ᓘᑲᓯᐅᑉ ᐊᒡᓚᖏᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦᐊᔪᕐᓂᖅ ᒫᑎᐅᓯ 18:6-7 , 21-22 ; ᒫᑯᓯ 9:42 1 ᔩᓱᓯᐅᑉ ᐃᓕᓐᓂᐊᕐᑎᓂ ᐅᖃᐅᑎᕔᑦ, “ᐊᔪᕐᓂᕐᒧᑦ ᐱᔪᒥᓵᕐᑕᐅᓂᖅ ᐱᑕᕾᓐᓇᕐᓂᐊᕋᓗᐊᕐᐳᖅ; ᑲᑉᐱᐊᓐᓇᒦᒡᓕ ᑍᓐᓇ ᐊᖅᑯᑎᒋᔭᐅᔪᖅ! 2 ᐱᐅᓂᕐᓴᐅᒐᔭᕐᐳᖅ ᑍᓐᓇ ᐊᖅᑯᑎᒋᔭᐅᔪᖅ ᓂᐊᖂᔭᒃᓴᓂᒃ ᓯᖃᓪᓕᓯᕕᐅᑉ ᐅᔭᕋᒃᑕᖓᓂᒃ ᖁᖓᓯᖓᒍᑦ ᓂᕕᓐᖕᒊᕕᐅᓗᓂ ᐃᒪᕕᖕᒧᑦ ᑭᕕᑎᑕᐅᒃᐸᑦ, ᐅᑯᓂᖓᑯᓗᒃ ᐊᔪᕐᑐᓕᑎᑦᓯᓂᖓᓂᑦ. 3 ᐱᓂᐊᕐᓂᕆᔭᑦᓯᓐᓂᒃ ᖃᐅᔨᒪᓇᓱᐊᑎᐊᖃᑦᑕᕆᑦᑎ; ᖃᑕᓐᖑᑏᑦ ᐊᔪᕐᑐᓕᒃᐸᑦ ᐃᓂᕐᑎᕈᒃ, ᖃᕿᐊᓕᕐᐸᓪᓗ ᐃᓱᒪᒋᔪᓐᓁᕐᕕᒋᓗᒍᒃ; 4 ᐅᓪᓗᒥᒃ ᐊᑕᐅᓯᕐᒥ 7ᐃᑐᕐᓗᓂ ᐊᔪᕐᑐᓕᕕᒋᒃᐸᑎᑦ, ᐃᓕᖕᓄᑦ ᕾᕙᒡᓗᓂ ᐅᖃᕅᒃᐸᑦ ‘ᖃᕿᐊᓕᕐᐳᖓ,’ ᐃᓱᒪᒋᔪᓐᓁᕐᕕᒋᖃᑦᑕᑕᒃᓴᕆᕙᑦ.” ᐅᒃᐱᕐᓂᖅ 5 ᐋᐴᓯᑕᓖᑦ ᐊᑕᓂᕐᒧᑦ ᐅᖃᕐᐳᑦ, “ᐅᒃᐱᕐᓂᕗᑦ ᐊᖏᒡᓕᕚᓪᓕᕐᑎᓚᐅᕈᒃ!” 6 ᐊᑕᓂᐅᑉ ᐅᖃᐅᑎᕔᑦ, “ᐅᒃᐱᕐᓂᖃᕈᑦᓯ ᐱᕈᕐᓯᐊᒃᓮᑦ ᒥᑭᓐᓂᕐᐹᖓᑎᑐᑦ ᒪᔅᑕᕐᑦᑎᑐᑦ, ᐆᒧᖓ ᓇᐹᕐᑐᒧᑦ ᐅᖃᕈᓐᓇᕐᐳᓯ, ‘ᐃᓕᖕᓂᒃ ᓄᓱᒡᓗᑎᑦ, ᐃᒪᕕᖕᒧᐊᓕᕆᑦ,’ ᑕᕝᕙ ᓈᓚᖕᓂᐊᕐᐹᓯ.” ᐱᔨᐅᑉ ᐱᔭᒃᓴᖓ 7 “ᓇᓪᓕᓯ ᐱᔨᖃᕈᓂ ᐱᕈᕐᓰᕕᖕᒥ ᓄᓇᓕᕆᔪᒥᒃ ᐆᒪᔪᓂᒡᓘᓐᓃᑦ ᓰᐱᓂᒃ ᑲᒪᔪᒥᒃ, ᕾᒃᐸᑦ ᐅᖃᐅᑎᒐᔭᕐᐱᐅᒃ ‘ᑐᐊᕕᕐᓗᑎᑦ ᓂᕆᓕᕆᑦ?’ 8 ᑍᒤᓕᕙᓐᖏᓚᓯ, ᐃᒤᓕᕙᒃᐳᓯᓕ ᐱᔨᑦᓯᓐᓄᑦ, ‘ᓂᕆᓂᐊᕐᑕᓐᓂᒃ ᓂᕿᓕᐅᓕᕆᑦ, ᓮᓕᓴᕐᓗᑎᓪᓗ ᐅᕙᓐᓂᒃ ᐱᔨᑦᓯᓕᕆᑦ ᓂᕆᑎᓪᓗᖓ ᐃᒥᕐᑎᓪᓗᖓᓗ, ᑭᖑᓂᖓᒍᓪᓗ ᓂᕆᓗᑎᑦ ᐃᒥᕐᓂᐊᕆᕗᑎᑦ.’ 9 ᐱᔨ ᐊᖓᔪᖅᑳᖓᑕ ᖁᔭᒋᔭᕆᐊᖃᕐᐸᐅᒃ ᓈᓚᑦᓯᐊᕐᓂᖓᓅᑦ? 10 ᐃᓕᑦᓯᑦᑕᐅᖅ ᑍᒤᒃᑭᕗᓯ, ᐱᖁᔭᐅᑦᔪᑎᒋᔭᑦᓯᓐᓂᒃ ᐱᔭᕇᕌᖓᑦᓯ ᐅᖃᕐᑐᒃᓴᐅᕗᓯ, ‘ᐱᔨᑐᐃᓐᓇᐅᕗᒍᑦ; ᐱᔭᕆᐊᖃᕐᑕᕗᑦ ᐱᑐᐃᓐᓇᕋᑦᑎᒍ.’” ᔩᓱᓯᐅᑉ ᐋᖅᑭᒃᓯᓂᖓ ᐊᖑᑎᓂᒃ ᖁᓕᓂᒃ 11 ᔩᓱᓯ ᔨᕉᓴᓕᒻᒧᓐᖓᐅᑎᓪᓗᒍ, ᓴᒥᐊᕆᐊᓪᓗ ᒐᓕᓕᐊᓪᓗ ᐊᑯᓐᓂᖓᒎᓚᐅᕐᐳᖅ. 12 ᓄᓇᓕᖕᓄᐊᓕᕐᑎᓪᓗᒍ, ᐅᐸᒃᑕᐅᕗᖅ ᐊᖑᑎᓂᑦ ᖁᓕᓂᑦ, ᑲᑉᐱᐊᒋᔭᐅᔪᒥᒃ ᐸᕐᑎᕐᑐᓂᑦ, ᑖᒃᑯᐊ ᖃᓂᖏᑦᑐᒥ ᓇᖏᕐᐳᑦ, 13 ᕾᒐᓛᕐᓗᑎᒃ ᐅᖃᕐᐳᑦ, “ᐊᑕᓃᖅ ᔩᓱᓰ, ᓇᒡᓕᒋᑎᒍᑦ.” 14 ᔩᓱᓯᐅᑉ ᑕᑯᒐᒥᒋᑦ ᐅᖃᐅᑎᕔᑦ, “ᑐᒃᓯᐊᕐᕕᒡᔪᐊᕐᒥ ᑐᓂᕐᕈᓯᕐᑎᑦᓯᔨᓄᑦ ᑕᑯᔭᐅᑎᑦᓴᕐᑐᓕᕆᑦᓯ.” ᑍᑯᖓ ᐂᓕᕐᑎᓪᓗᒋᑦ ᐊᖅᑯᑖᓂ ᐋᖅᑭᒃᑕᐅᕗᑦ. 15 ᐃᓚᖓᑦ ᐋᖅᑭᒃᑕᐅᓂᕐᒥᓂᒃ ᖃᐅᔨᒐᒥ, ᐅᑎᕐᐳᖅ ᒎᑎ ᓂᕐᑐᕐᐹ ᓂᐱᖅᑯᕐᑐᓪᓗᓂ. 16 ᓄᓇᒧᑦ ᐹᒻᒪᒃᓗᓂ ᔩᓱᓯᐅᑉ ᓵᖓᓄᑦ, ᖁᔭᒋᒻᒪᕆᒃᐹ. ᐊᖑᑦ ᑖᓐᓇ ᓴᒥᐊᕆᐊᕐᒥᐅᑕᐅᕗᖅ. 17 ᔩᓱᓯ ᐅᖃᕐᐳᖅ, “ᐊᖑᑎᑦ ᖁᓕᐅᖅᑲᐅᓐᖏᓚᑦ ᐋᖅᑭᒃᑕᐅᔪᑦ? ᓇᐅᒡᓕ ᑍᒃᑯᐊ 9 ᑖᑦᓱᒪ ᐊᓯᖏᑦ? 18 ᐅᑎᕐᑐᖃᓐᖏᓛᑦ ᒎᑎᒧᑦ ᖁᔭᓕᔭᕐᑐᕐᓗᑎᒃ ᓄᓇᖃᑎᒋᓐᖏᑕᕗᑦ ᑖᓐᓇ ᐅᑎᕐᑐᑑᕚ?” 19 ᔩᓱᓯᐅᑉ ᐅᖃᐅᑎᕚ, “ᒪᑭᓪᓗᑎᑦ ᑕᑉᕙᓐᖓ ᐂᓕᕆᑦ; ᐅᒃᐱᕈᓱᒃᑲᕕᑦ ᐋᖅᑭᑕᐅᕗᑎᑦ.” ᒎᑎᐅᑉ ᐊᑕᓂᐅᕕᖓᑕ ᑎᑭᓐᓂᖓ ᒫᑎᐅᓯ 24:23-28 , 37-41 20 ᐹᕆᓯᑦ ᐃᓚᖏᑕ ᔩᓱᓯ ᐊᐱᕆᕚᑦ ᖃᖓ ᒎᑎᐅᑉ ᐊᑕᓂᐅᕕᖓ ᑎᑭᓐᓂᐊᕐᒪᖔᑦ, ᔩᓱᓯᐅᑉ ᑭᐅᕔᑦ, “ᒎᑎᐅᑉ ᐊᑕᓂᐅᕕᖓ ᓇᓗᓁᒃᑯᑕᒃᑯᑦ ᑕᑯᒃᓴᐅᔭᕐᑐᕐᓗᓂ ᑎᑭᓐᓂᐊᓐᖏᓚᖅ. 21 ᐅᖃᕐᑐᖃᕐᓂᐊᓐᖏᓚᕐᓘᓐᓃᑦ, ‘ᑕᑯᒋᑦ ᒫᓃᑉᐳᖅ!’ ᐅᕝᕙᓘᓐᓃᑦ, ‘ᐃᑲᓃᑉᐳᖅ!’ ᒎᑎᐅᑉ ᐊᑕᓂᐅᕕᖓ ᐃᓗᑦᓯᓐᓃᓐᓂᐊᕐᐳᖅ.” 22 ᐃᓕᓐᓂᐊᕐᑎᓂ ᐅᖃᐅᑎᕔᑦ, “ᓇᓪᓕᐅᑎᔪᖃᓛᒦᔪ, ᐃᓅᑉ ᐃᕐᓂᖓᑕ ᐅᓪᓗᕐᒥᒃ ᓴᖅᑭᑉᕕᒃᓴᖓᓂᒃ ᑕᑯᔪᒪᓪᓕᕐᕕᒋᓯᒪᔭᑦᓯᓐᓂᒃ ᑭᓯᐊᓂ ᐅᓪᓗᕐᒥᒃ ᑕᑯᕕᒃᓴᕐᑕᖃᓛᒋᑦᑐᖅ. 23 ᐃᓄᖕᓂᑦ ᐅᖃᐅᑎᔭᐅᔪᒫᕐᐳᓯ, ‘ᐊᕗᖓ ᑕᑯᔭᕐᑐᓕᕆᑦ!’ ᐅᕝᕙᓗ, ‘ᒪᐅᖓ ᑕᑯᔭᕐᑐᓕᕆᑦ!’ ᑍᒤᓕᐅᕐᑐᓄᑦ ᑕᑯᔭᕐᑐᕐᑍᓕᒋᑦᓯ ᒪᓕᖕᓂᐊᕐᓇᒋᓪᓗ. 24 ᓲᕐᓗ ᖃᐅᒻᒫᓪᓚᒃ ᖃᐅᒪᑎᑦᓯᑬᓐᓇᓲᖑᖕᒪᑦ ᓯᓚᒃᑯᑦ ᐃᖏᕐᕋᓪᓗᓂ ᓱᒃᑲᔪᒥᒃ, ᑍᒤᑦᓱᒫᕆᕗᕐᑕᐅᖅ ᐃᓅᑉ ᐃᕐᓂᖓᑕ ᐅᓪᓗᖓᓂ. 25 ᑍᒤᓚᐅᖅᑳᕐᑎᓐᓇᒍ ᐃᓅᑉ ᐃᕐᓂᖓ ᐊᖏᔪᒥᒃ ᐋᓐᓂᐊᑎᑕᐅᔭᕆᐊᖃᕐᐳᖅ ᓇᕐᕈᒋᔭᐅᔭᕆᐊᖃᕐᓗᓂᓗ ᒫᓐᓇ ᐃᓅᔪᓄᑦ. 26 ᓲᕐᓗ ᓄᐊᖅ ᐃᓅᑎᓪᓗᒍ ᑍᒤᓚᐅᕐᒪᑦ, ᑍᒤᑦᓱᒫᕆᕗᕐᑕᐅᖅ ᐃᓅᑉ ᐃᕐᓂᖓᑕ ᐅᓪᓗᖓᑕ ᓇᓪᓕᐅᓐᓂᖓᓂ. 27 ᑍᑦᓱᒪᓂ ᓄᐊᑉ ᓇᓪᓕᐅᓐᓂᖓᓂ, ᐃᓄᐃᑦ ᓂᕆᓚᐅᕐᐳᑦ ᐃᒥᕐᓗᑎᒡᓗ, ᓄᓕᐊᓂᒃᐳᑦ ᐅᐃᓂᒡᓗᑎᒡᓗ, ᐅᓪᓗᖅ ᓄᐊᑉ ᐅᒥᐊᕐᔪᐊᒧᑦ ᐃᑎᕐᕕᖓ ᑎᑭᓪᓗᒍ, ᐅᓕᕕᒡᔪᐊᖅ ᑎᑭᒻᒪᑦ ᑍᒃᑯᐊᓕᒫᑦ ᑐᖁᓚᐅᕐᐳᑦ. 28 ᓲᕐᓗᑦᑕᐅᖅ ᓘᑎ ᐃᓅᑎᓪᓗᒍ ᐃᓄᐃᑦ ᓂᕆᓚᐅᕐᐳᑦ, ᐃᒥᕐᓗᑎᒡᓗ, ᓂᐅᕕᕐᓗᑎᒃ, ᓂᐅᕐᕈᑎᖃᕐᓗᑎᒡᓗ, ᓂᕿᒃᓴᓂᒃ ᐱᕈᕐᓰᕗᑦ, ᐃᒡᓗᓕᐅᕐᓗᑎᒡᓗ, 29 ᐅᓪᓗᒥ ᑍᑦᓱᒪᓂ ᓘᑎ ᓱᑑᒪᒥᑦ ᐊᐅᓪᓚᕐᒪᑦ, ᐃᑯᒪ ᐅᔭᕅᓪᓗ ᐊᐅᒤᑦ ᕿᓚᖕᒥᑦ ᑲᑕᒃᐳᑦ ᐃᓄᓕᒫᓪᓗ ᑐᖁᓪᓗᒋᑦ. 30 ᑍᒤᑦᓱᒫᕆᕗᕐᑕᐅᖅ ᐅᓪᓗᒥ ᐃᓅᑉ ᐃᕐᓂᖓᑕ ᓴᖅᑭᕝᕕᐊᓂ. 31 “ᐅᓪᓗᖅ ᑍᓐᓇ ᓇᓪᓕᐅᑎᒃᐸᑦ, ᐃᒡᓘᑉ ᖄᖓᓃᑦᑐᖅ ᐃᒡᓗᒥᓄᑦ ᐃᑎᕐᓂᐊᕋᓂ ᐱᖁᑎᒥᓂᒃ ᐂᒃᓯᕋᓱᒡᓗᓂ; ᑍᒫᒃᑕᐅᖅ ᐱᕈᕐᓰᕕᖕᒦᑦᑐᖅ ᐃᒡᓗᒥᓄᑦ ᐅᑎᕐᑐᒃᓴᐅᓐᖏᓚᖅ. 32 ᓘᑎᐅᑉ ᓄᓕᐊᖓ ᐃᖅᑲᕐᓯᐅᒃ. 33 ᐃᓅᓯᕐᒥᓂᒃ ᐊᓐᓂᕈᓱᒃᑑᑉ ᐃᓅᓯᓂ ᐊᓯᐅᔨᔪᒫᕐᐹ; ᐃᓅᓯᕐᒥᓂᒡᓕ ᐊᓯᐅᔨᔫᑉ ᐃᓅᓯᓂ ᓴᐳᑎᔪᒫᕐᐹ. 34 ᐅᖃᐅᑎᕙᑦᓯ, ᑕᒪᓐᓇ ᓇᓪᓕᐅᑎᒃᐸᑦ ᐅᓐᓄᐊᒥ ᒪᕐᕉᒃ ᐃᒡᓕᕐᒥ ᐊᑕᐅᓯᕐᒥ ᓯᓂᒍᒫᕐᐴᒃ; ᐂᑉᐹ ᐊᐅᓪᓚᕈᑦᔭᐅᔪᒫᕐᐳᖅ ᐂᑉᐸᖓᓗ ᕿᒪᒃᑕᐅᓗᓂ. 35 ᐊᕐᓈᒃ ᒪᕐᕉᒃ ᓂᕿᒃᓴᒥᒃ ᓯᖃᓪᓕᓯᖃᑎᒌᒍᒫᕐᐴᒃ; ᐂᑉᐹ ᐊᐅᓪᓚᕈᑦᔭᐅᔪᒫᕐᐳᖅ, ᐂᑉᐸᖓᓗ ᕿᒪᒃᑕᐅᓗᓂ. [ 36 ᐊᖑᑏᒃ ᒪᕐᕉᒃ ᐱᕈᕐᓰᕕᖕᒥ ᐱᓇᓱᐊᖃᑎᒌᒍᒫᕐᐴᒃ; ᐂᑉᐹ ᐊᐅᓪᓚᕈᑦᔭᐅᔪᒫᕐᐳᖅ, ᐂᑉᐸᖓᓗ ᕿᒪᒃᑕᐅᓗᓂ.]” 37 ᐃᓕᓐᓂᐊᕐᑎᖏᑕ ᐊᐱᕆᕚᑦ, “ᐊᑕᓃᖅ ᓇᓂ?” ᔩᓱᓯᐅᑉ ᐅᖃᐅᑎᕔᑦ, “ᓇᓂᑐᐃᓐᓇᖅ ᐆᒪᔪᒥᒃ ᑐᖁᖓᔪᕐᑕᖃᕐᑎᓪᓗᒍ ᑎᖕᒥᐊᕐᔪᐊᑦ ᓂᕿᑐᓲᑦ ᑲᑎᕙᒃᐳᑦ.” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society