ᓘᑲᓯᐅᑉ ᐊᒡᓚᖏᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᔨ ᐃᓱᒪᒃᓴᕐᓯᐅᕐᓴᕅᑦᑐᖅ

¹ ᔩᓱᓯᐅᑉ ᐃᓕᓐᓂᐊᕐᑎᓂ ᐅᖃᐅᑎᕔᑦ, “ᐊᖑᒻᒥᒃ ᐊᔪᕐᓴᖏᑦᑐᕐᑕᖃᓚᐅᕐᐳᖅ ᐱᖁᑎᒥᓄᑦ ᑲᒪᔨᖁᑎᖃᕐᑐᒥᒃ, ᐊᖓᔪᖅᑳᖓ ᐅᖃᐅᑦᔭᐅᕗᖅ ᐱᖁᑎᒥᓂᒃ ᐱᒪᔨᖁᑎᖓ ᑮᓇᐅᔭᖏᓐᓂᒃ ᓄᖑᓮᑐᐃᓐᓇᕐᓂᕋᕐᑕᐅᓪᓗᓂ.

² ᐊᖓᔪᖅᑳᖓᑕ ᕾᖁᕚ ᐅᖃᐅᑎᓪᓗᒍ, ‘ᑐᓴᕐᑕᕋ ᑕᒪᓐᓇ ᓱᓕᕚ? ᑲᒪᒋᔭᑎᒃ ᐱᖁᑎᒃᑲ ᓇᓗᓁᑦᓯᐊᕐᓗᒋᑦ ᕾᓕᒃᑭᑦ, ᐱᖁᑎᓐᓂᒃ ᑲᒪᔨᐅᔭᕆᐊᖃᕈᓐᓃᕋᕕᑦ.’

³ ᑕᕝᕙ ᑲᒪᔨ ᐃᓱᒪᓕᕐᐳᖅ, ‘ᖃᓄᕐᓕ ᐱᓂᐊᓕᕐᑐᖓ? ᐊᖓᔪᖅᑳᒪ ᐱᖁᑎᒥᓂᒃ ᑲᒪᔨᐅᖁᔪᓐᓃᕐᒪᖓ, ᓴᓐᖐᓗᐊᕋᒪ ᓄᓇᒥᒃ ᖃᓗᕋᕋᓱᒋᐊᒃᓴᖅ, ᕿᓄᓇᓱᐊᕆᐊᒃᓴᕐᓗ ᐃᓄᖕᓂᑦ ᑲᓐᖑᓱᒃᖢᖓ.

⁴ ᐃᒫᒃ ᐱᔪᒪᓕᕐᐳᖓ, ᐃᖅᑲᓁᔮᒃᓴᖃᕈᓐᓃᕈᒪ ᐃᓄᐃᑦ ᐊᖏᕐᕋᖏᓐᓄᑦ ᑐᓐᖓᓱᒃᑎᑕᐅᖃᑦᑕᕐᓂᐊᕋᒪ!’

⁵ ᑖᑦᓱᒪ ᐊᖓᔪᖅᑳᒥᓄᑦ ᐊᑭᓕᒃᓴᓖᑦ ᕾᖁᓕᕐᐰᑦ ᐊᑕᐅᓯᐅᓈᕐᑎᕐᓗᒋᑦ, ᓯᕗᓪᓕᕐᐹᖅ ᐊᐱᕆᕚ, ‘ᐊᖓᔪᖅᑳᕋ ᖃᑦᓯᓂᒃ ᐊᑭᓕᒃᓴᖃᕐᕕᒋᕕᐅᒃ?’

⁶ ᑖᑦᓱᒪ ᑭᐅᕚ, ‘ᓇᐹᕐᑑᑉ ᐱᕈᕐᑐᖏᑕ ᐅᕐᓱᖏᓐᓂᒃ ᖃᑦᑕᐅᔭᓂᒃ 100ᓂᒃ,’ ᐅᖃᐅᑎᕚ, ‘ᐅᕝᕙᐅᓇ ᐊᑭᓕᒃᓴᖃᐅᑏᑦ ᐃᖏᓪᓗᑎᑦ ᑎᑎᕋᓕᕆᑦ 50ᓂᒃ,’

⁷ ᐊᒻᒪ ᐊᓯᐊᓂᒃ ᐊᐱᕆᒋᕗᖅ, ‘ᐃᕝᕕᓪᓕ ᖃᑦᓯᓂᒃ ᐊᑭᓕᒃᓴᖃᕐᐲᑦ?’ ᑖᓐᓇ ᑭᐅᕗᖅ, ‘ᓂᐊᖂᔭᒃᓴᓂᒃ ᐴᕐᓯᒪᔪᓂᒃ 100ᓂᒃ.’ ᑲᒪᔨᐅᑉ ᐅᖃᐅᑎᕚ, ‘ᐅᕝᕙᐅᓇ ᐊᑭᓕᒃᓴᖃᐅᑏᑦ ᑎᑎᕋᓕᕆᑦ 80ᓂᒃ.’

⁸ ᐊᖓᔪᖅᑳᖓᑕ ᖁᕕᐊᒋᓕᓚᐅᕐᐹ ᑍᒫᒃ ᓯᓚᑐᔪᒥᒃ ᐱᓇᓱᐊᕐᒪᑦ; ᒪᑐᒪ ᓯᓚᕐᔪᐊᑉ ᐃᓄᖏᑦ ᓯᓚᑐᐊᕿᓇᓱᐊᕈᓐᓇᕐᓂᕐᓴᐅᖕᒪᑕ ᖃᐅᒪᔪᒥᐅᑕᓂᑦ, ᐱᔭᕆᐊᖃᕐᑕᒥᖕᓂ ᐱᓇᓱᐊᕐᑎᓪᓗᒋᑦ.

⁹ “ᐅᖃᐅᑎᕙᑦᓯ, ᐃᓚᓐᓈᖃᕋᓱᐊᕆᑦᓯ ᓯᓚᕐᔪᐊᕐᒥᐅᑦ ᐊᔪᕐᓴᖏᑦᔪᑎᖏᑦ ᐊᑐᕐᓗᒋᑦ, ᐊᔪᕐᓴᓕᕈᑦᓯ ᑐᓐᖓᓱᒃᑎᑕᐅᖁᓪᓗᓯ ᐊᖏᕐᕋᒃᓴᑦᓯᓄᑦ ᐃᓱᖃᖏᑦᑐᒧᑦ.

¹⁰ ᒥᑭᔪᑯᓗᖕᒥᒃ ᑲᒪᑦᓯᐊᕐᑐᖅ, ᐊᖏᔪᓂᒃ ᑲᒪᑦᓯᐊᕈᓐᓇᕐᐳᖅ; ᒥᑭᔪᑯᓗᖕᓂᒃ ᑲᒪᑦᓯᐊᖏᑦᑐᖅ ᐊᖏᔪᓂᒃ ᑲᒪᑦᓯᐊᕈᓐᓇᖏᓐᓂᕗᖅ.

¹¹ ᑲᒪᑦᓯᐊᕐᓯᒪᖏᒃᑯᕕᑦ ᓯᓚᕐᔪᐊᕐᒥᐅᑦ ᐊᔪᕐᓴᖏᑦᔪᑎᖏᓐᓂᒃ, ᖃᓄᕐᓕ ᑍᒪ ᐅᒃᐱᕆᔭᐅᔪᓐᓇᕋᔭᕐᐲᑦ ᐱᓪᓚᕆᐅᓂᕐᓴᓂᒃ ᐱᓕᕆᔪᓐᓇᕐᒪᖔᕐᐱᑦ?

¹² ᐱᒋᓐᖏᑕᕐᓂᒃ ᑲᒪᑎᑕᐅᓗᑎᑦ ᑲᒪᑦᑎᐊᕐᓯᒪᓐᓂᖏᒃᑯᕕᑦ, ᖃᓄᕐᓕ ᓇᖕᒥᓂᕆᔭᒃᓴᕐᓂᒃ ᐱᑖᕐᑎᑕᐅᔪᓐᓇᕋᔭᐱᑦ?

¹³ “ᐱᔨ ᐊᖓᔪᖅᑳᖕᓂᒃ ᒪᕐᕉᖕᓂ ᐱᔨᑦᓯᕈᓐᓇᖏᒻᒪᑦ; ᐂᑉᐸᖓ ᐆᒥᒋᒐᔭᕐᐹ ᐂᑉᐸᖓᓗ ᓇᒡᓕᒋᓗᒍ; ᐅᕝᕙᓗ ᐂᑉᐸᖓ ᑐᓂᓯᒪᕕᒋᑦᑎᐊᕐᓗᒍ ᐂᑉᐸᖓᓗ ᓇᕐᕈᒋᓗᒍ. ᐊᑕᐅᑦᓯᒃᑯᑦ ᐱᔨᑦᓯᕕᖃᕈᓐᓇᖏᓚᓯ ᒎᑎᒥᒃ ᑮᓇᐅᔭᓂᒡᓗ!”

ᔩᓱᓯᐅᑉ ᐊᔪᕆᕐᑐᐃᓂᖏᑦ

¹⁴ ᐹᕆᓯᑦ ᑮᓇᐅᔭᓂᒃ ᐱᓪᓚᕆᖁᑎᖃᕋᒥ, ᑕᒪᑐᒥᖓ ᑐᓴᕋᒥᒃ, ᔩᓱᓯ ᒥᑕᐅᑎᒋᕚᑦ.

¹⁵ ᔩᓱᓯᐅᑉ ᐅᖃᐅᑎᕔᑦ, “ᐃᓕᑦᓯ ᑕᕝᕙ ᐃᓄᖕᓄᑦ ᓈᒻᒪᒋᔭᐅᑦᓯᐊᕋᓱᐊᕐᐳᓯ, ᒎᑎᐅᓪᓕ ᐆᒻᒪᑎᓯ ᖃᐅᔨᒪᕔᑦ; ᐃᓄᖕᓄᑦ ᓂᕐᑐᕐᑕᐅᔪᑦ ᒎᑎᒧᑦ ᐊᑑᑎᖃᖏᒻᒪᑕ.

¹⁶ “ᒨᓯᓯᐅᑉ ᐱᖁᔭᖏᑦ, ᓇᓚᐅᑦᑍᔪᓪᓗ ᐊᒡᓚᖏᑦ ᐊᑐᓚᐅᕐᐳᑦ ᔪᐊᓇᓯ ᐹᑉᑎᑎᕆᔨ ᑎᑭᓪᓗᒍ; ᑭᖑᓂᖓᒍᑦ ᐅᖃᐅᓰᑦ ᑐᓴᕈᒥᓇᕐᑐᑦ ᒎᑎᐅᑉ ᐊᑕᓂᐅᕕᖓᓂᒃ ᐅᖃᐅᓯᖃᕐᑐᑦ ᐅᖃᐅᓯᐅᓕᕐᐳᑦ, ᐅᓄᕐᑐᐊᓗᐃᑦ ᐊᔪᐃᓐᓇᕐᓗᑎᒃ ᐃᑎᕋᓱᓕᕐᒪᑕ.

¹⁷ ᐱᔭᕆᐊᑭᓐᓂᕐᓴᐅᕗᖅ ᕿᓚᒡᓗ ᓄᓇᕐᔪᐊᕐᓗ ᓄᖑᑉᐸᑎᒃ, ᐱᖁᔭᓂ ᓈᓂᑯᓘᓪᓘᓐᓃᑦ ᐊᑕᐅᓯᐅᑉ ᐊᑐᕐᑎᑕᐅᒐᔭᖏᓐᓂᖓᓂᑦ.

¹⁸ “ᐊᖑᑦ ᓄᓕᐊᒥᓂᒃ ᐊᕕᑦᓯᓪᓚᕆᒃᐸᑦ ᐊᓯᐊᓂᒃ ᓄᓕᐊᓂᒡᓗᓂ, ᑖᑦᓱᒪ ᓄᓕᐊᕆᓚᐅᕐᑕᓂᖅ ᐊᓯᓐᓂᐊᕐᐹ, ᐊᖑᓪᓗ ᐊᕐᓇᒥᒃ ᐊᕕᑕᐅᓪᓚᕆᒃᓯᒪᔪᒥᒃ ᓄᓕᐊᓂᒃᐸᑦ ᑖᓐᓇ ᐊᓯᓐᓂᐊᕆᕗ.”

ᐊᖑᑦ ᐊᔪᕐᓴᖏᑦᑐᖅ ᓛᓴᕉᓯᓗ

¹⁹ “ᐊᔪᕐᓴᖏᑦᑐᖕᒥᒃ ᐊᖑᑎᑕᖃᓚᐅᕐᐳᖅ ᐊᓐᓄᕌᓯᒪᕙᒃᑐᒥᒃ ᐊᓐᓄᕌᓂᒃ ᐊᑭᑐᓂᕐᐹᓂᒃ ᐊᐅᐸᓪᓚᕆᒃᑐᓂᒃ, ᖃᐅᑕᒫᑦ ᓂᕆᕕᒃᔪᐊᕐᑎᑦᓰᓐᓇᕐᑐᒥᒃ.

²⁰ ᐊᔪᕐᓴᑐᐊᓗᒃᑕᖃᓚᐅᕆᕗᖅ ᓛᓴᕉᓯᒥᒃ ᐊᑎᓕᖕᒥᒃ, ᑖᑦᓱᒪ ᑎᒥᓕᒫᖓ ᐊᔪᐊᕐᑐᐊᓗᒃ, ᑖᓐᓇ ᐋᑕᐅᖃᑦᑕᕐᐳᖅ ᐊᔪᓴᖏᑦᑐᐊᓘᑉ ᐃᒡᓗᖓᑕ ᐃᓯᕆᐊᕐᕕᖓᑕ ᓴᓂᐊᓄᑦ.

²¹ ᐃᓱᒪᖃᑦᑕᓚᐅᕋᓗᐊᕐᐳᖅ ᓂᕆᔪᒪᓪᓗᓂ ᐊᔪᕐᓴᓐᖏᑦᑑᑉ ᓂᕆᕕᖓᓂᑦ ᑲᑕᒃᑐᓂᒃ; ᐊᒡᓛᑦ ᕿᒻᒥᓂᑦ ᐊᔪᐊᖏᑦ ᐊᓗᒃᑐᕆᐊᑐᕐᑕᐅᕙᒃᓗᑎᒃ.

²² ᐊᔪᕐᓴᕐᑐᐊᓗᒃ ᑐᖁᖕᒪᑦ ᐂᖏᓖᓂᑦ ᐊᒡᔭᕐᑕᐅᕗᖅ ᐂᑉᕋᕼᐋᒻ ᓴᓂᐊᓄᑦ. ᑭᖑᓂᖓᒍᑦ ᐊᔪᕐᓴᓐᖏᑦᑐᐊᓗᒃᑕᐅᖅ ᑐᖁᒋᕗᖅ ᐃᓗᕕᕐᑕᐅᓪᓗᓂᓗ.

²³ ᑐᖁᖓᔪᑦ ᐃᓂᖓᓂ ᐋᓐᓂᐊᔪᐊᓘᓪᓗᓂ ᖃᐅᔨᓕᕐᐳᖅ, ᖁᒻᒧᑦ ᑕᑯᓴᕋᒥ ᐂᑉᕋᕼᐋᒻ ᑕᑯᕚ ᐅᖓᓯᒃᑐᒦᑦᑐᖅ, ᓛᓴᕉᓯᓗ ᓴᓂᐊᓃᑦᑐᖅ.

²⁴ ᕾᒐᓛᓕᕐᐳᖅ, ‘ᐊᑖᑖᒃ ᐂᑉᕋᕼᐋᒻ, ᓂᑲᒋᓚᐅᓐᖓ, ᓛᓴᕉᓯ ᑎᓕᓚᐅᕈᒃ ᑎᑭᓂ ᒥᓱᒡᓗᒍ ᐃᒥᕐᒧᑦ, ᐅᖃᓐᓂᒃ ᓂᒡᓕᑎᕆᖁᓗᒍ; ᐋᓐᓂᐊᔪᐊᓘᒐᒪ ᐅᕙᓂ ᐃᑯᒫᓗᖕᒥ.’

²⁵ ᐂᑉᕋᕼᐋᒻ ᐅᖃᐅᑎᕚ, ‘ᐃᕐᓃᒃ, ᐃᖅᑲᐅᒪᒋᑦ ᐃᓅᑎᓪᓗᑎᑦ ᐱᐅᔪᓂᒃ ᐱᖃᓚᐅᕋᕕᑦ, ᓛᓴᕉᓯᓕ ᐱᐅᖏᑦᑐᓂᒃ ᐱᑎᑕᐅᖃᑦᑕᓚᐅᕐᐳᖅ; ᒫᓐᓇ ᒫᓂ ᖁᕕᐊᓱᓕᕐᐳᖅ, ᐃᕝᕕᓪᓗ ᐋᓐᓂᐊᕐᑎᑕᐅᕗᑎᑦ.

²⁶ ᓱᓕ ᐊᑯᓐᓇᑦᑎᓐᓂ ᐃᑎᕐᓵᓗᒃᑕᖃᕐᒪᑦ, ᒫᓐᖓᑦ ᐃᓕᑦᓯᓐᓄᑦ ᐃᑳᕈᒪᔪᑦ ᐊᔪᕐᐳᑦ, ᑍᒫᒃᑕᐅᖅ ᐃᓕᑦᓯᓐᓂᑦ ᐃᑳᕈᒪᔪᑦ ᒪᐅᖓ ᐊᔪᕆᕗᑦ.’

²⁷ ᑖᓐᓇ ᐅᖃᕐᐳᖅ, ‘ᑕᕝᕙᓕ ᐊᑖᑖᒃ ᐂᑉᕋᕼᐋᒻ ᕿᓄᕕᒋᕙᒋᑦ, ᓛᓴᕉᓯ ᑎᓕᓚᐅᕈᒃ ᐊᑖᑕᒪ ᐃᒡᓗᖓᓄᑦ.

²⁸ ᑕᓪᓕᒪᓂᒃ ᖃᑕᓐᖑᑎᖃᕋᒪ, ᑖᑦᓱᒪ ᐅᖃᐅᑎᓂᐊᕐᒪᒋᑦ, ᐅᕗᖓ ᐋᓐᓂᐊᓇᕐᑐᒧᐊᖁᓇᒋᑦᑕᐅᖅ.’

²⁹ ᐂᑉᕋᕼᐋᒻ ᐅᖃᐅᑎᕚ, ‘ᖃᑕᓐᖑᑎᑎᑦ ᒨᓯᓯᐅᑉ ᓇᓚᐅᑦᑍᔪᓪᓗ ᐊᒡᓚᖏᓐᓂᒃ ᐱᖃᕐᐳᑦ ᑍᒃᑯᓇᓐᖓᑦ ᐅᖃᐅᑦᔭᐅᓕᕐᓕᑦ.’

³⁰ ᑖᑦᓱᒪ ᑭᐅᕚ, ‘ᐋᒃᑲ ᐊᑖᑖᒃ ᐂᑉᕋᕼᐋᒻ; ᑐᖁᖓᔪᒥᒡᓕ ᒪᑭᑦᑐᖃᕐᓗᓂ ᐅᖃᐅᑦᔭᐅᔭᕐᑐᕈᑎᒃ ᖃᕿᐊᓕᕋᔭᕐᐳᑦ.’

³¹ ᐂᑉᕋᕼᐋᒻ ᑭᐅᕚ, ‘ᒨᓯᓯᐅᑉ ᓇᓚᐅᑦᑍᔪᓪᓗ ᐊᒡᓚᖏᓐᓂᒃ ᓈᓚᖏᒃᑯᑎᒃ, ᐅᒃᐱᕈᓱᒃᑲᔭᖏᓐᓂᕗᑦ ᑐᖁᖓᔪᒥᒃ ᒪᑭᑦᑐᖃᕋᓗᐊᕐᐸᑦ.’”