ᒨᓯᓯ ᐱᖓᔪᖏᑦ 22 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᓂᕐᕈᑎᒃᓮᑦ ᐃᑦᔪᕐᓁᓐᓂᖓᑦ

¹ ᐊᑕᓂᐅᑉ ᒨᓯᓯ ᐅᖃᐅᑎᕚ,

² “ᐂᕉᓂ ᐃᕐᓂᖏᓪᓗ ᐅᖃᐅᑎᒃᑭᑦ, ᑲᒪᑦᓯᐊᖁᓪᓗᒋᑦ ᑐᓂᕐᕈᑎᓂᒃ ᐃᑦᔪᕐᓁᑦᑐᓂᒃ ᐃᓴᕆᐊᓕᒥᐅᓂᑦ ᑐᓂᕐᕈᑕᐅᔪᓂᒃ ᐅᕙᓐᓄᑦ, ᐊᑎᕋ ᓇᕐᕈᓇᕐᓯᑎᑕᐅᖁᓇᒍ. ᐅᕙᖓ ᐊᑕᓂᐅᒐᒪ.

³ ᓇᓪᓕᐊᑦ ᑭᖑᕚᓯ ᓴᓗᒪᖏᓪᓗᓂ, ᐃᓴᕆᐊᓕᒥᐅᑦ ᑐᓂᕐᕈᑎᖏᓐᓄᑦ ᐃᑦᔪᕐᓁᑦᑐᓄᑦ ᐅᕙᓐᓄᑦ ᑐᓂᔭᐅᓯᒪᔪᓄᑦ ᖃᒡᓕᑐᐊᕐᐸᑦ, ᑖᓐᓇ ᓇᔪᒐᓐᓂᑦ ᐲᕐᑕᐅᔪᒃᓴᐅᕗᖅ: ᐅᕙᖓ ᐊᑕᓂᐅᒐᒪ.

⁴ “ᓇᓪᓕᐊᑦ ᐂᕉᓂᐅᑉ ᑭᖑᕚᖓ ᑲᑉᐱᐊᓇᕐᑐᒥᒃ ᐊᒥᕐᓗᒃᑐᖅ, ᒪᕿᕙᒡᓗᓂ ᑎᒥᒥᒍᑦ ᓇᐅᑯᑐᐃᓐᓇᖅ, ᓂᕆᔭᕆᐊᖃᓐᖏᓚᖅ ᑐᓂᕐᕈᑎᕕᓂᕐᓂᒃ ᐃᑦᔪᕐᓁᑦᑐᓂᒃ, ᓴᓗᒻᒪᓚᐅᖏᓐᓂᕐᒥᓂ. ᓇᓪᓕᐊᑐᐃᓐᓇᖅ ᑐᓂᕐᕈᓯᕐᑎᑦᓯᔨ ᓴᓗᒤᑦᑐᓐᖑᕐᐳᖅ ᐊᒃᑐᐃᒃᐸᑦ ᓴᓗᒤᑎᑕᐅᓯᒪᔪᒥᒃ ᑐᖁᖓᔪᒧᑦ ᐅᕝᕙᓘᓐᓃᑦ ᖃᐹᕿᒃᐸᑦ.

⁵ ᐅᕝᕙᓘᓐᓃᑦ ᓂᕐᔪᑎᒥᒃ ᓴᓗᒤᑦᑐᒥᒃ ᐊᒃᑐᐃᒃᐸᑦ, ᓱᓇᑐᐃᓐᓇᕐᒥᒃ ᓴᓗᒤᑦᔪᑎᓕᖕᒥᒃ, ᐃᓄᖕᒥᒡᓘᓐᓃᑦ ᓴᓗᒤᑦᑐᒥᒃ ᐊᒃᑐᐃᒃᐸᑦ, ᓱᓇᑐᐃᓐᓇᕐᒥᒃ ᓴᓗᒤᑦᔪᑎᖃᕐᑐᒥᒃ.

⁶ ᑐᓂᕐᕈᓯᕐᑎᑦᓯᔨᑦ ᓇᓪᓕᐊᑦ ᓴᓗᒤᓕᔪᖅ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ. ᑖᓐᓇᓗ ᑐᓂᕐᕈᑎᓂᒃ ᐃᑦᔪᕐᓁᑦᑐᓂᒃ ᓂᕆᔪᒃᓴᐅᓐᖏᓚᖅ ᑭᓯᐊᓂ ᐃᒥᕐᒧᑦ ᑎᒥᒥᓂᒃ ᐅᐊᓴᓚᐅᖄᕐᓗᓂ.

⁷ ᓯᕿᓂᕐᓕ ᓂᐱᒃᐸᑦ, ᑕᕝᕙ ᓴᓗᒻᒪᕐᓂᐊᕐᐳᖅ, ᓂᕆᔪᓐᓇᕐᓯᓂᐊᕐᐳᕐᓗ ᑐᓂᕐᕈᑎᕕᓂᕐᓂᒃ ᐃᑦᔪᕐᓁᑦᑐᓂᒃ, ᑖᑦᓱᒪ ᓂᕿᒃᓴᕆᖕᒪᒋᑦ.

⁸ ᓂᕆᔭᕆᐊᖃᓐᖏᓚᕐᓕ ᓂᕐᔪᑎᒥᒃ ᐃᒻᒥᓂᒃ ᑐᖁᔪᕕᓂᕐᒥᒃ, ᓂᕐᔪᑎᐅᖃᑎᒥᓂᓪᓘᓐᓃᑦ ᑐᖁᑕᐅᔪᕕᓂᕐᒥᒃ; ᑍᒤᑦᑐᒥᒃ ᓂᕆᒃᐸᑦ ᑕᕝᕙ ᓴᓗᒤᓕᓂᐊᕐᐳᖅ. ᐅᕙᖓ ᐊᑕᓂᐅᒐᒪ.

⁹ “ᑐᓂᕐᕈᓯᕐᑎᑦᓯᔨᓕᒫᑦ ᓈᓚᑦᓯᐊᕆᐊᖃᕐᐳᑦ ᐊᑐᕐᑕᐅᖁᔭᓐᓂᒃ, ᐸᓯᔭᒃᓴᐅᓕᖁᓇᒋᑦ ᑐᖁᖁᓇᒋᓪᓗ ᓇᕐᕈᓇᕐᓯᑎᑦᓯᓂᕐᒧᑦ ᒪᓕᒐᒃᓴᐅᑎᑕᓐᓂᒃ ᐃᑦᔪᕐᓁᑦᑐᓂᒃ. ᐅᕙᖓ ᐊᑕᓂᐅᒐᒪ, ᑖᒃᑯᐊ ᐃᑦᔪᕐᓁᑦᑐᓐᖑᕐᑎᓯᒪᒐᒃᑭᑦ.

¹⁰ “ᑐᓂᕐᕈᓯᕐᑎᑦᓯᔨᐅᑉ ᐃᓚᒌᖕᓂᒃᑯᑦ ᓇᖕᒥᓂᕆᓐᖏᑕᖏᑦ ᓂᕆᔪᒃᓴᐅᓐᖏᓚᑦ ᑐᓂᕐᕈᑎᕕᓂᕐᓂᒃ ᐃᑦᔪᕐᓁᑦᑐᓂᒃ, ᑐᔪᕐᒥᐊᖏᓪᓘᓐᓃᑦ, ᐃᖅᑲᓁᔭᕐᑎᖏᓪᓘᓐᓃᑦ ᑐᓂᕐᕈᑎᕕᓂᕐᓂᒃ ᓂᕆᔭᕆᐊᖃᓐᖏᓚᑦ.

¹¹ ᑐᓂᕐᕈᓯᕐᑎᑦᓯᔨᓕ ᑮᓇᐅᔭᒥᓄᑦ ᓂᐅᕕᕐᐸᑦ ᓯᐊᓛᒃᓴᒥᓂᒃ, ᐅᕝᕙᓘᓐᓃᑦ ᓯᐊᓛᖓ ᑕᕝᕙᓂ ᐃᓅᔪᕕᓂᐅᒃᐸᑦ, ᑕᕝᕙ ᓯᐊᓛᖓ ᓂᕆᔪᓐᓇᕐᐳᖅ ᑐᓂᕐᕈᓯᕐᑎᑦᓯᔨᐅᑉ ᓂᕿᖏᓐᓂᒃ.

¹² ᑐᓂᕐᕈᓯᕐᑎᑦᓯᔨᐅᓪᓕ ᐸᓂᖓ ᐅᐃᓂᒃᐸᑦ ᑐᓂᕐᕈᓯᕐᑎᑦᓯᔨᐅᖏᑦᑐᒥᒃ, ᑕᕝᕙ ᓂᕆᔪᒃᓴᐅᔪᓐᓃᕐᐳᖅ ᑐᓂᕐᕈᑎᕕᓂᕐᓂᒃ ᐃᑦᔪᕐᓁᑦᑐᓂᒃ.

¹³ ᑐᓂᕐᕈᓯᕐᑎᑦᓯᔨᐅᓪᓕ ᐸᓂᖓ ᐅᐃᒡᒐᕐᐸᑦ, ᐅᐃᒥᓂᓪᓘᓐᓃᑦ ᐊᕕᑉᐸᑦ, ᕿᑐᕐᖓᕐᑖᓚᐅᖏᓪᓗᓂ, ᐊᑖᑕᒥᓗ ᐃᒡᓗᖓᓄᑦ ᐅᑎᕐᓗᓂ ᐃᓅᓱᒃᑑᑦᔪᓯᕕᓂᕐᒥᑐᑦ ᑕᕝᕙ ᓂᕆᖃᑕᐅᔪᓐᓇᕐᓯᕗᖅ ᐊᑖᑕᒥ ᓂᕿᖏᓐᓂᒃ. ᓇᖕᒥᓂᕆᓐᖏᑕᖏᓪᓕ ᑐᓂᕐᕈᑎᕕᓂᕐᓂᒃ ᓂᕆᔪᒃᓴᐅᓐᖏᓚᑦ.

¹⁴ “ᓇᓪᓕᐊᑦᓕ ᓂᕆᔪᖅ ᑐᓂᕐᕈᑎᕕᓂᕐᓂᒃ ᐃᑦᔪᕐᓁᑦᑐᓂᒃ ᐱᔮᕆᖏᓪᓗᓂ, ᐅᑎᕐᑎᑦᓯᔪᒃᓴᐅᕗᖅ ᑐᓂᕐᕈᓯᕐᑎᑦᓯᔨᒧᑦ ᐊᑭᓪᓗᐊᖓᓂᒃ ᐃᓚᓗᒍᓗ 20ᐳᓴᖓᓂᒃ.

¹⁵ ᑐᓂᕐᕈᓯᕐᑎᓯᔩᑦ ᐃᑦᔪᕐᓇᕐᓯᑎᑦᓯᔭᕆᐊᖃᓐᖏᓚᑦ ᐃᓴᕆᐊᓕᒥᐅᑦ ᑐᓂᕐᕈᑎᖏᓐᓂᒃ ᐊᑕᓂᕐᒧᑦ ᐃᑦᔪᕐᓁᑦᑐᓂᒃ.

¹⁶ ᐱᑎᑕᐅᔭᕆᐊᖃᖏᑦᑐᓂᒃ ᓂᕆᑎᑦᓯᖃᑦᑕᕐᐸᑕ ᑍᒤᑦᑐᓂᒡᓗ ᐸᓯᔭᒃᓴᐅᓕᕐᑎᓯᖁᓇᒋᑦ ᓱᒋᐊᕐᑕᐅᔭᕆᐊᖃᓕᕐᓗᑎᒃ. ᐅᕙᖓ ᐊᑕᓂᐅᒐᒪ ᐃᑦᔪᕐᓁᑎᑦᓯᔪᖅ.”

¹⁷ ᐊᑕᓂᖅ ᐅᖃᕐᐳᖅ ᒨᓯᓯᒧᑦ,

¹⁸ “ᐂᕉᓂ ᐃᕐᓂᖏᓪᓗ ᐃᓴᕆᐊᓕᒥᐅᓕᒫᓪᓗ ᐅᖃᐅᑎᒃᑭᑦ: ᓇᓕᕐᓯ ᑐᓂᕐᕈᓯᕐᐸᑦ ᐆᑕᒃᓴᒥᒃ ᐊᑕᓂᕐᒧᑦ, ᐃᓴᕆᐊᓕᐅᒍᕕᑦ ᐃᓴᕆᐊᓕᐅᖏᒃᑲᓗᐊᕈᕕᓪᓘᓐᓃᑦ ᐃᓴᕆᐊᓕᒥ ᓄᓇᖃᕐᓗᑎᑦ, ᐊᖏᕈᑎᒥᓂᒡᓘᓐᓃᑦ ᑐᓂᕐᕈᓯᕈᒪᑐᐃᓐᓇᕐᓂᕐᒧᓪᓘᓐᓃᑦ ᑐᓂᕐᕈᓯᕈᕕᑦ,

¹⁹ ᑐᓂᕐᕈᑏᑦ ᐃᓚᓕᐅᕐᑕᐅᖁᓪᓗᒍ ᐱᑦᔪᑎᒋᓗᑎᑦ, ᐆᒪᔪᖅ ᓇᓪᓕᐊᑐᐃᓐᓇᐅᓗᓂ ᐊᖑᓴᓪᓘᔭᕆᐊᖃᕐᐳᖅ ᑕᒤᑎᒍᑦ ᖃᓄᐃᑦᔪᑎᖃᖏᑦᓯᐊᕐᓗᓂ.

²⁰ ᖃᓄᐃᑦᔪᑎᖃᕐᑐᒥᒃ ᑕᕐᓴᓕᖕᒥᒡᓘᓐᓃᑦ ᑐᓂᕐᕈᓯᕆᐊᑐᕐᑐᒃᓴᐅᓐᖏᓚᑎᑦ, ᑍᒤᑦᑐᑦ ᐊᑕᓂᐅᑉ ᐃᓚᓕᐅᕐᓂᐊᖏᒻᒪᒋᑦ.

²¹ ᓇᓪᓕᐊᑦ ᓂᕐᔪᑎᒥᒃ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᓯᕐᐸᑦ ᐊᑕᓂᕐᒧᑦ, ᐊᖏᕈᑎᒋᓯᒪᔭᒥᓂᒃ ᐱᑦᔪᑎᖃᕐᓗᓂ ᐅᕝᕙᓘᓐᓃᑦ ᑐᓂᕐᕈᓯᕈᒪᓂᑐᐃᓐᓇᕐᒧᑦ, ᑐᓂᕐᕈᑎᖓ ᖃᓄᐃᑦᔪᑎᖃᕆᐊᖃᓐᖏᓚᖅ ᑕᕐᓴᖃᖏᓪᓗᓂᓗ ᐃᓚᓕᐅᕐᑕᐅᑦᓯᐊᖁᓪᓗᒍ.

²² ᓂᕐᔪᑎᒥᒃ ᑕᐅᑐᖏᑦᑐᒥᒃ ᑐᓂᕐᕈᓯᕆᐊᖃᓐᖏᓚᓯ ᐊᑕᓂᕐᒧᑦ, ᐋᓐᓂᕐᓯᒪᔪᒥᒡᓘᓐᓃᑦ, ᐃᓚᑯᓕᖕᒥᒡᓘᓐᓃᑦ ᐅᓐᖑᓕᖕᒥᒡᓘᓐᓃᑦ ᐊᒥᕐᓗᒃᑐᒥᒡᓘᓐᓃᑦ ᒪᕿᔪᒥᒡᓘᓐᓃᑦ. ᑍᒤᑦᑐᑦ ᓇᓪᓕᐊᑐᐃᓐᓇᖅ ᐃᑯᐊᓚᑎᑕᐅᓗᑎᒃ ᑐᓂᕐᕈᑕᐅᔭᕆᐊᖃᓐᖏᓚᑦ ᑐᓂᕐᕈᓯᕐᕕᖕᒥ ᐊᑕᓂᕐᒧᑦ.

²³ ᑭᓯᐊᓂᓕ ᑐᓂᕐᕈᓯᕈᒪᑐᐃᓐᓇᕐᓂᕐᒧᑦ ᑐᓂᕐᕈᓯᕈᓐᓇᕋᓗᐊᕐᐳᓯ ᓂᕐᔪᑎᒥᒃ ᐱᕈᕈᓐᓇᖏᓐᓂᑯᒥᒃ ᐃᓗᓯᕐᓗᒃᑐᒥᒡᓘᓐᓃᑦ, ᑭᓯᐊᓂ ᐃᓚᓕᐅᕐᑕᐅᒐᔭᓐᖏᓚᖅ ᐊᖏᕈᑎᒋᓇᓱᐊᕐᑕᓕᒫᑦᓯᓐᓄᑦ.

²⁴ ᐊᑕᓂᕐᒧᑦ ᑐᓂᕐᕈᓯᕆᐊᖃᓐᖏᓚᓯ ᓂᕐᔪᑎᒥᒃ ᐃᒡᔪᖃᕐᑐᒥᒃ ᖄᕐᓯᒪᔫᖕᓂᒃ ᐳᓪᓕᕐᑑᖕᓂᒡᓘᓐᓃᑦ ᑭᓕᕐᓯᒪᔫᖕᓂᒡᓘᓐᓃᑦ ᐲᕐᓯᒪᔫᖕᓂᒡᓘᓐᓃᑦ. ᓄᓇᒋᔭᑦᓯᓐᓂ ᑍᒤᑦᑐᓂᒃ ᑐᓂᕐᕈᓯᕆᐊᖃᓐᖏᓚᓯ.

²⁵ “ᑍᒤᑦᑐᓂᒃ ᓂᕐᔪᑎᓂᒃ ᐃᓚᓕᐅᕆᔭᕆᐊᖃᓐᖏᓚᓯ ᐃᓴᕆᐊᓕᒥᐅᖑᖏᑦᑐᓂᑦ ᓂᕿᒃᓴᐅᓗᑎᒃ ᒎᑎᒧᑦ ᑐᓂᕐᕈᑎᒋᔭᐅᓇᓱᐊᕐᑐᓂᒃ. ᑍᒤᑦᑐᑦ ᐃᓚᓕᐅᕐᑕᐅᓂᐊᓐᖏᓚᑦ ᐃᓕᑦᓯ ᐱᑦᔪᑎᒋᓗᓯ, ᑎᒥᖏᑦ ᐱᐅᓯᕐᓗᖕᒪᑕ ᐃᓗᓯᕐᓗᒡᓗᑎᒡᓗ.”

²⁶ ᐊᑕᓂᖅ ᐅᖃᕐᐳᖅ ᒨᓯᓯᒧᑦ,

²⁷ “ᐃᒻᒧᒃᓯᐅᒐᐅᑉ ᓄᕐᕋᖓ ᓰᐱᐅᓪᓘᓐᓃᑦ ᓄᕐᕋᖓ ᒎᑦᓯᐅᓪᓘᓐᓃᑦ ᓄᕐᕋᖓ ᐃᕐᓂᐊᖑᕋᑖᕐᑎᓪᓗᒍ, ᐊᓈᓇᒥᓃᑦᓴᕆᐊᖃᕐᐳᖅ ᐅᓪᓗᓂᒃ 7ᓂᒃ. ᐅᓪᓗᐃᓪᓕ 8ᖓᓂ ᐅᖓᑖᓂᓗ ᑕᕝᕙ ᐃᓚᓕᐅᕐᑕᐅᔪᓐᓇᕐᓯᕗᖅ ᐃᑯᐊᓚᑦᓯᓂᒃᑯᑦ ᑐᓂᕐᕈᑕᐅᒃᐸᑦ ᐊᑕᓂᕐᒧᑦ.

²⁸ ᓇᓪᓕᐊᓐᓂᑐᐃᓐᓇᖅ ᐊᑕᐅᑦᓯᒃᑰᕐᓗᒋᑦ ᑐᖁᑦᓯᔪᒃᓴᐅᓐᖏᓚᓯ ᑐᓂᕐᕈᑎᒃᓴᒥᒃ ᐃᒻᒧᒃᓯᐅᒐᕐᒥᒃ ᓄᕐᕋᖓᓂᒡᓗ, ᐅᕝᕙᓘᓐᓃᑦ ᓰᐱᒥᒃ ᓄᕐᕋᖓᓂᒡᓗ ᐅᓪᓗᒥ ᑕᕝᕙᓂᑦᓮᓐᓇᖅ.

²⁹ ᑐᓂᕐᕈᓯᕈᑦᓯ ᐆᑕᒃᓴᒥ ᖁᔭᓕᑦᔪᑎᒥᒃ ᐊᑕᓂᕐᒧᑦ, ᑐᓂᕐᕈᓯᕐᑐᒃᓴᐅᕗᓯ ᐱᖁᔭᐅᔪᓂᒃ ᒪᓕᑦᓯᐊᕐᓗᓯ ᐃᓚᓕᐅᕐᑕᐅᑦᓯᐊᖁᓪᓗᓯ;

³⁰ ᑐᓂᕐᕈᑎᓯ ᓂᕆᔭᐅᔭᕆᐊᖃᕐᐳᑦ ᐅᓪᓗᒥ ᑕᕝᕙᓂᑦᓮᓐᓇᖅ; ᐅᓪᓘᑉ ᐂᑉᐸᖓᓄᑦ ᐊᒥᐊᒃᑯᖃᕐᑎᑦᑍᓕᓗᒍ. ᐅᕙᖓ ᐊᑕᓂᐅᒐᒪ.”

³¹ ᐊᑕᓂᖅ ᐅᖃᕐᐳᖅ, “ᐱᖁᔭᒃᑲ ᑲᒪᒋᑦᓯᐊᕐᓯᒋᒃ ᒪᓕᑦᓯᐊᕐᓗᒋᓪᓗ. ᐅᕙᖓ ᐊᑕᓂᐅᒐᒪ.

³² ᐊᑎᕋ ᐃᑦᔪᕐᓁᑦᑐᖅ ᓇᕐᕈᓇᕐᓯᑎᓐᓂᐊᕋᓯᐅᒃ; ᐃᑦᔪᕐᓁᑦᑑᓂᕋ ᐅᖃᐅᓯᕆᔭᐅᑦᓯᐊᕐᑐᒃᓴᐅᕗᖅ ᐃᓴᕆᐊᓕᒥᐅᓕᒫᓄᑦ. ᐅᕙᖓ ᐊᑕᓂᐅᒐᒪ, ᐅᕙᖓ ᐃᑦᔪᕐᓁᑦᑑᑎᑉᐸᑦᓯ.

³³ ᐅᕙᖓᓗ ᐊᐅᓪᓚᕐᑎᓚᐅᕐᐸᑦᓯ ᐄᑦᔨᑉᑎᒥᑦ ᐃᓕᑦᓯᓐᓄᑦ ᒎᑎᒋᔭᐅᔪᒪᓪᓗᖓ. ᐅᕙᖓ ᐊᑕᓂᐅᒐᒪ.”