ᒨᓯᓯ ᐱᖓᔪᖏᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᕉᓂᐅᑉ ᑎᓕᔭᐅᓂᓂ ᐊᑐᓕᕐᐹ

¹ ᐅᓪᓗᐃᑦ 8ᖓᓐᓂ ᒨᓯᓯᐅᑉ ᐂᕉᓂ ᕾᖁᕚ ᐃᕐᓂᖏᓪᓗ, ᐃᓴᕆᐊᓕᒥᐅᓪᓗ ᐊᖓᔪᖅᑳᖏᑦ.

² ᐂᕉᓂᓗ ᐅᖃᐅᑎᕚ, “ᑐᓂᕐᕈᑎᒃᓴᖃᕆᑦ ᐃᒻᒧᒃᓯᐅᒐᐅᑉ ᓄᕐᕋᖓᓂᒃ ᐊᖑᒻᒥᒃ ᐊᔪᕐᓂᑎᑦ ᐱᓪᓗᒋᑦ, ᑐᓂᕐᕈᑎᒃᓴᖃᒃᑲᓐᓂᕆᓪᓗ ᓰᐱᐅᑉ ᐊᖑᓴᓪᓗᖓᓂᒃ ᐃᑯᐊᓚᓗᒍ ᑐᓂᕐᕈᑎᒃᓴᒥᒃ, ᑕᒪᖏᒡᓗ ᖃᓄᐃᓐᓂᖃᖏᑦᓯᐊᕐᓗᑎᒃ, ᑖᒃᑯᐊᒃ ᐊᑕᓂᐅᑉ ᓵᖓᓄᑦ ᐱᑎᒃᑭᒃ.

³ ᐃᓴᕆᐊᓕᒥᐅᓪᓗ ᐅᖃᐅᑎᒃᑭᑦ ᑐᓂᕐᕈᑎᒃᓴᖃᕆᑦᓯ ᒎᑦᓯᒥᒃ ᐊᖑᓴᓪᓗᕐᒥᒃ ᐊᔪᕐᓂᓯ ᐱᓪᓗᒋᑦ, ᐃᒻᒧᒃᓯᐅᒐᐅᓪᓗ ᓄᕐᕋᖓᓂᒃ, ᓰᐱᐅᓪᓗ ᓄᕐᕋᖓᓂᒃ ᑖᒃᑯᐊᒡᓗ ᐊᕐᕌᒍᖃᕐᑐᒃᓴᐅᕘᒃ ᐊᑕᐅᓯᕐᒥᒃ ᐊᑐᓂᑦ ᖃᓄᐃᓐᓂᖃᖏᑦᓯᐊᕐᓗᑎᒡᓗ, ᑖᒃᑯᐊᒃ ᐃᑯᐊᓚᓗᑎᒃ ᑐᓂᕐᕈᑎᒃᓴᐅᖁᓪᓗᒋᒃ,

⁴ ᐃᒻᒧᒃᓯᐅᒐᕐᒥᒡᓗ ᓰᐱᐅᓪᓗ ᐊᖑᓴᓪᓗᖓᓂᒃ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᒋᓗᒋᒃ, ᐃᑯᐊᓪᓚᓗᒋᒡᓗ ᐊᑕᓂᐅᑉ ᓵᖓᓂ, ᐱᖃᓯᐅᑦᔨᓗᓯᓗ ᓂᐊᖂᔭᓂᒃ ᑐᓂᕐᕈᑎᒃᓴᓂᒃ ᐅᕐᓱᒥᒃ ᐃᓚᖃᕐᓗᒋᑦ. ᐅᓪᓗᒥ ᐊᑕᓂᖅ ᓴᖅᑭᓐᓂᐊᕐᒪᑦ ᐃᓕᑦᓯᓐᓄᑦ.”

⁵ ᑖᒃᑯᓂᖓᓗ ᐊᑐᐃᓐᓇᕈᐃᕗᑦ ᒨᓯᓯᐅᑉ ᐱᖁᔭᖏᓐᓂᒃ ᑐᐱᐅᑉ ᑲᑎᒪᕕᐅᑉ ᓵᖓᓂ, ᐃᓄᒋᐊᒃᑐᕐᔪᐊᓪᓗ ᖃᒡᓕᒋᐊᕐᐳᑦ ᐊᑕᓂᐅᑉ ᓵᖓᓂ.

⁶ ᒨᓯᓯᓗ ᐅᖃᕐᐳᖅ, “ᐃᒫᒃ ᑕᕝᕙ ᐊᑕᓂᐅᑉ ᐱᖁᕚᓯ, ᐊᑕᓂᐅᑉ ᖃᐅᒪᓂᖓ ᐃᓕᑦᓯᓐᓄᑦ ᑕᑯᒃᓴᐅᖁᓪᓗᒍ.”

⁷ ᒨᓯᓯ ᐂᕉᓂᒧᑦ ᐅᖃᕐᐳᖅ, “ᑐᓂᕐᕈᓯᕐᕕᖕᒧᑦ ᕾᒋᑦ ᑐᓂᕐᕈᓯᕐᓗᑎᓪᓗ ᐊᔪᕐᓂᑎᑦ ᐱᓪᓗᒋᑦ ᑐᓂᕐᕈᑎᒃᓴᒥᒃ ᐃᑯᐊᓪᓚᒐᒃᓴᒥᒡᓗ ᑐᓂᕐᕈᑎᒃᓴᒥᒃ, ᐃᕝᕕᑦ ᐃᓱᒪᒋᔪᓐᓁᕐᕕᐅᖁᓪᓗᑎᑦ ᐃᓄᐃᓪᓗᑦᑕᐅᖅ ᐱᓪᓗᒋᑦ, ᑐᓂᕐᕈᑎᒋᒍᒃ ᑐᓂᕐᕈᑎᒃᓴᖅ ᐃᓄᐃᑦ ᐱᑦᔪᑎᒋᓗᒋᑦ ᐃᓱᒪᒋᔪᓐᓁᕐᕕᐅᖁᓪᓗᒋᑦ, ᑍᒪᒃ ᐊᑕᓂᖅ ᐱᖁᔨᖕᒪᑦ.”

⁸ ᐂᕉᓂᓗ ᑐᓂᕐᕈᓯᕐᕕᖕᒧᐊᕐᐳᖅ ᐃᒻᒧᒃᓯᐅᒐᐅᑉ ᓄᕐᕋᖓ ᑐᖁᑉᐹ ᓇᖕᒥᓂᖅ ᐊᔪᕐᓂᓂ ᐱᓪᓗᒋᑦ ᑐᓂᕐᕈᑎᒋᓪᓗᒍ.

⁹ ᐂᕉᓂᐅᓪᓗ ᐃᕐᓂᖏᑕ ᐆᒪᔫᑉ ᐊᐅᖓ ᑐᓂᕚᑦ, ᑎᑭᓂᓗ ᒥᓱᒃᐹ ᑐᓂᕐᕈᓯᕐᕕᐅᓪᓗ ᑎᕆᖅᑯᖏᑦ ᓇᒡᔪᖕᓂᒃ ᑍᔭᐅᔪᑦ ᒥᖑᐊᕐᐰᑦ; ᐊᐅᓪᓗ ᐊᒥᐊᒃᑯᖓ ᑯᕕᕚ ᑐᓂᕐᕈᓯᕐᕕᐅᑉ ᑭᒡᓕᖓᓄᑦ.

¹⁰ ᑐᓂᕐᕈᓯᕐᕕᐅᓪᓗ ᖄᖓᓂ ᑐᓐᓄᖓ ᐃᑯᐊᓪᓚᒃᐹ, ᑕᕐᑐᖏᒡᓗ ᑎᖑᖓᑕᓗ ᑭᒃᓴᐅᑎᖓ ᐊᔪᕐᓂᖅ ᐱᓪᓗᒍ ᑐᓂᕐᕈᑎᒃᓴᒥᑦ, ᑍᒫᒃ ᐊᑕᓂᐅᑉ ᒨᓯᓯ ᐱᖁᓚᐅᕐᒪᒍ.

¹¹ ᓂᕿᖓᓕ ᐊᒥᖓᓗ ᐃᑯᐊᓪᓚᒃᐹ ᓄᓇᓖᑦ ᓯᓚᑖᓂ.

¹² ᑐᓂᕐᕈᑎᒃᓴᕐᓗ ᐃᑯᐊᓚᒐᒃᓴᖅ ᑐᖁᑉᐹ. ᐃᕐᓂᖏᑕᓗ ᑐᓂᕐᕈᑎᐅᔫᑉ ᐊᐅᖓ ᑐᓂᕐᕈᑎᒋᕚᑦ, ᑐᓂᕐᕈᓯᕐᕕᐅᓪᓗ ᓴᓂᕋᖏᒃ ᓯᕐᐸᕐᓴᕐᐰᑦ.

¹³ ᐃᕐᓂᖏᑕᓗ ᑐᓂᕐᕈᑎᒃᓴᖅ ᑐᓂᐅᖅᑲᕐᐹᑦ ᐊᒡᒍᕐᓯᒪᔪᑦ ᐊᑕᐅᓯᐅᓈᕐᑎᕐᓗᒋᑦ. ᓂᐊᖁᖓ ᐱᖃᓯᐅᑎᓪᓗᒍ, ᐂᕉᓂᐅᓪᓗ ᐃᑯᐊᓪᓚᒃᐰᑦ ᑐᓂᕐᕈᓯᕐᕕᖕᒥ.

¹⁴ ᐃᕐᕋᕕᖏᓪᓗ ᐃᕐᕈᕐᑐᕐᐰᑦ ᓂᐅᖏᓪᓗ ᐃᑯᐊᓪᓚᖃᓯᐅᑎᓪᓗᒋᑦ ᑐᓂᕐᕈᑎᒃᓮᑦ ᖄᖏᓐᓂ ᑐᓂᕐᕈᓯᕐᕕᖕᒥ.

¹⁵ ᐂᕉᓂᐅᓪᓕ ᐃᓄᐃᑦ ᐱᓪᓗᒋᑦ ᑐᓂᕐᕈᑎᒃᓴᖅ ᑕᒪᐅᓐᖓᐅᑎᕚ, ᑖᓐᓇ ᒎᑦᓯᐅᕗᖅ ᑐᓂᕐᕈᑎᒃᓴᖅ ᐃᓄᐃᑦ ᐊᔪᕐᑐᓕᓂᖏᑦ ᐱᓪᓗᒋᑦ, ᑐᖁᑉᐹᓗ ᑐᓂᕐᕈᑎᒋᓪᓗᒍᓗ ᓯᕗᓪᓕᕐᑐᑦ ᑍᒫᓪᓗᐊᖅ.

¹⁶ ᐃᑯᐊᓚᓪᓗᓂ ᑐᓂᕐᕈᑎᒃᓴᖅ ᑕᒪᐅᓐᖓᕆᕚ ᑐᓂᕐᕈᑎᒋᕚᓗ ᐱᖁᔭᐅᓯᒪᔪᖅ ᒪᓕᒡᓗᒍ.

¹⁷ ᓂᐊᖂᔭᕐᓗ ᑐᓂᕐᕈᑎᒃᓴᖅ ᑕᒪᐅᓐᖓᕆᕚ ᐊᒡᒐᖕᒥᓄᑦ ᑎᒍᓯᓪᓗᓂ ᑖᓐᓇ ᐃᑯᐊᓪᓚᒃᐹ ᑐᓂᕐᕈᓯᕐᕕᖕᒥ, ᐅᓪᓛᒥ ᑐᓂᕐᕈᑎᒋᔭᐅᔪᒧᑦ ᐃᓚᓕᐅᑎᓪᓗᒍ.

¹⁸ ᐃᒻᒧᒃᓯᐅᒐᕐᓗ ᑐᖁᒃᑭᕚ ᓰᐱᐅᓪᓗ ᐊᖑᓴᓪᓗᖓ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᒋᕚ ᐃᓄᐃᑦ ᐱᓪᓗᒋᑦ. ᐃᕐᓂᖏᑕ ᐆᒪᔫᑉ ᐊᐅᖓ ᑐᓂᕚᑦ, ᐂᕉᓂᐅᓪᓗ ᓯᕐᐸᕐᓴᕈᑎᒋᕚ ᑐᓂᕐᕈᓯᕐᕕᐅᑉ ᓴᓂᕋᖏᓐᓄᑦ.

¹⁹ ᐃᒻᒧᒃᓯᐊᒐᐅᓪᓕ ᑐᓐᓄᖏᑦ, ᓰᐱᐅᓪᓗ ᐊᖑᓴᓪᓗᖓᑕ ᐸᒥᐊᓪᓗᖏᒃᑕ ᑐᓐᓄᖏᑦ, ᑕᕐᑐᖏᒡᓗ ᑎᖑᖏᑕᓗ ᑭᒃᓴᐅᑎᖏᑦ;

²⁰ ᑖᒃᑯᐊ ᓴᑭᐊᖏᒃᑕ ᖄᖏᓐᓄᑦ ᐃᓕᕔᑦ, ᐂᕉᓂᐅᓪᓗ ᐃᑯᐊᓪᓚᒃᐰᑦ ᑐᓂᕐᕈᓯᕐᕕᖕᒥ.

²¹ ᐂᕉᓂᐅᓪᓗ ᐆᒪᔫᑉ ᓴᑭᐊᖏᑦ ᒥᒥᖓᑕᓗ ᑕᓕᕐᐱᐊ ᑐᓂᕐᕈᑎᒋᕔᑦ ᐊᑕᓂᐅᑉ ᓵᖓᓂ, ᑍᒫᒃ ᑐᓂᕐᕈᑎᒋᕔᑦ ᒨᓯᓯᐅᑉ ᐱᖁᔨᓂᖓ ᒪᓕᒡᓗᒍ.

²² ᐂᕉᓂᓗ ᐃᓵᒃᐳᖅ ᐃᓄᐃᑦ ᓵᓪᓗᒋᑦ ᓮᒻᒪᕐᑎᓪᓗᒋᓪᓗ. ᑐᓂᕐᕈᓯᕇᕋᒥ ᐊᔪᕐᓂᖅ ᐱᓪᓗᒍ, ᐃᑯᐊᓚᒐᒃᓴᒥᒡᓗ ᑐᓂᕐᕈᓯᕇᕋᒥ, ᐃᓚᒋᔭᐅᑦᓯᐊᕈᒪᓂᕐᒧᓪᓗ ᑐᓂᕐᕈᓯᕇᕋᒥ, ᑐᓂᕐᕈᓯᕐᕕᖕᒥᑦ ᐊᖅᑲᕐᐳᖅ.

²³ ᑕᕝᕙ ᒨᓯᓯᒃᑯᒃ ᐂᕉᓂᒃᑯᒃ ᑐᐱᕐᒧᑦ ᑲᑎᒪᕕᖕᒧᑦ ᐃᑎᕐᐴᒃ, ᐊᓂᒐᒥᒡᓗ ᐃᓄᐃᑦ ᑐᒃᓯᐅᑎᓪᓗᒋᑦ ᓮᒻᒪᕐᑎᑉᐰᑦ; ᒎᑎᐅᓪᓗ ᖃᐅᒪᓂᕐᔪᐊᖓ ᑕᑯᒃᓴᐅᓕᕐᐳᖅ ᐃᓄᓕᒫᓄᑦ.

²⁴ ᐃᑯᒪᓗ ᐊᓂᕗᖅ ᐊᑕᓂᐅᑉ ᓇᔪᒐᖓᓂᑦ ᑐᓂᕐᕈᑏᓪᓗ ᐃᑯᐊᓚᒐᒃᓮᑦ ᓄᖑᑉᐰᑦ ᑐᓐᓄᐃᓪᓗ ᑐᓂᕐᕈᓯᕐᕕᐅᑉ ᖄᖓᓃᑦᑐᑦ. ᐃᓄᐃᓪᓗ ᑕᒪᑐᒥᖓ ᑕᑯᒐᒥᒃ, ᕾᒐᓛᕐᐳᑦ ᐹᒻᒪᒡᓗᑎᒡᓗ ᑮᓇᑎᒃ ᓄᓇᒧᑦ ᐊᒃᑐᕐᓗᒍ.