ᒨᓯᓯ ᐱᖓᔪᖏᑦ 20 - ᐊᒡᓔᑦ ᐃᑦᔪᕐᖕᓁᑦᑐᑦ

ᓱᒋᐊᕐᑕᐅᓂᖅ ᐊᔪᕐᓂᖅ ᐱᑦᔪᑎᒋᓪᓗᒍ

¹ ᐊᑕᓂᐅᑉ ᒨᓯᓯ ᐅᖃᕐᕕᒋᕚ,

² “ᐃᓴᕆᐊᓕᒥᐅᑦ ᐅᖃᐅᑎᒃᑭᑦ, ᐃᓴᕆᐊᓕᒥᐅᑦ ᐃᓴᕆᐊᓕᒥᐅᖑᖏᑦᑐᓪᓘᓐᓃᑦ ᐃᓴᕆᐊᓕᒥ ᓄᓇᖃᕐᑐᑦ ᕿᑐᕐᖓᒥᖕᓂᒃ ᑐᓂᕐᕈᑎᖃᕐᑐᖅ ᒎᑎᓐᖑᐊᒧᑦ ᒧᓕᑭᒧᑦ ᑐᖁᑕᐅᔭᕆᐊᖃᕐᐳᑦ. ᓄᓇᖅᑲᑎᒌᑦ ᒥᓪᓗᕐᓗᒍ ᑐᖁᑕᒃᓴᕆᕚᑦ.

³ ᑍᒤᓕᐅᕐᑐᖅ ᐃᓄᖁᑎᒋᔪᓐᓃᕐᓂᐊᕐᐸᕋ, ᐃᓅᖃᑎᖏᓐᓂᓪᓗ ᐊᕕᑕᐅᑎᓐᓂᐊᕐᐸᕋ; ᕿᑐᕐᖓᒥᓂᒃ ᑐᓂᕐᕈᑎᖃᕐᑐᖅ ᒎᑎᓐᖑᐊᒧᑦ ᒧᓕᑭᒧᑦ; ᑐᐱᕐᒥ ᑲᑎᒪᕕᖕᒥ ᐃᑦᔪᕐᓁᑦᑐᕕᖁᑎᒐ ᐃᑦᔪᕐᓇᕐᓯᑎᒻᒪᒍ, ᐊᑎᕋᓗ ᓇᕐᕈᓇᕐᓯᑎᑦᓱᓂᐅᒃ.

⁴ ᐃᓄᐃᑦ ᓄᓇᖅᑲᑎᒌᑦ ᑲᒪᖏᑉᐸᑕ ᐃᓄᖏᑦ ᕿᑐᕐᖓᒥᖕᓂᒃ ᑐᓂᕐᕈᑎᖃᕐᑐᒥᒃ ᒎᑎᓐᖑᐊᒧᑦ ᒧᓕᑭᒧᑦ, ᑐᖁᑕᐅᖏᑉᐸᓪᓗ,

⁵ ᐅᕙᖓ ᓇᖕᒥᓂᖅ ᐊᑭᕋᕐᑐᕐᓂᐊᕐᐸᕋ ᐃᒡᓗᒥᐅᖃᑎᖏᓪᓗ, ᐃᓄᖁᑎᓐᓂᒡᓗ ᑍᔪᓐᓁᕐᓂᐊᕐᐸᕋ ᒪᓕᒃᑎᓕᒫᖏᓪᓗ, ᐊᓯᓐᓂᐊᕐᒪᑕ ᒎᑎᓐᖑᐊᒧᑦ ᒧᓕᑭᒧᑦ.

⁶ “ᓇᓪᓕᐊᓐᓂᒃ ᑕᑎᖃᕐᑐᖃᕐᐸᑦ ᑐᖁᖓᔪᓂᒃ ᐅᖃᖃᑎᖃᕐᐸᒃᑐᓂᒃ ᓇᓗᓇᕐᑐᓂᒡᓗ ᖃᐅᔨᒪᓇᓱᐊᕐᑎᒥᒃ ᑕᒪᒃᑯᓄᖓᓗ ᐊᓯᓐᓂᐊᕐᑎᑕᐅᓕᕐᐸᑕ, ᑍᒤᓕᐅᕐᑐᖅ ᐊᓚᕐᓂᐊᕐᐸᕋ ᐃᓄᖁᑎᒋᔪᓐᓃᕐᓗᒍᓗ.

⁷ ᐃᓕᑦᓯᓐᓂᒃ ᐃᑦᔪᕐᓁᑎᓐᓂᐊᕆᑦᓯ, ᐅᕙᖓ ᐊᑕᓂᐅᒐᒪ ᒎᑎᓯ.

⁸ ᒪᓕᒐᒃᓴᐅᖁᔭᒃᑲ ᐃᖅᑲᐅᒪᓯᒋᒃ ᒪᓕᒡᓗᒋᓪᓗ. ᐅᕙᖓ ᐊᑕᓂᐅᒐᒪ, ᐃᓕᑦᓯᓐᓂᒃ ᐃᑦᔪᕐᓁᑎᑦᓯᒐᒪ.

⁹ “ᓇᓕᕐᓯ ᐊᑖᑕᒥᓂᒃ ᐊᓈᓇᒥᓂᒡᓘᓐᓃᑦ ᓇᕐᕈᓇᕐᓂᕅᒃᐸᑦ, ᑖᓐᓇ ᑐᖁᑕᐅᔭᕆᐊᖃᕐᐳᖅ. ᐊᑖᑕᓂ ᐊᓈᓇᓂᓗ ᓇᕐᕈᓇᕐᑎᒻᒪᒋᒃ ᓇᖕᒥᓂᖅ ᑐᖁᑕᐅᑦᔪᑎᒃᓴᒥᓂᒃ ᐱᓕᕆᖕᒪᑦ.

¹⁰ “ᐊᖑᑦ ᐊᓯᓐᓂᐊᕐᐸᑦ ᐃᓅᖃᑎᒥ ᓄᓕᐊᖓᓂᒃ, ᑖᒃᑯᐊᒃ ᐊᖑᓪᓗ ᐊᕐᓇᕐᓗ ᐊᓯᓐᓂᐊᕐᑑᒃ ᑕᒪᕐᒥᒃ ᑐᖁᑕᐅᔭᕆᐊᖃᕐᐳᒃ.

¹¹ ᐊᖑᑦ ᐃᓐᓇᖓᖃᑎᖃᕐᐸᑦ ᐊᑖᑕᒥ ᓄᓕᐊᖓᓂᒃ, ᐊᑖᑕᓂ ᐅᐱᒋᖏᒻᒪᒍ ᑕᒪᕐᒥᒃ ᐊᖑᓪᓗ ᐊᕐᓇᕐᓗ ᑐᖁᑕᐅᔭᕆᐊᖃᕐᐳᒃ; ᓇᖕᒥᓂᖅ ᑐᖁᑕᐅᑦᔪᑎᒃᓴᓕᐅᕐᒪᑎᒃ.

¹² ᐊᖑᑦ ᐃᓐᓇᖓᖃᑎᖃᕐᐸᑦ ᐅᑯᐊᒥᓂᒃ, ᑖᒃᑯᐊᒃ ᑕᒪᕐᒥᒃ ᑐᖁᑕᐅᔭᕆᐊᖃᕐᐳᒃ, ᑍᒤᓕᐅᕐᓂᖓᒃ ᐱᐅᖏᑦᑐᐊᓘᖕᒪᑦ; ᓇᖕᒥᓂᖅ ᑐᖁᑕᐅᑦᔪᑎᒃᓴᓕᐅᕐᒪᑎᒃ.

¹³ ᐊᖑᑦ ᐃᓐᓇᖓᖃᑎᖃᕐᐸᑦ ᐊᖑᒻᒥᒃ ᐊᕐᓇᑎᑐᑦ ᐱᓗᒍ, ᑖᒃᑯᐊᒃ ᐱᓂᐊᕐᓂᖓᒃ ᐃᑦᔪᕐᓇᕐᑐᐊᓘᕗᖅ, ᑕᒪᕐᒥᒃ ᑖᒃᑯᐊᒃ ᑐᖁᑕᐅᔭᕆᐊᖃᕐᐴᒃ; ᓇᖕᒥᓂᖅ ᑐᖁᑕᐅᑦᔪᑎᒃᓴᓕᐅᕐᒪᑎᒃ.

¹⁴ ᐊᖑᑦ ᓄᓕᐊᕐᑖᕐᐸᑦ ᑕᒤᓐᓂᒃ ᐊᕐᓇᒥᒃ ᐊᓈᓇᖓᓂᒡᓗ, ᑕᒪᓐᓇ ᐱᐅᖏᑦᑐᐊᓘᖕᒪᑦ ᐊᖑᓪᓗ ᑖᒃᑯᐊᒡᓗ ᐊᓈᓇᒌᒃ ᐃᑯᒪᒧᑦ ᐃᑭᑕᐅᔭᕆᐊᖃᕐᐳᑦ, ᐱᐅᖏᑦᑐᓕᓂᐊᓗᒃ ᑕᒪᓐᓇ ᐃᓕᑦᓯᓐᓃᖁᓇᒍ.

¹⁵ ᐊᖑᑦ ᓄᓕᐊᖃᑎᖃᕐᐸᑦ ᓂᕐᔪᑎᒥᒃ, ᑍᒤᓕᐅᕐᑐᖅ ᑐᖁᑕᐅᔭᕆᐊᖃᕐᐳᖅ, ᓂᕐᔪᑎᓗ ᑖᓐᓇ ᑐᖁᑕᐅᔭᕆᐊᖃᕆᕗᖅ.

¹⁶ ᐊᕐᓇᖅ ᓂᕐᔪᑎᒧᑦ ᒪᓂᒃᐸᑦ ᓄᓕᐊᕐᑕᐅᔪᒪᓗᓂ, ᑕᒪᕐᒥᒃ ᑖᒃᑯᐊᒃ ᐊᕐᓇᕐᓗ ᓂᕐᔪᑎᓗ ᑐᖁᑕᐅᔭᕆᐊᖃᕐᐳᒃ, ᓇᖕᒥᓂᖅ ᑐᖁᑕᐅᑦᔪᑎᒃᓴᒥᒃ ᐱᓕᕆᖕᒪᑎᒃ.

¹⁷ “ᐊᖑᑦ ᓄᓕᐊᓂᒃᐸᑦ ᓇᔭᖕᒥᓂᒃ, ᐊᑖᑕᒥ ᐸᓂᖓᓂᒡᓘᓐᓃᑦ, ᐊᓈᓇᒥ ᐸᓂᖓᓂᒡᓘᓐᓃᑦ, ᑖᒃᑯᐊᒃ ᐱᖃᑎᒌᒃᐸᑎᒃ, ᑕᒪᓐᓇ ᓇᕐᕈᓇᕐᓂᐅᕗᖅ ᐃᓄᐃᑦ ᑕᒃᑯᐊᓂ ᐃᓅᖃᑎᒌᓂᑦ ᐊᕕᑕᐅᔭᕆᐊᖃᕐᐳᒃ; ᐊᖑᑎᐅᑉ ᓇᔭᓂ ᐅᐱᒋᖏᒻᒪᒍ ᑖᓐᓇᓗ ᐸᓯᔭᒃᓴᐅᕗᖅ.

¹⁸ ᐊᖑᑦ ᐃᓐᓇᖓᓗᓂ ᐱᖃᑎᖃᕐᐸᑦ ᐊᕐᓇᒥᒃ ᐊᐅᓈᕐᑐᒥᒃ, ᑕᒪᕐᒥᒃ ᑖᒃᑯᐊᒃ ᐃᓅᖃᑎᒌᓂᑦ ᐃᓚᒋᔭᐅᔪᓐᓃᕆᐊᖃᕐᐴᒃ.

¹⁹ “ᐊᖑᑦ ᐃᓐᓇᖓᖃᑎᖃᕐᐸᑦ ᐊᓈᓇᖓᑕ ᓄᑲᖓᓂᒃ ᐊᖓᔪᐊᓂᒡᓘᓐᓃᑦ ᐊᑖᑕᖓᑕᓘᓐᓃᑦ ᓇᔭᖓᓂᒃ, ᐃᓚᒋᔭᒥᓂᒃ ᓇᕐᕈᓇᕐᓯᑎᑦᓯᕗᖅ, ᑕᒪᕐᒥᒃ ᑕᕝᕙ ᐸᓯᔭᒃᓴᐅᓕᕐᓂᐊᕐᐳᑦ.

²⁰ ᐊᖑᑦ ᐃᓐᓇᖓᖃᑎᖃᕐᐸᑦ ᐊᒃᑲᖕᒥ ᐊᖓᖕᒥᓘᓐᓃᑦ ᓄᓕᐊᖓᓂᒃ, ᐊᒃᑲᓂ ᐊᖓᓂᓘᓐᓃᑦ ᐅᐱᓐᓇᕐᑎᓐᖏᓛ, ᑍᒤᓕᐅᕐᑐᖅ ᐸᓯᔭᒃᓴᐅᕗᖅ; ᕿᑐᕐᖓᕐᑖᖏᓪᓗᑎᒃ ᑐᖁᔪᒫᕐᐴᒃ.

²¹ ᐊᖑᑦ ᓄᓕᐊᕐᑖᕐᐸᑦ ᓄᑲᕐᒥ ᐊᖓᔪᒥᓘᓐᓃᑦ ᓄᓕᐊᖓᓂᒃ ᑕᒪᓐᓇ ᐃᑦᔪᕐᓇᕐᒪᑦ, ᓄᑲᓂ ᐊᖓᔪᓂᓘᓐᓃᑦ ᐅᐱᒋᖏᒻᒪᒍ, ᑖᒃᑯᐊᒃ ᕿᑐᕐᖓᕐᑖᕐᓂᐊᓐᖏᓚᒃ.

²² “ᒪᓕᒐᒃᓴᐅᖁᔭᒃᑲ ᐱᖁᔭᒃᑲᓗ ᐃᖅᑲᐅᒪᑦᓯᐊᕐᓗᒋᑦ ᒪᓕᑦᓯᐊᕐᓯᐅᒃ ᐃᓕᑦᓯᓐᓄᑦ ᓄᓇᑖᕆᑎᑕᓐᓂ ᐃᓂᖃᑦᓯᐊᖁᓪᓗᓯ ᐊᐅᓪᓚᕐᑎᑕᐅᖁᓇᓯᓗ.

²³ ᓄᓇᖃᕐᑐᑦ ᑕᒫᓂ ᐃᓅᖃᑎᒌᒡᔪᐊᑦ ᐱᐅᓯᑐᖃᖏᓐᓂᒃ ᐃᓕᖅᑯᓯᖃᖁᓐᖏᓚᑦᓯ, ᑍᒃᑯᐊ ᑕᒫᓐᖓᑦ ᐊᐅᓪᓚᕐᑎᓐᓂᐊᕐᐸᒃᑲ, ᐱᐅᖏᑦᑐᐊᓗᖕᓂᒃ ᑕᒪᒃᑯᓂᖓ ᐱᐅᓯᖃᓚᐅᕐᒪᑕ. ᖁᕕᐊᒋᓐᖏᑕᓐᓂᒃ ᐊᑐᓚᐅᕐᒪᑕ.

²⁴ ᐃᓕᑦᓯᓕ ᐅᖃᐅᑎᕙᑦᓯ ᓄᓇ ᐱᑖᕆᓂᐊᕋᓯᐅᒃ; ᐃᓕᑦᓯᓐᓄᑦ ᑐᓂᓂᐊᕋᒃᑯ, ᓄᓇ ᐊᔪᕐᓴᕐᓇᖏᑦᑐᖅ ᐱᕈᕐᕕᐅᑦᓯᐊᕈᓐᓇᕐᑐᕐᓗ ᐱᑖᕆᓂᐊᕋᑦᓯᐅᒃ. ᐅᕙᖓ ᐊᑕᓂᐅᒐᒪ ᒎᑎᓯ, ᓴᓂᕐᕙᒃᑎᓯᒪᒐᑦᓯ ᐃᓅᖃᑎᒌᒡᔪᐊᓂᑦ.

²⁵ ᑍᒤᒻᒪᑦ ᐅᑦᔨᕈᓱᑦᓯᐊᓕᕆᑦᓯ ᓂᕐᔪᑎᓂᒃ ᓴᓗᒪᔪᓂᒃ ᓴᓗᒤᑦᑐᓂᒡᓗ, ᑎᖕᒥᐊᓂᒡᓗ ᓴᓗᒪᔪᓂᒃ ᓴᓗᒤᑦᑐᓂᒡᓗ, ᐃᓕᑦᓯᓐᓂᒃ ᐃᑦᔪᕐᓇᕐᓯᑎᓐᓂᐊᕋᓯ ᓂᕐᔪᑎᑦ ᓄᓇᒦᑦᑐᑦ ᐱᓪᓗᒋᑦ ᑎᖕᒥᐊᓪᓘᓐᓃᑦ ᓄᓇᒥᓘᓐᓃᑦ ᐹᕐᖑᕐᑐᑦ ᐱᑦᔪᑎᒋᓗᒋᑦ ᑕᒪᒃᑯᐊ ᐅᖃᐅᓯᕆᓗᒋᑦ ᐊᕕᒃᑐᑦᓯᐊᓚᐅᕋᒃᑭᑦ ᐃᑦᔪᕐᓇᕐᑐᑦ ᐃᓕᑦᓯᓐᓄᑦ.

²⁶ ᐃᓕᑦᓯᓐᓂᒃ ᐃᑦᔪᕐᓁᑎᒋᑦᓯ ᐅᕙᖓ ᐊᑕᓂᐅᒐᒪ ᐃᑦᔪᕐᓁᑦᑐᖅ. ᐃᓅᖃᑎᒌᒡᔪᐊᓂᑦ ᑎᒍᓚᐅᕋᑦᓯ ᓇᖕᒥᓂᕆᔪᒪᓪᓗᓯ.

²⁷ “ᐊᖑᑦ ᐊᕐᓇᕐᓘᓐᓃᑦ ᑐᖁᖓᔪᓂᒃ ᐅᖃᖃᑎᖃᕈᓐᓇᕋᓱᐊᕐᑐᖅ ᓇᓗᓇᕐᑐᓂᒡᓘᓐᓃᑦ ᖃᐅᔨᒪᑦᔪᑎᖃᕋᓱᐊᕐᑐᖅ ᓄᓇᑦᓯᓐᓃᑦᑐᖅ, ᑐᖁᑕᐅᔭᕆᐊᖃᕐᐳᖅ ᐅᔭᖅᑲᓄᑦ ᒥᓪᓗᕐᑕᐅᓗᓂ ᑐᖁᑕᐅᓕ. ᓇᖕᒥᓂᖅ ᑐᖁᑕᐅᑦᔪᑎᒃᓴᒥᓂᒃ ᐱᓇᓱᐊᕐᒪᑦ.”