ᒨᓯᓯ ᐱᖓᔪᖏᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᔪᕐᓂᖅ ᐱᓪᓗᒍ ᑐᓂᕐᕈᓯᕈᑕᐅᔭᕆᐊᓖᑦ ᐊᑦᔨᒌᖏᑦᑐᑦ

¹ “ᐃᓄᒃ ᐊᔪᕐᑐᓕᒃᐸᑦ ᐃᖅᑲᕐᑐᐃᔪᖃᕐᑎᓪᓗᒍ ᐅᖃᐅᓯᖃᖏᑦᑐᖅ ᐅᖃᕆᐊᖃᕋᓗᐊᕐᓗᓂ ᑕᑯᓚᐅᕐᑕᒥᓂᒃ ᖃᐅᔨᓚᐅᕐᑕᒥᓂᒡᓗ ᑖᓐᓇ ᐸᓯᔭᒃᓴᐅᕗᖅ.

² “ᐅᕝᕙᓘᓐᓃᑦ ᐃᓄᒃ ᐊᒃᑐᕐᓯᒃᐸᑦ ᓱᓇᑐᐃᓐᓇᕐᒥᒃ ᐅᒃᐱᕐᓂᕐᒧᑦ ᓴᓗᒤᓐᓂᕋᕐᑕᐅᔪᒥᒃ ᐃᒤᑦᑐᓂᒃ: ᐆᒪᔪᕕᓂᕐᓂᒃ ᑐᖁᖓᔪᓂᒃ ᓄᔪᐊᕐᑐᓂᒃ ᐅᕝᕙᓘᓐᓃᑦ ᐆᒪᔪᖁᑎᒋᔭᐅᔪᒥᒃ ᑐᖁᖓᔪᒥᒃ ᐅᕝᕙᓘᓐᓃᑦ ᐆᒪᔪᓂᒃ ᓄᓇᒥ ᐹᕐᖑᕐᑎᓂᒃ ᓴᓗᒤᑦᑐᓂᒃ ᖃᐅᔨᖏᒃᑲᓗᐊᕐᓗᓂ ᖃᓄᐃᓕᐅᕐᓂᕐᒥᓂᒃ ᑍᒤᓕᐅᕐᑐᖅ ᓴᓗᒤᓕᕐᒪᑦ ᐸᓯᔭᒃᓴᐅᓕᕐᓗᓂᓗ.

³ “ᐅᕝᕙᓘᓐᓃᑦ ᐊᒃᑐᐃᒃᐸᑦ ᐃᓅᑉ ᓴᓗᒤᑎᑕᖓᓂᒃ: ᓱᓇᑐᐃᓐᓇᕐᒥᒃ ᐃᓅᑉ ᓴᓗᒤᑦᔪᑎᒋᔪᓐᓇᕐᑕᖓᓂᒃ: ᐃᓄᒃ ᑖᓐᓇ ᖃᐅᔨᖏᒃᑲᓗᐊᕐᓗᓂ, ᖃᐅᔨᒍᓂᓕ ᑍᒤᓐᓂᕐᒥᓂᒃ ᑕᕝᕙ ᐸᓯᔭᒃᓴᐅᕗᖅ.

⁴ “ᐅᕝᕙᓘᓐᓃᑦ ᓱᓕᑦᓯᐊᕐᓂᕋᕐᓗᓂ ᐊᖏᕈᑎᓕᐅᕐᐸᑦ ᓱᓇᑐᐃᓐᓇᕐᒥᒃ ᐱᐅᔪᒥᒃ ᐱᐅᖏᑦᑐᒥᒡᓘᓐᓃᑦ: ᓱᓇᑐᐃᓐᓇᕐᒥᒃ ᐃᓅᑉ ᐅᑦᔨᕈᓱᖏᓪᓗᓂ ᐊᖏᕈᑎᒋᔪᓐᓇᕐᑕᖓᓂᒃ, ᐃᓄᒃ ᑖᓐᓇ ᖃᐅᔨᖏᒃᑲᓗᐊᕐᓗᓂ, ᖃᐅᔨᓕᕈᓂᓗ ᐱᓂᐊᕐᓂᕆᔭᒥᓂᒃ ᑕᕝᕙ ᐸᓯᔭᒃᓴᐅᕗᖅ.

⁵ “ᓇᓪᓕᐊᑐᐃᓐᓇᖅ ᐸᓯᔭᒃᓴᐅᒍᓂ ᑖᒃᑯᓄᖓ ᓇᓪᓕᐊᓐᓄᑐᐃᓐᓇᖅ ᑖᓐᓇ ᖃᕿᐊᓕᕆᐊᖃᕐᐳᖅ ᖃᓄᖅ ᐊᔪᕐᑐᓕᓚᐅᕐᒪᖔᕐᒥ,

⁶ ᐊᔪᕐᓂᕐᒥᓄᓪᓗ ᓱᒋᐊᕐᑕᐅᓂᖓ ᐱᓪᓗᒍ, ᐊᑕᓂᕐᒧᑦ ᐋᑦᓯᔭᕆᐊᖃᕐᐳᖅ ᓰᐱᐅᓪᓘᓐᓃᑦ ᒎᑦᓯᐅᓪᓘᓐᓃᑦ ᓄᕐᕋᖓᓂᒃ ᐊᕐᓇᓪᓗᖕᒥᒃ, ᐊᔪᕐᑐᓕᓂᖅ ᐱᑦᔪᑎᒋᓪᓗᒍ; ᑐᓂᕐᕈᓯᕐᑎᑦᓯᔨᐅᓪᓗ ᐃᓄᒃ ᑖᓐᓇ ᑐᓂᕐᕈᓯᕈᑎᔭᒃᓴᕆᕚ ᐊᔪᕐᓂᖏᑦ ᐱᓪᓗᒋᑦ.

⁷ “ᓰᐱᐅᓪᓕ ᓄᕐᕋᖓᓂᒃ ᑐᓂᕐᕈᓯᕆᐊᒃᓴᖅ ᐊᔪᕈᓂ ᒪᕐᕉᖕᓂᒃ ᑑᕖᖕᓂᒃ ᐊᕿᒡᒋᐅᔮᕐᑑᖕᓂᒃ ᐱᑦᔨᐊᓐᓂᒡᓘᓐᓃᑦ ᐱᐊᕋᕕᓂᕐᓂᒃ ᑐᓂᕐᕈᑎᖃᕐᑐᒃᓴᐅᕗᖅ ᐊᔪᕐᓂᓂ ᐱᓪᓗᒋᑦ, ᐂᑉᐸᖓ ᑐᓂᕐᕈᑎᒋᓗᒍ ᐊᔪᕐᓂᖅ ᐱᓪᓗᒍ, ᐂᑉᐸᖓᓗ ᐃᑯᐊᓚᒐᒃᓴᐅᑎᓪᓗᒍ ᑐᓂᕐᕈᑎᒋᓗᒍ.

⁸ ᑖᑦᓱᒪ ᑐᓂᕐᕈᓯᕐᑎᑦᓯᔨᒧᑦ ᐋᑕᒃᓴᕆᕚ, ᑐᓂᕐᕈᓯᕐᑎᑦᓯᔨᐅᓪᓗ ᓯᕗᓪᓕᕐᒥᒃ ᐂᑉᐸᖓ ᐊᔪᕐᓂᖅ ᐱᓪᓗᒍ ᑐᓂᕐᕈᑎᒋᔭᒃᓴᕆᕚ. ᑖᑦᓱᒪ ᑎᖕᒥᐊᑉ ᓂᐊᖁᖓ ᕿᐱᑎᑕᒃᓴᕆᕚ ᖁᖓᓯᖓᒍᑦ ᐱᑦᓯᐊᒪᕆᖏᓪᓗᒍ.

⁹ ᐊᐅᖓᑕᓗ ᐃᓚᖓ ᓯᕐᐸᕐᓴᕈᑎᒋᔭᓴᕆᕚ ᑐᓂᕐᕈᓯᕐᕕᐅᑉ ᓴᓂᕋᖓᓄᑦ; ᐊᐅᖓᑕᓗ ᐊᒥᐊᒃᑯᐊ ᑯᕕᑎᑕᐅᓗᓂ ᑐᓂᕐᕈᓯᕐᕕᐅᑉ ᑭᒡᓕᖓᓄᑦ. ᑐᓂᕐᕈᑕᐅᖕᒪᑦ ᐊᔪᕐᓂᖅ ᐱᓪᓗᒍ.

¹⁰ ᑐᓂᕐᕈᓯᕐᑎᑦᓯᔨᐅᑉ ᑕᕝᕙ ᑎᖕᒥᐊᑉ ᐂᑉᐸᖓ ᐃᑯᐊᓚᑦᓯᕕᖕᒥ ᑐᓂᕐᕈᑎᒋᔭᒃᓴᕆᕚ ᐱᖁᔭᐅᓯᒪᔪᖅ ᒪᓕᒡᓗᒍ, ᐃᓄᒃ ᑖᓐᓇ ᑐᓂᕐᕈᓯᕈᑎᒋᕚ ᐊᔪᕐᓂᖏᑦ ᐱᑦᔪᑎᒋᓪᓗᒋᑦ, ᐊᔪᕐᓂᖏᓐᓂᒡᓗ ᐃᓱᒪᒋᔪᓐᓁᕐᕕᐅᓂᐊᕐᐳᖅ.

¹¹ “ᑑᕖᖕᓂᒡᓕ ᒪᕐᕉᖕᓂᒃ ᐊᕿᒡᒋᐅᔮᕐᑑᖕᓂᒃ ᐱᑦᔨᐊᓐᓂᒡᓘᓐᓃᑦ ᐱᐊᕋᕕᓂᕐᓂᒃ ᑐᓂᕐᕈᓯᕆᐊᒃᓴᖅ ᐊᔪᕐᐸᑦ ᐊᑕᓂᕐᒧᑦ ᑕᕝᕙ ᕾᑦᓯᔭᕆᐊᖃᕐᐳᖅ ᓂᐊᖂᔭᒃᓴᒥᒃ 2ᐸᐅᓐᒥᒃ ᐅᖁᒤᓐᓂᓕᖕᒥᒃ ᓯᖃᓕᑦᓯᐊᕐᓯᒪᔪᒥᒃ ᐊᔪᕐᓂᓂ ᐱᓪᓗᒍ. ᓂᐊᖂᔭᖅ ᐅᕐᓯᕆᐊᖃᓐᖏᓚᖅ ᑎᐱᑦᓯᐊᕆᒃᑐᒥᒡᓘᓐᓃᑦ ᐃᓐᓴᓐᓯᒥᒃ ᐃᓚᔭᕆᐊᖃᓐᖏᓚᖅ, ᐊᔪᕐᓂᖅ ᐱᓪᓗᒍ ᑐᓂᕐᕈᑕᐅᖕᒪᑦ.

¹² ᑐᓂᕐᕈᓯᕐᑎᑦᓯᔨᒧᓪᓕ ᑐᓂᔭᒃᓴᕆᕚ, ᑖᓐᓇᓗ ᑕᕝᕙᓐᖓᑦ ᑎᒍᓯᓗᓂ ᑐᓂᕐᕈᑕᐅᓂᖓᓂᒃ ᓇᓗᓁᒃᑯᑦᓯᕋᒃᓴᕆᕚ ᐃᖅᑲᐅᒪᑦᔪᑎᒃᓴᒥᒃ, ᑎᒍᔭᓂ ᐃᑯᐊᓚᑦᓯᕕᖕᒧᑦ ᐃᒋᓪᓗᒍ ᑐᓂᕐᕈᓯᕐᕕᖕᒥ ᑐᓂᕐᕈᑕᐅᓗᑎᒃ ᐃᑯᐊᓚᑎᑕᐅᓗᑎᒃ ᐊᑕᓂᕐᒧᑦ ᐃᑯᐊᓚᔪᑦ ᖄᖏᓐᓂ. ᐊᔪᕐᓂᖅ ᐱᓪᓗᒍ ᑐᓂᕐᕈᑕᐅᖕᒪᑦ.

¹³ ᑍᒫᒃ ᑐᓂᕐᕈᓯᕐᑎᑦᓯᔨᐅᑉ ᑐᓂᕐᕈᓯᕐᑎᑉᐹ ᐊᔪᕐᓃᑦ ᓇᓪᓕᐊᑐᐃᓐᓁᑦ ᐱᓪᓗᒋᑦ ᐊᔪᕐᑐᓕᓂᕆᔭᖏᑦ, ᑖᓐᓇᓗ ᐃᓱᒪᒋᔪᓐᓁᕐᕕᐅᓂᐊᕐᐳᖅ. ᐊᒥᐊᒃᑯᖏᓪᓕ ᑐᓂᕐᕈᓯᕐᑎᑦᓯᔨᐅᑉ ᐱᒋᕚ, ᓂᐊᖂᔭᖅ ᑐᓂᕐᕈᑕᐅᑎᓪᓗᒍ.”

ᐸᓯᔭᒃᓴᐅᓂᖅ ᐱᓪᓗᒍ ᑐᓂᕐᕈᓯᕐᓂᖅ

¹⁴ ᐊᑕᓂᐅᑉ ᒨᓯᓯ ᐅᖃᐅᑎᕚ, ᐅᖃᕐᓗᓂ:

¹⁵ “ᐃᓄᐃᑦ ᓇᓪᓕᐊᑦ ᐱᖁᔭᒥᒃ ᓱᕅᒃᐸᑦ ᐊᔪᕐᑐᓕᒃᐸᓪᓗ ᐱᔮᕆᖏᓪᓗᓂ ᐊᑕᓂᐅᑉ ᐃᑦᔪᕐᓁᑎᑕᖏᓐᓂᒃ ᓇᓪᓕᐊᓐᓂᑐᐃᓐᓇᖅ, ᑖᓐᓇ ᑍᒤᓕᐅᕐᑐᖅ ᐊᑕᓂᕐᒧᑦ ᕾᑦᓯᔪᒃᓴᐅᕗᖅ ᐸᓯᔭᒃᓴᐅᓂᕐᒧᑦ ᐊᑭᓕᐅᑎᒥᓂᒃ ᓰᐲᑦ ᐊᖑᓴᓪᓗᖓᓂᒃ, ᐆᒪᔪᕐᓗ ᑖᓐᓇ ᖃᓄᐃᓐᓂᖃᖏᑦᓯᐊᕐᓗᓂ ᐊᑭᖃᓪᓗᐊᕐᓗᓂᓗ ᑐᒃᓯᐊᕐᕕᖕᒧᑦ ᐊᑭᒋᔭᐅᕙᒃᑐᑎᑐᑦ. ᐸᓯᔭᒃᓴᐅᓂᖅ ᐱᓪᓗᒍ ᑐᓂᕐᕈᑎᒃᓴᐅᖕᒪᑦ.

¹⁶ ᐃᓄᒃ ᑖᓐᓇ ᐊᑭᓖᒋᐊᖃᕐᐳᖅ ᐱᔭᕆᐊᖃᓚᐅᕐᑕᒥᓂᒃ ᐱᓐᖏᓮᓐᓇᕐᓂᑯᒥᓂᒃ ᐃᑦᔪᕐᓁᑎᑕᐅᔪᑦ ᓇᓛᓄᑦ, ᓱᓕᓗ ᐊᑭᓖᒃᑲᓐᓂᕐᓗᓂ 20ᐳᓴᒥᒃ ᐊᑭᓕᕆᐊᖃᕐᑕᒥ ᐅᖓᑖᓄᑦ ᑐᓂᕐᕈᓯᕐᑎᒧᑦ ᑐᓂᓗᒋᑦ. ᑖᑦᓱᒪ ᑐᓂᕐᕈᓯᕈᑎᓂᐊᕐᐹ ᓰᐱᐅᑉ ᐊᖑᓴᓪᓗᖓᓂᒃ ᐸᓯᔭᒃᓴᐅᓂᕐᒧᑦ ᐊᑭᓕᐅᑎᒥᒃ, ᐃᓱᒪᒋᔪᓐᓁᕐᕕᐅᓂᐊᕐᐳᕐᓗ.

¹⁷ “ᐃᓄᐃᓪᓕ ᓇᓪᓕᐊᑦ ᐊᔪᕐᑐᓕᒃᐸᑦ ᐱᓕᕆᒃᐸᓪᓗ ᐊᑕᓂᐅᑉ ᐱᖁᔭᖏᓐᓂ ᐊᑐᕐᑕᐅᖁᔭᐅᖏᑦᑐᒥᒃ, ᐃᓄᒃ ᓇᖕᒥᓂᖅ ᖃᐅᔨᖏᒃᑲᓗᐊᕐᓗᓂ ᑕᕝᕙ ᐸᓯᔭᒃᓴᐅᕗᖅ ᓱᒋᐊᒐᒃᓴᐅᓪᓗᓂᓗ, ᐱᓕᕆᔭᕆᐊᖃᕐᓗᓂᓗ ᐱᖁᔭᖅ ᒪᓕᒡᓗᒍ.

¹⁸ ᐋᑦᓯᔪᒃᓴᐅᕗᕐᓗ ᑐᓂᕐᕈᓯᕐᑎᑦᓯᔨᒧᑦ ᑐᓂᕐᕈᑎᒃᓴᒥᒃ ᐸᓯᔭᒃᓴᐅᓂᕐᒧᑦ ᐊᑭᓕᐅᑎᒥᒃ, ᓰᐲᑦ ᐊᖑᓴᓪᓗᖓᓂᒃ ᐊᑭᖃᓪᓗᐊᕐᓗᓂᓗ ᐊᑭᒋᔭᕆᐊᖃᕐᑕᖓᓂᒃ. ᑍᒤᓕᐅᕐᐸᑦ ᑐᓂᕐᕈᓯᕐᑎᑦᓯᔨᐅᑉ ᑐᓂᕐᕈᓯᕈᑎᓂᐊᕐᐹ ᑕᒻᒪᕐᓯᒪᓂᖓ ᖃᐅᔨᖏᒃᑲᓗᐊᕐᓗᓂ ᐱᓂᐊᓚᐅᕐᑕᖓ ᐱᓪᓗᒍ ᐃᓱᒪᒋᔪᓐᓁᕐᕕᐅᓂᐊᕐᐳᕐᓗ.

¹⁹ ᑐᓂᕐᕈᓯᕐᓂᖅ ᑍᒤᑦᑐᖅ ᑐᓂᕐᕈᓯᕐᓂᐅᖕᒪᑦ ᐸᓯᔭᒃᓴᐅᓂᕐᒧᑦ ᐊᑭᓕᐅᑎᒥᒃ, ᐃᓄᒃ ᑍᒫᒃ ᐱᔪᖅ ᐸᓯᔭᒃᓴᐅᖕᒪᑦ ᓈᒻᒪᖏᑦᑐᓕᓂᕆᓚᐅᕐᑕᒥᓄᑦ ᐊᑕᓂᕐᒧᑦ.”