑦ ᐱᖁᔭᓂᒡᓗ ᐃᓕᓮᔨᑦ ᓴᓂᐊᓄᐊᕐᐳᑦ ᐊᒃᓱᕈᕐᓗᑎᒃ ᐱᓇᓱᐊᓕᕐᐹᑦ ᔩᓱᓯ.

¹¹ ᐃᕉᑕᓯᐅᑉ ᐅᓇᑕᕐᑐᒃᓴᖁᑎᖏᑕ ᔩᓱᓯ ᒥᑕᐅᑎᒋᕚᑦ ᓇᕐᕈᒋᓪᓗᒍᓗ; ᐊᒻᒪ ᐅᓕᒡᔪᐊᒥᒃ ᐱᐅᔪᐊᓗᖕᒥᒃ ᐊᑎᑎᑉᐹᑦ, ᐅᑎᕐᑎᓪᓗᒍ ᐰᓛᑑᓯᒧᑦ.

¹² ᐅᓪᓗᒥᓪᓗ ᑕᕝᕙᓐᖓᑦ ᐱᒋᐊᕐᓗᑎᒃ ᐃᕉᑕᓯᒃᑯᒃ ᐰᓛᑑᓯᒃᑯᒃ ᐃᓚᓐᓈᕇᓕᕐᐴᒃ, ᓯᕗᓂᖓᓂ ᐊᑭᕋᕇᓚᐅᕋᓗᐊᕋᒥᒃ.

ᔩᓱᓯᐅᑉ ᑐᖁᑕᒃᓴᓐᖑᕐᑎᑕᐅᓂᖓ

¹³ ᑕᕝᕙ ᐰᓛᑑᓯᐅᑉ ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᖏᑦ, ᐊᐅᓚᑦᓯᔨᑦ ᐃᓄᐃᓪᓗ ᑲᑎᖁᕔᑦ,

¹⁴ ᐅᖃᐅᑎᓪᓗᒋᑦ, “ᐅᓇ ᐅᕙᓐᓄᐊᕈᑎᔭᓯ ᐅᖃᐅᓯᕆᓪᓗᒍ ᑕᒻᒪᕐᓮᓂᕋᕐᓗᒍ ᐃᓄᖕᓂᒃ; ᖃᐅᔨᓴᕋᒃᑯ ᑕᑯᓐᓇᕐᑎᓪᓗᓯ, ᑕᑯᒋᑦ, ᓇᓂᓯᓐᖏᓚᖓ ᑖᑦᓱᒪ ᑐᖁᑕᐅᑦᔪᑎᒃᓴᖓᓂᒃ ᐸᓯᒃᓯᕈᑎᒋᔭᑦᓯᓐᓂᑦ;

¹⁵ ᐃᕉᑕᓯᓗᑦᑕᐅᖅ ᓇᓂᓯᖏᓐᓇᒥ ᐸᓯᔭᐅᑦᔪᑎᒃᓴᒥᒃ ᑖᑦᓱᒧᖓ ᐅᑎᕐᑎᒃᑭᕚ ᐅᕙᑦᑎᓐᓄᑦ. ᑕᑯᒋᑦ, ᐊᖑᑦ ᐅᓇ ᐱᓂᐊᓚᐅᕐᓯᒪᓐᖏᓚᖅ ᑐᖁᑕᐅᑦᔪᑎᒃᓴᒥᒃ;

¹⁶ ᑍᒤᒻᒪᑦ ᑏᒐᕐᑐᕐᑕᐅᑎᓐᓂᐊᕐᐸᕋ ᐊᓂᑎᓪᓗᒍᓗ.”

¹⁷ ᖄᖏᕐᑕᐅᕕᒃ ᓇᓪᓕᐅᑎᔭᕌᖓᑦ ᐰᓛᑑᓯ ᐱᐅᓯᖃᕐᐸᒃᐳᖅ ᑎᒍᔭᐅᓯᒪᔪᑦ ᐃᓚᖓᓐᓂᒃ ᐊᓂᑎᑦᓯᔭᕆᐊᖃᕐᐸᒡᓗᓂ.

¹⁸ ᐃᓄᒋᐊᒃᑐᕐᔪᐊᓪᓕ ᐊᑕᐅᓯᒃᑯᑦ ᓂᓪᓕᐊᓕᕐᐳᑦ, “ᐅᓇ ᑐᖁᑕᐅᓕ, ᐸᕋᐹᓯ ᐊᓂᑎᑕᐅᖔᕐᓗᓂ.”

¹⁹ ᐸᕋᐹᓯ ᑎᒍᔭᐅᓯᒪᕕᖕᒧᐊᕐᑎᑕᐅᓯᒪᕗᖅ ᐊᑭᕋᕐᑐᓕᕐᑎᑎᓪᓗᓂ ᐅᐃᒪᔮᕐᑎᑦᓯᓚᐅᕐᒪᑦ ᑕᕝᕙᓂ ᐃᒡᓗᒐᓴᒡᔪᐊᓂ, ᐃᓄᐊᕐᓯᒪᓪᓗᓂᓗ.

²⁰ ᐰᓛᑑᓯᐅᑉ ᐃᓄᒋᐊᒃᑐᑦ ᐅᖃᐅᑎᒃᑲᓐᓂᕐᐰᑦ, ᔩᓱᓯ ᐊᓂᑎᑕᐅᖁᒐᓗᐊᕋᒥᐅᒃ;

²¹ ᐃᓄᒋᐊᒃᑐᓪᓕ ᕾᒐᓛᓕᕐᐳᑦ, “ᑭᑭᐊᒃᑐᕐᑕᐅᓕ, ᑭᑭᐊᒃᑐᕐᑕᐅᓕ!”

²² ᐰᓛᑑᓯᐅᑉ ᐱᖓᔪᐊᓐᓂᒃ ᓱᓕ ᐅᖃᐅᑎᒃᑲᓐᓂᕆᕔᑦ, “ᓱᖕᒪᑦ, ᓱᓇᒥᒃ ᐱᕋᔭᐅᑎᖃᕐᓯᒪᖕᒫᑦ? ᓇᓂᓯᖏᓐᓇᒪ ᐊᑐᕐᓯᒪᔭᖓᓂᒃ ᑐᖁᑕᐅᑦᔪᑎᒃᓴᒥᒃ ᑖᑦᓱᒪᓂ; ᑍᒤᒻᒪᑦ ᑏᒐᕐᑐᕐᑕᐅᑎᓪᓗᒍ ᓴᒃᑯᑕᐅᖁᓕᕐᐸᕋ.”

²³ ᐃᓄᐃᓪᓕ ᐊᒃᓱᕈᒻᒪᕆᓕᕐᐳᑦ ᕾᒐᓛᕐᓗᑎᒃ ᓂᐱᓕᒫᒥᖕᓄᑦ ᔩᓱᓯ ᑭᑭᐊᒃᑐᕐᑕᐅᖁᓪᓗᒍ. ᕾᒐᓛᕐᓂᕐᒥᖕᓄᓪᓗ ᓵᓚᖃᓕᕐᐳᑦ.

²⁴ ᐰᓛᑑᓯ ᑕᕝᕙ ᐱᖁᔨᓕᕐᐳᖅ ᔩᓱᓯᐅᑉ ᑐᖁᑕᐅᑦᔪᑎᒃᓴᖓᓂᒃ, ᐃᓄᒐᓴᒡᔪᐊᑦ ᑍᒫᒃ ᐱᖁᔨᖕᒪᑕ.

²⁵ ᐰᓛᑑᓯᐅᑉ ᐊᓂᑎᑕᐅᑯᓕᕐᐹ ᐸᕋᐹᓯ ᑎᒍᔭᐅᓯᒪᕕᖕᒦᑦᑐᖅ ᐃᓄᐃᑦ ᐊᓂᑎᑕᐅᖁᔭᖓᑦ, ᐅᐃᒪᔮᕐᑎᑦᓯᓂᖓᓄᑦ ᐃᓄᐊᕐᓯᒪᓂᖓᓄᓪᓗ ᑎᒍᔭᐅᓯᒪᔪᖅ, ᔩᓱᓯ ᐱᔭᐅᑎᓕᕐᐹ ᐃᓄᐃᑦ ᐱᔪᒪᔭᖏᑦ ᒪᓕᒡᓗᒋᑦ; ᐃᓱᒪᕐᓲᑎᒋᓗᒍ ᐱᓂᐊᕐᕕᒋᓂᐊᕐᒪᑦᔪᒃ.

ᔩᓱᓯᐅᑉ ᑭᑭᐊᒃᑐᕐᑕᐅᓂᖓ ᓴᓐᓂᖓᔪᓕᖕᒧᑦ

²⁶ ᐅᓇᑕᕐᑐᒃᓮᑦ ᔩᓱᓯ ᑕᓯᐅᕐᓗᒍ ᐊᓐᓂᓯᓕᕐᐹᑦ, ᐊᓂᓕᕐᓗᑎᒃ ᑲᑎᓯᕗᑦ ᐊᖑᒻᒥᒃ ᓮᕆᓂᒥᐅᕐᒥᒃ ᓮᒨᓂᒥᒃ ᐊᑎᓕᖕᒥᒃ, ᓄᓇᐅᑉ ᐊᓯᐊᓂᑦ ᐃᒡᓗᒐᓴᖕᓄᑦ ᑎᑭᓯᒪᔪᒥᒃ, ᑖᓐᓇ ᓴᓐᓂᖓᔪᓕᖕᒥᒃ ᐃᕐᓱᒃᑎᓕᕐᐹᑦ ᔩᓱᓯᐅᑉ ᑭᖑᓂᖓᓂ.

²⁷ ᐃᓄᒋᐊᒃᑐᕐᔪᐊᑦ ᒪᓕᒃᐳᑦ ᑖᑦᓱᒥᖓ, ᐊᕐᓁᓪᓗ ᐃᓚᖏᑦ ᒪᓕᖃᑕᐅᔪᑦ ᖁᕝᕕᐅᕐᐳᑦ ᐅᒡᒍᐊᕈᑎᖃᕐᓗᑎᒃ ᔩᓱᓯᒥᒃ.

²⁸ ᔩᓱᓯᐅᑉ ᑕᑯᓴᕐᓗᒋᑦ ᐅᖃᐅᑎᕔᑦ, “ᐊᕐᓁᑦ ᔨᕉᓴᓕᒻᒥᐅᑦ, ᕿᐊᑦᔪᑎᒋᓇᓯᓐᖓ, ᐃᓕᑦᓯᓐᓂᒃ ᕿᐊᑦᔪᑎᒋᓕᕆᑦᓯ ᕿᑐᕐᖓᑦᓯᓐᓂᒡᓗ.

²⁹ ᑕᑯᒋᑦ, ᐅᓪᓗᐃᑦ ᑎᑭᑦᓱᒫᕐᐳᑦ ᐃᓄᐃᑦ ᐅᖃᕐᕕᒋᔪᒫᕐᑕᖏᑦ, ‘ᓮᒻᒪᕐᑎᐅᓯᒪᔪᒥᒃ ᐃᓅᓯᖃᕐᐳᑦ ᐊᕐᓁᑦ ᕿᑐᕐᖓᕐᑖᕈᓐᓇᖏᑦᑐᑦ, ᓄᑕᕋᒃᑖᓚᐅᕐᓯᒪᖏᑦᑐᓪᓗ, ᐊᒫᒪᒃᑎᑦᑎᓚᐅᕐᓯᒪᓇᑎᒡᓗ!’

³⁰ ᑕᒪᓐᓇ ᓇᓪᓕᐅᑎᒃᐸᑦ ᐃᓄᐃᑦ ᐅᖃᕈᒫᕐᐳᑦ ᖃᖅᑲᓄᑦ, ‘ᑲᑕᒡᕕᒋᑎᒍᑦ’; ᐱᖑᖕᓄᓪᓗ ᐅᖃᕈᒫᕆᕗᑦ, ‘ᑕᓕᑎᑎᒍᑦ.’

³¹ ᑕᒪᒃᑯᐊ ᐊᑐᕐᑕᐅᔪᓐᓇᕐᐸᑕ ᐱᕈᕐᑐᑦ ᑐᖑᔪᕐᑎᓪᓗᒋᑦ, ᐸᓂᕐᓯᒪᓕᕐᑎᓪᓗᒋᓪᓕ ᖃᓄᐃᑦᑐᖃᕈᒫᕐᐹ?”

³² ᐊᖑᑏᒃᑕᐅᖅ ᒪᕐᕉᒃ ᐊᓯᖏᒃ, ᐱᐅᖏᑦᑐᓕᓯᒪᔫᒃ, ᐊᒻᒪ ᑐᖁᑕᐅᔭᕐᑐᕐᓗᑎᒃ ᑭᑭᐊᒃᑐᕐᑕᐅᕕᒃᓴᒧᐊᕐᑎᑕᐅᒋᕘᒃ ᔩᓱᓯ ᐃᓚᒋᓪᓗᒍ.

³³ ᖃᖅᑲᒧᑦ ᑎᑭᓐᓇᒥᒃ ᐊᑎᓕᖕᒧᑦ ᓂᐊᖁᕕᓂᕐᒥᒃ, ᑕᕝᕙᓂ ᔩᓱᓯ ᑭᑭᐊᒃᑐᕐᐹᑦ, ᐱᐅᖏᑦᑐᓕᓯᒪᔫᒡᓗ, ᐂᑉᐹ ᑕᓕᕐᐱᐊᓂ, ᐂᑉᐸᖓᓗ ᓴᐅᒥᐊᓂ.

³⁴ ᔩᓱᓯ ᐅᖃᕐᐳᖅ, “ᐊᑖᑖᒃ, ᐃᓱᒪᒋᔪᓐᓁᕐᕕᒋᒃᑭᑦ; ᖃᓄᐃᓕᐅᕐᓂᕐᒥᖕᓂᒃ ᖃᐅᔨᒪᖏᒻᒪᑕ.” ᔩᓱᓯᐅᑉ ᐊᓐᓄᕌᖏᑦ ᓇᓚᐅᑖᕈᑎᒋᓪᓗᒋᑦ ᐊᑐᓂᑦ ᐱᑖᕋᓱᐊᕐᐳᑦ.

³⁵ ᐃᓄᐃᑦ ᑕᕝᕙᓂ ᓇᖏᕐᐳᑦ ᑕᑯᓐᓈᕐᓗᑎᒃ; ᔫᑎᓪᓕ ᐊᖓᔪᖅᑳᖏᑦ ᒥᑕᐅᑎᖃᕐᐳᑦ ᔩᓱᓯᒥᒃ, ᐅᖃᕐᓗᑎᒃ, “ᐊᓯᒥᓂᒃ ᐱᐅᓕᓯᓚᐅᕐᐳᖅ; ᐃᒻᒥᓂᒃ ᐱᐅᓕᓕᕐᓕ, ᒥᓮᐊᓯᐅᒍᓂ ᒎᑎᐅᑉ ᓂᕈᐊᕐᓯᒪᔭᖓ!”

³⁶ ᐅᓇᑕᕐᑐᒃᓮᑦᑕᐅᖅ ᒥᑕᐅᑎᒋᕚᑦ; ᒪᔪᕋᕐᕕᒋᓪᓗᒍ ᐅᐂᓂᒥᒃ ᖃᒃᑭᓐᓇᕐᑐᒥᒃ ᐱᑎᓐᓇᓱᐊᕐᐹᑦ,

³⁷ ᐅᖃᕐᓗᑎᒡᓗ, “ᔫᑎᑦ ᐊᖓᔪᖅᑳᕐᔪᐊᕆᒃᐸᑎᑦ, ᐃᓕᖕᓂᒃ ᐱᐅᓕᓚᐅᕆᑦ!”

³⁸ ᖁᓛᓂᓗ ᑎᑎᕋᕐᓯᒪᔪᖃᕐᐳᖅ ᐃᒤᓕᔪᓂᒃ: “ᐅᓇ ᔫᑎᑦ ᐊᖓᔪᖅᑳᕐᔪᐊᖓᑦ.”

³⁹ ᓂᕕᖓᖃᑎᖓᑕᓗ ᐂᑉᐸᖓᑕ ᒥᑕᐅᑎᒋᕚ, ᐅᖃᕐᓗᓂ, “ᒥᓮᐊᓯᐅᓐᖏᓚᑏᑦ? ᐃᓕᖕᓂᒃ ᐱᐅᓕᓚᐅᕆᑦ ᐅᕙᒍᒡᓗ!”

⁴⁰ ᐂᑉᐸᖓᑕᓕ ᐃᓂᕐᑎᕐᐹ ᐅᖃᕐᓗᓂ, “ᒎᑎᒥᒃ ᓯᕘᕋᖏᓐᓇᕖᑦ? ᑍᒫᓪᓗᐊᕐᑕᐅᖅ ᑖᑦᓱᑐᓇᖅ ᓱᒋᐊᕐᑕᐅᔪᑎᑦ ᑐᖁᑕᐅᓂᐊᕐᓗᑎᑦ.

⁴¹ ᐅᕙᒍᒃᓕ ᑍᒫᒃ ᐱᔭᐅᑦᔪᑎᒃᓴᖃᕋᓐᓄᒃ ᐱᓂᐊᕐᕕᐅᕗᒍᒃ ᐱᓂᐊᕐᓂᕆᓚᐅᕐᑕᕗᒃ ᒪᓕᒡᓗᒋᑦ; ᐅᓇᓕ ᐊᖑᑦ ᓈᒻᒪᖏᑦᑐᒥᒃ ᐱᓚᐅᓐᖏᓚᖅ.”

⁴² ᔩᓱᓯᒧᑦ ᐅᖃᕐᐳᖅ, “ᔩᓱᓰ ᐃᖅᑲᐅᒪᓛᕐᐸᕐᒪ ᐊᑕᓂᐅᕕᖕᓄᑦ ᑎᑭᒍᕕᑦ!”

⁴³ ᔩᓱᓯᐅᑉ ᐅᖃᐅᑎᕚ, “ᓱᓕᔪᒥᒃ ᐅᖃᐅᑎᕙᒋᑦ, ᐅᓪᓗᒥ ᐂᑉᐸᕆᓂᐊᕐᐸᕐᒪ ᖁᕕᐊᓇᕐᑐᕕᖕᒥ.”

ᔩᓱᓯᐅᑉ ᑐᖁᓂᖓ

⁴⁴ ᐅᓪᓗᖅ ᕿᑎᕋᓕᕐᑎᓪᓗᒍ, ᓄᓇᓕᒫᖅ ᑖᕐᓯᓚᐅᕐᐳᖅ ᐅᓐᓄᓴᖕᒧᑦ 3ᒧᑦ ᑎᑭᓪᓗᒍ,

⁴⁵ ᓯᕿᓂᖅ ᖃᐅᒪᔪᓐᓃᕐᓯᒪᑎᓪᓗᒍ; ᑐᒃᓯᐊᕐᕕᒡᔪᐊᑉ ᐃᓗᐊᓃᑦᑐᖅ ᑖᓗᑕᕐᔪᐊᖅ ᐊᓕᒃᐳᖅ ᒪᕐᕉᓕᓪᓗᓂ.

⁴⁶ ᔩᓱᓯ ᓂᐱᖅᑯᕐᑐᓪᓗᓂ ᕾᒐᓛᕐᐳᖅ, ᐅᖃᕐᓗᓂ, “ᐊᑖᑕᒃ, ᐊᓂᕐᓂᕋ ᐃᓕᖕᓄᑦ ᑐᓂᕙᕋ!” ᑍᒫᒃ ᐅᖃᕇᕋᒥ ᐊᓂᕐᓇᖏᕐᐳᖅ.

⁴⁷ ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᑕᑯᒐᒥ ᐱᓂᐊᕐᓂᐅᔪᒥᒃ, ᒎᑎ ᓂᕐᑐᓕᕐᐹ, ᐅᖃᕐᓗᓂ, “ᐃᓛᒃ ᐊᖑᑦ ᑖᓐᓇ ᓱᓕᓪᓗᓂ ᐸᓯᔭᐅᑦᔪᑎᒃᓴᖃᓚᐅᓐᖏᓚᖅ!”

⁴⁸ ᐃᓄᓕᒫᑦ ᑕᕝᕙᓃᑦᑐᑦ ᑕᑯᔭᕐᑐᕐᓯᒪᔪᑦ, ᑕᒪᑐᒥᖓ ᖃᐅᔨᒐᒥᒃ ᖃᓄᐃᑦᑐᖃᕐᒪᖔᑦ, ᐊᖏᕐᕋᓕᕐᐳᑦ ᓴᒡᕕᖕᒥᖕᓂᒃ ᐸᑎᒃᓯᖃᑦᑕᕐᓗᑎᒃ ᕿᒃᓵᖕᓂᕐᒧᑦ.

⁴⁹ ᔩᓱᓯᒥᒃ ᖃᐅᔨᒪᓪᓚᕆᒃᑐᓕᒫᑦ, ᐊᕐᓁᓪᓗ ᒐᓕᓕᐊᒥᑦ ᐱᓯᒪᔪᑦ ᐅᖓᓯᒋᔭᖓᓂ ᓇᖏᕐᐳᑦ ᑕᑯᓐᓈᕐᓗᑎᒃ ᑕᒪᒃᑯᓂᖓ.

ᔩᓱᓯᐅᑉ ᐃᓗᕕᕐᑕᐅᓂᖓ

⁵⁰ ᐊᖑᑎᑕᖃᓚᐅᕐᐳᖅ ᔫᓯᐱᒥᒃ ᐊᑎᓕᖕᒥᒃ ᔫᑎᑦ ᓄᓇᖏᑕ ᐃᓚᖓᓐᓂᑦ ᐊᕆᒪᑎᐊᒥ ᓄᓇᖃᕐᑐᒥᒃ. ᑖᓐᓇ ᔫᑎᑦ ᑲᑎᒪᔨᕐᔪᐊᖏᓐᓄᑦ ᐃᓚᒋᔭᐅᔪᖅ, ᐃᓄᑦᓯᐊᕙᐅᕗᖅ ᓇᓛᒎᕐᑐᒥᒃ ᐃᓅᓯᖃᕐᓗᓂ,

⁵¹ ᑖᓐᓇ ᑲᑎᒪᔨᐅᖃᑎᒥᓂᒃ ᐊᖏᖃᑎᖃᓚᐅᓐᖏᓚᖅ ᐱᑦᔪᑎᒋᔭᖏᓐᓂᒃ ᐱᓂᐊᕐᓂᖏᓐᓂᒡᓗ, ᒎᑎᐅᑉ ᐊᑕᓂᐅᕕᖓᑕ ᑎᑭᑦᓱᒫᕐᓂᖓᓂᒃ ᓂᕆᐅᒋᔭᖃᕐᐳᖅ.

⁵² ᑖᓐᓇ ᐰᓛᑑᓯᒧᑦ ᐅᐸᒍᑎᓚᐅᕐᐳᖅ ᔩᓱᓯᐅᑉ ᑎᒥᖓᓂᒃ ᐱᔪᓐᓇᕐᑎᑕᐅᔪᒪᓪᓗᓂ.

⁵³ ᔩᓱᓯᐅᑉ ᑎᒥᖓ ᓴᓐᓂᖓᔪᓕᖕᒥᑦ ᐊᖅᑲᕐᑎᑉᐹ ᐃᒻᒧᓯᕐᓗᒍ ᖃᓪᓗᓈᕐᑕᒥᒃ ᓵᑦᑐᒥᒃ, ᐃᓕᓪᓗᒍ ᐃᓗᕕᕐᒧᑦ ᐃᓗᓕᐅᕐᓯᒪᔪᒧᑦ ᕾᕐᓱᒥ, ᑐᖁᖓᔪᒥᑦ ᓱᓕ ᐃᓗᕕᕐᕕᐅᓚᐅᕐᓯᒪᖏᑦᑐᒧᑦ.

⁵⁴ ᑖᓐᓇ ᐅᓪᓗᖅ ᐅᐸᓗᖕᒊᔭᕐᕕᐅᖕᒪᑦ, ᓴᐸᑎᒧᑦ ᓴᐸᑎᓐᖑᕐᐸᓪᓕᐊᓂᐊᓕᕐᓗᓂ.

⁵⁵ ᐊᕐᓁᑦ ᔩᓱᓯᒥᒃ ᒪᓕᓚᐅᕐᑐᑦ ᒐᓕᓕᐊᒥᑦ ᔫᓯᐱ ᒪᓕᒃᐹᑦ, ᑕᑯᓪᓗᑎᒃ ᐃᓗᕕᕐᒥᒃ, ᔩᓱᓯᐅᑉ ᑎᒥᖓ ᖃᓄᖅ ᐃᓗᕕᕐᑕᐅᖕᒪᖔᑦ ᑕᑯᓐᓈᕐᓗᑎᒃ;

⁵⁶ ᐊᖏᕐᕋᕋᒥᒃ ᑎᐱᑦᓯᐊᕆᒃᓴᐅᑎᑦ ᒪᒪᕐᓴᐅᑎᓪᓗ ᑎᒥᖓᓄᑦ ᒥᖑᐊᕈᑎᒋᓂᐊᕐᑕᑎᒃ ᐅᐸᓗᖕᒊᔭᕐᐰᑦ. ᓴᐸᑎᒥ ᕿᑲᕐᐳᑦ, ᐱᖁᔭᓂᒃ ᒪᓕᒡᓗᑎᒃ.