ᒨᓯᓯ ᐱᖓᔪᖏᑦ 15 - ᐊᒡᓔᑦ ᐃᑦᔪᕐᖕᓁᑦᑐᑦ

ᓴᓗᒤᑦᑐᑦ ᒪᕿᓂᖅ–ᒪᕐᓴᕐᓂᖅ–ᐱᑦᔪᑎᒋᓪᓗᒍ

¹ ᐊᑕᓂᐅᑉ ᒨᓯᓯᓗ ᐂᕉᓂᓗ ᐅᖃᐅᑎᕚᒃ,

² ᐃᓴᕆᐊᓕᒥᐅᑦ ᐃᒫᒃ ᐅᖃᐅᑎᒃᑭᑦ; ᐃᓄᒃ ᐅᓱᖕᒥᒍᑦ ᒪᕐᓴᕐᐸᑦ, ᒪᕿᖓ ᑕᕝᕙ ᓴᓗᒤᑦᑑᕗᖅ.

³ ᒪᖀᓐᓇᐅᔭᕐᐸᓪᓘᓐᓃᑦ ᐅᓱᖓ ᒪᕿᔪᓐᓁᕐᑎᑕᐅᓯᒪᒃᐸᓪᓘᓐᓃᑦ, ᑖᓐᓇ ᓴᓗᒤᑦᑑᕗᖅ ᐃᒫᒃ ᑕᕝᕙ ᒪᕐᓴᕐᓂᖅ ᓴᓗᒤᑎᑦᓯᓂᐊᕐᐳᖅ.

⁴ ᓯᓂᒡᕕᒃ ᐃᓅᑉ ᒪᕐᓴᕐᑑᑉ ᓇᓚᕕᒋᔭᖓ ᓴᓗᒤᑦᑑᕗᖅ, ᐃᒃᓯᕚᕐᕕᒋᔭᓕᒫᖏᓪᓗ ᓴᓗᒤᑦᑑᓂᐊᕐᐳᑦ.

⁵ ᑭᓇᑐᐃᓐᓇᐅᑉ ᒪᕐᓴᕐᑑᑉ ᐃᒡᓕᖓ ᐊᒃᑐᕐᐸᒍ, ᐊᒃᑐᐃᔫᑉ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐅᕕᓂᓕᒫᒥᓂᒡᓗ ᐅᐊᓴᕐᓗᓂ ᐃᒥᕐᒧᑦ, ᑖᓐᓇ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ.

⁶ ᓇᓪᓕᐊᑦᓗ ᐃᒃᓯᕚᕐᑐᖅ ᐊᖑᑎᐅᑉ ᒪᕐᓴᕐᑑᑉ ᐃᒃᓯᕚᕐᕕᕕᓂᖓᓂ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐅᕕᓂᓕᒫᒥᓂᒡᓗ ᐅᐊᓴᕐᓗᓂ ᐃᒥᕐᒧᑦ, ᑖᓐᓇᓗ ᓴᓗᒤᓐᓂᐊᕐᐳᖅ ᐅᓐᓄᒃ ᑎᑭᓪᓗᒍ.

⁷ ᓇᓪᓕᐊᑦᓗ ᐊᒃᑐᕐᓯᔪᖅ ᐊᖑᒻᒥᒃ ᒪᕐᓴᕐᑐᒥᒃ ᐊᒃᑐᕐᓯᔫᑉ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐅᕕᓂᓕᒫᓂᓗ ᐅᐊᓴᕆᐊᖃᕐᐹ, ᑖᓐᓇᓗ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ.

⁸ ᐊᖑᑦ ᒪᕐᓴᕐᑐᖅ ᓴᓗᒪᔪᒧᑦ ᑭᓇᑐᐃᓐᓇᕐᒧᑦ ᐅᕆᐊᕐᐸᑦ, ᐃᓄᒃ ᑖᓐᓇ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐅᕕᓂᓕᒫᓂᓗ ᐅᐊᓴᕆᐊᖃᕐᐹ ᐃᒥᕐᒧᑦ, ᓴᓗᒤᑦᑑᓂᐊᕐᐳᕐᓗ ᐅᓐᓄᒃ ᑎᑭᓪᓗᒍ.

⁹ ᓱᓇᑐᐃᓐᓁᑦ ᐃᓅᑉ ᒪᕐᓴᕐᑑᑉ ᐃᒃᓯᕙᕕᒋᔭᖏᑦ ᓱᓇᒥᒃ ᐃᑭᒪᓗᓂᓘᓐᓃᑦ ᑖᒃᑯᐊ ᓴᓗᒤᑦᑑᓂᐊᕐᐳᑦ.

¹⁰ ᓇᓪᓕᐊᑦᓗ ᑕᒪᒃᑯᐊ ᒪᕐᓴᕐᑑᑉ ᐊᑖᓃᖃᑦᑕᕐᓯᒪᔪᑦ ᐊᒃᑐᕐᐸᒋᑦ ᑖᓐᓇ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ; ᑕᒪᒃᑯᓂᖓᓗ ᑎᒍᓯᔪᖅ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐅᕕᓂᓕᒫᒥᓂᒡᓗ ᐅᐊᓴᕆᐊᖃᕐᐳᖅ ᐃᒥᕐᒧᑦ, ᓴᓗᒤᑦᑑᓂᐊᕐᐳᕐᓗ ᐅᓐᓄᒃ ᑎᑭᓪᓗᒍ.

¹¹ ᓇᓪᓕᐊᑦ ᐊᖑᒻᒥᒃ ᒪᕐᓴᕐᑐᒥᒃ ᐊᒃᑐᕐᓯᒃᐸᑦ ᐊᒡᒐᓂ ᐅᐊᓴᓚᐅᖏᓪᓗᒋᑦ ᐃᒥᕐᒧᑦ, ᐊᓐᓄᕌᓂ ᐅᐊᓴᕆᐊᖃᕐᐰᑦ ᐅᕕᓂᓕᒫᒥᓂᒡᓗ ᐅᐊᓴᕆᐊᖃᕐᐳᖅ ᐃᒥᕐᒧᑦ, ᓴᓗᒤᑦᑑᓂᐊᕐᐳᕐᓗ ᐅᓐᓄᒃ ᑎᑭᓪᓗᒍ.

¹² ᐅᔭᕅᑦ ᐃᓗᓕᖁᑎᓕᐊᕆᓯᒪᔪᑦ ᐊᖑᑎᐅᑉ ᒪᕐᓴᕐᑑᑉ ᐊᒃᑐᕐᑕᖏᑦ ᓯᖁᒥᑕᐅᔭᕆᐊᖃᕐᐳᑦ, ᕿᔪᐃᓪᓗ ᓴᓇᓯᒪᔪᑦ ᐊᒃᑐᕐᑕᖏᑦ ᐃᒥᕐᒧᑦ ᐅᐊᓴᕐᑕᐅᔭᕆᐊᖃᕐᐳᑦ.

¹³ ᐊᖑᑦ ᓴᓗᒻᒪᕐᐸᑦ ᐅᓱᐊᑕ ᒪᕐᓴᕐᓂᖓᓂᑦ ᐅᓪᓗᓂᒃ 7ᓂᒃ ᐅᑕᖅᑭᔭᕆᐊᖃᕐᐳᖅ ᓴᓗᒻᒪᕐᓴᕐᑕᐅᖏᓐᓂᕐᒥᓂ; ᑕᕝᕙ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐅᕕᓂᓕᒫᓂᓗ ᐃᒥᕐᒧᑦ ᓴᓗᒪᔪᒧᑦ, ᓴᓗᒻᒪᕐᓂᐊᕐᐳᖅ ᑕᕝᕙ.

¹⁴ ᐅᓪᓗᑦ 8ᖓᓐᓂ ᐱᔭᕆᐊᖃᕐᐳᖅ ᑐᕕᖕᓂᒃ ᒪᕐᕉᖕᓂᒃ ᐅᕝᕙᓘᓐᓃᑦ ᒪᕐᕉᖕᓂᒃ ᐊᕿᒡᒋᐅᔮᕐᑑᖕᓂᒃ ᐱᑦᔭᓐᓂᒃ ᐱᐊᕋᕕᓃᖕᓂᒃ, ᕾᓗᓂᓗ ᐊᑕᓂᐅᑉ ᓵᖓᓄᑦ ᑐᐱᐅᑉ ᑲᑎᒪᕕᐅᑉ ᐃᑎᕐᑕᕐᕕᖓᓄ, ᑐᓂᓗᒋᓪᓗ ᑖᒃᑯᐊ ᑐᓂᕐᕈᓯᕐᑎᑦᓯᔨᒧᑦ.

¹⁵ ᑐᓂᕐᕈᓯᕐᑎᑦᓯᔨᐅᑉ ᑖᒃᑯᐊ ᑐᓂᕐᕈᑎᒋᓂᐊᕐᐰᑦ, ᐱᖃᑖ ᑐᓂᕐᕈᑕᐅᓗᓂ ᐊᔪᕐᓂᖅ ᐱᓪᓗᒍ, ᐂᑉᐸᖓᓗ ᑐᓂᕐᕈᑕᐅᓗᓂ ᐃᑯᐊᓪᓚᒃᑕᐅᓗᓂ, ᑍᒫᒃ ᐃᓱᒪᒋᔪᓐᓁᕐᕕᐅᑎᓐᓂᐊᕐᐹ ᐊᑕᓂᕐᒧᑦ, ᐃᓄᒃ ᑖᓐᓇ ᐊᓂᐊᑦᓯᕙᒃᑐᖅ ᐅᓱᖕᒥᒍᑦ.

¹⁶ ᐊᖑᑎᐅᑉ ᐅᓱᖓ ᒪᕿᒃᐸᑦ, ᑎᒥᓂ ᐅᕕᓂᖕᓂᐊᕆᐊᖃᕐᐹ ᐃᒥᕐᒧᑦ, ᑖᓐᓇᓗ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ.

¹⁷ ᐊᓐᓄᕌᑦ ᓱᓇᑐᐃᓐᓁᑦ ᐆᒪᔫᓪᓘᓐᓃᑦ ᐊᒥᕕᓂᖏᑦ ᐅᓱᖕᒥᑦ ᒪᕿᕕᐅᓯᒪᔪᑦ ᐅᐊᓴᕐᑕᐅᔭᕆᐊᖃᕐᐳᑦ ᐃᒥᕐᒧᑦ ᓴᓗᒤᑦᑑᓂᐊᕐᓗᑎᒡᓗ ᐅᓐᓄᒃ ᑎᑭᓪᓗᒍ.

¹⁸ ᐊᖑᓪᓗ ᐊᕐᓇᕐᓗ ᐃᓐᓇᖓᓗᑎᒃ ᐱᖃᑎᒌᒃᐸᑎᒃ ᐅᓱᐊᓗ ᒪᕿᒃᐸᑦ ᑕᒪᕐᒥᒃ ᐅᕕᓂᖕᓂᐊᕆᐊᖃᕐᐳᒃ ᐃᒥᕐᒧᑦ, ᓴᓗᒤᑦᑑᓂᐊᕐᐳᒡᓗ ᑕᒪᕐᒥᒃ ᐅᓐᓄᒃ ᑎᑭᓪᓗᒍ.

¹⁹ ᐊᕐᓇᖅ ᑕᖅᑭᑕᒫᕐᓯᐅᑎᒥᒃ ᐊᐅᓈᕈᓂ, ᓴᓗᒤᑦᑑᓂᐊᕐᐳᖅ ᐅᓪᓗᓂᒃ 7ᓂᒃ, ᑭᐊᑐᐃᓐᓇᐅᓪᓗ ᐊᒃᑐᕐᐸᒍ ᐊᒃᑐᐃᔪᖅ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ.

²⁰ ᐊᕐᓇᐅᑉ ᓇᓚᕕᒋᔭᖏᑦ ᐊᐅᓈᕐᑎᓪᓗᒍ ᓴᓗᒤᑦᑑᓂᐊᕐᐳᑦ, ᐃᒃᓯᕙᕕᒋᔭᓕᒫᖏᓪᓗ ᓴᓗᒤᑦᑑᓂᐊᕐᐳᑦ.

²¹ ᑭᓇᒧᓪᓘᓐᓃᑦ ᓯᓂᒡᕕᖓ ᐊᒃᑐᕐᑕᐅᒃᐸᑦ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐃᒥᕐᒧᓪᓗ ᐅᕕᓂᖕᓂᐊᕐᓗᓂ, ᐊᒃᑐᕐᓯᔪᕕᓂᖅ ᓴᓗᒤᓐᓂᐊᕐᐳᖅ ᐅᓐᓄᒃ ᑎᑭᓪᓗᒍ.

²² ᑭᐊᓘᓐᓃᑦ ᐃᒃᓯᕙᕕᖓᓂᒃ ᐊᒃᑐᕐᓯᒃᐸᑦ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐃᒥᕐᒧᓪᓗ ᐅᕕᓂᖕᓂᐊᕆᐊᖃᕐᐳᖅ ᓴᓗᒤᑦᑑᓂᐊᕐᓗᓂᓗ ᐅᓐᓄᒃ ᑎᑭᓪᓗᒍ.

²³ ᓯᓂᒡᕕᖓᓘᓐᓃᑦ ᐃᒃᓯᕙᕕᖓᓘᓐᓃᑦ, ᑭᓇᒧᑦ ᐊᒃᑐᕐᑕᐅᒃᐸᑕ, ᐊᒃᑐᕐᓯᔪᖅ ᓴᓗᒤᓐᓂᐊᕐᐳᖅ ᐅᓐᓄᒃ ᑎᑭᓪᓗᒍ.

²⁴ ᐊᖑᑎᐅᑉ ᐃᓐᓇᖓᖃᑎᒋᒃᐸᒍ ᐱᖃᑎᒋᒃᐸᒍᓗ ᐊᐅᓈᕐᑎᓪᓗᒍ, ᐊᖑᑦ ᓴᓗᒤᓐᓂᐊᕐᐳᖅ ᐅᓪᓗᓂᒃ 7ᓂᒃ, ᓇᓚᕕᒋᔭᓕᒫᖏᓪᓗ ᓴᓗᒤᑦᑑᓂᐊᕐᐳᑦ.

²⁵ ᐊᕐᓇᖅ ᐊᐅᓈᕐᐸᑦ ᐅᓪᓗᓂᒃ ᐅᓄᕐᑐᓂᒃ ᑕᖅᑭᑕᒫᕐᓯᐅᑎᖓᑕ ᐊᓯᐊᒍᑦ, ᐅᕝᕙᓘᓐᓃᑦ ᑕᖅᑭᑕᒫᑦ ᐊᐅᓈᕐᕕᖓᑕ ᐅᖓᑖᓄᑦ, ᑖᓐᓇ ᓴᓗᒤᑦᑑᓂᐊᕐᐳᖅ ᐊᐅᓈᕐᓂᕐᒥᓂ, ᓲᕐᓗᑦᑕᐅᖅ ᑕᖅᑭᑕᒫᑦ ᐊᐅᓈᕐᕕᖕᒥᑐᑦ.

²⁶ ᓯᓂᒡᕕᒃ ᓇᓚᕕᒋᔭᖓ ᐊᐅᓈᕐᑎᓪᓗᒍ ᓴᓗᒤᑦᑑᓂᐊᕐᐳᖅ ᓲᕐᓗᑦᑕᐅᖅ ᑕᖅᑭᑕᒫᕐᓯᐅᑎᒥᒃ ᐊᐅᓈᕈᓯᖓᑐᑦ.

²⁷ ᑭᐊᓘᓐᓃᑦ ᐊᒃᑐᕐᐸᒍ ᓯᓂᒡᕕᖓᓘᓐᓃᑦ ᐃᒃᓯᕙᕕᖓᓘᓐᓃᑦ ᓴᓗᒤᑦᑑᓕᕐᓂᐊᕐᐳᖅ, ᑖᑦᓱᒪ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐃᒥᕐᒧᓪᓗ ᐅᕕᓂᖕᓂᐊᕐᓗᓂ, ᓴᓗᒤᑦᑑᓂᐊᕐᐳᕐᓗ ᐅᓐᓄᒃ ᑎᑭᓪᓗᒍ.

²⁸ ᐊᐅᓈᕈᓐᓃᕈᓂ ᐊᕐᓇᖅ ᐅᑕᖅᑭᔭᕆᐊᖃᕐᐳᖅ ᐅᓪᓗᓂᒃ 7ᓂᒃ, ᑭᖑᓂᖓᒍᑦ ᐊᑐᕐᑕᐅᔭᕆᐊᓕᒃ ᒪᓕᒡᓗᒍ ᓴᓗᒪᓂᕋᕐᑕᐅᓕᕐᓂᐊᕐᐳᖅ.

²⁹ ᐅᓪᓗᑦ 8ᖓᓐᓂ ᑑᕖᖕᓂᒃ ᒪᕐᕉᖕᓂᒃ ᐅᕝᕙᓘᓐᓃᑦ ᐊᕿᒡᒋᐅᔮᕐᑑᖕᓂᒃ ᐱᑦᔭᓐᓂᒃ ᒪᕐᕉᖕᓂᒃ ᐱᐊᕋᕕᓃᖕᓂᒃ ᓇᒃᓴᕆᐊᖃᕐᐳᖅ, ᑐᓂᕐᕈᓯᕐᑎᑦᓯᔨᒧᓪᓗ ᑐᓂᓗᒋᒃ ᑐᐱᐅᑉ ᑲᑎᒪᕕᐅᑉ ᐃᑎᕐᑕᕐᕕᖓᓂ.

³⁰ ᑐᓂᕐᕈᓯᕐᑎᑦᓯᔨ ᑐᓂᕐᕈᓯᕆᐊᖃᕐᐳᖅ ᑎᖕᒥᐊᒥᒃ ᐊᑕᐅᓯᕐᒥᒃ ᐊᔪᕐᓂᖅ ᐱᓪᓗᒍ, ᐂᑉᐸᖓᓗ ᑐᓂᕐᕈᑎᒋᓗᒍ ᐃᑯᐊᓪᓚᓗᒍ ᑐᓂᕐᕈᓯᕐᑎᑦᓯᔨᐅᑉ ᐊᕐᓇᖅ ᐃᓱᒪᒋᔪᓐᓁᕐᕕᐅᑎᓐᓂᐊᕐᐹ ᐊᑕᓂᕐᒧᑦ ᓴᓗᒤᑦᑐᖅ ᐊᐅᓈᕐᓂᕆᓚᐅᕐᑕᖓ ᐱᓪᓗᒍ.

³¹ ᐃᓴᕆᐊᓕᒥᐅᖑᔪᓯ ᐊᕕᑎᓯᒪᔭᕆᐊᖃᕐᐸᓯ ᓱᓇᑐᐃᓐᓁᑦ ᓴᓗᒤᓕᕈᑕᐅᔪᓐᓇᕐᑐᑦ, ᑐᖁᖁᓇᒋᑦ ᓴᓗᒤᓕᑎᑕᐅᓂᕐᒧᑦ, ᐃᑦᔪᕐᓁᑦᑐᕕᖁᑎᓐᓂ ᓇᔪᒐᓐᓂᒃ ᐃᑦᔪᕐᓇᕐᓯᑎᑦᓯᒃᐸᑕ, ᑖᒃᑯᓄᖓ ᓇᔫᑎᓂᕆᔭᓐᓂ ᑐᖁᑕᐅᔪᒃᓴᐅᖕᒪᑕ.

³² ᐅᓇ ᑕᕝᕙ ᐱᖁᔭᖅ ᐊᖑᑦ ᖃᐹᕿᔪᖅ ᐱᑦᔪᑎᒋᓪᓗᒍ, ᓴᓗᒤᓕᑎᑕᐅᔪᓪᓗ ᖃᐹᕿᓂᕐᒧᑦ.

³³ ᐊᕐᓇᐅᓪᓗ ᐊᐅᓈᕐᑑᑉ ᑕᖅᑭᑕᒫᕐᓯᐅᑎᖓ ᐱᓪᓗᒍ, ᐊᖑᓪᓘᓐᓃᑦ ᐊᕐᓇᕐᓘᓐᓃᑦ ᖃᐹᕿᔪᖅ ᐱᓪᓗᒍ, ᐊᖑᓪᓗ ᐊᕐᓇᒥᒃ ᓴᓗᒤᑦᑐᒥᒃ ᐱᖃᑎᖃᕐᑐᖅ ᐱᓪᓗᒍ.