ᓘᑲᓯᐅᑉ ᐊᒡᓚᖏᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦᔩᓱᓯᐅᑉ ᐊᔪᕆᕐᑐᐃᓂᖓ ᑐᒃᓯᐊᕐᓂᕐᒥᒃ ᒫᑎᐅᓯ 6:9-13 ; 7:7-11 1 ᔩᓱᓯᐅᑉ ᐅᐸᒃᑕᓂ ᑎᑭᓇᒥᐅᒃ ᑐᒃᓯᐊᕐᐳᖅ, ᑐᒃᓯᐊᕇᕐᒪᑦ ᐃᓕᓐᓂᐊᕐᑎᖏᑕ ᐃᓚᖓᑦᑕ ᐅᖃᐅᑎᕚ, “ᐊᑕᓃᖅ, ᑐᒃᓯᐊᕐᓂᕐᒥᒃ ᐊᔪᕆᕐᑐᕐᑎᒍᑦ, ᔪᐊᓇᓯᐅᑦᑕᐅᖅ ᐃᓕᓐᓂᐊᕐᑎᓂ ᐊᔪᕆᕐᑐᓚᐅᕐᒪᒋᑦ.” 2 ᔩᓱᓯᐅᑉ ᐅᖃᐅᑎᕔᑦ, “ᑐᒃᓯᐊᓕᕌᖓᑦᓯ ᐃᒫᒃ ᐅᖃᖃᑦᑕᕆᑦᓯ: ᐊᑖᑖᒃ, ᐊᑎᕐᐱᑦ ᐃᑦᔪᕐᓁᓐᓂᖓ ᐃᓱᒪᒋᔭᐅᑦᓯᐊᕐᓕ; ᐊᑕᓂᐅᓃᑦ ᕾᓚᐅᕐᓕ, 3 ᖃᐅᑕᒫᑦ ᓂᕿᒃᓴᑦᑎᓐᓂᒃ ᑐᓂᓯᕕᒋᑎᒍᑦ; 4 ᐱᐅᖏᑦᑐᓕᓂᕗᑦ ᐃᓱᒪᒋᔪᓐᓁᒃᑭᑦ, ᐱᐅᖏᑦᑐᓕᕕᒋᔨᕗᑦᑕᐅᖅ ᐃᓱᒪᒋᔪᓐᓁᕐᕕᒋᕙᒃᑲᑦᑎᒍ; ᐱᐅᓐᖏᑐᒥᒃ ᐱᔪᒥᓵᕐᑕᐅᓇᕐᑐᒧᑦ ᑎᑭᑎᑦᑍᓕᑎᒍᑦ.” 5 ᐅᖃᐅᑎᒃᑲᓐᓂᕐᐰᑦ, “ᓇᓕᕐᓯ ᐃᓚᓐᓇᕆᔭᖃᕈᓂ, ᐅᓐᓄᐊᕌᓗᒃᑯᑦ ᐅᐸᒃᓗᒍ ᐅᖃᐅᑎᒐᔭᕈᓂᐅᒃ, ‘ᐃᓚᓐᓈᒃ ᐅᑎᕐᑎᓛᕐᑕᓐᓂᒃ ᐂᑦᑐᓚᐅᓐᖓ ᓂᐊᖂᔭᓂᒃ ᐱᖓᓱᓂᒃ; 6 ᐃᓚᓐᓇᕆᔭᕋ ᐅᖓᓯᒃᑐᒥᑦ ᑎᑭᒻᒪᑦ, ᐅᕙᑦᑎᓐᓂ ᓂᕿᒃᓴᖃᖏᒻᒪᑦ’; 7 ᐃᓚᓐᓇᕆᔧᓪᓕ ᐃᒡᓘᑉ ᐃᓗᐊᓃᑦᑐᖅ ᐃᒫᒃ ᑭᐅᒃᐸᑦ, ‘ᓯᓂᒐᓱᐊᓕᕋᒪ! ᐅᒃᑯᐊᖅ ᐊᑦᓱᖏᕐᓯᒪᓕᕐᒪᑦ, ᕿᑐᕐᖓᒃᑲ ᓯᓂᒐᓱᖃᑎᒋᓪᓗᒋᑦ; ᒪᑭᑦᑐᒪᔪᓐᓃᕋᒪ ᕾᑦᓯᔪᓐᓇᖏᓚᖓ.’ 8 ᐅᖃᐅᑎᕙᑦᓯ, ᑖᓐᓇ ᒪᑭᑦᑐᒪᖏᒃᑲᓗᐊᕈᓂ ᑐᓂᓯᔪᒪᖏᒃᑲᓗᐊᕐᓗᓂ; ᐃᓚᓐᓇᕆᒐᒥᑎᑦ, ᒪᑭᓪᓗᓂ ᑐᓂᓯᕕᒋᒐᔭᕐᐹᑎᑦ ᐱᔪᒪᔭᕐᓂᒃ, ᐱᔪᒪᕕᒌᓐᓇᕈᕕᐅᒃ. 9 ᐅᖃᐅᑎᕙᑦᓯ, ᐱᔪᒪᒍᑦᓯ, ᑕᕝᕙ ᑐᓂᓯᕕᐅᓂᐊᕐᐳᓯ; ᕿᓂᕆᑦᓯ, ᑕᕝᕙ ᓇᓂᓯᓂᐊᕐᐳᓯ; ᑎᒡᓗᒃᑐᕆᑦᓯ, ᑕᕝᕙ ᒪᑐᐃᕈᑦᔭᐅᓂᐊᕐᐳᓯ. 10 ᓇᓪᓕᐊᑦ ᐱᔪᒪᔪᖅ ᑐᓂᓯᕕᐅᓂᐊᕐᒪᑦ, ᕿᓂᕐᑐᕐᓗ ᓇᓂᓯᓂᐊᕐᒪᑦ, ᑎᒡᓗᒃᑐᕐᑐᕐᓗ ᒪᑐᐃᕈᑦᔭᐅᓂᐊᕐᒪᑦ. 11 ᓇᓪᓕᓯ ᐊᑖᑕᐅᔪᓯ ᐃᕐᓂᓯ ᖁᒡᓗᒋᐊᒥᒃ ᑐᓂᓯᕕᒋᒐᔭᕐᐱᓯᐅᒃ, ᐃᖃᓗᖕᒥᒃ ᐱᔪᒪᑎᓪᓗᒍ? 12 ᐅᕝᕙᓗ ᒪᓐᓂᖕᒥᒃ ᐱᑦᔪᒪᑎᓪᓗᒍ, ᓯᑯᐊᕐᐱᐅᓂᒥᒃ ᑐᖁᓐᓇᕐᑐᖃᕐᑐᒥᒃ ᑐᓂᓯᕕᒋᒐᔭᕐᐱᓯᐅᒃ? 13 ᐃᓕᑦᓯ ᐱᐅᖏᑦᑑᒐᓗᐊᕐᑐᓯ, ᐱᐅᔪᒥᒃ ᑐᓂᓯᔭᕆᐊᒃᓴᖅ ᕿᑐᕐᖓᑦᓯᓐᓄᑦ ᖃᐅᔨᒪᒐᑦᓯ, ᐊᖏᓂᕐᓴᒥᒡᓕ ᐊᑖᑕᓯ ᕿᓚᖕᒦᑦᑐᖅ ᑐᓂᓯᔪᓐᓇᕐᓂᕐᓴᐅᕗᖅ ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐱᔪᒪᕕᒋᔨᒥᓄᑦ!” ᔩᓱᓯᓗ ᐱᐅᓪᓯᐹᐱᓗ ᒫᑎᐅᓯ 12:22-30 ; ᒫᑯᓯ 3:20-27 14 ᔩᓱᓯ ᐊᓂᑎᑦᓯᑎᓪᓗᒍ ᐊᓂᕐᓂᕐᓗᖕᒥᒃ ᐅᖃᕈᓐᓇᖏᑎᑦᓯᔪᒥᒃ; ᐊᓂᕐᓂᕐᓗᒃ ᐃᓄᖕᒥᑦ ᐊᓂᖕᒪᑦ, ᐅᖃᕈᓐᓇᖏᑦᑐᖅ ᐅᖃᕈᓐᓇᕐᓯᕗᖅ, ᐃᓄᐃᑦ ᑲᒪᒻᒪᕆᓕᕐᐳᑦ, 15 ᐃᓚᖏᑦ ᐅᖃᕐᐳᑦ, “ᐅᓇ ᐊᓂᕐᓂᕐᓗᖕᓂᒃ ᐊᓂᑎᑦᓯᕙᒃᑐᖅ ᐱᐅᓪᓯᐹᐱᒃᑯᑦ, ᐊᓂᕐᓂᕐᓗᒃᑐᑦ ᐊᖓᔪᖅᑳᖓᑦᑎᒍᑦ ᐱᔪᓐᓇᕐᓂᖃᕐᑎᑕᐅᓪᓗᓂ.” 16 ᐊᓯᖏᑕᓗ ᔩᓱᓯ ᐆᒃᑐᕈᒪᕚᑦ, ᕿᓚᖕᒥᑦ ᑲᒪᓇᕐᑐᒥᒃ ᓇᓗᓁᒃᑯᑕᕐᒥᒃ ᑕᑯᑎᑦᓯᖁᓪᓗᒍ. 17 ᔩᓱᓯᐅᑉ ᐃᓱᒪᖏᑦ ᖃᐅᔨᒐᒥᒋᑦ, ᐅᖃᐅᑎᕔᑦ, “ᐊᖓᔪᖅᑲᐅᕕᓕᒫᑦ, ᐃᒻᒥᒍᑦ ᐃᓛᒃᑰᕐᑎᓕᕐᐸᑕ ᐊᑭᕋᕐᑑᑎᓗᑎᒃ, ᐊᓯᕈᕐᓗᑎᒃ ᓄᖑᓐᓂᐊᕐᐳᑦ. ᐃᒡᓗᒥᐅᖃᑎᒌᑦ ᐊᑭᕋᕐᑑᑎᓕᕈᑎᒃ ᐊᓯᕈᕐᓗᑎᒃ ᓄᖑᓐᓂᐊᕆᕗᑦ. 18 ᓵᑖᓇᓯᑦᑕᐅᖅ ᐊᒡᒍᕐᓗᓂ ᐃᒻᒥᓄᑦ ᐊᑭᕋᕐᑐᓕᕈᓂ, ᖃᓄᖅ ᐊᑕᓂᐅᕕᖓ ᒪᑭᑕᔪᓐᓇᕋᔭᕐᐹ? ᐅᖃᕋᑦᓯ ᐊᓂᕐᓂᕐᓗᖕᓂᒃ ᐊᓂᑎᑦᓯᖃᑦᑕᕐᓂᕋᕐᓗᖓ ᐱᐅᓪᓯᐹᐱᒃᑯᑦ. 19 ᐊᓂᕐᓂᕐᓗᐃᑦ ᐊᓂᑎᑉᐸᒃᑯᒃᑭᑦ ᐱᐅᓪᓯᐹᐱᒃᑯᑦ, ᓱᓇᒧᓪᓕ ᒪᓕᒃᑎᓯ ᐊᓂᕐᓂᕐᓗᖕᓂᒃ ᐊᓂᑎᑦᓯᕙᒃᐹᑦ? ᑍᒤᒻᒪᑦ ᒪᓕᒃᑎᑦᓯᒍᑦ ᓱᓕᖏᓐᓂᓯ ᓴᖅᑭᑕᐅᕗᖅ. 20 ᒎᑎᐅᓪᓕ ᐱᔪᓐᓇᕐᓂᖓᒍᑦ ᐊᓂᕐᓂᕐᓗᖕᓂᒃ ᐊᓂᑎᑦᓯᕙᒃᑯᒪ, ᑕᕝᕙ ᒎᑎᐅᑉ ᐊᑕᓂᐅᕕᖓᑕ ᑎᑭᓯᒪᕚᓯ. 21 “ᐊᖑᑦ ᓴᓐᖏᔪᐊᓗᒃ, ᓱᒋᐅᑎᖃᑦᓯᐊᕐᓗᓂ, ᐃᒡᓗᓂ ᖃᐅᔨᓴᑦᓯᐊᕐᐸᒍ, ᐱᖁᑎᖏᑦ ᐱᔭᐅᓂᐊᑦᔭᓐᖏᓚᑦ. 22 ᓴᓐᖏᓂᕐᓴᒧᓪᓕ ᐅᐸᒃᑐᕐᑕᐅᒍᓂ ᓵᓚᒋᔭᐅᒍᓂᓗ, ᓱᒋᐅᑎᖏᓐᓂᒃ ᐊᕐᓵᕐᑕᐅᓂᐊᕐᐳᖅ ᑕᑎᒋᔭᖏᓐᓂᒃ, ᐱᖁᑎᖏᑦ ᐊᒡᒍᕐᓗᒋᑦ ᐱᑖᕆᔭᐅᒐᔭᕐᐳᑦ. 23 “ᐅᕙᓐᓂᒃ ᐃᓚᖃᖏᑦᑐᖅ ᐊᑭᕋᕐᑐᕐᑎᒋᕙᕋ, ᑲᑎᕐᓱᐃᖃᑎᒋᓐᖏᑕᕋᓗ ᓯᐊᒻᒪᒃᑎᕆᕗᖅ ᓇᒧᑐᐃᓐᓇᖅ.” ᐊᓂᕐᓂᐅᑉ ᓵᑖᓇᓯᒥᓐᖔᕐᑑᑉ ᐅᑎᕐᓂᖓ ᒫᑎᐅᓯ 12:43-45 24 “ᐊᓂᕐᓂᕐᓗᒃ ᐃᓄᖕᒥᑦ ᐊᓂᒐᒥ, ᐃᖏᕐᕋᕗᖅ ᓄᓇᒃᑯᑦ ᐱᕈᕐᑐᖃᖏᑦᑐᒃᑯᑦ ᐸᓂᕐᑐᐊᓗᒃᑯᑦ ᐃᓂᒃᓴᕐᓯᐅᕐᓗᓂ; ᐃᓂᒃᓴᕐᓯᐊᖏᓐᓇᒥ ᐃᓱᒪᓕᕐᐳᖅ, ‘ᐃᒡᓗᓐᓄᑦ ᐅᑎᕐᓂᐊᓕᕐᐳᖓ ᐊᓂᕕᒋᓚᐅᕐᑕᓐᓄᑦ.’ 25 ᐅᑎᕋᒥ ᑕᑯᕚ ᓴᓗᒻᒪᕐᓴᕐᓯᒪᑎᐊᓕᕐᑐᖅ ᐃᓂᓪᓚᒃᑎᕐᓯᒪᑦᑎᐊᕐᓗᓂᓗ. 26 ᑕᕝᕙ ᐊᓂᕗᖅ ᐂᒃᓯᕐᓗᓂ 7ᓂᒃ ᐊᓂᕐᓂᕐᓗᖕᓂᒃ ᐃᒻᒥᓂᑦ ᐱᐅᖏᓐᓂᕐᓴᐅᔪᓂᒃ, ᑕᕝᕗᓐᖓᕋᒥᒃ ᑕᕝᕙᓂ ᐃᓂᖃᓕᕐᐳᑦ; ᐃᓄᒡᓗ ᓯᕗᓂᖓᓂᑦ ᐱᐅᖏᓐᓂᕐᓴᐅᓕᕐᐳᖅ ᖃᓄᐃᓐᓂᕆᓚᐅᕐᑕᒥᓂᑦ.” ᓱᓕᑦᓯᐊᕐᑐᒥᒃ ᖁᕕᐊᓱᖕᓂᖅ 27 ᔩᓱᓯ ᑍᒫᒃ ᐅᖃᕐᑎᓗᒍ, ᐊᕐᓇᒥᒃ ᓂᓪᓕᕐᑐᖃᓕᕐᐳᖅ ᐅᖃᕐᓗᓂ, “ᓮᒻᒪᕐᑎᑕᐅᓯᒪᔪᒥᒃ ᐃᓅᓯᖃᕐᐳᖅ ᐊᕐᓇᖅ ᑍᓐᓇ ᐃᓕᖕᓂᒃ ᕿᑐᕐᒐᑖᑐᕕᓂᖅ ᐱᕈᕐᓮᓪᓗᓂᓗ!” 28 ᔩᓱᓯ ᐅᖃᕐᐳᖅ, “ᓮᒻᒪᕐᑎᑕᐅᓯᒪᔪᒥᒃ ᐃᓅᓯᖃᕐᐳᕐᓕ ᒎᑎᐅᑉ ᐅᖃᐅᓯᖏᓐᓂᒃ ᑐᓴᕐᑐᑦ ᒪᓕᑦᓯᐊᕐᓗᒋᓪᓗ!” ᑲᒪᓇᕐᑐᒥᒃ ᑕᑯᑎᑕᐅᔪᒪᔪᑦ ᒫᑎᐅᓯ 12:38-42 29 ᐃᓄᐃᑦ ᔩᓱᓯᐅᑉ ᐊᕙᑖᓃᑦᑐᑦ ᑲᑎᕐᓱᕐᐸᓪᓕᐊᖕᒪᑕ ᐅᖃᐅᑎᕔᑦ, “ᒫᓐᓇᐅᔪᖅ ᐅᓪᓗᒥ ᐃᓄᐃᑦ ᐱᐅᖏᑦᑑᓂᕐᓴᐅᓕᕐᒪᑕ; ᑲᒪᓇᕐᑐᒥᒡᓗ ᑕᑯᔪᒪᕙᒃᖢᑎᒃ, ᑲᒪᓇᕐᑐᒥᒃ ᑕᑯᑎᑕᐅᓂᐊᓐᖏᓚᑦ ᔫᓇᐅᑉ ᑲᒪᓇᕐᑐᒦᓚᐅᕐᓂᖓᑕ ᐊᓯᐊᓂᒃ. 30 ᔫᓇ ᓇᓗᓁᒃᑯᑕᐅᓕᓚᐅᕐᒪᑦ ᐃᓄᖕᓄᑦ ᓂᓂᕕᒥᐅᓄᑦ, ᑍᒫᒃᑕᐅᖅ ᐃᓅᑉ ᐃᕐᓂᖓ ᓇᓗᓁᒃᑯᑕᐅᓂᐊᕆᕗᖅ ᒫᓐᓇ ᐃᓅᔪᓄᑦ. 31 ᐅᓪᓗᖅ ᐃᖅᑲᕐᑐᐃᕕᒃ ᓇᓪᓕᐅᑎᒃᐸᑦ ᓰᐸᒥᐅᑦ ᐊᖓᔪᕐᖄᔪᐊᖓᑦ ᐊᕐᓇᖅ ᓂᑯᕕᑦᑐᒫᕐᐳᖅ ᐃᖅᑲᕐᑐᐃᓗᓂ ᒫᓐᓇ ᐃᓅᔫᓂᒃ ᓱᒋᐊᕐᑕᐅᔪᒃᓴᐅᖁᓪᓗᒋᑦ; ᑍᓐᓇ ᓄᓇᒥᓂᑦ ᐅᖓᓯᒃᑐᐊᓗᖕᒥᑦ ᑎᑭᓚᐅᕐᒪᑦ ᑐᓵᔭᕐᑐᕐᓗᓂ ᓲᓗᒨᓂᐅᑉ ᓯᓚᑐᓂᖓᓂᒃ; ᑕᑯᒋᑦ, ᐅᖃᐅᑎᕙᑦᓯ ᓲᓗᒨᓂᒥᑦ ᐊᖏᓂᕐᓴᒥᒃ ᑕᒫᓃᑦᑐᖃᕐᐳᖅ. 32 ᐅᓪᓗᒥ ᐃᖅᑲᕐᑐᐃᕕᖕᒥ ᓂᓂᕕᒥᐅᑦ ᒪᑭᑦᓱᒫᕐᐳᑦ ᒫᓐᓇ ᐃᓅᔪᑦ ᐃᖅᑲᕐᑐᕐᓗᒋᑦ ᓱᒋᐊᕐᑕᐅᖁᓪᓗᒋᑦ; ᑍᒃᑯᐊ ᓂᓂᕕᒥᐅᑦ ᖃᕿᐊᓕᓚᐅᕐᒪᑕ ᐱᐅᖏᑦᑐᓕᓂᕐᒥᖕᓂᒃ ᓇᓚᐅᑦᑍᔪᖅ ᔫᓇ ᐊᔪᕆᕐᑐᐃᑎᓪᓗᒍ ᑐᓵᒐᒥᒃ, ᑕᑯᒋᑦ ᐅᖃᐅᑎᕙᑦᓯ ᔫᓇᒥᑦ ᐊᖏᓂᕐᓴᒥᒃ ᐅᕙᓃᑦᑐᖃᕐᐳᖅ!” ᑎᒥᐅᑉ ᖃᐅᒪᓂᖓ ᒫᑎᐅᓯ 5:15 ; 6:22-23 33 “ᓇᓂᕈᐊᕐᒥᒃ ᐃᑭᑦᓯᔪᖃᕌᖓᒥ ᐃᔨᕐᑕᐅᕙᓐᖏᓚᖅ, ᒪᒃᑲᐅᔭᐅᓪᓘᓐᓃᑦ ᐊᑖᓄᑦ ᐃᓕᔭᐅᕙᓐᖏᓚᖅ; ᓇᓂᕈᐊᒃᑯᕕᐅᓪᓕ ᐃᓂᖓᓄᑦ ᐃᓕᔭᐅᕙᒃᐳᖅ, ᐃᒡᓗᒧᑦ ᐃᑎᕐᑐᑦ ᖃᐅᒪᔪᒥᒃ ᑕᑯᖁᓪᓗᒋᑦ. 34 ᐃᔨᓯ ᑎᒥᑦᓯᓐᓄᑦ ᓇᓂᕈᐊᑎᑐᑦ ᑍᒤᑉᐳᑦ; ᐃᔩᒃᑭᒃ ᑕᑯᓐᓇᑦᓯᐊᕐᐸᑎᒃ ᑎᒦᑦ ᐃᓘᓐᓈᑦ ᖃᐅᒪᔪᒦᑉᐳᖅ; ᐃᔩᒃᑭᒡᓕ ᑕᑯᓐᓇᖏᑉᐸᑎᒃ ᑎᒦᑦ ᐃᓘᓐᓈᑦ ᑖᕐᑐᒦᑉᐳᖅ. 35 ᑍᒤᒻᒪᑦ ᖃᐅᔨᓴᑦᓯᐊᕆᑦ ᖃᐅᒪᔪᖅ ᐃᓗᖕᓃᑦᑐᖅ ᑖᕐᓯᖁᓇᒍ. 36 ᑎᒥᓕᒫᑦ ᖃᐅᒪᓯᐅᕐᐸᑦ, ᑖᕐᑑᓂᖃᖏᓪᓗᓂ, ᑕᕝᕙ ᑎᒥᓕᒫᑦ ᖃᐅᒪᓯᐅᕐᓂᐊᕐᐳᖅ, ᓇᓂᕈᐊᑎᑐᑦ ᐃᓕᖕᓂᒃ ᖃᐅᒪᑎᑦᓯᑦᓯᐊᕐᑐᑎᑐᑦ.” ᔩᓱᓯᐅᑉ ᓈᒻᒪᒃᓴᖏᓐᓂᖓ ᐹᕆᓯᑦ ᐱᖁᔭᓂᒡᓗ ᐃᓕᓮᔩᑦ ᐱᓂᐊᕐᓂᖏᓐᓂᒃ ᒫᑎᐅᓯ 23:1-36 ; ᒫᑯᓯ 12:38-40 37 ᔩᓱᓯ ᑍᒫᒃ ᐅᖃᕐᑎᓪᓗᒍ, ᐹᕆᓯᐅᑉ ᓂᕆᔭᕐᑐᖁᕚ ᐃᒡᓗᒥᓄᑦ; ᑕᕝᕗᓐᖓᕋᒥᓗ ᐃᖏᑉᐳᖅ ᓂᕆᕕᖕᒧᑦ. 38 ᐹᕆᓯᓕ ᑲᒪᕕᒡᔪᐊᕐᐳᖅ ᔩᓱᓯ ᐅᐊᓴᖅᑳᖏᒻᒪᑦ ᓂᕆᓚᐅᖏᓐᓂᕐᒥᓂ. 39 ᐊᑕᓂᐅᑉ ᐅᖃᐅᑎᕚ, “ᐃᓕᑦᓯ ᐹᕆᓯᑦ ᑏᑑᑏᑦ ᓂᕐᕆᑏᓪᓗ ᓯᓚᑎᖏᑦ ᓴᓗᒻᒪᕐᓴᕋᓗᐊᕐᐸᓯ, ᐃᓗᓯᓕ ᐱᑖᕈᒫᓂᐊᓗᖕᒥᒃ ᐱᐅᖏᑦᑐᓕᓂᕐᒥᒡᓗ ᑕᑕᑉᐳᖅ. 40 ᓯᓔᑦᑐᓯ! ᑖᑦᓱᒪ ᓯᓚᑖᓂᒃ ᓴᓇᓚᐅᕐᑑᑉ ᐃᓗᐊᑦᑕᐅᖅ ᓴᓇᓚᐅᓐᖏᓚᐅᒃ? 41 ᑏᑑᑎᐅᑉ ᓂᕐᕆᓰᓪᓗ ᐃᓗᐊᓃᑦᑐᑦ ᑐᓂᓯᒋᒃ ᐊᒃᖢᔪᓄᑦ; ᑕᑯᒋᑦ, ᑕᕝᕙ ᓴᓗᒻᒪᑦᓯᐊᓕᕐᓂᐊᕐᐳᓯ ᐃᓘᓐᓇᖓᒍᑦ. 42 “ᐃᓕᑦᓯᓐᓄᑦ ᑲᑉᐱᐊᓐᓇᒦᒃ ᐃᓕᑦᓯ ᐹᕆᓯᑦ! ᑕᓪᓕᒪᐅᔪᕐᑐᐃᔭᕐᐸᒃᑐᓯ ᐊᒡᓛᑦ ᓂᕿᒧᑦ ᐃᓚᒃᓴᑯᓗᖕᓂᒃ ᐱᕈᕐᑐᓂᒃ ᒥᓐᑎᓂᒃ ᕉᓂᒡᓗ ᐊᑎᖃᕐᑐᓂᒃ, ᐊᓯᖏᓐᓂᒡᓗ ᐱᕈᕐᑐᓂᒃ, ᓈᒻᒪᓈᕐᑐᒥᒃ ᐱᓇᓱᐊᕐᓂᖅ, ᓇᒡᓕᒍᓱᖕᓂᕐᓗ ᒎᑎᒥᒃ ᑲᒪᒋᓇᒋᑦ; ᑖᒃᑯᐊ ᐱᔭᕆᐊᖃᕐᐸᓯ, ᐊᓯᖏᓪᓗ ᐊᑐᕆᐊᓖᑦ ᖁᔭᓈᖏᓪᓗᒋᑦ. 43 “ᐃᓕᑦᓯᓐᓄᑦ ᑲᑉᐱᐊᓐᓇᒦᒃ ᐃᓕᑦᓯ ᐹᕆᓯᑦ! ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ ᐃᒃᓯᕙᐅᑕᓂ ᐱᐅᓂᕐᐹᓂ ᐃᒃᓯᕙᔪᒪᕙᒃᑐᓯ, ᐃᓄᖕᓄᓪᓗ ᓂᓪᓕᐅᑦᔭᐅᑦᓯᐊᕈᒪᕙᒃᑐᓯ ᓂᐅᕕᕐᕕᖕᓂ. 44 ᐃᓕᑦᓯᓐᓄᑦ ᑲᑉᐱᐊᓐᓇᒦᒃ! ᐃᓗᕕᕐᑎᑐᑦ ᓇᓗᓁᒃᑯᑕᖃᖏᑦᑐᑎᑐᑦ ᑍᒤᓐᓇᑦᓯ, ᐃᓄᖕᓄᑦ ᑐᓪᓕᕋᕐᑕᐅᓪᓗᑎᒃ ᐱᓱᒃᕕᐅᕗᑦ ᖃᐅᔨᒪᔭᐅᓇᑎᒃ.” 45 ᐱᖁᔭᓂᒃ ᐃᓕᓮᔩᑦ ᐃᓚᖓᑦᑕ ᐅᖃᐅᑎᕚ, “ᑍᒫᒃ ᐅᖃᕐᑎᓪᓗᑎᑦ, ᐅᕙᑦᑎᓐᓂᒃ ᓇᕐᕈᓇᕐᑎᑦᓯᒋᕗᑎᑦ!” 46 ᔩᓱᓯᐅᑉ ᑭᐅᕚ, “ᐃᓕᑦᓯᓐᓄᑦ ᑲᑉᐱᐊᓐᓇᒦᒃ ᐃᓕᑦᓯ ᐱᖁᔭᓂᒃ ᐃᓕᓮᔨᐅᔪᓯ! ᐃᓄᐃᑦ ᐅᖁᒤᑦᑐᐊᓗᖕᓂᒃ ᐊᒡᔭᕐᓯᑎᓐᓇᓱᐊᕋᑦᓯᐅᒃ ᐊᒡᔭᒐᒃᓴᐅᖏᑦᑐᓂᒃ, ᓇᖕᒥᓂᕐᓗ ᒥᑭᔪᑯᓗᖕᒥᒡᓘᓐᓃᑦ ᐊᒡᔭᕋᓱᐊᕐᑕᖏᓐᓂᒃ ᐃᑲᔪᕋᓱᐊᕋᓯᐅᒃ. 47 ᐃᓕᑦᓯᓐᓄᑦ ᑲᑉᐱᐊᓐᓇᒦᒃ ᐃᓕᑦᓯ! ᓇᓚᐅᑦᑍᔪᑦ ᓯᕗᓕᑦᓯ ᑐᖁᓚᐅᕐᑕᖏᑦ ᐃᓗᕕᖃᕐᕕᓕᐅᕋᑦᓯᐅᒃ ᐃᖅᑲᐅᒪᔭᐅᑦᔪᑎᒃᓴᖏᓐᓂᒃ. 48 ᑕᕝᕙ ᓇᓗᓁᕐᓯᕗᓯ ᓈᒻᒪᒃᓴᕐᓂᑦᓯᓐᓂᒃ ᓯᕗᓕᑦᓯ ᐱᓂᐊᕐᓂᕆᓚᐅᕐᑕᖏᓐᓂᒃ; ᓯᕗᓕᓯ ᓇᓚᐅᑦᑍᔪᓂᒃ ᑐᖁᑦᓯᓚᐅᕐᐳᑦ, ᐃᓕᑦᓯᓕ ᑐᖁᓚᐅᕐᑕᖏᑦ ᐃᓗᕕᖃᕐᕕᓕᐅᕐᐸᓯ ᐃᖅᑲᐅᒪᔭᐅᑦᔪᑎᒃᓴᖏᓐᓂᒃ. 49 ᑍᒤᒻᒪᑦ ᒎᑎ ᓯᓚᑐᓂᕐᒥᒍᑦ ᐅᖃᓚᐅᕐᐳᖅ, ‘ᓇᓚᐅᑦᑍᔪᓂᒃ ᐅᖃᕆᐊᕐᑐᕐᑎᑕᓐᓂᒡᓗ ᑎᓕᓯᕕᒋᔪᒫᕐᐸᒃᑲ; ᑖᒃᑯᐊᓕ ᑐᖁᑦᓯᔪᒫᕐᐳᑦ ᐃᓚᖏᓐᓂᒃ, ᐃᓚᖏᓪᓗ ᐊᑭᕋᕐᑐᕐᓗᒋᑦ.’ 50 ᑍᒪ ᒫᓐᓇ ᐃᓅᔪᑦ ᓱᒋᐊᕐᑕᐅᑦᔪᑎᖃᕈᒫᕐᐳᑦ ᓇᓚᐅᑦᑍᔪᓂᒃ ᑐᖁᑕᐅᓯᒪᔪᓂᒃ ᐱᑦᔪᑎᖃᕐᑐᒧᑦ, ᓯᓚᕐᔫᑉ ᐱᒋᐊᕐᓂᖓᓂᑦ ᒫᓐᓇᒧᑦ ᑎᑭᓪᓗᒍ ᑐᖁᑕᐅᖃᑦᑕᕐᓯᒪᔪᓂᒃ. 51 ᐂᐱᓕᐅᑉ ᑐᖁᑕᐅᓂᖓᓂᑦ ᓴᑲᕅᐊᐅᑉ ᑐᖁᑕᐅᓂᖓ ᑎᑭᓪᓗᒍ, ᑖᓐᓇ ᑐᖁᑕᐅᓚᐅᕐᒪᑦ ᑐᒃᓯᐊᕐᕕᒡᔪᐊᕐᒥ ᑐᓂᕐᕈᓯᕐᕕᐅᑉ ᐃᑦᔪᕐᓁᑦᑐᕕᐅᓪᓗ ᐊᑯᓐᓂᖓᓂ. ᐃᓛᒃ ᐅᖃᐅᑎᕙᑦᓯ, ᒫᓐᓇ ᐅᑯᐊ ᐃᓅᔪᑦ ᓱᒋᐊᕐᑕᐅᔪᒫᕐᐳᑦ ᑍᒃᑯᐊ ᑕᒪᕐᒥᑦᓯᐊᖅ ᓱᒋᐊᕐᑕᐅᑦᔪᑎᒋᓗᒋᑦ! 52 “ᐃᓕᑦᓯᓐᓄᑦ ᑲᑉᐱᐊᓐᓇᒦᒃ ᐃᓕᑦᓯ ᐱᖁᔭᓂᒃ ᐃᓕᓮᔩᑦ! ᐃᓕᓯᒪᓂᐅᑉ ᒪᑐᖓᑕ ᐲᕈᑖ ᐱᓯᒪᒐᑦᓯᐅᒃ; ᐃᓕᑦᓯᓕ ᓇᖕᒥᓂᖅ ᐃᑎᕐᓂᐊᓐᖏᓚᓯ, ᐃᑎᕈᒪᔪᓪᓗ ᐃᑎᕐᑎᑦᑍᓕᓪᓗᒋᑦ!” 53 ᔩᓱᓯ ᑕᕝᕙᓐᖓᑦ ᕿᒪᕉᑎᑎᓪᓗᒍ, ᐱᖁᔭᓂᒃ ᐃᓕᓮᔩᑦ, ᐹᕆᓯᓪᓗ ᐊᑭᕋᕐᑐᒻᒪᕆᓕᕐᐹᑦ ᐊᐱᕐᓱᕐᓗᑎᒡ ᔩᓱᓯᐅᑉ ᒥᒃᓵᓄᑦ ᓱᓇᑐᐃᓐᓇᕐᓂᒃ ᐊᒥᓱᓂᒃ, 54 ᐅᐸᓗᐃᓇᓱᐊᕐᐹᑦ ᖃᓄᑐᐃᓐᓇᖅ, ᐅᖃᐅᓯᖏᑦ ᖃᐅᔨᒪᓇᓱᐊᑦᑎᐊᕐᐰᑦ, ᐅᖃᕐᑕᖓᒍᑦ ᓵᑕᒃᓴᓐᖑᕐᑎᑦᑐᒪᓪᓗᒍ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society