ᒨᓯᓯ ᐱᖓᔪᖏᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᐅᒃᑐᕐᑍᓕᓂᖅ

¹ ᐊᑕᓂᐅᑉ ᒨᓯᓯ ᐅᖃᐅᑎᕚ,

² ᐂᕉᓂ ᐃᕐᓂᖏᓪᓗ ᐅᖃᐅᑎᒃᑭᑦ ᐃᓴᕆᐊᓕᒥᐅᓕᒫᓪᓗ ᐃᒫᒃ: “ᐊᑕᓂᖅ ᐃᒫᒃ ᐱᖁᔨᕗᖅ:

³ ᐃᓴᕆᐊᓕᒥᐅᑦ ᓇᓪᓕᐊᑦ ᑐᓂᕐᕈᑎᖃᕐᐸᑦ ᐃᒻᒧᒃᓯᐅᒐᕐᒥᒃ, ᓰᐱᒥᒡᓘᓐᓃᑦ, ᒎᑦᓯᒥᒡᓘᓐᓃᑦ ᓄᓇᓕᖕᓂ ᓄᓇᓖᓪᓘᓐᓃᑦ ᓯᓚᑖᓂ,

⁴ ᑐᐱᐅᑉ ᑲᑎᒪᕕᐅᑉ ᐃᑎᕐᑕᕐᕕᖓᓄᐊᖏᑉᐸᒍ ᐊᑕᓂᕐᒧᑦ ᑐᓂᕐᕈᑎᖃᕐᐸᑦ ᑍᒤᓕᐅᕐᑐᖅ ᐸᓯᔭᒃᓴᐅᕗᖅ ᐊᐅᖕᒥᒃ ᑯᕕᓯᓂᖓᓄᑦ, ᐃᓅᖃᑎᒥᓂᑦ ᐊᕕᑕᐅᔪᒃᓴᐅᕗᖅ.

⁵ ᑕᒪᓐᓇ ᑍᒤᑉᐳᖅ ᐃᓴᕆᐊᓕᒥᐅᑦ ᐂᑦᑐᐃᖁᓪᓗᒋᑦ ᐊᑕᓂᕐᒧᑦ ᑕᒫᓂᑐᐃᓐᓇᖅ ᑐᓂᕐᕈᓯᕐᓂᕆᕙᓚᐅᕐᑕᒥᖕᓂᒃ, ᒫᓐᓇᓕ ᕾᑦᔪᑎᔭᕆᐊᖃᓕᕐᐰᑦ ᑐᓂᕐᕈᓯᕐᑎᑦᓯᔨᒧᑦ, ᐃᒫᒃ ᐊᑕᓂᕐᒧᑦ ᑐᐱᐅᑉ ᑲᑎᒪᕕᐅᑉ ᐃᑎᕐᑕᕐᕕᖓᓄᑦ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᒃᓴᓂᒃ ᑐᓂᕐᕈᑎᖃᕐᓗᑎᒃ.

⁶ ᑐᓂᕐᕈᓯᕐᑎᑦᓯᔨᐅᑉ ᐆᒪᔫᑉ ᐊᐅᖓ ᓯᕐᐸᕐᓴᕈᑎᒋᔭᕆᐊᖃᕐᐹ ᑐᓂᕐᕈᓯᕐᕕᖕᒧᑦ ᑐᐱᐅᑉ ᑲᑎᒪᕕᐅᑉ ᐃᑎᕐᑕᕐᕕᖓᓃᑦᑐᒧᑦ, ᐃᑯᐊᓪᓚᒡᓗᒋᓪᓗ ᑐᓐᓄᖏᑦ ᑎᐱᖓ ᒪᒪᕐᒪᑦ ᐊᑕᓂᕐᒧᑦ.

⁷ ᑐᓂᕐᕈᓯᖃᑦᑕᕆᐊᖃᕈᓐᓃᕐᒪᑕ ᒎᑎᓐᖑᐊᓄᑦ ᒎᑦᓯᓐᖑᐊᓕᐊᕆᓯᒪᔪᓄᑦ ᓴᑍᕆᓄᑦ ᐃᒃᓕᒎᕐᓂᒃᑯᑦ ᐊᓯᓐᓂᐊᕐᕕᒋᕙᒃᑕᒥᖕᓄᑦ. ᑕᒪᓐᓇ ᐱᖁᔭᖅ ᑍᒤᓕᖕᒊᓐᓇᕐᓂᐊᕐᐳᖅ ᑍᒪᓐᖓᓕᒫᖅ ᑭᖑᕚᒃᓴᖏᓐᓄᓪᓗ.

⁸ “ᐃᒫᒃ ᐅᖃᕐᕕᒋᒃᑭᑦ: ᐃᓴᕆᐊᓕᒥᐅᑦ ᐅᕝᕙᓘᓐᓃᑦ ᐃᓴᕆᐊᓕᒥᐅᖑᖏᑦᑐᖅ ᑖᒃᑯᓇᓂ ᓄᓇᖃᖃᑕᐅᔪᖅ ᑐᓂᕐᕈᓯᕐᐸᑦ ᐃᑯᐊᓚᑎᑕᒃᓴᒥᒃ, ᑐᖁᑕᒃᓴᒥᒡᓘᓐᓃᑦ,

⁹ ᑐᐱᐅᑉ ᑲᑎᒪᕕᐅᑉ ᐃᑎᕐᑕᕐᕕᖓᓂᐅᖏᑦᑐᖅ, ᐊᑕᓂᕐᒧᑦ ᑐᓂᕐᕈᑎᒃᓴᕆᓗᒍ ᐃᓄᒃ ᑍᒤᓕᐅᕐᑐᖅ ᐃᓅᖃᑎᒌᓂᑦ ᐊᕕᑕᐅᔭᕆᐊᖃᕐᐳᖅ.

¹⁰ “ᐃᓴᕆᐊᓕᒥᐅᑦ ᐃᓴᕆᐊᓕᒥᐅᖑᖏᑦᑐᕐᓘᓐᓃᑦ ᑖᒃᑯᓇᓂ ᓄᓇᖃᖃᑕᐅᔪᖅ ᐊᐅᖕᒥᒃ ᓂᕆᒃᐸᑦ ᑮᓇᕋ ᑖᑦᓱᒪᓐᖓᑦ ᐊᓚᕐᓂᐊᕐᐸᕋ ᐊᐅᖕᒥᒃ ᓂᕆᔪᖅ ᐃᓅᖃᑎᖏᓐᓂᑦ ᐃᓚᒋᔭᐅᓂᕋᕈᓐᓁᕐᓂᐊᕐᐸᕋ.

¹¹ ᐆᒪᔪᑦ ᓂᕐᔪᑎᐅᑉ ᐊᐅᓂ ᐆᒪᑦᔪᑎᒋᖕᒪᒍ, ᐃᓕᑦᓯᓐᓄᑦ ᑐᓂᒐᒃᑯ ᐃᓱᒪᒋᔪᓐᓁᕐᕕᒋᔪᒪᓪᓗᓯ ᑐᓂᕐᕈᓯᕐᕕᖕᒥ, ᐊᐅᒃ ᐃᓱᒪᒋᔪᓐᓁᕐᕕᖃᕐᑎᑦᓯᖕᒪᑦ ᐃᓅᓯᕐᒥᒃ.

¹² ᐃᓴᕆᐊᓕᒥᐅᓄᑦ ᐃᒫᒃ ᐅᖃᕐᐳᖓ, ᓇᓕᕐᓯ ᓂᕆᔭᕆᐊᖃᓐᖏᓚᖅ ᐊᐅᖕᒥᒃ, ᐃᓴᕆᐊᓕᐅᖏᑦᑐᕐᓘᓐᓃᑦ ᓄᓇᖅᑲᑎᒋᔭᓯ ᐊᐅᒃᑐᕆᐊᖃᓐᖏᓚᖅ.

¹³ “ᐃᓴᕆᐊᓕᒥᐅᑦ ᐃᓴᕆᐊᓕᒥᐅᖑᖏᑦᑐᓪᓘᓐᓃᑦ ᓄᓇᖅᑲᑎᒋᔭᓯ ᐆᒪᔪᕐᓯᐅᕐᐸᑦ ᑎᖕᒥᐊᒥᒡᓘᓐᓃᑦ ᓂᕆᔭᐅᔪᓐᓇᕐᑐᒥᒃ ᐊᐅᖓ ᑯᕕᔭᕆᐊᖃᕐᐹ ᐊᐅᖓᓗ ᓄᓇᒧᑦ ᓴᐅᓗᒍ.

¹⁴ ᐆᒪᔪᐃᑦ ᑎᖕᒥᐊᓪᓗ ᐊᐅᒃ ᐆᒪᑦᔪᑎᒋᖕᒪᑦᔪᒃ ᑍᒤᒻᒪᑦ ᐅᖃᕐᐳᖓ ᐃᓴᕆᐊᓕᒥᐅᓄᑦ, ᓂᕆᔭᕆᐊᖃᓐᖏᓚᓯ ᐊᐅᖕᒥᒃ ᐆᒪᔫᑉ ᖃᓄᐃᑦᑐᑐᐃᓐᓇᐅᑉ ᐊᐅᖓᓂᒃ, ᐆᒪᔫᑉ ᐊᐅᓂ ᐆᒪᑦᔪᑎᒋᖕᒪᒍ; ᓇᓪᓕᐊᑦ ᐊᐅᖕᒥᒃ ᓂᕆᔪᖅ ᐊᕕᑕᐅᔭᕆᐊᖃᕐᐳᖅ ᐃᓅᖃᑎᒥᓂᑦ.

¹⁵ “ᓇᓪᓕᐊᑦ ᐃᓴᕆᐊᓕᒥᐅᖅ ᐃᓴᕆᐊᓕᒥᐅᖑᖏᑦᑐᕐᓘᓐᓃᑦ ᓄᓇᖃᖃᑕᐅᔪᖅ ᓂᕆᒃᐸᑦ ᐆᒪᔪᕕᓂᕐᒥᒃ ᑐᖁᖓᔪᕐᓯᐊᕕᓂᕐᒥᓂᒃ ᐆᒪᔪᒧᑦ ᑐᖁᑕᐅᔪᕕᓂᕐᒥᒡᓘᓐᓃᑦ, ᐊᓐᓄᕌᓂ ᐅᐊᓴᕆᐊᖃᕐᐰᑦ ᐃᒥᕐᒧᓪᓗ ᑎᒥᓕᒫᓂ ᐅᐊᓴᕐᓗᒍ, ᐃᓕᖅᑯᓯᖅ ᒪᓕᒡᓗᒍ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ, ᑭᖑᕐᖓᓂ ᓴᓗᒻᒪᕐᓂᐊᕐᐳᖅ.

¹⁶ ᐊᓐᓄᕌᓂ ᐅᐊᓴᖏᑉᐸᒋᑦ ᐅᕕᓂᓕᒫᓂᓗ ᐅᐊᓴᖏᑉᐸᒍ ᐃᒥᕐᒧᑦ ᑕᕝᕙ ᐸᓯᔭᒃᓴᐅᓂᐊᕐᐳᖅ.”