ᒨᓯᓯ ᐱᖓᔪᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᓂᕐᕈᓯᕐᓂᖅ ᐱᔮᕆᓇᓂ ᐊᔪᕐᑐᓕᓂᖅ ᐱᑦᔪᑎᒋᓪᓗᒍ

¹ ᐊᑕᓂᐅᑉ ᒨᓯᓯ ᐅᖃᐅᑎᕚ,

² “ᐃᓴᕆᐊᓕᒥᐅᑦ ᐃᒫᒃ ᐅᖃᐅᑎᒃᑭᑦ; ᓇᓪᓕᐊᑦ ᐱᔮᕆᖏᓪᓗᓂ ᐊᔪᕐᑐᓕᒃᐸᑦ, ᐊᑕᓂᐅᓪᓗ ᒪᓕᒐᒃᓴᐅᖁᔭᖏᓐᓂ ᐊᑐᕐᑕᐅᖁᔭᐅᖏᑦᑐᒥᒃ ᐊᑐᕐᐸᑦ.

³ ᑐᓂᕐᕈᓯᕐᑎᑦᓯᔨ ᓂᕈᐊᕐᑕᐅᓂᕐᒥᒍᑦ ᐅᕐᓱᒧᑦ ᓇᓗᓁᒃᑯᓯᕐᑕᐅᓯᒪᔪᖅ ᐊᔪᕐᑐᓕᒃᐸᑦ, ᑕᕝᕙ ᐃᓄᓕᒫᑦ ᐸᓯᔭᒃᓴᓐᖑᕐᑎᒻᒪᒋᑦ, ᑖᓐᓇ ᐊᑕᓂᕐᒧᑦ ᐋᑦᓯᔪᒃᓴᐅᕗᖅ ᐃᒻᒧᒃᓯᐅᒐᐅᑉ ᐸᖕᓂᖓᓂᒃ ᐃᓐᓇᐅᓗᐊᖏᑦᑐᒥᒃ ᖃᓄᐃᓐᓂᖃᖏᑦᑐᒥᒃ, ᐊᔪᕐᓂᖅ ᐱᓪᓗᒍ ᑐᓂᕐᕈᑎᒃᓴᒥᒃ ᓇᖕᒥᓂᖅ ᐊᔪᕐᑐᓕᓂᓂ ᐱᑦᔪᑎᒋᓪᓗᒍ.

⁴ ᑖᑦᓱᒪ ᐊᖑᓴᓪᓗᖅ ᕾᑦᔪᑎᔭᒃᓴᕆᕚ ᑐᐱᐅᑉ ᑲᑎᒪᕕᐅᑉ ᐃᑎᕐᕕᐊᑕ ᓴᓂᐊᓄᑦ ᐊᑕᓂᐅᑉ ᓵᖓᓂ. ᓂᐊᖁᐊᒍᑦ ᑎᒍᓗᒍ ᑐᖁᑕᒃᓴᕆᕚ ᐊᑕᓂᐅᑉ ᑕᒃᑯᐊᓂ.

⁵ ᑐᓂᕐᕈᓯᕐᑎᑦᓯᔨᐅᓪᓗ ᐅᕐᓱᒧᑦ ᓇᓗᓁᒃᑯᓯᕐᑕᐅᓯᒪᔫᑉ ᑖᑦᓱᒪ ᐊᖑᓴᓪᓘᑉ ᐊᐅᖓᑕ ᐃᓚᖓ ᑐᐱᕐᒧᑦ ᑲᑎᒪᕕᖕᒧᑦ ᐃᑎᕈᑎᔭᒃᓴᕆᕚ.

⁶ “ᑖᑦᓱᒪᓗ ᑎᑭᓂ ᐊᐅᖕᒧᑦ ᒥᓱᓚᐅᕐᓗᒍ ᐃᓚᖓ ᓯᕿᔭᕐᑎᑕᒃᓴᕆᕚ. 7ᐃᕐᑐᕐᓗᓂ ᐊᑕᓂᐅᑉ ᓵᖓᓂ ᑕᓘᑉ ᐃᑦᔪᕐᓁᑦᑑᑉ ᓵᖓᓂ.

⁷ ᑐᓂᕐᕈᓯᕐᑎᑦᓯᔨᐅᑉ ᑕᕝᕙ ᐊᐅᑉ ᐃᓚᖓᓄᑦ, ᑎᐱᑦᓯᐊᕆᒃᑐᒥᒃ ᐃᓐᓴᓐᓯᒥᒃ ᑐᓂᕐᕈᓯᕐᕕᐅᑉ ᓇᒡᔪᖏᑦ ᐊᐅᒥᑎᕐᑕᒃᓴᕆᕔᑦ ᐊᑕᓂᐅᑉ ᓵᖓᓂ ᑐᐱᕐᒥ ᑲᑎᒪᕕᖕᒥ. ᐊᖑᓴᓪᓘᓪᓗ ᐊᐅᖓ ᑯᕕᔭᕆᐊᖃᕐᐹ ᐃᑯᐊᓚᑦᓯᕕᐅᑉ ᑐᓂᕐᕈᓯᕐᕕᐅᑉ ᐊᑖᓄᑦ, ᑐᐱᐅᑉ ᑲᑎᒪᕕᐅᑉ ᐃᑎᕐᑕᕐᕕᐊᑕ ᖃᓂᒋᔭᖓᓃᑦᑐᒧᑦ.

⁸ ᑐᓂᕐᕈᓯᕐᑎᑦᓯᔨᐅᑉ ᑕᕝᕙ ᐊᖑᓴᓪᓘᑉ ᑐᓐᓄᓕᒫᖏᒃ ᐲᔭᒐᒃᓴᕆᕔᑦ, ᐊᔪᕐᓂᖅ ᐱᓪᓗᒍ ᑐᓂᕐᕈᑎᒃᓴᒥᑦ, ᑭᒃᓴᐅᑎᖏᑦ ᐃᕐᕋᕕᖏᑕᓗ ᑐᓐᓄᓕᒫᖏᑦ.

⁹ ᑕᕐᑐᖏᒡᓗ ᑕᕐᑐᕈᑎᖏᓪᓗ ᑐᓐᓄᐃᑦ ᑯᑦᓯᓂᖏᑕᓗ ᑐᓐᓄᓕᒫᖏᑦ, ᑎᖑᖓᑕᓗ ᑭᒃᓴᐅᑎᖓ; ᑕᕐᑐᖏᒃ ᐲᓕᕈᓂᒋᒃ ᐲᖃᓯᐅᑎᔭᒃᓴᕆᕔᑦ.

¹⁰ ᑍᒫᒃᑕᐅᖅ ᑐᓐᓄᓕᒫᖏᑦ ᐲᔭᕐᑕᐅᖕᒪᑕ ᐃᒻᒧᒃᓯᐅᒐᕐᒥᑦ ᑐᓂᕐᕈᑎᒃᓴᐅᓪᓗᓂ ᑐᖁᑕᐅᔪᒥᑦ ᐃᓚᒋᔭᐅᑦᓯᐊᕈᑎᒃᓴᑐᑦ. ᑐᓂᕐᕈᓯᕐᑎᑦᓯᔨᐅᑉ ᑍᒫᒃᑕᐅᖅ ᐃᑯᐊᓚᑎᑕᒃᓴᕆᕔᑦ ᑐᓂᕐᕈᓯᕐᕕᖕᒥ ᐃᑯᐊᓚᑦᓯᕕᖕᒥ.

¹¹ ᐊᖑᓴᓪᓘᓪᓕ ᐊᒥᖓ ᓂᕿᓕᒫᖓᓗ, ᓂᐊᖁᖓᓗ ᓂᐅᖏᒡᓗ, ᓂᕆᔭᒃᓴᐅᖏᓐᓂᖏᓪᓗ,

¹² ᐃᒫᒃ, ᐊᖑᓴᓪᓘᑉ ᐊᒥᐊᒃᑯᓕᒫᖏᑦ ᑐᓂᕐᕈᓯᕐᑎᑦᓯᔨᐅᑉ ᐊᐅᓪᓚᕈᑎᔭᒃᓴᕆᕔᑦ ᓄᓇᓖᑦ ᓯᓚᑖᓐᓄᑦ. ᑐᒃᓯᐊᕐᓂᒃᑯᑦ ᓴᓗᒻᒪᕐᓴᕐᑕᐅᓯᒪᔪᒧᑦ, ᐊᕐᔭᓕᓂᕐᓂᒃ ᐃᒋᑦᓯᕕᖕᒧᑦ, ᑕᕝᕙᓂᓗ ᐊᕐᔭᓕᓃᑦ ᖄᖏᓐᓂ ᕿᔪᓕᕐᓯᒪᔪᒥ ᐃᑯᐊᓚᑎᑕᒃᓴᕆᕚ.

¹³ “ᐃᓴᕆᐊᓕᒥᐅᓪᓕ ᓄᓇᖅᑲᑎᒌᓕᒫᑦ ᐱᔮᕆᖏᓪᓗᑎᒃ ᐊᔪᕐᑐᓕᒃᐸᑕ ᐊᑕᓂᐅᓪᓗ ᐱᖁᔭᖏᓐᓂ ᐊᑐᕐᑕᐅᖁᔭᐅᖏᑦᑐᒥᒃ ᐊᑐᕐᐸᑕ, ᓄᓇᓖᑦ ᖃᐅᔨᖏᒃᑲᓗᐊᕐᑎᓪᓗᒋᑦ, ᑕᕝᕙ ᑕᒪᕐᒥᒃ ᐸᓯᔭᒃᓴᐅᓕᕐᐳᑦ.

¹⁴ ᖃᐅᔨᓕᕈᑎᒡᓗ ᐊᔪᕐᑐᓕᓯᒪᓂᕐᒥᖕᓂᒃ, ᓄᓇᓖᑦ ᐊᖓᔪᖅᑳᖏᑦ ᕾᑦᓯᔪᒃᓴᐅᕗᑦ ᐃᒻᒧᒃᓯᐅᒐᐅᑉ ᐸᖕᓂᖓᓂᒃ ᐃᓐᓇᐅᓗᐊᖏᑦᑐᒥᒃ; ᑖᓐᓇ ᐊᔪᕐᑐᓕᓂᕐᒧᑦ ᑐᓂᕐᕈᑎᒃᓴᐅᖁᓪᓗᒍ, ᕾᑦᔪᑎᓗᒍᓗ ᑐᐱᐅᑉ ᑲᑎᒪᕕᐅᑉ ᐃᑎᕐᑕᕐᕕᐊᑕ ᓴᓂᐊᓄᑦ.

¹⁵ ᓄᓇᓖᑦ ᐊᖓᔪᖅᑳᖏᑦ ᐸᑎᒻᒥᒃᓯᕐᑐᒃᓴᐅᕗᑦ ᐆᒪᔫᑉ ᓂᐊᖁᐊᓂᒃ ᐊᑕᓂᐅᑉ ᓵᖓᓂ, ᑕᕝᕙᓂᓗ ᐊᑕᓂᐅᑉ ᓵᖓᓂ ᑐᖁᑕᐅᓗᓂ.

¹⁶ ᑕᕝᕙᓕ ᑐᓂᕐᕈᓯᕐᑎᑦᓯᔨᐅᑉ ᐅᕐᓱᒧᑦ ᓇᓗᓁᒃᑯᓯᕐᑕᐅᓯᒪᔫᑉ ᑎᓕᔭᐅᓂᒃᑯᑦ, ᐊᖑᓴᓪᓘᑉ ᐊᐅᖓᑕ ᐃᓚᖓᓂᒃ ᐃᑎᕈᑦᔨᔭᕆᐊᖃᕐᐳᖅ ᑐᐱᕐᒧᑦ ᑲᑎᒪᕕᖕᒧᑦ.

¹⁷ ᑎᑭᓂᓗ ᐊᐅᖕᒧᑦ ᒥᓱᒡᓗᒍ ᐊᑕᓂᐅᑉ ᓵᖓᓂ ᓯᕿᔭᕐᑎᑕᒃᓴᕆᕚ 7ᐃᕐᑐᕐᓗᓂ ᐃᑦᔪᕐᓁᑦᑐᕕᐅᑉ ᑕᓗᐊᑕ ᓵᖓᓂ.

¹⁸ ᑐᓂᕐᕈᓯᕐᑎᑦᓯᔨᐅᓪᓗ ᑐᓂᕐᕈᓯᕐᕕᐅᑉ ᓇᒡᔪᖏᑦ ᐊᐅᑉ ᐃᓚᖓᓂᒃ ᒥᖑᐊᒐᒃᓴᕆᕔᑦ ᐊᑕᓂᐅᑉ ᓇᔪᒐᖓᓃᑦᑐᑦ ᑐᐱᕐᒥ ᑲᑎᒪᕕᖕᒥ. ᐊᐅᓪᓗ ᑖᑦᓱᒪ ᐊᒥᐊᒃᑯᖓ ᑯᕕᔭᒃᓴᕆᕚ ᐃᑯᐊᓚᑦᓯᓗᓂ ᑐᓂᕐᕈᓯᕐᕕᐅᑉ ᑭᒡᓕᖓᓄᑦ ᑐᐱᐅᑉ ᑲᑎᒪᕕᐅᑉ ᐃᑎᕐᕕᐊᑕ ᓴᓂᐊᓃᑦᑐᒧᑦ.

¹⁹ ᑐᓂᕐᕈᓯᕐᑎᐅᓪᓗ ᐊᖑᓴᓪᓘᑉ ᑐᓐᓄᓕᒫᖏᑦ ᐲᔭᒐᒃᓴᕆᕔᑦ, ᐃᑯᐊᓚᑎᓪᓗᒋᓪᓗ ᑐᓂᕐᕈᓯᕐᕕᖕᒥ.

²⁰ ᑍᒫᑦᓮᓐᓇᕐᓗ ᐊᖑᓴᓪᓗᖅ ᐱᔭᕆᐊᖃᕐᐹ ᐊᖑᓴᓪᓗᕐᑐᑦ ᐊᔪᕐᓂᖅ ᐱᓪᓗᒍ ᑐᓂᕐᕈᑎᒃᓴᑐᑦ.

²¹ ᐊᖑᓴᓪᓗᕐᓗ ᑖᓐᓇ ᓄᓇᓖᑦ ᓯᓚᑖᓄᑦ ᐊᐅᓪᓚᕈᑎᔭᒃᓴᕆᕚ ᐃᑯᐊᓚᑎᓪᓗᒍᓗ ᐊᖑᓴᓪᓗᕐᑐᑦ ᓯᕗᓪᓕᕐᑐᑦ. ᑍᒫᒃ ᑕᕝᕙ ᐱᔭᕆᐊᖃᕐᐳᑦ ᓄᓇᓖᑦ ᐊᔪᕐᑐᓕᓂᖏᑦ ᑐᓂᕐᕈᓯᕈᑕᐅᑎᓪᓗᒋᑦ.

²² “ᐃᓄᐃᓪᓗ ᓯᕗᓕᕐᑎᖓᑦ ᐱᔮᕆᖏᓪᓗᓂ ᐊᔪᕐᑐᓕᒃᐸᑦ, ᐱᓂᐊᕐᐸᓪᓗ ᐊᑕᓂᐅᑉ ᒎᑎᐅᑉ ᐱᖁᔭᖏᓐᓂᑦ ᐊᑐᖁᔭᐅᖏᑦᑐᒥᒃ, ᑖᓐᓇ ᐸᓯᔭᒃᓴᐅᕗᖅ.

²³ ᓇᓗᔪᓐᓁᕐᑎᑕᐅᒃᐸᓪᓗ ᐊᔪᕐᑐᓕᓂᕆᔭᖓᓂᒃ, ᑐᓂᕐᕈᑎᒃᓴᖃᕆᐊᖃᕐᐳᖅ ᒎᑦᓯᒥᒃ ᐊᖑᓴᓪᓗᕐᒥᒃ ᖃᓄᐃᓐᓂᖃᖏᑦᓯᐊᕐᑐᒥᒃ.

²⁴ ᓯᕗᓕᕐᑎᐅᑉ ᒎᑦᓯᐅᑉ ᓂᐊᖁᐊ ᐸᑎᒃᓯᒪᔭᕆᐊᖃᕐᐹ ᑐᖁᓪᓗᓂᐅᒡᓗ ᐃᑯᐊᓚᑦᓯᓂᕐᒧᑦ ᑐᓂᕐᕈᑎᒃᓮᑦ ᑐᖁᑕᐅᕕᒋᕙᒃᑕᖓᓂ ᐊᑕᓂᐅᑉ ᓵᖓᓂ. ᐊᔪᕐᓂᖅ ᐱᓪᓗᒍ ᑐᓂᕐᕈᑎᒃᓴᐅᖕᒪᑦ.

²⁵ ᑐᓂᕐᕈᓯᕐᑎᑦᓯᔨ ᐆᒪᔫᑉ ᐊᐅᖓᑕ ᐃᓚᖓᓄᑦ ᑎᑭᓂ ᒥᓱᒃᑕᒃᓴᕆᕚ ᑐᓂᕐᕈᓯᕐᕕᐅᓪᓗ ᐃᑯᐊᓚᑦᓯᕕᐅᑉ ᓇᒡᔪᖏᑦ ᒥᖑᐊᒐᒃᓴᕆᕔᑦ ᑯᕕᓗᒍᓗ ᐊᒥᐊᒃᑯᖓ ᑐᓂᕐᕈᓯᕐᕕᐅᑉ ᑭᒡᓕᖓᓄᑦ.

²⁶ ᐆᒪᔫᓪᓗ ᑐᓐᓄᓕᒫᖏᑦ ᐃᑯᐊᓪᓚᒐᒃᓴᕆᕔᑦ ᑐᓂᕐᕈᓯᕐᕕᖕᒥ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᒃᓴᑐᑦ ᐱᔭᕆᐊᖃᕐᐳᖅ. ᑍᒫᒃ ᑕᕝᕙ ᑐᓂᕐᕈᓯᕐᑎᑦᓯᔨ ᑐᖁᑕᒃᓴᒥᒃ ᑐᓂᕐᕈᑎᖃᕐᓂᐊᕐᐳᖅ ᓯᕗᓕᕐᑎᐅᑉ ᐊᔪᕐᓂᖏᑦ ᐱᓪᓗᒋᑦ, ᑖᓐᓇᓗ ᐃᓱᒪᒋᔪᓐᓁᕐᕕᐅᓂᐊᕐᐳᖅ.

²⁷ “ᓄᓇᓕᖕᓂ ᓄᓇᖃᖃᑕᐅᔪᖅ ᐱᔮᕆᖏᓪᓗᓂ ᐊᔪᕐᑐᓕᕐᐸᑦ ᐱᓕᕆᒃᐸᓪᓗ ᐊᑕᓂᐅᑉ ᐱᖁᔭᖏᑕ ᐊᑐᖁᓐᖏᑕᖓᓂᒃ ᑖᓐᓇ ᐸᓯᔭᒃᓴᐅᕗᖅ.

²⁸ ᐊᔪᕐᑐᓕᓂᖓᓂᒃ ᓇᓗᔪᓐᓃᕐᑎᑕᐅᒃᐸᑦ, ᑖᓐᓇ ᑐᓂᕐᕈᑎᒃᓴᒥᒃ ᑐᓂᕐᕈᓯᕐᑐᒃᓴᐅᕗᖅ ᐊᔪᕐᑐᓕᓂᓂ ᐱᓪᓗᒍ, ᒎᑦᓯᒥᒃ ᐊᕐᓇᓪᓗᖕᒥᒃ ᖃᓄᐃᓐᓂᖃᖏᑦᓯᐊᕐᑐᒥᒃ.

²⁹ ᑖᑦᓱᒪ ᐊᔪᕐᓂᖅ ᐱᓪᓗᒍ ᑐᓂᕐᕈᑎᒃᓴᖅ ᓂᐊᖁᐊᒍᑦ ᐸᑎᒻᒥᔭᒃᓴᕆᕚ ᑐᖁᓪᓗᒍᓗ ᐃᑯᐊᓚᑎᑕᒃᓴᒥᒃ ᑐᓂᕐᕈᓯᕐᕕᖕᒥ.

³⁰ ᑕᕝᕙ ᑐᓂᕐᕈᓯᕐᑎᑦᓯᔨ ᐆᒪᔫᑉ ᐊᐅᖓᑕ ᐃᓚᖓᓂᒃ ᑎᑭᕐᒥᓄᑦ ᐃᑯᐊᓚᔪᓂᒃ ᑐᓂᕐᕈᓯᕐᕕᐅᑉ ᓇᒡᔪᖏᑦ ᒥᖑᐊᕐᑕᒃᓴᕆᕔᑦ, ᐊᐅᓪᓗ ᐊᒥᐊᒃᑯᐊ ᑯᕕᓗᒍ ᑐᓂᕐᕈᓯᕐᕕᐅᑉ ᑭᒡᓕᖓᓄᑦ.

³¹ ᑐᓂᕐᕈᓯᕐᓂᐊᕐᑑᓪᓗ ᐆᒪᔫᑉ ᑐᓐᓄᓕᒫᖏᑦ ᐲᔭᕐᑕᒃᓴᕆᕔᑦ, ᑍᒫᒃᑕᐅᖅ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᒃᓴᖅ ᑐᓐᓄᐃᔭᕐᑕᐅᒃᐸᑦ ᑐᓂᕐᕈᓯᕐᑎᑦᓯᔨᐅᑉ ᐃᑯᐊᓪᓚᒃᑕᒃᓴᕆᕚ ᑐᓂᕐᕈᓯᕐᕕᖕᒥ ᑎᐱᖓᓗ ᐊᑕᓂᐅᑉ ᒪᒪᕆᕚ. ᑍᒫᒃ ᑕᕝᕙ ᑐᓂᕐᕈᓯᕐᑎᑦᓯᔨᐅᑉ ᐃᓄᒃ ᑖᓐᓇ ᑐᓂᕐᕈᓯᕈᑎᕚ ᐊᔪᕐᓂᖏᑦ ᐱᓪᓗᒋᑦ ᑖᓐᓇᓗ ᐃᓱᒪᒋᔪᓐᓁᕐᕕᐅᓂᐊᕐᐳᖅ.

³² ᓰᐱᐅᓪᓕ ᓄᕐᕋᖓᓂᒃ ᑐᓂᕐᕈᑎᒃᓴᖃᕐᐸᑦ ᐊᔪᕐᑐᓕᓂ ᐱᓪᓗᒍ, ᑐᓂᕐᕈᑎᒃᓴᖃᕐᑐᒃᓴᐅᕗᖅ ᐊᕐᓇᓪᓗᖕᒥᒃ ᖃᓄᐃᓐᓂᖃᖏᑦᓯᐊᕐᑐᒥᒃ.

³³ ᑐᓂᕐᕈᓯᕐᓂᐊᕐᑑᑉ ᐆᒪᔪᖅ ᓂᐊᖁᐊᒍᑦ ᐸᑎᒻᒥᔭᒃᓴᕆᕚ ᑐᖁᓪᓗᒍᓗ ᐊᔪᕐᑐᓕᓂᖅ ᐱᓪᓗᒍ, ᑐᓂᕐᕈᑎᒃᓮᑦ ᐃᑯᐊᓚᒐᒃᓮᑦ ᑐᖁᑕᐅᕕᒋᕙᒃᑕᖓᓐᓂ.

³⁴ ᑐᓂᕐᕈᓯᕐᑎᑦᓯᔨᐅᑉ ᑕᕝᕙ ᐊᔪᕐᑐᓕᓂᖅ ᐱᓪᓗᒍ ᑐᓂᕐᕈᑎᒃᓴᐅᑉ ᐊᐅᖓᑕ ᐃᓚᖓᓂᒃ ᑎᑭᕐᒥᓄᑦ ᑐᓂᕐᕈᓯᕐᕕᐅᑉ ᐃᑯᐊᓚᑦᓯᕕᐅᑉ ᓇᒡᔪᖏᑦ ᒥᖑᐊᕐᑕᒃᓴᕆᕔᑦ ᐊᐅᓪᓗ ᐊᒥᐊᒃᑯᖓ ᑯᕕᓗᒍ ᑐᓂᕐᕈᓯᕐᕕᐅᑉ ᑭᒡᓕᖓᓄᑦ.

³⁵ ᑐᓂᕐᕈᓯᕐᓂᐊᕐᑑᑉ ᓰᐱᐅᑉ ᓄᕐᕋᖓᑕ ᑐᓐᓄᓕᒫᖏᑦ ᐲᔭᕐᑕᒃᓴᕆᕔᑦ; ᑍᒫᑦᓮᓐᓇᕐᑕᐅᖅ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᒃᓴᐅᑉ ᑐᓐᓄᖏᑦ ᐲᔭᕐᑕᐅᕙᖕᒪᑕ ᑐᓂᕐᕈᓯᕐᑎᑦᓯᔨᐅᓪᓗ ᐃᑯᐊᓚᑎᑕᒃᓴᕆᕚ ᑐᓂᕐᕈᓯᕐᕕᐅᑉ ᖄᖓᓂ, ᑐᓂᕐᕈᑕᐅᓗᑎᒃ ᐃᑯᐊᓚᑎᑕᐅᓗᑎᒃ ᐊᑕᓂᕐᒧᑦ; ᑍᒫᒃ ᑕᕝᕙ ᑐᓂᕐᕈᓯᕐᑎᑦᓯᔨᐅᑉ ᐃᓄᒃ ᑖᓐᓇ ᑐᓂᕐᕈᓯᕈᑎᕚ ᐊᔪᕐᓂᖏᑦ ᐱᓪᓗᒋᑦ ᑖᓐᓇᓗ ᐃᓱᒪᒋᔪᓐᓁᕐᕕᐅᓂᐊᕐᐳᖅ.”