ᓘᑲᓯᐅᑉ ᐊᒡᓚᖏᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦᔩᓱᓯᐅᑉ ᑎᓕᓯᓂᖓ ᐊᖑᑎᓂᒃ 72ᓂᒃ 1 ᑕᒪᑐᒪ ᑭᖑᓂᖓᒍᑦ ᐊᑕᓂᖅ ᓂᕈᐊᓚᐅᕆᕗᖅ 72ᓂᒃ, ᑎᓕᓪᓗᒋ ᒪᕐᕉᓈᕐᑎᕐᓗᒋᑦ ᓄᓇᓕᓕᒫᓄᑦ ᐅᐸᓛᕈᒪᔭᒥᓄᑦ. 2 ᐅᖃᐅᑎᓪᓗᒋᑦ, “ᐱᕈᕐᓰᕕᒃ ᐊᖏᔫᕗᖅ, ᑲᑎᕐᓯᔪᒃᓴᓪᓕ ᐊᒥᒐᕐᐳᑦ; ᑍᒤᒻᒪᑦ ᐱᕈᕐᓰᕕᐅᑉ ᐊᑕᓂᖓ ᑐᒃᓯᐊᕐᕕᒋᓯᐅᒃ ᑎᓕᓯᖁᓪᓗᒍ ᑲᑎᕐᓯᖃᑕᐅᓂᐊᕐᑐᓂᒃ ᐱᕈᕐᓰᕕᖓᓂ. 3 ᐊᐅᓪᓚᓕᕆᑦᓯ; ᑕᑯᒋᑦ, ᓰᐱᐅᑉ ᓄᕐᕋᖏᑎᑐᑦ ᑎᓕᕙᑦᓯ ᐊᒪᖅᑯᑦ ᐊᑯᕐᖓᓐᓄᑦ. 4 ᑮᓇᐅᔭᒃᑯᕕᓕᔭᕐᓂᐊᕋᓯ, ᐃᒃᐱᐊᔪᓕᔭᕋᓯᓗ, ᐃᑎᒐᒍᑎᓕᔭᕋᓯᓗ; ᐊᖅᑯᑎᑦᓯᓐᓂ ᓂᓪᓕᐅᑦᔨᓂᐊᕋᓯᓘᓐᓃᑦ. 5 ᐃᒡᓗᒧᑦ ᐃᑎᕅᒍᑦᓯ, ᓯᕗᓪᓕᕐᒥᒃ ᐅᖃᖃᑦᑕᕆᑦᓯ, ‘ᐃᒡᓗᒥ ᐅᕙᓂ ᓮᒪᓇᕐᑐᖃᕐᓕ!’ 6 ᑕᕝᕙᓂ ᐃᒡᓗᒥ ᓮᒻᒪᕐᑎᑦᓯᓂᑦᓯᓐᓂᒃ ᐃᓚᓕᐅᕐᓯᔪᖃᕐᐸᑦ, ᑕᕝᕙ ᓮᒪᓂᖅ ᑕᕝᕙᓃᓐᓂᐊᕐᐳᖅ; ᐃᓚᓕᐅᕐᓯᖏᑉᐸᑕᓕ ᓮᒻᒪᕐᑎᑦᓯᓂᓯ ᐃᓕᑦᓯᓐᓄᑦ ᐅᑎᕐᓂᐊᕐᐳᖅ. 7 ᐃᒡᓗᒥᑦ ᑕᕝᕙᓐᖓᑦ ᓅᓐᓂᐊᕋᓯ, ᓂᕆᕙᒡᓗᓯ ᐃᒥᕐᐸᒡᓗᓯᓗ ᒪᓂᔭᐅᔪᓂᒃ ᐃᓕᑦᓯᓐᓄᑦ, ᐱᓇᓱᐊᕐᑐᖅ ᐊᑭᓕᕐᑕᐅᔭᕆᐊᖃᕐᒪᑦ; ᓯᓂᒃᑕᕐᕕᒋᔭᑦᓯ ᐊᓯᐊᓄᑦ ᓄᒃᑎᕐᓂᐊᕋᓯ. 8 ᓄᓇᓕᖕᓄᑦ ᑎᑭᑐᐊᕈᑦᓯ ᑐᓐᖓᓱᒃᑎᑕᐅᒍᑦᓯᓗ, ᓂᕿᓂᒃ ᕾᑕᖏᓐᓂᒃ ᓂᕆᖃᑦᑕᕆᑦᓯ; 9 ᖃᓂᒪᔪᑦ ᑕᕝᕙᓂ ᐋᖅᑭᖃᑦᑕᕐᓗᒋᑦ ᐅᖃᐅᑎᓗᒋᑦ, ‘ᒎᑎᐅᑉ ᐊᑕᓂᐅᕕᖓᑕ ᑎᑭᑉᐹᓯ.’ 10 ᓄᓇᓕᖕᓄᓪᓕ ᑎᑭᕝᕕᒋᔭᑦᓯᓐᓄᑦ ᑐᓐᖓᓱᒃᑎᑕᐅᖏᒃᑯᑦᓯ, ᐊᑐᕆᐊᒧᐊᕐᓗᓯ ᐅᖃᕐᑐᒃᓴᐅᕗᓯ, 11 ‘ᓴᓃᑦ ᓄᓇᑦᓯᓐᓂᑦ ᐱᓯᒪᔪᑦ, ᐃᑎᒐᑦᑎᓐᓃᑦ ᐲᔭᕐᐸᕗᑦ ᓇᒻᒪᒋᔭᐅᖏᓐᓂᑦᓯᓐᓂᒃ ᑲᐅᔨᑦᔪᑕᐅᖁᓪᓗᒋᑦ, ᒎᑎᐅᑉ ᐊᑕᓂᐅᕕᖓᑕ ᖃᓂᒋᓕᕐᒪᓯ.’ 12 ᐅᖃᐅᑎᕙᑦᓯ, ᐃᖅᑲᕐᑐᐃᕕᒃ ᓇᓪᓕᐅᑎᒃᐸᑦ ᓄᓇᓖᑦ ᑖᒃᑯᐊ ᓂᑲᒋᔭᐅᖏᓐᓂᕐᓴᐅᔪᒫᕐᐳᑦ ᓱᑑᒪᒥᐅᓂᑦ.” ᓄᓇᓖᑦ ᐅᒃᐱᕈᓱᖏᑦᑐᑦ ᒫᑎᐅᓯ 11:20-24 13 “ᑲᑉᐱᐊᓐᓇᒦᒃ ᑯᕋᓯᓐ! ᑲᑉᐱᐊᓐᓇᒦᒡᓗ ᐱᑦᓮᑕ! ᐃᓕᑦᓯᓐᓂ ᑲᒪᓇᕐᑐᓕᓂᕆᔭᐅᓚᐅᕐᑐᑦ ᑍᒫᓪᓗᐊᖅ ᑲᒪᓇᕐᑐᓕᔪᖃᕐᐸᑦ ᑍᕆᒥ ᓮᑐᓂᒥᓗ, ᑖᒃᑯᐊ ᐃᓄᖏᑦ ᖃᕿᐊᓕᕇᕐᓯᒪᓕᕋᔭᓚᐅᕐᐳᑦ, ᒎᑦᓯᐅᑉ ᒥᖅᑯᕕᓂᖓᓂᒃ ᐊᓐᓄᕌᕐᓗᑎᒃ ᐊᕐᔭᓕᓂᕐᓂᒡᓗ ᑲᑕᒑᑎᑦᓯᕕᒋᓗᑎᒃ ᐃᒻᒥᖕᓄᑦ ᐃᒃᓯᕚᕋᔭᓚᐅᕐᐳᑦ ᖃᕿᐊᓕᕐᓗᑎᒃ. 14 ᐃᖅᑲᕐᑐᐃᕕᒡᓕ ᓇᓪᓕᐅᑎᒃᐸᑦ ᓱᒋᐊᕐᑕᐅᓂᕐᓴᐅᔪᒫᕐᐳᓯ ᑍᕆᒥᑦ ᓮᑐᓂᒥᓪᓗ. 15 ᐃᕝᕕᓪᓗ ᑲᐲᕐᓂᐊᒻ, ᐃᓕᖕᓂᒃ ᖁᕝᕙᕐᑎᑦᓱᒪᕖᑦ ᕿᓚᖕᒧᑦ ᑎᑭᓪᓗᑎᑦ? ᑲᑕᒃᑎᑕᐅᔪᒫᕐᐳᑎᑦ ᑲᑉᐱᐊᓇᕐᑐᕕᖕᒧᑦ! 16 “ᐃᓕᑦᓯᓐᓂᒃ ᓈᓚᒃᑐᑦ, ᓈᓚᒃᑭᕚᖓ; ᐃᓕᑦᓯᓐᓂᒡᓗ ᓇᕐᕈᔫᑉ ᓇᕐᕈᒋᕚᖓ; ᐅᕙᓐᓂᒡᓕ ᓇᕐᕈᔫᑉ ᑎᓕᓯᓚᐅᕐᑐᖅ ᐅᕙᓐᓂᒃ ᓇᕐᕈᒋᕚ.” ᑎᓕᔭᐅᓚᐅᕐᑐᑦ 72 ᐅᑎᕐᓂᖓᑦ 17 ᐊᖑᑎᑦ 72 ᐅᑎᕐᐳᑦ ᖁᕕᐊᓱᒃᑐᐊᓘᓪᓗᑎᒃ ᐅᖃᕐᓗᑎᒃ, “ᐊᑕᓃᖅ, ᐊᓂᕐᓂᕐᓗᐃᑦ ᐊᒡᓛᑦ ᓈᓚᖃᑦᑕᓚᐅᕐᐹᑎᒍᑦ ᐊᑎᕐᓂ!” 18 ᔩᓱᓯᐅᑉ ᑭᐅᕔᑦ, “ᓵᑖᓇᓯ ᑕᑯᓚᐅᕐᐸᕋ ᕿᓚᖕᒥᑦ ᑲᑕᒃᑐᖅ ᖃᐅᒻᒫᓪᓚᒃᑐᑎᑐᑦ. 19 ᑕᑯᒋᑦ, ᐱᔪᓐᓇᕐᑎᑕᐅᓂᕐᒥᒃ ᑐᓂᓯᕕᒋᓚᐅᕐᐸᑦᓯ, ᖁᒡᓗᒋᐊᑦ ᓯᑯᐊᕐᐱᐅᓃᓪᓗ ᑐᓪᓕᕋᕈᓐᓇᕐᓗᒋᑦ, ᐊᑭᕋᕐᑐᕐᑎᐅᓪᓗ ᐱᔪᓐᓇᕐᓂᓕᒫᖏᓐᓂᒃ ᓵᓚᖃᕈᓐᓇᖁᓪᓗᓯ; ᓱᓇᒧᓪᓘᓐᓃᑦ ᐋᓐᓂᕐᑕᐅᓂᐊᓐᖏᓚᓯ. 20 ᐊᓂᕐᓂᕐᓗᐃᑦ ᓈᓚᖕᒪᓯ ᑕᒪᓐᓇ ᖁᕕᐊᓲᑎᒋᓇᓯᐅᒃ, ᖁᕕᐊᓱᒋᑦᓯᓕ ᐊᑎᕐᓯ ᑎᑎᕋᕐᓯᒪᖕᒪᑕ ᕿᓚᖕᒥ.” ᔩᓱᓯᐅᑉ ᖁᕕᐊᓱᒃᑎᑕᐅᓂᖓ ᒫᑎᐅᓯ 11:25-27 ; 13:16-17 21 ᑕᕝᕙᓂ ᐃᑲᕐᕋᒥ ᔩᓱᓯ ᐊᓂᕐᓂᒃᑯᑦ ᐃᑦᔪᕐᓁᑦᑐᒃᑯᑦ ᖁᕕᐊᓱᒃᑎᑕᐅᕗᖅ ᐅᖃᕐᓗᓂ, “ᐊᑖᑖᒃ, ᖁᔭᒋᕙᒋᑦ, ᐊᑕᓂᐅᔪᑎᑦ ᕿᓚᖕᒥ ᓄᓇᒥᓗ, ᑕᒪᒃᑯᐊ ᐃᓕᓯᒪᔪᓄᑦ ᓯᓚᑐᔪᓄᓪᓗ ᐃᔨᕐᓯᒪᒐᕕᒋᑦ, ᓄᑕᕋᕐᑎᑑᕐᑐᓄᓪᓕ ᑕᒪᒃᑯᐊ ᓇᓗᓇᕈᓐᓁᕐᑎᓐᓇᕕᒋᑦ; ᐄᓛᒃ, ᐊᑖᑖᒃ, ᑍᒫᒃ ᐱᖁᓯᒪᒐᕕᐅᒃ ᖁᕕᐊᒋᒐᕕᐅᒡᓗ. 22 “ᐊᑖᑕᒪ ᓱᓇᓕᒫᓂᒃ ᑐᓂᓯᕕᒋᕚᖓ, ᓇᓪᓕᐊᑦᑕᓗ ᐃᕐᓂᖅ ᑭᓇᐅᖕᒪᖔᑦ ᖃᐅᔨᒪᓐᖏᓛ, ᐊᑖᑕ ᑭᓯᒥ ᖃᐅᔨᒪᕗᖅ, ᐊᑖᑕᓗ ᑭᓇᐅᖕᒪᖓᑦ ᖃᐅᔨᒪᔪᖃᖏᓐᓂᕗᑦ, ᐃᕐᓂᖅ ᑭᓯᒥ ᖃᐅᔨᒪᕗᖅ, ᐃᕐᓂᐅᓪᓗ ᓂᕈᐊᕐᓗᒋᑦ ᖃᐅᔨᑎᑦᓱᒪᔭᖏᑕ ᑭᓯᒥ ᖃᐅᔨᒪᕚᑦ.” 23 ᑕᕝᕙ ᔩᓱᓯᐅᑉ ᐃᓕᓐᓂᐊᕐᑎᓂ ᓵᕝᕕᒋᓪᓗᒋᑦ ᑖᒃᑯᐊᑑᑎᓪᓗᒋᑦ ᐅᖃᐅᑎᕔᑦ, “ᑐᓱᓐᓇᕐᑐᒦᑉᐳᓯ ᑕᑯᓐᓇᕐᑕᓯ ᑕᒪᒃᑯᐊ ᐱᓪᓗᒋᑦ! 24 ᐅᖃᐅᑎᕙᑦᓯ ᓇᓚᐅᑦᑍᔪᑦ ᐊᒥᓱᑦ, ᐊᖓᔪᖅᑳᕐᔪᐊᓪᓗ ᑕᑯᔪᒪᓚᐅᕋᓗᐊᕐᐳᑦ ᒫᓐᓇ ᑕᑯᖃᑦᑕᕐᑕᑦᓯᓐᓂᒃ, ᑕᑯᓚᐅᓐᖏᓚᓪᓗ, ᑐᓴᕐᑕᑦᓯᓐᓂᒡᓗ ᑐᓴᕈᒪᓚᐅᕋᓗᐊᕐᐳᑦ, ᑐᓴᓚᐅᓐᖏᓚᓪᓗ.” ᔩᓱᓯᐅᑉ ᐊᑦᔨᐅᔫᑎᑕᖓ ᓴᒥᐊᕆᐊᕐᒥᐅᑕᑦᓯᐊᖅ 25 ᑕᑯᒋᑦ, ᐱᖁᔭᓂᒃ ᐃᓕᓯᒪᔪᖅ ᕾᒋᕗᖅ ᔩᓱᓯᒧᑦ ᐆᒃᑐᕐᓗᒍ, ᐅᖃᕐᓗᓂ, “ᐊᔪᕆᕐᑐᐃᔩ, ᖃᓄᖅ ᐱᔪᒃᓴᐅᕗᖔ ᐃᓅᓯᕐᒥᒃ ᓄᖑᓱᐃᑦᑐᒥᒃ ᐱᑖᖁᓪᓗᖓ?” 26 ᔩᓱᓯᐅᑉ ᑭᐅᕚ, “ᖃᓄᖅ ᐱᖁᔧᑦ ᐅᖃᕐᓯᒪᕚᑦ? ᖃᓄᕐᓕ ᑐᑭᓯᓯᒪᕕᒋᑦ?” 27 ᑖᑦᓱᒪ ᑭᐅᕚ, “ᐊᑕᓂᖅ, ᒎᑎᓯ ᓇᒡᓕᒋᔭᒃᓴᕆᕙᓯ ᐆᒻᒪᑎᑦᓯᓐᓄᑦ ᑕᒤᓐᓄᑦ, ᑕᕐᓂᑦᓯᓐᓄᓪᓗ ᑕᒤᓐᓄᑦ, ᐱᔪᓐᓇᕐᓂᑦᓯᓐᓄᓪᓗ ᑕᒤᓐᓄᑦ, ᐃᓱᒤᓪᓗ ᑕᒫᑦ ᐊᑐᕐᓗᒍ; ᐃᓅᖃᑎᖕᓂᒃ ᐃᓕᒃᑐᑦ ᓇᒡᓕᒍᓱᒃᑐᒃᓴᐅᕗᑎᑦ.” 28 ᔩᓱᓯᐅᑉ ᑭᐅᕚ, “ᑍᒫᑦᓯᐊᖅ ᑭᐅᕗᑎᑦ; ᑍᒤᓕᐅᕆᑦ ᑕᕝᕙ ᐃᓅᓂᐊᕐᐳᑎᑦ.” 29 ᐱᖁᔭᓂᒃ ᐃᓕᓮᔨ ᓈᒻᒪᑦᑎᐊᕐᑐᒦᓐᓂᕐᒥᖕᓂᒃ ᖃᐅᔨᒪᔭᐅᔪᒪᓕᕋᒥ ᔩᓱᓯ ᐊᐱᕆᕚ, “ᑭᓇᓕ ᑍᒪ ᐃᓅᖃᑎᒋᕙᕋ?” 30 ᔩᓱᓯᐅᑉ ᑭᐅᕚ, “ᐊᖑᒻᒥᒃ ᔨᕉᓴᓕᒻᒥᑦ ᐊᒻᒧᐊᒃᑐᖃᓚᐅᕐᐳᖅ ᔨᕆᑰᒧᓐᖓᐅᔪᒥᒃ, ᑎᒡᓕᒃᑎᓂᑦ ᑖᓐᓇ ᐅᐸᒃᑕᐅᕗᖅ, ᑲᑐᑦᔭᐅᓪᓗᓂ ᐊᓐᓄᕅᔭᕐᑕᐅᕗᖅ ᐋᓐᓂᕐᓯᕐᑕᐅᓪᓗᓂ, ᐊᓇᐅᓕᕐᑕᐅᕗᖅ, ᑐᖁᓕᒑᓕᕐᑐᖅ ᕿᒪᒃᐹᑦ. 31 ᑍᑦᓱᒪᓂ ᐱᓱᒃᑐᖃᓚᐅᕐᐳᖅ ᑐᓂᕐᕈᓯᕐᑎᑦᓯᔨᒥᒃ ᑕᒪᐅᓇ ᐊᑐᕆᐊᒃᑯᑦ; ᑖᓐᓇ ᑐᖁᓕᒑᔪᖅ ᑕᑯᒐᒥᐅᒃ ᖄᖐᓐᓇᕐᐹ ᐊᑐᕆᐊᑉ ᐊᑭᐊᒍᑦ. 32 ᐊᒻᒪᑦᑕᐅᖅ ᓕᕔᑎ ᑕᒪᐅᓈᓚᐅᕆᕗᖅ, ᑐᖁᓕᒑᔪᖅ ᑕᑯᒐᒥᐅᒃ ᖄᒌᓐᓇᕆᕚ ᐊᑐᕆᐊᑉ ᐊᑭᐊᒍᑦ. 33 ᓴᒥᐊᕆᐊᕐᒥᐅᑕᐅᑉ ᑕᒪᐅᓇ ᐃᖏᕐᕋᔫᑉ ᑎᑭᓐᓇᒥᐅᒃ ᑐᖁᓕᒑᔪᖅ; ᑕᑯᒐᒥᐅ, ᓇᒡᓕᒋᓕᕐᐹ. 34 ᐅᐸᒡᓗᒍ ᑭᓪᓕᖏᑦ ᐅᕐᓱᒥᒃ ᐅᐂᓂᒥᒡᓗ ᖁᕝᕕᕆᓪᓗᒋᑦ ᒪᑦᑐᓯᕐᑐᕐᐰᑦ, ᐆᒪᔪᖁᑎᒥᓄᑦ ᐃᑭᑎᓪᓗᒍ ᓯᓂᒃᑕᕐᕕᖕᒧᐊᕈᑎᕚ, ᑕᕝᕙᓂᓗ ᑲᒪᒋᓕᕐᓗᒍ. 35 ᖃᐅᑎᓪᓗᒍ ᑮᓇᐅᔮᖕᓂᒃ ᒪᕐᕉᖕᓂᒃ ᓯᓂᒃᑕᕐᕕᐅᑉ ᐃᓄᐊ ᑐᓂᓯᕕᒋᕚ, ᐅᖃᐅᑎᓪᓗᒍ, ‘ᐅᓇ ᑲᒪᒋᑦᓯᐊᕈᒃ; ᐊᖏᓂᕐᓴᒥᒃ ᑮᓇᐅᔧᕈᑎᒋᒍᕕᐅᒃ ᐅᑎᓕᕐᒥᒍᒪ ᑕᒪᐅᓇ ᐊᑭᓕᒃᑲᓐᓂᓛᕐᐸᒋᑦ.’ 36 “ᓇᓪᓕᐊᑦ ᑍᒪ ᐊᖑᑎᑦ ᐱᖓᓱᑦ ᐃᓅᖃᑎᒋᔭᐅᓂᕐᐹᖑᕚ ᑖᑦᓱᒧᖓ ᑐᖁᑕᐅᑲᓴᓚᐅᕐᑐᒧᑦ?” 37 ᐱᖁᔭᓂᒃ ᐃᓕᓮᔨᐅᑉ ᑭᐅᕚ, “ᑖᓐᓇ ᐱᑦᓯᐊᓚᐅᕐᑐᖅ ᑖᑦᓱᒧᖓ ᑐᖁᑕᐅᑲᓴᒃᑐᒧᑦ.” ᔩᓱᓯᐅᑉ ᐅᖃᐅᑎᕚ, “ᐃᕝᕕᑦᑕᐅᖅ ᑍᒤᓕᐅᕆᐊᕐᑐᓕᕆᑦ.” ᔩᓱᓯᐅᑉ ᐳᓛᕆᐊᕐᓂᖓ ᒫᑕᒥᒃ ᒥᐊᕆᒥᒡᓗ 38 ᔩᓱᓯ ᐃᓕᓐᓂᐊᕐᑎᓂ ᐃᓚᒋᓪᓗᒋᑦ ᐃᖏᕐᕋᓪᓗᑎᒃ, ᓄᓇᓕᖕᓄᑦ ᑎᑭᑉᐳᑦ; ᑕᕝᕙᓂ ᐊᕐᓇᐅᑉ ᒫᑕᒥᒃ ᐊᑎᓕᐅᑉ ᑐᓐᖓᓱᒃᑎᑉᐹ ᐊᖏᕐᕋᒥᓄᑦ. 39 ᒫᑕ ᖃᑕᓐᖑᑎᖃᕐᐳᖅ ᒥᐊᕆᒥᒃ ᐊᑎᓕᖕᒥᒃ, ᒥᐊᕆ ᐃᒃᓯᕚᓚᐅᕐᐳᖅ ᐊᑕᓂᐅᑉ ᓵᑦᑎᐊᖓᓂ ᐊᔪᕆᕐᑑᓯᖏᓐᓂᒃ ᓈᓚᒡᓗᓂ. 40 ᒫᑕᓕ ᐃᓱᒪᔮᕈᑎᖃᓕᕐᐳᖅ ᐱᔭᒃᓴᖃᓗᐊᕐᓂᕐᒥᓄᑦ; ᔩᓱᓯ ᐅᐸᒃᓗᒍ ᐅᖃᐅᑎᕚ, “ᐊᑕᓃᖅ, ᖃᓄᐃᒃᓴᓐᖏᓚᑏᑦ ᒥᐊᕆᐅᑉ ᐱᓕᕆᔪᑑᑎᒐᓗᐊᕐᐸᖓ? ᐅᕙᓐᓂᒃ ᐃᑲᔪᖁᓚᐅᕈᒃ.” 41 ᐊᑕᓂᐅᑉ ᑭᐅᕚ, “ᒫᑖ, ᒫᑖ, ᐃᓱᒪᔮᕈᑎᖃᓗᐊᕋᕕᑦ ᐱᓇᓱᐊᒐᒃᓴᕕᑦ ᐅᓄᕐᓂᖏᓐᓂᒃ; 42 ᐊᑕᐅᓯᕐᓕ ᐱᔭᕆᐊᖃᓗᐊᕐᑐᑑᕗᖅ. ᒥᐊᕆ ᐱᐅᓂᕐᓴᒥᒃ ᐱᔪᒪᖕᒪᑦ, ᑖᓐᓇ ᐊᕐᓵᕐᑕᐅᓂᐊᓐᖏᓚᖅ ᑕᒪᑐᒥᖓ.” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society