ᒨᓯᓯ ᐱᖓᔪᖏᑦ 19 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᖁᔭᑦ ᐃᑦᔪᕐᓁᑦᑐᒃᓴᐅᓂᕐᒧᑦ ᐋᖅᑭᒃᓯᒪᑦᓯᐊᕐᓂᕐᒧᓪᓗ

¹ ᐊᑕᓂᖅ ᒨᓯᓯᒧᑦ ᐅᖃᕐᐳᖅ,

² “ᐃᓴᕆᐊᓕᒥᐅᓕᒫᑦ ᐃᒫᒃ ᐅᖃᐅᑎᒃᑭᑦ, ᐃᑦᔪᕐᓁᒋᑦᓯ, ᐅᕙᖓ, ᐊᑕᓂᖅ ᒎᑎᓯ, ᐃᑦᔪᕐᓁᓐᓇᒪ.

³ ᑕᒪᑦᓯ ᐊᑐᓂᑦ ᐊᓈᓇᓯ ᐊᑖᑕᓯᓗ ᐅᐱᒋᑦᓯᐊᕆᐊᖃᕐᐸᓯ, ᓴᐸᑎᓗ ᑲᒪᒋᑦᓯᐊᕐᓗᒍ ᑍᒫᒃ ᐱᖁᔨᓯᒪᒐᒪ, ᐅᕙᖓ ᐊᑕᓂᐅᒐᒪ ᒎᑎᓯ.

⁴ “ᒎᑎᓐᖑᐊᑦ ᓵᕝᕕᒋᓂᐊᕋᓯᒋᒃ; ᒎᑎᓐᖑᐊᓂᒡᓘᓐᓃᑦ ᓴᕕᕋᔭᖕᓂᒃ ᓴᓇᔭᕆᐊᖃᓐᖏᓚᓯ ᒎᑎᒋᓂᐊᕐᑕᑦᓯᓐᓂᒃ, ᐅᕙᖓ ᐊᑕᓂᐅᒐᒪ ᒎᑎᓯ.

⁵ “ᐊᑕᓂᕐᒧᑦ ᑐᓂᕐᕈᓯᕈᑦᓯ ᑐᖁᑕᒃᓴᒥᒃ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᒥᒃ, ᑐᓂᕐᕈᑎᒋᓯᐅᒃ ᐱᖁᔭᐅᓯᒪᔪᑦ ᒪᓕᑦᓯᐊᕐᓗᒋᑦ ᐃᓚᓕᐅᕐᑕᐅᑦᓯᐊᖁᓪᓗᒍ ᐃᓕᑦᓯ ᐱᓪᓗᓯ.

⁶ ᓂᕆᔭᐅᓗᓂ ᓄᖑᑕᐅᔭᕆᐊᖃᕐᐳᖅ ᐅᓪᓗᒥ ᑕᕝᕙᓂ ᑐᓂᕐᕈᓯᕐᕕᒋᔭᑦᓯᓐᓂ, ᐅᓪᓘᑉ ᐂᑉᐸᖓᓂᓘᓐᓃᑦ; ᐊᒥᐊᒃᑯᖃᕐᐸᑦ ᐅᓪᓗᐃᑦ ᐱᖓᔪᐊᓐᓂ, ᐃᑯᒪᒧᑦ ᓄᖑᑕᐅᔭᕆᐊᖃᕐᐳᖅ.

⁷ ᐅᓪᓗᐃᑦ ᐱᖓᔪᐊᓐᓂ ᓂᕆᔭᐅᒃᐸᑦ, ᑕᕝᕙ ᐃᑦᔪᕐᓇᕐᓯᕗᖅ ᑐᓂᕐᕈᑕᐅᓯᒪᓂᖓᓗ ᐃᓚᓕᐅᕐᑕᐅᓂᐊᓐᖏᓚᖅ.

⁸ ᓇᓪᓕᐊᑦ ᑍᒤᑦᑐᒥᒃ ᓂᕆᔪᖅ, ᑖᓐᓇ ᐸᓯᔭᒃᓴᐅᕗᖅ ᐃᑦᔪᕐᓇᕐᑎᑦᓯᖕᒪᑦ ᐊᑕᓂᕐᒧᑦ ᐃᑦᔪᕐᓁᑐᒥᒃ; ᑖᓐᓇᓗ ᐊᕕᑕᐅᔭᕆᐊᖃᕐᐳᖅ.

⁹ “ᓄᓇᒥ ᐱᕈᕐᓯᐊᓂᒃ ᓂᕿᒃᓴᓂᒃ ᑲᑎᕐᓱᐃᒍᕕᑦ, ᓄᓇᖁᑎᕕᑦ ᑭᒡᓕᒻᒪᕆᐊᓄᑦ ᑲᑎᕐᓱᐃᔭᕆᐊᖃᓐᖏᓚᑎᑦ, ᓇᑲᑎᕐᓯᒪᖏᑦᑐᑦ ᐊᒥᐊᒃᑯᑎᑦ ᐅᑎᕐᕕᒋᔭᒃᓴᕆᓐᖏᓚᑎᑦ.

¹⁰ ᐱᕈᕐᓰᕖᑦ ᐸᐅᕐᖓᓕᒃ ᑲᑎᕐᓱᐃᕕᒋᒍᕕᐅᒃ, ᕿᒪᒃᑕᑎᑦ ᐸᐅᕐᖎᑦ ᐅᑎᕐᕕᒋᔭᕆᐊᖃᓐᖏᓚᑎᑦ. ᐊᒥᐊᒃᑯᒋᓕᒃᑭᑦ ᐊᔪᕐᓴᕐᑐᓄᑦ, ᑕᒫᓂᓗ ᓄᓇᖃᖏᑦᑐᓄᑦ. ᐅᕙᖓ ᐊᑕᓂᐅᒐᒪ ᒎᑎᓯ.

¹¹ “ᑎᒡᓕᒃᑐᒃᓴᐅᓐᖏᓚᑎᑦ, ᓴᒡᓗᔪᒃᓴᐅᓇᒃᓗ, ᓯᓔᕐᕆᒃᓯᔪᒃᓴᐅᓇᒡᓗ ᐊᓯᖕᓂᒃ.

¹² ᐊᖏᕐᓗᑎᑦ ᓱᓕᓂᕋᕈᑎᖃᕆᐊᖃᓐᖏᓚᑎᑦ ᐅᕙᖓ ᐊᑎᓐᓂᒃ, ᐊᖏᕈᑎᒋᔭᕐᓂᒃ, ᓱᓕᖏᒃᑯᕕᑦ ᒎᑎᕕᑦ ᐊᑎᖓ ᓇᕐᕈᓇᕐᓯᑎᓐᓂᐊᕋᕕᐅᒃ, ᐅᕙᖓ ᐊᑕᓂᐅᒐᒪ.

¹³ “ᐃᓅᖃᑎᖕᓂᒃ ᓯᓔᕐᕆᒃᓯᔪᒃᓴᐅᓐᖏᓚᑎᑦ, ᐱᖁᑎᖏᓐᓂᒡᓗ ᑎᒡᓕᒡᕕᒋᔭᒃᓴᕆᓐᖏᓚᑦ ᐃᖅᑲᓁᔭᕐᑎᑕᕐᓂᒃ ᐊᑭᓖᑦᑍᓕᒪᔪᒃᓴᐅᓐᖏᓚᑎᑦ ᖃᐅᑦᓯᐊᕆᑦᑍᓕᓗᒍ ᐊᒡᓛᑦ.

¹⁴ ᑐᓵᖏᑦᑐᒥᒃ ᐅᖃᕐᓂᓘᑎᖃᕐᓂᐊᕐᓇᒃ, ᐅᕝᕙᓘᓐᓃᑦ ᑕᐅᑐᖏᑦᑐᒥᒃ ᐹᓪᓚᒍᑎᒃᓴᓕᐅᕐᓯᓂᐊᕐᓇᒃ, ᒎᑎ ᓯᕘᕋᒋᒍᒃ, ᐅᕙᖓ ᐊᑕᓂᐅᒐᒪ.

¹⁵ ᓱᓕᑦᓯᐊᕐᑐᒥᒃ ᐱᓂᐊᕐᓂᖃᕆᑦ; ᐃᓔᓐᓇᕐᓯᐅᕐᓂᐊᕐᓇᒃ ᐃᓄᒃ ᐊᔪᕐᓴᕐᑐᑦ ᐱᓪᓗᒋᑦ ᐊᔪᕐᓴᖏᑦᑐᓪᓗ ᐱᓪᓗᒋᑦ, ᐃᓅᖃᑎᑎᑦ ᐊᑦᔨᒌᒃᑐᒥᒃ ᐱᓂᐊᕐᓂᖃᕐᕕᒋᔭᕆᐊᖃᕐᐸᑎᑦ.

¹⁶ ᐅᖃᐅᓯᕐᓗᖕᒥᒃ ᐃᓅᖃᑎᖕᓂᒃ ᐱᐅᓐᖏᑎᑦᓯᔪᒥᒃ ᓯᐊᒻᒪᕐᑎᑦᓯᔭᕆᐊᖃᓐᖏᓚᑎᑦ ᐃᓅᖃᑎᖕᓄᑦ. ᐃᓅᖃᑎᕕᓪᓗ ᐃᓅᓯᖓᓂᒃ ᑲᑉᐱᐊᓇᕐᑐᒦᑎᑦᓯᔭᕆᐊᖃᓐᖏᓚᑎᑦ. ᐅᕙᖓ ᐊᑕᓂᐅᒐᒪ.

¹⁷ “ᐃᓅᖃᑎᖕᓂᒃ ᐃᓗᒃᑯᑦ ᖀᒥᒍᓱᒃᑐᒃᓴᐅᓐᖏᓚᑎᑦ. ᐃᓅᖃᑏᑦ ᓱᐊᒍᓐᓇᕐᐸᑦ ᓱᓕᓗᑎᑦ ᐸᓯᔭᒃᓴᐅᓂᖓᓂᒃ ᐱᖃᓯᐅᑦᔭᐅᓯᒪᖁᓇᒃ.

¹⁸ ᐊᑭᓂᐊᕈᒪᔪᒃᓴᐅᓐᖏᓚᑎᑦ, ᓂᓐᖓᒃᓯᒪᕕᖃᕐᓂᐊᕐᓇᒡᓗ ᐃᓅᖃᑎᖕᓂᒃ, ᐃᓅᖃᑎᖕᓂᒡᓕ ᓇᒡᓕᒍᓱᒃᑐᒃᓴᐅᕗᑎᑦ ᐃᓕᒃᑐᑦ ᓇᒡᓕᒋᓗᒍ. ᐅᕙᖓ ᐊᑕᓂᐅᒐᒪ.

¹⁹ “ᒪᓕᒐᒃᓴᐅᖁᔭᒃᑲ ᐃᖅᑲᐅᒪᓯᒋᒃ ᓂᕐᔪᑎᓂᒃ ᐊᑦᔨᒌᖏᑦᑐᓂᒃ ᓄᓕᐊᕐᑎᑦᓯᔪᒃᓴᐅᓐᖏᓚᓯ. ᓄᓇᖁᑏᑦ ᐱᕈᕐᓰᕕᒋᔭᕆᐊᖃᓐᖏᓚᑦ ᐱᕈᕐᓯᐊᒃᓵᖕᓂᒃ ᒪᕐᕉᖕᓂᒃ ᐊᑦᔨᒌᖏᑦᑑᖕᓂᒃ ᑲᑎᓐᖓᓗᒋᑦ. ᐊᓐᓄᕌᕐᓯᒪᔭᕆᐊᖃᓐᖏᓚᑎᑦ ᖃᓪᓗᓈᕐᑕᓂᒃ ᐊᑦᔨᒌᖏᑦᑐᓂᒃ ᐊᑕᐅᑦᓯᒃᑯᑦ.

²⁰ “ᐊᖑᑦ ᓄᓕᐊᕐᐸᑦ ᐊᕐᓇᒥᒃ ᐱᔨᒥᒃ ᓂᐅᕕᐊᖑᓯᒪᓂᒃᑯᑦ, ᐊᓯᐊᑕᓗ ᓄᓕᐊᒃᓴᕆᓗᓂᐅᒃ ᐊᕐᓇᖅ ᐊᑭᓕᕐᑕᐅᓯᒪᖏᓪᓗᓂ, ᐃᒡᓗᒥᓪᓗ ᐊᓂᑎᑕᐅᓯᒪᖏᓪᓗᓂ, ᑖᒃᑯᐊᒃ ᓱᒋᐊᕐᑕᐅᔭᕆᐊᖃᕐᐴᒃ ᑭᓯᐊᓂᓕ ᑐᖁᑕᐅᔭᕆᐊᖃᓐᖏᓚᒃ ᐊᕐᓇᖅ ᓯᐊᓛᖑᖕᒪᑦ ᓂᐅᕕᐊᖑᓯᒪᓪᓗᓂ.

²¹ ᐊᖑᓪᓕ ᑖᓐᓇ ᓰᐱᐅᑉ ᐊᖑᓴᓪᓗᖓᓂᒃ ᕾᑦᓯᔭᕆᐊᖃᕐᐳᖅ ᑐᐱᐅᑉ ᑲᑎᒪᕕᐅᑉ ᐃᑎᕐᑕᕐᕕᖓᓄᑦ ᐸᓯᔭᒃᓴᐅᓂᕐᒧᑦ ᐊᑭᓕᐅᑎᒃᓴᖅ ᑐᓂᕐᕈᑎᒋᓗᒍ ᐊᑕᓂᕐᒧᑦ.

²² ᓰᐱᐅᑉ ᐊᖑᓴᓪᓗᖓᓄᑦ ᐸᓯᔭᒃᓴᐅᓂᕐᒧᑦ ᐊᑭᓕᐅᑎᒃᓴᒧᑦ ᑐᓂᕐᕈᑎᒥᒃ ᑐᓂᕐᕈᓯᕐᑎᑦᓯᔨ ᐃᓱᒪᒋᔭᐅᔪᓐᓁᕐᕕᐅᑎᑦᓯᔭᕆᐊᖃᕐᐳᖅ ᐃᓄᖕᒥᒃ ᑖᑦᓱᒥᖓ ᐊᑕᓂᐅᑉ ᓵᖓᓂ ᐊᔪᕐᑐᓕᕆᓚᐅᕐᑕᖏᓐᓂᑦ, ᐊᔪᕐᓂᖏᑦ ᑕᕝᕙ ᐃᓱᒪᒋᔪᓐᓁᕐᑕᐅᓂᐊᕐᐳᑦ.

²³ “ᓄᓇᒃᓴᑦᓯᓐᓄᑦ ᑎᑭᒃᑯᕕᑦ ᓇᐹᕐᑐᒥᒡᓗ ᐸᐅᕐᖓᓕᒃᓴᒥᒃ ᐱᕈᕐᓰᒍᕕᑦ, ᐸᐅᕐᖓᖏᑦ ᓂᕆᔭᒃᓴᐅᔭᕆᐊᖃᓐᖏᓚᑦ; ᐊᕐᕌᒍᓂᒃ ᐱᖓᓱᓂᒃ ᐸᐅᕐᖓᖏᑦ ᓂᕆᔭᒃᓴᐅᔭᕆᐊᖃᓐᖏᓚᑦ.

²⁴ ᐊᕐᕌᒍᑦ ᓯᑕᒪᖓᓐᓂ ᐸᐅᕐᖓᖏᑦ ᐃᑦᔪᕐᓁᑦᑑᓕᕐᐳᑦ, ᑐᓂᕐᕈᑎᒃᓴᐅᓪᓗᑎᒃ ᐊᑕᓂᐅᑉ ᓂᕐᑐᕐᓴᐅᑦᔪᑎᒃᓴᖓᓄᑦ.

²⁵ ᐊᕐᕌᒍᓪᓕ ᑕᓪᓕᒪᖓᓐᓂ ᑕᕝᕙ ᓇᐹᕐᑑᑉ ᐸᐅᕐᖓᖏᑦ ᓂᕿᒃᓴᐅᕗᑦ, ᑍᒤᓕᐅᕈᑦᓯ ᐱᕈᕐᑎᑕᓯ ᐅᓄᕐᓂᕐᓴᐅᓂᐊᕐᐳᑦ, ᐅᕙᖓ ᐊᑕᓂᐅᒐᒪ ᒎᑎᓯ.

²⁶ “ᓂᕿᒥᒃ ᐊᐅᖏᕐᓯᒪᖏᑦᑐᒥᒃ ᓂᕆᔪᒃᓴᐅᓐᖏᓚᓯ. ᓇᓗᓇᕐᑐᓂᒃ ᖃᐅᔨᒪᓇᓱᐊᕐᓂᕐᒥᒃ ᐊᖓᒃᑰᓇᓱᐊᕐᓂᕐᒥᒡᓗ ᐊᑐᕐᑐᒃᓴᐅᓐᖏᓚᓯ.

²⁷ ᓄᔭᕐᐱᑦ ᓴᓂᕋᖏᒃ ᑭᐱᔭᕆᐊᖃᓐᖏᓚᑎᑦ ᐅᒥᒃᐱᓪᓘᓐᓃᑦ ᓯᓂᖏᑦ ᑭᐱᔭᕆᐊᖃᓐᖏᓚᑎᑦ.

²⁸ ᑎᒥᓯ ᕿᓕᕈᓕᕐᓱᕆᐊᖃᓐᖏᓚᓯ ᑐᖁᖓᔪᑦ ᐱᑦᔪᑎᒋᓗᒋᑦ, ᑲᑭᓂᓕᐅᕆᐊᖃᓐᖏᓚᓯᓘᓐᓃᑦ ᑎᒥᑦᓯᓐᓂ. ᐅᕙᖓ ᐊᑕᓂᐅᒐᒪ.

²⁹ “ᐸᓂᓯ ᓇᕐᕈᓇᕐᓯᑎᓐᓂᐊᕐᓇᒋᑦ ᒎᑎᓐᖑᐊᖃᕐᕕᖕᒥ ᓄᓕᐊᒐᓐᖑᕐᑎᓪᓗᒋᑦ; ᑍᒤᓕᐅᕈᑦᓯ ᓄᓇ ᓄᓕᐊᒐᕐᓂᒃ ᓂᐅᕕᐊᒃᓴᓂᒃ ᐃᓄᖃᓕᕐᓂᐊᕐᒪᑦ ᐱᐅᖏᑦᑐᓕᓂᐊᓗᖕᒥᒡᓗ ᑕᑕᓕᕐᓗᓂ.

³⁰ ᓴᐸᑎᓕᐊᕆᓯᒪᔭᒃᑲ ᑲᒪᒋᑦᓯᐊᕐᓯᒋᑦ ᐃᑦᔪᕐᓁᑎᑕᒃᑲᓗ ᑐᒃᓯᐊᕐᕖᑦ ᐅᐱᒋᑦᓯᐊᕐᓯᐅᒃ. ᐅᕙᖓ ᐊᑕᓂᐅᒐᒪ.

³¹ “ᐊᖓᒃᑰᓇᓱᐊᕐᑐᓂᒃ ᑕᑎᖃᕐᓂᐊᕋᓯ, ᑐᖁᖓᔪᓂᒡᓗ ᐅᖃᖃᑎᖃᕐᐸᒃᑐᑦ ᑕᑎᒋᓂᐊᕐᓇᒋᑦ, ᑍᒤᓕᐅᕈᑦᓯ ᑖᒃᑯᓄᖓ ᐃᑦᔪᕐᓇᕐᑎᑕᐅᓂᐊᕋᑦᓯ. ᐅᕙᖓ ᐊᑕᓂᐅᒐᒪ ᒎᑎᓯ.

³² “ᐃᓄᑐᕾᑦ ᐅᐱᒋᑦᓯᐊᕐᓯᐅᒃ, ᐃᓐᓇᑐᕾᓪᓗ ᑲᒪᒋᑦᓯᐊᕐᓗᒋᑦ, ᒎᑎᓯ ᓯᕘᕋᒋᓗᒍ. ᐅᕙᖓ ᐊᑕᓂᐅᒐᒪ.

³³ “ᐃᓴᕆᐊᓕᒥᐅᖑᖏᑦᑐᖅ ᓄᓇᑦᓯᓐᓂ ᓄᓇᖃᕐᐸᑦ, ᐱᑦᓯᐊᕐᕕᒋᓯᐅᒃ.

³⁴ ᐃᓴᕆᐊᓕᒥᐅᖑᖏᑦᑐᑦ ᓄᓇᑦᓯᓐᓂ ᓄᓇᖃᕐᐸᑕ, ᐃᓴᕆᐊᓕᒥᐅᖑᖃᑎᑦᓯᑐᑦ ᐱᔭᐅᔭᕆᐊᖃᕐᐳᑦ, ᓇᒡᓕᒋᓗᒋᑦ ᐃᓕᑦᓯᑐᑦ ᐃᓕᑦᓯᑦᑕᐅᖅ ᓄᓇᒋᓐᖏᑕᑦᓯᓐᓃᓚᐅᕋᑦᓯ ᐄᑦᔨᑉᑎᒥ; ᐅᕙᖓ ᐊᑕᓂᐅᒐᒪ ᒎᑎᓯ.

³⁵ “ᓱᓕᖏᑦᑐᓂᒃ ᐆᒃᑑᑎᓂᒃ ᐊᑐᕐᓂᐊᕋᓯ, ᓱᓇᑐᐃᓇᐅᑉ ᑕᑭᓂᖓᓂᒃ ᐆᒃᑐᕐᓯᒍᑦᓯ, ᐅᖁᒤᓐᓂᕐᓯᐅᑎᓂᒡᓘᓐᓃᑦ, ᐅᓄᕐᑐᓂᒃ ᓈᓮᑦᔪᑎᓂᒡᓘᓐᓃᑦ.

³⁶ ᑕᑭᓂᕐᓯᐅᑎᓂᒃ ᐆᒃᑑᑎᓂᒃ ᓱᓕᔪᓂᒃ ᐊᑐᖃᑦᑕᕆᐊᖃᕐᐳᓯ, ᐅᖁᒤᓐᓂᕐᓯᐅᑎᓂᒡᓗ ᓱᓕᑦᓯᐊᕐᑐᓂᒃ, ᐸᓂᕐᑐᒥᒡᓗ ᐅᖁᒤᓐᓂᕐᓯᐅᑎᓂᒃ, ᐃᒥᕐᒧᓪᓗ ᐆᒃᑑᑎᓂᒃ ᓱᓕᑦᓯᐊᕐᑐᓂᒃ. ᐅᕙᖓ ᐊᑕᓂᐅᒐᒪ ᒎᑎᓯ, ᐅᕙᖓ ᐊᐅᓪᓚᕐᑎᓚᐅᕐᐸᑦᓯ ᐄᑦᔨᑉᑎᒥᑦ.

³⁷ ᒪᓕᒐᒃᓴᐅᖁᔭᒃᑲ ᐃᖅᑲᐅᒪᑦᓯᐊᕐᓯᒋᑦ ᐱᖁᔭᒃᑲᓗ ᒪᓕᑦᓯᐊᕐᓗᒋᑦ, ᐅᕙᖓ ᐊᑕᓂᐅᒐᒪ.”