ᓘᑲᓯᐅᑉ ᐊᒡᓚᖏᑦ 15 - ᐊᒡᓔᑦ ᐃᑦᔪᕐᖕᓁᑦᑐᑦ

ᓰᐱ ᐊᓯᐅᓯᒪᔪᖅ

¹ ᑍᑦᓱᒪᓂ ᕉᒪᒥᐅᑦ ᑮᓇᐅᔧᕐᑎᑦᓯᔨᖁᑎᖏᑦ ᐱᐅᖏᑦᑐᓕᓂᖏᓐᓄᓪᓗ ᓇᕐᕈᒋᔭᐅᔪᑦ ᔩᓱᓯᒧᐊᕐᐳᑦ ᑐᓵᔪᒪᓪᓗᑎᒃ.

² ᐹᕆᓯᑦ ᐱᖁᔭᓂᒡᓗ ᐃᓕᓮᔩᑦ ᐅᖃᕐᓂᕐᓘᑎᓕᕐᐳᑦ ᐅᖃᕐᓗᑎᒃ, “ᐆᒪ ᐱᐅᖏᑦᑐᓕᔪᑦ ᐃᓚᓕᐅᕐᐰᑦ ᓂᕆᖃᑎᒋᓪᓗᒋᓪᓗ.”

³ ᐊᑦᔨᐅᔪᒥᒃ ᐆᒥᖓ ᐅᖃᐅᑎᕔᑦ:

⁴ “ᓇᓕᕐᓯ ᓰᐱᖁᑎᖃᕈᓂ 100ᓂᒃ, ᐃᓚᖓᑦ ᐊᑕᐅᓯᖅ ᐊᓯᐅᒃᐸᑦ, ᑖᒃᑯᐊ 99 ᐃᓄᖃᖏᑦᑐᒧᑦ ᕿᒪᒃᑲᔭᓐᖏᓔᑦ, ᑍᓐᓇ ᐊᑕᐅᓯᖅ ᕿᓂᕆᐊᕐᓗᒍ ᕿᓃᓐᓇᕋᔭᓐᖏᓚᐅᒃ ᓇᓂᖅᑳᕐᓇᒍ?

⁵ ᓇᓂᒍᓂᐅᒃ, ᖁᕕᐊᓱᒡᓗᓂ ᐃᕐᓱᓕᕋᔭᕐᐹ.

⁶ ᐊᖏᕐᕋᕈᓂ, ᐃᓚᓐᓈᕆᔭᓂ ᐃᓅᖃᑎᓂᓗ ᕾᖁᒐᔭᕐᐰᑦ, ᐅᖃᐅᑎᓗᒋᑦ, ‘ᖁᕕᐊᓱᖃᑎᒋᓯᓐᖓ ᓰᐱᖁᑎᒐ ᐊᓯᐅᓯᒪᓚᐅᕐᑐᖅ ᓇᓂᒐᒃᑯ.’

⁷ ᑍᒫᒃᑕᐅᖅ ᐅᖃᐅᑎᕙᑦᓯ, ᐊᖏᓂᕐᓴᒥᒃ ᕿᓚᖕᒥ ᖁᕕᐊᓲᑎᒋᔭᐅᓂᐊᕐᐳᖅ ᐊᔪᕐᑐᓕᔪᖅ ᐊᑕᐅᓯᖅ ᓵᒋᐊᕐᐸᑦ ᐊᒡᓛᑦ ᑍᒃᑯᓇᓐᖓᑦ 99ᓂᑦ ᐃᓗᐊᕐᑐᓂᑦ ᓵᒋᐊᕆᐊᖃᖏᑦᑐᓂᑦ ᖁᕕᐊᓲᑕᐅᓂᕐᓴᐅᕗᖅ.”

ᑮᓇᐅᔭᖅ ᐊᓯᐅᓯᒪᔪᖅ

⁸ “ᐅᕝᕙᓗ ᐊᕐᓇᖅ, 10ᓂᒃ ᑮᓇᐅᔭᖁᑎᖃᕐᑐᖅ, ᐊᑕᐅᓯᕐᒥᒃ ᐊᓯᐅᔨᒍᓂ, ᓇᓂᕈᐊᒥᒃ ᐃᑭᑦᓯᒐᔭᓐᖏᓛᖅ, ᐃᒡᓗ ᓴᓂᕐᓗᒍ ᕿᓂᑦᓯᐊᕋᔭᓐᖏᓚᐅᒃ ᓇᓂᖅᑳᕐᓇᒍ?

⁹ ᓇᓂᒍᓂᐅᒃ, ᐃᓚᓐᓈᕆᔭᓂ ᐃᓅᖃᑎᓂᓗ ᕾᖁᒐᔭᕐᐰᑦ ᐅᖃᐅᑎᓗᒋᑦ, ‘ᖁᕕᐊᓱᖃᑎᒋᓯᓐᖓ, ᑮᓇᐅᔭᕋ ᐊᓯᐅᔨᓯᒪᓚᐅᕐᑕᕋ ᓇᓂᒐᒃᑯ.’

¹⁰ ᑍᒫᒃᑕᐅᖅ ᐅᖃᐅᑎᕙᑦᓯ, ᒎᑎᐅᑉ ᐂᖏᓖᖁᑎᖏᑦ ᐊᖏᔪᒥᒃ ᖁᕕᐊᓱᒃᑎᑕᐅᕗᑦ ᐊᔪᕐᑐᓕᔪᖅ ᐊᑕᐅᓯᖅ ᓵᒋᐊᕐᐸᑦ.”

ᐃᕐᓂᖅ ᐊᓯᐅᓯᒪᔪᖅ

¹¹ ᔩᓱᓯ ᐅᖃᕐᐳᖅ, “ᐊᖑᑎᑕᖃᓚᐅᕐᐳᖅ ᒪᕐᕉᖕᓂᒃ ᐃᕐᓂᖃᕐᑐᒥᒃ.

¹² ᓄᑲᕐᖠᐅᑉ ᐊᑖᑕᓂ ᐅᖃᐅᑎᕚ, ‘ᐊᑖᑖᒃ, ᐱᖁᑎᑎᑦ ᐃᓅᔪᓐᓃᕈᕕᑦ ᐱᑖᒃᓴᒃᑲ ᒫᓐᓇ ᕾᓕᒃᑭᑦ.’ ᐊᑖᑕᖓᑕ ᐱᖁᑎᓂ ᐊᕕᒃᐰᑦ ᑐᓂᓪᓗᒋᑦ ᐊᑐᓂᑦ ᐃᕐᓃᖕᒥᓄᑦ.

¹³ ᐅᓪᓗᐃᑦ ᐅᓄᖏᑦᑐᑦ ᑭᖑᕐᖓᒍᑦ, ᐃᕐᓂᖓᑕ ᓄᑲᕐᖠᐅᑉ ᐱᖁᑎᓕᒫᓂ ᑲᑎᓪᓗᒋᑦ ᓄᓇᒧᑦ ᐅᖓᓯᒃᑐᒧᑦ ᐊᐅᓪᓚᕐᐳᖅ, ᑕᐅᕙᓂ ᐱᖁᑎᓕᒫᓂ ᓄᖑᑉᐰᑦ ᐃᓱᒪᕐᓲᓗᐊᕐᓂᕐᒧᑦ.

¹⁴ ᐱᖁᑎᓕᒫᒥᓂᒃ ᓄᖑᑎᓯᒪᓕᕐᑎᓪᓗᒍ, ᓄᓇᓕᖕᓂ ᓇᔪᕐᑕᖓᓂ ᑳᖕᓇᕐᑐᕐᔪᐊᖃᓕᕐᐳᖅ, ᑕᑉᕙ ᐊᔪᕐᓴᓇᕐᑐᕐᔪᐊᒦᓕᕐᐳᖅ.

¹⁵ ᓇᔪᕐᑕᒥ ᓄᓇᓖᑦ ᐃᓄᖏᑕ ᐃᓚᖓᓐᓄᑦ ᐃᖅᑲᓁᔭᕆᐊᕐᑐᕐᐳᖅ, ᑖᑦᓱᒪ ᐅᐸᒃᑕᖓᑕ ᑎᓕᕚ ᐱᕈᕐᓰᕕᖁᑎᒥᓄᑦ ᑰᒃᑰᓯᖁᑎᒥᓂᒃ ᑲᒪᔨᐅᖁᓪᓗᒍ.

¹⁶ ᑰᒃᑰᓯᑦ ᓂᕆᔭᒃᓴᖏᓐᓂᒃ ᓂᕆᔪᒪᒐᓗᐊᕐᐳᖅ; ᓂᕆᓂᐊᕐᑕᒥᓂᒃ ᑐᓂᓯᕕᐅᕙᖏᓐᓇᒥ.

¹⁷ ᑍᒪᓕ ᐃᖅᑬᓕᕋᒥ ᐃᓱᒪᓕᕐᐳᖅ, ᐊᑖᑕᒪ ᐃᖅᑲᓁᔭᕐᑎᖁᑎᖏᑦ ᓂᕿᒃᓴᒥᒃ ᐊᒥᒐᕐᓯᖏᑦᓯᐊᕐᐳᑦ, ᐅᕙᖓᓕ ᒫᓂ ᐱᕐᓕᓕᕐᐳᖓ!

¹⁸ ᐅᑎᕐᓂᐊᓕᕐᐳᖓ ᐊᑖᑕᓐᓄᑦ, ᐅᖃᐅᑎᓗᒍ, ‘ᐊᑖᑖᒃ ᐊᔪᕐᑐᓕᓚᐅᕐᐳᖓ ᒎᑎᒧᑦ ᕿᓚᖕᒦᑦᑐᒧᑦ ᐃᓕᖕᓄᓪᓗ;

¹⁹ ᐃᕐᓂᕐᓂᒃ ᑍᔭᐅᔪᒃᓴᐅᔪᓐᓃᕋᒪ; ᐃᖅᑲᓁᔭᕐᑎᖁᑎᒃᑐᑦ ᑍᒫᒃ ᐱᓚᐅᓐᖓ.’

²⁰ ᐊᐅᓪᓚᕋᒥ ᐊᑖᑕᒥᓄᑦ ᐅᑎᓕᕐᐳᖅ. “ᓱᓕ ᐅᖓᓯᒃᑐᒦᑎᓪᓗᒍ ᐊᑖᑕᖓᑕ ᑕᑯᕚ, ᐃᓚᑦᓱᒋᓕᕐᓗᒍ, ᐊᑖᑕᖓ ᐅᓪᓚᒃᓯᓪᓗᓂ ᐸᕐᕆᐊᕐᐹ, ᑎᑭᓐᓇᒥᐅᒡᓗ ᐃᕿᑉᐹ ᑯᓂᒡᓗᒍᓗ,

²¹ ᐃᕐᓂᖓᑕ ᐅᖃᐅᑎᕚ, ‘ᐊᑖᑖᒃ ᐊᔪᕐᑐᓕᓚᐅᕐᐳᖓ ᒎᑎᒧᑦ ᕿᓚᖕᒦᑦᑐᒧᑦ ᐃᓕᖕᓄᓪᓗ; ᐃᕐᓂᕐᓂᒃ ᑍᔭᐅᔪᒃᓴᐅᔪᓐᓃᕐᐳᖓ.’

²² ᐊᑖᑕᖓᑕ ᐱᔨᓂ ᐅᖃᐅᑎᕔᑦ, ‘ᑐᐊᕕᕐᓗᓯ ᐊᓐᓄᕌᓂᒃ ᐱᐅᓂᕐᐹᓂᒃ ᕾᑦᓯᓕᕆᑦᓯ, ᐊᓐᓄᕌᕐᓗᒍ; ᓇᒡᒍᐊᕐᒥᒃᑕᐅᓗᓂ, ᐃᑎᒐᒍᓯᕐᑕᐅᓗᓂᓗ;

²³ ᐃᒻᒧᒃᓯᐅᒐᐅᑉ ᓄᕐᕋᖓ ᖁᐃᒃᓯᑦᓯᐊᖑᔪᖅ ᑐᖁᓯᐅᒃ, ᓂᕆᕕᒡᔪᐊᕐᓗᑕ ᖁᕕᐊᓱᖃᑎᒌᓕᕐᑕ;

²⁴ ᐅᓇ ᐃᕐᓂᕋ ᑐᖁᖓᓚᐅᕐᑐᖅ ᐆᒻᒪᕐᒥᖕᒪᑦ; ᐊᓯᐅᓯᒪᓚᐅᕐᑐᖅ ᓇᓂᔭᐅᖕᒪᑦ.’ ᑕᕝᕙ ᖁᕕᐊᓱᖃᑎᒌᓕᕐᐳᑦ.

²⁵ “ᐃᕐᓂᖓᓕ ᐊᖓᔪᒃᖠᖅ ᐱᕈᕐᓰᕕᖕᒦᓚᐅᕐᐳᖅ; ᐊᖏᕐᕋᓕᕋᒥ ᐃᒡᓗᒧᑦ ᖃᒡᓕᓪᓗᓂ, ᑐᓵᓕᕐᐳᖅ ᓂᑦᔭᐅᓯᔭᕐᑐᓂᒃ ᑖᓂᓯᕐᑐᓂᒡᓗ.

²⁶ ᐱᔨᑦ ᐃᓚᖓᓐᓂᒃ ᕾᖁᔨᕗᖅ ᐊᐱᕆᓪᓗᓂ ᓱᔪᖃᕐᒪᖔᑦ.

²⁷ ᐱᔨᐅᑉ ᑭᐅᕚ, ‘ᓄᑬᑦ ᑎᑭᒻᒪᑦ, ᐊᑖᑕᕕᑦ ᐃᒻᒧᒃᓯᐅᒐᐅᑉ ᓄᕐᕋᖓ ᖁᐃᒃᓯᑦᓯᐊᖑᔪᖅ ᑐᖁᑦᑕᐅᖁᖅᑲᐅᕚ, ᓄᑬᑦ ᖃᓄᐃᒐᓂ ᐅᑎᕐᓯᒪᓕᕐᓂᖓ ᐱᑦᔪᑎᒋᓪᓗᒍ.’

²⁸ ᐊᖓᔪᒃᖠᕐᓕ ᓂᓐᖓᒃᐳᖅ ᐃᒡᓗᒧᑦ ᐃᑎᕈᒪᔪᓐᓃᕐᓗᓂ. ᐊᑖᑕᖓ ᐊᓂᒐᒥ ᐃᑎᖁᓕᕐᐹ,

²⁹ ᑖᑦᓱᒪ ᐊᑖᑕᓂ ᑭᐅᕚ, ‘ᑕᑯᒋᑦ, ᐊᕐᕌᒍᓂᒃ ᐊᒥᓱᓂᒃ ᐱᔨᑦᓯᓕᕐᐸᒋᑦ, ᖃᓄᑐᐃᓐᓇᖅ ᑐᓵᓐᖏᓴᓚᐅᕐᓯᒪᓇᖓ ᐱᖁᔨᑎᓪᓗᑎᑦ; ᑭᓯᐊᓂ ᑐᓂᓯᓚᐅᕐᓯᒪᖏᑦᑐᑎᑦ ᒎᑦᓯᐅᑉ ᓄᕐᕋᖓᓂᒃ ᐃᓚᓐᓈᕆᔭᒃᑲ ᖁᕕᐊᓱᖃᑎᒋᓗᒋᑦ ᓂᕆᖃᑎᒋᓂᐊᕋᒃᑭᑦ.

³⁰ ᐃᕐᓃᑦ ᐅᑎᕐᒪᑦ, ᐱᖁᑎᖕᓂᒃ ᓄᖒᑦᓯᔪᖅ ᐊᕐᓇᓄᑦ ᐊᖑᓐᓂᐊᕐᑎᓄᑦ, ᐃᒻᒧᒃᓯᐅᒐᐅᑉ ᓄᕐᕋᖓᓂᒃ ᖁᐃᒃᓯᑦᓯᐊᖑᓯᒪᔪᒥᒃ ᑐᖁᑕᐅᑎᑦᓯᕗᑎᑦ!’

³¹ ᐊᑖᑕᖓᑕ ᑭᐅᕚ, ‘ᐃᕐᓃᒃ, ᐅᕙᓐᓂᒃ ᓇᔫᑏᓐᓇᕋᕕᑦ, ᐱᒋᔭᓕᒫᒃᑲᓗ ᐱᒋᕙᑎᑦ,

³² ᒫᓐᓇ ᐊᑲᐅᓈᑦᓯᐊᕐᒪᑦ ᖁᕕᐊᓱᖃᑎᒌᒡᓗᑕ ᓯᕆᓗᑕᓗ, ᓄᑬᑦ ᑐᖁᖓᓚᐅᕐᑐᖅ, ᐆᒻᒪᕐᒥᖕᒪᑦ; ᐊᓯᐅᓯᒪᓚᐅᕐᑐᖅ ᒫᓐᓇ ᓇᓂᔭᐅᖕᒥᖕᒪᑦ.’”