ᒨᓯᓯ ᐱᖓᔪᖏᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᓪᓗᖅ ᐃᓱᒪᒋᔪᓐᓁᕐᕕᐅᕕᒃ

¹ ᐊᑕᓂᐅᑉ ᒨᓯᓯ ᐅᖃᕐᕕᒋᕚ, ᐂᕉᓂᐅᑉ ᐃᕐᓂᖏᑦᑕ ᑐᖁᓚᐅᕐᓂᖏᑕ ᑭᖑᓂᖓᒍᑦ, ᑖᒃᑯᐊᒃ ᐊᑕᓂᕐᒧᑦ ᐂᓚᐅᕐᑑᒃ ᑐᖁᓪᓗᑎᒡᓗ.

² ᐊᑕᓂᐅᑉ ᒨᓯᓯ ᐅᖃᐅᑎᕚ, “ᐊᖓᔪᐃᑦ ᐂᕉᓂ ᐅᖃᐅᑎᒍᒃ ᐃᑎᕈᒪᓕᕈᓂ ᖃᖓᑐᐃᓐᓇᒃᑯᑦ ᐃᑎᖃᑦᑕᖁᖏᓪᓗᒍ ᐃᑦᔪᕐᓁᕐᑐᕕᖕᒥ ᐃᑦᔪᕐᓁᓐᓂᕐᐹᖓᓐᓄᑦ ᑖᓗᑕᐅᑉ ᐅᖓᑖᓃᑦᑐᒧᑦ ᐃᓱᒪᒋᔭᐅᔪᓐᓁᕐᕕᐅᑉ ᐃᒃᓯᕐᕕᐅᑉ ᓵᖓᓄᑦ, ᐃᑎᕈᓂ ᖃᖓᑐᐃᓐᓇᒃᑯᑦ ᑐᖁᓂᐊᕐᒪᑦ, ᐅᕙᖓ ᓴᖅᑭᖃᑦᑕᕋᒪ ᓄᕗᔭᒥ ᑖᓗᑕᕐᔪᐊᑉ ᐃᓱᒪᒋᔪᓐᓁᕐᓯᕕᐅᑉ ᖁᓛᓂ.

³ ᐃᒫᒃ ᑕᕝᕙ ᐂᕉᓂ ᐃᑎᖃᑦᑕᕆᐊᖃᕐᐳᖅ ᐃᑦᔪᕐᓁᑦᑐᕕᖕᒧᑦ; ᐃᒻᒧᒃᓯᐅᒐᐅᑉ ᐊᖑᓴᓪᓗᖓᓂᒃ ᐃᓐᓇᐅᖏᑦᑐᒥᒃ ᐊᔪᕐᓂᖅ ᐱᓪᓗᒍ ᑐᓂᕐᕈᑎᒃᓴᒥᒃ ᓇᒃᓴᕐᓗᓂ, ᓰᐱᐅᓪᓗ ᐊᖑᓴᓪᓗᖓᓂᒃ ᐃᑯᐊᓚᓗᓂ ᑐᓂᕐᕈᑎᒃᓴᒥᒃ.”

⁴ ᐊᑐᕆᐊᖃᕐᐳᖅ ᖃᓪᓗᓈᕐᑕᒥᒃ ᐅᕕᓂᕈᕐᒥᒃ ᑕᑭᔪᒥᒃ, ᐃᓗᓪᓖᓪᓗ ᓵᑦᑐᑦ ᐊᑐᕐᓗᒋᑦ; ᑕᑦᓯᕈᓯᕐᓯᒪᓗᓂᓗ ᖃᓪᓗᓈᕐᑕᒥᒡᓗ ᓇᓴᕐᓯᒪᓗᓂ, ᑖᒃᑯᐊ ᐊᓐᓄᕌᑦ ᐃᑦᔪᕐᓁᑦᑑᖕᒪᑕ; ᐊᓐᓄᕌᖏᓐᓂᕐᒥᓂ ᐃᒥᕐᒧᑦ ᐅᐊᓴᕆᐊᖃᕐᐳᖅ ᑎᒥᓕᒫᒥᓂᒃ.

⁵ ᓄᓇᓕᖕᓂᑦ ᐃᓴᕆᐊᓕᒥᐅᓂᑦ ᐱᑎᑕᐅᔭᕆᐊᖃᕐᐳᖅ ᒎᑦᓰᖕᓂᒃ ᒪᕐᕉᖕᓂᒃ ᐊᖑᓴᓪᓘᖕᓂᒃ, ᐊᔪᕐᓂᖅ ᐱᓪᓗᒍ ᑐᓂᕐᕈᑎᒃᓵᖕᓂᒃ, ᓰᐱᐅᓪᓗ ᐊᖑᓴᓪᓗᖓᓂᒃ ᑐᓂᕐᕈᑎᒃᓴᒥᒃ ᐃᑯᐊᓚᒐᒃᓴᒥᒃ.

⁶ ᑐᓂᕐᕈᓯᕆᐊᖃᕐᐳᕐᓗ ᐃᒻᒧᒃᓯᐅᒐᐅᑉ ᐸᖕᓂᖓᓂᒃ ᓇᖕᒥᓂᖅ ᐊᔪᕐᓂᓂ ᐱᓪᓗᒋᑦ ᐃᓱᒪᒋᔪᓐᓁᕐᕕᐅᖁᓪᓗᒍ ᐃᒡᓗᒥᐅᖃᑎᓂᓗ ᐱᓪᓗᒋᑦ.

⁷ ᑕᕝᕙ ᒎᑦᓰᒃ ᒪᕐᕉᒃ ᐊᑕᓂᐅᑉ ᓵᖓᓄᐊᕈᑎᔭᕆᐊᖃᕐᐹᒃ ᑐᐱᐅᑉ ᑲᑎᒪᕕᐅᑉ ᐃᑎᕐᑕᕐᕕᖓᓄᑦ.

⁸ ᐂᕉᓂ ᑕᕝᕙ ᓇᓚᐅᑦᑖᕈᑏᖕᓂᒃ ᒪᕐᕉᖕᓂᒃ ᑲᑕᒃᑎᑦᓯᔭᕆᐊᖃᕐᐳᖅ ᒎᑦᓰᒃ ᒪᕐᕉᒃ ᐱᓪᓗᒋᒃ ᐱᖃᑖ ᐊᑕᓂᕐᒧᑦ ᑐᓂᕐᕈᑕᐅᖁᓪᓗᒍ ᐱᖃᑖᓗ ᐊᐅᓪᓚᕐᑎᑕᒃᓴᐅᖁᓪᓗᒍ ᐊᔪᕐᓂᖅ ᐱᓪᓗᒍ.

⁹ ᑖᓐᓇ ᒎᑦᓯ ᐊᑕᓂᕐᒧᑦ ᑐᓂᕐᕈᑕᐅᖁᓪᓗᒍ ᓇᓚᐅᑕᐅᔪᖅ ᐂᕉᓂᐅᑉ ᑐᖁᓪᓗᒍ ᑐᓂᕐᕈᑎᒋᔭᕆᐊᖃᕐᐹ ᐊᔪᕐᓂᖅ ᐱᓪᓗᒍ.

¹⁰ ᐱᖃᑖᓕ ᒎᑦᓯ ᓇᓚᐅᑕᐅᔪᖅ ᐊᐅᓪᓚᕐᑎᑕᒃᓴᒧᑦ ᐊᑕᓂᐅᑉ ᓵᖓᓄᐊᕐᑎᑕᐅᔭᕆᐊᖃᕐᐳᖅ ᐆᒪᓗᓂ ᐃᓱᒪᒋᔪᓐᓁᕐᕕᐅᑦᔪᑎᒃᓴᐅᖁᓪᓗᒍ ᐊᐅᓪᓚᕐᑎᓪᓗᒍᓗ ᐃᓄᖃᖏᑦᑐᒧᑦ.

¹¹ ᐂᕉᓂᐅᓪᓗ ᐃᒻᒧᒃᓯᐅᒐᐅᑉ ᐸᖕᓂᖓ ᕾᑎᑕᒃᓴᕆᕚ ᓇᖕᒥᓂᖅ ᐊᔪᕐᓂᓂ ᐱᑦᔪᑎᒋᓗᒋᑦ ᐃᒡᓗᒥᐅᖃᑎᓂᓗ ᐱᓪᓗᒋᑦ, ᑐᖁᑕᒃᓴᕆᕚ ᑐᓂᕐᕈᑎᒋᓗᒍ.

¹² ᐃᓯᕐᓗᐊᕐᓂᑎᑦᓯᑦᔪᑎᒥᒃ ᐱᔭᕆᐊᖃᕐᐳᖅ ᐊᐅᒪᓂᒃ ᐃᓗᓕᖃᕐᓗᓂ ᑐᓂᕐᕈᓯᕐᕕᖕᒥᑦ, ᐊᑕᓂᐅᑉ ᓵᖓᓂᑦ, ᒪᕐᕈᕕᒡᓗᒍ ᐃᑎᒻᒥᐊᕐᑑᑎᒥᒃ ᑎᐱᑦᓯᐊᕆᒃᑐᒥᒃ ᐃᓐᓴᓐᓯᒥᒃ ᐃᓯᕐᓗᐊᕐᓂᑎᑕᒃᓴᒥᒃ ᓯᖃᓪᓕᑦᓯᐊᕐᓯᒪᔪᒥᑦ ᐱᓗᓂ, ᑖᒃᑯᐊ ᑕᓘᑉ ᐅᖓᑖᓄᐊᕈᑎᓗᓂᒋᑦ.

¹³ ᑎᐱᑦᓯᐊᕆᒃᑐᖅ ᐃᓐᓴᓐᓯ ᐃᓕᔭᕆᐊᖃᕐᐹ ᐃᑯᒪᒧᑦ ᐊᑕᓂᐅᑉ ᓵᖓᓂ, ᐳᔪᖅ ᐃᓯᕐᓗᐊᕐᓂᑎᑦᓯᕕᖕᒥᑦ ᐱᔪᖅ ᑕᓕᑎᑦᓯᓂᐊᕐᒪᑦ ᐊᖏᖃᑎᒌᒍᑎᒥᒃ ᐃᒃᓯᕕᖕᒥᑦ ᑐᖁᖁᓇᒍ.

¹⁴ ᐃᒻᒧᒃᓯᐅᒐᐅᑉ ᐸᖕᓂᖓᑕ ᐊᐅᖓᑕ ᐃᓚᖓᓂᒃ ᐱᔭᕆᐊᖃᕐᐳᖅ, ᑎᑭᕐᒥᓄᓪᓗ ᓯᕐᐸᕐᓴᕐᓗᒍ ᐊᖏᖃᑎᒌᖕᓂᐅᑉ ᐃᒃᓯᕐᕕᐅᑉ ᖄᖓ ᓵᖓᓗ ᓯᕐᐸᕐᓴᕆᐊᖃᕐᐹ ᑎᑭᕐᒥᓄᑦ 7ᐃᑐᕐᓗᒍ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᐅᑉ ᖄᖓ.

¹⁵ ᑕᕝᕙ ᑐᖁᑦᓴᕆᐊᖃᕐᐹ ᒎᑦᓯ ᑐᓂᕐᕈᑎᒃᓴᖅ ᐊᔪᕐᓂᖅ ᐱᓪᓗᒍ, ᐃᓄᐃᑦ ᑐᓂᕐᕈᓯᕈᑎᓗᒋᑦ ᐊᐅᖓ ᑖᓗᑕᐅᑉ ᐅᖓᑖᓄᐊᕈᑎᔭᕆᐊᖃᕐᐹ ᑍᒫᒃᑕᐅᖅ ᐃᒻᒧᒃᓯᐅᒐᐅᑉ ᐸᖕᓂᐅᑉ ᐊᐅᖓᑐᑦ ᐱᔭᕆᐊᖃᕐᐹ ᓯᕐᐸᕐᓴᕈᑎᒋᔭᕆᐊᖃᕐᐹ ᐊᖏᖃᑎᒌᖕᓂᐅᑉ ᐃᒃᓯᕐᕕᐅᑉ ᖄᖓᓄᑦ ᓵᖓᓄᓪᓗ.

¹⁶ ᑍᒫᒃ ᑕᕝᕙ ᓴᓗᒻᒪᕐᑎᓐᓂᐊᕐᐹ ᐃᑦᔪᕐᓁᑦᑑᑉ ᐃᑦᔪᕐᓁᓐᓂᕐᐹᖓᑦ ᓴᓗᒤᓐᓂᕐᒥᑦ ᐃᓴᕆᐊᓕᒥᐅᓪᓗ ᓈᓚᖏᓐᓂᖏᓐᓂᑦ ᓱᓇᑐᐃᓐᓇᕐᒥᒃ ᐊᔪᕐᑐᓕᓯᒪᒐᓗᐊᕐᐸᑕ, ᑍᒤᓕᐅᕆᐊᖃᕆᕗᖅ ᓱᓕ ᑐᐱᕐᒥ ᑲᑎᒪᕕᖕᒥ, ᑖᓐᓇ ᐃᓄᐃᑦ ᓇᔪᒐᕆᖕᒪᑦᔪᒃ ᓴᓗᒤᑦᑑᓪᓗᑎᒡᓗ.

¹⁷ ᑐᐱᕐᒥ ᑲᑎᒪᕕᖕᒥ ᐃᑎᕐᓯᒪᔪᖃᕆᐊᖃᓐᖏᓚᖅ ᐂᕉᓂ ᐃᑎᕐᐸᑦ ᐃᑦᔪᕐᓁᑦᑐᑦ ᐃᑦᔪᕐᓁᓐᓂᕐᐹᖓᓐᓄᑦ ᓴᓗᒻᒪᕐᓮᔭᕐᑐᕐᓗᓂ ᐊᓂᒃᐸᑦ ᑭᓯᐊᓂ, ᐃᒻᒥᓂᒃ ᐃᓱᒪᒋᔪᓐᓁᕐᕕᐅᑎᑉᐸᑦ, ᐃᒡᓗᒥᐅᖃᑎᒥᓂᒡᓗ, ᐃᓴᕆᐊᓕᒥᐅᓪᓗ ᓄᓇᖃᑎᒌᖏᓐᓂᒃ.

¹⁸ ᑭᖑᕐᖓᓂ ᑕᕝᕙᓐᖓᑦ ᐊᓂᓂᐊᕐᐳᖅ ᑐᓂᕐᕈᓯᕐᕕᖕᒧᑦ ᐱᓗᓂ ᐊᑕᓂᐅᑉ ᓵᖓᓂ ᑖᓐᓇ ᐃᑦᔪᕐᓁᓕᕐᑎᓪᓗᓂᐅᒃ, ᐃᒻᒧᒃᓯᐅᒐᐅᑉ ᐸᖕᓂᖓᑕ ᐊᐅᖓᓂᒃ ᐱᔭᕆᐊᖃᕐᐳᖅ ᒎᑦᓯᐅᓪᓗ ᐊᐅᖓᓂᒃ, ᑐᓂᕐᕈᓯᕐᕕᐅᑉ ᓇᒡᔪᖏᑦ ᐊᐅᖕᒥᒃ ᒥᖑᐊᕆᐊᖃᕐᐰᑦ.

¹⁹ ᑎᑭᕐᒥᓄᑦ ᓯᕐᐸᕐᓴᕆᐊᖃᕐᐹ ᑐᓂᕐᕈᓯᕐᕕᒃ 7ᐃᕐᑐᕐᓗᒍ ᐊᐅᖕᒥᒃ ᐃᑦᔪᕐᓁᑎᓪᓗᒍ ᑖᓐᓇ ᐱᑦᔪᑎᖃᕐᓗᓂ ᐃᓴᕆᐊᓕᒥᐅᓄᑦ ᓴᓗᒤᑦᑐᓄᑦ.

ᒎᑦᓯ ᐊᔪᕐᓂᖅ ᐱᓪᓗᒍ ᐊᐅᓪᓚᕐᑎᑕᒃᓴᖅ

²⁰ ᐂᕉᓂ ᐃᑦᔪᕐᓁᑎᑦᓯᔭᕇᕈᓂ ᐃᑦᔪᕐᓁᑦᑐᑦ ᐃᑦᔪᕐᓁᓐᓂᕐᐹᖓᓐᓂᒃ, ᑐᐱᕐᒥᒡᓗ ᑲᑎᒪᕕᖕᒥᒃ, ᑐᓂᕐᕈᓯᕐᕕᖕᒥᒡᓗ, ᒎᑦᓯ ᐆᒪᔪᖅ ᑕᒪᐅᓐᖓᕐᑎᑕᒃᓴᕆᕚ.

²¹ ᐊᒡᒐᖕᒥᓄᑦ ᐃᒡᓗᒃᑐᑦ ᐸᑎᒻᒥᔭᕆᐊᖃᕐᐹ ᓂᐊᖁᐊᒍᑦ, ᖃᕿᐊᓕᕐᓗᓂᓗ ᐱᐅᖏᑦᑐᓕᓂᕐᓂᒃ ᓈᓚᖏᓐᓂᓕᒫᓂᒡᓗ ᐃᓴᕆᐊᓕᒥᐅᑦ ᐊᑐᕐᐸᒃᑕᖏᓐᓂᒃ, ᐊᔪᕐᑐᓕᓂᖏᓪᓗ ᓂᐊᖁᖓᓄᑦ ᐱᑎᓪᓗᒋᑦ. ᐊᐅᓪᓚᕐᑎᑕᒃᓴᕆᕚ ᐃᓄᖃᖏᑦᑐᒧᑦ ᑲᒪᔨᖃᕐᑎᓪᓗᒍ ᐊᖑᒻᒥᒃ ᑍᒤᑦᑐᒧᑦ ᑎᓕᔭᐅᓯᒪᔪᒥᒃ.

²² ᒎᑦᓯ ᑕᕝᕙ ᐊᒡᔭᕐᓯᓂᐊᕐᐳᖅ ᐊᔪᕐᑐᓕᓂᓕᒫᕐᓂᒃ ᐃᓄᖃᖏᑦᑐᒧᑦ: ᐊᖑᑎᐅᓪᓗ ᑖᕙᓂ ᐊᐅᓪᓚᕐᑎᓐᓂᐊᕐᐹ.

²³ ᑕᕝᕙ ᐂᕉᓂ ᑐᐱᕐᒧᑦ ᑲᑎᒪᕕᖕᒧᑦ ᐃᑎᕆᐊᖃᕐᐳᖅ, ᐊᓐᓄᕌᓂᓗ ᖃᓪᓗᓈᕐᑍᑦ ᐲᕆᐊᖃᕐᐰᑦ ᐃᑦᔪᕐᓁᑦᑐᑦ ᐃᑦᔪᕐᓁᓐᓂᕐᐹᖓᓐᓄᑦ ᐃᑎᓚᐅᕋᓂ ᐊᑎᖅᑲᐅᔭᓂ, ᑕᕝᕗᖓ ᕿᒪᒋᐊᖃᕐᐰᑦ.

²⁴ ᐃᑦᔪᕐᓁᑦᑐᕕᖕᒥᓗ ᐅᕕᓂᓕᒫᒥᓂᒃ ᐅᐊᓴᕆᐊᖃᕐᐳᖅ ᐃᒥᕐᒧᑦ, ᐊᓐᓄᕌᑐᐃᓐᓇᓂ ᐊᑎᓗᒋᑦ, ᐊᓂᔭᕆᐊᖃᕆᕗᖅ ᑕᕝᕙᓐᖓᑦ ᑐᓂᕐᕈᓯᕐᓗᓂᓗ ᐃᑯᐊᓚᑎᑕᒃᓴᒥᒃ ᓇᖕᒥᓂᖅ ᐱᑦᔪᑎᒋᓗᓂ, ᐃᓴᕆᐊᓕᒥᐅᓪᓗ ᐱᑦᔪᑎᒋᓗᒋᑦ ᐃᓱᒪᒋᔪᓐᓁᕐᕕᐅᑎᓪᓗᓂ ᐃᒻᒥᓂᒃ ᐃᓄᐃᓪᓗ.

²⁵ ᐃᑯᐊᓪᓔᓗᓂᓗ ᑐᓂᕐᕈᑎᒥᒃ ᐊᔪᕐᓂᖅ ᐱᓪᓗᒍ ᑐᓂᕐᕈᑎᐅᑉ ᑐᓐᓄᖏᓐᓂᒃ.

²⁶ ᐊᖑᑦ ᒎᑦᓯᒥᒃ ᐊᐅᓪᓚᕐᑎᑦᓯᔪᖅ ᐊᔪᕐᓂᖅ ᐱᓪᓗᒍ ᐊᐅᓪᓚᕐᑎᑕᒃᓴᒥᒃ, ᐊᓐᓄᕌᓂ ᐅᐊᓴᕆᐊᖃᕐᐰᑦ ᐅᕕᓂᓕᒫᒥᓂᒡᓗ ᐅᐊᓴᕐᓗᓂ ᐃᒥᕐᒧᑦ; ᑭᖑᓂᖓᒍᑦ ᓄᓇᓕᖕᓄᑦ ᐅᑎᕈᓐᓇᕐᐳᖅ ᑕᕝᕙ.

²⁷ ᐃᒻᒧᒃᓯᐅᒐᐅᑉ ᐸᖕᓂᖓ ᒎᑦᓯᓗ ᑐᓂᕐᕈᑎ ᐊᔪᕐᓂᖅ ᐱᓪᓗᒍ, ᐊᐅᖓ ᐊᑐᕐᑕᐅᓚᐅᕐᑐᑦ ᐃᑦᔪᕐᓁᑦᑐᑦ ᐃᑦᔪᕐᓁᓐᓂᕐᐹᖓᓄᑦ ᐃᑦᔪᕐᓁᓕᑎᕈᑎᒃᓴᒧᑦ, ᑖᒃᑯᐊ ᓄᓇᓖᑦ ᓯᓚᑖᓄᑦ ᐱᑎᑕᐅᔭᕆᐊᖃᕐᐳᒃ, ᐊᒥᖏᓪᓗ ᐃᕐᕋᕕᖏᓪᓗ ᐃᑯᐊᓪᓚᑕᐅᒋᐊᖃᕐᐳᑦ.

²⁸ ᐊᖑᑦ ᑖᒃᑯᓂᖓ ᐃᑯᐊᓚᑦᓯᔪᖅ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐅᕕᓂᓕᒫᓂᓗ ᐅᐊᓴᕐᓗᒍ ᐃᒥᕐᒧᑦ; ᑭᖑᓂᖓᒍᑦ ᓄᓇᓕᖕᓄᑦ ᑕᕝᕙ ᐅᑎᕈᓐᓇᕐᓂᐊᕐᐳᖅ.

ᐅᓪᓗᖅ ᐃᓱᒪᒋᔪᓐᓁᕐᕕᐅᓂᐅᑉ ᑲᒪᒋᔭᐅᑦᓯᐊᕆᐊᖃᕐᓂᖓ

²⁹ ᐅᓇ ᐱᖁᔭᖅ ᐃᓕᑦᓯᓐᓄᑦ ᑍᒪᓐᖓᑦ ᐊᑐᕐᓂᐊᕐᑐᖅ. ᐅᓪᓗᑦ 10ᖓᓐᓂ ᑕᖅᑮᓪᓗ 7ᖓᓐᓂ ᓂᕆᑦᑍᓕᔭᕆᐊᖃᕐᐳᓯ ᑕᕐᓂᓯ ᐱᓪᓗᒍ, ᐃᖅᑲᓁᔭᖏᓪᓗᓯᓗ ᐃᓴᕆᐊᓕᒥᐅᖑᒍᕕᓪᓘᓐᓃᑦ ᐊᓯᖏᓐᓂᓪᓘᓐᓃᑦ ᐱᓯᒪᒐᓗᐊᕈᕕᑦ ᑕᕝᕙᓂ ᓄᓇᖃᖃᑕᐅᓗᑎᑦ.

³⁰ ᐅᓪᓗᒥ ᑕᕝᕙᓂ ᐃᓱᒪᒋᔭᐅᔪᓐᓁᕐᕕᒃ ᐊᑐᕐᓂᐊᕐᒪᑦ ᐃᓕᑦᓯ ᐱᓪᓗᓯ, ᓴᓗᒻᒪᕐᑎᑕᐅᖁᓪᓗᓯ ᑕᕝᕙᓂᓗ ᐊᑕᓂᐅᑉ ᓵᖓᓂ, ᓴᓗᒻᒪᕐᑎᑕᐅᓂᐊᕐᐳᓯ ᐊᔪᕐᓂᑦᓯᓐᓂᑦ.

³¹ ᐅᓪᓗᖅ ᑖᓐᓇ ᐃᑦᔪᕐᓁᑦᑑᖕᒪᑦ ᕿᑲᕐᕕᐅᔭᕆᐊᓕᒃ, ᓂᕆᑦᑍᓕᔭᕆᐊᖃᕐᐳᓯ; ᑕᐅᕗᖓᓕᒫᖅ ᐱᖁᔭᖅ ᑖᓐᓇ ᐊᑐᕐᓂᐊᕐᐳᖅ.

³² ᑐᓂᕐᕈᓯᕐᑎᑦᓯᔨ ᒥᖑᐊᕐᑕᐅᓂᒃᑯᑦ ᐅᕐᓱᒧᑦ ᑐᓂᕐᕈᓯᕐᑎᑦᓯᔨᓐᖑᕐᓯᒪᔪᖅ ᐊᑖᑕᒥᓂᒃ ᑭᖑᕝᕖᓯᒪᔪᖅ, ᑐᓂᕐᕈᓯᕐᑎᑦᓯᔨᕐᔪᐊᓐᖑᕐᑎᑕᐅᓯᒪᔪᖅ ᐃᓱᒪᒋᔪᓐᓁᕐᕕᐅᓂᕐᒥᒃ ᑲᒪᔭᕆᐊᖃᕐᐳᖅ. ᖃᓪᓗᓈᕐᑍᓪᓗ ᐊᓐᓄᕌᓂ ᐃᑦᔪᕐᓁᑦᑐᑦ ᐊᑎᔭᕆᐊᖃᕐᐰᑦ.

³³ ᐃᑦᔪᕐᓁᑦᑐᕕᐅᑉ ᐃᑦᔪᕐᓁᓐᓂᕐᐹᖓ ᐃᑦᔪᕐᓁᓕᑎᑦᓴᕆᐊᖃᕐᐹ, ᑐᐱᕐᓗ ᑲᑎᒪᕕᒃ, ᑐᓂᕐᕈᓯᕐᕕᒡᓗ, ᑐᓂᕐᕈᓯᕐᑎᑦᓯᔩᓪᓗ ᐃᓄᓕᒫᓪᓗ ᓄᓇᖃᑎᒌᑦ ᑕᕝᕙᓂ.

³⁴ ᑕᒪᓐᓇ ᐱᖁᔭᖅ ᐊᑐᕐᓂᐊᕐᐳᖅ ᐃᓕᑦᓯᓐᓄᑦ ᑍᒪᓐᖓᓕᒫᖅ: ᐃᓱᒪᒋᔭᐅᔪᓐᓁᕐᕕᐅᓂᖅ ᐊᑐᕐᑕᐅᖃᑦᑕᕐᓂᐊᕐᒪᑦ ᐊᕐᕌᒍ ᐊᑕᐅᓯᐊᕐᓗᒍ ᐃᓴᕆᐊᓕᒥᐅᑦ ᐊᔪᕐᑐᓕᓂᖏᑦ ᐱᓪᓗᒋᑦ. ᒨᓯᓯ ᐊᑕᓂᐅᑉ ᑍᒫᒃ ᐱᖁᓚᐅᕐᒪᒍ, ᑍᒤᓕᐅᓚᐅᕐᐳᖅ.