ᒨᓯᓯ ᐱᖓᔪᖏᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᕐᓇᐅᑉ ᐃᕐᓂᕋᑖᕐᑑᑉ ᓴᓗᒻᒪᕐᑎᑕᐅᓂᖓ

¹ ᐊᑕᓂᖅ ᒨᓯᓯᒧᑦ ᐅᖃᕐᐳᖅ,

² ᐃᓴᕆᐊᓕᒥᐅᑦ ᐃᒫᒃ ᐅᖃᐅᑎᒃᑭᑦ: “ᐊᕐᓇᖅ ᓄᑕᕋᒃᓴᖃᕐᐸᑦ ᐃᕐᓂᒃᐸᓪᓗ ᐃᕐᓂᕐᒥᒃ ᐃᓕᖅᑯᓯᖅ ᒪᓕᒡᓗᒍ ᓴᓗᒤᑦᑑᓂᐊᕐᐳᖅ ᐅᓪᓗᓂᒃ 7ᓂᒃ, ᑍᒫᒃᑕᐅᖅ ᓴᓗᒤᑦᑑᕙᖕᒪᑦ ᑕᖅᑭᑕᒫᑦ ᐊᐅᓈᕌᖓᒥ.

³ ᐅᓪᓗᑦ 8ᖓᓐᓂ ᓄᑲᑉᐱᐊᑯᓗᒃ ᑖᓐᓇ ᑭᐱᔭᐅᔭᕆᐊᖃᕐᐳᖅ.

⁴ ᐊᕐᓇᕐᓕ ᑖᓐᓇ ᐅᑕᖅᑭᔭᕆᐊᖃᕐᐳᖅ ᐅᓪᓗᓂᒃ 33ᓂᒃ ᓴᓗᒻᒪᕐᑎᑕᐅᕕᒃᓴᒥᓂᒃ ᐊᐅᓈᕐᓂᕐᒥᓂᑦ. ᑍᒤᑎᓪᓗᒍ ᐊᒃᑐᕐᓯᔭᕆᐊᖃᓐᖏᓚᖅ ᐃᑦᔪᕐᓁᑦᑐᓂᒃ ᐃᑦᔪᕐᓁᑦᑐᕕᖕᒧᐊᕆᐊᖃᕋᓂᓗ ᐅᓪᓗᖅ ᓴᓗᒻᒪᕐᓴᕐᑕᐅᕕᒃᓴᖓ ᓈᒻᒪᒃᓯᖅᑳᕐᑎᓐᓇᒍ.

⁵ “ᐸᓂᖕᒥᒡᓕ ᓄᑕᕋᕐᑖᕐᐸᑦ, ᐅᓪᓗᓂᒃ 14ᓂᒃ ᓴᓗᒤᑦᑑᓂᐊᕐᐳᖅ, ᓲᕐᓗᑦᑕᐅᖅ ᑕᖅᑭᑕᒫᑦ ᐊᐅᓈᕐᐸᖕᓂᕐᒥᑐᑦ. ᑭᖑᓂᖓᒍᓪᓗ ᐅᑕᖅᑭᔭᕆᐊᖃᕐᐳᖅ ᐅᓪᓗᓂᒃ 66ᓂᒃ ᓴᓗᒻᒪᕐᓴᕐᑕᐅᕕᒃᓴᒥᓂᒃ ᐊᐅᓈᕐᓂᕐᒥᓂᑦ.

⁶ “ᐊᕐᓇᐅᑉ ᓴᓗᒻᒪᕐᓴᕐᑕᐅᕕᖏᑦ ᐅᓪᓗᑦ ᓈᒃᐸᑕ, ᐃᕐᓂᕐᑖᓚᐅᕈᓂᓘᓐᓃᑦ ᐸᓂᒃᑖᓚᐅᕈᓂᓘᓐᓃᑦ, ᑐᓂᕐᕈᓯᕐᑎᑦᓯᔨᒧᑦ ᐋᑦᓯᔪᒃᓴᐅᕗᖅ ᑐᐱᕐᒧᑦ ᑲᑎᒪᕕᖕᒧᑦ, ᓰᐱᐅᑉ ᓄᕐᕋᖓᓂᒃ ᐊᕐᕌᒍᖃᕐᑐᒥᒃ ᐊᑕᐅᓯᕐᒥᒃ ᐃᑯᐊᓪᓚᓗᒍ ᑐᓂᕐᕈᑎᒃᓴᒥᒃ, ᐱᐊᕋᕕᓂᕐᒥᒡᓗ ᑎᖕᒥᐊᒥᒃ ᐱᑦᔭᓐᒥᒃ, ᐅᕝᕙᓗ ᑑᕕᒥᒃ ᐊᔪᕐᓂᖅ ᐱᓪᓗᒍ ᑐᓂᕐᕈᑎᒃᓴᒥᒃ.

⁷ ᑐᓂᕐᕈᓯᕐᑎᑦᓯᔨᐅᑉ ᑐᓂᕐᕈᑎᒋᔭᕆᐊᖃᕐᐰᑦ ᐊᑕᓂᕐᒧᑦ ᐊᕐᓇᖅ ᐃᓱᒪᒋᔪᓐᓁᕐᕕᐅᖁᓪᓗᒍ, ᑍᒫᒃ ᐊᕐᓇᖅ ᐃᓕᖅᑯᓯᖅ ᒪᓕᒡᓗᒍ ᓴᓗᒪᓂᕋᕐᑕᐅᓕᕐᓂᐊᕐᐳᖅ ᐊᐅᓈᕐᓂᕆᓚᐅᕐᑕᒥᓂᑦ. ᑕᒪᒃᑯᐊ ᑕᕝᕙ ᒪᓕᒊᑦ ᐊᕐᓇᖅ ᐃᕐᓂᓚᐅᕐᑎᓪᓗᒍ ᐃᕐᓂᕐᒥᒡᓘᓐᓃᑦ ᐸᓂᖕᒥᒡᓘᓐᓃᑦ.

⁸ “ᐊᕐᓇᕐᓕ ᑐᓂᕐᕈᑎᒃᓴᖃᖏᑉᐸᑦ ᓰᐱᐅᑉ ᓄᕐᕋᖓᓂᒃ, ᒪᕐᕉᖕᓂᒃ ᑑᕖᖕᓂᒃ ᐊᖅᑭᒡᒋᐅᔮᕐᑑᖕᓂᒃ, ᐱᑦᔭᓐᓂᒡᓘᓐᓃᑦ ᐱᐊᕋᕕᓃᖕᓂᒃ ᒪᕐᕉᖕᓂᒃ ᐋᑦᓯᔪᒃᓴᐅᕗᖅ, ᐱᖃᑖ ᐃᑯᐊᓪᓚᒡᓗᒍ ᑐᓂᕐᕈᑎᒃᓴᒥᒃ, ᐂᑉᐸᖓᓗ ᐊᔪᕐᓂᖅ ᐱᓪᓗᒍ ᑐᓂᕐᕈᑎᒃᓴᒥᒃ. ᑍᒫᒃ ᑐᓂᕐᕈᓯᕐᑎᑦᓯᔨᐅᑉ ᐃᓱᒪᒋᔪᓐᓁᕐᕕᐅᑎᓐᓂᐊᕐᐹ, ᓴᓗᒻᒪᕐᓂᐊᕐᐳᕐᓗ.”