ᒨᓯᓯ ᐱᖓᔪᖏᑦ 23 - ᐊᒡᓔᑦ ᐃᑦᔪᕐᖕᓁᑦᑐᑦᐅᒃᐱᕐᓂᕐᒧᑦ ᓇᓪᓕᐅᓐᓂᕐᓯᐅᕐᓃᑦ 1 ᐊᑕᓂᐅᑉ ᒨᓯᓯ ᐃᒫᒃ ᐅᖃᐅᑎᕚ, 2 “ᐃᓴᕆᐊᓕᒥᐅᑦ ᐅᖃᐅᑎᒃᑭᑦ; ᒪᓕᒊᑦ ᐅᑯᐊ ᐊᑐᕐᑕᐅᔭᕆᐊᖃᕐᐳᑦ ᐅᒃᐱᕐᓂᕐᒥ ᓇᓪᓕᐅᓐᓂᕐᓯᐅᕐᓃᑦ ᐱᓪᓗᒋᑦ, ᐃᓴᕆᐊᓕᒥᐅᑦ ᑲᑎᕝᕕᒋᕙᒃᑕᖏᓐᓂ ᑐᒃᓯᐊᖃᑎᒌᖕᓂᕐᒧᑦ. 3 ᐅᓪᓗᓂᒃ 6ᓂᒃ ᐱᓇᓱᐊᕐᕕᒃᓴᖃᕐᐳᓯ, ᐅᓪᓗᐃᓪᓕ 7ᖓᑦ ᓴᐸᑎᐅᕗᖅ ᑕᕾᕐᓯᕐᕕᒃ, ᐅᓪᓗᖅ ᑖᓐᓇ ᑐᒃᓯᐊᕐᓂᕐᒧᑦ ᑲᑎᒪᕕᒃᓴᐅᕗᖅ. ᓱᓇᒥᒡᓘᓐᓃᑦ ᓴᓇᔪᒃᓴᐅᓐᖏᓚᑎᑦ; ᓇᓂᑐᐃᓐᓇᖅ ᓄᓇᖃᕋᓗᐊᕈᕕᑦ, ᐊᑕᓂᐅᑉ ᓴᐸᑎᒋᖕᒪᒍ. 4 ᐅᑯᐊ ᑕᕝᕙ ᐊᑕᓂᐅᑉ ᓇᓪᓕᐅᓐᓂᕐᓯᐅᕐᕕᐅᖁᔭᖏᑦ, ᑐᒃᓯᐊᖃᑎᒌᖕᓂᕐᒧᑦ ᑲᑎᒪᕝᕕᐅᖁᓪᓗᒋᑦ ᐅᖃᐅᓯᕆᔭᕆᐊᖃᕐᐸᓯ ᓇᓪᓕᐅᑎᔭᕌᖓᑕ.” ᖄᖏᕐᑕᐅᕕᒃ ᐳᕙᓪᓚᕐᓴᐅᑎᖃᖏᑦᑐᓂᒡᓗ ᓂᐊᖂᔭᕐᑐᕕᒃ ᒨᓯᓯ ᓯᑕᒪᖏᑦ 28:16-25 5 ᖄᖏᕐᑕᐅᕕᒃ, ᐱᒋᐊᓲᖑᕗᖅ ᐅᓪᓛᒃᑯᑦ ᖃᐅᒻᒪᓕᕐᑎᓪᓗᒍ ᐅᓪᓗᐃᑦ 14ᖓᓂ ᑕᖅᑮᓪᓗ ᓯᕗᓪᓕᕐᐹᖓᓂ. 6 ᐅᓪᓗᐃᑦ 15ᖓᓂ ᑕᖅᑭᒥ ᑕᕝᕙᓂ ᐊᑕᓂᐅᑉ ᓇᓪᓕᐅᓐᓂᕐᓯᐅᕐᕕᐅᑎᑕᖓ ᐳᕙᓪᓚᕐᓴᐅᑎᖃᖏᑦᑐᒥ ᓂᐊᖂᔭᕐᑐᕐᕕᒃ ᐱᒋᐊᕐᓂᖃᕐᐳᖅ; ᐅᓪᓗᓂᒃ 7ᓂᒃ ᓂᐊᖂᔭᕐᑐᖃᑦᑕᕆᐊᖃᕐᐳᓯ ᐳᕙᓪᓚᕐᓴᐅᑎᖃᖏᑦᑐᓂᒃ. 7 ᑖᒃᑯᐊ ᐅᓪᓗᐃᑦ ᓯᕗᓪᓕᕐᐹᖓᓂᒃ ᑐᒃᓯᐊᖃᑎᒌᖕᓂᕐᒧᑦ ᑲᑎᒪᔭᕆᐊᖃᕐᐳᓯ, ᖃᐅᑕᒫᕐᓯᐅᑎᑦᓯᓐᓂᒡᓗ ᐱᓇᓱᐊᕆᐊᖃᓐᖏᓚᓯ. 8 ᐅᓪᓗᓂᒡᓗ 7ᓂᒃ ᑖᒃᑯᓇᓂ ᖃᐅᑕᒫᑦ ᐃᑯᐊᓚᑦᓯᓂᒃᑯᑦ ᑐᓂᕐᕈᓯᖃᑕᕆᐊᖃᕐᐳᓯ ᐊᑕᓂᕐᒧᑦ. ᐅᓪᓗᐃᓪᓗ 7ᖓᓂ ᑲᑎᒪᔭᕆᐊᖃᕐᐳᓯ ᑐᒃᓯᐊᖃᑎᒌᒃᓗᓯ, ᖃᐅᑕᒫᑦ ᐱᓇᓱᐊᒐᕆᕙᒃᑕᑦᓯᓐᓂᑦ ᓄᖅᑲᖓᓗᓯ. 9 ᐊᑕᓂᐅᑉ ᒨᓯᓯ ᐅᖃᐅᑎᕚ, 10 “ᐃᓴᕆᐊᓕᒥᐅᑦ ᐅᖃᐅᑎᒃᑭᑦ, ‘ᓄᓇᒧᑦ ᐃᓕᑦᓯᓐᓄᑦ ᐊᖏᕈᑎᒋᓯᒪᔭᓐᓄᑦ ᑎᑭᓯᒪᓕᕈᑦᓯ ᐱᕈᕐᓯᐊᓂᒡᓗ ᓂᕿᒃᓴᓂᒃ ᑲᑎᕐᓱᐃᓕᕌᖓᑦᓯ, ᑲᑎᕐᓱᕐᑕᓯ ᕿᓚᒃᓯᒪᔪᐃᑦ ᓯᕗᓪᓕᕐᐹᑦ ᑐᓂᔭᒃᓴᕆᕙᓯ ᑐᓂᕐᕈᓯᕐᑎᑦᓯᔨᒧᑦ. 11 ᑐᓂᕐᕈᓯᕐᑎᑦᓯᔨᐅᑉ ᑐᓂᕐᕈᑎᒋᔭᕆᐊᖃᕐᐹ ᐊᑕᓂᕐᒧᑦ, ᐃᓚᓕᐅᕐᑕᐅᖁᓪᓗᒍ ᐱᑦᔪᑎᒋᓪᓗᑎᑦ. ᑐᓂᕐᕈᓯᕐᑎᑦᓯᔨᐅᑉ ᑐᓂᕐᕈᑎᒋᔭᒃᓴᕆᕚ ᐅᓪᓗᒥ ᓴᐸᑎᐅᑉ ᑭᖑᓂᑦᓯᐊᖓᓂ. 12 ᐅᓪᓗᒥ ᑕᕝᕙᓂ ᐱᕈᕐᑐᓂᒃ ᑐᓂᕐᕈᑎᖃᕕᑦᓯᓐᓂ, ᑐᓂᕐᕈᓯᕆᐊᖃᕐᐳᓯ ᐆᑕᒃᓴᒥᒃ ᐊᑕᓂᕐᒧᑦ ᓰᐱᐅᑉ ᓄᕐᕋᖓᓂᒃ ᐊᕐᕌᒍᖃᕐᑐᒥᒃ ᐊᑕᐅᓯᕐᒥᒃ ᖃᓄᐃᓐᓂᖃᖏᑦᓯᐊᕐᑐᒥᒃ. 13 ᐃᓚᓗᒍ ᓂᐊᖂᔭᒥᒃ ᐅᖁᒤᓐᓂᖃᕐᑐᒥᒃ 2ᑭᓗᒍᕌᒻᒥᒃ ᐸᐅᕐᖎᑦ ᐅᕐᓱᖓᓂᒃ ᐃᓚᓗᒍ, ᑖᒃᑯᐊ ᑐᓂᔭᐅᔭᕆᐊᖃᕐᐳᖅ ᐃᑯᐊᓚᑦᓯᓂᒃᑯᑦ, ᑎᐱᖓ ᐊᑕᓂᐅᑉ ᒪᒪᕆᖕᒪᒍ. ᐃᓚᖃᕆᐊᖃᕆᕗᖅ ᐃᒥᒐᒃᓴᒥᒃ ᑐᓂᕐᕈᑎᒥᒃ ᕔᓂᒥᒃ 1ᓖᑕᒥᒃ ᐊᖏᓂᖃᕐᑐᒥᒃ. 14 ᓂᐊᖂᔭᒥᒃ ᖃᓄᐃᑦᑐᑐᐃᓐᓇᕐᒥᒃ ᓂᕆᔭᕆᐊᖃᓐᖏᓚᓯ, ᐃᒐᐅᑉ ᐃᓗᐊᒍᑦ ᐆᓯᒪᔪᒥᒡᓘᓐᓃᑦ, ᓄᑖᒥᒡᓘᓐᓃᑦ ᐱᕈᕇᕐᑐᒥᒃ, ᐅᓪᓗᒥ ᑭᓯᐊᓂ ᑕᕝᕙᓂ ᒎᑎᒧᑦ ᑐᓂᕐᕈᓯᕐᕕᒋᔭᑦᓯᓐᓂ ᓂᕆᔪᓐᓇᕐᓯᖃᑦᑕᕐᓂᐊᕐᐳᓯ. ᑖᓐᓇ ᒪᓕᒐᖅ ᐊᑐᕐᑕᐅᖏᓐᓇᖃᑦᑕᕆᐊᓕᒃ ᑍᒪᓐᖓᓕᒫᖅ ᑭᖑᕚᑦᓯᓐᓄᑦ, ᓇᓂᑐᐃᓐᓇᖅ ᓄᓇᖃᕋᓗᐊᕈᑦᓯ.’” ᐱᕈᕐᑐᓂᒃ ᓂᕿᒃᓴᓂᒃ ᑲᑎᕐᓱᐃᕕᖕᒥ ᓇᓪᓕᐅᓐᓂᕐᓯᐅᕐᓂᖅ ᒨᓯᓯ ᓯᑕᒪᖏᑦ 28:26-31 15 “ᐅᓪᓗᒥᒃ ᐊᑕᐅᓯᕐᒥᑦ ᓴᐸᑎᐅᑉ ᑭᖑᓂᖓᓂ, ᑐᓂᕐᕈᓯᓚᐅᕐᑎᓪᓗᓯ ᐱᕈᕐᑐᓂᒃ ᓂᕿᒃᓴᓂᒃ, ᐱᓇᓱᐊᕈᓯᕐᓂᒃ 7ᓗᐊᑦᓯᐊᓂᒃ ᓈᓴᐃᔪᒃᓴᐅᕗᓯ. 16 ᐅᓪᓗᐃᑦ 50ᖓᓐᓂᒃ, ᑖᒃᑯᐊ ᐱᓇᓱᐊᕈᓰᑦ 7 ᑭᖑᓂᖓᓂ ᓴᐸᑎᐅᑉ ᓯᕗᓪᓕᕐᐹᑉ ᖃᐅᑐᐃᓐᓇᖓᓂ, ᑐᓂᕐᕈᓯᕐᑐᒃᓴᐅᕗᓯ ᐊᑕᓂᕐᒧᑦ ᐱᕈᕐᑐᓂᒃ ᓂᐊᖂᔭᒃᓴᓂᒃ ᓄᑖᓂᒃ. 17 ᓇᓂᑐᐃᓐᓇᖅ ᓄᓇᖃᕋᓗᐊᕈᕕᑦ, ᒪᕐᕉᖕᓂᒃ ᓂᐊᖂᔭᖕᓂᒃ ᐆᓯᒪᔫᖕᓂᒃ ᑐᓂᕐᕈᓯᕆᐊᖃᕐᐳᓯ ᐊᑕᓂᕐᒧᑦ ᑐᓂᕐᕈᓯᕐᓂᐅᑉ ᓴᓂᐊᒍᑦ. ᐆᓯᒪᔫᒃ ᑖᒃᑯᐊᒃ ᓴᓇᓯᒪᔭᕆᐊᖃᕐᐴᒃ ᓂᐊᖂᔭᒥᑦ ᐅᖁᒤᓐᓂᖃᕐᑐᒥᒃ 2ᑭᓗᒍᕌᒻᒥᒃ ᐳᕙᓪᓚᕐᓴᐅᑎᖃᕐᓗᓂᓗ ᑐᓂᕐᕈᑎᒋᔭᐅᔭᕆᐊᖃᕐᐴᒃ ᐱᕈᕐᑐᑦ ᓂᕿᒃᓮᑦ ᓯᕘᓪᓕᕐᐹᑦ ᑐᓂᕐᕈᑕᐅᓂᖏᓐᓂ ᐊᑕᓂᕐᒧᑦ. 18 ᑖᒃᑯᐊ ᓂᐊᖂᔭᑦ ᑐᓂᕐᕈᑕᐅᔪᑦ ᐃᓚᖃᕆᐊᖃᕐᐳᑦ ᓰᐱᐅᑉ ᓄᕐᕋᖏᓐᓂᒃ ᐊᖑᑎᓂᒃ 7ᓂᒃ, ᐊᑐᓂᑦ ᐊᕐᕌᒍᖃᕐᓗᑎᒃ ᐊᑕᐅᓯᕐᒥᒃ ᖃᓄᐃᓐᓂᖃᖏᑦᓯᐊᕐᓗᑎᒃ, ᐃᓚᖃᕐᒥᓗᑎᒃ ᐃᒻᒧᒃᓯᐅᒐᐅᑉ ᐸᖕᓂᖓᓂᒃ ᐊᑕᐅᓯᕐᒥᒃ ᐃᓐᓇᒻᒪᕆᐅᖏᑦᑐᒥᒃ, ᓰᐱᐅᓪᓗ ᐊᖑᓴᓪᓗᖏᖕᓂᒃ ᒪᕐᕉᖕᓂᒃ. ᑖᒃᑯᐊ ᐊᑕᓂᕐᒧᑦ ᐃᑯᐊᓚᑦᓯᓂᒃᑯᑦ ᑐᓂᕐᕈᑎᒋᔭᐅᔭᕆᐊᖃᕐᐳᑦ, ᓂᐊᖂᔭᑦ ᕔᓃᓪᓗ ᑐᓂᕐᕈᑕᐅᖃᓯᐅᑎᓗᑎᒃ, ᐃᑯᐊᓪᓚᒡᓗᒋᑦ, ᑖᒃᑯᐊ ᑎᐱᖏᑦ ᐊᑕᓂᐅᑉ ᒪᒪᕆᖕᒪᒋᑦ. 19 ᓱᓕ ᑐᓂᕐᕈᓯᒃᑲᓐᓂᕆᐊᖃᕆᕗᓯ ᒎᑦᓯᒥᒃ ᐊᖑᓴᓪᓗᕐᒥᒃ ᐊᑕᐅᓯᕐᒥᒃ, ᐊᔪᕐᓃᑦ ᐱᑦᔪᑎᒋᓪᓗᒋᑦ, ᒪᕐᕉᖕᓂᒡᓗ ᓰᐱᐅᑉ ᓄᕐᕋᖏᖕᓂᒃ ᐊᑕᐅᓯᕐᒥᒃ ᐊᕐᕌᒍᖃᕐᑑᖕᓂᒃ ᐃᓚᒋᔭᐅᑦᓯᐊᕐᓂᖅ ᐱᑦᔪᑎᒋᓪᓗᒍ. 20 ᑐᓂᕐᕈᓯᕐᑎᑦᓯᔨ ᑐᓂᕐᕈᓯᕐᑎᑦᓯᔭᕆᐊᖃᕐᐳᖅ ᓰᐱᐅᑉ ᓄᕐᕋᖏᖕᓂᒃ ᒪᕐᕉᖕᓂᒃ, ᐃᓚᖃᕐᓗᑎᒃ ᓂᐊᖂᔭᒥᒃ ᓂᕿᒃᓮᑦ ᐱᕈᕐᑐᑦ ᓯᕗᓪᓕᕐᐹᖏᓐᓂᒃ. ᑖᒃᑯᐊ ᐊᑕᓂᕐᒧᑦ ᑐᓂᕐᕈᑏᑦ ᐃᑦᔪᕐᓁᑦᑑᕗᑦ. 21 ᐅᓪᓗᒥ ᑕᕝᕙᓂ ᑍᒤᓕᐅᕐᕕᒋᔭᑦᓯᓐᓂ ᑲᑎᒪᔭᕆᐊᖃᕐᐳᓯ ᑐᒃᓯᐊᖃᑎᒌᒃᓗᓯ ᖃᐅᑕᒫᕐᓯᐅᑎᓂᒃ ᐱᓇᓱᐊᒐᕐᓂᑦ ᓄᖅᑲᖓᓗᓯ. ᑕᒪᓐᓇ ᒪᓕᒐᖅ ᐃᓕᖓᓂᐊᕐᒪᑦ ᑍᒪᓐᖓᓕᒫᒧᑦ, ᓇᓂᑐᐃᓐᓇᖅ ᓄᓇᖃᕋᓗᐊᕈᑦᓯ. 22 “ᐱᕈᕐᑐᓂᒃ ᓂᕿᒃᓴᓂᒃ ᑲᑎᕐᓱᐃᓕᕌᖓᑦᓯ, ᐱᕈᕐᓰᕕᑦᓯ ᓯᓈᓃᑦᑐᑦ ᑲᑎᕐᓱᕐᓂᐊᕋᓯᒋᑦ, ᑲᑎᕐᓱᐃᓗᓯᓗ ᓇᑲᓐᖏᑕᓯ ᐅᑎᕐᕕᒋᓂᐊᕋᓯᒋᒃ. ᑕᒪᒃᑯᐊ ᐊᔪᕐᓴᕐᑐᓄᑦ ᓄᓇᑐᖃᖃᖏᑦᑐᓄᓪᓗ ᐊᒥᐊᒃᑯᒋᔭᕆᐊᖃᕐᐸᓯ. ᐅᕙᖓ ᐊᑕᓂᐅᒐᒪ ᐃᓕᑦᓯ ᒎᑎᓯ.” ᐊᕐᕌᒍᒥᒃ ᓄᑖᒥᒃ ᓇᓪᓕᐅᓐᓂᕐᓯᐅᕐᕕᒃ ᒨᓯᓯ ᓯᑕᒪᖏᑦ 29:1-6 23 ᐊᑕᓂᐅᑉ ᒨᓯᓯ ᐅᖃᐅᑎᕚ, 24 “ᐃᓴᕆᐊᓕᒥᐅᑦ ᐅᖃᐅᑎᒃᑭᑦ: ᐅᓪᓗᐃᑦ ᓯᕗᓕᕐᐸᖓᓂ ᑕᖅᑮᑦ 7ᖓᓐᓂ ᑕᕾᕐᓯᕕᖃᕆᐊᖃᕐᐳᓯ, ᑲᑎᒪᔭᕆᐊᖃᕐᐳᓯᓗ ᑐᒃᓯᐊᖃᑎᒌᖕᓂᕐᒧᑦ, ᑎᑦᑐᓚᐅᑏᑦ ᓂᓪᓕᕐᐸᑕ. 25 ᖃᐅᑕᒫᕐᓯᐅᑎᑦᓯᓐᓂᒃ ᐱᓇᓱᐊᒐᕐᓂᒃ ᓄᖅᑲᖓᔪᒃᓴᐅᕗᓯ, ᑐᓂᕐᕈᑎᒃᓴᓂᒡᓗ ᐃᑯᐊᓚᑎᑕᒃᓴᓂᒃ ᑐᓂᕐᕈᓯᕐᑐᒃᓴᐅᕗᓯ ᐊᑕᓂᕐᒧᑦ.” ᐅᓪᓗᖅ ᐊᔪᕐᓂᒥᑦ ᐃᓱᒪᒋᔪᓐᓁᕐᑕᐅᕕᒃ ᒨᓯᓯ ᓯᑕᒪᖏᑦ 29:7-11 26 ᐊᑕᓂᐅᑉ ᒨᓯᓯ ᐅᖃᐅᑎᕚ, 27 “ᐅᓪᓗᐃᑦ ᖁᓕᖓᓂ ᑕᕝᕙᓂ ᑕᖅᑮᑦ 7ᖓᓐᓂ ᐊᕐᕌᒍᑕᒫᕐᓯᐅᑦ ᐊᔪᕐᓂᕐᓂᑦ ᐃᓱᒪᒋᔪᓐᓁᕐᑕᐅᕕᒃ ᓇᓪᓕᐅᑎᕗᖅ, ᑲᑎᒪᓗᓯ ᑐᒃᓯᐊᖃᑎᒌᒋᑦᓯ ᓂᕆᑦᑍᓕᓗᓯᓗ, ᐊᑕᓂᕐᒧᓪᓗ ᑐᓂᕐᕈᓯᕐᓗᓯ ᐃᑯᐊᓚᑦᓯᓂᒃᑯᑦ. 28 ᐅᓪᓗᒥ ᑕᕝᕙᓂ ᐱᓇᓱᐊᕆᐊᖃᓐᖏᓚᓯ ᖃᐅᑕᒫᑦ ᐱᓇᓱᐊᕐᐸᒃᑕᑦᓯᓐᓂᒃ, ᑖᓐᓇ ᐅᓪᓗᖅ ᐊᔪᕐᓂᕐᓂᑦ ᐃᓱᒪᒋᔪᓐᓁᕐᑕᐅᕕᐅᖕᒪᑦ, ᐊᔪᕐᓂᓯ ᐃᓱᒪᒋᔪᓐᓁᕐᑕᐅᖕᒪᑕ ᐊᑕᓂᐅᑉ ᒎᑎᓯ ᓵᖓᓂ. 29 ᓇᓪᓕᐊᑦ ᓂᕆᔪᖅ ᐅᓪᓗᒥ ᑕᕝᕙᓂ ᐃᓅᖃᑎᒋᔭᐅᓂᕐᒥᑦ ᐊᕕᑕᐅᔭᕆᐊᖃᕐᐳᖅ. 30 ᐅᕙᖓᓗ ᐊᓯᕈᐃᓂᐊᕐᐳᖓ ᐃᓅᖃᑎᒌᓂᑦ ᑕᕝᕙᓐᖓᑦ ᓇᓪᓕᐊᓐᓂᒃ ᓴᓇᔪᖃᕐᐸᑦ ᐅᓪᓗᒥ ᑕᕝᕙᓂ. 31 ᑕᕝᕙᓂ ᓴᓇᔪᒃᓴᐅᓐᖏᓚᓯ ᓱᓇᒥᒡᓘᓐᓃᑦ. ᑕᒪᓐᓇ ᒪᓕᒐᖅ ᑍᒪᓐᖓᓕᒫᖅ ᐊᑐᕐᓂᐊᕐᐳᖅ ᑭᖑᕚᑦᓯᓐᓄᓪᓗ, ᓇᓂᑐᐃᓐᓇᖅ ᓄᓇᖃᕋᓗᐊᕈᑦᓯ. 32 ᐅᓪᓗᖅ ᑖᓐᓇ ᓴᐸᑎᐅᖕᒪᑦ ᑕᕾᕐᓯᕕᒃ ᐃᓕᑦᓯ ᐱᓪᓗᓯ. ᑕᕝᕙᓂ ᓂᕆᔭᕆᐊᖃᓐᖏᓚᓯ. ᐅᓪᓗᐃᑦ 9ᖓᓂᑦ ᐅᓐᓄᒃᑐᒥᑦ ᐱᒋᐊᕐᓗᒍ ᑖᓐᓇ ᐅᓪᓗᖅ ᐅᓐᓄᖓᓄᑦ ᐃᓱᖃᕐᓗᒍ, ᓴᐸᑎ ᑖᓐᓇ ᑲᒪᒋᓯᐊᕐᑕᒃᓴᕆᕙᓯ.” ᐅᓪᓗᖅ ᑐᐱᕐᓯᒪᕕᖕᒥᒃ ᓇᓪᓕᐅᓐᓂᕐᓯᐅᕐᕕᒃ ᒨᓯᓯ ᓯᑕᒪᖏᑦ 29:12-40 33 ᐊᑕᓂᐅᑉ ᒨᓯᓯ ᐅᖃᐅᑎᕚ, 34 “ᐃᓴᕆᐊᓕᒥᐅᑦ ᐅᖃᐅᑎᒃᑭᑦ, ᑕᖅᑮᑦ 7ᖓᓐᓂ ᐅᓪᓗᖓᑕ 15ᖓᓐᓂ ᐊᑕᓂᐅᑉ ᓇᓪᓕᐅᓐᓂᕐᓯᐅᕐᕕᖓ ᑐᐱᕐᓯᒪᓂᕐᒧᑦ ᓇᓪᓕᐅᑎᕗᖅ, ᓇᓪᓕᐅᑎᓯᒪᕙᒡᓗᓂ ᐅᓪᓗᓂᒃ 7ᓂᒃ. 35 ᑖᒃᑯᐊ ᐅᓪᓗᐃᑦ ᓯᕗᓪᓕᕐᐹᖓᓐᓂ ᑲᑎᒪᔭᕆᐊᖃᕐᐳᓯ ᑐᒃᓯᐊᑲᑎᒌᒃᓗᓯ; ᓱᓇᒥᒡᓘᓐᓃᑦ ᓴᓇᔪᒃᓴᐅᓐᖏᓚᓯ. 36 ᐅᓪᓗᓂᒃ ᑖᒃᑯᓇᓂ 7ᓂᒃ ᐃᑯᐊᓪᓚᒡᓗᒋᑦ ᑐᓂᕐᕈᓯᖃᑕᕐᑐᒃᓴᐅᕗᓯ ᐊᑕᓂᕐᒧᑦ, ᐅᓪᓗᐃᑦ 8ᖓᓂ ᑲᑎᒪᔪᒃᓴᐅᕗᓯ ᑐᒃᓯᐊᖃᑎᒌᒃᓗᓯ ᑐᓂᕐᕈᓯᕐᓗᓯᓗ ᐃᑯᐊᓪᓚᓗᒋᑦ ᐊᑕᓂᕐᒧᑦ. ᑖᓐᓇ ᑕᕝᕙ ᓄᖅᑲᐅᑎᓯ ᓱᓇᒥᒡᓘᓐᓃᑦ ᓴᓇᔪᒃᓴᐅᓐᖏᓚᓯ. 37 (“ᑖᒃᑯᐊ ᑕᕝᕙ ᐊᑕᓂᐅᑉ ᓇᓪᓕᐅᓐᓂᕐᓯᐅᕕᐅᖃᑦᑕᖁᔭᖏᑦ, ᑖᒃᑯᓇᓂ ᑲᑎᖃᑕᕆᐊᖃᕐᐳᓯ ᑐᒃᓯᐊᖃᑎᒌᒃᓗᓯ, ᓂᕿᒃᓴᓂᒡᓗ ᐃᑯᐊᓚᑎᑕᒃᓴᓂᒃ ᑐᓂᕐᕈᓯᖃᑦᑕᕆᐊᖃᕐᐳᓯ ᐊᑕᓂᕐᒧᑦ, ᓂᐊᖂᔭᒃᓴᓂᒡᓗ, ᕔᓂᒥᒡᓗ. ᑖᒃᑯᓇᓂ ᖃᐅᑕᒫᑦ ᑐᓂᔭᐅᔭᕆᐊᓕᖕᓂᒃ ᑐᓂᕐᕈᓯᖃᑦᑕᕆᐊᖃᕐᐳᓯ. 38 ᑖᒃᑯᐊ ᑐᓂᕐᕈᓯᕐᓃᑦ ᐊᑕᓂᐅᑉ ᓴᐸᑎᖏᑕ ᐊᓯᐊᒍᑦ ᑐᓂᕐᕈᓯᕐᓂᐅᕗᑦ, ᐊᒻᒪ ᓱᓕ ᑐᓂᕐᕈᓯᕆᐊᖃᕐᓂᑦᓯ ᐱᔭᕆᐊᖃᕐᑐᑦ ᖄᒃᑲᓐᓂᐊᒎᕆᕗᑦ ᐊᖏᕈᑎᖃᕈᒪᓂᕐᒧᓪᓘᓐᓃᑦ, ᑐᓂᕐᕈᓯᕈᒪᓂᕐᒧᓪᓘᓐᓃᑦ.) 39 “ᐱᕈᕐᓯᐊᓂᒃ ᓂᕿᒃᓴᓂᒃ ᑲᑎᕐᓱᐃᔭᕇᕈᑦᓯ, ᑖᒃᑯᐊ ᓇᓪᓕᐅᓐᓂᕐᓯᐅᕐᓃᑦ ᐊᑐᖃᑦᑕᕆᐊᖃᕐᐸᓯ, ᑕᖅᑮᑦ 7ᖓᑕ ᐅᓪᓗᖓᑕ 15ᖓᓂ ᐱᒋᐊᕐᓗᒍ ᐅᓪᓗᓂᒃ 7ᓂᒃ; ᑖᒃᑯᐊ ᐅᓪᓗᐃᑦ ᓯᕗᓪᓕᕐᐹᖓᑦ ᕿᑲᕐᕕᐅᔭᕆᐊᖃᕐᐳᖅ, ᐅᓪᓗᐃᓪᓗ ᑖᒃᑯᐊ 8ᖓᑦ ᕿᑲᕐᕕᐅᔭᕆᐊᖃᕆᕗᖅ. 40 ᑖᒃᑯᐊ ᐅᓪᓗᐃᑦ ᓯᕗᓪᓕᕐᐹᖓᓂ ᓇᐹᕐᑐᐃᑦ ᐸᐅᕐᖓᖏᑕ ᐱᐅᓂᕐᐹᖏᓐᓂᒃ ᐱᔭᕆᐊᖃᕐᐳᓯ, ᓇᐹᕐᑐᓪᓗ ᐹᒥᓂᒃ ᐊᑎᓖᑦ ᐊᕙᓚᖓᔪᖏᓐᓂᒃ ᓇᐹᕐᑐᓪᓗ ᐅᖃᐅᔭᖅᑯᕐᑐᔪᐃᑦ ᐊᕙᓚᖓᔪᖏᓐᓂᒃ ᐱᔭᕆᐊᖃᕆᕗᓯ, ᖁᕕᐊᓱᒡᓗᓯ ᐊᑕᓂᐅᑉ ᒎᑎᑦᓯ ᓵᖓᓂ ᓇᓪᓕᐅᓐᓂᕐᓯᐅᕆᐊᖃᕐᐳᓯ ᐅᓪᓗᓂᒃ 7ᓂᒃ. 41 ᓇᓪᓕᐅᓐᓂᕐᓯᐅᕐᓂᖅ ᑕᒪᓐᓇ ᖁᕕᐊᓲᑎᒋᓯᐅᒃ ᐅᓪᓗᓂᒃ 7ᓂᒃ ᐊᕐᕌᒍ ᑕᒫᑦ. ᑕᒪᓐᓇ ᒪᓕᒐᖅ ᑲᒪᒋᔭᐅᑦᓯᐊᕆᐊᖃᕐᐳᖅ ᑍᒪᓐᖓᓕᒫᖅ ᑭᖑᕚᕆᔪᒫᕐᑕᑦᓯᓐᓂᑦ; ᓇᓪᓕᐅᓐᓂᕐᓯᐅᖃᑦᑕᕆᐊᖃᕐᐸᓯ ᑕᖅᑮᑦ 7ᖓᓂ. 42 ᑐᐱᕐᒦᑦᓴᕆᐊᖃᕐᐳᓯ ᐅᓪᓗᓂᒃ 7ᓂᒃ; ᑕᒪᕐᒥᒃ ᐃᓴᕆᐊᓕᒥᐅᑦ ᑐᐱᕐᒦᑦᓴᕆᐊᖃᕐᐳᑦ. 43 ᑭᖑᕚᓯ ᖃᐅᔨᒪᖁᓪᓗᒋᑦ ᐅᕙᖓ ᐃᓴᕆᐊᓕᒥᐅᑦ ᑐᐱᕐᒥᐅᑕᐅᑎᓚᐅᕋᒃᑭᑦ ᐄᑦᔨᑉᑎᒥᑦ ᑍᑦᓱᒪᓂ ᐊᐅᓪᓚᕐᑎᓐᓇᒃᑭᑦ. ᐅᕙᖓ ᐊᑕᓂᐅᒐᒪ ᒎᑎᓯ.” 44 ᑍᒤᒪᑦ ᒨᓯᓯᐅᑉ ᐃᓴᕆᐊᓕᒥᐅᑦ ᐊᑕᓂᐅᑉ ᓇᓪᓕᐅᓐᓂᕐᓯᐅᕐᕕᐅᖁᔭᖏᓐᓂᒃ ᓇᓗᓁᕐᓯᕕᒋᕔᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society