ᒨᓯᓯ ᐱᖓᔪᖏᑦ 21 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᓂᕐᕈᓯᕐᑎᑦᓯᔩᑦ ᐃᑦᔪᕐᓁᓐᓂᖓ

¹ ᐊᑕᓂᐅᑉ ᒨᓯᓯ ᐅᖃᐅᑎᕚ, “ᑐᓂᕐᕈᓯᕐᑎᑦᓯᔩᑦ ᐂᕉᓂᐅᑉ ᐃᓚᖏᑦ ᐃᒫᒃ ᐅᖃᐅᑎᒃᑭᑦ, ᑐᓂᕐᕈᓯᕐᑎᑦᓯᔩᑦ ᓇᓪᓕᐊᑦ ᐃᒻᒥᖕᓂᒃ ᓴᓗᒤᑦᑐᓐᖑᕐᑎᑦᑐᒃᓴᐅᓐᖏᓚᖅ ᐃᓗᕕᕐᓯᔪᓂ ᑲᒪᔨᐅᖃᑕᐅᓗᓂ ᐃᓚᒋᔭᖓᓂᒃ ᑐᖁᔪᖃᕐᑎᓪᓗᒍ.

² ᑭᓯᐊᓂ ᓇᖕᒥᓂᓪᓚᕆᒋᒍᓂᐅᒃ, ᐃᒫᒃ ᐊᓈᓇᓂ ᐊᑖᑕᓂᓘᓐᓃᑦ, ᐃᕐᓂᓂᓘᓐᓃᑦ ᐸᓂᓂᓘᓐᓃᑦ, ᐅᕝᕙᓘᓐᓃᑦ ᓇᖕᒥᓂᕆᓗᒍ ᖃᑕᓐᖑᑎᒥᓂᒃ,

³ ᐅᕝᕙᓘᓐᓃᑦ ᓇᔭᖕᒥᓂᒃ ᐅᐃᖃᓚᐅᕐᓯᒪᖏᑐᒥᒃ ᐃᒡᓗᒥᓂ ᓇᔪᕐᑎᒋᔭᒥᓂᒃ ᑖᓐᓇ ᐱᑦᔪᑎᒋᓗᒍ ᓴᓗᒤᑦᑐᓐᖑᕐᑎᑕᐅᑐᐃᓐᓇᕆᐊᖃᕐᐳᖅ.

⁴ ᐃᒻᒥᖕᓂᒃ ᓴᓗᒤᑦᑐᓐᖑᕐᑎᓐᓂᐊᕋᑎᒃ ᐃᓚᒋᔭᖓᓂᒃ ᑐᖁᔪᖃᕐᐸᑦ ᐅᐃᒋᔭᐅᓂᕐᒥᒍᑦ ᐃᓚᒋᔭᒥᓂᒃ ᐃᓗᕕᕐᓯᖃᑕᐅᓂᕐᒧᑦ, ᑍᒫᒃ ᐃᒻᒥᓂᒃ ᐃᑦᔪᕐᓇᓯᑎᑦᓱᓇᕐᒪᑦ.

⁵ “ᑐᓂᕐᕈᓯᕐᑎᑦᓯᔩᑦ ᓂᐊᖁᑎᒃ ᓴᓕᔭᕆᐊᖃᖏᓔᑦ ᐅᒥᒃᑎᒡᓘᓐᓃᑦ ᓯᓈᒍᑦ ᑭᐱᔭᕆᐊᖃᖏᓔᑦ ᑎᒥᒥᒃᑎᒍᓪᓗ ᑭᓪᓕᐊᔪᒃᓴᐅᓐᖏᓚᑦ ᕿᒃᓵᖕᓂᕐᒥᖕᓄᑦ ᓇᓗᓁᒃᑯᑕᕆᓇᓱᐊᕐᓗᒋᑦ.

⁶ ᑖᒃᑯᐊ ᐃᑦᔪᕐᓁᑦᑕᕆᐊᖃᕐᐳᑦ ᒎᑎᒥᖕᓄᑦ, ᓇᕐᕈᓇᕐᑎᑦᓯᓂᐊᕋᑎᒡᓗ ᒎᑎᒥ ᐊᑎᖓᓂᒃ, ᑖᒃᑯᐊ ᑐᓂᕐᕈᑎᒃᓴᓂᒃ ᐆᑕᒃᓴᓂᒃ ᐃᑯᐊᓚᑎᑦᓯᕙᖕᒪᑕ ᐊᑕᓂᕐᒧᑦ, ᒎᑎᖓᑦᑕ ᓂᕿᒃᓴᖓᓂᒃ, ᑍᒤᒻᒪᑦ ᐃᑦᔪᕐᓁᑦᓴᕆᐊᖃᕐᐳᑦ.

⁷ ᑐᓂᕐᕈᓯᕐᑎᑦᓯᔩᑦ ᓄᓕᐊᕐᑖᕐᑐᒃᓴᐅᓐᖏᓚᑦ ᐊᕐᓇᒥᒃ ᑮᓇᐅᔭᓕᐅᕐᓂᕐᒧᑦ ᓄᓕᐊᒐᐅᕙᒃᑐᕕᓂᕐᒥᒃ, ᐅᐃᖃᕐᓯᒪᔪᒥᒡᓘᓐᓃᑦ ᐅᕝᕙᓘᓐᓃᑦ ᐅᐃᒥᓂᒃ ᐊᕕᖃᑎᖃᕐᓯᒪᔪᒥᒃ, ᑐᓂᕐᕈᓯᕐᑎᑦᓯᔩᑦ ᒎᑎᒥᖕᓄᑦ ᐃᑦᔪᕐᓁᑦᓴᕆᐊᖃᕐᒪᑕ.

⁸ ᐃᑦᔪᕐᓁᑎᓯᒋᒃ, ᒎᑎᑦᓯ ᓂᕿᒃᓴᖏᓐᓂᒃ ᐃᑯᐊᓚᑦᓯᓂᒃᑯᑦ ᑐᓂᕐᕈᓯᖃᑕᕐᒪᑕ. ᐃᑦᔪᕐᓁᓐᓂᖏᑦ ᐃᓱᒪᒋᑦᓯᐊᕐᓯᐅᒃ, ᐅᕙᖓ ᐊᑕᓂᖅ ᐃᑦᔪᕐᓁᓐᓇᒪ, ᐃᓄᖁᑎᒃᑲᑦᑕᐅᖅ ᐃᑦᔪᕐᓁᑎᓐᓂᐊᕆᕙᒃᑲ.

⁹ ᑐᓂᕐᕈᓯᕐᑎᑦᓯᔨᐅᑉ ᐸᓂᖓ ᐃᒻᒥᓂᒃ ᓇᕐᕈᓇᕐᓯᑎᑉᐸᑦ ᓂᐅᕕᐊᖑᓗᓂ ᓄᓕᐊᒐᐅᓕᕐᐸᑦ, ᐊᑖᑕᓂ ᑕᕝᕙ ᐅᐱᓐᓇᕈᓐᓃᕐᑎᑉᐹ; ᑖᓐᓇ ᐃᑯᐊᓪᓚᒃᑕᐅᔭᕆᐊᖃᕐᐳᖅ.

¹⁰ “ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᖓᑦ, ᑖᓐᓇ ᐅᕐᓱᒧᑦ ᓂᐊᖁᐊᒍᑦ ᑯᕝᕕᕆᔭᐅᓯᒪᔪᖅ ᓂᕈᐊᕐᑕᐅᓂᕐᒧᑦ, ᐊᑐᕈᓐᓇᕐᓯᑎᑕᐅᓯᒪᔪᕐᓗ ᑐᓂᕐᕈᓯᕐᑎᑦᓯᔩᑦ ᐊᓐᓄᕌᖏᓐᓂᒃ, ᓄᔭᕙᓪᓗᓐᖑᕐᑎᓯᒪᔭᕆᐊᖃᓐᖏᓚᖅ ᐊᓐᓄᕌᒥᓂᒡᓘᓐᓃᑦ ᐊᓕᒃᓯᓯᒪᔭᕆᐊᖃᓐᖏᓚᖅ ᕿᒃᓵᖕᓂᕐᒧᑦ ᓇᓗᓁᒃᑯᑕᕆᓇᓱᐊᕐᓗᒋᑦ.

¹¹ ᐃᒡᓗᒧᑦ ᑐᖁᖓᔪᕐᑕᓕᖕᒧᑦ ᐃᑎᕐᑐᒃᓴᐅᓐᖏᓚᖅ. ᐃᒻᒥᓂᒃ ᓴᓗᒤᓕᑎᕐᑐᒃᓴᐅᓐᖏᓚᖅ, ᑐᖁᖓᔪᖅ ᐊᑖᑕᒋᒐᓗᐊᕈᓂᐅᒃ ᐊᓈᓇᒋᒐᓗᐊᕈᓂᐅᒡᓘᓐᓃᑦ,

¹² ᑐᐱᕐᒥᒃ ᐃᑦᔪᕐᓁᑐᕕᖁᑎᓐᓂᒃ ᓇᕐᕈᓇᕐᓯᑎᑦᓯᖁᓇᒍ ᑕᕝᕙᓐᖓᑦ ᐊᓂᓗᓂ ᑐᖁᖓᔪᕐᑕᓕᖕᒧᓪᓗ ᐃᑎᕐᒥᓗᓂ ᐃᑦᔪᕐᓇᕐᓯᑎᒃᑲᔭᕐᒪᒍ, ᑖᓐᓇ ᓂᐊᖁᐊᒍᑦ ᐅᕐᓱᒥᒃ ᑯᕝᕕᕆᔭᐅᓯᒪᖕᒪᑦ ᓂᕈᐊᕐᑕᐅᓂᕐᒥᒍᑦ ᒎᑎᒥᓄᑦ. ᐅᕙᖓ ᐊᑕᓂᐅᒐᒪ.

¹³ ᓄᓕᐊᕐᑖᕈᓂ, ᓄᓕᐊᕐᑖᕆᐊᖃᕐᐳᖅ ᐊᕐᓇᒥᒃ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᑐᒥᒃ.

¹⁴ ᓄᓕᐊᕐᑖᕆᔭᖓ ᐅᐃᒡᒐᕐᓂᐅᔭᕆᐊᖃᓐᖏᓚᖅ, ᐊᕕᑕᐅᓂᑰᔭᕆᐊᖃᕋᓂᓗ, ᐊᒻᒪᓗ ᑮᓇᐅᔭᓕᐅᕋᓱᖕᓂᕐᒧᑦ ᓄᓕᐊᒐᕕᓂᐅᔭᕆᐊᖃᓐᖏᓚᖅ, ᑭᓯᐊᓂ ᓄᓕᐊᕐᑖᕆᐊᖃᕐᐳᖅ ᐃᓅᖃᑎᒥᓂᑦ ᐱᔪᒥᒃ ᐊᕐᓇᒥᒃ ᐊᖑᒻᒧᑦ ᐊᒃᑐᑕᐅᓯᒪᖏᑦᑐᒥᒃ.

¹⁵ ᑍᒫᒃ ᐱᔭᕆᐊᖃᕐᐳᖅ ᕿᑐᕐᖓᖏᑦ ᐃᑦᔪᕐᓇᕐᑑᖁᓇᒋᑦ ᐃᓅᖃᑎᒥ ᐊᑯᕐᖓᓐᓂ. ᐅᕙᖓ ᐊᑕᓂᐅᒐᒪ, ᑖᓐᓇ ᐃᑦᔪᕐᓁᑎᓯᒪᒐᒃᑯ.”

¹⁶ ᐊᑕᓂᐅᑉ ᒨᓯᓯ ᐃᒫᒃ ᐅᖃᐅᑎᕚ,

¹⁷ “ᐂᕉᓂ ᐅᖃᐅᑎᒍᒃ: ‘ᑍᒪᓐᖓᓕᒫᖅ ᑭᖑᕚᑎᑦ ᑎᒥᒥᒃᑎᒍᑦ ᐱᐅᓯᕐᓘᑎᓖᑦ ᒎᑎᒧᑦ ᓂᕿᒃᓴᒥ ᑐᓂᕐᕈᓯᕐᑐᒃᓴᐅᓐᖏᓚᑦ.

¹⁸ ᓇᓪᓕᐊᑦ ᐱᐅᓯᕐᓘᑎᓕᒃ ᑐᓂᕐᕈᓯᕐᑎᑦᓯᔪᒃᓴᐅᓐᖏᓚᖅ: ᐃᒤᑦᑐᑦ; ᑕᐅᑐᖏᑦᑐᖅ, ᑐᓯᐊᑦᑐᕐᓘᓐᓃᑦ, ᑕᐅᑦᑐᖓᓘᓐᓃᑦ ᐱᐅᓯᕐᓱᖏᑦᑐᖅ, ᑎᒥᖓᓘᓐᓃᑦ ᐋᖅᑭᑦᓯᐊᕐᓯᒪᖏᑦᑐᖅ;

¹⁹ ᓇᓪᓕᐊᓪᓘᓐᓃᑦ ᐃᑎᒐᒥᒍᑦ ᐃᓚᑯᓕᒃ ᐊᒡᒐᒥᒍᓪᓘᓐᓃᑦ ᐃᓚᑯᓕᒃ,

²⁰ ᓇᓪᓕᐊᓪᓘᓐᓃᑦ ᐱᕆᖓᔪᖅ, ᐱᕈᔪᐃᑦᑐᕐᓘᓐᓃᑦ, ᐃᔨᓗᒃᑐᕐᓘᓐᓃᑦ, ᐊᒥᕐᓗᒃᑐᕐᓘᓐᓃᑦ ᒪᕿᔪᓂᒡᓘᓐᓃᑦ ᐊᔪᐊᕐᑐᖅ, ᐃᒡᔪᐃᕐᓯᒪᔪᕐᓘᓐᓃᑦ.

²¹ ᐂᕉᓂᐅᑉ ᑐᓂᕐᕈᓯᕐᑎᑦᓯᔨᐅᑉ ᑭᖑᕚᖏᑦ ᐱᐅᓯᑐᖃᕐᒥᑐᑦ ᐃᓕᖅᑯᓯᖃᖏᑦᑐᖅ ᐃᑭᑕᒃᓴᓂᒃ ᑐᓂᕐᕈᓯᕐᑎᑦᓯᔭᕆᐊᖃᓐᖏᓚᑦ ᐊᑕᓂᕐᒧᑦ. ᑎᒥᒥᒍᑦ ᐱᐅᓯᕐᓱᖏᒻᒪᑦ, ᒎᑎᒥ ᓂᕿᒃᓴᖓᓂᒃ ᑐᓂᕐᕈᓯᕆᐊᖃᓐᖏᓚᖅ ᓇᔪᒐᖓᓅᕆᐊᖃᓐᖏᓚᕐᓗ.

²² ᑍᒤᑦᑐᑦ ᓂᕆᔪᓐᓇᕐᐳᑦ ᑐᓂᕐᕈᑎᕕᓂᕐᓂᒃ ᒎᑎᒧᑦ, ᐃᑦᔪᕐᓁᑦᑐᓂᒃ ᓂᕿᒃᓴᓂᒃ ᑐᓂᕐᕈᑕᐅᓯᒪᔪᓂᒃ, ᐊᒻᒪᓗ ᐃᑦᔪᕐᓁᓐᓂᕐᓴᓂᒃ ᓂᕿᒃᓴᓂᒃ;

²³ ᑎᒥᒥᒍᑦ ᐱᐅᓯᕐᓘᑎᖃᕋᒥ, ᐃᑦᔪᕐᓁᑦᑐᕕᐅᑉ ᑕᓗᕐᔪᐊᖓᓄᑦ ᖃᒡᓕᔭᕆᐊᖃᓐᖏᓚᖅ, ᑐᓂᕐᕈᓯᕐᕕᒡᓘᓐᓃᑦ ᐅᐸᒋᐊᖃᓐᖏᓛ, ᓈᓚᖏᒃᑯᓂ ᐃᑦᔪᕐᓁᑦᑐᕕᖁᑎᒐ ᐃᑦᔪᕐᓇᓯᑎᓐᓂᐊᕐᐹ. ᐅᕙᖓ ᐊᑕᓂᐅᒐᒪ, ᑖᒃᑯᓂᖓᓗ ᐃᑦᔪᕐᓁᑎᑦᓯᕗᖓ.’”

²⁴ ᑕᒪᒃᑯᓂᖓ ᒨᓯᓯᐅᑉ ᐂᕉᓂ ᐃᕐᓂᖏᓪᓗ ᐃᓴᕆᐊᓕᒥᐅᓕᒫᓪᓗ ᐅᖃᐅᑎᕔᑦ.