ᒨᓯᓯ ᐱᖓᔪᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐊᑕᓂᐅᑉ ᒨᓯᓯ ᐅᖃᐅᑎᕚ, ᐅᖃᕐᓗᓂ:

² “ᐊᔪᕐᑐᓕᔪᖃᕐᐸᑦ ᐊᑕᓂᕐᒧᓪᓗ ᐅᒃᐱᕐᓂᕐᒥᓂᒃ ᑲᔪᓯᖏᓪᓗᓂ ᐃᓅᖃᑎᒥᓂᒡᓗ ᐅᐃᕕᕆᒃᓯᒃᐸᑦ ᐱᓯᒪᒃᓯᑎᑕᐅᓂᕐᒥᓂᒃ, ᑲᒪᔨᐅᑎᑕᐅᓂᕐᒥᒡᓘᓐᓃᑦ, ᐃᓅᖃᑎᒥᓂᒡᓘᓐᓃᑦ ᑎᒡᓕᒃᐸᑦ, ᓯᓔᕐᕆᒃᓯᒃᐸᓪᓘᓐᓃᑦ ᐃᓅᖃᑎᒥᓂᒃ,

³ ᐅᕝᕙᓘᓐᓃᑦ ᐊᓯᐅᔨᔭᐅᓯᒪᔪᓂᒃ ᓇᓂᓯᓗᓂ ᓴᒡᓗᑦᔪᑎᒋᒃᐸᒋᑦ, ᐊᖏᕈᑎᖃᕐᐸᓪᓗ ᓱᓕᑦᓯᐊᕈᑎᒥᒃ ᓱᓕᖏᓪᓗᓂ, ᐅᕝᕙᓘᓐᓃᑦ ᐊᓯᖏᓐᓂᒃ ᐊᔪᕐᑐᓕᒃᐸᑦ ᓇᓪᓕᐊᓐᓂᒃ ᐃᓄᐃᑦ ᐊᔪᕐᑐᓕᓂᕆᕙᒃᑕᖏᓐᓂᒃ.

⁴ ᓇᓪᓕᐊᓐᓂᒃ ᐊᔪᕐᑐᓕᒃᐸᑦ ᑕᕝᕙ ᐸᓯᔭᒃᓴᐅᓕᕐᐳᖅ, ᐅᑎᕐᑎᑦᓯᔭᕆᐊᖃᕐᐳᖅ ᑎᒡᓕᓚᐅᕐᑕᒥᓂᒃ, ᓵᓚᖃᕐᓂᕐᒥᓄᓪᓗ ᐊᕐᓵᕐᓯᑦᔪᑎᒋᓚᐅᕐᑕᒥᓂᒃ, ᑲᒪᒋᔭᕆᓚᐅᕐᑕᒥᓂᒡᓘᓐᓃᑦ, ᓇᓂᓚᐅᕐᑕᒥᓂᒡᓘᓐᓃᑦ ᐱᒋᔭᐅᔪᒥᒃ.

⁵ ᑲᔪᓯᓂᐊᕐᓂᕋᕐᓗᓂᓗ ᓴᒡᓗᓂᕆᓚᐅᕐᑕᒥᓂᒃ. ᐅᑎᕐᑎᑦᓯᑦᓯᐊᕆᐊᖃᕐᐳᖅ 20ᐳᓴᒥᒡᓗ ᐃᓚᒃᑲᓐᓂᕐᓗᒋᑦ ᐅᑎᕐᑎᑕᓂ ᐃᓄᐊᓄᑦ ᑖᑦᓱᒧᖓ, ᐅᓪᓗᒥ ᑖᑦᓱᒪᓂᑦᓮᓐᓇᖅ ᐸᓯᔭᒃᓴᐅᓂᓂ ᐱᓪᓗᒍ ᑐᓂᕐᕈᓯᕐᕕᖕᒥᓂ.

⁶ ᓱᒋᐊᕐᑕᐅᑦᔪᑎᒥᓂᒡᓗ ᑐᓂᕐᕈᓯᕐᑎᑦᓯᔨᒧᑦ ᑐᓂᓯᔪᒃᓴᐅᕗᖅ ᐊᑕᓂᕐᒧᑦ ᑐᓂᕐᕈᑎᒥᓂᒃ ᐸᓯᔭᒃᓴᐅᓂᕐᒧᑦ ᐊᑭᓕᐅᑎᒥᒃ, ᓰᐱᐅᑉ ᐊᖑᓴᓪᓗᖓᓂᒃ, ᖃᓄᐃᓐᓂᖃᖏᑦᓯᐊᕐᑐᒥᒃ, ᐊᑭᓖᑦᔪᑎᒋᓗᓂᐅᒃ ᐊᑭᓕᐅᑎᓪᓗᐊᕐᑐᒥᒃ.

⁷ ᑍᒫᒃ ᑐᓂᕐᕈᓯᕐᑎᑦᓯᔨᐅᑉ ᐃᓱᒪᒋᔪᓐᓁᕐᕕᐅᑎᓐᓂᐊᕐᐹ ᐊᑕᓂᕐᒧᑦ, ᐃᓱᒪᒋᔪᓐᓁᕐᕕᐅᓂᐊᕐᐳᕐᓗ ᐸᓯᔭᒃᓴᐅᑦᔪᑎᓕᒫᒥᓂᒃ.”

ᑐᓂᕐᕈᑏᑦ ᐃᑯᐊᓚᑎᑕᒃᓴᑦ

⁸ ᐊᑕᓂᐅᑉ ᒨᓯᓯ ᐅᖃᐅᑎᕚ, ᐅᖃᕐᓗᓂ:

⁹ “ᐂᕉᓂ ᐃᕐᓂᖏᓪᓗ ᐃᒫᒃ ᐱᖁᒃᑭᑦ: ᐅᑯᐊ ᑕᕝᕙ ᐱᖁᔧᑦ ᑐᓂᕐᕈᑎᒃᓮᑦ ᐃᑯᐊᓚᒐᒃᓮᑦ ᐱᓪᓗᒋᑦ: ᑐᓂᕐᕈᑎᒃᓮᑦ ᐃᑯᐊᓚᒐᒃᓮᑦ ᑐᓂᕐᕈᓯᕐᕕᐅᑉ ᖄᖓᓃᑦᓴᕆᐊᖃᕐᐳᑦ ᐅᓐᓄᐊᖅ ᓈᓗᒍ ᐅᓪᓛᖅ ᑎᑭᓪᓗᒍ, ᑐᓂᕐᕈᓯᕐᕕᒡᓕ ᐃᑯᒪᕾᓐᓇᕆᐊᖃᕐᐳᖅ.

¹⁰ ᑐᓂᕐᕈᓯᕐᑎᑦᓯᔨ ᑕᕝᕙ ᐊᑎᓯᔭᕆᐊᖃᕐᐳᖅ ᐃᓗᓪᓕᕐᒥᓂᒃ ᓵᑦᑐᓂᒃ. ᐅᕕᓂᕈᕐᒥᒃ ᓵᑦᑐᒥᒃ ᖃᕐᓕᖕᒥᓂᒡᓗ ᓵᑦᑐᓂᒃ, ᐲᕐᓗᒋᓪᓗ ᑐᓂᕐᕈᑎᕕᓂᐅᑉ ᐊᕐᔭᓕᓂᖏᑦ ᐃᑯᐊᓚᑕᐅᓗᑎᒃ ᑐᓂᕐᕈᑎᕕᓃᑦ ᐃᑯᒪᒧᑦ ᓄᖑᑕᐅᓯᒪᔪᑦ, ᑐᓂᕐᕈᓯᕐᕕᐅᓪᓗ ᓴᓂᐊᓄᑦ ᐃᓕᓗᒋᑦ.

¹¹ ᑍᒫᒡᓗ ᐊᑐᕐᑕᓂ ᑖᒃᑯᐊ ᐲᕐᓗᒋᑦ ᐊᓯᖏᓐᓂᒡᓗ ᐊᑎᓯᔪᒃᓴᐅᕗᖅ, ᐊᕐᔭᓕᓃᑦ ᑖᒃᑯᐊ ᐊᐅᓪᓚᕈᑎᔭᒃᓴᕆᕔᑦ ᓄᓇᓖᑦ ᓯᓚᑖᓐᓄᑦ ᐃᓕᖅᑯᓯᖅ ᒪᓕᒡᓗᒍ ᓴᓗᒻᒪᕐᓴᕐᑕᐅᓯᒪᔪᒧᑦ.

¹² ᐃᑯᒪ ᑐᓂᕐᕈᓯᕐᕕᖕᒦᑦᑐᖅ ᐃᑯᒤᓐᓇᕆᐊᖃᕐᐳᖅ; ᖃᒥᑦᓴᕆᐊᖃᓐᖏᓚᖅ. ᐅᓪᓛᑕᒫᑦ ᑐᓂᕐᕈᓯᕐᑎᑦᓯᔨ ᐃᓕᓯᔭᕆᐊᖃᕐᐳᖅ ᕿᔪᖕᓂᒃ ᐃᑯᐊᓚᒐᒃᓮᓪᓗ ᑐᓂᕐᕈᑏᑦ ᐋᖅᑭᒃᓱᒃᑲᓐᓂᕐᐸᒡᓗᒋᑦ, ᑐᓐᓄᕐᓂᒡᓗ ᐃᑯᐊᓪᓚᖅᑯᓯᕐᐸᒡᓗᒋᑦ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᕕᓃᑦ ᖄᖏᓐᓃᑦᑐᑦ.

¹³ ᑐᓂᕐᕈᓯᕐᕕᖕᒥ ᐃᑯᒪ ᐃᑯᒤᓐᓇᕆᐊᖃᕐᐳᖅ ᑍᒪᓐᖓᑦ, ᖃᒥᑦᓴᕆᐊᖃᓐᖏᓚᖅ.”

ᓂᐊᖂᔭᑦ ᑐᓂᕐᕈᑎᒃᓮᑦ

¹⁴ “ᐅᑯᐊ ᑕᕝᕙ ᐱᖁᔧᑦ ᓂᐊᖂᔭᑦ ᑐᓂᕐᕈᑎᒃᓮᑦ ᐱᓪᓗᒋᑦ: ᐂᕉᓂᐅᑉ ᐃᕐᓂᖏᑦ ᑖᒃᑯᓂᖓ ᐊᑕᓂᐅᑉ ᓇᔪᒐᖓᓄᐊᕐᓯᔭᕆᐊᖃᕐᐳᑦ ᑐᓂᕐᕈᓯᕐᕕᖕᒧᑦ.

¹⁵ ᑐᓂᕐᕈᓯᕐᑎᑦᓯᔨ ᑎᒍᓯᔭᕆᐊᖃᕐᐳᖅ ᓂᐊᖂᔭᒥᒃ ᓯᖃᓪᓕᓯᒪᑦᓯᐊᕐᑐᒥᒃ ᐅᕐᓱᒥᒡᓗ ᐃᓚᖃᕐᓗᒍ ᑎᐱᑦᓯᐊᕆᒃᑐᒥᒃ ᐃᓯᕐᓗᐊᕐᓂᑎᑕᒃᓴᒥᒃ ᐃᓐᓴᓐᓯᒥᒃ ᑐᓂᕐᕈᑎᒃᓴᖅ ᓂᐊᖂᔭᖅ, ᑖᓐᓇᓗ ᐃᑯᐊᓪᓚᒃᑎᓪᓗᒍ ᑐᓂᕐᕈᓯᕐᕕᖕᒥ ᓇᓗᓁᒃᑯᑕᐅᓗᓂ ᐃᖅᑲᐅᒪᑦᔪᑎᒃᓴᒥᒃ ᓂᐊᖂᔭᖅ ᑖᓐᓇ ᑐᓂᕐᕈᑕᐅᖕᒪᑦ ᑎᐱᖓᓗ ᒪᒪᕆᔭᐅᓪᓗᓂ ᐊᑕᓂᕐᒧᑦ.

¹⁶ ᐂᕉᓂᐅᑉ ᐃᕐᓂᖏᑕᓗ ᑖᒃᑯᐊ ᐊᒥᐊᒃᑯᖓ ᓂᕆᔭᒃᓴᕆᕚᑦ, ᓂᕆᔭᐅᔭᕆᐊᖃᕐᐳᕐᓕ ᐳᕙᓪᓚᕐᓴᐅᑎᖃᖏᓪᓗᓂ ᐃᑦᔪᕐᓁᑦᑐᕕᖕᒥ; ᓂᕆᔭᕆᐊᖃᕐᐹᓪᓗ ᑐᐱᐅᑉ ᑲᑎᒪᕕᐅᑉ ᑐᕐᓲᖓᓂ.

¹⁷ ᐳᕙᓪᓚᕐᓴᐅᑎᒥᒃ ᐃᓚᖃᕐᓗᓂ ᐃᒐᔭᐅᔭᕆᐊᖃᓐᖏᓚᖅ; ᐅᕙᖓ ᑐᓂᒐᒃᑯ ᑖᒃᑯᓄᖓ ᓂᕆᖃᑎᒋᓗᒋᑦ ᑐᓂᕐᕈᑎᒥᒃ ᐅᕙᓐᓄᑦ ᑐᓂᔭᐅᔪᒥᒃ ᐃᑯᒪᒃᑯᑦ. ᑍᒫᒃ ᓱᓕ ᐊᔪᕐᓂᖅ ᐱᓪᓗᒍ ᑐᓂᕐᕈᑎᑐᑦ ᐸᓯᔭᒃᓴᐅᓂᕐᒧᑦ ᐊᑭᓕᐅᑎᑎᑐᑦ, ᑍᒤᑦᑐᖅ ᐃᑦᔪᕐᓁᓐᓂᕐᐹᖑᖕᒪᑦ.

¹⁸ ᐊᖑᑎᑦ ᐂᕉᓂᐅᑉ ᑭᖑᕚᖏᑦ ᓂᕆᔪᒃᓴᐅᕗᑦ. ᑕᒪᒃᑯᐊ ᐊᒥᐊᒃᑯᔭᐅᑦᔪᓯᐊᕆᖕᒪᒋᑦ ᑐᓂᕐᕈᑎᓂᑦ ᐊᑕᓂᕐᒧᑦ ᑐᓂᔭᐅᔪᓂᑦ ᐃᑯᒪᒃᑯᑦ, ᑭᖑᕚᖏᑕ ᐊᑐᕐᓂᐊᕐᑕᖓ ᑭᖑᓪᓕᒃᓴᒥᖕᓄᑦ. ᓇᓪᓕᐊᑦ ᑖᒃᑯᓂᖓ ᐊᒃᑐᐃᔪᖅ ᐃᑦᔪᕐᓁᓕᓂᐊᕐᐳᖅ.”

¹⁹ ᐊᑕᓂᐅᑉ ᒨᓯᓯ ᐅᖃᐅᑎᒋᕚ,

²⁰ “ᐃᒤᑦᑐᒥᒃ ᐂᕉᓂ ᐃᕐᓂᖏᓪᓗ ᑐᓂᕐᕈᓯᕆᐊᖃᕐᐳᑦ ᐅᓪᓗᒥ ᑐᓂᕐᕈᓯᕐᑎᑦᓯᔨᓐᖑᕐᑎᑕᐅᕕᖕᒥᖕᓂ: ᐅᖁᒤᓐᓂᐅᑉ ᓇᑉᐹᓂᒃ ᐅᖁᒤᑎᒋᔪᒥᒃ ᓂᐊᖂᔭᒥᒃ ᓯᖃᓪᓕᑦᓯᐊᕐᓯᒪᔪᒥᒃ ᓂᐊᖂᔭᑉ ᑐᓂᕐᕈᑕᐅᓂᖓᓂᒃ, ᑖᑦᓱᒪ ᓇᑉᐹ ᐅᓪᓛᒃᑯᑦ ᑐᓂᕐᕈᑎᒋᓗᒍ ᓇᑉᐹᓗ ᐅᓐᓄᒃᐸᑦ ᑐᓂᕐᕈᑎᒋᓗᒍ.

²¹ ᓴᓇᔭᕆᐊᖃᕐᐹᑦ ᐅᕐᓱᒥᒃ ᐃᓚᓗᒍ ᐃᒐᓗᒍᓗ, ᐃᖑᓚᑦᓯᐊᕐᓗᒍ ᑐᓂᕐᕈᑎᒋᓗᒍ, ᑎᐱᖓᓗ ᒪᒪᕆᔭᐅᕗᖅ ᐊᑕᓂᕐᒧᑦ.

²² ᑖᒃᑯᐊᓗ ᐃᕐᓂᖓᑦ ᑭᖑᕝᕕᐅᑎᓂᐊᓕᕈᓂ ᒥᖑᐊᕐᑕᐅᕕᖏᓐᓂ ᐅᕐᓱᒧᑦ, ᑍᒥᑦᑐᒥᒃ ᓴᓇᔭᕆᐊᖃᕐᐳᖅ. ᑖᓐᓇ ᐊᑕᓂᐅᑉ ᐱᔭᒃᓴᕆᖕᒪᒍ ᑕᒪᒃᑭᕐᓗᒍ ᐃᑯᐊᓚᑎᑕᐅᔭᕆᐊᖃᕐᐳᖅ.

²³ ᓂᐊᖂᔭᑦ ᑐᓂᕐᕈᓯᕐᑎᑦᓯᔨᒧᑦ ᑐᓂᔭᐅᔪᓕᒫᑦ ᐃᑯᐊᓚᑎᑕᐅᔭᕆᐊᖃᕐᐳᑦ, ᓂᕆᔭᐅᔭᕆᐊᖃᓐᖏᓚᑦ.”

ᑐᓂᕐᕈᑎᒃᓮᑦ ᐊᔪᕐᓂᖅ ᐱᓪᓗᒍ

²⁴ ᐊᑕᓂᐅᑉ ᒨᓯᓯ ᐅᖃᐅᑎᕚ,

²⁵ “ᐂᕉᓂᓗ ᐃᕐᓂᖏᓪᓗ ᐅᖃᐅᑎᒃᑭᑦ: ᐃᒫᒃ ᒪᓕᒐᖃᕐᐳᑦ ᑐᓂᕐᕈᑏᑦ ᐊᔪᕐᓂᖅ ᐱᓪᓗᒍ ᑐᓂᕐᕈᑕᐅᔪᑦ. ᐊᔪᕐᓂᖅ ᐱᓪᓗᒍ ᑐᓂᕐᕈᑎᒃᓴᖅ ᐆᒪᔪᖅ, ᑐᖁᑕᐅᔭᕆᐊᖃᕐᐳᖅ ᐊᑕᓂᐅᑉ ᓵᖓᓂ ᐃᑯᐊᓚᑎᑕᒃᓮᑦ ᑐᓂᕐᕈᑏᑦ ᑐᖁᑕᐅᕕᖓᓐᓂ, ᑍᒤᑦᑐᑦ ᐃᑦᔪᕐᓁᓐᓂᕐᐹᖑᖕᒪᑕ.

²⁶ ᑐᓂᕐᕈᓯᕐᑎᑦᓯᔨ ᑐᓂᕐᕈᑎᖃᕐᑐᖅ ᑖᑦᓱᒥᖓ ᓂᕆᔭᕆᐊᖃᕐᐳᖅ; ᐃᑦᔪᕐᓁᑦᑐᕕᖕᒥᓗ ᑭᓯᐊᓂ ᓂᕆᔭᕆᐊᖃᕐᐹ, ᑐᐱᐅᑉ ᑲᑎᒪᕕᐅᑉ ᑐᕐᓲᖓᓂ.

²⁷ ᐊᓯᖏᓐᓄᑦ ᒪᑯᓄᖓᑐᐃᓐᓇᖅ ᓂᕿᖓ ᐊᒃᑐᕐᑕᐅᒃᐸᑦ, ᐃᑦᔪᕐᓁᓐᓂᖓᓄ ᐊᒃᑐᕐᓯᔪᖅ ᐃᑦᔪᕐᓁᓕᕗᖅ, ᐊᓐᓄᕌᒥᒡᓗ ᑕᕝᕙᓐᖓᑦ ᐊᐅᒥᑎᕐᑐᖃᕐᐸᑦ, ᐃᑦᔪᕐᓁᑦᑐᕕᖕᒥ ᑭᓯᐊᓂ ᐅᐊᓴᕐᑕᐅᔭᕆᐊᖃᕐᐳᖅ.

²⁸ ᐅᔭᕋᖕᒧᑦ ᐅᒃᑯᓯᖕᒧᑦ ᐃᒐᔭᐅᒃᐸᑦ ᐅᒃᑯᓯᒃ ᓯᖁᒥᑕᐅᔭᕆᐊᖃᕐᐳᖅ, ᐅᒃᑯᓯᖕᒧᓪᓕ ᑲᓐᓄᔭᒧᑦ ᓴᕕᕋᔭᖕᒧᑦ ᐃᒐᔭᐅᒃᐸᑦ ᐅᒃᑯᓯᒃ ᐅᐊᓴᕐᑕᐅᑦᓯᐊᕆᐊᖃᕐᐳᖅ ᐃᒥᕐᒧᓪᓗ ᐃᕐᕈᕐᑐᕐᓗᒍ.

²⁹ ᐊᖑᑎᓕᒫᑦ ᓇᓪᓕᐊᑐᐃᓐᓇᖅ ᑐᓂᕐᕈᓯᕐᑎᑦᓯᔨᐅᑉ ᐃᓚᖏᑦ ᓂᕆᔪᓐᓇᕐᐳᑦ ᑖᑦᓱᒥᖓ. ᑖᓐᓇ ᐃᑦᔪᕐᓁᓐᓂᕐᐹᖑᖕᒪᑦ.

³⁰ ᐊᔪᕐᓂᖅ ᐱᓪᓗᒍ ᑐᓂᕐᕈᑎᒃᓴᐅᑉ ᐊᐅᖓ ᑐᐱᕐᒧᑦ ᑲᑎᒪᕕᖕᒧᑦ ᐱᑎᑕᐅᔪᖅ ᐃᓱᒪᒋᔪᓐᓁᕐᕕᐅᑦᔪᑕᐅᔪᖅ ᐃᑦᔪᕐᓁᑦᑐᕕᖕᒥ ᓂᕆᔭᐅᔭᕆᐊᖃᓐᖏᓚᖅ; ᐃᑯᐊᓪᓚᒃᑕᐅᔭᕆᐊᖃᕐᐳᕐᓕ.”