ᒨᓯᓯ ᐱᖓᔪᖏᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦ

ᓂᕐᔪᑎᑦ ᓂᕆᔭᐅᔪᓐᓇᕐᑐᑦ

¹ ᐊᑕᓂᖅ ᐅᖃᕐᐳᖅ ᒨᓯᓯᒧᑦ ᐂᕉᓂᒧᓪᓗ,

² ᐃᓴᕆᐊᓕᒥᐅᑦ ᐅᖃᐅᑎᓯᒋᒃ: “ᓂᕐᔪᑎᓂᑦ ᓄᓇᒥᐅᑕᕐᓂᑦ ᐅᑯᐊ ᓂᕆᔪᓐᓇᕐᐸᓯ:

³ ᓂᕐᔪᑎᓕᒫᓂᒃ ᓂᕆᔪᓐᓇᕐᐳᓯ ᑯᑭᖃᕐᑐᓂᒃ ᒪᕐᕉᓕᖅᑲᖓᔪᓂᒃ ᐊᕕᒃᓯᒪᔪᓂᒃ ᑕᒧᓗᕋᐅᔭᕐᐸᒡᓗᑎᒡᓗ.

⁴ ᐱᑕᖃᕐᒥᖕᒪᑦ ᑕᒧᓗᕋᐅᔭᑐᐃᓐᓇᕐᐸᒃᑐᓂᒃ, ᐱᑕᖃᕆᓪᓗᓂᓗ ᑯᑭᖃᕐᑐᓂᒃ ᒪᕐᕉᓕᖅᑲᖓᔪᓂᒃ ᓇᓪᓕᐊᑦ ᑍᒤᑦᑐᑦ ᓂᕆᔭᒃᓴᕆᓐᖏᓚᓯ, ᐅᑯᐊ: ᑳᒥᓖᑦ ᑍᒤᑦᑐᑦ ᑕᒧᓗᕋᐅᔭᕐᐸᒃᑑᒐᓗᐊᑦ ᑯᑭᖏᓪᓕ ᕿᑎᖓᒍᑦ ᐊᕕᒃᓯᒪᖏᒻᒪᑕ, ᑍᒤᑦᑐᑦ ᓴᓗᒤᑦᑑᕗᑦ.

⁵ ᓂᕐᔪᑏᑦ ᐹᑦᔪᕐᒥᒃ ᐊᑎᖃᕐᑐᑦ ᑕᒧᓗᕋᐅᔭᕐᐸᖕᒥᖕᒪᑕ ᑯᑭᖃᕐᓗᑎᒡᓗ ᒪᕐᕉᓕᖅᑲᖓᖏᑦᑐᓂᒃ ᑍᒤᑦᑐᑦ ᓴᓗᒤᑦᑑᕗᑦ.

⁶ ᐅᑲᓖᓪᓗ ᑕᒧᓗᕋᐅᔭᕐᐸᖕᒥᔫᖓᓗᐊᑦ ᑯᑭᖃᕋᑎᒡᓗ ᒪᕐᕉᓕᖅᑲᖓᔪᓂᒃ ᑍᒤᑦᑐᑦ ᓴᓗᒤᑦᑑᕗᑦ.

⁷ ᑰᒃᑰᓰᑦ, ᑯᑭᖃᕐᑐᑦ ᒪᕐᕉᓕᖅᑲᖓᔪᓂᒃ ᑭᓯᐊᓂᓕ ᑕᒧᓗᕋᐅᔭᕐᐸᖏᒻᒪᑕ ᑕᒪᒃᑯᐊ ᓴᓗᒤᑦᑑᕗᑦ.

⁸ ᑍᒤᑦᑐᑦ ᓂᕿᖏᑦ ᓂᕿᒋᔭᒃᓴᕆᓐᖏᓚᓯ, ᑎᒥᖏᓪᓘᓐᓃᑦ ᑐᖁᖓᒃᐸᑕ ᐊᒃᑐᕆᐊᖃᓐᖏᓚᓯ; ᓴᓗᒤᒻᒪᑕ ᐃᓕᑦᓯᓐᓄᑦ.

⁹ “ᑕᕆᐅᕐᒥᐅᑕᓂᒡᓗ ᐆᒪᔪᓂᒃ ᑰᖕᒥᐅᑕᓂᒡᓗ, ᓂᕆᔪᓐᓇᕐᐳᓯ ᐸᐱᕈᖃᕐᐸᑕ ᐊᖒᑎᖃᕐᓗᑎᒃ ᑲᕕᓯᖃᕐᓗᑎᒡᓗ.

¹⁰ ᐆᒪᔪᓪᓕ ᑕᕆᐅᕐᒥᐅᑍᑦ ᑰᖕᒥᐅᑍᓪᓗ ᐸᐱᕈᖃᖏᑦᑐᑦ ᐊᖒᑎᖃᕋᑎᒡᓗ ᑲᕕᓯᖃᖏᑦᑐᑦ, ᑲᑎᒪᕙᒃᑐᑦ ᐃᒪᕐᒥᐅᑍᑦ ᐆᒪᔪᓪᓗ ᐃᒪᕐᒥᐅᑍᑦ, ᑍᒤᑦᑐᑦ ᐃᓕᑦᓯᓐᓄᑦ ᓇᕐᕈᓇᕐᐳᑦ.

¹¹ ᐃᓕᑦᓯᓐᓄᑦ ᓇᕐᕈᓇᕐᒪᑕ ᑕᒪᒃᑯᐊ ᓂᕆᔭᕆᐊᖃᓐᖏᓚᓯ, ᑐᖁᖓᒃᐸᑕᓗ ᑎᒥᖏᑦ ᐊᒃᑐᕆᐊᖃᓐᖏᓚᓯ ᓴᓗᒤᒻᒪᑕ ᐃᓕᑦᓯᓐᓄᑦ.

¹² ᐃᒪᕐᒥᐅᑍᑦ ᓱᓇᑐᐃᓐᓁᑦ ᐸᐱᕈᖃᖏᑦᑐᑦ ᐊᖒᑎᖃᕋᑎᒡᓗ ᑲᕕᓯᖃᕋᑎᒡᓗ ᐃᓕᑦᓯᓐᓄᑦ ᓇᖁᔭᕐᓇᕐᐳᑦ.

¹³ “ᑎᖕᒥᐊᑦ ᐃᓚᖏᑦ ᓂᕆᔭᕆᐊᖃᓐᖏᓚᓯ ᓇᕐᕈᓇᕐᒪᑕ ᐃᒤᑦᑐᑦ: ᓇᒃᑐᕋᓖᑦ, ᓇᒃᑐᕋᓕᐅᔮᕐᑐᓪᓗ ᑭᒡᒐᕕᐊᕐᔪᐃᓪᓗ,

¹⁴ ᑬᑦ, ᑭᒡᒐᕕᐊᕐᔪᐃᑦ ᑭᒡᒐᕕᐊᕐᔫᔮᕐᑐᓕᒫᓪᓗ,

¹⁵ ᑐᓗᒊᓪᓗ ᐊᑦᔨᑲᓴᓕᒫᖏᓪᓗ.

¹⁶ ᐅᓪᓚᒃᑏᓪᓗ ᑎᖕᒥᐊᑦ, ᓇᐅᔧᓪᓗ, ᕿᓐᓄᐊᔪᐊᓪᓗ,

¹⁷ ᐅᒃᐱᒡᔪᐊᓪᓗ ᐊᑦᔨᒌᖏᑦᑐᑦ, ᑕᑎᒡᒐᕐᔪᐊᖑᔮᕐᑐᓪᓗ,

¹⁸ ᐃᒪᕐᒥᐅᑍᓪᓗ ᑎᖕᒥᐊᑦ, ᓯᒡᒍᖕᒥᒍᓪᓗ ᐃᒃᐱᐊᕐᔪᓖᑦ ᐃᒪᕐᒥᐅᑍᑦ, ᑭᒡᒐᕕᐊᕐᔪᐃᓪᓗ ᐊᑦᔨᑲᓴᖏᑦ.

¹⁹ ᓂᐅᑯᑖᓖᓪᓗ, ᕼᐃᕌᓃᓪᓗ ᐊᑦᔨᐸᓱᖏᓪᓗ, ᕼᐅᐳᐃᑦ, ᐅᓐᓄᐊᕐᓯᐅᑏᓪᓗ ᐃᓴᕈᓖᑦ.

²⁰ “ᖁᐱᕐᕈᓪᓗ ᐃᓴᕈᓖᑦ ᐱᓱᒃᐸᒃᑐᑦ ᓯᑕᒪᓂᒃ ᓂᐅᖃᕐᓗᑎᒃ, ᑕᒪᒃᑯᐊ ᐃᓕᑦᓯᓐᓄᑦ ᓇᕐᕈᓇᕐᑑᕗᑦ.

²¹ ᐱᑕᖃᕆᕗᕐᓕ ᐃᓴᕈᖃᕐᑐᓂᒃ ᓯᑕᒪᓂᒡᓗ ᓂᐅᖃᕐᓗᑎᒃ ᐱᓱᓲᓂᒃ ᓂᕆᔪᓐᓇᕐᑕᑦᓯᓐᓂᒃ: ᓂᐅᒥᒃᑎᒍᑦ ᓇᒡᒍᐊᖃᕐᑐᓂᒃ ᐱᒡᓕᕐᑕᓲᓂᒡᓗ ᓄᓇᒥ.

²² ᐅᑯᓇᓐᖓᑦ ᓂᕆᔪᓐᓇᕐᐳᓯ, ᐱᒡᓕᕐᑕᐅᔮᕐᑐᓂᒃ, ᐊᑦᔨᑲᓴᖏᓐᓂᒡᓗ ᑳᑎᑎᑦᒥᒃ ᐊᑎᖃᕐᑐᓂᒃ, ᑯᕆᑭᓯᓂᒡᓗ, ᐱᒡᓕᕐᑕᓂᒡᓗ ᒍᕌᔅᕼᐋᐸᓂᒃ.

²³ ᑕᒪᒃᑯᐊᓕ ᐊᓯᖏᑦ ᒥᑭᔫᑏᑦ ᐃᓴᕈᓖᑦ ᖁᐱᕐᕈᐃᑦ ᓯᑕᒪᓂᒡᓗ ᓂᐅᖃᕐᑑᖓᓗᐊᑦ ᓇᕐᕈᓇᕐᓂᖏᓐᓂᒃ ᖃᐅᔨᒪᔭᒃᓴᕆᕙᓯ.

²⁴ “ᐃᓕᑦᓯᓐᓂᒃ ᓴᓗᒤᓕᕐᑎᑦᓱᓐᓇᕐᐳᓯ ᑕᒪᒃᑯᑎᒎᓇᖅ, ᑐᖁᖓᔪᒥᒡᓗ ᖁᐱᕐᕈᕐᒥᒃ ᑍᒤᑦᑐᒥᒃ ᐊᒃᑐᐃᔪᖅ ᓴᓗᒤᓕᓂᐊᕐᐳᖅ ᐅᓐᓄᒃ ᑎᑭᓪᓗᒍ.

²⁵ ᓇᓪᓕᐊᑦ ᑎᒍᓯᔪᖅ ᖁᐱᕐᕈᒥᒃ ᑐᖁᖓᔪᒥᒃ ᓇᕐᕈᓇᕐᑐᒥᒃ ᐊᓐᓄᕌᓂ ᐃᕐᕈᕐᑐᕆᐊᖃᕐᐰᑦ, ᓴᓗᒤᑦᑑᓂᐊᕐᐳᕐᓗ ᐅᓐᓄᒃ ᑎᑭᓪᓗᒍ.

²⁶ ᓂᕐᔪᑎᓕᒫᑦ ᑯᑭᖃᕐᑐᑦ ᒪᕐᕉᓕᖅᑲᖓᔪᓂᒃ ᑯᑭᖏᑦ ᐊᕕᒃᓯᒪᒻᒪᕆᖏᑦᑐᓂᒃ, ᑕᒧᓗᕋᐅᔭᕐᐸᖏᑦᑐᓪᓗ ᑕᒪᒃᑯᐊ ᐃᓕᑦᓯᓐᓄᑦ ᓴᓗᒤᑦᑑᕗᑦ: ᓇᓪᓕᐊᓪᓗ ᑍᒤᑦᑐᒥᒃ ᑐᖁᖓᔪᒥᒃ ᐊᒃᑐᐃᔪᖅ ᓴᓗᒤᑦᑑᓂᐊᕐᐳᖅ.

²⁷ ᓂᕐᔪᑏᑦ ᓯᑕᒪᓄᑦ ᐱᓱᒃᐸᒃᑐᑦ, ᐃᑎᒐᖕᒥᖕᓄᑦ ᐱᓱᒃᐸᒃᑐᑦ ᓴᓗᒤᑦᑐᐃᓐᓇᐅᕗᑦ ᐃᓕᑦᓯᓐᓄᑦ, ᑍᒤᑦᑐᒥᒡᓗ ᑐᖁᖓᔪᒥᒃ ᐊᒃᑐᐃᔪᖅ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ.

²⁸ ᓇᓪᓕᐊᑦ ᑍᒤᑦᑑᑉ ᑎᒥᖓᓂᒃ ᑐᖁᖓᔪᒥᒃ ᑎᒍᓯᔪᖅ ᐊᓐᓄᕌᓂ ᐃᕐᕈᕐᑐᕆᐊᖃᕐᐰᑦ, ᐅᓐᓄᒡᓗ ᑎᑭᓪᓗᒍ ᓴᓗᒤᑦᑑᓂᐊᕐᐳᖅ. ᑍᒤᑦᑐᑦ ᓴᓗᒤᑦᑑᖕᒪᑕ ᐃᓕᑦᓯᓐᓄᑦ.

²⁹ “ᓂᕐᔪᑎᑦᑕᐅᖅ ᓄᓇᒥᐅᑍᑦ ᓴᓗᒤᑦᑐᑦ ᐃᓕᑦᓯᓐᓄᑦ ᐃᒤᑦᑑᕗᑦ: ᑎᕆᐊᑦ, ᓄᓂᕙᒃᑬᑦ, ᐸᒥᐅᑯᑖᓖᓪᓗ ᑐᖑᔪᕐᑕᐅᓲᑦ ᓕᓴᕐᑦᒥᒃ ᐊᑎᓖᑦ ᐊᖏᔪᑦ,

³⁰ ᐊᑦᔨᖏᓪᓗ ᒥᑭᓐᓂᕐᓮᑦ, ᓄᓇᒥᓗ ᐹᕐᖑᕐᑐᑦ ᑯᕌᑲᑍᓕᒥᒃ ᐊᑎᓖᑦ, ᒥᑭᑦᑐᑯᓗᐃᓪᓗ ᐊᑦᔨᖏᑦ ᓱᒃᑲᓕᔪᑦ, ᐸᓂᕐᑐᒥᐅᑍᓪᓗ ᓕᓴᕐᑦᒥᒃ ᐊᑎᓖᑦ, ᑕᐅᑦᑐᖏᓪᓗ ᑕᕐᓴᖏᑦ ᐊᓯᑦᔨᓲᑦ ᑲᒦᓕᐊᓂᒥᒃ ᐊᑎᓖᑦ.

³¹ ᓄᓇᒥ ᐹᕐᖑᕐᑐᓂ ᑕᒪᒃᑯᐊ ᓴᓗᒤᑦᑑᖕᒪᑕ ᐃᓕᑦᓯᓐᓄᑦ, ᓇᓪᓕᐊᑦᑕ ᑐᖁᖓᑎᓪᓗᒋᑦ ᐊᒃᑐᕐᐸᒋᑦ, ᐊᒃᑐᐃᔪᖅ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ.

³² ᑖᒃᑯᐊᓗ ᓇᓪᓕᐊᑦ ᑐᖁᒃᐸᑦ ᑲᑕᒡᓗᓂᓗ, ᑐᕝᕕᒋᔭᖓ ᓱᓇᐅᒐᓗᐊᕐᐸᑦ ᓴᓗᒤᑦᑑᓂᐊᕐᐳᖅ, ᕿᔫᒃᐸᓪᓘᓐᓃᑦ, ᖃᓪᓗᓈᕐᑕᐅᒃᐸᒡᓘᓐᓃᑦ, ᐆᒪᔪᓪᓘᓐᓃᑦ ᐊᒥᕆᒃᐸᒍ, ᐃᒃᐱᐊᕐᔫᒃᐸᓪᓘᓐᓃᑦ, ᐃᒥᕐᒧᐊᕐᑕᐅᔪᒃᓴᐅᕗᖅ, ᓴᓗᒤᑦᑑᓂᐊᕐᐳᕐᓗ ᐅᓐᓄᒃ ᑎᑭᓪᓗᒍ, ᑭᖑᓂᖓᒍᑦ ᑕᕝᕙ ᓴᓗᒻᒪᕐᓂᐊᕐᐳᖅ.

³³ ᓇᓪᓕᐊᓪᓗ ᐆᒪᔪᖅ ᑍᒤᑦᑐᖅ ᐃᒪᖃᐅᑎᒧᑦ ᐅᔭᕋᖕᒧᑦ ᑲᑕᒡᓗᓂ ᑐᖁᒃᐸᑦ, ᐃᒪᖃᐅᑎᐅᑉ ᐃᓗᓕᒫᖓ ᓴᓗᒤᓕᓂᐊᕐᐳᖅ, ᐃᒪᖃᐅᑎᓗ ᑕᕝᕙ ᓯᖁᒥᑕᐅᔭᕆᐊᖃᓕᕐᐳᖅ.

³⁴ ᓂᖀᓪᓘᓐᓃᑦ ᓂᕿᒃᓮᑦ ᐃᒥᕐᒥᒃ ᑯᕕᕕᐅᒃᐸᑕ, ᐃᒪᖃᐅᑎᐅᑉ ᑍᒤᑦᑑᑉ ᐃᒪᖓᓄᑦ ᓴᓗᒤᓕᕗᑦ, ᐃᒥᕐᓗ ᐃᒪᕕᓂᖓ ᑕᕝᕙ ᓴᓗᒤᓕᕗᖅ.

³⁵ ᐆᒪᔪᑦ ᑖᒃᑯᐊ ᓇᓪᓕᐊᑦᑕ ᑲᑕᒡᕕᒋᔭᖓ ᓴᓗᒤᓕᕗᖅ: ᐃᒐᓘᓐᓃᑦ ᐃᒐᑦᔪᑎᓪᓘᓐᓃᑦ ᓱᓇᑐᐃᓐᓇᖅ ᑕᕝᕙ ᓯᖁᒥᑕᐅᔭᕆᐊᖃᓕᕐᐳᖅ, ᓴᓗᒤᑦᑑᓕᕐᒪᑕ, ᐃᓕᑦᓯᓗ ᓴᓗᒤᑦᑑᓂᖏᓐᓂᒃ ᐅᑦᔨᕈᓱᑦᓯᐊᕆᐊᖃᕐᐳᓯ.

³⁶ ᐃᒥᕐᓕ ᑰᒃᑐᖅ ᐃᒥᕐᑕᕐᕕᒡᓘᓐᓃᑦ ᑰᒡᕕᐅᔪᖅ ᑲᑕᒡᕕᐅᒐᓗᐊᕈᓂ ᓴᓗᒤᑦᑑᓕᕈᓐᓇᓐᖏᓚᖅ, ᐃᓄᐃᓪᓕ ᓇᓪᓕᐊᑦ ᐆᒪᔪᒥᒃ ᑍᒤᑦᑐᒥᒃ ᐊᒃᑐᐃᔪᖅ ᑖᓐᓇ ᓴᓗᒤᓕᕗᖅ.

³⁷ ᐆᒪᔪᕐᓕ ᑐᖁᖓᔪᖅ ᑲᑕᒃᐸᑦ ᐱᕈᕐᓯᐊᒃᓴᓄᑦ ᐃᓕᐅᕋᕐᑕᐅᔪᒃᓴᓄᑦ, ᑖᒃᑯᐊ ᓴᓗᒤᓕᕈᓐᓇᓐᖏᓚᑦ.

³⁸ ᐱᕈᕐᓯᐊᒃᓮᓪᓕ ᐃᒻᒥᕐᑕᐅᒃᐸᑕ ᐆᒪᔪᕐᓗ ᑐᖁᖓᔪᖅ ᐃᓗᐊᓄᑦ ᑲᑕᒃᐸᑦ, ᑕᕝᕙ ᑍᒤᑦᑐᖅ ᓴᓗᒤᑦᑑᓕᕐᐳᖅ ᐃᓕᑦᓯᓐᓄᑦ.

³⁹ “ᓂᕐᔪᑎᓪᓕ ᓂᕆᔪᓐᓇᕐᑕᓯ ᑐᖁᒃᐸᑦ, ᓇᓪᓕᐊᑦ ᑖᑦᓱᒥᖓ ᐊᒃᑐᐃᔪᖅ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ.

⁴⁰ ᓇᓪᓕᐊᓪᓗ ᓂᕆᔪᖅ ᑖᑦᓱᒪ ᐃᓚᖓᓂᒃ ᐊᓐᓄᕌᓂ ᐃᕐᕈᕐᑐᕆᐊᖃᕐᐰᑦ, ᓴᓗᒤᑦᑑᓂᐊᕐᐳᕐᓗ ᐅᓐᓄᒃ ᑎᑭᓪᓗᒍ. ᓇᓪᓕᐊᓪᓗ ᑐᖁᖓᔪᒥᒃ ᑖᑦᓱᒥᖓ ᐊᒡᔭᕐᓯᔪᖅ ᐊᓐᓄᕌᓂ ᐃᕐᕈᕐᑐᕆᐊᖃᕐᐰᑦ, ᓴᓗᒤᑦᑑᓂᐊᕐᐳᕐᓗ ᐅᓐᓄᒃ ᑎᑭᓪᓗᒍ.

⁴¹ “ᐆᒪᔪᐃᑦ ᒥᑭᔪᑦ ᓄᓇᒥ ᐹᕐᖑᕐᑐᓕᒫᑦ ᐃᑦᔪᕐᓇᕐᐳᑦ; ᓂᕆᔭᐅᔭᕆᐊᖃᕋᑎᒡᓗ.

⁴² ᓂᕆᔭᕆᐊᖃᓐᖏᓚᓯ ᐆᒪᔪᒥᒃ ᓄᓇᒥ ᐹᕐᖑᕐᑐᒥᒃ, ᓈᕐᒥᓄᓪᓘᓐᓃᑦ ᐹᕐᖑᕐᑎᐅᒃᐸᑦ, ᓯᑕᒪᓄᓪᓘᓐᓃᑦ ᐱᓱᒃᑎᐅᒃᐸᑦ, ᐅᓄᕐᑐᓂᒡᓗ ᐃᑎᒐᖃᕐᐸᑦ: ᑍᒤᑦᑐᑦ ᐃᑦᔪᕐᓇᕐᐳᑦ.

⁴³ ᐆᒪᔪᓄᑦ ᑍᒤᑦᑐᓄᑦ ᐃᓕᑦᓯᓐᓂᒃ ᐃᑦᔪᕐᓇᕐᓯᑎᓐᓂᐊᕋᓯ. ᐃᓕᑦᓯᓐᓂᒃ ᓴᓗᒤᓕᕐᑎᓐᓂᐊᕋᓯ ᑕᒪᒃᑯᐊ ᐱᑦᔪᑎᒋᓗᒋᑦ, ᑕᒪᒃᑯᓄᖓᓘᓐᓃᑦ ᓴᓗᒤᓕᕐᑎᑕᐅᓂᐊᕋᓯ.

⁴⁴ ᐊᑕᓂᐅᒐᒪ ᒎᑎᓯ; ᐃᓕᑦᓯᓐᓂᒃ ᑐᓂᓕᕆᑦᓯ ᐃᑦᔪᕐᓁᓕᕐᓗᓯᓗ, ᐅᕙᖓ ᐃᑦᔪᕐᓁᓐᓇᒪ. ᐃᓕᑦᓯᓐᓂᒃ ᓴᓗᒤᓕᕐᑎᓐᓂᐊᕋᓯ ᐆᒪᔪᐃᑦ ᐹᕐᖑᕐᑐᑦ ᓄᓇᒥ ᐱᑦᔪᑎᒋᓗᒋᑦ.

⁴⁵ ᐅᕙᖓ ᐊᑕᓂᐅᒐᒪ ᐄᑦᔨᑉᑎᒥᑦ ᐃᓕᑦᓯᓐᓂᒃ ᐊᐅᓪᓚᕐᑎᑦᓯᓚᐅᕐᑐᖅ ᐃᓕᑦᓯᓐᓄᑦ ᒎᑎᒋᔭᐅᔪᒪᓪᓗᖓ; ᑍᒤᒻᒪᑦ ᐃᑦᔪᕐᓁᒋᑦᓯ, ᐅᕙᖓ ᐃᑦᔪᕐᓁᓐᓇᒪ.

⁴⁶ “ᑖᒃᑯᐊ ᑕᕝᕙ ᐱᖁᔧᑦ ᓂᕐᔪᑎᑦ, ᑎᖕᒥᐊᓪᓗ, ᐃᒪᕐᒥᐅᑍᓪᓗ, ᓄᓇᒥᐅᑍᓪᓗ ᐱᓪᓗᒋᑦ.

⁴⁷ ᐅᑦᔨᕐᓱᑦᓯᐊᕆᐊᖃᕐᐳᓯ ᓇᓪᓕᐊᑦ ᓴᓗᒤᑦᑑᖕᒪᖔᑕ ᓇᓪᓕᐊᓪᓗ ᓴᓗᒪᖕᒪᖔᑕ, ᓇᓪᓕᐊᓪᓗ ᐆᒪᔪᑦ ᓂᕆᔭᐅᔭᕆᐊᖃᕐᒪᖔᑕ, ᓇᓪᓕᐊᓪᓗ ᓂᕆᔭᐅᔭᕆᐊᖃᖏᒻᒪᖔᑕ.”