ᒨᓯᓯ ᐱᖓᔪᖏᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦᒪᓕᒊᑦ ᐅᕕᓂᒡᓗᖕᓂᖅ ᐸᕐᑎᕐᓂᖅ ᐱᑦᔪᑎᒋᓪᓗᒍ 1 ᐊᑕᓂᐅᑉ ᒨᓯᓯᓗ ᐂᕉᓂᓗ ᐅᖃᐅᑎᕚᒃ, 2 “ᓇᓪᓕᐊᑦ ᐅᕕᓂᖓᓂ ᖃᑦᑎᒃᑐᖃᕐᐸᑦ, ᐅᕝᕙᓗ ᖃᑦᑎᒃᑐᒥᒃ ᐊᖕᒪᕐᓯᒪᔪᖃᕐᐸᑦ, ᐅᕝᕙᓘᓐᓃᑦ ᐊᐅᐸᕐᓯᓯᒪᔪᖃᕐᐸᑦ, ᐃᓱᒪᓇᕐᐸᓪᓗ ᐂᑦᑐᕐᓗᐃᔪᓐᓇᕐᑑᔮᕐᓗᓂ, ᐂᕉᓂᒧᑦ, ᑭᖑᕚᖓᓄᓪᓘᓐᓃᑦ ᑐᓂᕐᕈᓯᕐᑎᑦᓯᔨᒧᑦ ᐂᔪᒃᓴᐅᕗᖅ. 3 ᑐᓂᕐᕈᓯᕐᑎᑦᓯᔨᐅᑉ ᖃᐅᔨᓴᕆᐊᖃᕐᐹ ᐅᕕᓂᒡᓗᒃᑐᖅ, ᓄᔧᑦ ᐅᕕᓂᕐᓗᖕᒦᑦᑐᑦ ᖃᑯᕐᓯᒃᐸᑕ ᐅᕕᓂᕐᓘᓪᓗ ᐊᒥᖓᑕ ᐃᑭᐊᖓᓃᓕᕐᐸᑦ, ᑕᕝᕙ ᐂᑦᑐᐃᔪᓐᓇᕐᓗᓂ ᐸᕐᑎᕐᑑᓕᕐᐳᖅ. ᑐᓂᕐᕈᓯᕐᑎᑦᓯᔨᐅᑉ ᖃᐅᔨᓴᕈᓂᐅᒃ, ᐅᖃᐅᓯᕆᔭᕆᐊᖃᕐᐹ ᐅᒃᐱᕐᓂᑎᒃ ᒪᓕᒡᓗᒍ ᓴᓗᒤᓐᓂᕋᕐᓗᒍ. 4 ᐅᕕᓂᕐᓗᒡᓕ ᖃᑯᕐᑕᐅᒃᐸᑦ ᐊᒥᐅᓪᓗ ᐊᑖᓃᓗᐊᕐᑑᔮᖏᓪᓗᓂ ᓄᔧᓪᓗ ᑖᑦᓱᒪᓃᑦᑐᑦ ᖃᑯᕐᓯᖏᑉᐸᑕ, ᑐᓂᕐᕈᓯᕐᑎᑦᓯᔨᐅᑉ ᐅᕕᓂᕐᓗᒃᑐᖅ ᐃᓄᑐᐊᖑᑎᑦᓴᕆᐊᖃᕐᐹ ᐅᓪᓗᓂᒃ 7ᓂᒃ. 5 ᐅᓪᓗᑦ 7ᖓᓐᓂ ᑐᓂᕐᕈᓯᕐᑎᑦᓯᔨᐅᑉ ᖃᐅᔨᓴᕆᐊᖃᕐᐹ, ᐅᕕᓂᕐᓗᖕᓂᕐᓗ ᓱᕐᕋᖏᑉᐸᑦ ᐊᓯᐊᓄᓪᓗ ᓯᐊᒻᒪᖏᓪᓗᓂ, ᐃᓄᑐᐊᖑᑎᒃᑲᓐᓂᕆᐊᖃᕐᐹ ᓱᓕ ᐅᓪᓗᓂᒃ 7ᓂᒃ. 6 ᐅᓪᓗᑦ 7ᐅᓕᕐᒥᒃᐸᑕ, ᑐᓂᕐᕈᓯᕐᑎᑦᓯᔨᐅᑉ ᖃᐅᔨᓴᒃᑲᓐᓂᕆᐊᖃᕐᐹ, ᐅᕕᓂᕐᓗᒡᓗ ᓄᖑᑉᐸᑦ ᓯᐊᒻᒪᖏᓪᓗᓂᓗ ᐅᕕᓂᖕᒥ, ᑐᓂᕐᕈᓯᕐᑎᑦᓯᔨᐅᑉ ᓴᓗᒪᓂᕋᕆᐊᖃᕐᐹ, ᐅᖏᓚᖕᓂᕕᓂᑐᐃᓐᓇᐅᖕᒪᑦ, ᐃᓅᑉ ᑖᑦᓱᒪ ᐊᓐᓄᕌᓂ ᐅᐊᓴᕆᐊᖃᕐᐰᑦ, ᓴᓗᒻᒪᕐᓂᐊᕐᐳᖅ ᑕᕝᕙ. 7 ᐅᕕᓂᕐᓗᒡᓕ ᓯᐊᒻᒪᕐᐸᑦ ᐃᒻᒥᓂᒃ ᑕᑯᔭᐅᑎᓚᐅᕐᓗᓂ ᑐᓂᕐᕈᓯᕐᑎᑦᓯᔨᒧᑦ ᓴᓗᒪᓂᕋᕐᑕᐅᔪᒪᓗᓂ, ᑐᓂᕐᕈᓯᕐᑎᑦᓯᔨᒧᑦ ᑕᑯᔭᐅᒃᑲᓐᓂᕆᐊᖃᕐᐳᖅ. 8 ᑐᓂᕐᕈᓯᕐᑎᑦᓯᔨᐅᑉ ᖃᐅᔨᓴᕆᐊᖃᕐᐹ, ᐅᕕᓂᕐᓗᒡᓗ ᓯᐊᒻᒪᕐᐸᑦ ᐊᓯᐊᓄᑦ, ᓴᓗᒤᓐᓂᕋᕐᓗᒍ ᐅᖃᐅᓯᕆᔭᕆᐊᖃᕐᐹ, ᑍᒤᑦᑐᖅ ᐸᕐᑎᕐᓂᐅᖕᒪᑦ ᑲᑉᐱᐊᓇᕐᑐᖅ. 9 “ᑲᑉᐱᐊᓇᕐᑐᒥᒃ ᐸᕐᑎᕐᑐᖃᕐᐸᑦ, ᑖᓐᓇ ᑐᓂᕐᕈᓯᕐᑎᑦᓯᔨᒧᑦ ᐋᑕᐅᔭᕆᐊᖃᕐᐳᖅ. 10 ᑐᓂᕐᕈᓯᕐᑎᑦᓯᔨᐅᑉ ᖃᐅᔨᓴᕆᐊᖃᕐᐹ, ᖃᑯᕐᑕᖃᕐᐸᑦ ᐊᒥᕐᓗᖕᒥᒃ ᓄᔧᓪᓗ ᑕᕝᕙᓃᑦᑐᑦ ᖃᑯᕐᓯᒃᐸᑕ ᐃᒪᖃᕐᐸᓪᓗ, 11 ᑍᒤᑦᑐᖅ ᐱᔪᓐᓃᕐᑎᑕᐅᔪᓐᓇᓐᖏᓚᖅ ᐅᕕᓂᕐᓗᖕᓂᖅ ᐸᕐᑎᕐᓂᖅ ᑲᑉᐱᐊᓇᕐᑐᖅ ᑐᓂᕐᕈᓯᕐᑎᑦᓯᔨᐅᓪᓗ ᓴᓗᒤᓐᓂᕋᕐᓗᒍ ᐅᖃᐅᓯᕆᔭᒃᓴᕆᕚ. ᑕᕝᕙ ᐃᓄᑑᑎᑦᓴᕆᐊᖃᕈᓐᓃᕐᐹ, ᓴᓗᒤᑦᑐᒥᒃ ᑍᔭᐅᓕᕇᕐᒪᑦ. 12 ᐅᕕᓂᕐᓗᖕᓂᖅ ᓯᐊᒻᒪᕐᐸᑦ ᑎᒥᓕᒫᖓᓄᑦ, ᑐᓂᕐᕈᓯᕐᑎᑦᓯᔨᐅᓪᓗ ᑕᑯᓗᓂᐅᒃ, ᐃᓄᖕᒥᒃ ᓈᓯᓯᒪᒃᐸᑦ ᓂᐊᖁᖓᓂᑦ ᐃᑎᒐᖏᓐᓄᑦ ᑎᑭᓯᒪᓗᓂ. 13 ᑐᓂᕐᕈᓯᕐᑎᑦᓯᔨᐅᑉ ᖃᐅᔨᓴᕆᐊᖃᕐᐹ, ᐅᕕᓂᕐᓗᖕᓂᐅᑉ ᐃᓅᑉ ᑎᒥᖓ ᐅᓕᒃᓯᒪᓕᕐᓗᓂᐅᒃ, ᑐᓂᕐᕈᓯᕐᑎᑦᓯᔨᐅᑉ ᑕᕝᕙ ᓴᓗᒪᓂᕋᕐᓗᒍ ᐅᖃᐅᓯᕆᔭᕆᐊᖃᕐᐹ. ᐅᕕᓂᕐᓗᖕᓂᕕᓂᖅ ᖃᑯᕐᓯᒃᐸᑦ ᑎᒥᖓᓂ, ᑕᕝᕙ ᓴᓗᒻᒪᕐᐳᖅ. 14 ᑭᓯᐊᓂᓕ ᐊᒥᕐᓗᖕᒥᒃ ᐊᖕᒪᕐᓯᒪᔪᒥᒃ ᐱᑕᖃᕐᐸᑦ ᑕᕝᕙ ᓴᓗᒤᑦᑑᓂᐊᕐᐳᖅ. 15 ᑐᓂᕐᕈᓯᕐᑎᑦᓯᔨ ᑕᑯᒍᓂ ᐊᒥᕐᓗᖕᒥᒃ ᐊᖕᒪᕐᓯᒪᔪᒥᒃ, ᓴᓗᒤᓐᓂᕋᕐᓗᒍ ᐅᖃᐅᓯᕆᔭᕆᐊᖃᕐᐹ, ᐊᒥᕐᓗᒃ ᐊᖕᒪᕐᓯᒪᔪᖅ ᓴᓗᒤᒻᒪᑦ; ᑍᒤᑉᐸᑦ ᑕᕝᕙ ᐂᑦᑐᐃᔭᑦᑐᒥᒃ ᐸᕐᑎᕐᓂᐅᕗᖅ. 16 ᐊᒥᕐᓗᒃ ᐊᖕᒪᕐᓯᒪᔪᖅ ᒪᒥᓪᓗᓂ ᖃᑯᕐᓯᒃᐸᑦ, ᑐᓂᕐᕈᓯᕐᑎᑦᓯᔨᒧᑦ ᐂᔭᕆᐊᖃᕐᐳᖅ. 17 ᑐᓂᕐᕈᓯᕐᑎᑦᓯᔨᐅᑉ ᖃᐅᔨᓴᕆᐊᖃᕐᐹ, ᐊᒥᕐᓗᖏᑦ ᖃᑯᕐᓯᒃᐸᑕ, ᑐᓂᕐᕈᓯᕐᑎᑦᓯᔨᐅᑉ ᐅᕕᓂᕐᓗᒃᑐᖅ ᓴᓗᒻᒪᕐᓂᕋᕐᓗᒍ ᐅᖃᐅᓯᕆᔭᕆᐊᖃᕐᐹ; ᑕᕝᕙ ᓴᓗᒪᓕᕐᓂᐊᕐᐳᖅ. 18 “ᓇᓪᓕᐊᑦ ᐊᔪᐊᕐᐸᑦ ᐅᕕᓂᖕᒥᒍᑦ ᑖᓐᓇᓗ ᒪᒥᑉᐸᑦ, 19 ᐊᔪᐊᕕᓂᕐᒥᒃ ᖃᑯᕐᑕᒥᒃ ᐳᕕᓕᕐᐸᑦ, ᐅᕝᕙᓘᓐᓃᑦ ᐊᐅᐸᕈᔪᒃᑐᒥᒃ ᖃᑯᕐᑕᒥᒃ ᑕᕐᓴᖃᕐᐸᑦ, ᑍᒤᑦᑐᖅ ᑐᓂᕐᕈᓯᕐᑎᑦᓯᔨᒧᑦ ᐂᔭᕆᐊᖃᕐᐳᖅ. 20 ᑕᕝᕙ ᑐᓂᕐᕈᓯᕐᑎᑦᓯᔨᐅᑉ ᖃᐅᔨᓴᕆᐊᖃᕐᐹ, ᐅᕕᓂᖓᑕ ᐃᑭᐊᖓᓃᑉᐸᑦ, ᒥᖅᑯᐃᓪᓗ ᐅᕕᓂᖕᒥ ᑕᕝᕙᓃᑦᑐᑦ ᖃᑯᕐᓯᒃᐸᑕ, ᑕᕝᕙ ᑐᓂᕐᕈᓯᕐᑎᑦᓯᔨᐅᑉ ᓴᓗᒤᓐᓂᕋᕐᓗᒍ ᐅᖃᐅᓯᕆᔭᕆᐊᖃᕐᐹ, ᑍᒤᑦᑐᖅ ᐂᑦᑐᐃᔭᑦᑑᓪᓗᓂ ᐅᕕᓂᕐᓗᖕᓂᐅᖕᒪᑦ ᓴᖅᑭᑦᑐᖅ ᐊᔪᐊᕕᓂᕐᒥᑦ. 21 ᑐᓂᕐᕈᓯᕐᑎᑦᓯᔨᐅᓪᓕ ᖃᐅᔨᓴᕈᓂᐅᒃ, ᒥᖅᑯᐃᓪᓗ ᑕᕝᕙᓃᑦᑐᑦ ᖃᑯᕐᓯᖏᑉᐸᑕ ᐅᕕᓂᖓᑕᓗ ᐃᑭᐊᖓᓃᖏᑉᐸᑦ ᑕᑯᒃᓴᐅᑦᓯᐊᕈᓐᓃᕐᓗᓂ, ᑐᓂᕐᕈᓯᕐᑎᑦᓯᔨᐅᑉ ᑕᕝᕙ ᐃᓄᑑᑎᑦᓴᕆᐊᖃᕐᐹ ᐅᓪᓗᓂᒃ 7ᓂᒃ. 22 ᐅᕕᓂᖓᑕᓗ ᐊᓯᐊᓄᑦ ᓯᐊᒻᒪᕐᐸᓪᓕᐊᓕᕐᐸᑦ, ᑐᓂᕐᕈᓯᕐᑎᑦᓯᔨᐅᑉ ᑕᕝᕙ ᓴᓗᒤᓐᓂᕋᕐᓂᐊᕐᐹ; ᑍᒤᑦᑐᑦ ᐂᑦᑐᐃᔪᓐᓇᕐᒪᑕ. 23 ᑖᓐᓇᓕ ᑕᕐᓴᖅ ᐊᓯᑦᔨᖏᑉᐸᑦ ᓯᐊᒻᒪᖏᓪᓗᓂᓗ, ᑕᕝᕙ ᕿᓕᕈᑐᐃᓐᓇᐅᕗᖅ ᐊᔪᐊᕕᓂᖅ, ᑐᓂᕐᕈᓯᕐᑎᑦᓯᔨᐅᓪᓗ ᓴᓗᒪᓂᕋᕐᓗᒍ ᐅᖃᐅᓯᕆᔭᕆᐊᖃᕐᐹ. 24 “ᓇᓪᓕᐊᓪᓕ ᐆᓯᒪᒃᐸᑦ ᐅᕕᓂᖕᒥᒍᑦ, ᐊᐅᐸᕐᓯᓗᓂ ᖃᑯᕐᓯᒃᐸᑦ, ᐅᕝᕙᓘᓐᓃᑦ ᖃᑯᕐᑕᖅ ᑕᑯᒃᓴᐅᓕᕐᐸᑦ ᐊᖕᒪᕐᓯᒪᔪᒥ ᐆᓐᓂᕐᒥ, 25 ᑐᓂᕐᕈᓯᕐᑎᑦᓯᔨᐅᑉ ᖃᐅᔨᓴᕆᐊᖃᕐᐹ, ᒥᖅᑯᐃᑦ ᐆᓐᓂᕐᒦᑦᑐᑦ ᖃᑯᕐᓯᒃᐸᑕ, ᒥᖅᑯᐃᓪᓗ ᐅᕕᓂᐅᑉ ᐃᑭᐊᖓᓅᕐᓯᒪᒃᐸᑕ, ᑕᕝᕙ ᐂᑦᑐᐃᔪᓐᓇᕐᐳᖅ ᐅᕕᓂᕐᓗᒃ ᐊᓂᔪᖅ ᐆᓐᓂᕐᒥᑦ. ᑐᓂᕐᕈᓯᕐᑎᑦᓯᔨᐅᑉ ᑕᕝᕙ ᓴᓗᒤᑦᑐᒥᒃ ᐅᖃᐅᓯᕆᔭᕆᐊᖃᕐᐹ, ᑍᒤᑦᑐᖅ ᐅᕕᓂᕐᓗᒃ ᐂᑐᐃᔪᓐᓇᕐᑑᖕᒪᑦ, ᑍᒤᑉᐸᑦ ᑕᕝᕙ ᐂᑦᑐᐃᔭᑦᑐᒥᒃ ᐸᕐᑎᕐᓂᐅᕗᖅ. 26 ᑐᓂᕐᕈᓯᕐᑎᑦᓯᔨᐅᓪᓕ ᖃᐅᔨᓴᕐᐸᒍ ᒥᖅᑯᐃᓪᓗ ᑕᕝᕙᓃᑦᑐᑦ ᖃᑯᕐᓯᖏᑉᐸᑕ ᑕᕐᓴᒥ ᑕᕝᕙᓂ, ᐅᕕᓂᐅᓪᓗ ᐃᑭᐊᖓᓄᐊᕐᓯᒪᖏᑉᐸᑦ ᑕᑯᒃᓴᐅᑦᓯᐊᖏᓪᓗᓂᓗ, ᑐᓂᕐᕈᓯᕐᑎᑦᓯᔨᐅᑉ ᑕᕝᕙ ᐃᓄᑐᐊᖑᑎᑦᓴᕆᐊᖃᕐᐹ ᐅᓪᓗᓂᒃ 7ᓂᒃ. 27 ᐅᓪᓘᑉ 7ᖓᓂ ᑐᓂᕐᕈᓯᕐᑎᑦᓯᔨᐅᑉ ᖃᐅᔨᓴᕆᐊᖃᕐᐹ, ᓯᐊᒻᒪᕐᐸᓪᓕᐊᒃᐸᑦ ᐅᕕᓂᖓᓄᑦ ᐊᓯᐊᓄᑦ, ᑐᓂᕐᕈᓯᕐᑎᑦᓯᔨᐅᑉ ᑕᕝᕙ ᓴᓗᒤᓐᓂᕋᕐᓗᒍ ᐅᖃᐅᓯᕆᔭᕆᐊᖃᕐᐹ; ᑍᒤᑦᑐᖅ ᐸᕐᑎᕐᓂᐅᖕᒪᑦ ᐂᑦᑐᐃᔪᓐᓇᕐᓗᓂ. 28 ᑭᓯᐊᓂᓕ, ᑕᕐᓴᖅ ᐊᓯᑦᔨᖏᑉᐸᑦ, ᓯᐊᒻᒪᖏᑉᐸᓪᓗ ᐅᕕᓂᖓᑕ ᐊᓯᐊᓄᑦ ᑕᑯᒃᓴᐅᑦᓯᐊᕈᓃᕐᓗᓂ, ᑍᒤᑦᑐᖅ ᐆᓐᓂᕐᒥᑦ ᐳᕕᑐᐃᓐᓇᕐᒪᑦ, ᑐᓂᕐᕈᓯᕐᑎᑦᓯᔨᐅᓪᓗ ᓴᓗᒪᓂᕋᕐᓗᒍ ᐅᖃᐅᓯᕆᔭᕆᐊᖃᕐᐹ; ᑍᒤᑦᑐᖅ ᕿᓕᕈᑐᐃᓐᓇᐅᖕᒪᑦ ᐆᓐᓂᕕᓂᕐᒥᑦ. 29 “ᐊᖑᑦ ᐊᕐᓇᕐᓘᓐᓃᑦ ᓂᐊᖁᕐᒥᒍᑦ ᐋᓐᓂᐊᔪᖃᕐᐸᑦ ᑕᓪᓗᒥᒍᓪᓘᓐᓃᑦ, 30 ᑕᕝᕙ ᑐᓂᕐᕈᓯᕐᑎᑦᓯᔨᐅᑉ ᑲᐅᔨᓴᕆᐊᖃᕐᐹ. ᑖᓐᓇᓗ ᐋᓐᓂᐊᔪᖅ ᐅᕕᓂᐅᑉ ᐃᑭᐊᖓᓃᑦᑑᔮᕐᐸᑦ ᓄᔧᓪᓗ ᑕᕝᕙᓃᑦᑐᑦ ᖁᕐᓱᕐᑑᓕᕐᐸᑕ, ᑐᓂᕐᕈᓯᕐᑎᑦᓯᔨᐅᑉ ᐃᓄᒃ ᑖᓐᓇ ᓴᓗᒤᓐᓂᕋᕐᓗᒍ ᐅᖃᐅᓯᕆᔭᕆᐊᖃᕐᐹ: ᑍᒤᑦᑐᖅ ᐅᖏᓚᖕᓂᐅᖕᒪᑦ ᐂᑦᑐᐃᔪᓐᓇᕐᓗᓂᓗ ᐸᕐᑎᕐᓂᐅᕗᖅ ᓂᐊᑯᕐᒥ ᐅᒥᖕᒥᓘᓐᓃᑦ. 31 ᑐᓂᕐᕈᓯᕐᑎᑦᓯᔨᓕ ᑍᒤᑦᑐᒥᒃ ᖃᐅᔨᓴᕐᐸᑦ, ᐅᕕᓂᖓᑕ ᐃᑭᐊᖓᓃᑦᑑᔮᖏᑉᐸᑦ ᓄᔭᕐᑕᖃᖏᑉᐸᓪᓗ ᕿᕐᓂᕐᑕᒥᒃ, ᐃᓄᒃ ᑍᒤᑦᑐᒥᒃ ᐅᕕᓂᕐᓗᒃᑐᖅ ᑐᓂᕐᕈᓯᕐᑎᑦᓯᔨᐅᑉ ᐃᓄᑑᑎᑦᓴᕆᐊᖃᕐᐹ ᐅᓪᓗᓂᒃ 7ᓂᒃ. 32 ᐅᓪᓗᐃᑦ 7ᖓᓐᓂ ᑐᓂᕐᕈᓯᕐᑎᑦᓯᔨᐅᑉ ᖃᐅᔨᓴᕆᐊᖃᕐᐹ ᐋᓐᓂᐊᔪᖅ ᐅᕕᓂᖓᓃᑦᑐᖅ, ᐅᖏᓚᖕᓂᖓᓗ ᐊᓯᐊᓄᑦ ᓯᐊᒻᒪᖏᑉᐸᑦ ᖁᕐᓱᕐᑐᓂᒡᓗ ᓄᔭᕐᑕᖃᖏᑉᐸᑦ ᐅᕕᓂᖓᓂᓗ ᐃᑎᔪᐊᓘᖏᑉᐸᑦ, 33 ᐅᕕᓂᕐᓗᒃᑑᑉ ᓂᐊᖁᐊ ᐅᕕᓃᓐᓇᕈᕐᓗᒍ ᓴᓕᔭᕆᐊᖃᕐᐳᖅ, ᑖᓐᓇ ᐊᒥᕐᓗᒃᑐᖅ ᓴᓕᓐᖏᑕᑐᐊᕆᓗᒍ, ᐅᓪᓗᓂᒡᓗ 7ᓂᒃ ᑐᓂᕐᕈᓯᕐᑎᑦᓯᔨᐅᑉ ᐃᓄᑑᑎᒃᑲᓐᓂᕆᐊᖃᕐᐹ. 34 ᐅᓪᓗᐃᑦ 7ᖓᓐᓂ ᐅᕕᓂᕐᓗᒃᑐᖅ ᑐᓂᕐᕈᓯᕐᑎᑦᓯᔨᐅᑉ ᖃᐅᔨᓴᕆᐊᖃᕐᐹ ᐅᕕᓂᖓᑕ ᐊᓯᐊᓄᑦ ᓯᐊᒻᒪᕐᓯᒪᖏᑉᐸᑦ, ᐅᕕᓂᐅᑉ ᐃᑭᐊᖓᓃᑐᐃᓐᓇᕐᐸᑦ, ᑐᓂᕐᕈᓯᕐᑎᑦᓯᔨᐅᑉ ᓴᓗᒪᓂᕋᕐᓗᓂᐅᒃ ᐅᖃᐅᓯᕆᔭᕆᐊᖃᕐᐹ. ᑖᑦᓱᒪ ᐊᓐᓄᕌᓂ ᐅᐊᓴᕐᓗᒋᑦ, ᑕᕝᕙ ᓴᓗᒻᒪᕐᓂᐊᕐᐳᖅ. 35 ᐅᕕᓂᖕᒥᓕ ᐋᓐᓂᐊᔪᖅ ᓯᐊᒻᒪᕐᐸᑦ ᓴᓗᒪᓂᕋᕐᑕᐅᓚᐅᕋᓗᐊᕐᓗᓂ, 36 ᑐᓂᕐᕈᓯᕐᑎᑦᓯᔨᐅᑉ ᖃᐅᔨᓴᕆᐊᖃᕐᐹ, ᑖᓐᓇ ᐅᕕᓂᖕᒥ ᐋᓐᓂᐊᔪᖅ ᓯᐊᒻᒪᕐᐸᑦ ᐅᕕᓂᖓᓄᑦ, ᑐᓂᕐᕈᓯᕐᑎᑦᓯᔨ ᑕᕝᕙ ᓄᔭᕐᓂᒃ ᖁᕐᓱᕐᓯᓯᒪᔪᓂᒃ ᕿᓂᕆᐊᖃᕈᓐᓃᕐᐳᖅ; ᐃᓄᒃ ᑖᓐᓇ ᓴᓗᒤᓕᕐᒪᑦ. 37 ᑭᓯᐊᓂᓕ ᑐᓂᕐᕈᓯᕐᑎᑦᓯᔨᐅᑉ ᐃᓱᒪᒥᓂᒃ ᐅᕕᓂᖕᒥ ᐋᓐᓂᐊᔪᖅ ᓯᐊᒻᒪᕋᓱᒋᖏᒃᑯᓂᐅᒃ ᓄᔧᓪᓗ ᖃᓄᐅᖏᑦᑐᑦ ᐱᕈᕐᐸᓪᓕᐊᓕᕐᐸᑕ, ᑕᕝᕙ ᐅᕕᓂᖕᒥ ᐋᓐᓂᐊᔪᖅ ᒪᒥᑉᐳᖅ, ᑐᓂᕐᕈᓯᕐᑎᑦᓯᔨᐅᑉ ᑕᕝᕙ ᓴᓗᒪᓂᕋᕆᐊᖃᕐᐹ. 38 “ᐊᖑᑦ ᐊᕐᓇᕐᓘᓐᓃᑦ ᖃᖁᕐᑕᓂᒃ ᐱᑕᖃᓕᕐᐸᑦ ᐅᕕᓂᖓᓂ, 39 ᑐᓂᕐᕈᓯᕐᑎᑦᓯᔨᐅᑉ ᑕᕝᕙ ᖃᐅᔨᓴᕆᐊᖃᕐᐹ, ᖃᑯᕐᑍᓪᓕ ᑕᒪᒃᑯᐊ ᖃᑯᕐᑕᓪᓚᕆᐅᖏᑉᐸᑕ, ᑕᕝᕙ ᑲᑉᐱᐊᓇᓐᖏᓚᑦ ᐅᕕᓂᖕᒥᑦ ᓴᖅᑭᑐᐃᓐᓇᕐᒪᑦ, ᐃᓄᒃ ᑍᒤᑦᑐᖅ ᓴᓗᒪᔪᒥᒃ ᑍᔭᐅᔭᕆᐊᖃᕐᐳᖅ. 40 “ᐊᖑᓪᓕ ᓄᔧᕐᐸᑦ, ᓂᐊᖁᐊ ᓄᔭᖃᕈᓐᓃᕐᓗᓂ, ᑖᓐᓇ ᓴᓗᒤᑦᑑᓐᖏᓚᖅ. 41 ᐃᓄᒃ ᓯᕗᒥᒍᑦ ᓄᔧᕐᐸᑦ ᒥᖅᑯᐃᕐᓯᓂᖃᓕᕐᓗᓂ, ᑍᒤᑦᑐᖅ ᓴᓗᒤᑦᑑᓐᖏᓚᖅ. 42 ᑭᓯᐊᓂ ᓄᔧᕐᓯᒪᔪᖅ ᐅᕕᓂᕐᓗᒃᐸᑦ ᑖᓐᓇᓗ ᐊᐅᐸᔪᒡᓗᓂ ᖃᑯᕈᔪᒃᐸᑦ ᓂᐊᖁᕐᒥᒍᑦ ᖃᐅᕐᒥᒍᓪᓘᓐᓃᑦ. 43 ᑐᓂᕐᕈᓯᕐᑎᑦᓯᔨᐅᑉ ᑕᕝᕙ ᖃᐅᔨᓴᕆᐊᖃᕐᐹ, ᐳᕕᑦᑐᕐᓗ ᑖᓐᓇ ᓂᐊᖁᐊᓃᑦᑐᕐᓘᓐᓃᑦ ᖃᐅᖓᓃᑦᑐᕐᓘᓐᓃᑦ ᐊᐅᐸᔪᒡᓗᓂ ᖃᑯᕈᔪᒃᐸᑦ ᑕᐅᑦᑐᖃᕐᓗᓂᓗ ᐂᑦᑐᐃᔭᑦᑐᑎᑐᑦ ᐸᕐᑎᕐᑐᑎᑐᑦ. 44 ᐃᓄᒃ ᑖᓐᓇ ᐸᕐᑎᕐᐳᖅ ᓴᓗᒤᑦᑑᓪᓗᓂ. ᑐᓂᕐᕈᓯᕐᑎᑦᓯᔨᐅᑉ ᓴᓗᒤᑦᑐᒥᒃ ᐅᖃᐅᓯᕆᔭᕆᐊᖃᕐᐹ ᓂᐊᖁᐊᓂ ᐅᕕᓂᕐᓗᖕᓂᖅ ᐱᑦᔪᑎᒋᓗᒍ. 45 “ᐃᓄᒃ ᑍᒤᑦᑐᒥᒃ ᐸᕐᑎᕐᑐᖅ ᐊᓐᓄᕌᓂᒃ ᐊᓕᒃᑐᕐᓯᒪᔪᓂᒃ ᐊᑐᕐᑐᒃᓴᐅᕗᖅ, ᓄᔭᑉᐱᒋᐊᖃᕐᓗᓂᓗ, ᑮᓇᕐᒥᓗ ᐃᓚᖓ ᐅᓕᒃᓯᒪᔭᕆᐊᖃᕐᐹ, ᓂᓪᓕᐊᕙᒡᓗᓂᓗ, ‘ᓴᓗᒤᑦᑐᖓ! ᓴᓗᒤᑦᑐᖓ!’ 46 ᑍᒫᒃ ᑖᓐᓇ ᐸᕐᑎᕐᓂᕐᒥᓂ ᑍᒪᓐᖓᑦ ᓴᓗᒤᑦᑑᓂᐊᕐᐳᖅ. ᐃᓄᑑᔭᕆᐊᖃᓕᕐᐳᖅ; ᓄᓇᓖᓪᓗ ᓯᓚᑖᓂ ᐃᓂᖃᕆᐊᓕᕐᐳᖅ ᐃᓄᖕᓄᑦ ᑲᑎᒪᔭᐅᖏᓪᓗᓂ.” ᒪᓕᒊᑦ ᐅᖁᒃ ᐱᑦᔪᑎᒋᓪᓗᒍ 47 “ᐊᓐᓄᕌᖅ ᐅᖁᒃᓯᒪᒃᐸᑦ, ᓄᕕᕐᓵᕐᓘᓐᓃᑦ ᖃᓪᓗᓈᕐᑕᑐᐃᓐᓇᕐᓘᓐᓃᑦ, 48 ᓄᕕᕐᓴᕐᓯᒪᔪᕐᓘᓐᓃᑦ ᖃᓪᓗᓈᕐᑕᓕᐅᕈᑎᒧᓪᓘᓐᓃᑦ ᓴᓇᓯᒪᔪᖅ, ᐱᕈᕐᑐᒥᓐᖔᕐᓯᒪᔪᖅ ᖃᓪᓗᓈᕐᑕᖅ ᐅᕝᕙᓘᓐᓃᑦ ᓰᐱᐅᑉ ᐊᓯᐊᑕᓗ ᒥᖅᑯᖓ, ᐆᒪᔫᓪᓘᓐᓃᑦ ᐊᒥᖓ, ᐆᒪᔫᓪᓘᓐᓃᑦ ᐊᒥᖓᓂᓐᖔᕐᓯᒪᔪᖅ. 49 ᐊᓐᓄᕌᖅ ᐅᖁᒃᓯᒪᔪᖅ, ᐆᒪᔫᑉ ᐊᒥᕕᓂᖓᓘᓐᓃᑦ, ᓄᕕᕐᓴᕐᓯᒪᔪᕐᓘᓐᓃᑦ, ᖃᓪᓗᓈᕐᑕᓕᐊᕆᓯᒪᔪᕐᓘᓐᓃᑦ, ᐆᒪᔫᑉ ᐊᒥᖓᓂᓐᖔᕐᓯᒪᔪᕐᓘᓐᓃᑦ, ᑐᖑᔪᕈᔪᒃᐸᑦ, ᐊᐅᐸᕈᔪᒃᐸᓪᓘᓐᓃᑦ, ᐊᖏᒡᓕᕙᓪᓕᐊᒃᐸᓪᓗ ᑐᓂᕐᕈᓯᕐᑎᑦᓯᔨᒧᑦ ᑕᑯᑎᑕᐅᔭᕆᐊᖃᕐᐳᖅ. 50 ᑐᓂᕐᕈᓯᕐᑎᑦᓯᔨᐅᑉ ᐅᖁᒃ ᕿᒥᕐᕈᐊᕆᐊᖃᕐᐹ, ᓴᓂᕐᕙᒃᓯᒪᔭᕆᐊᖃᕐᐹᓗ ᐅᓪᓗᓂᒃ 7ᓂᒃ. 51 ᐅᓪᓗᑦ 7ᖓᓐᓂ, ᖃᐅᔨᓴᒃᑲᓐᓂᕆᐊᖃᕐᐹ, ᐅᖁᒃ ᓯᐊᒻᒪᕐᐸᑦ ᐊᓐᓄᕌᒧᑦ ᓄᕕᕐᓴᕐᓯᒪᔪᒧᓪᓘᓐᓃᑦ, ᖃᓪᓗᓈᕐᑕᓕᐊᕆᓯᒪᔪᒧᓪᓘᓐᓃᑦ, ᐆᒪᔫᓪᓘᓐᓃᑦ ᐊᒥᖓᓄᑦ, ᓱᓇᑐᐃᓐᓇᕐᒧᑦ ᐊᑐᕋᓗᐊᕐᐸᑦ, ᑍᒤᑦᑐᖅ ᑕᕝᕙ ᐅᖁᒃ ᐊᓐᓄᕌᒥᒃ ᐱᐅᔪᓐᓃᕐᑎᑦᓯᔪᓐᓇᕐᑐᖅ, ᐸᕐᑎᕐᓂᐅᕗᖅ ᐂᑦᑐᐃᔪᓐᓇᕐᑐᖅ, ᐊᓐᓄᕌᖅ ᑕᕝᕙ ᓴᓗᒤᑉᐳᖅ. 52 ᑐᓂᕐᕈᓯᕐᑎᑦᓯᔨᐅᑉ ᐃᑭᑦᓴᕆᐊᖃᕐᐹ ᐊᓐᓄᕌᖅ, ᓄᕕᕐᓴᕐᓯᒪᔪᕐᓘᓐᓃᑦ ᖃᓪᓗᓈᕐᑕᓕᐊᕆᓯᒪᔪᕐᓘᓐᓃᑦ, ᓰᐱᐅᑉ ᒥᖅᑯᖓ ᐱᕈᕐᑐᓂᓐᖔᕐᓯᒪᔪᕐᓘᓐᓃᑦ, ᐆᒪᔫᓪᓘᓐᓃᑦ ᐊᒥᖓ ᐅᖁᒃᓯᒪᔪᖅ, ᐅᖁᒃ ᐱᐅᔪᓐᓃᕐᑎᑦᓯᖕᒪᑦ ᐊᓐᓄᕌᒥᒃ, ᐸᕐᑎᕐᓂᐅᕗᖅ ᐂᑦᑐᐃᔪᓐᓇᕐᑐᖅ, ᑖᓐᓇ ᐃᑭᑕᐅᔭᕆᐊᖃᕐᐳᖅ. 53 “ᑐᓂᕐᕈᓯᕐᑎᑦᓯᔨᐅᓪᓕ ᕿᒥᕐᕈᐊᕈᓂᐅᒃ, ᐅᖁᒃ ᓯᐊᒻᒪᖏᑉᐸᑦ ᐊᓐᓄᕌᒥ ᓄᕕᕐᓵᒧᓪᓘᓐᓃᑦ, ᖃᓪᓗᓈᕐᑕᓕᐊᕆᓯᒪᔪᒧᓪᓘᓐᓃᑦ, ᐆᒪᔫᓪᓘᓐᓃᑦ ᐊᒥᕕᓂᖓ, 54 ᑐᓂᕐᕈᓯᕐᑎᑦᓯᔨ ᐱᖁᔨᔭᕆᐊᖃᕐᐳᖅ ᐊᓐᓄᕌᖅ ᐅᐊᓴᕐᑕᐅᖁᓗᒍ. ᑕᕝᕙ ᓱᓕ ᐅᓪᓗᓂᒃ 7ᓂᒃ ᓴᓂᕐᕙᒃᓯᒪᔭᕆᐊᖃᕐᐹ. 55 ᐊᓐᓄᕌᖅ ᐅᖁᖃᕐᑐᖅ ᐅᐊᓴᕐᑕᐅᓚᐅᕐᑎᓪᓗᒍ ᑕᐅᑦᑐᐊ ᐊᓯᑦᔨᖏᑉᐸᑦ, ᓯᐊᒻᒪᖏᒃᑲᓗᐊᕐᑎᓪᓗᒍ, ᑕᕝᕙ ᑖᓐᓇ ᓴᓗᒤᑉᐳᖅ. ᐃᑭᑕᐅᔭᕆᐊᓕᒃ, ᐊᓐᓄᕌᖅ ᐃᓗᐊᓂ ᓯᓚᑎᖔᖓᓂᓘᓐᓃᑦ ᐅᖁᒃᓯᒪᒐᓗᐊᕐᑎᓪᓗᒍ. 56 ᐊᓐᓄᕌᕐᓕ ᐅᐊᓴᕐᑕᐅᓚᐅᕐᑎᓪᓗᒍ ᐅᖁᒃ ᑕᑯᒃᓴᐅᑦᓯᐊᕈᓐᓃᕐᐸᑦ, ᑖᓐᓇ ᐅᖁᖃᕐᑐᕕᓂᖅ ᐊᓕᒡᓗᒍ ᐲᕆᐊᖃᕐᐹ, ᐊᓐᓄᕌᒥᑦ ᓄᕕᕐᓵᒥᓪᓘᓐᓃᑦ, ᖃᓪᓗᓈᕐᑕᓕᐊᕆᓯᒪᔪᒥᓪᓘᓐᓃᑦ, ᐆᒪᔫᓪᓘᓐᓃᑦ ᐊᒥᕕᓂᖓ. 57 ᐊᓐᓄᕌᖅ ᐅᖁᖃᓕᕐᐸᑦ ᓄᕕᕐᓴᕐᓯᒪᔪᖅ, ᖃᓪᓗᓈᕐᑕᓕᐊᕆᓯᒪᔪᕐᓘᓐᓃᑦ ᐆᒪᔫᓪᓘᓐᓃᑦ ᐊᒥᖓᓂᑦ ᓴᓇᓯᒪᔪᖅ, ᐅᖁᒃ ᓯᐊᒻᒪᕐᐸᓪᓕᐊᒃᐸᑦ ᖃᓄᑐᐃᓐᓇᖅ ᐅᖁᖃᕐᐸᑦ ᑖᓐᓇ ᐃᑯᐊᓪᓚᒃᑎᑕᐅᔭᕆᐊᖃᕐᐳᖅ. 58 ᐊᓐᓄᕌᕐᓗ ᖃᓄᐃᑦᑐᑐᐃᓐᓇᖅ ᐊᓐᓄᕌᓕᐊᕆᓯᒪᔪᖅ ᐅᐊᓴᕐᑕᐅᓯᒪᓗᓂ ᐅᖁᖃᕈᓐᓁᕐᐸᑦ, ᐅᐊᓴᕐᑕᐅᒃᑲᓐᓂᕆᐊᖃᕐᐳᖅ ᑕᕝᕙ ᓴᓗᒻᒪᕐᓂᐊᕐᐳᖅ. 59 “ᑖᒃᑯᐊ ᑕᕝᕙ ᐱᖁᔧᑦ ᐅᖁᒃᓯᒪᔪᑦ ᐊᓐᓄᕌᑦ ᖃᓄᐃᑦᑐᑐᐃᓐᓁᑦ ᐊᓐᓄᕌᓕᐊᕆᓯᒪᔪᑦ ᓴᓗᒪᓂᕋᕐᑕᐅᓂᖏᑦ ᓴᓗᒤᓐᓂᕋᕐᑕᐅᓂᖏᓪᓘᓐᓃᑦ.” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society