ᒨᓯᓯ ᐱᖓᔪᖏᑦ 27 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᖁᔧᑦ ᐊᑕᓂᕐᒧᑦ ᑐᓂᕐᕈᑏᑦ ᐱᓪᓗᒋᑦ

¹ ᐊᑕᓂᐅᑉ ᒨᓯᓯ ᐅᖃᐅᑎᕚ,

² “ᐃᓴᕆᐊᓕᒥᐅᑦ ᐅᖃᐅᑎᒃᑭᑦ, ᐃᓄᒃ ᐊᖏᕈᑎᒋᔭᒥᓂᒃ ᑐᓂᕐᕈᓯᕐᐸᑦ ᐊᑕᓂᕐᒧᑦ ᐃᓄᒃ ᑐᓂᔭᐅᓯᒪᑎᓪᓗᒍ, ᐃᓄᒃ ᐊᑭᓕᕐᑕᐅᔪᖅ ᕿᓚᕈᑦᔮᕐᑕᐅᔭᕆᐊᖃᕐᐳᖅ ᐊᑭᓪᓗᐊᖓᓂᒃ ᑮᓇᐅᔭᓂᒃ ᐊᑭᓕᕐᓗᒍ.

³ ᐊᖑᑦ ᐊᕐᕌᒍᖃᕐᑐᖅ 20ᒥᑦ 60ᒧᑦ ᐊᑭᖃᕆᐊᖃᕐᐳᖅ ᑮᓇᐅᔭᓂᒃ 50ᓂᒃ ᓯᐅᓪᕕᕆᓂᒃ, ᐃᑦᔪᕐᓁᑦᑐᕕᐅᑉ ᑮᓇᐅᔭᖏᑦ ᒪᓕᒡᓗᒋᑦ.

⁴ ᐊᕐᓇᕐᓕ ᐊᑭᖃᕆᐊᖃᕐᐳᖅ, ᑮᓇᐅᔭᓂᒃ 30ᓂᒃ ᓯᐅᓪᕕᕆᓂᒃ.

⁵ ᐃᓅᓱᒃᑐᖅ ᐊᕐᕌᒍᓕᒃ 5ᒥᑦ 20ᒧᑦ, ᑮᓇᐅᔭᓂᒃ 20ᓂᒃ ᓯᐅᓪᕕᕆᓂᒃ, ᑍᒫᓪᓗᐊᖅ ᐊᕐᕌᒍᓕᒃ ᐊᕐᓇᖅ ᐊᑭᖃᕆᐊᖃᕐᐳᖅ 10ᓂᒃ ᑮᓇᐅᔭᓂᒃ ᓯᐅᓪᕕᕆᓂᒃ.

⁶ ᐊᖑᑦ ᑕᖅᑭᓕᒃ ᐊᑕᐅᓯᕐᒥᒃ ᑕᓪᓕᒪᓂᒃ ᐊᕐᕌᒍᓕᒧᑦ ᑎᑭᓪᓗᒍ ᐊᑭᖃᕆᐊᖃᕐᐳᖅ ᑕᓪᓕᒪᓂᒃ ᑮᓇᐅᔭᓂᒃ ᓯᐅᓪᕕᕆᓂᒃ, ᐊᕐᓇᖅ ᑍᒫᓪᓗᐊᖅ ᐊᕐᕌᒍᓕᒃ ᐊᑭᖃᕆᐊᖃᕐᐳᖅ ᑮᓇᐅᔭᓂᒃ ᐱᖓᓱᓂᒃ ᓯᐅᓪᕕᕆᓂᒃ.

⁷ ᐃᓄᒃ ᐊᕐᕌᒍᖃᕐᐸᑦ 60ᓂᒃ ᐅᖓᑖᓄᓪᓗ, ᐊᖑᑕᐅᒃᐸᑦ ᐊᑭᖃᕆᐊᖃᕐᐳᖅ ᑮᓇᐅᔭᓂᒃ 15ᓂᒃ ᓯᐅᓪᕕᕆᓂᒃ, ᐊᕐᓇᐅᒃᐸᓪᓕ ᑍᒫᓪᓗᐊᖅ ᐊᕐᕌᒍᓕᒃ ᐊᑭᖃᕆᐊᖃᕐᐳᖅ ᑮᓇᐅᔭᓂᒃ 10ᓂᒃ ᓯᐅᓪᕕᕆᓂᒃ.

⁸ “ᓇᓪᓕᐊᑦ ᐊᖏᕈᑎᖃᕋᓱᐊᕐᑐᖅ ᐊᔪᕐᓴᓗᐊᕐᐸᑦ, ᐃᓅᓪᓗ ᐊᑭᒋᔭᕆᐊᖃᕐᑕᖓᓂᒃ ᐊᑭᓖᔪᓐᓇᕋᓂ, ᐃᓄᒃ ᐊᑭᓕᕈᒪᔭᓂ ᑐᓂᕐᕈᓯᕐᑎᑦᓯᔨᒧᑦ ᐱᑎᑕᒃᓴᕆᕚ, ᑐᓂᕐᕈᓯᕐᑎᑦᓯᔨ ᐊᑭᖓᓂᒃ ᐋᖅᑭᒃᓯᒐᔭᕐᒪᑦ ᑖᑦᓱᒪ ᐊᑭᓕᕈᓐᓇᕐᑕᖓᓂᒃ.

⁹ “ᐃᓅᑉ ᐊᖏᕈᑎᒋᔭᖓ ᓂᕐᔪᑎᐅᒃᐸᑦ, ᑐᓂᕐᕈᑎᒃᓴᐅᓗᓂ ᓈᒻᒪᑦᓯᐊᕐᓗᓂ ᐊᑕᓂᕐᒧᑦ, ᑍᒤᑦᑐᖅ ᐃᑦᔪᕐᓁᓕᕗᖅ ᐊᑕᓂᕐᒧᑦ.

¹⁰ ᑕᕝᕙ ᑕᐅᕐᓰᑎᑦᓴᕆᐊᖃᕈᓐᓃᕐᐹ ᐊᓯᐊᓂᒡᓘᓐᓃᑦ ᑭᖑᕝᕕᕆᐊᖃᕐᓇᒍ ᐱᐅᓂᕐᓴᒥᒃ ᐱᐅᖏᓐᓂᕐᓴᒥᒡᓘᓐᓂᑦ ᐱᖔᕈᒪᓗᓂ, ᑕᐅᕐᓰᑦᔪᑎᒋᒍᓂᐅᒃ ᓂᕐᔪᑎᒧᑦ ᐊᓯᐊᓄᑦ ᓂᕐᔪᑏᒃ ᑕᕝᕙ ᑕᒪᖏᒃ ᐃᑦᔪᕐᓁᓕᕘᒃ.

¹¹ ᐊᖏᕈᑎᒋᔭᐅᔪᖅ ᐆᒪᔪᖅ ᑐᓂᕐᕈᑎᒋᔭᐅᓂᕐᒧᑦ ᓴᓗᒤᑦᑑᒃᐸᑦ, ᐊᑕᓂᕐᒧᓪᓗ ᑐᓂᕐᕈᑕᐅᓇᓱᐊᕐᓗᓂ ᐃᓚᓕᐅᕐᑕᐅᒐᔭᖏᑉᐸᑦ, ᓂᕐᔪᑎ ᐋᑕᐅᔭᕆᐊᖃᕐᐳᖅ ᑐᓂᕐᕈᓯᕐᑎᑦᓯᔨᒧᑦ,

¹² ᑐᓂᕐᕈᓯᕐᑎᑦᓯᔨᐅᑉ ᖃᐅᔨᓴᕐᓗᓂᐅᒃ ᐅᖃᕆᐊᖃᕐᐳᖅ ᑐᓂᕐᕈᑎᒋᔭᐅᔪᓐᓇᕐᒪᖔᑦ ᑐᓂᕐᕈᑎᒃᓴᐅᖏᒻᒪᖔᓪᓘᓐᓃᑦ, ᑐᓂᕐᕈᓯᕐᑎᑦᓯᔨ ᖃᓄᖅ ᐅᖃᕐᐸᑦ ᑕᕝᕙ ᑍᒤᑦᓴᕆᐊᖃᕐᐳᖅ.

¹³ ᓂᕐᔪᑎᐅᑉ ᐃᓄᐊ ᐅᑎᕐᑎᑦᓯᔪᒪᒃᐸᑦ ᑖᑦᓱᒥᖓ, ᐊᑭᓖᔭᕆᐊᖃᕐᐳᖅ ᐊᑭᖓᑕ 20ᐳᓴᖓᓂᒃ.

¹⁴ “ᓇᓪᓕᐊᑦ ᐃᒡᓗᒥᓂᒃ ᑐᓂᓯᔪᒪᒃᐸᑦ ᐊᑕᓂᕐᒧᑦ, ᑐᓂᕐᕈᓯᕐᑎᑦᓯᔨ ᖃᐅᔨᓴᕆᐊᖃᕐᐳᖅ ᐃᒡᓗ ᐱᐅᖕᒪᖔᑦ ᐱᐅᖏᒻᒪᖔᓪᓘᓐᓃᑦ, ᑐᓂᕐᕈᓯᕐᑎᑦᓯᔨ ᑕᕝᕙ ᐊᑭᖓᓂᒃ ᐋᖅᑭᒃᓯᔭᕆᐊᖃᕋᔭᕐᐳᖅ, ᐊᑭᖃᕐᑎᑕᖓᑐᓪᓗ ᑍᒤᓕᕐᓗᓂ.

¹⁵ ᓇᓪᓕᐊᓪᓕ ᐃᒡᓗᒥᓂᒃ ᑐᓂᕐᕈᑎᖃᓚᐅᕐᓗᓂ, ᐅᑎᕐᑎᑦᓯᔪᒪᒃᐸᑦ 20ᐳᓴᖓᓂᒃ ᐊᑭᓕᒃᑲᓐᓂᕐᓗᓂᐅᒃ ᐅᑎᕐᑎᑦᓱᓐᓇᕐᐹ ᓇᖕᒥᓂᕆᓕᕐᒥᓗᓂᐅᒃ.

¹⁶ “ᐃᓄᒃ ᓄᓇᖁᑎᒥ ᐃᓚᖓᓂᒃ ᑐᓂᕐᕈᑎᖃᕐᐸᑦ ᐊᑕᓂᕐᒧᑦ, ᐊᑭᖓ ᐋᖅᑭᒃᑕᐅᔭᕆᐊᖃᕐᐳᖅ ᖃᓄᖅ ᐊᖏᑎᒋᔪᓂᒃ ᐱᕈᕐᓰᕕᐅᔪᓐᓇᕐᒪᖔᑦ, ᖁᓕᓂᒃ ᑮᓇᐅᔭᓂᒃ ᓯᐅᓪᕕᕆᓂᒃ 20ᑭᓗᒍᕌᒻᒥᒃ ᐅᖁᒤᓐᓂᓕᒃ ᓂᐊᖂᔭᒃᓴᖅ ᒪᓕᒡᓗᒍ.

¹⁷ ᓄᓇᖁᑎᒋᔭᐅᔪᖅ ᑐᓂᕐᕈᑎᒋᔭᐅᒃᐸᑦ ᐊᕐᕌᒍ ᓴᑐᕐᓯᕕᒃ ᓇᓪᓕᐅᑎᓚᐅᕐᑎᓪᓗᒍ, ᐊᑭᒋᓚᐅᕐᑕᖓ ᑍᒫᒃ ᓱᓕ ᓱᖁᓯᕋᔭᓐᖏᓚᖅ.

¹⁸ ᓄᓇ ᑐᓂᕐᕈᑎᒋᔭᐅᒃᐸᑦ ᐊᕐᕌᒎᑉ ᓴᑐᕐᓯᕕᐅᑉ ᑭᖑᓂᖓᓂ, ᑐᓂᕐᕈᓯᕐᑎᑦᓯᔨᐅᑉ ᐊᑭᖓ ᐋᖅᑭᖅᑳᕋᔭᕐᐹ ᐊᕐᕌᒍᑦ ᐅᓄᕐᓂᖏᑦ ᓴᑐᕐᓯᕕᖕᒧᑦ ᑎᑭᓪᓗᒋᑦ, ᐊᕐᕌᒍᑦ ᑖᒃᑯᐊ ᒪᓕᒡᓗᒋᑦ ᐊᑭᖃᓕᕋᔭᕐᐳᖅ.

¹⁹ ᑐᓂᕐᕈᓯᕐᑐᕕᓂᐅᓪᓕ ᓄᓇ ᐅᑎᕐᑎᑦᓱᒪᓕᕈᓂᐅᒃ, ᐊᑭᓪᓗᐊᖓᓂᒃ ᐊᒻᒪᓗ 20ᐳᓴᓐᒥᒃ ᐃᓚᓗᒍ ᓂᐅᕕᐊᕆᒃᑲᓐᓂᕈᓐᓇᕐᐹ ᓇᖕᒥᓂᕆᓕᕐᒥᓗᓂᐅᒡᓗ.

²⁰ ᐱᖃᕐᑐᕕᓂᐅᑉ ᓄᓇ ᐅᑎᕐᑎᖏᑉᐸᒍ, ᐅᕝᕙᓘᓐᓃᑦ ᐊᓯᐊᓄᑦ ᓂᐅᕕᐊᕆᔭᐅᒃᐸᑦ, ᐱᖃᕐᑐᕕᓂᐅᑉ ᓴᑐᕈᓐᓁᓪᓕᒐᔭᕐᐹ.

²¹ ᓄᓇ ᑍᒫᒃ ᑐᓂᕐᕈᑎᕕᓂᖅ ᓴᑐᕐᑕᐅᓯᒪᖏᑦᑐᖅ ᐊᕐᕌᒍ ᓴᑐᕐᓯᕕᒃ ᓇᓪᓕᐅᑎᒃᐸᑦ, ᓄᓇ ᑖᓐᓇ ᐃᑦᔪᕐᓁᑦᑑᓕᕐᐳᖅ, ᐊᑕᓂᕐᒧᓪᓗ ᑐᕌᓕᕐᓗᓂ; ᑐᓂᕐᕈᓯᕐᑎᑦᓯᔨᓂᑦ ᐱᒋᔭᐅᔭᕆᐊᖃᓕᕐᐳᖅ.

²² “ᐃᓄᒃ ᓄᓇᒥᒃ ᐱᕈᕐᓰᕕᖕᒥᒃ ᓂᐅᕕᐊᕆᕋᑖᕐᑕᒥᓂᒃ ᑐᓂᕐᕈᓯᕐᐸᑦ ᐊᑕᓂᕐᒧᑦ, ᐃᓚᒋᔭᖏᑕ ᓄᓇᖁᑎᖓᑕ ᐊᓯᐊᒍᑦ,

²³ ᑐᓂᕐᕈᓯᕐᑎᑦᓯᔨᐅᑉ ᐊᑭᖓ ᐋᖅᑭᒋᐊᖃᕐᐹ ᐊᕐᕌᒍ ᓴᑐᕐᓯᕕᒃ ᑎᑭᓪᓗᒍ, ᐃᓄᒃ ᑖᓐᓇ ᐊᑭᓖᔭᕆᐊᖃᕐᐳᖅ ᐅᓪᓗᒥ ᑕᕝᕙᓂ ᓄᓇᐅᑉ ᐊᑭᓪᓗᐊᖓᓂᒃ, ᑮᓇᐅᔭᓪᓗ ᐊᑕᓂᐅᑉ ᐱᖁᑎᒋᕔᑦ.

²⁴ ᐊᕐᕌᒍ ᓴᑐᕐᓯᕕᒃ ᓇᓪᓕᐅᑎᒃᐸᑦ, ᓄᓇ ᐱᕈᕐᓰᕕᒃ ᐅᑎᕐᑎᑕᐅᔭᕆᐊᖃᓕᕐᐳᖅ ᐱᖃᖅᑳᕐᑐᕕᓂᕐᒧᑦ, ᑭᖑᕚᖓᓄᓪᓘᓐᓂᑦ.

²⁵ “ᑮᓇᐅᔧᑦ ᒪᓕᒋᐊᖃᕐᐳᑦ ᐃᑦᔪᕐᓁᑦᑐᕕᐅᑉ ᑮᓇᐅᔭᖓ ᒪᓕᒡᓗᒍ.

²⁶ “ᓂᕐᔪᑎᐅᑉ ᕿᑐᕐᖓᕐᑖᕆᐅᕈᑎᖓ, ᐃᑦᔪᕐᓁᓕᑎᑕᐅᔪᓐᓇᓐᖏᓚᖅ, ᕿᑐᕐᖓᕐᑖᕐᖓᐅᑎᑦ ᐊᑕᓂᐅᑉ ᐱᒋᔭᕇᕐᒪᒍ, ᐃᒻᒧᒃᓯᐅᒐᕐᓘᓐᓃᑦ ᓰᐱᐅᒃᐸᓪᓘᓐᓃᑦ.

²⁷ ᓂᕐᔪᑎ ᓴᓗᒤᑦᑑᒃᐸᑦ ᐃᓄᐊᑕ ᐅᑎᕐᑎᑦᓱᓐᓇᕐᐹ ᐊᑭᒋᖁᔭᐅᓯᒪᔪᒥᒃ ᐊᑭᖃᕐᓗᓂ ᐃᓚᓗᒍᓗ 20ᐳᓴᓐᒥᒃ, ᐃᓄᐊᑕ ᐅᑎᕐᑎᑦᓱᒪᖏᑉᐸᒍ, ᓂᐅᕕᐊᖑᔪᓐᓇᕐᐳᖅ ᐊᑭᒋᖁᔭᐅᓯᒪᔪᒥᒃ ᐊᑭᖃᕐᓗᓂ.

²⁸ “ᐃᓄᒃ ᐱᖁᑎᒥᓂᒃ ᑐᓂᕐᕈᑎᖃᕐᐸ ᐊᑕᓂᕐᒧᑦ, ᐃᓄᖕᒥᒡᓘᓐᓃᑦ ᓂᕐᔪᑎᒥᒡᓘᓐᓃᑦ, ᓄᓇᒥᒡᓘᓐᓃᑦ, ᑕᒪᒃᑯᐊ ᓂᐅᕕᐊᖑᔪᓐᓇᓐᖏᓚᑦ ᐅᑎᕐᑎᑕᐅᔪᓐᓇᕋᑎᒡᓗ, ᑍᒤᑦᑐᑦ ᐃᑦᔪᕐᓁᑦᑑᓕᖃᑦᑕᕐᒪᑕ ᐊᑕᓂᐅᑉ ᐱᒋᓕᕐᒪᒋᑦ.

²⁹ ᐃᓄᒃ ᐊᑕᓂᕐᒧᑦ ᓱᓕᑦᓯᐊᕐᓗᓂ ᑐᓂᕐᕈᑎᒋᔭᐅᔪᖅ ᐅᑎᕐᑎᑕᐅᔪᓐᓇᓐᖏᓚᖅ, ᑖᓐᓇ ᑐᖁᑕᐅᔭᕆᐊᖃᕐᐳᖅ.

³⁰ “ᓱᓇᑐᐃᓐᓁᑦ ᓄᓇᒥᑦ ᐱᕈᕐᑐᑦ, ᓂᐊᖂᔭᒃᓮᑦ ᓱᓇᑐᐃᓐᓁᑦ, ᐸᐅᕐᖎᓪᓗ ᓇᐹᕐᑐᓂᑦ ᐱᔪᑦ ᑕᓪᓕᒪᐅᔪᖏᑦ ᐊᑕᓂᐅᑉ ᐱᒋᕔᑦ, ᑕᒪᒃᑯᐊ ᐃᑦᔪᕐᓁᑦᑑᕘᑦ ᐊᑕᓂᕐᒧᑦ.

³¹ ᐃᓄᒃ ᑕᓪᓕᒪᐅᔪᐃᕈᑎᒥᓂᒃ ᐅᑎᕐᑎᑦᓯᔪᒪᒃᐸᑦ ᐊᑭᒋᖁᔭᐅᓯᒪᔪᖅ ᒪᓕᒡᓗᒍ ᐊᑭᖃᕆᐊᖃᕐᐳᑦ ᐃᓚᒃᑲᓐᓂᕐᓗᒍᓗ 20ᐳᓴᓐᖓᓂᒃ.

³² ᓂᕐᔪᑎᑦ ᐆᒪᔪᑎᖁᑎᒋᔭᐅᔪᑦ ᓱᓇᑐᐃᓐᓇᐅᒃᐸᑕ ᑕᓪᓕᒪᐅᔪᖏᑦ ᐊᑕᓂᐅᑉ ᐱᒋᕔᑦ. ᓂᕐᔪᑎᑦ ᓈᓴᕐᑕᐅᒃᐸᑕ ᖁᓕᐅᓕᕌᖓᑕ ᐊᑕᐅᓯᖅ ᐃᑦᔪᕐᓁᑦᑑᓪᓗᓂ ᐊᑕᓂᐅᑉ ᐱᒋᕚ.

³³ ᓂᕐᔪᑎᖁᑎᖃᕐᑐᖅ ᐱᐅᓂᕐᓴᒥᒃ ᐱᐅᖏᓐᓂᕐᓴᒥᒡᓘᓐᓃᑦ ᓂᕈᐊᕐᑐᒃᓴᐅᓐᖏᓚᖅ ᐊᑕᓂᕐᒧᑦ ᑐᓂᕐᕈᑎᒃᓴᒥᒃ ᑕᐅᕐᓯᐅᑦᔨᒃᐸᓪᓕ, ᑕᒪᖏᒃ ᓂᕐᔪᑏᒃ ᐃᑦᔪᕐᓁᑦᑑᓕᕐᐴᒃ ᐅᑎᕐᑎᑕᐅᔭᕆᐊᖃᕈᓐᓁᕐᓗᑎᒡᓗ.”

³⁴ ᑕᒪᒃᑯᐊ ᑕᕝᕙ ᐱᖁᔧᑦ ᐊᑕᓂᐅᑉ ᒨᓯᓯᒧᑦ ᑐᓂᓚᐅᕐᑕᖏᑦ ᖃᖅᑲᒥ ᓮᓁᒥ ᐃᓴᕆᐊᓕᓄᑦ ᐃᓕᖓᖁᓪᓗᒋᑦ.