ᒨᓯᓯ ᐱᖓᔪᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᒧᑦ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᓯᕐᓂᖅ

¹ “‘ᓇᓪᓕᐊᑦᑕᓪᓗ ᑐᓂᕐᕈᑎᒃᓴᖓ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᒃᓴᐅᒃᐸᑦ; ᐆᒪᔪᒥᒡᓗ ᐃᒻᒧᒃᓯᐅᒐᕐᓂᒃ ᑐᓂᕐᕈᑎᒃᓴᖃᕐᐸᑦ, ᐊᖑᓴᓪᓘᒃᐸᑦ ᐊᕐᓇᓪᓘᒃᐸᓪᓘᓐᓃᑦ, ᑐᓂᕐᕈᓯᕐᓂᐊᕐᑑᑉ ᐊᑕᓂᐅᑉ ᓵᖓᓄᐊᕈᑎᔭᕆᐊᖃᕐᐹ, ᐆᒪᔪᖅ ᑖᓐᓇ ᖃᓄᐃᓐᓂᖃᖏᑦᓯᐊᕐᓗᓂ.

² ᐆᒪᔪᖅ ᓂᐊᖁᐊᒍᑦ ᑎᒍᓗᒍ ᑐᖁᑕᒃᓴᕆᕚ ᑐᐱᐅᑉ ᑲᑎᒪᕕᐅᑉ ᐃᑎᕐᕕᖓᑕ ᓴᓂᐊᓂ. ᐂᕉᓂᐅᓪᓗ ᐃᕐᓂᖏᑕ ᑐᓂᕐᕈᓯᕐᑎᑦᓯᔨᐅᔪᑦ ᐆᒪᔫᑉ ᐊᐅᖓ ᓯᕐᐸᕐᓴᐅᑎᒋᔭᒃᓴᕆᕚᑦ ᑐᓂᕐᕈᓯᕐᕕᐅᑉ ᓴᓂᕋᖏᓐᓄᑦ.

³ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᒃᓴᒥᒃ ᐆᑕᒃᓴᒥᒃ ᐃᑯᐊᓚᑦᓯᓂᒃᑯᑦ ᑐᓂᕐᕈᓯᕐᑐᒃᓴᐅᕗᖅ ᐊᑕᓂᕐᒧᑦ; ᑐᓐᓄᕐᒥᒡᓗ ᐆᒪᔫᑉ ᑭᒃᓴᐅᑎᖏᓐᓂᒃ, ᐅᕝᕙᓘᓐᓃᑦ ᓴᓂᐊᓃᑦᑐᑦ ᐃᕐᕋᕕᖏᑕ ᑭᒃᓴᐅᑎᖓᓂᒃ.

⁴ ᑕᕐᑐᖏᒡᓗ ᐃᒡᓗᒃᑐᑦ ᑕᕐᑐᕈᑎᖏᒃ ᐊᑕᓗᑎᒃ ᑯᑦᑎᓂᖃᕐᓗᑎᒃ, ᑎᖑᖓᑕᓗ ᑭᒃᓴᐅᑎᖓ ᐲᖃᓯᐅᑎᔭᕆᐊᖃᕐᐹ ᑕᕐᑐᖏᒃ ᐲᓕᕈᓂᒋᒃ.

⁵ ᐂᕉᓂᐅᓪᓗ ᐃᕐᓂᖏᑕ ᐃᑯᐊᓚᑎᑕᒃᓴᕆᕚᑦ ᑐᓂᕐᕈᓯᕐᕕᖕᒥ ᑐᓂᕐᕈᑏᑦ ᐃᑯᐊᓚᑎᑕᐅᔪᑦ ᖄᖏᓐᓂ ᕿᔪᐃᑦ ᖄᖏᓐᓃᑦᑐᓂ, ᑐᓂᕐᕈᑏᑦ ᑍᒤᑦᑐᑦ ᑐᓂᕐᕈᑎᐅᖕᒪᑕ ᐃᑯᒪᒃᑯᑦ, ᑎᐱᖓᓗ ᐊᑕᓂᐅᑉ ᒪᒪᕆᕙ.

⁶ “‘ᐆᒪᔪᒥᒡᓕ ᓰᐱᒥᒃ ᒎᑦᓯᒥᒡᓘᓐᓃᑦ ᑐᓂᕐᕈᓯᕐᑐᖃᕐᐸᑦ ᐃᓚᒋᔭᐅᑦᓯᐊᕈᒪᓂᕐᒧᑦ ᐊᑕᓂᕐᒧᑦ ᑐᓂᕐᕈᓯᕐᓗᓂ, ᑖᓐᓇ ᑐᓂᕐᕈᓯᕐᑐᒃᓴᐅᕗᖅ ᐊᖑᓴᓪᓗᕐᒥᒃ ᐊᕐᓇᓪᓗᖕᒥᒡᓘᓐᓃᑦ ᖃᓄᐃᓐᓂᖃᖏᑦᓯᐊᕐᑐᒥᒃ.

⁷ ᓰᐱᐅᑉ ᓄᕐᕋᖓᓂᒃ ᑐᓂᕐᕈᓯᕐᐸᑦ ᐊᑕᓂᕐᒧᑦ, ᐊᑕᓂᐅᑉ ᓵᖓᓄᐊᕐᑕᒃᓴᕆᕚ.

⁸ ᐊᒡᒐᓂ ᐃᓕᔭᒃᓴᕆᕔᑦ ᐆᒪᔫᑉ ᓂᐊᖁᐊᓄᑦ ᑐᖁᓪᓗᓂᐅᒡᓗ ᑐᐱᐅᑉ ᑲᑎᒪᕕᐅᑉ ᐃᑎᕐᕕᖓᑕ ᖃᓂᒋᔮᓂ. ᐂᕉᓂᐅᓪᓗ ᐃᕐᓂᖏᑕ ᐆᒪᔫᑉ ᐊᐅᖓ ᓯᕐᐸᕐᓴᐅᑎᒋᔭᒃᓴᕆᕚᑦ ᑐᓂᕐᕈᓯᕕᐅᑉ ᓴᓂᕋᖏᓐᓄᑦ.

⁹ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᒃᓴᒥᒃ ᑐᑯᑕᒃᓴᒥᒃ ᑐᓂᕐᕈᓯᕐᑐᒃᓴᐅᕗᖅ ᐃᑯᐊᓚᑎᑦᓯᓂᒃᑯᑦ ᐊᑕᓂᕐᒧᑦ ᑐᓂᔭᒃᓴᒥᒃ; ᑐᓐᓄᖓᓂᒃ, ᑐᓐᓄᓕᒫᖏᒃ ᐸᒥᐅᖓ ᓇᑲᓯᒪᓗᓂ ᕿᒥᕐᓗᐊᑕ ᑭᒡᓕᖓᒍᑦ, ᑭᒃᓴᐅᑎᓕᒫᖏᑦ ᐃᕐᕋᕕᖏᓐᓂᒃ ᐅᓕᒃᓯᓯᒪᔪᑦ ᐅᕝᕙᓘᓐᓃᑦ ᓴᓂᐊᓃᑦᑐᓕᒫᑦ.

¹⁰ ᑕᕐᑐᖏᒃ ᐃᒡᓗᒃᑐᑦ ᑐᓐᓄᖏᒃ ᐱᖃᓯᐅᑎᓗᒋᒃ ᑯᑦᑎᓂᖏᒃᑕᓗ ᑐᓐᓄᓕᒫᖏᑦ, ᑎᖑᐊᑕᓗ ᐃᒻᒧᑎᖓ ᑐᓐᓄᖅ, ᐲᖃᓯᐅᑎᓗᒍ ᑕᕐᑐᖏᒃ ᐲᓕᕈᓂᒋᒃ.

¹¹ ᑐᓂᕐᕈᓯᕐᑎᑦᓯᔨᐅᑉ ᑐᓂᕐᕈᓯᕐᕕᖕᒥ ᐃᑯᐊᓚᑎᑕᒃᓴᕆᕔᑦ ᓂᕿᒃᓴᐅᖁᓪᓗᒋᑦ, ᑐᓂᕐᕈᑕᐅᓪᓗᑎᒃ ᐃᑯᒪᒃᑯᑦ ᐊᑕᓂᕐᒧᑦ.

¹² “‘ᓇᓪᓕᐊᑦᑕᓕ ᑐᓂᕐᕈᑎᒃᓴᖓ ᒎᑦᓯᐅᒃᐸᑦ, ᑐᓂᕐᕈᓯᕐᓂᐊᕐᑑᑉ ᐊᑕᓂᕐᒧᑦ ᕾᑦᔪᑎᔭᒃᓴᕆᕚ.

¹³ ᐊᒡᒐᓂ ᓂᐊᖁᖓᓄᑦ ᐃᓕᓗᒋᑦ ᑐᖁᓪᓗᒍᓗ ᑐᐱᐅᑉ ᑲᑎᒪᕕᐅᑉ ᐃᑎᕐᕕᐊᑕ ᓴᓂᐊᓂ. ᐂᕉᓂᐅᓪᓗ ᐃᕐᓂᖏᑕ ᒎᑦᓯᐅᑉ ᐊᐅᖓ ᓯᕐᐸᕐᓴᐅᑎᒋᔭᒃᓴᕆᕚᑦ ᑐᓂᕐᕈᓯᕐᕕᐅᑉ ᓴᓂᕋᖏᓐᓄᑦ.

¹⁴ ᑐᓂᕐᕈᑎᒃᓴᒥᓂᑦ ᑕᕝᕙᓐᖓᑦ ᑐᓂᕐᕈᓯᕐᑐᒃᓴᐅᕗᖅ ᐃᑯᐊᓚᑎᑦᓯᓐᓂᒃᑯᑦ ᐊᑕᓂᕐᒧᑦ; ᐆᒪᔫᑉ ᑭᒃᓴᐅᑎᓕᒫᖏᓐᓂᒃ, ᓴᓂᐊᓃᑦᑐᓕᒫᓪᓗ.

¹⁵ ᑕᕐᑐᖏᒡᓗ ᐃᒡᓗᒃᑐᑦ ᑯᑦᑎᓂᖏᑕᓗ ᖃᓂᒋᔭᖏᓐᓃᑦᑐᖅ ᑐᓐᓄᐃᑦ, ᑎᖑᖓᑕᓗ ᐃᒻᒧᑎᖓ ᑭᒃᓴᐅᑎ, ᑕᕐᑐᖏᒃ ᐲᕋᓱᐊᓕᕈᓂᒋᒃ ᑕᒪᓐᓇ ᐲᖃᓯᐅᑎᔭᒃᓴᕆᕚ.

¹⁶ ᑐᓂᕐᕈᓯᕐᑎᐅᑉ ᐃᑯᐊᓚᑎᑕᒃᓴᕆᕔᑦ ᑐᓂᕐᕈᓯᕐᕕᖕᒥ ᓂᕿᒃᓴᐅᖁᓪᓗᒋᑦ, ᑖᒃᑯᐊ ᐃᑯᐊᓚᑎᑦᓯᓂᒃᑯᑦ ᑐᓂᕐᕈᑎᒃᓴᐅᖕᒪᑕ, ᑎᐱᖓᓗ ᒪᒪᕐᓗᓂ ᑐᓐᓄᓕᒫᖏᒃ ᐊᑕᓂᐅᑉ ᐱᒋᕔᑦ.

¹⁷ ᑕᒪᓐᓇ ᑕᕝᕙ ᐱᖁᔭᖅ ᑭᖑᕚᕇᓄᑦ ᑭᖑᓪᓕᒃᓴᑦᑎᓐᓄᓪᓗ ᑐᕌᕐᑐᖅ, ᓇᓂ ᓄᓇᖃᕋᓗᐊᕈᕕᑦ ᓂᕆᔪᒃᓴᐅᓐᖏᓪᓚᑎᑦ ᑐᓐᓄᕐᒥᒃ ᐊᐅᖕᒥᒡᓘᓐᓃᑦ.’”