ᓘᑲᓯᐅᑉ ᐊᒡᓚᖏᑦ 14 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯᐅᑉ ᐋᖅᑭᒃᓯᓂᖓ ᐋᓐᓂᐊᔪᒥᒃ

¹ ᓴᐸᑎᑦ ᐃᓚᖓᓐᓂ ᔩᓱᓯ ᓂᕆᔭᕐᑐᕐᐳᖅ ᐹᕆᓯᑦ ᓯᕗᓕᕐᑎᖓᑦᑕ ᐃᓚᖓᑦᑕ ᐃᒡᓗᖓᓄᑦ, ᑖᒃᑯᐊ ᖃᐅᔨᓴᑦᓯᐊᕋᓱᒃᐹᑦ.

² ᑕᑯᒋᑦ, ᐊᖑᒻᒥᒃ ᑕᕝᕙᓃᑦᑐᖃᕐᐳᖅ ᓂᐅᒥᒍᑦ ᑕᓕᕐᒥᒍᓪᓗ ᐃᒻᒪᒃᓯᒪᓂᕐᒥᓄᑦ ᐳᕕᑦᑐᒥᒃ,

³ ᔩᓱᓯ ᐅᖃᕐᐳᖅ, ᐱᖁᔭᓂᒃ ᐃᓕᓮᔨᓄᑦ ᐹᕆᓯᓄᓪᓗ, “ᐱᖁᔧᑦ ᓴᐸᑎᒥ ᐋᖅᑭᒃᓯᖁᔨᕚ ᐋᖅᑭᒃᓯᖁᔨᓐᖏᓚᓪᓘᓐᓃᑦ?”

⁴ ᑖᒃᑯᐊ ᓂᓪᓕᓐᖏᓚᑦ. ᑕᕝᕙ ᔩᓱᓯᐅᑉ ᐅᐸᒃᓗᒍ ᐊᖑᑦ ᐋᖅᑭᒃᐹ, ᑕᕝᕙᓐᖓᑦ ᐊᓂᖁᓪᓗᒍ.

⁵ ᑖᒃᑯᐊ ᐅᖃᐅᑎᕔᑦ, “ᓇᓪᓕᓯ ᐃᕐᓂᖓ ᐆᒪᔪᖁᑎᖓᓘᓐᓃᑦ ᐃᒥᕐᑕᕐᕕᖕᒧᑦ ᑲᑕᒃᐸᑦ, ᑐᐊᕕᕐᓗᓂ ᕿᓗᓯᒐᔭᓐᖏᓛᖅ ᓴᐸᑎᐅᑎᓪᓗᒍ?”

⁶ ᑖᒃᑯᐊ ᑕᒪᑐᒥᖓ ᑭᐅᔪᓐᓇᓐᖏᓚᑦ.

ᒥᑭᒡᓕᑎᕐᓂᕐᒥᒃ ᑐᓐᖓᓱᒃᑎᑦᓯᓂᕐᒥᒡᓗ

⁷ ᔩᓱᓯ ᖃᐅᔨᒐᒥ ᐃᓄᐃᑦ ᐃᓚᖏᑦ ᓂᕆᔭᕐᑐᕐᓯᒪᔪᑦ ᐃᒃᓯᕙᐅᑕᕐᓂ ᐃᓂᑦᓯᐊᕙᐅᓂᕐᐹᓂ ᐃᒃᓯᕙᔪᒪᖕᒪᑕ, ᐊᑦᔨᐅᔪᒥᒃ ᐅᖃᐅᑎᕔᑦ,

⁸ “ᓂᕆᔭᕐᑐᖁᔭᐅᒍᑦᓯ ᓇᓪᓕᐊᓐᓄᑐᐃᓐᓇᖅ ᑲᑎᑎᑕᐅᕋᑖᕐᑐᓄᑦ, ᐃᓂᑦᓯᐊᕙᐅᓂᕐᐹᓂ ᐃᖏᓐᓂᐊᕋᓯ, ᐃᓕᑦᓯᓐᓂᑦ ᐱᓪᓚᕆᐅᓂᕐᓴᒥᒃ ᓂᕆᔭᕐᑐᕐᑐᖃᑐᐃᓐᓇᕆᐊᖃᕐᒪᑦ,

⁹ ᑖᑦᓱᒪ ᐃᓕᑦᓯᓐᓂᒃ ᓂᕆᔭᕐᑐᖁᔨᔫᑉ ᐅᐸᒡᓗᓂᑎᑦ ᐅᖃᐅᑎᒃᐸᑎᑦ, ‘ᐅᓇ ᐊᒡᕔᕈᒃ,’ ᑕᕝᕙ ᑲᓐᖑᓱᓕᕐᓗᑎᑦ ᐃᓂᑦᓯᐊᕙᐅᓐᖏᓐᓂᕐᓴᒧᑦ ᐃᖏᑦᓴᕆᐊᖃᓕᕋᔭᕐᐳᑎᑦ.

¹⁰ ᑍᒤᒻᒪᑦ ᓂᕆᔭᕐᑐᖁᔭᐅᒍᕕᑦ, ᐃᓂᑦᓯᐊᕙᐅᖏᓐᓂᕐᓴᒧᑦ ᐃᖏᑦᓴᕐᑐᕆᑦ, ᑖᑦᓱᒪ ᓂᕆᔭᕐᑐᖁᔨᔫᑉ ᐃᓕᑦᓯᓐᓂᒃ ᐅᐸᒡᓗᓂᑎᑦ ᐅᖃᐅᑎᒃᐹᑎᑦ, ‘ᐃᓚᓐᓈᒃ, ᐃᓂᑦᓯᐊᕙᐅᓂᕐᓴᒧᑦ ᐃᖏᑦᓴᕐᑐᕆᑦ’; ᑕᕝᕙ ᑖᒃᑯᓇᓐᖓᑦ ᓂᕆᔭᕐᑐᖃᑎᒋᓯᒪᔭᕐᓂᑦ ᖁᕕᐊᒋᔭᐅᒐᔭᕐᐳᑎᑦ.

¹¹ ᐃᒻᒥᖕᓂᒃ ᐊᖏᔪᕈᕐᑎᑦᑐᓕᒫᑦ ᒥᑭᒡᓕᑎᑕᐅᓂᐊᕐᐳᑦ, ᐃᒻᒥᖕᓂᒡᓗ ᒥᑭᒡᓕᑎᕐᑐᑦ ᐊᖏᔪᕈᕐᑎᑕᐅᓂᐊᕐᐳᑦ.”

¹² ᐊᒻᒪ ᐅᖃᕆᕗᖅ ᓂᕆᔭᕐᑐᖁᔨᓯᒪᔪᒧᑦ, “ᐅᓐᓄᒍᒻᒥᑕᕐᒥᒃ ᓂᕆᕕᒡᔪᐊᕐᑎᑦᓯᓂᕐᒥᒡᓘᓐᓃᑦ ᓂᕆᔭᕐᑐᖁᔨᒍᕕᑦ, ᐃᓚᓐᓇᕆᔭᑎᑦ ᖃᑕᓐᖑᑎᑎᓪᓘᓐᓃᑦ ᐃᓚᒋᔭᑎᓪᓘᓐᓃᑦ ᐃᓅᖃᑎᑎᓪᓘᓐᓃᑦ ᐊᔪᕐᓴᖏᑦᑐᑦ ᓂᕆᔭᕐᑐᖁᓂᐊᕐᓇᒋᑦ, ᑖᒃᑯᓇᓐᖓᑦ ᓂᕆᔭᕐᑐᖁᔭᐅᓛᕐᒥᒐᕕᑦ ᓂᕆᑎᑦᑎᓂᕆᓚᐅᕐᑍᑦ ᐱᓪᓗᒍ.

¹³ ᓂᕆᔭᕐᑐᖁᔨᒍᕕᓪᓕ, ᐊᔪᕐᓴᕐᑐᑦ ᕾᖁᒃᑭᑦ, ᐃᓚᑯᓐᖑᕐᓯᒪᔪᑦ, ᓄᕿᖃᑦᑎᐊᖏᑦᑐᑦ, ᑕᐅᑐᖏᑦᑐᓪᓗ;

¹⁴ ᑕᕝᕙ ᓮᒻᒪᕐᑎᑕᐅᓂᐊᕐᐳᑎᑦ, ᑖᒃᑯᐊ ᓂᕆᔭᕐᑐᕐᑎᑎᔪᒃᑎᒃᓴᖃᖏᒻᒪᑕ ᐃᓕᖕᓂᒃ. ᐊᑭᓕᕐᑕᐅᔪᒫᕐᐳᑎᓪᓕ ᐃᓗᐊᕐᑐᑦ ᑐᖁᖓᔪᓂᑦ ᒪᑭᕝᕕᐊᓂ.”

ᔩᓱᓯᐅᑉ ᐊᑦᔨᐅᑎᑦᓯᓂᖓ ᓂᕆᕕᒡᔪᐊᕐᑐᓂᒃ

¹⁵ ᑕᕝᕙᓂ ᓂᕆᖃᑕᐅᔪᑦ ᐃᓚᖓᑦᑕ ᑕᒪᓐᓇ ᑐᓴᕋᒥᐅᒃ, ᔩᓱᓯ ᐅᖃᐅᑎᕚ, “ᓮᒪᕐᑎᑕᐅᓯᒪᔪᒥᒃ ᐃᓅᓯᖃᕐᐳᑦ ᑍᒃᑯᐊ ᓂᕆᖃᑕᐅᔪᒫᕐᑐᑦ ᒎᑎᐅᑉ ᐊᑕᓂᐅᕕᖓᓂ!”

¹⁶ ᔩᓱᓯᐅᑉ ᐅᖃᐅᑎᕚ, “ᐊᖑᒻᒥᒃ ᓂᕆᕕᒡᔪᐊᕐᑎᑦᓯᔪᖃᓚᐅᕐᐳᖅ, ᐊᒥᓱᓂᒃ ᓂᕆᔭᕐᑐᖁᔨᓪᓗᓂ;

¹⁷ ᓂᕆᕕᒡᔪᐊᕐᓇᖅ ᓇᓪᓕᐅᑎᖕᒪᑦ ᐱᔨᓂ ᑎᓕᕚ ᓂᕆᔭᕐᑐᖁᔭᒥᓄᑦ ᐅᖃᐅᔨᖁᓪᓗᒍ, ‘ᕾᓕᕆᑦᓯ ᒫᓐᓇ ᓂᕆᓂᐊᕐᑕᓯ ᐊᑐᐃᓐᓇᐅᓕᕐᒪᑕ!’

¹⁸ ᑖᒃᑯᐊ ᕾᖁᔭᐅᓯᒪᔪᑦ ᐊᑐᓂᑦ ᐅᐸᖏᑦᔪᑎᒃᓴᕐᓯᐅᓕᕐᐳᑦ. ᓯᕗᓪᓕᕐᐹᖅ ᐅᖃᕆᐊᕐᑐᕐᑐᒧᑦ ᐅᖃᕐᐳᖅ, ‘ᐱᕈᕐᓰᕕᖕᒥᒃ ᓂᐅᕕᕋᒪ, ᒫᓐᓇ ᑕᑯᔭᕐᑐᕆᐊᖃᕋᒃᑯ; ᕾᔪᓐᓇᖏᓐᓇᒪ ᐸᓯᔭᐅᑦᑍᓕᓚᖓ.’

¹⁹ ᐊᓯᐊ ᐅᖃᕆᕗᖅ, ‘ᐃᒻᒧᒃᓯᐅᒐᕐᓂᒃ 10ᓂᒃ ᐱᕈᕐᓰᕕᓕᕆᑦᔪᑎᒃᓴᓐᓂᒃ ᓂᐅᕕᕋᒪ, ᑖᒃᑯᐊ ᐆᒃᑐᕆᐊᕐᑐᕐᓂᐊᕋᒃᑭᑦ; ᕾᔪᓐᓇᖏᓐᓇᒪ ᐸᓯᔭᐅᑦᑍᓕᓚᖓ.’

²⁰ ᐊᓯᐊ ᐅᖃᕆᕗᖅ, ‘ᓄᓕᐊᓂᕋᑖᕋᒪ, ᑍᒤᒻᒪᑦ ᕾᔪᓐᓇᓐᖏᓚᖓ.’

²¹ ᐱᔨ ᐊᖓᔪᖅᑳᒥᓄᑦ ᐅᑎᕐᐳᖅ ᑕᒪᒃᑯᓂᖓ ᐅᖃᕐᕕᒋᓪᓗᓂᐅᒃ. ᐊᖑᑦ ᓂᓐᖓᒃᑐᐊᓘᓪᓗᓂ ᐱᔨᓂ ᐅᖃᐅᑎᕚ, ‘ᑐᐊᕕᕐᓗᑎᑦ ᐊᑐᕆᐊᓄᑦ ᐂᓕᕆᑦ ᐊᖅᑯᑎᓪᓚᕆᖕᓄᓪᓗ ᓄᓇᓕᖕᓂ, ᐅᕗᓐᖓᐅᑎᓪᓗᒋᑦ ᐊᔪᕐᓴᕐᑐᑦ, ᐱᒡᒐᕐᑐᓪᓗ ᑕᐅᑐᖏᑦᑐᓪᓗ, ᑐᓯᐊᑦᑐᓪᓗ.’

²² ᐊᑯᓂᐅᖏᑦᑐᖅ ᐱᔨ ᐅᖃᕆᐊᕐᑐᕆᕗᖅ, ‘ᐊᖓᔪᖅᑳᖅ, ᑍᒫᒃ ᐱᖁᔨᖅᑲᐅᒐᕕᑦ ᐱᔭᕇᕐᐳᖅ, ᓱᓕᓕ ᐃᓂᒃᓴᖃᕐᐳᖅ.’

²³ ᐊᖓᔪᖅᑳᖓ ᐅᖃᕐᐳᖅ ᐱᔨᒥᓄᑦ, ‘ᐃᒡᓗᒐᓮᑦ ᓯᓚᑖᓃᑦᑐᓄᑦ ᐊᖅᑯᑎᓄᑦ, ᓄᓇᓕᖕᓄᕆᐊᓄᓪᓗ ᐂᓕᕆᑦ, ᐃᓄᐃᑦ ᕾᖁᓗᒋᑦ ᐃᒡᓗᒐ ᑕᑕᑦᑕᐅᖁᓪᓗᒍ.

²⁴ ᐅᖃᐅᑎᕙᒋᑦ, ᑍᒃᑯᐊ ᕾᖁᓚᐅᕐᑕᕋᓗᐊᒃᑲ ᓂᕆᓂᐊᕐᑕᑦᑎᓐᓂᒃ ᐆᒃᓯᓂᐊᓐᖏᓚᓪᓘᓐᓃᑦ.’”

ᔩᓱᓯᒧᑦ ᐃᓕᓐᓂᐊᕐᑎᒋᔭᐅᓂᐅᑉ ᐊᑭᖃᕐᓂᖓ

²⁵ ᑍᑦᓱᒪᓂ ᐃᓄᒋᐊᒃᑐᐊᓗᐃᑦ ᔩᓱᓯ ᐃᓚᒋᖕᒪᑦᔪᒃ; ᓵᕝᕕᒋᓪᓗᒋᑦ ᐅᖃᐅᑎᕔᑦ,

²⁶ “ᓇᓪᓕᐊᑦ ᐅᕙᓐᓄᑦ ᕾᔪᖅ ᐅᖓᓂᕐᓴᐅᒃᐸᑦ ᐊᑖᑕᒥᓂᒃ ᐊᓈᓇᒥᓂᒡᓗ, ᓄᓕᐊᒥᓂᒃ ᕿᑐᕐᖓᒥᓂᒡᓗ, ᖃᑕᓐᖑᑎᒥᓂᒃ ᓇᔭᖕᒥᓂᒡᓗ, ᐊᒡᓛᓪᓗ ᐃᒻᒥᓂᒃ, ᑖᓐᓇ ᐃᓕᓐᓂᐊᕐᑎᒋᔪᓐᓇᓐᖏᓚᕋ.

²⁷ ᓴᓐᓂᖓᔪᓕᒃᓴᒥᓂᒃ ᐊᒡᔭᕐᓯᔪᒪᖏᑦᑐᖅ ᒪᓕᒡᓗᖓ, ᑖᓐᓇ ᐃᓕᓐᓂᐊᕐᑎᒋᔪᓐᓇᓐᖏᓚᕋ.

²⁸ ᓇᓕᕐᓯ ᐃᒡᓗᓕᐅᕈᒪᒍᓂ ᐳᕐᑐᔪᒥᒃ, ᐃᓱᒪᒃᓴᓯᐅᕈᑎᒋᖅᑳᕋᔭᓐᖏᓛ ᖃᓄᖅ ᐊᑭᑐᑎᒋᓂᐊᕐᒪᖔᑦ, ᑮᓇᐅᔭᑦ ᓈᒻᒪᖕᓂᐊᕋᓗᐊᕐᒪᖔᑕ ᐱᔭᕇᕈᓐᓇᕐᓗᒍ?

²⁹ ᑍᒫᒡᓕ ᐱᓚᐅᖏᒃᑯᓂ ᑐᓐᖓᕕᒃᓴᖓ ᐱᔭᕇᕋᓗᐊᕐᓗᒍ, ᐃᒡᓗ ᐳᕐᑐᔪᖅ ᐱᔭᕇᕈᓐᓁᓕᒃᐸᒍ, ᖃᐅᔨᔪᓂᑦ ᒥᑕᐅᑎᒋᔭᐅᓕᕋᔭᕐᐳᖅ.

³⁰ ᐅᖃᕐᓗᑎᒃ, ‘ᐅᓇ ᐃᒡᓗᒥᒃ ᐳᕐᑐᔪᒥᒃ ᓴᓇᒋᐊᓚᐅᕐᑑᒐᓗᐊᖅ ᐱᔭᕇᕈᓐᓇᖏᑦᑐᖅ.’

³¹ ᐅᕝᕙᓘᓐᓃᑦ ᐊᖓᔪᖅᑳᕐᔪᐊᖅ ᐊᖓᔪᖅᑳᕐᔪᐊᕐᒥᒃᑕᐅᖅ ᐊᓯᒥᓂᒃ ᐅᓇᑕᕆᐊᕐᑐᕐᓂᐊᕈᓂ, ᐅᓇᑕᕐᑐᒃᓴᓂᒃ 10,000ᓂᒃ ᐃᓚᖃᕐᓗᓂ, ᐃᓱᒪᒃᓴᕐᓯᐅᕋᔭᓐᖏᓛᖅ? ᐊᑭᕋᖏᑦ ᐅᓇᑕᕐᑐᒃᓮᑦ 20,000ᐅᐸᑕ, ᓵᓚᒋᔪᓐᓇᕐᓂᐊᕋᓗᐊᕐᒪᖔᕐᒥᐅᒃ?

³² ᓵᓚᒋᔪᓐᓇᕐᓂᐊᕐᑑᔮᖏᒃᑯᓂᐅᒡᓕ, ᐅᖓᓯᒃᑎᓪᓗᒋᑦ ᓱᓕ ᑎᓕᓯᓕᕋᔭᕐᐳᖅ ᖃᓄᖅ ᐅᓇᑕᖏᑦᔪᑎᒃᓴᒥᖕᓂᒃ ᐊᐱᕆᑎᑦᓯᔭᕐᑐᕐᓗᓂ.

³³ ᑍᒫᒃᑕᐅᖅ ᑕᕝᕙ, ᓇᓕᕐᓯ ᐱᒋᔭᓕᒫᒥᓂᒃ ᖁᔭᓈᕐᓯᓂᐊᖏᑦᑐᖅ ᐃᓕᓐᓂᐊᕐᑎᒋᔪᓐᓇᓐᖏᓚᕋ.”

ᑕᕆᐅᑉ ᑕᕆᐅᖑᔪᓐᓃᕐᑑᑉ ᐊᑐᕐᑐᒃᓴᐅᖏᓐᓂᖓ

³⁴ “ᑕᕆᐅᖅ ᐱᐅᔪᐊᓘᕗᖅ; ᑭᓯᐊᓂᓕ ᑕᕆᐅᕐᓱᓐᓂᑦᑐᓐᓃᕐᐸᑦ, ᖃᓄᕐᓕ ᑕᕆᐅᓐᖑᒃᑲᓐᓂᕐᑎᑕᐅᔪᓐᓇᕐᐹ?

³⁵ ᑍᒤᑉᐸᑦ ᐊᑐᕐᑐᒃᓴᐅᔪᓐᓃᕐᐳᖅ ᓄᓇᒧᓪᓘᓐᓃᑦ, ᐱᕈᕐᑐᓄᓪᓘᓐᓃᑦ ᐱᕈᕐᓴᐅᑎᒃᓴᒧᑦ; ᐃᒋᑕᒃᓴᑐᐃᓐᓇᐅᓕᕐᐳᖅ. ᑐᓵᔪᓂᒃ ᓯᐅᑎᓕᒃ ᑐᓴᕐᓕ.”