ᒨᓯᓯ ᐱᖓᔪᖏᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

ᓁᑕᐱᐅᑉ ᐊᐱᕼᐅᓪᓗ ᐊᔪᕐᑐᓕᓂᖓᒃ

¹ ᐂᕉᓂᐅᓪᓗ ᐃᕐᓂᖏᒃ ᓁᑖᑉ ᐊᒻᒪᓗ ᐊᐱᕼᐅ ᐃᓯᕐᓗᐊᕐᓂᑎᑦᓯᑦᔪᑎᑎᒃ ᑎᒍᕔᑦ, ᐃᑭᓪᓗᒋᓪᓗ ᑎᐱᑦᓯᐊᕆᒃᑐᒥᒃ ᐃᓐᓴᓐᓯᒥᒃ ᐃᓗᓪᓕᕐᓗᒋᑦ; ᑐᓂᕐᕈᓯᕐᐳᒡᓗ ᐃᑯᒪᔪᒥᒃ ᐊᑕᓂᕐᒧᑦ, ᑍᒫᒃ ᐱᖁᔭᐅᓯᒪᓇᑎᒃ.

² ᐃᑯᒪᓗ ᐊᓂᕗᖅ ᐊᑕᓂᐅᑉ ᓇᔪᒐᖓᓂᑦ ᐃᓅᒃ ᑖᒃᑯᐊᒃ ᓄᖑᓪᓗᒋᒃ, ᑖᒃᑯᐊᒃ ᑐᖁᕘᒃ ᐊᑕᓂᐅᑉ ᓵᖓᓂ.

³ ᑕᕝᕙ ᒨᓯᓯᐅᑉ ᐂᕉᓂ ᐅᖃᐅᑎᕚ, “ᑕᒪᑦᔭ ᐊᑕᓂᐅᑉ ᐅᖃᐅᓯᕆᓚᐅᕐᑕᖓ ᐅᖃᕋᒥ; ‘ᐅᕙᓐᓄᑦ ᖃᒡᓕᔪᓄᑦ ᐃᑦᔪᕐᓁᓐᓂᓐᓂᒃ ᓇᓗᓁᕐᓯᓂᐊᕐᐳᖓ; ᐃᓄᐃᑦ ᑕᒃᑯᐊᓐᓂ ᐅᐱᒋᔭᐅᓂᐊᕐᐳᖓ.’” ᐂᕉᓂᓗ ᓂᓪᓕᓐᖏᓚᖅ.

⁴ ᒨᓯᓯᐅᑉ ᒥᓮᐅᓪ ᐃᐅᓪᓴᕚᓐᓗ ᕾᖁᕚᒃ ᐊᑦᔧᐆᑉ ᐃᕐᓂᖏᒃ ᐂᕉᓂᐅᑉ ᐊᒃᑲᖓᑕ ᐅᖃᐅᑎᓪᓗᒋᒃ, “ᕾᒋᑦᓯᒃ ᖃᑕᓐᖑᑎᓯᓗ ᐅᑯᐊᒃ ᓄᓇᓖᑦ ᓯᓚᑖᓄᐊᓚᐅᕐᓯᒋᒃ ᐃᑦᔪᕐᓁᑦᑐᕕᐅᑉ ᓵᖓᓂᑦ.”

⁵ ᑖᒃᑯᐊᒡᓗ ᕾᕘᒃ ᐊᒡᔭᕐᓗᒋᒡᓗ ᑐᓂᕐᕈᓯᕐᑎᑦᓯᔨᓯᐅᑎᓂᒃ ᐊᓐᓄᕌᕐᓯᒪᑎᓪᓗᒋᒃ, ᓄᓇᓖᑦ ᓯᓚᑖᓄᑦ ᐊᒡᔭᕐᐹᑦ, ᒨᓯᓯᐅᑉ ᐱᖁᔨᓂᖓ ᒪᓕᒡᓗᒍ.

⁶ ᒨᓯᓯᓗ ᐅᖃᕆᕗᖅ ᐂᕉᓂᒧᑦ ᐃᕐᓂᖏᓐᓄᓪᓗ ᐃᓕᓯᕆᒧᑦ ᐃᑕᒫᕐᒧᓪᓗ, “ᓄᔭᓯ ᐃᓪᓔᕐᓯᒪᔪᓐᓃᕐᑎᓐᓂᐊᕋᓯᒋᒃ, ᐊᓐᓄᕌᓯᓗ ᐊᓕᖕᓂᐊᕐᓇᒋᑦ, ᑍᒤᓕᐅᕈᑦᓯ ᑐᖁᓂᐊᕆᕗᓯᒃ ᐊᑕᓂᕐᓗ ᓂᓐᖓᐅᒪᓂᐊᕐᐳᖅ ᓄᓇᓕᖕᓄᑦ ᑖᒃᑯᓄᖓ. ᐃᓚᓯᓕ ᐃᓴᕆᐊᓕᒥᐅᓪᓗ ᕿᒃᓵᒍᓐᓇᕐᐳᑦ ᐊᑕᓂᐅᑉ ᐃᑯᒪᒧᑦ ᑐᖁᑕᖏᑦ ᐱᑦᔪᑎᒋᓗᒋᑦ.

⁷ ᑐᐱᐅᑉ ᑲᑎᒪᕕᐅᑉ ᐃᑎᕐᑕᕐᕕᖓ ᕿᒪᒃᑍᓕᓯᐅᒃ, ᑐᖁᖁᓇᓯᒃ, ᐊᑕᓂᐅᑉ ᐅᕐᓱᖅ ᒥᖑᐊᕈᑎᖓ ᐃᓕᑦᓯᓐᓃᒻᒪᑦ.” ᑖᒃᑯᐊᒡᓗ ᒨᓯᓯᐅᑉ ᐅᖃᐅᓯᕆᔭᖓ ᒪᓕᒡᓗᒍ ᑍᒤᓕᐅᕐᐳᑦ.

ᒪᓕᒊᑦ ᑐᓂᕐᕈᓯᕐᑎᑦᓯᔩᑦ ᐱᓪᓗᒋᑦ

⁸ ᐊᑕᓂᐅᑉ ᐂᕉᓂ ᐅᖃᐅᑎᕚ,

⁹ “ᐃᕝᕕᑦ ᐃᕐᓂᑎᓪᓗ ᕔᓂᒥᒃ ᐃᒥᕆᐊᖃᓐᖏᓚᓯ, ᐊᓯᐊᓂᒡᓘᓐᓃᑦ ᐃᒥᐊᓗᓕᐊᕆᓯᒪᔪᒥᒃ ᐃᒥᕆᐊᖃᓐᖏᓚᓯ ᑐᐱᐅᑉ ᑲᑎᒪᕕᐅᑉ ᐃᓗᐊᓃᑎᓪᓗᓯ, ᑍᒤᓕᐅᕈᑦᓯ ᑐᖁᔪᒫᕐᐳᓯ, ᑕᒪᓐᓇ ᒪᓕᒐᐅᓂᐊᕐᐳᖅ ᑭᖑᕚᒃᓴᑦᓯᓐᓄᑦ.

¹⁰ “ᓇᓗᓁᕐᓯᑦᓯᐊᕆᐊᖃᕐᐳᓯ ᐃᑦᔪᕐᓁᑦᑐᒥᒃ, ᐃᑦᔪᕐᓁᑦᑑᖏᑦᑐᒥᒡᓗ ᐃᓄᑐᐃᓐᓇᕐᓯᐅᑎᒥᒃ, ᓴᓗᒤᑦᑐᒥᒃ, ᓴᓗᒪᔪᒥᒡᓗ.

¹¹ ᐃᓴᕆᐊᓕᒥᐅᓕᒫᑦ ᐃᓕᓐᓂᐊᕐᑎᑦᓴᕆᐊᖃᕐᐸᓯ ᐊᑕᓂᐅᑉ ᐱᖁᔭᖏᓐᓂᒃ ᒨᓯᓯᒃᑯᑦ ᑐᓂᔭᖏᓐᓂᒃ.”

¹² ᒨᓯᓯᓗ ᐅᖃᕆᕗᖅ ᐂᕉᓂᒧᑦ ᐃᕐᓂᖏᓐᓄᓪᓗ ᐃᓕᓯᕆᒧᑦ ᐃᑕᒫᕐᒧᓪᓗ ᐊᒥᐊᒃᑰᔫᖕᓄᑦ, “ᑎᒍᓯᓕᕆᑦᓯ ᓂᐊᖂᔭᒥᒃ ᑐᓂᕐᕈᑕᐅᓯᒪᔪᒥᒃ ᑐᓂᕐᕈᑎᓂᒃ ᐊᑕᓂᕐᒧᑦ ᐃᑯᐊᓪᓚᒃᑕᐅᓗᑎᒃ ᑐᓂᕐᕈᑎᕕᓂᕐᒥᒃ ᓴᓇᓯᒪᔪᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᓂᕆᓗᒍᓗ ᑐᓂᕐᕈᓯᕐᕕᐅᑉ ᓴᓂᐊᓂ, ᑖᓐᓇ ᐃᑦᔪᕐᓁᓐᓂᕐᐹᖑᖕᒪᑦ.

¹³ ᑖᓐᓇ ᓂᕆᓯᐅᒃ ᐃᑦᔪᕐᓁᑦᑑᑉ ᐃᓂᖓᓂ ᑖᓐᓇ ᓂᕿᒃᓴᕆᒐᕕᐅᒃ ᐃᕐᓂᕐᐱᓪᓗ ᓂᕿᒃᓴᕆᖕᒪᑦᔪᒃ ᑖᒃᑯᓇᓐᖓᑦ ᑐᓂᕐᕈᑎᓂᒃ ᐃᑯᐊᓪᓚᒃᑕᐅᓯᒪᔪᓂᒃ ᐊᑕᓂᕐᒧᑦ ᐃᓕᖓᖕᒪᑦ; ᑍᒫᒃ ᑕᕝᕙ ᐱᖁᕙᑦᓯ.

¹⁴ ᑭᓯᐊᓂᓕ ᐆᒪᔫᑉ ᓴᑭᐊᖏᓐᓂᒃ ᐃᕝᕕᓪᓗ ᐃᕐᓂᑎᓪᓗ ᐸᓂᒃᑎᓪᓗ ᐊᐅᓪᓚᕐᑎᑕᐅᓪᓗᓂ ᑐᓂᕐᕈᑕᐅᓯᒪᔪᖅ ᒥᒥᖏᒡᓗ ᑐᓂᕐᕈᑕᐅᓯᒪᔪᖅ ᓂᕆᔭᒃᓴᕆᕙᓯ, ᑖᒃᑯᐊ ᓂᕆᓯᐅᒃ ᐅᒃᐱᕐᓂᐅᑉ ᐃᓕᖅᑯᓯᖓᑕ ᐃᑦᔪᕐᓁᓐᓂᕋᕐᑕᖓᓃᓪᓗᓯ ᑖᒃᑯᐊ ᑐᓂᔭᐅᖕᒪᑕ ᐃᓕᖕᓄᑦ ᕿᑐᕐᖓᕐᓄᓪᓗ ᐃᓴᕆᐊᓕᒥᐅᑦ ᑐᓂᕐᕈᑎᖏᓐᓂᑦ ᐱᔪᑦ.

¹⁵ ᒥᒥᖅ ᑐᓂᕐᕈᑕᐅᓯᒪᔪᖅ ᓴᑭᐊᒡᓗ ᐊᐅᓪᓚᕐᑎᑕᐅᓗᓂ ᑐᓂᕐᕈᑕᐅᓯᒪᔪᖅ ᐃᓚᖃᕐᓗᓂ ᑐᓐᓄᕐᓂᒃ ᐃᑯᐊᓚᑦᓯᓂᒃᑯᑦ ᑐᓂᕐᕈᑕᐅᓯᒪᔪᓂᒃ, ᐊᐅᓪᓚᕐᑎᑕᐅᓗᑎᒃ ᑐᓂᕐᕈᑎᒃᓮᑦ ᐊᑕᓂᕐᒧᑦ. ᑖᒃᑯᐊ ᑕᕝᕙ ᐃᕝᕕᑦ ᐱᑖᕆᔭᕆᐊᖃᕐᑕᑎᑦ ᕿᑐᕐᖓᕐᓄᓪᓗ, ᐊᑕᓂᖅ ᑍᒫᒃ ᐱᖁᔨᓚᐅᕐᒪᑦ.”

¹⁶ ᒨᓯᓯᓗ ᐊᐱᖅᑯᑎᖃᕐᒪᑦ ᒎᑦᓯᒥᒃ ᐊᔪᕐᓃᑦ ᐱᓪᓗᒋᑦ ᑐᓂᕐᕈᑕᐅᓯᒪᔪᒥᒃ ᖃᐅᔨᑎᑕᐅᓪᓗᓂᓗ ᐃᑯᐊᓪᓚᒃᑕᐅᔪᕕᓂᐅᖕᒪᑦ, ᐃᓕᓯᕆᓗ ᐃᑕᒫᕐᓗ ᓂᓐᖓᒡᕕᒋᕔᑦ, ᐂᕉᓂᐅᑉ ᐃᕐᓂᖏᒃ ᐊᒥᐊᒃᑰᒃ, ᐊᐱᕆᓪᓗᒋᒡᓗ,

¹⁷ “ᓱᖕᒪᑦ ᐊᔪᕐᓂᖅ ᐱᓪᓗᒍ ᑐᓂᕐᕈᑎᕕᓂᖅ ᓂᕆᓚᐅᖏᑉᐱᓯᒃᑰᒃ ᐃᑦᔪᕐᓁᑦᑐᕕᐅᑉ ᐃᓚᖓᓂ? ᐃᑦᔪᕐᓁᓐᓂᕐᐹᖑᖕᒪᑦ; ᐃᓕᑦᓯᖕᓄᑦ ᑐᓂᔭᐅᓚᐅᕐᑐᖅ ᐃᓄᐃᑦ ᓄᓇᖅᑲᑎᒌᑦ ᐸᓯᔭᒃᓴᐅᓂᖏᑦ ᐲᕐᑕᐅᖁᓪᓗᒋᑦ ᐃᓱᒪᒋᔪᓐᓁᕐᕕᐅᖁᓪᓗᒋᑦ ᐊᑕᓂᐅᑉ ᓵᖓᓂ.

¹⁸ ᐊᐅᖓ ᐋᑕᐅᓚᐅᖏᒻᒪᑦ ᐃᑦᔪᕐᓁᑦᑐᕕᖕᒧᑦ, ᑍᒤᒻᒪᑦ ᐃᑦᔪᕐᓁᑦᑐᕕᐅᑉ ᖃᓂᒋᔭᖓᓂ ᓂᕆᔭᕆᐊᖃᓚᐅᕐᐸᓯ, ᐱᖁᔨᓂᕋ ᒪᓕᒡᓗᒍ.”

¹⁹ ᐂᕉᓂᓗ ᑭᐅᕗᖅ ᒨᓯᓯᒧᑦ, “ᐅᓪᓗᒥ ᐃᓄᐃᑦ ᐊᔪᕐᓂᑎᒃ ᐱᓪᓗᒍ ᑐᓂᕐᕈᓯᕐᐳᑦ ᐃᑯᐊᓪᓚᒋᐊᓕᖕᓂᒡᓗ ᑐᓂᕐᕈᓯᕐᐳᑦ ᐊᑕᓂᕐᒧᑦ; ᑭᓯᐊᓂᓕ ᐅᕙᓐᓄᑦ ᑕᒪᓐᓇ ᐃᓱᒪᔮᕐᓇᕐᑐᖅ ᑎᑭᑉᐳᖅ! ᐅᓪᓗᒥ ᓂᕆᓚᐅᕈᒪ ᐊᔪᕐᓂᖅ ᐱᓪᓗᒍ ᑐᓂᕐᕈᑎᕕᓂᕐᒥᑦ, ᐊᑕᓂᐅᑉ ᑕᒪᓐᓇ ᓈᒻᒪᒋᒐᔭᕐᐸᐅᒃ?”

²⁰ ᒨᓯᓯ ᑕᒪᑐᒥᖓ ᑐᓴᕋᒥ ᓈᒻᒪᒃᓴᓕᕐᐳᖅ.