ᒨᓯᓯ ᐱᖓᔪᖏᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦ

ᓄᓕᐊᕐᓃᑦ ᐊᑐᖁᔭᐅᖏᑦᑐᑦ

¹ ᐊᑕᓂᖅ ᒨᓯᓯᒧᑦ ᐅᖃᕐᐳᖅ,

² “ᐃᓴᕆᐊᓕᒥᐅᑦ ᐃᒫᒃ ᐅᖃᐅᑎᒃᑭᑦ, ‘ᐊᑕᓂᐅᕗᖓ ᒎᑎᓯ.

³ ᐄᑦᔨᑉᑎᒥᐅᑦ ᐱᐅᓯᖏᑦ ᒪᓕᖕᓂᐊᕋᓯᒋᒃ, ᑍᒃᑯᐊ ᓄᓇᖃᑎᒋᓚᐅᕐᑕᑦᓯ, ᑬᓇᓂᒥᐅᓪᓗ ᐱᐅᓯᖏᑦ ᒪᓕᖕᓂᐊᕋᓯᒋᒃ ᑍᒃᑯᐊ ᓄᓇᖓᓐᓄᑦ ᐱᑎᓐᓂᐊᕋᑦᓯ, ᐱᐅᓯᖏᓐᓂᒃ ᒪᓕᒃᓴᕐᓂᐊᕋᓯ.

⁴ ᐱᖁᔭᒃᑲ ᓈᓚᒃᓯᒋᒃ ᒪᓕᒐᒃᓴᐅᖁᔭᒃᑲᓗ ᐅᑦᔨᕆᓯᒋᒃ, ᐊᑕᓂᐅᒐᒪ ᐃᓕᑦᓯ ᒎᑎᓯ.

⁵ ᒪᓕᒐᒃᓴᐅᖁᔭᒃᑲ ᐱᖁᔭᒃᑲᓗ ᐳᐃᒍᕐᓂᐊᕐᓇᒋᑦ, ᑖᒃᑯᓂᖓ ᓈᓚᒃᑐᖅ ᐃᓅᑦᔪᑎᖃᕐᓂᐊᕐᒪᑦ ᐅᕙᖓ ᐊᑕᓂᐅᒐᒪ.’

⁶ “ᓇᓪᓕᐊᑦ ᐃᓚᒥᓂᒃ ᓇᖕᒥᓂᕆᔭᒥᓂᒃ ᓄᓕᐊᕆᐊᖃᓐᖏᓚᖅ, ᓇᖕᒥᓂᖅ ᑲᓐᖑᓇᕐᓂᕆᖕᒪᒋᑦ: ᐅᕙᖓ ᐊᑕᓂᐅᒐᒪ!

⁷ ᐊᑖᑕᕕᑦ ᑲᓐᖑᓇᕐᓂᖓᓂᒃ ᐊᓈᓇᕕᓪᓘᓐᓃᑦ ᓴᖅᑭᑎᑦᓯᔪᒃᓴᐅᓐᖏᓚᑎᑦ. ᐊᓈᓇᒋᒐᕕᐅᒃ ᐊᓈᓇᕕᑦ ᑲᓐᖑᓇᕐᓂᖓ ᓴᖅᑭᑎᑕᒃᓴᕆᓐᖏᓚᑦ.

⁸ ᐊᑖᑕᕕᑦ ᓄᓕᐊᖓᑕ ᑲᓐᖑᓇᕐᓂᖏᓐᓂᒃ ᓴᖅᑭᑎᑦᓯᔪᒃᓴᐅᓐᖏᓚᑎᑦ; ᐊᑖᑕᕕᑦ ᑲᓐᖑᓇᕐᓂᕆᖕᒪᒍ.

⁹ ᓇᔭᒃᐱᑦ ᑲᓐᖑᓇᕐᓂᖏᓐᓂᒃ, ᐊᑖᑕᕕᑦ ᐸᓂᖓᓂᒃ, ᐊᓈᓇᕕᑦ ᐸᓂᖓᓂᒡᓘᓐᓃᑦ, ᐊᖏᕐᕋᑦᓯᓐᓂ ᐃᓅᔪᕕᓂᕐᒥᒡᓘᓐᓃᑦ ᐊᓯᐊᓂᒡᓘᓐᓃᑦ, ᑲᓐᖑᓇᕐᓂᖏᓐᓂᒃ ᓴᖅᑭᑎᑦᓯᔪᒃᓴᐅᓐᖏᓚᑎᑦ.

¹⁰ ᐃᕐᓂᕕᑦ ᐸᓂᖓᑕ ᑲᓐᖑᓇᕐᓂᖏᓐᓂᒃ, ᐸᓂᒃᐱᓪᓘᓐᓃᑦ ᐸᓂᖓᑕ ᑲᓐᖑᓇᕐᓂᖏᓐᓂᒃ; ᓴᖅᑭᑎᑦᓯᔪᒃᓴᐅᓐᖏᓚᑎᑦ ᑖᒃᑯᐊ ᐃᕝᕕᑦ ᓇᖕᒥᓂᖅ ᑲᓐᖑᓇᕐᓂᕆᒐᕕᒋᑦ.

¹¹ ᐊᑖᑕᕕᑦ ᓄᓕᐊᖓᑕ ᐸᓂᖓᑕ ᑲᓐᖑᓇᕐᓂᖓᓂᒃ, ᐊᑖᑕᕕᑦ ᐸᓂᒃᑖᕆᓯᒪᔭᖓᓂᒃ; ᓇᔭᒋᒐᕕᐅᒃ ᑖᑦᓱᒪ ᑲᓐᖑᓇᕐᓂᖓᓂᒃ ᓴᖅᑭᑎᑦᓯᔪᒃᓴᐅᓐᖏᓚᑎᑦ.

¹² ᐊᑖᑕᕕᑦ ᓇᔭᖓᑕ ᑲᓐᖑᓇᕐᓂᖏᓐᓂᒃ ᓴᖅᑭᑎᑦᓯᔭᕆᐊᖃᓐᖏᓚᑎᑦ; ᐊᑖᑕᕕᑦ ᓇᖕᒥᓂᕆᓪᓗᓂᐅᒃ ᐃᓚᒋᖕᒪᒍ.

¹³ ᐊᓈᓇᕕᑦ ᓄᑲᖓᑕ ᐊᖓᔪᖓᑕᓘᓐᓃᑦ ᑲᓐᖑᓇᕐᓂᖏᓐᓂᒃ ᓴᖅᑭᑎᑦᓯᔭᕆᐊᖃᓐᖏᓚᑎᑦ, ᐊᓈᓇᕕᑦ ᓇᖕᒥᓂᕆᓪᓗᓂᐅᒃ ᐃᓚᒋᖕᒪᒍ.

¹⁴ ᐊᑖᑕᕕᑦ ᓄᑲᖓᑕ ᐊᖓᔪᐊᑕᓘᓐᓃᑦ ᓄᓕᐊᖓᑕ ᑲᓐᖑᓇᕐᓂᖏᓐᓂᒃ ᓴᖅᑭᑎᑦᓯᔭᐊᕆᐊᖃᓐᖏᓚᑎᑦ. ᑖᑦᓱᒪ ᑖᓐᓇ ᓄᓕᐊᕆᖕᒪᒍ; ᐃᕝᕕᓪᓗ ᓇᖕᒥᓂᕆᓪᓗᒍ.

¹⁵ ᐅᑯᐊᕐᐱᑦ ᑲᓐᖑᓇᕐᓂᖏᓐᓂᒃ ᓴᖅᑭᑎᑦᓯᔭᕆᐊᖃᓐᖏᓚᑎᑦ, ᑖᓐᓇ ᐃᕐᓂᕐᐱᑦ ᓄᓕᐊᕆᖕᒪᒍ, ᑖᑦᓱᒪ ᑲᓐᖑᓇᕐᓂᖓ ᓴᖅᑭᑎᑕᒃᓴᕆᓐᖏᓚᑦ.

¹⁶ ᐊᖓᔪᕕᑦ ᓄᑲᕐᐱᓪᓘᓐᓃᑦ ᓄᓕᐊᖓᑕ ᑲᓐᖑᓇᕐᓂᖏᓐᓂᒃ ᓴᖅᑭᑎᑦᓯᔭᐊᕆᐊᖃᓐᖏᓚᑎᑦ; ᓄᑲᕐᐱᑦ ᐊᖓᔪᕕᓪᓘᓐᓃᑦ ᑲᓐᖑᓇᕐᓂᕆᖕᒪᒍ.

¹⁷ ᐊᕐᓇᐅᑉ ᓄᓕᐊᕐᓯᒪᔭᕕᑦ ᐸᓂᖓᓂᒃ ᐃᕐᖑᑕᖓᓂᒡᓘᓐᓃᑦ ᓄᓕᐊᕆᐊᖃᓐᖏᓚᑎᑦ, ᑖᑦᓱᒪᓘᓐᓃᑦ ᐃᕐᓂᖓᑕ ᐸᓂᖓᓂᒃ, ᐸᓂᖓᑕᓘᓐᓃᑦ ᐸᓂᖓᓂᒃ, ᑖᒃᑯᐊ ᓇᖕᒥᓂᕇᒃᓗᑎᒃ ᐃᓚᒌᖕᒪᑕ, ᑕᒪᓐᓇ ᐱᐅᖏᑦᑐᓕᓂᐅᖕᒪᑦ.

¹⁸ ᓄᓕᐊᕕᑦ ᓄᑲᖓᑕ ᐊᖓᔪᖓᑕᓘᓐᓃᑦ ᑲᓐᖑᓇᕐᓂᖏᓐᓂᒃ ᓴᖅᑭᑎᑦᓯᔭᕆᐊᖃᓐᖏᓚᑎᑦ ᓄᓕᐊᑦ ᐃᓅᓂᖓᓂ.

¹⁹ “ᐊᕐᓇᒥᒃ ᓄᓕᐊᕆᐊᖃᓐᖏᓚᑎᑦ ᑕᖅᑭᑕᒫᕐᓯᐅᑎᒥᒃ ᐊᐅᓈᕐᑎᓪᓗᒍ ᓴᓗᒤᑦᑑᖕᒪᑦ.

²⁰ ᐃᓅᖃᑎᕕᑦ ᓄᓕᐊᖓᓂᒃ ᓄᓕᐊᕆᐊᖃᓐᖏᓚᑎᑦ, ᑍᒤᓕᐅᕈᕕᑦ ᐃᓕᖕᓂᒃ ᓇᕐᕈᓇᕐᓯᑎᓐᓇᕕᑦ ᑖᑦᓱᒥᖓᓗ.

²¹ ᕿᑐᕐᖓᕐᓂᒃ ᑐᓂᕐᕈᑎᖃᕆᐊᖃᓐᖏᓚᑎᑦ ᒎᑎᓐᖑᐊᒧᑦ ᒧᓕᑭᒧᑦ, ᒎᑎᕕᑦ ᐊᑎᖓᓂᒃ ᓇᕐᕈᓇᕐᓯᑎᑦᓯᖁᓇᒃ, ᐅᕙᖓ ᐊᑕᓂᐅᒐᒪ.

²² ᐊᖑᒻᒥᒃ ᓄᓕᐊᕆᐊᖃᓐᖏᓚᑎᑦ ᐊᕐᓇᒥᒃ ᓄᓕᐊᕐᑐᑎᑐᑦ; ᑕᒪᓐᓇ ᒎᑎᒧᑦ ᐱᐅᖏᑦᑐᐊᓘᖕᒪᑦ.

²³ ᓂᕐᔪᑎᒥᒃ ᓄᓕᐊᕆᐊᖃᓐᖏᓚᑎᑦ ᐃᓕᖕᓂᒃ ᓇᕐᕈᓇᕐᓯᑎᓐᓂᐊᕋᕕᑦ. ᐊᕐᓇᖅ ᐃᒻᒥᓂᒃ ᒪᓂᔭᕆᐊᖃᓐᖏᓚᖅ ᓂᕐᔪᑎᒧᑦ ᓄᓕᐊᕐᑕᐅᔪᒪᓗᓂ; ᑍᒤᑦᑐᖅ ᑕᒻᒪᕐᓂᒻᒪᕆᐅᖕᒪᑦ.

²⁴ “ᐃᓕᑦᓯᓐᓂᒃ ᐃᑦᔪᕐᓇᕐᓯᑎᓐᓂᐊᕋᓯ ᓇᓪᓕᐊᓐᓂᒃ ᑖᒃᑯᓇᓐᖓᑦ ᐊᑐᕐᓂᑦᓯᓐᓄᑦ. ᐃᓅᖃᑎᒌᒡᔪᐊᑦ ᐊᐅᓪᓚᕐᑎᓐᓂᐊᕐᑕᒃᑲ ᑎᑭᓐᓂᐊᕐᑕᓯ ᑍᒤᓕᐅᕐᒪᑕ, ᐃᓕᖅᑯᓯᖏᓐᓄᑦ ᐃᑦᔪᕐᓇᕐᓯᑎᑕᐅᖁᓇᓯ.

²⁵ ᓄᓇᓘᓐᓃᑦ ᑕᒪᓐᓇ ᐃᑦᔪᕐᓇᕐᓯᑎᑕᐅᓯᒪᖕᒪᑦ, ᑍᒤᒻᒪᑦ ᓱᒋᐊᕐᐸᕋ ᐊᔪᕐᓃᑦ ᐱᓪᓗᒋᑦ, ᓄᓇᐅᓪᓗ ᐃᓄᓂ ᒥᕆᐊᕐᐰᑦ ᑕᒫᓐᖓᑦ.

²⁶ ᐃᓕᑦᓯᓕ ᒪᓕᒐᒃᓴᐅᖁᔭᒃᑲ ᐱᖁᔭᒃᑲᓗ ᐃᖅᑲᐅᒤᓐᓇᕐᓯᒋᒃ. ᐃᓴᕆᐊᓕᒥᐅᑦ ᐃᓴᕆᐊᓕᐅᖏᑦᑐᓪᓗ ᓄᓇᖅᑲᑎᓯ ᑕᒪᒃᑯᓂᖓ ᐃᑦᔪᕐᓇᕐᑐᓂᒃ ᐊᑐᕐᑍᓕᒋᑦᓯ.

²⁷ ᐃᓄᐃᑦ ᓄᓇᖃᓚᐅᕐᑐᑦ ᑎᑭᑕᑦᓯᓐᓂ ᑕᒪᒃᑯᓂᖓ ᐱᐅᖏᑦᑐᐊᓗᖕᓂᒃ ᐃᓕᖅᑯᓯᖃᓚᐅᕐᒪᑕ ᓄᓇ ᐃᑦᔪᕐᓇᕐᓯᓚᐅᕐᐳᖅ.

²⁸ ᐃᓕᑦᓯᑦᑕᐅᖅ ᓄᓇ ᑕᒪᓐᓇ ᐃᑦᔪᕐᓇᕐᓯᑎᒃᑯᑦᓯᐅᒃ ᑍᒃᑯᑎᑐᓇᖅ ᐊᐅᓪᓚᕐᑎᑕᐅᔪᒫᕆᕗᓯ, ᑕᒫᓃᓚᐅᕐᑐᑦ ᐃᓅᖃᑎᒌᒡᔪᐊᑦ ᐊᐅᓪᓚᕐᑎᑕᐅᓚᐅᕐᓂᖏᑎᑐᑦ.

²⁹ ᓇᓪᓕᐊᑦ ᐱᐅᖏᑦᑐᐊᓗᖕᓂᒃ ᑕᒪᒃᑯᓂᖓ ᐊᑐᕐᑐᖅ, ᐊᕕᑕᐅᔭᕆᐊᖃᕐᐳᖅ ᐃᓅᖃᑎᖏᓐᓂᑦ.

³⁰ “ᐊᑐᖁᔭᒃᑲ ᐃᖅᑲᐅᒪᑦᓯᐊᕐᓯᒋᒃ, ᑕᒫᓂᓗ ᓄᓇᖃᓚᐅᕐᑐᑦ ᐱᐅᓯᕆᓚᐅᕐᑕᖏᑦ ᑎᑭᓚᐅᕐᑎᓐᓇᓯ ᒪᓕᖕᓂᐊᕐᓇᒋᑦ, ᑕᒪᒃᑯᓂᖓ ᐃᓕᑦᓯᓐᓂᒃ ᐃᑦᔪᕐᓇᕐᓯᑎᓐᓂᐊᕋᓯ, ᐅᕙᖓ ᐊᑕᓂᐅᒐᒪ ᒎᑎᓯ!”