ᒨᓯᓯ ᐱᖓᔪᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᓂᕐᕈᑎᒃᓴᖅ ᐸᓯᔭᒃᓴᐅᓂᖅ ᐱᓪᓗᒍ

¹ “ᐅᑯᐊ ᑕᕝᕙ ᒪᓕᒊᑦ ᐸᓯᔭᒃᓴᐅᓂᕐᒧᑦ ᐊᑭᓕᐅᑎᒃᓴᑦ ᑐᓂᕐᕈᑎᒃᓮᑦ, ᑕᒪᓐᓇᓗ ᐃᑦᔪᕐᓁᓐᓂᕐᐹᖑᓪᓗᓂ.

² ᐸᓯᔭᒃᓴᐅᓂᕐᒧᑦ ᐊᑭᓕᐅᑎᒃᓴᖅ ᑐᓂᕐᕈᑦ ᑐᖁᑕᐅᔪᒃᓴᐅᕗᖅ ᑐᓂᕐᕈᑎᒃᓮᑦ ᐃᑯᐊᓚᒐᒃᓮᑦ ᑐᖁᑕᐅᕕᖓᓂ, ᐊᐅᖓᓗ ᓯᕐᐸᕐᓴᕈᑕᐅᓗᓂ ᑐᓂᕐᕈᓯᕐᕕᐅᑉ ᓴᓂᕋᖏᓐᓄᑦ.

³ ᑐᓐᓄᓕᒫᖏᑦ ᑐᓂᕐᕈᑕᐅᔭᕆᐊᖃᕐᐳᑦ, ᐸᒥᐊᓪᓗᖓᑕᓗ ᑐᓐᓄᖓ, ᐃᕐᕋᕕᖏᑕᓗ ᑭᒃᓴᐅᑎᖏᑦ.

⁴ ᑕᕐᑐᖏᒡᓗ ᐃᒡᓗᒃᑐᑦ ᑕᕐᑐᕈᑎᖏᓪᓗ ᑐᓐᓄᐃᑦ ᑯᑦᓯᓂᖏᓐᓂ ᑐᓐᓄᐃᑦ ᑎᖑᖓᑕᓗ ᐃᒻᒧᑎᖓ ᑐᓐᓄᖅ, ᑕᒪᓐᓇ ᐱᖃᓯᐅᑎᔭᕆᐊᖃᕐᐳᖅ ᑕᕐᑐᖏᒃ ᐲᓕᕐᐸᑎᒃ.

⁵ ᑐᓂᕐᕈᓯᕐᑎᑦᓯᔨᐅᑉ ᐃᑯᐊᓪᓚᒐᒃᓴᕆᕔᑦ ᑐᓂᕐᕈᓯᕐᕕᖕᒥ ᑐᓂᕐᕈᑎᒋᓗᒋᑦ ᐃᑯᐊᓪᓚᓗᒋᑦ ᐊᑕᓂᕐᒧᑦ. ᑍᒤᑦᑐᖅ ᑐᓂᕐᕈᑕᐅᖕᒪᑦ ᐸᓯᔭᒃᓴᐅᓂᕐᒧᑦ ᐊᑭᓕᐅᑕᐅᓪᓗᓂ.

⁶ ᐊᖑᑎᓂᑦ ᑐᓂᕐᕈᓯᕐᑎᑦᓯᔨᐅᑉ ᐃᓚᖏᓐᓂᑦ ᓂᕆᔭᐅᔪᓐᓇᕐᐳᖅ, ᑭᓯᐊᓂᓕ ᐃᑦᔪᕐᓁᑦᑐᕕᖕᒥ ᓂᕆᔭᐅᔭᕆᐊᖃᕐᐳᖅ: ᑍᒤᑦᑐᑦ ᐃᑦᔪᕐᓁᓐᓂᕐᐹᖑᖕᒪᑕ.

⁷ ᐱᖁᔭᖅ ᑕᒪᓐᓇ ᑐᕌᕐᐳᖅ ᐊᔪᕐᓂᖅ ᐱᓪᓗᒍ ᑐᓂᕐᕈᓯᕐᓂᕐᒧᑦ ᐸᓯᔭᒃᓴᐅᓂᕐᒧᓪᓗ ᐊᑭᓕᐅᑎᒃᓴᒧᑦ ᑐᓂᕐᕈᓯᕐᓂᕐᒧᑦ: ᑐᓂᕐᕈᑎᕕᓃᑦ ᑐᓂᕐᕈᓯᕐᑎᑦᓯᔨᐅᑉ ᐱᒋᕔᑦ ᑐᓂᕐᕈᓯᕈᑦᔨᔨᐅᑉ ᐃᓄᖕᓂᒃ.

⁸ ᑐᓂᕐᕈᓯᕐᑎᑦᓯᔨ ᐃᑯᐊᓚᒐᒃᓴᓂᒃ ᑐᓂᕐᕈᓯᕐᐸᒃᑐᖅ ᐆᒪᔫᑉ ᐊᒥᖏᑦ ᓇᖕᒥᓂᕐᑖᕆᓗᒋᑦ ᐱᑖᕆᔭᒃᓴᕆᕔᑦ.

⁹ ᓂᐊᖂᔭᒃᓮᑦ ᑐᓂᕐᕈᑕᐅᔪᑦ ᐃᒐᒧᑦ ᐆᓯᒪᔪᑦ, ᐃᒐᐅᑉ ᖄᖓᓂᓘᓐᓃᑦ ᐆᓯᒪᔪᑦ ᓵᑦᑑᔭᐅᑎᒥᓘᓐᓃᑦ ᐆᓯᒪᔪᑦ ᑐᓂᕐᕈᓯᕐᑎᑦᓯᔨᐅᑉ ᑖᑦᓱᒪ ᑐᓂᕐᕈᑎᒃᓴᓕᐅᕐᑑᑉ ᑖᒃᑯᐊ ᐱᒋᕔᑦ.

¹⁰ ᓂᐊᖂᔭᒃᓮᑦ ᑐᓂᕐᕈᑕᐅᔪᑦ ᐅᕐᓱᒥᒃ ᐃᓚᖃᕐᐸᑕᓘᓐᓃᑦ ᐃᓚᖃᖏᒃᑲᓗᐊᕐᐸᑕᓘᓐᓃᑦ ᐂᕉᓂᐅᑉ ᐃᕐᓂᖏᑕ ᐱᒋᕔᑦ.”

ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᑦ

¹¹ “ᐅᑯᐊ ᑕᕝᕙ ᐱᖁᔧᑦ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᒃᓮᑦ ᐱᓪᓗᒋᑦ ᐃᓅᑉ ᓇᓪᓕᐊᑐᐃᓐᓇᐅᑉ ᑐᓂᔪᓐᓇᕐᑕᖏᑦ ᐊᑕᓂᕐᒧᑦ.

¹² ᐃᓄᒃ ᑐᓂᕐᕈᑎᖃᕐᐸᑦ ᖁᔭᓕᔪᒪᓂᕐᒧᑦ, ᑐᓂᕐᕈᓯᕆᐊᓪᓚᒍᒪᒃᐸᓪᓗ ᖁᔭᓕᑦᔪᑎᒃᓴᒥᒃ ᑐᓂᓯᔪᒃᓴᐅᕗᖅ ᓂᐊᖂᔭᕐᒥᒃ ᐆᓯᒪᔪᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᐅᕐᓱᒥᒡᓗ ᐃᓚᓯᒪᔪᒥᒃ, ᓯᕙᓕᐊᕆᓯᒪᔪᓪᓗ ᐳᕙᓪᓚᕐᓴᐅᑎᖃᖏᓪᓗᑎᒃ ᐅᕐᓱᒥᒃ ᒥᖑᐊᕐᓯᒪᓗᑎᒃ, ᓂᐊᖂᔭᕐᓗ ᓯᖃᓪᓕᑦᓯᐊᕐᓯᒪᔪᒥᒃ ᓂᐊᖂᔭᕐᒥᒃ ᐅᐊᕈᑦᓯᕐᓯᒪᔪᒃᓴᐅᕗᖅ ᐅᕐᓱᒥᒃ ᐃᓚᖃᕐᓗᓂ.

¹³ ᐃᓚᒋᔭᐅᑦᓯᐊᕈᒪᓂᕐᒧᑦ ᖁᔭᓕᓂᖃᕐᓗᓂ ᑐᓂᕐᕈᓯᕐᑐᖃᕐᐸᑦ ᑐᓂᕐᕈᓯᒃᑲᓐᓂᕐᑐᒃᓴᐅᕗᖅ ᐆᓯᒪᔪᓂᒃ ᐳᕙᓪᓚᕐᓴᐅᑎᖃᕐᑐᓂᒃ.

¹⁴ ᑖᒃᑯᐊ ᐊᑐᓂᑦ ᐊᑕᐅᓯᐅᓈᕐᑎᕐᓗᒋᑦ ᑐᓂᕐᕈᑎᒋᔭᒃᓴᕆᕔᑦ ᐊᑕᓂᕐᒧᑦ ᑐᓂᕐᕈᑎᒋᓗᒋᑦ; ᑐᓂᕐᕈᓯᕐᑎᑦᓯᔨᐅᑉ ᐊᐅᖕᒥᒃ ᓯᕐᐸᕐᓴᕈᑎᖃᕐᑑᑉ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᓯᕐᓂᕐᒥᒃ, ᑖᑦᓱᒪ ᐱᒋᕔᑦ.

¹⁵ ᓂᕿ ᑐᓂᕐᕈᑕᐅᓯᒪᔪᖅ ᐃᓚᒋᔭᐅᑦᓯᐊᕈᒪᓂᕐᒧᑦ ᖁᔭᓕᓂᕐᒧᓪᓗ ᓂᕆᔭᐅᔭᕆᐊᖃᕐᐳᖅ ᐅᓪᓗᒥ ᑕᕝᕙᓂ ᑐᓂᕐᕈᓯᕐᕕᐅᔪᒥ. ᐊᒥᐊᒃᑯᖃᕆᐊᖃᕋᓂᓗ ᐅᓪᓛᒥ ᐅᓪᓘᑉ ᐂᑉᐸᖓᓂ.

¹⁶ “ᑭᓯᐊᓂᓕ ᑐᓂᕐᕈᑎᖃᕐᑐᖃᕐᐸᑦ ᐊᖏᕐᓯᒪᓂᓂ ᐱᑦᔪᑎᒋᓗᒍ, ᐅᕝᕙᓘᓐᓃᑦ ᑐᓂᕐᕈᓯᕆᐊᖃᕐᓂᕐᒧᑦ ᐃᓱᒪᒥᓂᒃ ᑐᓂᕐᕈᓯᕐᑐᖃᕐᐸᑦ, ᑐᓂᕐᕈᑎᖓ ᓂᕆᔭᐅᔭᕆᐊᖃᕐᐳᖅ ᐅᓪᓗᒥ ᑕᕝᕙᓂ, ᐊᒥᐊᒃᑯᖃᕐᐸᓪᓗ ᐅᓪᓘᑉ ᐂᑉᐸᖓᓂ ᓄᖑᑕᐅᔭᕆᐊᖃᕐᐳᖅ.

¹⁷ ᓂᕿ ᑐᓂᕐᕈᑕᐅᓯᒪᔪᖅ ᐅᓪᓘᑉ ᐱᖓᔪᐊᑦ ᑎᑭᓪᓗᒍ ᓱᓕ ᐊᒥᐊᒃᑯᖃᕐᐸᑦ ᐃᑯᐊᓪᓚᒃᑕᐅᔭᕆᐊᖃᕐᐳᖅ.

¹⁸ ᓂᕿ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑕᐅᓯᒪᔪᖅ ᐅᓪᓘᑉ ᐱᖓᔪᐊᓐᓂ ᓂᕆᔭᐅᒃᐸᑦ, ᑐᓂᕐᕈᑕᐅᓂᖓ ᐃᓚᓕᐅᕐᑕᐅᓂᐊᓐᖏᓚᖅ. ᑐᓂᕐᕈᓯᕐᑐᕕᓂᐅᓪᓗ ᑐᓂᕐᕈᓯᕐᓂᖓ ᐊᑐᕈᓐᓁᕐᓂᐊᕐᐳᖅ ᑍᒤᑦᑐᖅ ᐃᑦᔪᕐᓇᕐᓯᖕᒪᑦ, ᑍᒤᑦᑐᒥᒡᓗ ᓂᕆᔪᖅ ᐸᓯᔭᒃᓴᕈᕐᓂᐊᕐᐳᖅ ᑐᓂᕐᕈᓯᕐᑐᕕᓂᐅᑉ ᐸᓯᔭᒃᓴᐅᑦᔪᑎᖓᓂᒃ.

¹⁹ ᓂᕿ ᐊᑐᕐᓯᒪᔪᖅ ᓱᓇᑐᐃᓐᓇᕐᒧᑦ ᐅᒃᐱᕐᓂᐅᑉ ᐃᓕᖅᑯᓯᖓᒍᑦ ᓴᓗᒤᓐᓂᕋᕐᑕᐅᔪᒧᑦ ᓂᕆᔭᐅᔭᕆᐊᖃᓐᖏᓚᖅ ᐃᑭᑕᐅᔭᕆᐊᖃᕐᐳᓪᓕ. ᐅᒃᐱᕐᓂᐅᑉ ᐃᓕᖅᑯᓯᖓᒍᑦ ᓴᓗᒪᓂᕋᕐᑕᐅᔪᑦ ᑕᒪᕐᒥᒃ ᓂᕆᔪᓐᓇᕐᐳᑦ.

²⁰ ᐃᓄᐃᓪᓕ ᓇᓪᓕᐊᑦ ᐅᒃᐱᕐᓂᐅᑉ ᐃᓕᖅᑯᓯᖓᒍᑦ ᓴᓗᒤᓐᓂᕋᕐᑕᐅᔪᖅ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑕᐅᓯᒪᔪᒥᒃ ᐊᑕᓂᕐᒧᑦ ᓂᕆᒃᐸᑦ ᐃᓅᖃᑎᖏᓐᓄᑦ ᐊᕕᑕᐅᔪᒃᓴᐅᕗᖅ.

²¹ ᓇᓪᓕᐊᑦ ᐅᒃᐱᕐᓂᐅᑉ ᐃᓕᖅᑯᓯᖓ ᒪᓕᒡᓗᒍ ᓴᓗᒤᓐᓂᕋᕐᑕᐅᔪᒥᒃ ᐊᒃᑐᐃᒃᐸᑦ, ᐃᓅᑉ ᓴᓗᒤᓐᓂᕋᕐᑕᐅᓂᖓᓂᒡᓘᓐᓃᑦ ᐅᕝᕙᓘᓐᓃᑦ ᐆᒪᔪᒥᒃ ᓴᓗᒤᓐᓂᕋᕐᑕᐅᔪᒥᒃ, ᓱᓇᑐᐃᓐᓇᕐᒥᒡᓘᓐᓃᑦ ᓴᓗᒤᓐᓂᕋᕐᑕᐅᔪᒥᒃ, ᑍᒤᑦᑐᖅ ᓇᕐᕈᓇᕐᓯᕗᖅ, ᓂᕿᒥᒡᓗ ᓂᕆᒃᐸᑦ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑕᐅᓯᒪᔪᒥᒃ ᐊᑕᓂᕐᒧᑦ, ᐃᓄᒃ ᑖᓐᓇ ᐃᓅᖃᑎᒥᓄᑦ ᐊᕕᑕᐅᔪᒃᓴᐅᕗᖅ.”

ᑐᓐᓄᐃᑦ ᐊᐅᓪᓗ ᓂᕆᔭᐅᔭᕆᐊᖃᖏᓐᓂᖓᑦ

²² ᐊᑕᓂᐅᑉ ᒨᓯᓯ ᐅᖃᐅᑎᕚ,

²³ “ᐃᓴᕆᐊᓕᒥᐅᑦ ᐅᖃᐅᑎᒃᑭᑦ; ᓂᕆᔭᕆᐊᖃᓐᖏᓚᓯ ᐃᒻᒧᒃᓯᐅᒊᑦ, ᓰᐲᓪᓘᓐᓃᑦ ᒎᑦᓰᓪᓘᓐᓃᑦ ᑐᓐᓄᖏᓐᓂᒃ.

²⁴ ᐆᒪᔪᐃᑦ ᐃᒻᒥᖕᓂᒃ ᑐᖁᔪᕕᓃᑦ, ᐆᒪᔪᓄᓪᓘᓐᓃᑦ ᑐᖁᑕᐅᔪᕕᓃᑦ ᑐᓐᓄᖏᑦ ᓱᓇᑐᐃᓐᓇᕐᒧᑦ ᐊᑐᕐᑕᐅᔪᓐᓇᕐᐳᑦ, ᑭᓯᐊᓂᓕ ᓂᕆᔭᐅᔭᕆᐊᖃᓐᖏᓚᑦ.

²⁵ ᓇᓪᓕᐊᑦ ᑐᓐᓄᕐᒥᒃ ᓂᕆᔪᖅ ᐊᑕᓂᕐᒧᑦ ᐃᑯᐊᓪᓚᓗᒋᑦ ᑐᓂᕐᕈᑕᐅᔪᒥᑦ, ᐃᓅᖃᑎᒌᓄᑦ ᐊᕕᑕᐅᔪᒃᓴᐅᕗᖅ.

²⁶ ᓇᓂᓗ ᓄᓇᖃᕋᓗᐊᕈᕕᑦ, ᑎᖕᒥᐊᑉ ᐆᒪᔫᓪᓘᓐᓃᑦ ᐊᐅᖓᓂᒃ ᐊᐅᒃᑐᕐᑐᒃᓴᐅᓐᖏᓚᑎᑦ.

²⁷ ᓇᓪᓕᐊᑦ ᐊᐅᒃᑐᕐᑐᖅ ᑖᓐᓇ ᐃᓅᖃᑎᒥᓄᑦ ᐊᕕᑕᐅᔪᒃᓴᐅᕗᖅ.”

²⁸ ᐊᑕᓂᐅᑉ ᒨᓯᓯ ᐅᖃᐅᑎᕚ,

²⁹ “ᐃᓴᕆᐊᓕᒥᐅᑦ ᐃᒫᒃ ᐅᖃᐅᑎᒃᑭᑦ; ᓇᓪᓕᐊᑦ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᓯᕐᐸᑦ ᐊᑕᓂᕐᒧᑦ ᑐᓂᕐᕈᑎᒋᔭᒥ ᐃᓚᖓᓂᒃ ᐊᑕᓂᕐᒧᑦ ᑐᓂᓯᔪᒃᓴᐅᕗᖅ.

³⁰ ᓇᖕᒥᓂᖅ ᑎᒍᒥᐊᕐᓗᓂ ᑐᓂᕐᕈᑎᒃᓴᒥᒃ ᐃᑯᐊᓚᑎᑕᒃᓴᒥᒃ ᑐᓂᕐᕈᓯᕆᐊᕐᑐᕆᐊᖃᕐᐳᖅ ᐊᑕᓂᕐᒧᑦ ᐃᑯᐊᓚᑦᓯᕕᖕᒧᑦ; ᑐᓐᓄᖏᖕᓂᒃ ᑐᓂᕐᕈᑎᒃᓴᖃᕆᐊᖃᕐᐳᖅ, ᓴᑭᐊᖏᒡᓗ ᐱᖃᓯᐅᑎᓗᒋᒃ, ᐆᒪᔫᑉ ᓴᑭᐊᖏᑦ ᐊᐅᓪᓚᕐᑎᑕᒃᓴᐅᓗᑎᒃ ᑐᓂᕐᕈᑕᐅᓂᕐᒧᑦ ᐊᑕᓂᐅᑉ ᓵᖓᓂ.

³¹ ᑐᓂᕐᕈᓯᕐᑎᑦᓯᔨᐅᑉ ᑐᓐᓄᐃᑦ ᐃᑯᐊᓚᑎᑕᒃᓴᕆᕔᑦ ᑐᓂᕐᕈᓯᕐᕕᖕᒥ, ᐆᒪᔫᓪᓕ ᓴᑭᐊᖏᑦ ᐂᕉᓂᐅᑉ ᐃᕐᓂᖏᑕᓗ ᐱᑖᕆᓂᐊᕐᐹᑦ.

³² ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᓯᕈᕕᑦ ᑐᓂᕐᕈᑎᕕᑦ ᒥᒥᖓ ᑕᓕᕐᐱᒃ ᑐᓂᔭᒃᓴᕆᕙᑦ ᑐᓂᕐᕈᓯᕐᑎᑦᓯᔨᒧᑦ ᐃᑲᔪᕈᑎᒋᓗᒍ.

³³ ᐂᕉᓂᐅᓪᓗ ᐃᕐᓂᖓᑕ ᐃᓚᖓᑦ ᐊᐅᖕᒥᒃ ᑐᓐᓄᕐᒥᒡᓗ ᑐᓂᕐᕈᑎᖃᕐᑐᖅ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᒃᓴᒥᑦ, ᓂᕿᑖᕆᐊᖃᕐᐳᖅ ᐆᒪᔫᑉ ᒥᒥᖓᓂᒃ ᑕᓕᕐᐱᖕᒥᒃ.

³⁴ ᐃᓴᕆᐊᓕᒥᐅᑦ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᖏᓐᓂᑦ, ᐆᒪᔫᑉ ᑐᓂᕐᕈᑎᐅᑉ ᓴᑭᐊᖏᒃ ᐊᐅᓪᓚᕐᑎᑕᒃᓴᐅᔫᑉ ᐊᑕᓂᐅᑉ ᓵᖓᓂ, ᐆᒪᔫᓪᓗ ᒥᒥᖓ ᑕᓕᕐᐱᒃ ᑐᓂᕐᕈᑕᐅᔪᖅ ᑖᒃᑯᐊ ᑐᓂᕙᒃᑲ ᐂᕉᓂᒧᑦ ᑐᓂᕐᕈᓯᕐᑎᑦᓯᔨᒧᑦ ᐃᕐᓂᖏᓐᓄᓪᓗ ᑍᒤᑦᑐᓂᒃ ᐱᑎᑕᐅᖁᓪᓗᒋᑦ ᐃᓴᕆᐊᓕᒥᐅᓂᑦ.”

³⁵ ᑍᒫᒃ ᑕᕝᕙ ᐊᑕᓂᕐᒧᑦ ᐃᑯᐊᓚᑦᓯᓂᒃᑯᑦ ᑐᓂᕐᕈᑎᐅᑉ ᐃᓚᖓᓂᒃ ᑐᓂᓯᕕᐅᔭᕆᐊᖃᕐᑎᑕᐅᕗᑦ ᐃᑦᔪᕐᓁᑎᑕᐅᓂᖏᑕ ᐅᓪᓗᖓᓂᑦ ᐱᒋᐊᕐᓗᒋᑦ ᐂᕉᓂ ᐃᕐᓂᖏᓪᓗ ᐊᑕᓂᕐᒧᑦ ᑐᓂᔭᐅᓯᒪᖕᒪᑕ ᑐᓂᕐᕈᓯᕐᑎᑦᓯᔨᐅᓂᕐᒧᑦ ᐱᔨᑦᓯᕐᑎᐅᖁᔭᐅᓪᓗᑎᒃ.

³⁶ ᐅᓪᓗᒥ ᑍᑦᓱᒪᓂ ᐅᕐᓱᒥᒃ ᓇᓗᓁᒃᑯᓯᕐᑕᐅᖕᒪᑕ ᓂᕈᐊᕐᑕᐅᓂᖏᓐᓂᒃ, ᐊᑕᓂᖅ ᐱᖁᔨᓚᐅᕐᐳᖅ ᐃᓴᕆᐊᓕᒥᐅᓂᒃ ᑍᒤᑦᑐᓂᒃ ᐂᑦᑐᕐᑕᐅᖃᑦᑕᖁᓪᓗᒋᑦ ᑭᖑᕚᒃᓴᖏᑦ ᑐᓂᕐᕈᓯᕐᑎᑦᓯᔩᑦ ᑍᒫᒃ ᑐᓂᔭᐅᖃᑦᑕᑯᓪᓗᒋᑦ.

³⁷ ᐅᑯᐊ ᑕᕝᕙ ᐱᖁᔧᑦ ᑐᓂᕐᕈᑎᒃᓮᑦ ᐃᑯᐊᓚᒐᒃᓮᑦ ᐱᓪᓗᒋᑦ, ᓂᐊᖂᔭᓂᒃ ᑐᓂᕐᕈᓯᕐᓂᕐᒥᒃ, ᐊᔪᕐᓂᖅ ᐱᓪᓗᒍ ᑐᓂᕐᕈᓯᕐᓂᕐᒥᒃ, ᐸᓯᔭᒃᓴᐅᓂᕐᒧᑦ ᐊᑭᓕᐅᑎᒃᓴᒥᒃ ᑐᓂᕐᕈᓯᕐᓂᕐᒥᒃ, ᑎᓕᔭᐅᓂᖅ ᐱᓪᓗᒍ ᑐᓂᕐᕈᓯᕐᓂᕐᒥᒃ, ᐊᒻᒪᓗ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᓯᕐᓂᕐᒥᒃ,

³⁸ ᑖᒃᑯᐊ ᐊᑕᓂᐅᑉ ᒨᓯᓯᒧᑦ ᑐᓂᓚᐅᕐᐰᑦ ᖃᖅᑲᒥ ᓮᓁᒥ, ᐅᓪᓗᒥ ᑕᕝᕙᓂ ᐃᓴᕆᐊᓕᒥᐅᑦ ᑐᓂᕐᕈᓯᖃᑦᑕᖁᒐᒥᒋᑦ ᐊᑕᓂᕐᒧᑦ, ᓄᓇᒥ ᓯᐅᕅᓐᓇᕐᒥ ᓮᓁᒥ.