ᓘᑲᓯᐅᑉ ᐊᒡᓚᖏᑦ 22 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯᐅᑉ ᑐᖁᑕᐅᓇᓱᐊᕈᒪᓂᖓ

¹ ᓇᓪᓕᐅᓐᓂᕐᓯᐅᕐᕕᒃ ᐳᕙᓪᓚᖅᑯᑎᖃᖏᑦᑐᒥᒃ ᓂᐊᖂᔭᕐᑐᕐᕕᒃ ᖃᒡᓕᓕᕐᑎᓪᓗᒍ, ᖄᖏᕐᑕᐅᕕᖕᒥᒃ ᑍᔭᐅᔪᖅ.

² ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᐱᖁᔭᓂᒡᓗ ᐃᓕᓮᔩᑦ ᐃᓱᒪᒃᓴᕐᓯᐅᓕᕐᐳᑦ ᖃᓄᖅ ᔩᓱᓯ ᑐᖁᑕᐅᔪᓐᓇᕐᓯᔪᓐᓇᕐᒪᖔᑦ; ᐃᓄᖕᓂᒃ ᓯᕘᕋᒐᒥᒃ.

ᔫᑕᓯᐅᑉ ᐊᖏᕈᑎᖃᕐᓂᖓ ᔩᓱᓯᒥ ᐱᔭᐅᑎᑦᓯᔪᒪᓪᓗᓂ

³ ᓵᑖᓇᓯ ᐃᑎᓚᐅᕐᐳᖅ ᔫᑕᓯᒧᑦ ᐃᔅᑲᕆᐊᑎᒥᒃ ᑍᔭᐅᔪᒧᑦ, ᑖᑦᓱᒧᖓ ᐃᓕᓐᓂᐊᕐᑎᓄᑦ 12ᓄᑦ ᐃᓚᒋᔭᐅᔪᒧᑦ;

⁴ ᔫᑕᓯ ᐅᖃᖃᑎᖃᕆᐊᕐᑐᕐᐳᖅ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᓐᓂᒃ, ᑐᒃᓯᐊᕐᕕᒡᔪᐊᕐᒥᓗ ᖃᐅᔨᓴᕐᑏᑦ ᐊᖓᔪᖅᑳᖏᓐᓂᒃ, ᖃᓄᖅ ᔩᓱᓯᒥᒃ ᐱᔭᐅᑎᑦᓯᔪᓐᓇᕐᒪᖔᕐᒥ ᑖᒃᑯᓄᖓ.

⁵ ᑖᒃᑯᐊ ᐅᖃᖃᑎᒋᔭᖏᑦ ᖁᕕᐊᓱᓕᕐᐳᑦ, ᐊᑭᓕᕈᒪᓕᕐᐹᓪᓗ ᑮᓇᐅᔭᓂᒃ.

⁶ ᔫᑕᓯ ᑕᒪᑐᒥᖓ ᐊᖏᕐᐳᖅ, ᕿᓂᓕᕐᓗᓂ ᖃᓄᖅ ᐱᕕᒃᓴᖃᕈᓐᓇᕐᒪᖔᕐᒥ ᔩᓱᓯ ᑎᒍᔭᐅᑎᑦᓱᒪᓪᓗᒍ ᑖᒃᑯᓄᖓ ᐃᓄᖕᓄᑦ ᖃᐅᔨᔭᐅᖏᓪᓗᑎᒃ.

ᔩᓱᓯᐅᑉ ᐅᐸᓗᖕᒊᔭᕐᓂᖓ ᖄᖏᕐᑕᐅᕕᒃᓯᐅᑎᒥᒃ ᓂᕆᖃᑎᒌᖕᓂᕐᒥᒃ

⁷ ᐅᓪᓗᖅ ᓇᓪᓕᐅᑎᖕᒪᑦ ᐳᕙᓪᓚᖅᑯᑎᖃᖏᑦᑐᓂᒃ ᓂᐊᖂᔭᕐᑐᕐᕕᒃ, ᓰᐱᐅᓗ ᓄᕐᕋᖓᓂᒃ ᑐᖁᑦᓯᓗᓂ ᑐᓂᕐᕈᓯᕐᕕᐅᓲᖅ.

⁸ ᔩᓱᓯᐅᑉ ᐲᑦᑐᕉᓯᒃᑯᒃ ᔪᐊᓇᓯᒃᑯᒃ ᑎᓕᕚᒃ, ᐅᖃᐅᑎᓪᓗᒋᒃ, “ᐂᓕᕆᑦᓯᒃ ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕈᑎᒃᓴᕗᑦ ᐊᑐᐃᓐᓇᕈᕆᐊᕐᑐᕐᓗᒍ, ᓂᕆᖃᑎᒌᖁᓪᓗᑕ.”

⁹ ᑖᒃᑯᐊᒃ ᐊᐱᕆᕘᒃ, “ᓇᓂ ᐋᖅᑭᒃᓱᐃᔭᕐᑐᖁᔨᕕᑦ?”

¹⁰ ᔩᓱᓯᐅᑉ ᐅᖃᐅᑎᕚᒃ, “ᐃᒡᓗᒐᓴᒡᔪᐊᓄᑦ ᑎᑭᒃᑯᑦᓯᒃ, ᐊᖑᑦ ᐃᒪᖃᐅᑎᒥᒃ ᐊᒡᔭᕐᓯᔪᖅ ᐹᕐᓂᐊᕐᐸᓯᒃ; ᑖᓐᓇ ᒪᓕᒃᓯᒃᑯᒃ ᐃᒡᓗᒧᑦ ᐃᑎᕐᕕᒋᔭᖓᓄᑦ,

¹¹ ᐃᒡᓘᑉ ᐃᓄᐊᓄᑦ ᐅᖃᓂᐊᕐᐳᓯᒃ, ‘ᐊᔪᕆᕐᑐᐃᔨᐅᑉ ᐅᖃᐅᑦᔭᐅᖁᖕᒪᑎᑦ, ᓇᐅᒃᑍᒪ ᐃᓂᒃᓴᖅ ᐃᓕᓐᓂᐊᕐᑎᒃᑲᓗ ᓂᕆᕕᒋᓂᐊᕐᑕᕗᑦ ᖄᖏᕐᑕᐅᕕᒃᓯᐅᑎᒥᒃ?’

¹² ᑖᑦᓱᒪ ᑕᑯᑎᓐᓂᐊᕐᐹᓯᒃ ᐃᒡᓗᕈᓯᕐᒥᒃ ᐊᖏᔪᒥᒃ ᐊᑐᐃᓐᓇᕐᒥᒃ ᐃᒡᓘᑉ ᖁᓛᓃᑦᑐᒥᒃ; ᑕᕝᕙᓂ ᐋᖅᑭᒃᓱᐃᓂᐊᕐᐳᓯᒃ ᓂᕆᕕᒋᓂᐊᕐᑕᑦᑎᓐᓂᒃ.”

¹³ ᑖᒃᑯᐊᒃ ᑎᓕᔭᐅᔫᒃ ᑍᑯᓐᖓᕐᐴᒃ, ᑍᒫᓪᓗᐊᖅ ᑕᒤᓐᓂᒃ ᔩᓱᓯᐅᑉ ᐅᖃᐅᓯᕆᔭᖏᓐᓂᒃ ᐱᓇᓱᐊᕐᐳᒃ; ᑕᕝᕙᓂ ᓂᕆᓂᐊᕐᑕᑎᒃ ᖄᖏᕐᑕᐅᕕᒃᓯᐅᕈᑎᒃᓴᖅ ᐋᖅᑭᒃᓱᕐᐹᒃ.

ᐊᑕᓂᐅᑉ ᐅᓐᓄᒍᒻᒥᑕᕐᓂᖓ

¹⁴ ᐃᑲᕐᕋᖅ ᓇᓪᓕᐅᑎᖕᒪᑦ, ᔩᓱᓯᐅᑉ ᐃᓂᒋᓂᐊᕐᑕᓂ ᐅᐸᒃᐹ, ᐋᐴᓯᑕᓖᑦ ᐃᓚᒋᓪᓗᒋᑦ.

¹⁵ ᐅᖃᐅᑎᓪᓗᒋᑦ, “ᐆᒥᖓ ᕿᓚᓈᒻᒪᕆᒃᓗᖓ ᖄᖏᕐᑕᐅᕕᒃᓯᐅᑎᒥᒃ ᓂᕆᖃᑎᒋᔪᒪᓚᐅᕐᐸᑦᓯ ᐋᓐᓂᐊᑎᑕᐅᖏᓐᓂᓐᓂ;

¹⁶ ᐅᖃᐅᑎᕙᑦᓯ ᓂᕆᒃᑲᓐᓂᕐᓂᐊᕈᓐᓃᕋᒪ ᑍᒤᑦᑐᒥᒃ ᒎᑎᐅᑉ ᐊᑕᓂᐅᕕᖓᓂ ᓇᓪᓕᐅᑎᔭᕆᐊᓖᑦ ᐱᔭᕇᓚᐅᖏᓐᓂᖏᓐᓂ.”

¹⁷ ᔩᓱᓯᐅᑉ ᐃᒥᐅᑎ ᑎᒍᕚ, ᖁᔭᓕᔭᕇᕋᒥ ᐅᖃᕐᐳᖅ, “ᑖᓐᓇ ᑎᒍᓗᒍ ᐊᑐᓂᑦ ᓂᐅᕐᓯᕕᒋᓯᐅᒃ;

¹⁸ ᐅᖃᐅᑎᕙᑦᓯ ᒫᓐᓇᒥᑦ ᐱᒋᐊᕐᓗᒍ ᐅᐂᓂᒥᒃ ᐃᒥᕐᓂᐊᕈᓐᓃᕋᒪ ᒎᑎᐅᑉ ᐊᑕᓂᐅᕕᖓ ᑎᑭᖅᑳᕐᑎᓐᓇᒍ.”

¹⁹ ᓂᐊᖂᔭᖅ ᑎᒍᒐᒥᐅᒃ, ᖁᔭᓕᔭᕇᕋᒥ ᐊᕕᒃᐹ ᑖᒃᑯᓄᖓ ᑐᓂᓪᓗᒍ, ᐅᖃᕐᐳᖅ, “ᐅᓇ ᑕᕝᕙ ᑎᒥᒐ ᑐᓂᔭᐅᔪᖅ ᐃᓕᑦᓯᓐᓄᑦ. ᑍᒤᓕᐅᖃᑦᑕᕆᑦᓯ ᐃᖅᑲᐅᒪᑦᔪᑎᒋᓗᒍ ᐅᕙᓐᓂᒃ.”

²⁰ ᑍᒫᒃᑕᐅᖅ ᐃᒥᐅᑎ ᑎᒍᕚ ᓂᕆᔭᕇᕋᒥ, ᐅᖃᕐᓗᓂ, “ᐅᓇ ᐃᒥᐅᑎ ᑯᕕᔭᐅᔪᖅ ᐃᓕᑦᓯ ᐱᓪᓗᓯ ᐊᖏᖃᑎᒌᒍᑎ ᓄᑖᖅ ᐊᐅᓐᓂᒃ ᓇᓗᓁᒃᑯᑕᓕᒃ.

²¹ “ᑕᑯᒋᑦᓯ ᐅᕙᓐᓂᒃ ᐱᔭᐅᑎᑦᓯᔪᖅ ᐅᕙᓃᑉᐳᖅ ᓂᕆᖃᑎᒋᔭᕋ ᓂᕐᕆᕕᖕᒥ.

²² ᐃᓅᑉ ᐃᕐᓂᖓ ᑐᖁᑕᐅᓂᐊᕐᐳᖅ ᑍᒫᒃ ᐋᖅᑭᒃᑕᐅᓯᒪᖕᒪᑦ; ᑲᑉᐱᐊᓐᓇᒦᒡᓕ ᐊᖑᑦ ᑖᓐᓇ ᐱᔭᐅᑎᑦᓯᔪᖅ ᑖᑦᓱᒥᖓ!”

²³ ᑖᒃᑯᐊ ᐃᒻᒥᖕᓄᑦ ᐊᐱᕐᓱᖃᑦᑕᐅᑎᓕᕐᐳᑦ, ᓇᓪᓕᐊᑦ ᑍᒫᒃ ᐱᔭᐅᑎᑦᓯᓂᐊᕐᒪᖔᑦ.

ᐊᖏᓂᕐᓴᐅᔪᒪᓂᕐᒧᑦ ᐂᕙᐅᑎᓂᖅ

²⁴ ᐃᓕᓐᓂᐊᕐᑎᓪᓕ ᐃᒻᒥᖕᓄᑦ ᐂᕙᖃᑎᒌᓕᕐᐳᑦ, ᓇᓪᓕᐊᑦ ᐊᖏᓂᕐᓴᒥᒃ ᐃᓱᒪᒋᔭᐅᔪᒃᓴᐅᖕᒪᖔᑦ.

²⁵ ᔩᓱᓯᐅᑉ ᐅᖃᐅᑎᕔᑦ, “ᔫᑎᐅᖏᑦᑐᑦ ᐊᖓᔪᖅᑳᕐᔪᐊᖏᑦ ᐱᔪᓐᓇᕐᓂᖃᕐᒪᑕ ᐃᓄᖁᑎᒥᖕᓄᑦ; ᐊᐅᓚᑦᓯᔩᓪᓗ ᑍᔭᐅᔪᒪᕙᒃᐳᑦ ᐃᓄᖕᓄᑦ ᓯᕗᓕᕐᑎᑦᓂᒃ.

²⁶ ᐃᓕᑦᓯᓕ ᑍᒤᑦᑕᕆᐊᖃᓐᖏᓚᓯ; ᓇᓕᕐᓯᓕ ᐊᖏᓂᕐᐹᖑᔪᖅ ᐃᓕᑦᓯᓐᓂᑦ ᐃᓅᓱᖕᓂᕐᐹᑎᑐᑦ ᑍᒤᑦᑕᕆᐊᖃᕐᐳᖅ, ᓯᕗᓕᕐᑎᐅᔪᕐᓗ ᐱᔨᒋᔭᐅᔪᑐᑦ ᑍᒤᑦᑕᕆᐊᖃᕐᐳᖅ.

²⁷ ᓇᓪᓕᐊᒃ ᐊᖏᓂᕐᓴᐅᕚ, ᓂᕆᕕᖕᒥ ᐃᒃᓯᕙᔪᖅ ᐅᕝᕙᓗ ᓂᕆᓂᐊᕐᑕᖏᓐᓂᒃ ᕾᑦᓯᔪᖅ? ᐃᓛᒃ ᑖᓐᓇᐅᕗᖅ ᐃᒃᓯᕚᕐᑐᖅ ᓂᕆᓂᐊᕐᓗᓂ ᑖᓐᓇ ᐊᖏᓂᕐᓴᐅᕗᖅ; ᐅᕙᖓᓕ ᐃᓕᑦᓯᓐᓂᒃ ᓂᕆᑎᑦᓯᔪᖅ ᐊᑦᔨᒋᕙᕋ.

²⁸ “ᐃᓕᑦᓯ ᐃᓚᒌᓐᓇᓚᐅᕐᐸᑦᓯᓐᖓ ᐅᖁᒤᑦᑐᒃᑰᕐᑎᓪᓗᖓ;

²⁹ ᐊᑖᑕᒪ ᑐᓂᓯᕕᒋᓚᐅᕐᒪᖓ ᐊᐅᓚᑦᓯᔪᓐᓇᕐᓂᕐᒥᒃ, ᑍᒫᒃᑕᐅᖅ ᑐᓂᓯᕕᒋᔪᒪᕙᑦᓯ ᐊᐅᓪᓚᑦᓯᔪᓐᓇᕐᓂᕐᒥᒃ ᐊᑕᓂᐅᕕᖕᒥ,

³⁰ ᓂᕆᖃᑎᒋᔪᒫᕋᑦᓯ ᐃᒥᖃᑎᒋᓗᓯᓗ ᐊᑕᓂᐅᕕᖕᒪ ᓂᕆᕕᐊᓂ, ᐃᒃᓯᕙᔪᒫᕐᐳᓯᓗ ᐃᒃᓯᕙᐅᑕᕐᔪᐊᓂ ᐊᖓᔪᖅᑳᖑᓗᓯ ᐃᓴᕆᐊᓕᒥᐅᑉ ᑭᖑᕚᖏᓐᓄᑦ 12ᓄᑦ.”

ᔩᓱᓯᐅᑉ ᐱᔪᖃᕐᓂᐊᕐᑐᒥᒃ ᐅᖃᐅᑦᔨᓂᖓ ᐲᑦᑐᕉᓯᒥᒃ

³¹ “ᓮᒨᓃ, ᓮᒨᓃ, ᓈᓚᒋᑦ! ᓵᑖᓇᓯ ᐱᔪᒪᒐᓗᐊᕐᐳᖅ ᐊᑕᖏᕐᓗᓯ ᓴᓃᔭᕈᒪᓪᓗᓯ ᐱᕈᕐᓰᕕᓕᕆᔨᐅᑉ ᓂᐊᖂᔭᒃᓴᓂᒃ ᓴᓃᔧᓂᖓᑐᑦ,

³² ᑐᒃᓯᐊᓚᐅᕐᐳᖓᓕ ᐅᒃᐱᕐᓃᑦ ᓵᓚᐅᖁᓇᒍ; ᐅᑎᕈᕕᑦ ᐅᕙᓐᓄᑦ, ᐃᓅᖃᑎᕕᑦ ᐅᒃᐱᕐᓂᕐᖏᑦ ᒪᑭᑎᒃᑲᓐᓂᕆᐊᖃᓛᕐᐸᑎᑦ.”

³³ ᐲᑦᑐᕉᓯᐅᑉ ᑭᐅᕚ, “ᐊᑕᓃᖅ, ᐅᐸᓗᖕᒊᕐᓯᒪᕗᖓ ᑎᒍᔭᐅᖃᑎᒋᔪᒪᓪᓗᑎᑦ ᑐᖁᖃᑎᒋᔪᒪᓪᓗᑎᓪᓗ.”

³⁴ ᔩᓱᓯᐅᑉ ᐅᖃᐅᑎᕚ, “ᐲᑦᑐᕉᓰ ᐅᖃᐅᑎᕙᒋᑦ, ᐊᖑᑎᕕᐊᖅ ᐅᓐᓄᒃ ᓂᓪᓕᕐᓂᐊᕐᐳᖅ ᐱᖓᓱᐃᕐᓱᕐᓗᑎᑦ ᐅᕙᓐᓂᒃ ᖃᐅᔨᒪᖏᓐᓂᕋᖃᑦᑕᕐᓯᒪᓕᕐᑎᓪᓗᑎᑦ.”

ᑮᓇᐅᔭᒃᑯᕕᒃ, ᐃᒃᐱᐊᕐᔪᒃ, ᓴᕕᒡᔪᐊᕐᓗ

³⁵ ᐃᓕᓐᓂᐊᕐᑎᓂ ᐅᖃᐅᑎᕔᑦ, “ᑍᑦᓱᒪᓂ ᑎᓕᓚᐅᕋᑦᓯ ᑮᓇᐅᔭᒃᑯᕕᓕᔭᖁᓇᓯ ᐃᒃᐱᐊᕐᔪᓕᔭᖁᓇᓯᓗ ᐃᑎᒐᒍᑎᓕᔭᕋᓯᓘᓐᓃᑦ, ᓱᓇᑐᐃᓐᓇᕐᒥᒃ ᑭᓐᖒᒪᔭᖃᓚᐅᕐᐱᓰ?” ᑖᒃᑯᐊ ᑭᐅᕚᑦ, “ᓱᓇᒥᒡᓘᓐᓃᑦ ᑭᓐᖒᒪᔭᖃᓚᐅᓐᖏᓚᒍᑦ.”

³⁶ ᔩᓱᓯᐅᑉ ᐅᖃᐅᑎᕔᑦ, “ᒫᓐᓇᓕ, ᓇᓕᕐᓯ ᑮᓇᐅᔭᒃᑯᕕᖃᕈᓂ ᐃᒃᐱᐊᕐᔪᖃᕈᓂᓘᓐᓃᑦ ᓇᒃᓴᕆᐊᖃᓕᕐᐳᖅ. ᓇᓕᕐᓯ ᓴᕕᒡᔪᐊᖃᖏᒃᑯᓂ ᐅᓕᒡᔪᐊᓂ ᓂᐅᕐᕈᑎᒋᔭᒃᓴᕆᕚ ᓴᕕᒡᔪᐊᕐᑖᕈᑎᒋᓗᒍ.

³⁷ ᑕᒪᒃᑯᓂᖓ ᐅᖃᐅᑎᕙᑦᓯ; ᐊᒡᓔᑦ ᓈᓚᐅᑦᓯᖁᓪᓗᒋᑦ ᐅᕙᓐᓂᒃ ᐅᖃᐅᓯᖃᕐᓯᒪᔪᑦ, ‘ᐱᐅᖏᑦᑐᓕᔪᕐᔪᐊᓄᑦ ᐃᓚᓕᐅᑦᔭᐅᕗᖅ,’ ᑖᒃᑯᐊ ᐅᕙᓐᓂᒃ ᐅᖃᐅᓯᖃᕐᓯᒪᔪᑦ ᓇᓚᐅᑦᓯᓂᐊᕐᒪᑕ.”

³⁸ ᐃᓕᓐᓂᐊᕐᑎᖏᑕ ᐅᖃᐅᑎᕚᑦ, “ᐊᑕᓃᖅ ᑕᑯᒋᑦ, ᐅᕝᕙ ᓴᕕᒡᔪᐊᒃ ᒪᕐᕉᒃ.” ᑭᐅᕔᑦ, “ᑖᒃᑯᐊᒃ ᓈᒻᒪᒃᐴᒃ.”

ᔩᓱᓯᐅᑉ ᑐᒃᓯᐊᕐᓂᖓ ᖃᖅᑲᒥ ᓇᐹᕐᑐᓕᖕᒥ ᐅᕐᓱᒃᓴᐅᔪᓐᓇᕐᑐᓂᒃ ᐸᐅᕐᖓᖃᓲᓂᒃ

³⁹ ᔩᓱᓯ ᐊᓂᒐᒥ, ᐂᓕᕐᐳᖅ ᐱᐅᓯᕆᕙᒃᑕᒥᑐᑦ, ᖃᖅᑲᒧᑦ ᓇᐹᕐᑐᓕᖕᒧᑦ ᐅᕐᓱᒃᓴᐅᔪᓐᓇᕐᑐᓂᒃ ᐸᐅᕐᖓᖃᓲᒧᑦ; ᐃᓕᓐᓂᐊᕐᑎᖏᑕ ᒪᓕᒃᐹᑦ.

⁴⁰ ᐅᐸᒃᑕᒥᓄᑦ ᑎᑭᓐᓇᒥ ᐅᖃᐅᑎᕔᑦ, “ᑐᒃᓯᐊᕆᑦᓯ ᐱᐅᓐᖏᑐᒥᒃ ᐱᔪᒥᓵᕐᑕᐅᓂᕐᒧᑦ ᑎᑭᖁᓇᓯ.”

⁴¹ ᕿᒪᒃᐰᑦ ᒥᓘᑎᒧᑦ ᑎᑭᑕᒃᓴᐅᔪᒧᑦ, ᓰᖅᑯᕐᓗᓂ ᑐᒃᓯᐊᕐᐳᖅ,

⁴² ᐅᖃᕐᓗᓂ, “ᐊᑖᑖᒃ, ᐱᔪᒪᒍᕕᑦ, ᐃᒥᐅᑦ ᐅᓇ ᐲᕐᑎᓚᐅᕈᒃ ᐅᕙᓐᓂᑦ; ᐱᔪᒪᔭᕋᐅᖏᑦᑐᕐᓕ, ᐱᔪᒪᔧᓪᓕ ᐱᓕ.”

⁴³ ᐂᖏᓕᒧᑦ ᕿᓚᖕᒥᑦ ᐅᐸᒃᑕᐅᕗᖅ ᓲᖑᓯᑎᑕᐅᓪᓗᓂᓗ.

⁴⁴ ᐅᖁᒤᒃᓴᓗᐊᓕᕋᒥ ᐊᒃᓱᕈᕐᓂᕐᓴᐅᓪᓗᓂ ᑐᒃᓯᐊᓕᕐᐳᖅ, ᐊᐅᒃᑲᕐᓂᖓᓕᕐᓗᓂ ᐊᐅᒃᑎᑐᑦ ᑯᑐᒃᑐᓂᒃ ᓄᓇᒧᑦ.

⁴⁵ ᑐᒃᓯᐊᕐᓂᕐᒥᓂᑦ ᒪᑭᓐᓇᒥ, ᐃᓕᓐᓂᐊᕐᑎᒥᓄᑦ ᐅᑎᕐᐳᖅ ᓯᓂᒃᑐᑦ ᐅᐸᒃᐰᑦ ᕿᒃᓵᓗᐊᕐᓂᕐᒧᑦ ᓯᓂᒍᒪᑐᐃᓐᓇᓕᕐᑐᑦ.

⁴⁶ ᐅᖃᐅᑎᓪᓗᒋᑦ, “ᓱᖕᒪᑦ ᓯᓂᒃᐱᓰ? ᒪᑭᒋᑦᓯ ᑐᒃᓯᐊᕐᓗᓯ ᐱᐅᓐᖏᑐᒧᑦ ᐱᔪᒥᓵᕐᑕᐅᓂᕐᒧᑦ ᑎᑭᖁᓇᓯ.”

ᔩᓱᓯᐅᑉ ᑎᒍᔭᐅᓂᖓ

⁴⁷ ᔩᓱᓯᓕ ᓱᓕ ᐅᖃᓪᓚᒃᑎᓪᓗᒍ, ᐃᓄᒋᐊᒃᑐᑦ ᑎᑭᑉᐳᑦ, ᔫᑕᓯᐅᑉ ᐃᓕᓐᓂᐊᕐᑏᑦ 12 ᐃᓚᖓᑦᑕ ᑕᕝᕗᓐᖓᐅᑎᔭᖏᑦ. ᔩᓱᓯ ᐅᐸᒃᑲᒥᐅᒃ ᑯᓂᒃᐹ;

⁴⁸ ᔩᓱᓯᐅᑉ ᐅᖃᐅᑎᕚ, “ᔫᑕᓰ, ᐃᓅᑉ ᐃᕐᓂᖓ ᑯᓂᒃᓗᒍ ᐱᔭᐅᒃᑲᕐᐱᐅᒃ?”

⁴⁹ ᐃᓕᓐᓂᐊᕐᑎᖏᑦ ᖃᐅᔨᒐᒥᒃ ᖃᓄᐃᓕᐅᕐᑐᖃᓕᕐᒪᖔᑦ, ᔩᓱᓯ ᐊᐱᕆᕚᑦ, “ᐊᑕᓃᖅ, ᓴᕕᒡᔪᐊᒥᒃ ᐊᑐᑐᐃᓐᓇᕆᐊᖃᓕᕐᐱᑖ?”

⁵⁰ ᐃᓚᖓᑦᑕᓕ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦᑕ ᐱᔨᑲᑖᖓ ᓴᕕᒡᔪᐊᒥᓄᑦ ᓯᐅᑎᖓᑕ ᑕᓕᕐᐱᐊ ᓇᑲᑉᐹ.

⁵¹ ᔩᓱᓯ ᐅᖃᕐᐳᖅ, “ᑍᒤᓕᐅᕈᓐᓃᕆᑦᓯ!” ᐊᖑᑎᐅᑉ ᓯᐅᑎᖓ ᐊᒃᑐᕐᓗᒍ ᐋᖅᑭᒃᐹ.

⁵² ᔩᓱᓯ ᐅᖃᕐᐳᖅ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᓐᓄᑦ ᑐᒃᓯᐊᕐᕕᒡᔪᐊᓪᓗ ᐊᖓᔪᖅᑳᖏᓐᓄᑦ ᐃᓄᐃᓪᓗ ᐊᖓᔪᖅᑲᖏᓐᓄᑦ, ᑕᕝᕗᓐᖓᕐᓯᒪᔪᑦ ᑎᒍᓯᔭᕐᑐᕐᓗᑎᒃ ᑖᑦᓱᒥᖓ, “ᕾᕕᓰ ᓴᕕᒡᔪᐊᓕᔭᕐᓗᓯ ᐊᓇᐅᑕᓕᔭᕐᓗᓯᓗ ᐱᕋᔭᒃᓯᒪᔪᒥᒃ ᑎᒍᓯᔭᕐᑐᕐᑐᑎᑐᑦ?

⁵³ ᖃᐅᑕᒫᑦ ᐃᓚᒋᖃᑦᑕᓚᐅᕐᐸᑦᓯ ᑐᒃᓯᐊᕐᕕᒡᔪᐊᕐᒥ, ᑎᒍᓚᐅᓐᖏᓚᑦᓯᓐᖓ. ᒫᓐᓇᓕ ᐃᑲᕐᕋᓯ ᓇᓪᓕᐅᑎᕗᖅ, ᑖᕐᑑᓪᓗ ᐱᔪᓐᓇᕐᓂᖓ ᐊᐅᓚᑦᓯᓕᕐᐳᖅ.”

ᐲᑦᑐᕉᓯᐅᑉ ᖃᐅᔨᒪᖏᓐᓂᕋᕐᓂᖓ ᔩᓱᓯᒥᒃ

⁵⁴ ᑕᕝᕙ ᔩᓱᓯ ᑎᒍᕚᑦ ᐊᐅᓪᓚᕈᑎᓪᓗᒍ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦᑕ ᐃᒡᓗᖓᓅᕈᑎᕚᑦ; ᐲᑦᑐᕉᓯ ᐅᖓᓯᒋᔮᓂ ᒪᓕᒃᐳᖅ;

⁵⁵ ᐃᑯᐊᓚᑎᑦᓯᔪᖃᕐᐳᖅ ᐃᒡᓘᑉ ᓯᓚᑖᓂ ᐃᒃᓯᕙᓪᓗᑎᒃ ᐊᕙᑖᓂ, ᐲᑦᑐᕉᓯᐅᓪᓗ ᐃᒃᓯᕙᖃᑎᒋᕔᑦ.

⁵⁶ ᐊᕐᓇᐅᑉ ᐱᔨᐅᑉ, ᑕᑯᒐᒥᐅᒃ ᐃᑯᒪᒧᑦ ᖃᐅᒻᒥᑕᐅᓯᒪᔪᖅ, ᑕᑯᓐᓈᕐᓗᓂᐅᒃ ᐅᖃᕐᐳᖅ, “ᐆᒪ ᐊᖑᑎᐅᑉ ᔩᓱᓯ ᐃᓚᒋᕚ.”

⁵⁷ ᐲᑦᑐᕉᓯ ᖃᐅᔨᒪᖏᓐᓂᕋᕐᓗᓂ ᐅᖃᕐᐳᖅ, “ᐊᕐᓈᖅ, ᖃᐅᔨᒪᓐᖏᓚᕋ.”

⁵⁸ ᐊᑯᓂᐅᓗᐊᕐᑎᓐᓇᒍ ᐊᓯᐊᑕ ᑕᑯᒋᕚ ᐅᖃᕐᓗᓂ, “ᐃᕝᕕᑦᑕᐅᖅ ᑍᒃᑯᐊ ᐃᓚᒋᕚᑎᑦ.” ᐲᑦᑐᕉᓯ ᐅᖃᕐᐳᖅ, “ᑍᒃᑯᓄᖓ ᐃᓚᒋᔭᐅᓐᖏᓚᖓ.”

⁵⁹ ᐃᑲᕐᕋᖅ ᐊᓂᒍᕐᓯᒪᓕᕐᑎᓪᓗᒍ ᓱᓕ ᐊᓯᐊ ᐅᖃᓕᕆᕗᖅ, “ᐆᒪ ᐃᓛᒃ ᖁᓚᕐᓇᖏᑦᑐᒥᒃ ᔩᓱᓯ ᐃᓚᒋᕚ; ᒐᓕᓕᐊᒥᐅᖑᖕᒪᑦ.”

⁶⁰ ᐲᑦᑐᕉᓯ ᐅᖃᕐᐳᖅ, “ᐅᖃᐅᓯᕆᔭᑎᓪᓘᓐᓃᑦ ᖃᐅᔨᒪᓐᖏᓚᒃᑲ” ᓱᓕᓕ ᐅᖃᓪᓚᒃᑎᓪᓗᒍ, ᑕᕝᕔᓐᓇᖅ ᐊᖑᑎᕕᐊᖅ ᓂᓪᓕᕐᐳᖅ.

⁶¹ ᐊᑕᓂᐅᓪᓗ ᕿᕕᐊᕐᓗᓂᐅᒃ ᐲᑦᑐᕉᓯ ᑕᑯᓴᕐᐹ. ᐲᑦᑐᕉᓯ ᐃᖅᑬᓕᕐᐳᖅ ᐊᑕᓂᐅᑉ ᐅᖃᐅᓯᖏᓐᓂᒃ, ᐅᖃᐅᑎᖅᑲᐅᖕᒪᒍ, “ᐊᖑᑎᕕᐊᖅ ᓂᓪᓕᖅᑳᕐᑎᓐᓇᒍ, ᐅᓪᓗᒥ ᐱᖓᓱᐃᕐᓱᕐᓗᑎᑦ ᐅᕙᓐᓂᒃ ᖃᐅᔨᒪᖏᓐᓂᕋᖃᑦᑕᕐᓂᐊᕐᐳᑎᑦ.”

⁶² ᐲᑦᑐᕉᓯ ᐊᓂᕗᖅ ᐊᒃᓱᐊᓗᒃ ᕿᐊᓪᓗᓂ.

ᔩᓱᓯᐅᑉ ᒥᑕᐅᑎᒋᔭᐅᓂᖓ ᐋᓐᓂᕐᓯᕐᑕᐅᓂᖓᓗ

⁶³ ᔩᓱᓯᒥᒃ ᑎᒍᓯᓯᒪᔪᑦ ᑖᑦᓱᒥᖓ ᒥᑕᐅᑎᖃᕐᐳᑦ ᐊᓇᐅᓕᕐᓗᒍᓗ.

⁶⁴ ᐃᔨᖏᒃ ᒪᑐᐊᕐᓗᒋᒃ ᐊᐱᕆᖃᑦᑕᓕᕐᐹᑦ, “ᓇᓚᐅᑦᑍᓚᐅᕆᑦ! ᑭᐊ ᑎᒡᓗᒃᐹᑏᑦ?”

⁶⁵ ᐊᓯᖏᓐᓂᒡᓗ ᐊᒥᓱᓂᒃ ᐅᖃᐅᓯᖃᕐᐳᑦ ᐅᖃᕐᓂᕐᓗᒡᓗᑎᒃ ᐊᑭᕋᕐᑐᕐᓗᒍ.

ᔩᓱᓯᐅᑉ ᐃᖅᑲᕐᑐᐃᔨᕐᔪᐊᓃᑎᑕᐅᓂᖓ

⁶⁶ ᐅᓪᓛᓐᖑᕐᑎᓪᓗᒍ ᖃᐅᒪᓕᕐᒪᑦ, ᑐᒃᓯᐊᕐᕕᒡᔪᐊᑉ ᐊᖓᔪᖅᑳᖏᑦ ᑐᓂᕐᕈᓯᕐᑎᑦᓯᔩᓪᓗ ᐊᖓᔪᖅᑳᖏᑦ, ᐱᖁᔭᓂᒡᓗ ᐃᓕᓮᔩᑦ ᑲᑎᕗᑦ; ᔩᓱᓯ ᑲᑎᒪᔪᑦ ᓵᖓᓐᓄᐊᕐᑎᑉᐹᑦ, ᐅᖃᕐᓗᑎᒃ,

⁶⁷ “᙭ᔅᑑᓯᐅᖕᒪᖔᕐᐱᑦ ᐅᖃᐅᑎᓚᐅᕐᑎᒍᑦ.” ᔩᓱᓯᐅᑉ ᐅᖃᐅᑎᕔᑦ, “ᐅᖃᐅᑎᒍᑦᓯ ᐅᒃᐱᕆᓂᐊᓐᖏᓚᑦᓯᓐᖓ;

⁶⁸ ᐊᐱᕆᒍᑦᓯᓘᓐᓃᑦ ᑭᐅᔪᓐᓇᕐᓂᐊᓐᖏᓚᓯ.

⁶⁹ ᒫᓐᓇᒥᑦ ᐱᒋᐊᕐᓗᒍ ᐃᓅᑉ ᐃᕐᓂᖓ ᐃᒃᓯᕙᔪᒫᓕᕐᐳᖅ ᒎᑎᐅᑉ ᐊᔪᒐᖃᖏᑦᑑᑉ ᑕᓕᕐᐱᐊᓂ.”

⁷⁰ ᑖᒃᑯᐊᓕᒫᑦ ᐊᐱᕆᕚᑦ, “ᑕᕝᕚ ᒎᑎᐅᑉ ᐃᕐᓂᕆᕚᑏᑦ?” ᔩᓱᓯᐅᑉ ᑭᐅᕔᑦ, “ᑕᕝᕙ ᐅᖃᕇᕋᑦᓯ ᑖᓐᓇᐅᕗᖓ.”

⁷¹ ᑖᒃᑯᐊ ᐅᖃᕐᐳᑦ, “ᐊᓯᐊᓂᒃ ᖃᐅᔨᓯᒪᔪᒃᓴᒥᒃ ᕿᓂᕆᐊᖃᕈᓐᓃᕐᐳᒍᑦ, ᓇᖕᒥᓂᖅ ᐅᖃᕐᑎᓪᓗᒍ ᑐᓴᕋᑦᑕ.”