ᒨᓯᓯ ᐱᖓᔪᖏᑦ 24 - ᐊᒡᓔᑦ ᐃᑦᔪᕐᖕᓁᑦᑐᑦᓇᓂᕈᐊᕐᕕᖕᓂᒃ ᑲᒪᑦᓯᐊᕐᓂᖅ ᒨᓯᓯ ᐂᑉᐸᖏᑦ 27:20-21 1 ᐊᑕᓂᐅᑉ ᒨᓯᓯ ᐅᖃᕐᕕᒋᕚ, 2 “ᐃᓴᕆᐊᓕᒥᐅᑦ ᐱᖁᒃᑭᑦ ᕾᑦᓯᖁᓪᓗᒋᑦ ᓇᐹᕐᑑᑉ ᐅᕐᓱᖏᓐᓂᒃ ᑲᑭᐊᑦᓯᐊᕐᑐᓂᒃ ᑐᐱᕐᒥ ᐃᑦᔪᕐᓁᑦᑐᕕᖕᒥ ᓇᓂᕈᐊᑦ ᑍᒪᓐᖓᓕᒫᖅ ᐃᑯᒤᓐᓇᖁᓪᓗᒋᑦ. 3 ᑖᓗᑕᕐᔪᐊᑉ ᐊᖏᕈᑎᑕᓕᐅᑉ ᓯᓚᑖᓂᑦᑐᑉ ᓵᖓᓂ, ᑐᐱᐅᑉ ᐃᑦᔪᕐᓁᑦᑐᕕᐅᑉ ᐃᓗᐊᓃᑦᑐᖅ, ᑖᒃᑯᐊ ᓇᓂᕈᐊᕐᕖᑦ ᑕᒫᓂᑦᑐᑦ ᐂᕉᓂᐅᑉ ᑲᒪᒋᔭᕆᐊᖃᕐᐰᑦ ᐊᑕᓂᐅᑉ ᓵᖓᓂ, ᐅᓐᓄᖕᒥᑦ ᐅᓪᓛᒧᑦ ᑎᑭᓪᓗᒍ ᑍᒪᓐᖓᓕᒫᖅ. ᑕᒪᓐᓇ ᒪᓕᒐᖅ ᑲᔪᓰᓐᓇᕐᓂᐊᕐᐳᖅ ᑭᖑᕚᕇᓂᑦ ᑭᖑᕚᕇᓄᑦ. 4 ᓇᓂᕈᐊᑦ ᒎᓗᑦᓯᐊᕙᖕᒥᒃ ᓴᓇᓯᒪᔪᒥᒃ ᐃᓂᖃᕐᑐᑦ ᐊᑕᓂᐅᑉ ᓵᖓᓂ ᑍᒪᓐᖓᓕᒫᖅ ᑲᒪᒋᔭᐅᔭᕆᐊᖃᕐᐳᑦ.” ᓂᐊᖂᔭᑦ ᑐᓂᕐᕈᑕᐅᓯᒪᔪᑦ ᒎᑎᒧᑦ 5 “ᓂᐊᖂᔭᒥᒃ ᐅᖁᒤᓐᓂᖃᕐᑐᒥᒃ 12ᑭᓗᒍᕌᒻᒥᒃ ᓴᓇᔭᕆᐊᖃᕐᐳᓯ ᐸᓚᐅᒐᓕᐅᕐᓗᓯᓗ ᐆᓯᒪᔪᓂᒃ 12ᓂᒃ. 6 ᑖᒃᑯᐊ ᐃᓕᔭᒃᓴᕆᕙᓯ ᑐᑭᓕᕇᒃᓯᑎᓪᓗᒋᑦ ᒪᕐᕉᓗᑎᒃ ᓴᓂᓕᕇᑦ ᑐᑭᒧᑦ ᐱᖓᓲᔪᕐᑑᓗᑎᒃ. ᓵᑉ ᖄᖓᓂ ᒎᓗᑦᓯᐊᕙᖕᒥᒃ ᖄᓕᕐᓯᒪᔪᒧᑦ ᐊᑕᓂᐅᑉ ᓵᖓᓂ. 7 ᓂᐊᖂᔭᑦ ᑖᒃᑯᐊ ᑐᑭᓕᕇᑦ ᐃᓕᓯᕝᕕᒋᔭᕆᐊᖃᕐᐸᓯ ᐃᓯᕐᓗᐊᕐᓂᑎᑕᒃᓴᒥᒃ ᑎᐱᑦᓯᐊᕆᒃᑐᒥᒃ ᓇᓗᓁᒃᑯᑕᐅᖁᓪᓗᒍ ᐃᖅᑲᐅᒪᑦᔪᑎᒃᓴᒥᒃ ᑖᒃᑯᐊ ᐃᑯᐊᓪᓔᓂᒃᑯᑦ ᑐᓂᕐᕈᑕᐅᓯᒪᓂᖏᓐᓂᒃ ᐊᑕᓂᕐᒧᑦ. 8 ᓴᐸᑎ ᑕᒫᑦ, ᑍᒪᓐᖓᑦ, ᓂᐊᖂᔭᑦ ᐆᓯᒪᔪᑦ ᐃᓕᔭᐅᔭᕆᐊᖃᕐᐳᑦ ᐊᑕᓂᐅᑉ ᓵᖓᓄᑦ, ᐃᓴᕆᐊᓕᒥᐅᑦ ᐱᑦᔪᑎᒋᓗᒋᑦ. ᑕᒪᓐᓇ ᐃᓴᕆᐊᓕᒥᐅᑦ ᐊᖏᖃᑎᒌᒍᑎᒋᔭᒃᓴᕆᕚᑦ ᐃᓱᖃᖏᑦᑐᒧᑦ. 9 ᐂᕉᓂᓗ ᑭᖑᕚᖏᓪᓗ ᑭᓯᐊᓂ ᐃᑦᔪᕐᓁᑦᑐᕕᖕᒥ ᓂᕆᔪᓐᓇᕐᑐᑑᕗᑦ, ᑕᕝᕙᓂ ᑐᓂᕐᕈᑕᐅᔪᑦ ᐃᑦᔪᕐᓁᓐᓂᕐᐹᖑᖕᒪᑦ ᑖᒃᑯᐊᓗ ᓂᖀᑦ ᐃᑯᐊᓚᑦᓯᓂᒃᑯᑦ ᑐᓂᕐᕈᑕᐅᓯᒪᔪᑦ ᑐᓂᕐᕈᓯᕐᑎᑦᓯᔨᓄᑦ ᐃᑦᔪᕐᓁᓐᓂᕐᐹᖑᒪᑕ ᐊᑕᓂᕐᒧᑦ ᑐᓂᕐᕈᑕᐅᓯᒪᔪᓂᑦ.” ᓱᒋᐊᕐᑕᐅᓂᖅ ᐃᓗᐊᕐᑐᒥᒃ ᓈᒻᒪᓈᑦᓯᐊᕐᓯᒪᔪᒥᒡᓗ 10 ᐊᖑᑎᑕᖃᓚᐅᕐᐳ ᐃᓴᕆᐊᓕᒥᐅᑕᕐᒥᒃ ᐊᓈᓇᖃᕐᑐᒥᒃ ᐊᑖᑕᖃᕐᓗᓂ ᐄᑦᔨᑉᑎᒥᐅᑕᕐᒥᒃ ᐃᓴᕆᐊᓕᒥᐅᓂᑦ ᓄᓇᖃᑎᒋᔭᐅᓚᐅᕐᐳᖅ, ᑖᓐᓇ ᐂᕙᖃᑎᖃᓕᕐᐳᖅ ᐃᓴᕆᐊᓕᒥᒃ. 11 ᐊᖑᑦ ᑖᓐᓇ ᐃᓴᕆᐊᓕᒥᐅᑕᕐᒥᒃ ᐊᓈᓇᖃᕐᑐᖅ ᒎᑎᒥᒃ ᐅᖃᕐᓂᕐᓘᑎᖃᕐᐳᖅ ᓱᐊᒃᓗᓂᓗ; ᒨᓯᓯᒧᐊᕐᑕᐅᓚᐅᕐᐳᕐᓗ. (ᑖᑦᓱᒪ ᐊᓈᓇᖓ ᓯᓗᒥᑎᒥᒃ ᐊᑎᖃᕐᐳᖅ, ᑎᑉᕆᐅᑉ ᐸᓂᐊ ᑖᓂᐅᑉ ᑭᖑᕚᖏᑕ ᐃᓚᖓᑦ.) 12 ᑖᓐᓇ ᑎᒍᔭᐅᓯᒪᕕᖕᒨᕐᑕᐅᓚᐅᕐᐳᖅ, ᐅᑕᖅᑭᓪᓗᑎᒃ ᐊᑕᓂᕐᒥᑦ ᖃᓄᖅ ᓇᓗᓁᕐᓯᕕᐅᓂᐊᕐᓂᕐᒥᖕᓂᒃ. 13 ᐊᑕᓂᐅᑉ ᒨᓯᓯ ᐅᖃᐅᑎᕚ: 14 “ᐅᖃᕐᓂᕐᓗᒃᓯᒪᔪᖅ ᓄᓇᓖᑦ ᓯᓚᑖᓄᐊᓯᐅᒃ. ᑐᓵᓚᐅᕐᑐᓕᒫᑦ ᓱᐊᒃᑎᓪᓗᒍ ᐅᖃᕐᓂᕐᓗᒃᑎᓪᓗᒍᓗ ᒎᑎᒥᒃ, ᓂᐊᖁᐊᒍᑦ ᐸᑎᒻᒥᔭᒃᓴᕆᕙᑦ ᐸᓯᔭᒃᓴᐅᓂᖓ ᓇᓗᓁᕐᓗᒍ, ᓄᓇᖃᑎᒌᓪᓗ ᐅᔭᖅᑲᓄᑦ ᒥᓪᓗᕐᓗᒍ ᑐᖁᑕᒃᓴᕆᕚᑦ.” 15 ᐃᓴᕆᐊᓕᒥᐅᑦ ᐅᖃᐅᑎᒃᑭᑦ: “ᓇᓪᓕᐊᑦ ᒎᑎᒥᓂᒃ ᓇᕐᕈᓇᕐᓂᕅᔪᖅ, ᑖᓐᓇ ᐸᓯᔭᒃᓴᐅᓂᐊᕐᐳᖅ. 16 ᓇᓪᓕᐊᑦ ᐊᑕᓂᐅᑉ ᐊᑎᖓᓂᒃ ᐅᖃᕐᓂᕐᓘᑎᖃᕐᑐᖅ ᑐᖁᑕᒃᓴᐅᕗᖅ ᓄᓇᖃᑎᒌᓪᓗ ᐅᔭᖅᑲᓄᑦ ᒥᓪᓗᕐᑕᒃᓴᕆᕚᑦ. ᐃᓴᕆᐊᓕᒥᐅᖑᒃᐸᓪᓘᓐᓃᑦ ᐃᓴᕆᐊᓕᒥᐅᖑᖏᑉᐸᓪᓘᓐᓃᑦ, ᐊᑕᓂᐅᑉ ᐊᑎᖓᓂᒃ ᐅᖃᕐᓂᕐᓘᑎᖃᕐᐸᑦ ᑐᖁᑕᒃᓴᐅᕗᖅ. 17 “ᓇᓪᓕᐊᑦ ᐃᓅᖃᑎᒥᓂᒃ ᑐᖁᑦᓯᔪᖅ ᑐᖁᑕᒃᓴᐅᕗᖅ. 18 ᓇᓪᓕᐊᓪᓗ ᐃᓅᖃᑎᒥ ᐆᒪᔪᖁᑎᖓᓂᒃ ᑐᖁᑦᓯᔪᖅ, ᑖᓐᓇ ᑭᖑᕝᕕᕐᑕᒃᓴᕆᕚ ᐃᓅᓯᖅ ᐃᓅᓯᕐᒥᒃ ᐊᑭᖃᕆᐊᖃᕐᒪᑦ. 19 “ᓇᓪᓕᐊᑦ ᐱᕕᒃᔪᐊᒥᒃ ᐋᓐᓃᔪᖅ ᐃᓅᖃᑎᒥᓂᒃ, ᑍᒫᓪᓗᐊᑦᓯᐊᖅ ᐊᑭᔭᐅᔭᕆᐊᖃᕐᐳᖅ. 20 ᓴᐅᓂᖅ ᓇᑲᑉᐸᒍ, ᓇᑲᑦᓯᔪᖅ ᑍᒫᓪᓗᐊᖅ ᓴᐅᓂᖓ ᓇᑲᑕᐅᔭᕆᐊᖃᕆᕗᖅ, ᐃᔨ ᐃᔨᒥᒃ ᐊᑭᖃᕆᐊᖃᕐᐳᖅ, ᑭᒍᑎ ᑭᒍᑎᒥᒃ ᐊᑭᖃᕆᐊᖃᕐᐳᖅ. ᐋᓐᓃᔪᖃᕐᐸᑦ ᐊᓯᒥᓂᒃ ᑍᒫᓪᓗᐊᖅ ᑖᓐᓇ ᐋᓐᓂᕐᑕᐅᔭᕆᐊᖃᕐᐳᖅ. 21 ᓇᓪᓕᐊᑦ ᐆᒪᔪᖁᑎᒋᔭᐅᔪᒥᒃ ᑐᖁᑦᓯᒃᐸᑦ, ᑖᓐᓇ ᐊᑦᔨᖓᓂᒃ ᑭᖑᕝᕕᕐᑕᒃᓴᕆᕚ, ᐃᓄᖕᒥᒡᓕ ᑐᖁᑦᓯᔪᖅ ᑖᓐᓇ ᑐᖁᑕᒃᓴᐅᕗᖅ. 22 ᐊᑦᔨᒌᒥᒃ ᐱᖁᔭᖃᕆᐊᖃᕐᐳᓯ ᐃᓴᕆᐊᓕᒥᐅᖑᒃᐸᑦ ᐊᓯᐊᓂᒥᐅᑕᐅᒃᐸᓪᓘᓐᓃᑦ ᐃᓕᑦᓯᓐᓂ ᓄᓇᖃᖃᑕᐅᔪᓕᒫᑦ ᐅᕙᖓ ᐊᑕᓂᐅᒐᒪ ᒎᑎᓯ.” 23 ᒨᓯᓯ ᑕᒪᑐᒥᖓ ᐅᖃᐅᓯᖃᓚᐅᕐᑎᓪᓗᒍ ᐃᓴᕆᐊᓕᒥᐅᓄᑦ, ᑍᓐᓇ ᒎᑎᒥᒃ ᐅᖃᕐᓂᕐᓘᑎᖃᕐᓯᒪᔪᖅ ᓄᓇᓕᖕᓂᑦ ᐊᓂᑎᓚᐅᕐᐹᑦ, ᐅᔭᖅᑲᓄᓪᓗ ᒥᓪᓗᕐᓗᒍ ᑐᖁᑉᐹᑦ. ᑍᒫᒃ ᐃᓴᕆᐊᓕᒥᐅᑦ ᐊᑕᓂᐅᑉ ᐱᖁᔭᖓᓂᒃ ᐊᑑᑎᑦᓯᐊᓚᐅᕐᐳᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society